1. ¿Chuqui an qʼuextʌyi ti yan tac bʌ país ti jiñi jabil tac ñumen bʌ tilel?

TI WAJALI, yonlel wiñicob xʼixicob (quixtañujob) añob i ñopbal. Pero ili jabil ñumen bʌ tilel tsaʼ qʼuextʌyi. Ñumen añix quixtañujob maʼañic bʌ i ñopbal. Pero an país tac baqui jiñi quixtañujob miʼ yʌlob chaʼan mach ochemobic ti jumpʼejl ñopbalʌl * (Mt. 24:12).

2. ¿Chucoch ñumen añix quixtañujob maʼañobic bʌ i ñopbal?

² ¿Chucoch ñumen añix quixtañujob maʼañobic bʌ i ñopbal? * Come an quixtañujob mucʼ jach bʌ i sʌclañob chuqui yomob tiʼ cuxtʌlel o jin jach miʼ qʼuelob i wocol tac (Lc. 8:14). Yambʌlob tsaʼix i cʌyʌyob i ñop Dios. Cheʼ jaʼel, an mucʼʌch bʌ i ñopob Dios, pero miʼ ñaʼtañob chaʼan mach cʼʌñʌlix cheʼ ochemob ti jumpʼejl ñopbalʌl i chaʼan maʼañic miʼ taj i bʌ yicʼot jiñi ciencia yicʼot jiñi sujmlel. Tajol miʼ subentelob tiʼ maestrojob, tiʼ yamigojob o muʼ bʌ i ñumelob yaʼ ti televisión chaʼan tilemonla bajcheʼ evolución. Pero maʼañic miʼ wen ñʌchʼtañob jiñi i sujmlel chaʼan añʌch Dios. An yambʌlob tsʼaʼ bʌ miʼ qʼuelob cheʼ jiñi ñucoʼ bʌ i yeʼtel ti ñopbalʌl tac yomob jach i taj i pʼʌtʌlel yicʼot taqʼuin. I ti yan tac bʌ parte, jiñi yumʌlob miʼ mʌctañob chuqui miʼ melob jiñi ñopbalʌl tac.

3. ¿Chuqui la com laj cʌn ti ili temaj?

³ Jesús tiʼ subeyonla chaʼan mi lac ‹sutqʼuin ti xcʌntʼañob winicob xʼixicob tiʼ pejtelel pañimil› (Mt. 28:19). ¿Bajcheʼ miʼ mejlel laj coltan jiñi maʼañobic bʌ i ñopbal chaʼan miʼ cʼotel i cʼuxbiñob Dios i miʼ sujtelob ti xcʌntʼan i chaʼan Cristo? Yom mi lac ñaʼtan chaʼan jiñi quixtañujob mach junlajalic mi caj i jacʼob jiñi wen tʼan come qʼuexel baqui tsaʼ coliyob. Jumpʼejl ejemplo, jiñi tsaʼ bʌ coliyob ti Europa mach lajalic mi caj i jacʼob bajcheʼ jiñi tsaʼ bʌ coliyob ti Asia. Yaʼ ti Europa, yonlel quixtañujob yujilobʌch i chaʼan bʌ Biblia  yicʼot an i yubiyob chaʼan Dios jiñʌch tsaʼ bʌ i mele (pʌtʌ) pejtelel chuqui tac an. Pero ti Asia, yonlel quixtañujob mach i cʌñʌyob o tsʼitaʼ jach i chaʼan bʌ Biblia i tajol maʼañic miʼ chʼujbiñob chaʼan Dios jiñʌch tsaʼ bʌ i meleyonla. Ti ili temaj, la com laj cʌn bajcheʼ miʼ mejlel laj coltañob jiñi quixtañujob muʼ bʌ lac subeñob jiñi wen tʼan, mach yʌlʌyic baqui tsaʼ coliyob o chuqui miʼ ñopob.

