Tsaʼ quila pañimil (chʼocʼayon) ti 1954 yaʼ ti Saint Paul (Minnesota), ti Estados Unidos. Jiñi c tat c ñaʼ mach cabʌlobic i taqʼuin pero mach pʼumpʼuñobic, i católicojob. I tsiʼ tajayob joʼtiquil i yalobil i joñon jiñi i chaʼticlel. Cheʼ bʌ alobonto, tsaʼ c chaʼle clase ti jumpʼejl escuela católica yicʼot mij coltan jiñi cura yaʼ ti iglesia, pero mach c wen cujilic i chaʼan bʌ Biblia. Anquese cujil chaʼan añʌch juntiquil Dios tsaʼ bʌ i mele (pʌtʌ) pejtelel chuqui tac an, tsaʼ c ñaʼta chaʼan jiñi Iglesia católica maʼañic mi caj i coltañon c chʼujutesan.

Cheʼ bʌ cojaxto jumpʼejl jab woli (choncol) c majlel yaʼ ti escuela i chaʼan abogadojob, chaʼtiquil i testigojob Jehová tsiʼ jatsʼʌyob i tiʼ cotot. Come woli c wutsʼ c pislel, ti uts bʌ tʼan tiʼ subeyoñob chaʼan ti yanto bʌ ora mi caj i chaʼ cʼotel i qʼueloñob. Cheʼ bʌ tsaʼ chaʼ cʼotiyob, tsaʼ c melbeyob ili chaʼpʼejl cʼajtiya: «¿Chucoch ñumen wen añob jiñi jontoloʼ bʌ i jiñi utsoʼ bʌ mach cheʼiqui?» i «¿chuqui yom mi lac mel chaʼan tijicñayonla?». Tsaʼ c jacʼʌ c chʼʌm jiñi libro La verdad que lleva a vida eterna yicʼot jiñi Traducción del Nuevo Mundo de  las Santas Escrituras, yʌjyʌx bʌ i pat. Cheʼ jaʼel, tsaʼ c jacʼʌ c chʼʌm jumpʼejl estudio loqʼuem bʌ ti Biblia. Cabʌl chuqui tsaʼ cʼoti j cʌn. Tsiʼ toj acʼʌ ti sajtel c pusicʼal cheʼ bʌ tsaʼ j cʌñʌ chaʼan jiñi i Yumʌntel Dios jiñʌch la com bʌ ti lac tojlel yicʼot muʼ bʌ caj i mel i yeʼtel (troñel) ila ti Lum. Tsaʼ cʼoti c chʼʌmben i sujm chaʼan jiñi i yumʌntel wiñicob maʼañic i cʼʌjñibal, i chaʼan an i butʼuyob ili pañimil ti wocol tac yicʼot tiʼ melol mach tac bʌ tojic.

Tsaʼ cʌqʼue j cuxtʌlel Jehová cheʼ ti tejchibal 1982 i ti jiñi jach bʌ jabil tsaʼ c chʼʌmʌ jaʼ yaʼ ti Uxpʼejl bʌ qʼuin colem tempa bʌ: «Verdad del Reino», yaʼ ti estadio i chaʼan St. Paul Civic Center. Tsaʼ ñumi jumpʼejl semana, i tsaʼ chaʼ cʼotiyon yaʼi chaʼan mic mel jumpʼejl examen chaʼan miʼ mejlel c mel queʼtel bajcheʼ abogado. I tiʼ tejchibal octubre tsaʼ cʼoti cubin chaʼan tsaʼʌch c ñusa jiñi examen.

Ti jiñi colem tempa bʌ, tsaʼ j cʌñʌ jiñi hermano Mike Richardson, woli (yʌquel) bʌ ti eʼtel yaʼ ti Betel i chaʼan Brooklyn (Nueva York), i tiʼ subeyon chaʼan yaʼ ti central mundial tsaʼ waʼchoconti oficina tac i chaʼan asuntos legales. Tsaʼ cʼajtiyi c chaʼan tsaʼ bʌ i yʌlʌ jiñi eunuco etíope yaʼ ti Hechos 8:36, i tsaʼ j cʼajtibe c bʌ: «¿Am ba chuqui miʼ mʌctañon chaʼan mic chaʼlen coltaya bajcheʼ abogado yaʼ ti Betel?». Jin chaʼan tsaʼ c butʼu jiñi solicitud chaʼan mic chaʼlen eʼtel ti Betel.

