Jehová yom chaʼan jiñi muʼ bʌ i ñujpuñelob tijicñayob, pʼʌtʌl i ñujpuñelob yicʼot maʼañic miʼ cʌyob i bʌ (Mt. 19:4-6). Mi jatet a wom ñujpuñel, ¿bajcheʼ miʼ mejlel a taj wem bʌ a ñoxiʼal o wem bʌ a wijñam? Jehová jiñʌch tsaʼ bʌ i meleyonla (pʌtʌyonla), jin chaʼan yujil chuqui yom mi lac mel cheʼ bʌ lac novioto lac bʌ yicʼot cheʼ bʌ mi lac ñujpuñel. Cheʼ mucʼʌch lac jacʼ jiñi principio tac am bʌ Biblia mi caj lac taj lac wenlel. Laʼ laj qʼuel chaʼpʼej uxpʼejl principio.

Ñaxam bʌ, yom mi laj cʌn junchajp lac sajtemal am bʌ lac chaʼan ti lac pejtelel: «Wen yujilob lot i pusicʼal winicob. Cabʌl i sajtemal» (Jer. 17:9). Cheʼ bʌ chaʼtiquil yomoʼ bʌ ñujpuñel miʼ tech i cʌñob i bʌ, tajol ti ora mi caj i cʌlʌx mulañob i bʌ i cheʼ bʌ miʼ yujtel iliyi, tajol wocol mi caj i yubiñob chaʼan miʼ yajcañob i mel chuqui wen. Mi tsiʼ ñaʼtayob ñujpuñel tiʼ caj jach bajcheʼ yubil miʼ yubiñob tajol mi caj i tajob wocol (Pr. 28:26). Jin chaʼan, jiñi noviojob wolito (choncolto) bʌ i tech i cʌñob i bʌ, mach ti orajic yom miʼ tech i yʌlob chuqui miʼ yubiñob tiʼ tojlel jiñi yambʌ o chuqui mi caj i melob, yom miʼ ñaxan wen cʌñob i bʌ.

Proverbios 22:3 miʼ yʌl: «Jini cʌntesʌbil bʌ miʼ wʌn ñaʼtan chuqui bʌbʌqʼuen miʼ yujtel. Miʼ chajpan i bʌ. Jini tonto bʌ maʼanic miʼ yotsan tiʼ pusicʼal. Muqʼuix i toj». ¿Baqui tac bʌ wocol miʼ mejlel lac taj cheʼ mi lac sʌclan lac piʼʌl ti internet? An tsaʼ bʌ cajiyob ti loqʼuel yicʼot juntiquil tsaʼ bʌ i cʌñʌyob ti internet, pero ti wiʼil tsiʼ qʼueleyob chaʼan woli (yʌquel) jach i lotintelob. Cheʼ jaʼel, an jontol (maña) bʌ lac piʼʌlob am bʌ i meleyob i correo chaʼan miʼ lotiñob lac piʼʌlob yicʼot miʼ xujchʼibeñob i taqʼuin. I an i tajol miʼ poj alob chaʼan i testigojob Jehová.

Laʼ laj qʼuel yambʌ wocol. An página tac ti internet muʼ bʌ i cʼʌn aplicación tac muʼ bʌ i poj ñaʼtan majqui yom bʌ mi lac loqʼuel la quicʼot. Pero maʼañic chuqui miʼ pʌs chaʼan weñʌch tac iliyi. ¿Muʼ ba lac pʌs lac ñaʼtʌbal cheʼ mi la cʌcʼ chaʼan jumpʼejl aplicación miʼ yajcan majqui mi lac ñujpuñel la quicʼot? Tiʼ sujm maʼañic. Jumpʼejl aplicación maʼañic miʼ wis laj i bʌ yicʼot jiñi principio tac am bʌ ti Biblia (Pr. 1:7; 3:5-7).