4. ¿Chucoch miʼ mejlel lac ñaʼtan chuqui wen tiʼ tojlel jiñi quixtañujob?

⁴ Laʼ lac ñaʼtan chuqui wen tiʼ tojlel jiñi quixtañujob. Ti jujumpʼejl jab, miʼ sujtelob tiʼ testigojob Jehová jiñi mach bʌ añobic i ñopbal. Cabʌlob weñob i melbal (chaʼlebal) i maʼañic tsiʼ mulayob i qʼuel cheʼ jiñi ñopbalʌl tac mucʼ jach i chaʼleñob lot, pero an yambʌlob mach bʌ weñobic i melbal ti ñaxan. Yonlel tsiʼ cʌyʌ i melob mach tac bʌ weñic. Tiʼ coltaya Jehová, miʼ mejlel lac taj jiñi quixtañujob utsoʼ bʌ i pusicʼal chaʼan miʼ tajob jiñi i cuxtʌlel mach añic i jilibal (Hch. 13:48; 1 Ti. 2:3, 4).

5. ¿Chucoch an quixtañujob weñʌch bʌ miʼ jacʼob cheʼ mi lac subeñob jiñi wen tʼan?

⁵ Laʼ lac pʌs la cutslel i laʼ lac ñaʼtan bajcheʼ mi caj lac pejcañob. Ti bele ora jiñi quixtañujob weñʌch miʼ jacʼob cheʼ mi lac subeñob jiñi wen tʼan, pero mach chaʼañic chuqui mi lac subeñob, chaʼañʌch bajcheʼ mi lac subeñob. Miʼ mulañob cheʼ uts mi lac pejcañob, cheʼ mi laj cʼʌn wen tac bʌ tʼan yicʼot cheʼ mi lac pʌs chaʼan lac wentajobʌch. Maʼañic mi lac wersa xicʼob chaʼan miʼ ñʌchʼtañoñobla. Cojach mi lac chaʼlen wersa lac ñaʼtan bajcheʼ yilal miʼ qʼuelob jiñi ñopbalʌl tac i chucoch cheʼ miʼ ñaʼtañob. An maʼañic bʌ miʼ mulañob i tajob ti tʼan i chaʼan bʌ ñopbalʌl yicʼotob jiñi mach bʌ i cʌñʌyob. An muʼ bʌ i ñaʼtañob chaʼan mach tojic cheʼ mi laj cʼajtiben juntiquil quixtañu i chaʼan tac bʌ Dios. I yambʌlob miʼ quisñiñob cheʼ miʼ qʼuejlelob chaʼan woli (choncol) i pejcañob jiñi Biblia, ñumento cheʼ yicʼot juntiquil i testigo Jehová. Jin chaʼan, la com laj qʼuel ti ñuc bajcheʼ miʼ yubiñob i bʌ (2 Ti. 2:24).

6. ¿Bajcheʼ tsiʼ pʌsʌ jiñi apóstol Pablo chaʼan miʼ chʼʌm ti ñuc jiñi quixtañujob, i chuqui miʼ mejlel lac mel chaʼan mi lac lajin i melbal?

⁶ ¿Chuqui miʼ mejlel lac mel cheʼ an maʼañic bʌ miʼ mulan cheʼ woli (yʌquel) la cʌl i chaʼan bʌ Biblia, jiñi melbil tac bʌ, i chaʼan bʌ Dios o jiñi ñopbal? Yom mi laj qʼuextan chuqui mi caj la cʌl cheʼ bajcheʼ tsiʼ mele jiñi apóstol Pablo. Cheʼ bʌ tiʼ sube wen tʼan jiñi judíojob, tsiʼ cʼʌñʌ jiñi Tsʼijbujel chaʼan miʼ tsictesʌbeñob. Pero maʼañic tsiʼ waʼ taja ti tʼan cheʼ bʌ tsiʼ pejca jiñi filósofojob yaʼ ti Areópago, ti Grecia (Hch. 17:2, 3, 22-31). ¿Bajcheʼ miʼ mejlel lac lajin tsaʼ bʌ i mele? Cheʼ woli lac pejcan juntiquil quixtañu maʼañic bʌ miʼ ñop i chaʼan bʌ Biblia, wen cheʼ maʼañic mi lac waʼ taj ti tʼan. Mi tsaʼ laj qʼuele chaʼan mach yomic chaʼan miʼ qʼuejlel cheʼ woliʼ pejcan jiñi Biblia yicʼotonla, laʼ lac mucu pʌsben texto tac ti lac celular o yan tac bʌ.