Jiñi c tat c ñaʼ maʼañic tsiʼ mulayob cheʼ tsaʼ sujtiyon tiʼ testigo Jehová. Jiñi c tat tsiʼ cʼajtibeyon mi an bajcheʼ mi caj i coltañon ti jiñi queʼtel bajcheʼ abogado cheʼ añon yaʼ ti Betel. Tsaʼ c sube chaʼan ti jujumpʼejl uw mi caj j coltʌntel ti tsʼitaʼ taqʼuin cheʼ bajcheʼ miʼ yʌqʼuentelob jiñi yambʌ betelitajob.

Cheʼ bʌ tsaʼix c jumucʼ chaʼle eʼtel ti jumpʼejl meloñibʌl, tsaʼ c teche eʼtel ti Betel yaʼ ti Brooklyn cheʼ ti 1984. Tsaʼ chojquiyon majlel yaʼ ti Oficina i chaʼan asuntos legales. Jiñi tsaʼ bʌ j cʌñʌ ti jiñi meloñibʌl tsiʼ chajpayon chaʼan muʼ bʌ caj i tilel ti wiʼil.

Cheʼ ti noviembre i chaʼan 1983, jiñi i testigojob Jehová tsiʼ mʌñʌyob jiñi Teatro Stanley, yaʼ ti Jersey City (Nueva Jersey). Jiñi hermanojob tsiʼ cʼajtiyob permiso chaʼan miʼ tojʼesañob jiñi i chaʼan tac bʌ luz yicʼot jaʼ am bʌ ti jiñi Teatro Stanley. Cheʼ bʌ tsiʼ tempayob i bʌ yicʼot jiñi añoʼ bʌ i yeʼtel, jiñi i testigojob Jehová tiʼ tsictesʌbeyob chaʼan yom i cʼʌñob jiñi Teatro Stanley chaʼan miʼ melob colem tempa bʌ tac. Pero tsaʼ ujti jumpʼejl wocol. Jiñi yumʌlob miʼ yʌlob chaʼan jiñi i yotlel tac ñopbalʌl yom miʼ yajñel tiʼ tiʼ jiñi tejclum. Jin chaʼan, maʼañic tsaʼ aqʼuentiyon lojon jiñi permiso tac come jiñi teatro an tiʼ yojlil jiñi tejclum. Jiñi hermanojob tsiʼ chaʼ cʼajtibeyob permiso tac jiñi añoʼ bʌ i yeʼtel, pero maʼañic tsaʼ jacʼbentiyob.

 Cheʼ bʌ jumpʼejl jaxto semana añon yaʼ ti Betel, jiñi organización tsaʼ majli i cʼajtiñob jiñi permiso tac ti jumpʼejl meloñibʌl. Come chaʼpʼejl jab tsaʼ c chaʼle eʼtel yaʼ ti meloñibʌl i chaʼan Saint Paul (Minnesota), wen cujil bajcheʼ miʼ tojʼesʌntel jiñi wocol tac. Juntiquil abogado testigo bʌ tsiʼ yʌlʌ chaʼan yaʼ ti Teatro Stanley tsaʼ ujti qʼuiñijel tac, tsaʼ qʼuejli película tac yicʼot tsaʼ cʼoti xcʼayob. Jin chaʼan, ¿chucoch mach yomic chaʼan miʼ mejlel colem tempa bʌ tac yaʼi? Jiñi juez tsiʼ chaʼ qʼuele jiñi wocol, i tsiʼ yʌlʌ chaʼan jiñi añoʼ bʌ i yeʼtel yaʼ ti Jersey City tsiʼ meleyob mach bʌ weñic come jiñi i testigojob Jehová mejlʌch i tempañob i bʌ yaʼi. Jin chaʼan tiʼ sube jiñi añoʼ bʌ i yeʼtel chaʼan miʼ yʌqʼueñob jiñi permiso tac. Tsaʼ caji j qʼuel chaʼan Jehová woliʼ coltan jiñi abogadojob chaʼan bʌ jiñi i yorganización chaʼan miʼ chʌn mejlel jiñi eʼtel. Tsiʼ wen aqʼueyon c tijicñʌyel cheʼ tsaʼ cʌcʼʌ j coltaya.

Jiñi hermanojob tsaʼ caji i wen tsijibtesañob jiñi teatro, i mach i tajalic jumpʼejl jab tsiʼ meleyob. Cheʼ ti 8 i chaʼan septiembre ti 1985, tsaʼ ujti jiñi clase 79 i chaʼan Galaad tsaʼ bʌ cʼoti ti cʌjñel bajcheʼ i Yotlel colem tempa bʌ i chaʼan Jersey City. Tsaʼ c wen qʼuele ti ñuc cheʼ tsaʼ c chaʼle eʼtel chaʼan i Yumʌntel Dios bajcheʼ abogado yicʼot yambʌ hermanojob, jiñʌch tsaʼ bʌ i ñumen aqʼueyon tijicñʌyel bajcheʼ yan tac bʌ eʼtel tsaʼ bʌ c mele cheʼ bʌ maxto cʼotiyon ti Betel. Maʼañic tsaʼ wis ñumi tic jol chaʼan Jehová mi caj i yʌqʼueñon c mel ñuc bʌ eʼtel tac bajcheʼ iliyi.

