JIÑI Biblia miʼ taj ti tʼan chuqui tsaʼ cʼoti i yubiñob jiñi wiñicob xʼixicob «lajal [bʌ] bajcheʼonla» (Stg. 5:17). Jumpʼejl ejemplo, jiñi apóstol Pablo tsiʼ yʌlʌ: «Come cheʼ com c mel chuqui utsʼat, an jontolil tic pusicʼal. [...] Pʼumpʼun jax c bʌ» (Ro. 7:21-24). Tiʼ sujm, cheʼʌch miʼ cʼotel la cubin jeʼel. Cheʼ bʌ woli lac chaʼlen wersa lac mʌlben lac sajtemal, jiñi tsaʼ bʌ cʼoti i yubin Pablo miʼ yʌcʼ chaʼan wen mi la cubin lac bʌ.

Pero Pablo tsiʼ taja ti tʼan jaʼel bajcheʼ tsiʼ yubi i bʌ cheʼ bʌ Jesús tsiʼ yʌcʼʌ i cuxtʌlel. Ti Gálatas 2:20 tsiʼ yʌlʌ: ‹I Yalobil Dios tsaʼ bʌ i cʼuxbiyon, tsiʼ yʌcʼʌ i bʌ ti chʌmel chaʼañon›. Jiñi apóstol tsiʼ wen ñopo chaʼan cheʼʌchi. ¿Cheʼ ba mi lac ñaʼtan jaʼel? Tajol mach cheʼiqui.

Mi mach tijicñayic mi la cubin lac bʌ tiʼ caj jiñi mulil tsaʼ bʌ lac mele wajali, tajol wocol mi caj lac ñop chaʼan Jehová miʼ cʼuxbiñonla yicʼot chaʼan tsaʼix i ñusʌbeyonla lac mul. I tajol ñumen wocol mi caj laj qʼuel chaʼan jumpʼejlʌch majtañʌl jiñi i tojol laj coltʌntel tsaʼ bʌ aqʼuentiyonla ti jujuntiquil. ¿Yom ba Jesús chaʼan mi laj qʼuel bajcheʼ jumpʼej majtañʌl? Mi cheʼʌchi, ¿chuqui mi caj i coltañonla? Laʼ la cʌqʼuen i jacʼbal ili chaʼpʼejl cʼajtiya.

Jesús yom chaʼan jiñi i cuxtʌlel tsaʼ bʌ i yʌcʼʌ mi laj qʼuel bajcheʼ jumpʼejl majtañʌl tsaʼ bʌ aqʼuentiyonla ti jujuntiquil. ¿Chucoch miʼ mejlel lac wen ñop iliyi? Laʼ laj qʼuel muʼ bʌ i yʌl Lucas 23:39-42. Juntiquil wiñic chʼijil bʌ ti teʼ am bʌ tiʼ tʼejl Jesús miʼ suben chaʼan añʌch i mul. Tsiʼ mele tsʌts bʌ mulil come jiñob jach muʼ bʌ i melob bajcheʼ jiñi miʼ chʼijtilob ti teʼ. Cheʼ wolix i ñaʼtan chuqui woliʼ ñusan, miʼ cʼajtiben Jesús: «C Yum ñaʼtañon cheʼ maʼ tilel ti a yumʌntel».

¿Bajcheʼ miʼ jacʼ Jesús? Laʼ lac ñaʼtan bajcheʼ cʼamel i cʼuxel tsiʼ yubi cheʼ tsiʼ ñijca i jol chaʼan miʼ sujtel i qʼuel jiñi wiñic. Anquese wen cʼuxix pejtelel i bʌcʼtal, miʼ pʌs i tijicñʌyel tiʼ wut i miʼ suben: «Tiʼ sujm mic subeñet wʌle, mi caj a wajñel a wicʼoton ti Paraíso» (Lc. 23:43, TNM). Cheʼic yom Jesús, tsaʼ jach mejli i cʼajtesʌben chaʼan jiñi i Yalobil wiñic tsaʼ tili «chaʼan miʼ yʌcʼ i bʌ ti chʌmel chaʼan i tojol i mul cabʌlob» (Mt. 20:28). Pero tsiʼ colta jiñi jontol bʌ wiñic chaʼan miʼ chʼʌmben i sujm chaʼan jiñi i cuxtʌlel muʼ bʌ caj i yʌcʼ chaʼañʌch i coltʌntel jaʼel. Ti uts bʌ tʼan tiʼ sube: «Mi caj a wajñel a wicʼoton» i tsiʼ yʌlʌ jumpʼejl wenlel muʼ bʌ caj i taj jiñi wiñic chaʼan jiñi i cuxtʌlel: Mi caj i chumtʌl ti jumpʼejl Paraíso ila ti Pañimil.

Jiñi wiñic maʼañic tsiʼ melbe i yeʼtel Dios. Pero Jesús tsiʼ mulaj chaʼan miʼ chʼʌmben i sujm chaʼan jumpʼejlʌch majtañʌl chaʼan i coltʌntel cheʼ mi caj i yʌc i cuxtʌlel. Mi Jesús tsiʼ mulaj chaʼan jiñi wiñic miʼ chʼʌmben i sujm iliyi, cheʼ yom jaʼel tiʼ tojlel juntiquil xñoptʼan chʼʌmʌlix bʌ i chaʼan jaʼ woli bʌ i melben i yeʼtel Dios. Jin chaʼan, ¿chuqui mi caj i coltañonla lac ñop chaʼan jiñi cuxtʌlel tsaʼ bʌ i yʌcʼʌ Jesús miʼ yʌqʼueñonla lac wenlel ti jujuntiquil anquese tsaʼ lac mele mulil ti wajali?