7. Cheʼ bajcheʼ miʼ yʌl 1 Corintios 9:20-23, ¿chuqui tajol mi caj lac mel chaʼan mi lac lajiben i melbal Pablo?

⁷ La lac chʼʌmben i sujm chuqui miʼ ñaʼtañob jiñi quixtañujob i la lac ñʌchʼtan. Yom mi lac chaʼlen wersa chaʼan mi lac chʼʌmben i sujm chucoch jiñi quixtañujob qʼuexelob i pensar (Pr. 20:5). Laʼ lac chaʼ ñaʼtan tiʼ tojlel jiñi Pablo. Come juntiquilʌch judío tajol tsiʼ qʼuexta bajcheʼ miʼ suben wen tʼan jiñi gentilob, mach bʌ yujilobic o tsʼitaʼ jach i chaʼan bʌ Jehová yicʼot jiñi Tsʼijbujel. Cheʼ jeʼel, mi la com lac chʼʌmben i sujm chuqui miʼ ñaʼtañob yicʼot bajcheʼ miʼ yubiñob i bʌ jiñi quixtañujob yaʼ baqui mi lac chaʼlen subtʼan, tajol yom mi lac sʌclan ti lac jun tac chuqui yom mi lac mel o mi laj cʼajtiben i coltaya juntiquil hermano añix bʌ i mele jiñi (pejcan 1 Corintios 9:20-23).

8. ¿Bajcheʼ miʼ mejlel lac tech lac subeñob i chaʼan bʌ Biblia jiñi quixtañujob?

⁸ La com lac taj jiñi quixtañujob yomoʼ bʌ i ñʌchʼtan jiñi wen tʼan (Mt. 10:11). Chaʼan mi  lac tajob, laʼ lac melbeñob cʼajtiya tac chaʼan miʼ yʌlob chuqui miʼ ñaʼtañob yicʼot laʼ lac wen ñʌchʼtañob. Juntiquil hermano chʼoyol bʌ ti Inglaterra miʼ cʼajtiben jiñi quixtañujob chuqui yom miʼ mejlel chaʼan an tijicñʌyel ti lac ñujpuñel, chaʼan wen cʌntesʌbil jiñi la calobilob o bajcheʼ miʼ mejlel lac lʌtʼ i melol mach bʌ tojic. Ti wiʼil, cheʼ bʌ tsaʼix i jacʼʌ jiñi quixtañu, miʼ cʼajtiben: «¿Bajcheʼ maʼ qʼuel ili ticʼojel añix bʌ tsʼijbunti cheʼ bʌ 2 mil jab?». Cheʼ jiñi, miʼ pʌsben tiʼ celular chaʼpʼejl uxpʼejl texto chaʼan maʼañic miʼ waʼ locʼsan jiñi Biblia.

9. ¿Bajcheʼ miʼ mejlel laj coltan jiñi quixtañujob maʼañic bʌ miʼ mulañob i yʌl i chaʼan bʌ Dios?