Cheʼ ti jabil 1980, jiñi doctorob yicʼot yaʼ ti hospital maʼañic miʼ chʼʌmob ti ñuc cheʼ bʌ jiñi i testigojob Jehová ñucobix bʌ miʼ cʼajtiñob chaʼan yomob tsʼac maʼañic bʌ i chaʼan chʼichʼ. Jiñi muʼ bʌ i ñumen ñusañob wocol jiñʌch jiñi xʼixicob cʌntʌbiloʼ bʌ i chaʼañob i yalobil (añoʼ bʌ ti quixtañu) come jiñi juezob miʼ yʌlob chaʼan mach mejlic i yʌlob chaʼan mach yomobic chaʼan miʼ yotsʌbentelob chʼichʼ come mi tsaʼ chʌmiyob, maʼañix i ñaʼ miʼ caj i cʌytʌl jiñi alʌl.

Cheʼ ti 29 i chaʼan diciembre ti 1988, jiñi hermana Denise Nicoleau tsiʼ wen choco chʼichʼ cheʼ bʌ tsaʼix i yila pañimil i yalobil. Come miʼ mejlel ti chʌmel (sajtel), jiñi doctor tsiʼ yʌlʌ chaʼan yom miʼ yotsʌbentel chʼichʼ. Pero jiñi hermana tsiʼ yʌlʌ chaʼan maʼañic. Tiʼ yijcʼʌlel, jiñi hospital tsiʼ cʼajtibe permiso juntiquil juez chaʼan miʼ yotsʌbentel chʼichʼ jiñi hermana. Jiñi juez tsiʼ yʌcʼʌ jiñi permiso, anquese maʼañic tsaʼ ujti meloñel mi tsaʼicto i subeyob jiñi hermana yicʼot i ñoxiʼal.

Cheʼ ti viernes 30 i chaʼan diciembre, jiñi hospital tsiʼ yotsʌbe chʼichʼ jiñi hermana, anquese jiñi i ñoxiʼal yicʼot i familia mach yomobic. Cheʼ jaʼel, tsaʼ otsʌntiyob ti cárcel chaʼtiqui uxtiquil tiʼ familia yicʼot ancianojob cheʼ ti icʼan. Tsaʼ ajli chaʼan tsiʼ ñopoyob i mʌctañob jiñi xʼeʼtelob yaʼ ti hospital chaʼan maʼañic  miʼ cʼotelob baʼan jiñi hermana chaʼan miʼ yotsʌbeñob chʼichʼ. Cheʼ ti sábado 31 i chaʼan diciembre ti sʌcʼan, jiñi periodico tac, radio tac yicʼot jiñi televisión yaʼ ti Nueva York tsiʼ tajayob ti tʼan jiñi Testigojob tsaʼ bʌ otsʌntiyob ti cárcel.

Tsaʼ majliyon lojon ti jumpʼejl ñuc bʌ meloñibʌl, i ti lunes cheʼ ti sʌcʼan tsaʼ c pejca jiñi juez Milton Mollen muʼ bʌ caj i qʼuel jiñi wocol. Tsaʼ c sube jiñi tsaʼ bʌ ujti i tsaʼ c sube chaʼan jiñi yambʌ juez tsiʼ yʌcʼʌ permiso cheʼ bʌ maxto ujtem meloñel. Jiñi juez Mollen tiʼ subeyon chaʼan mic ñumel tiʼ yoficina cheʼ ti ochʼajel qʼuin chaʼan mi cʌl lojon chuqui tac tsaʼ bʌ ujti yicʼot jiñi mandar tac yom bʌ miʼ jajqʼuel. Jiñi c superintendente, Philip Brumley, tsaʼ majli quicʼot yaʼ ti meloñibʌl. Cheʼ jaʼel, jiñi juez tsiʼ pʌyʌ cʼotel jiñi abogado i chaʼan jiñi hospital. Tsaʼ tsʌtsʼa jiñi wocol. I jiñi hermano Brumley tiʼ tsʼijbubeyon tiʼ jun jumpʼejl tʼan muʼ bʌ i yʌl: «Tsʼitaʼ juʼsan a tʼan». Ili ticʼojel tsaʼʌch i coltayon come wolix c michʼan tiʼ caj com cʌcʼ ti ñaʼtʌntel chaʼan mach i sujmic woli bʌ i yʌl jiñi abogado i chaʼan jiñi hospital.