Pablo tsiʼ chʼʌmbe i sujm chaʼan Jesús tsaʼ chʌmi tiʼ tojlel come tsiʼ yʌqʼue jiñi eʼtel chaʼan miʼ suben  wen tʼan jiñi quixtañujob. Tsiʼ yʌlʌ: «Mic suben wocolix i yʌlʌ Cristo Jesús lac Yum, come tsiʼ waʼchocoyon tiʼ yeʼtel. Tsiʼ pʼʌtesayon, come tsiʼ wʌn ñaʼta xucʼul mi caj cajñel. Ti yambʌ ora tsac chaʼle pʼajoñel yicʼot ticʼlaya yicʼot tsʼaʼleya» (1 Ti. 1:12-14). Jiñi eʼtel tsiʼ yʌqʼue i wen ñop chaʼan Jesús woliʼ pʌsben i pʼuntaya, i cʼuxbiya yicʼot chaʼan miʼ ñop chaʼan mejlʌch i mel jiñi eʼtel. Cheʼ jaʼel, Jesús tsiʼ yʌqʼueyonla ti jujuntiquil jiñi eʼtel chaʼan mi lac sub jiñi wen tʼan chaʼan i Yumʌntel Dios (Mt. 28:19, 20). ¿Cheʼ ba mi lac chʼʌmben i sujm jaʼel bajcheʼ jiñi Pablo?

Laʼ laj qʼuel ti tojlel Albert, tsaʼ jaxto bʌ chaʼ ochi ti Testigo come 34 jab tsaʼ ajñi bajcheʼ expulsado. Miʼ yʌl: «Tiʼ pejtelel ora mic ñaʼtan jiñi c mul. Pero cheʼ mic loqʼuel ti subtʼan mi cubin chaʼan Jesús tsiʼ yʌqʼueyon jiñi eʼtel chaʼan mic sub jiñi wen tʼan, cheʼ bajcheʼ jiñi Pablo. Ili miʼ ñumen aqʼueñon c tijicñʌyel i miʼ coltañon chaʼan wen jach chuqui mic ñaʼtan tic tojlel, tij cuxtʌlel yicʼot ti talto bʌ qʼuin» (Sal. 51:3).

Allan, wen jontol yic’ot miʼ mel mach tac bʌ weñic cheʼ maxto i cʌñʌyic jiñi i sujmlel. Miʼ yʌl: «Muʼto c ñaʼtan bajcheʼ jiñi c melbal tsiʼ wen lowo jiñi quixtañujob. An qʼuiñil mic taj c chʼijiyemlel. Pero mi cʌqʼuen wocolix i yʌlʌ Jehová cheʼ miʼ yʌcʼ chaʼan juntiquil xmulil bajcheʼ joñon miʼ suben wen tʼan yambʌlob. Cheʼ bajcheʼ miʼ jacʼob jiñi quixtañujob ti subtʼan miʼ cʼajtesʌbeñon chaʼan Jehová wen uts yicʼot an i cʼuxbiya. Mi cʌl chaʼan woliʼ cʼʌñon chaʼan mij coltan jiñi quixtañujob lajaloʼ bʌ i melbal ti wajali bajcheʼ joñon».

Jiñi subtʼan miʼ yʌqʼueñonla laj cʼʌn jiñi lac pʼʌtʌlel chaʼan mi lac mel chuqui wen yicʼot lac ñaʼtan jiñi wen tac bʌ. Miʼ yʌqʼueñonla lac ñop chaʼan Jesús miʼ pʌsbeñonla i pʼuntaya, i cʼuxbiya yicʼot miʼ ñop chaʼan mejlʌch lac melben i yeʼtel.

Tajol jiñi lac pusicʼal mi caj i bej ticʼlañonla cʼʌlʌl miʼ jilel i pañimil Satanás chaʼan tsaʼ lac mele mach bʌ weñic ti wajali. ¿Chuqui mi caj coltañonla chaʼan mi lac mʌlben?

Jean muʼto i bej chaʼlen wersa chaʼan maʼañix mi ñaʼtan i mul come chaʼchajp jax i pusicʼal cheʼ bʌ xcolelto. Pero miʼ yʌl: «Mic wen mulan cheʼ mic ñaʼtan chaʼan ‹ñumen ñuc Dios bajcheʼ lac pusicʼal›» (1 Jn. 3:19, 20). Mucʼʌch i ñuqʼuesan lac pusicʼal jaʼel cheʼ la cujil chaʼan Jehová yicʼot Jesús miʼ ñaʼtañob chaʼan xmulilonla. Laʼ laj cʼajtesan chaʼan jiñʌch jiñi cʼuxbiya tsaʼ bʌ i ñijcayob chaʼan miʼ yʌcʼob i tojol laj coltʌntel chaʼan jiñi quixtañujob muʼ bʌ i cʌyob i mul (1 Ti. 1:15).

Mi caj lac ñumen ñop chaʼan jiñi i cuxtʌlel Jesús jumpʼejlʌch majtañʌl tsaʼ bʌ aqʼuentiyonla ti jujuntiquil cheʼ mi lac mel ili chaʼchajp: Cheʼ mi lac wen ñaʼtan bajcheʼ tsiʼ pʌsʌ i melbal Jesús tiʼ tojlel jiñi quixtañujob xmuliloʼ bʌ yicʼot cheʼ mi lac chaʼlen wersa lac tsʼʌctesan jiñi eʼtel tsaʼ bʌ i yʌqʼueyonla. Cheʼ bajcheʼ jiñi, mi caj la cʌl tsaʼ bʌ i yʌlʌ jiñi Pablo: Jesús ‹tsaʼ bʌ i cʼuxbiyon, tsiʼ yʌcʼʌ i bʌ ti chʌmel chaʼañon›.