⁹ Miʼ mejlel lac ñijcʌben i pusicʼal jiñi maʼañic bʌ miʼ mulañob i yʌl i chaʼan bʌ Dios, cheʼ mi lac taj ti tʼan jiñi temaj tac muʼ bʌ i mulañob i cʌn. Jumpʼejl ejemplo, an muʼ bʌ i wen mulañob i qʼuel jiñi utsʼatax bʌ chuqui tac an ila ti Pañimil yicʼot ti panchan. Miʼ mejlel la cʌl: «Tajol a wujil chaʼan an chuqui tac melbil i chaʼan wiñicob come an i lajiyob chuqui tac an ila ti Pañimil. Laʼ cu lac ñaʼtan, jiñi muʼ bʌ i melob jiñi micrófono tac miʼ tsajiñob i chiquin jiñi añimal tac i jiñi muʼ bʌ i melob cámara tac cheʼʌch miʼ melob jaʼel. ¿Chuqui miʼ tilel ti a jol cheʼ maʼ ñaʼtan jiñi utsʼatax bʌ chuqui tac an ila ti Pañimil? ¿Muʼ baʼ ñaʼtan chaʼan i bajñel tsaʼ tsictiyi tilel, am ba majqui tsiʼ mele o yambʌ?». Ti wiʼil, cheʼ tsaʼix a ñʌchʼta chuqui miʼ ñaʼtan, miʼ mejlel la cʌl: «Cheʼ baqui ora jiñi ingenierojob miʼ tsajiñob i wut yicʼot i chiquin añimal tac, tajol miʼ mejlel laj cʼajtiben lac bʌ majqui woliʼ cʌntesañob. Tsaʼ c wen mulaj cheʼ bʌ juntiquil poeta ti wajali tsiʼ cʼajti mi mucʼʌch i ñʌchʼtan tʼan jiñi tsaʼ bʌ i mele jiñi lac chiquin o miʼ mejlel i qʼuel pañimil jiñi tsaʼ bʌ i mele lac wut. Ti wiʼil, tsiʼ bej alʌ chaʼan jiñi tsaʼ bʌ i mele tac iliyi, jiñʌch muʼ bʌ i yʌqʼuen i ñaʼtʌbal jiñi wiñicob. An científicojob cheʼʌch bʌ miʼ cʼotel i ñaʼtañob jaʼel» (Sal. 94:9, 10). Cheʼ jiñi, miʼ mejlel lac pʌsben jumpʼejl video am bʌ ti jw.org^®, ti jiñi sección «xColelob» baʼ miʼ yʌl «Muʼ bʌ i yʌl yambʌ xcolelob: I ñopol Dios» (Cucu ti JUN TAC > VIDEO TAC). O miʼ mejlel la cʌqʼuen jiñi folleto ¿Es la vida obra de un Creador? o jiñi folleto El origen de la vida. Cinco cuestiones dignas de análisis.

10. ¿Bajcheʼ miʼ mejlel lac tech tʼan la quicʼot juntiquil quixtañu maʼañic bʌ miʼ mulan i yʌl chaʼan bʌ Dios?

¹⁰ Yonlel quixtañujob yomob chaʼan weñix miʼ chumtʌlob ti talto qʼuin. Cabʌlob miʼ bʌcʼñañob chaʼan ili Lum mi caj i jilel o chaʼan maʼañix majqui mi caj i chumtan. Juntiquil superintendente i chaʼan circuito ti Noruega miʼ yʌl chaʼan jiñi  mach bʌ yomic i yʌlob i chaʼan bʌ Dios, yomobʌch i yʌl chaʼan chuqui tac woliʼ yujtel ila ti pañimil (mulawil). Cheʼ bʌ tsaʼix i subu i bʌ tiʼ tojlel juntiquil quixtañu, miʼ cʼajtiben: «¿Muʼ ba caj i tojʼan maʼ wʌl woli bʌ ti ujtel cheʼ ti talto bʌ qʼuin? ¿Majqui mi caj i tojʼesan? ¿Jimba añoʼ bʌ ti política, jiñi científicojob o yambʌ quixtañu?». Cheʼ tsaʼix i ñʌchʼta chuqui miʼ ñaʼtan jiñi quixtañu, miʼ pejcʌben o miʼ suben jumpʼejl texto baʼ miʼ yʌl chaʼan utsʼatax mi cajel jiñi talto bʌ qʼuin. An muʼ bʌ i mulañob cheʼ miʼ yʌl jiñi Biblia chaʼan ili Lum maʼañic mi caj i jisʌntel i chaʼan jiñi tojoʼ bʌ mi caj i chumtañob tiʼ pejtelel ora (Sal. 37:29; Ec. 1:4).