Cheʼ bʌ tsaʼix ñumi jumpʼejl ora, jiñi juez Mollen tsiʼ yʌlʌ chaʼan tiʼ yijcʼʌlel jiñʌch jiñi c wocol lojon muʼ bʌ caj i ñaxan qʼuejlel yaʼ ti meloñibʌl. Cheʼ bʌ wolix c loqʼuel lojon tiʼ yoficina jiñi juez, tsiʼ yʌlʌ chaʼan jiñi abogado i chaʼan jiñi hospital tsʌts mi caj i ñusan yaʼ ti meloñibʌl come maʼañic mi caj i wen mejlel i coltan i bʌ. Tsaʼ cubi chaʼan lajalʌch bajcheʼ Jehová woliʼ subeñon chaʼan mucʼʌch caj i mʌjlel c chaʼan lojon. Tsiʼ yʌcʼʌ ti toj sajtel c pusicʼal cheʼ bʌ tsaʼ j qʼuele chaʼan Jehová woliʼ cʼʌñon lojon chaʼan miʼ tsʼʌctesan chuqui yom.

Tsaʼ c chajpa lojon chuqui mi caj cʌl lojon cʼʌlʌl ti acʼʌlel. Jiñi meloñibʌl mach ñajtic an yaʼ ti Betel i chaʼan Brooklyn, jin chaʼan cabʌl c piʼʌlob lojon ti eʼtel yaʼ ti Oficina i chaʼan asuntos legales tsiʼ xʌñʌyob chaʼan miʼ cʼotel i qʼuelob. Cheʼ bʌ jiñi chʌntiquil juezob tsaʼ caji i ñʌchʼtañob tsaʼ bʌ caji j cʌl lojon, tsiʼ yʌlʌyob chaʼan mach weñic cheʼ tsaʼ ajqʼui jiñi permiso chaʼan jiñi hermana miʼ yotsʌbentel chʼichʼ. Tsaʼʌch mʌjli c chaʼan lojon yaʼ ti meloñibʌl, i jiñi juez tsiʼ yʌlʌ chaʼan mach weñic cheʼ bʌ miʼ yʌjqʼuel jumpʼejl permiso cheʼ bʌ maxto ñʌchʼtʌnti chuqui yom juntiquil quixtañu.

Ti wiʼil, jiñi ñumen ñuc bʌ meloñibʌl am bʌ ti Nueva York tsiʼ waʼchoco i tʼan chaʼan jiñi hermana Nicoleau mejlʌch i yʌl chaʼan yom tsʼʌcʌntel cheʼ maʼañic miʼ yotsʌbentel chʼichʼ. Ti jiñi chʌmpʼejl wocol tsaʼ bʌ lon j qʼuele tiʼ caj jiñi chʼichʼ, ili jiñʌch jiñi ñaxam bʌ tsaʼ bʌ mʌjli lon c chaʼan yaʼ ti ñuc tac bʌ  meloñibʌl i chaʼan Estados Unidos baqui tsaʼ j cʌcʼʌ j coltaya (qʼuele jiñi recuadro « Jiñi wocol tac tsaʼ bʌ lon c mʌlʌ yaʼ ti ñuc tac bʌ meloñibʌl»). Cheʼ jaʼel, an c chaʼle eʼtel yicʼot yambʌ abogadojob yaʼ ti Betel chaʼan miʼ tojʼesʌntel wocol tac chaʼan majqui mi caj i cʌyle tiʼ wenta jiñi alobob, divorcio tac yicʼot mandar tac chaʼan bajcheʼ yom miʼ cʌjñel jiñi lum yicʼot jiñi otot tac.