11. a) ¿Chucoch yom qʼuexel bajcheʼ mi lac tech tʼan la quicʼot jiñi quixtañujob? b) ¿Chuqui yom mi lac mel cheʼ bajcheʼ tsiʼ yʌlʌ Pablo ti Romanos 1:14-16?

¹¹ Weñʌch cheʼ mi lac ñaʼtan bajcheʼ mi caj lac tech tʼan la quicʼot quixtañujob, come jujuntiquil quixtañu qʼuexel i pensar. Muʼ bʌ i mulan juntiquil maʼañic mi caj i mulan jiñi yambʌ. An mucʼʌch bʌ i mulañob cheʼ mi la cʌl i chaʼan bʌ Dios o jiñi Biblia, pero yambʌlob ñumen wen miʼ jacʼob cheʼ yambʌ chuqui mi lac taj ti tʼan. Bajcheʼic jach, pero yomʌch mi lac chaʼlen tʼan majqui jach la quicʼot (pejcan Romanos 1:14-16). Maʼañic baqui ora yom miʼ ñajʌyel lac chaʼan: Jiñʌch Jehová muʼ bʌ i yʌcʼ ti colel i sujmlel tiʼ pusicʼal juntiquil quixtañu muʼ bʌ i cʼuxbin chuqui toj (1 Co. 3:6, 7).

12. ¿Chuqui miʼ mejlel lac mel chaʼan mi lac pejcañob jiñi chʼoyoloʼ bʌ ti Asia, maʼañobic bʌ miʼ ñopob chaʼan an majqui tsiʼ meleyonla?

¹² Tiʼ pejtelel pañimil, cabʌl xsubtʼañob miʼ tajob quixtañujob chʼoyoloʼ bʌ ti Asia. An tilemoʼ bʌ baqui jiñi yumʌlob miʼ mʌctañob chuqui miʼ melob jiñi ñopbalʌl tac. Ti cabʌl país i chaʼan Asia, yonlel quixtañujob maʼañic baʼ ora an i ñaʼtayob chaʼan an majqui tsiʼ meleyonla. An yomobʌch bʌ i cʌn i miʼ chʼʌmob jumpʼejl estudio cheʼ miʼ subentelob. Pero yambʌlob maʼañic miʼ seb mulañob i cʌn tsijib tac bʌ ñaʼtʌbal. ¿Chuqui yom mi lac mel chaʼan mi lac subeñob i sujmlel? An xsubtʼañob cʼotemoʼ bʌ i cʌn chaʼan ñumen wen cheʼ mi lac ñaxan chaʼlen tʼan la quicʼotob, mi lac chʼʌmob ti ñuc i ti wiʼil, cheʼ weñix mi laj qʼuel, miʼ mejlel lac suben bajcheʼ an i yʌqʼueyonla lac wenlel cheʼ an lac chʼʌmʌ ti ñuc jumpʼejl principio am bʌ ti Biblia.

13. ¿Chuqui yom melol chaʼan jiñi quixtañujob miʼ cʼotel i mulañob i chaʼan bʌ Biblia? (Qʼuele jiñi foto am bʌ tiʼ tejchibal).

¹³ Muʼ bʌ i ñaxan mulañob jiñi quixtañujob jiñʌch jiñi wem bʌ ticʼojel tac am bʌ ti Biblia (Ec. 7:11, 12). Juntiquil hermana ti Nueva York, muʼ bʌ i julaʼtan yujiloʼ bʌ tʼan ti chino mandarín, miʼ yʌl: «Mic chaʼlen wersa chaʼan mic chʼʌm ti ñuc jiñi quixtañujob yicʼot chaʼan mic ñʌchʼtañob. Cheʼ mij cʼotel c ñaʼtan chaʼan cʼotemob jaxto ti jiñi país, mij cʼajtibeñob bajcheʼ woliyob i ñusan, mi tsaʼix i tajayob i yeʼtel (troñel) yicʼot bajcheʼ yilal miʼ qʼuejlelob». Iliyi, an i wen colta chaʼan miʼ tech i yʌl i chaʼan bʌ Biblia. Cheʼ weñix miʼ qʼuel, jiñi hermana miʼ bej al: «¿Chuqui miʼ mejlel i coltañonla maʼ wʌl chaʼan wen mi laj qʼuel lac bʌ ti lac pejtelel? ¿Mejl ba c pʌsbeñet jumpʼejl proverbio am bʌ ti Biblia? Miʼ yʌl: ‹Cheʼ miʼ cajelob ti leto miʼ yutsi pʼojlel cheʼ bajcheʼ jaʼ. Jini chaʼan cʌyʌx leto ame utsi pʼojlic›. ¿Muʼ baʼ ñaʼtan chaʼan ili ticʼojel miʼ mejlel i coltañonla chaʼan wen mi laj qʼuel lac bʌ ti lac pejtelel?» (Pr. 17:14). Mi cheʼʌch mi lac mel jaʼel, miʼ mejlel i coltañonla lac ñaʼtan majqui mi caj i chaʼ mulan tʼan yicʼotonla.

14. ¿Chuqui miʼ mel juntiquil hermano am bʌ ti Asia chaʼan miʼ coltan jiñi quixtañujob maʼañic bʌ miʼ ñopob Dios?

¹⁴ ¿Chuqui miʼ mejlel lac subeñob jiñi muʼ bʌ i yʌlob chaʼan maʼañic miʼ ñopob Dios? Juntiquil hermano, cabʌlix bʌ chuqui cʌmbil i chaʼan ti subtʼan tiʼ tojlel jiñi quixtañujob mach bʌ añobic  i ñopbal ti Asia, miʼ tsictesan: «Ti bele ora, cheʼ jiñi quixtañujob miʼ yʌlob chaʼan maʼañic miʼ ñopob Dios, yomob i yʌl chaʼan mach yomic miʼ chʼujutesʌntel jiñi diosob añoʼ bʌ tiʼ lumal. Cheʼ jiñi, mic subeñob chaʼan cheʼʌch mic ñaʼtan jaʼel come jiñi diosteʼ tac maʼañobic i cuxtʌlel i melbil jach i chaʼan jiñi wiñicob. Mic pejcʌbeñob Jeremías 16:20, muʼ bʌ i yʌl: ‹¿Chucoch miʼ lon melob i diosob mach bʌ Diosic? Jini mero Dios mach i melbalic winicob›. Ti wiʼil, mij cʼajtibeñob bajcheʼ miʼ mejlel laj cʌn majqui jiñi i sujm bʌ Dios yicʼot jiñi dios tac melbil jach bʌ i chaʼan wiñicob. Mic wen ñʌchʼtan bajcheʼ miʼ jacʼob i mic pejcʌbeñob Isaías 41:23: ‹Laʼ i wʌn tsictesan chuqui miʼ caj ti ujtel, chaʼan mi laʼ wen ñaʼtan mi diosʌch›. Cheʼ jiñi, mic pʌsben chuqui albil i chaʼan Jehová chaʼan mi caj i yujtel ti talto bʌ qʼuin».

15. ¿Chuqui mi laj cʌn tiʼ tojlel juntiquil hermano ti Asia?