Cheʼ bʌ tsaʼ j cʌñʌ Dawn, juntiquil xʼixic tsaʼ bʌ i chaʼle i bʌ ti divorciar yicʼot am bʌ uxtiquil i yalobilob. Miʼ chaʼlen eʼtel yicʼot an bajcheʼ precursora. Anquese wen wocolʌch tsaʼ bʌ i ñusa, tsaʼʌch i yʌcʼʌ ti toj ti sajtel c pusicʼal jiñi chʼejlel am bʌ i chaʼan tiʼ melol i yeʼtel Jehová. Ti 1992, tsaʼ comol majliyon lojon ti jiñi Uxpʼejl bʌ qʼuin colem tempa bʌ: «Portadores de Luz», yaʼ ti Nueva York i tsaʼ c sube chaʼan com c ñumen cʌn. Cheʼ ñumeñix jumpʼejl jab, tsaʼ ñujpuñiyon lojon i tsaʼ c bej chaʼle coltaya yaʼ ti Betel. Tsaʼ j qʼuele chaʼan jumpʼejl majtañʌl tilem bʌ ti Jehová cheʼ bʌ tsiʼ yʌqʼueyon juntiquil quijñam muʼ bʌ i yʌcʼ ti ñaxan i chaʼan tac bʌ Dios yicʼot wen am bʌ i tijicñʌyel. Cheʼ bajcheʼ miʼ yʌl Proverbios 31:12, Dawn utsʼat an i coltayon tiʼ pejtelel lon j cuxtʌlel.

Cheʼ bʌ tsaʼ ñujpuñiyon lojon, jiñi alobob an jaxto 11, 13 yicʼot 16 i jabilelob. Come com sujtel ti wem bʌ tatʌl, tsaʼ c chaʼle wersa c mel jiñi tsaʼ bʌ c pejca yaʼ ti lac jun tac chaʼan jiñi majan tatʌlob. Ti jiñi jabil tac tsaʼ bʌ ñumi tilel tsaʼʌch c taja lojon wocol tac, pero mi cubin c tijicñʌyel cheʼ bʌ jiñi alobob tsaʼ cʼoti i qʼueloñob bajcheʼ juntiquil uts bʌ tatʌl yicʼot juntiquil wem bʌ amigo. Tijicñayon lojon cheʼ bʌ miʼ pʌyob cʼotel jiñi i yamigojob yicʼot cheʼ butʼul jiñi otot ti xcolelob.

Ti 2013, Dawn yicʼot joñon tsaʼ majliyon lojon ti chumtʌl ti Wisconsin chaʼan mij cʌntan lojon jiñi lon c tat lon c ñaʼ. Pero toj sajtel c pusicʼal come muʼto caj i bej cʼʌñon jiñi Betel. Tsiʼ pʌyʌyoñob chaʼan mic bej acʼ coltaya bajcheʼ abogado.

Cheʼ ti septiembre i chaʼan 2018, tsaʼ caji j qʼuel chaʼan mic wen cʼojlan o cojlom c bicʼ cheʼ bʌ mi caj c chaʼlen tʼan. Jiñi c doctor maʼañic tsiʼ ñaʼta chuqui an c chaʼan. Ti wiʼil, cheʼ ti enero i chaʼan 2019, yambʌ doctor tiʼ subeyon chaʼan tajol an c chaʼan jumpʼejl leco bʌ cʼamʌjel tic jol xucʼu xucʼul bʌ mi caj i ticʼlan tiʼ pejtelel c bʌcʼtal.

Cheʼ ñumeñix uxpʼejl qʼuin, tsaʼ yajliyon cheʼ woliyon ti alas i tsaʼ c xulu ñoj bʌ j cʼʌb. Añix cabʌl jab c chaʼle tilel alas i wen ñʌmʌloñix. Jin chaʼan, tsaʼ c ñaʼta chaʼan maʼañix mi caj c mejlel c ñijcan c bʌ. Jiñi j cʼamʌjel tsaʼʌch caji i ticʼlañon ti ora i wocolix chaʼan mic chaʼlen tʼan, chaʼan mic ñijcan c bʌ yicʼot chaʼan mij cʼux c waʼ.

Mic wen ubin c tijicñʌyel cheʼ bʌ tsaʼ j colta jiñi i yorganización Jehová bajcheʼ abogado. Tijicñayon jaʼel, cheʼ bʌ tsaʼ c tsʼijbu revista tac muʼ bʌ i mejlel i pejcañob jiñi doctorob, jiñi abogadojob yicʼot juezob. Cheʼ jaʼel, tsaʼ j cʌcʼʌ discurso tac baqui tsaʼ j cʌlʌ chaʼan jiñi i testigojob Jehová an tiʼ wenta miʼ yʌlob chaʼan mach yomobic miʼ yotsʌbentelob chʼichʼ cheʼ bʌ mi caj i pʼojʼelob o chaʼan yom i chʼʌmob tsʼac maʼañic bʌ i chaʼan chʼichʼ. Pero xʼeʼtelon jach i maʼañic j cʼʌjñibal. Tsaʼ jach c mele jiñi am bʌ tic wenta chaʼan mic mel, cheʼ bajcheʼ miʼ yʌl Lucas 17:10.