¹⁵ Laʼ laj qʼuel chuqui miʼ mel juntiquil hermano am bʌ ti jumpʼejl país i chaʼan Asia cheʼ miʼ chaʼ sujtel i julaʼtan jiñi quixtañujob. Miʼ tsictesan: «Mic pʌsbeñob bajcheʼ tac miʼ pʌs i ñaʼtʌbal jiñi Biblia, jiñi profecía tac tsaʼix bʌ tsʼʌctiyi yicʼot mandar tac chaʼan bajcheʼ yom miʼ yajñel pejtelel chuqui tac an ti Lum. Ti wiʼil, mij coltañob i qʼuel chaʼan ili tac miʼ pʌs chaʼan an juntiquil cuxul bʌ Dios tsaʼ bʌ i meleyonla yicʼot cabʌl bʌ i ñaʼtʌbal. Cheʼ jiñi quixtañujob muqʼuix i ñopob chaʼan añʌch Dios, mic tech c pʌsbeñob muʼ bʌ i yʌl jiñi Biblia chaʼan Jehová».

16. Cheʼ bajcheʼ miʼ yʌl Hebreos 11:6, ¿chucoch yom miʼ yʌcʼob i ñopoñel ti Dios yicʼot ti Biblia jiñi muʼ bʌ la cʌqʼueñob estudio, i bajcheʼ miʼ mejlel laj coltañob?

¹⁶ Cheʼ bʌ mi la cʌqʼueñob estudio jiñi maʼañobic bʌ i ñopbal yom mi lac chʌn pʼʌtʼesʌbeñob i ñopoñel (chʼujbiya) (pejcan Hebreos 11:6). Cheʼ jaʼel, yom mi laj coltañob chaʼan miʼ ñopob muʼ bʌ i yʌl jiñi Biblia. Chaʼan mi lac mel, tajol mach junyajl jach mi caj lac tsictesʌben jumpʼejl cʌntesa. Ti jujumpʼejl estudio, tajol yomʌch mi lac tsajin yicʼotob chuqui tac miʼ pʌs chaʼan jiñi Biblia i Tʼañʌch Dios. Jumpʼejl ejemplo, miʼ mejlel lac tsajin profecía tac tsaʼix bʌ tsʼʌctiyi, chaʼan bajcheʼ miʼ taj i bʌ jiñi Biblia yicʼot jiñi ciencia yicʼot historia o jiñi ticʼojel tac muʼ bʌ i yʌcʼ.

17. ¿Chuqui miʼ mejlel lac taj cheʼ mi laj cʼuxbin jiñi quixtañujob?

¹⁷ Cheʼ mi lac pʌs laj cʼuxbiya tiʼ tojlel jiñi quixtañujob, añoʼ bʌ i ñopbal o mach bʌ añic, mi laj coltan chaʼan miʼ tsajcañob Cristo (1 Co. 13:1). Cheʼ mi laj cʌntesañob chaʼan jiñi i sujmlel, la com bʌ jiñʌch cheʼ miʼ cʼotel i chʼʌmbeñob i sujm chaʼan Dios miʼ cʼuxbiñonla i yom chaʼan mi laj cʼuxbin jaʼel. Ti jujumpʼejl jab, miʼ chʼʌmob jaʼ yonlel quixtañujob mach bʌ añic miʼ wen qʼuelob ti ñuc jiñi ñopbalʌl ti ñaxan, pero tsaʼ cʼoti i cʼuxbiñob Dios. Jin chaʼan, laʼ lac ñaʼtan chuqui wen tiʼ tojlel jiñi quixtañujob yicʼot lac pʌsbeñob laj cʼuxbiya. Laʼ lac ñʌchʼtañob yicʼot lac chʼʌmben i sujm bajcheʼ miʼ yubiñob i bʌ. Laʼ lac pʌsbeñob ti lac melbal bajcheʼ yom miʼ lajiñob Cristo.