Ti Proverbios 14:15 miʼ yʌl yambʌ ñuc bʌ i cʼʌjñibal: «Jini mach bʌ cʌntesʌbilic miʼ ñop pejtel chuqui miʼ yʌlob winicob. Jini cʌntesʌbil bʌ miʼ wen tsajin i bijlel». Chaʼan mi la cʌl chaʼan juntiquil lac piʼʌl mi caj i sujtel ti wem bʌ lac ñoxiʼal o ti wem bʌ la quijñam, yom mi lac ñaxan wen cʌn. Pero maʼañic  miʼ mejlel lac mel mi ti internet jach mi laj cʌn juntiquil lac piʼʌl. Anquese chaʼtiquil lac piʼʌlob miʼ yʌcʼob ti cʌñol chuqui miʼ mulañob i cabʌl ora miʼ pejcañob i bʌ ti internet, ¿muʼ ba mejlel la cʌl chaʼan i cʌñʌyobʌch i bʌ tiʼ sujm? An tsaʼ bʌ i poj ñaʼtayob chaʼan tsaʼix i tajayob jiñi i piʼʌl, pero tsaʼ toj sajtiyob i pusicʼal cheʼ bʌ tsiʼ ñoj qʼueleyob.

Juntiquil tsaʼ bʌ i tsʼijbu jumpʼejl salmo tsiʼ yʌlʌ: «Maʼanic mi cajñel yicʼot winicob yujiloʼ bʌ lot. Maʼanic mi cajñel yicʼot jini chaʼpʼejl jach bʌ i pusicʼal» (Sal. 26:4). An lac piʼʌlob mach bʌ lecojic miʼ qʼuelob cheʼ miʼ chaʼleñob lot tiʼ perfil chaʼan miʼ ñumen qʼuejlelob. Tajol maʼañic miʼ ñoj subob bajcheʼ yilalob o tajol mach tsiquilic jiñi i sajtemalob ti jiñi mensaje tac. Tajol an muʼ bʌ i yʌlob chaʼan i testigojob Jehová, pero ¿chʼʌmʌlʌch ba i chaʼañob jaʼ? ¿Wem ba bʌ hermanojob? ¿Wem ba añob yicʼot Jehová? ¿Muʼ ba i qʼuejlelob ti ñuc tiʼ congregación? ¿O mach weñic i melbalob (chaʼlibalob) i muʼto i qʼuejlelob bajcheʼ «jontoloʼ bʌ lac piʼʌlob»? (1 Co. 15:33; 2 Ti. 2:20, 21). ¿Libre ba chaʼan miʼ ñujpuñel? Jiñʌch yom tac bʌ mi laj cʌn iliyi, pero mi maʼañic mi lac chaʼlen tʼan la quicʼot jiñi hermanojob i cʌñʌyoʼ bʌ, maʼañic mi caj i mejlel laj cʌn (Pr. 15:22). Juntiquil xucʼul bʌ i wiñic Dios maʼañic mi caj i ñujpuñel yicʼot juntiquil maxto bʌ i chʼʌmʌ jaʼ (2 Co. 6:14; 1 Co. 7:39).

Come jiñi página tac am bʌ ti internet an i wocolel, ¿am ba baqui yambʌ miʼ mejlel laj cʌn juntiquil muʼ bʌ i mejlel ti sujtel ti wem bʌ lac piʼʌl? Cheʼ miʼ mejlel lac tempan lac bʌ miʼ mejlel laj cʌn yambʌ Testigojob yaʼ ti lac tempa bʌ, ti colem tempa bʌ tac yicʼot ti yambʌ tempa bʌ.

Cheʼ bʌ maʼañic miʼ mejlel lac tempan lac bʌ, cheʼ bajcheʼ tiʼ yorajlel jiñi COVID-19, mi laj cʼʌn yan tac bʌ aplicación chaʼan mi lac mel jiñi lac tempa bʌ, i yaʼʌch baqui miʼ mejlel laj cʌn yambʌ Testigojob i bajñelobto bʌ. Miʼ mejlel laj qʼuel bajcheʼ yilal miʼ ñusan i yasignación tac yicʼot bajcheʼ yilal miʼ yʌcʼ i comentario tac (1 Ti. 6:11, 12). Cheʼ jaʼel, cheʼ bʌ miʼ yujtel jiñi tempa bʌ mi lac mejlel ti tʼan ti alʌ grupo tac yaʼ ti sala. Yambʌ jiñʌch cheʼ jiñi hermanojob miʼ tempañob i bʌ ti internet chaʼan miʼ jumucʼ ñusañob i bʌ. Yaʼi miʼ mejlel laj cʌn bajcheʼ yilal tiʼ tojlel yambʌlob yicʼot bajcheʼ yilal i melbal (1 P. 3:4). Cheʼ bʌ miʼ cʌñob majlel i bʌ, mi caj i qʼuelob mi lajal chuqui yom i tajob, mi laj bʌ weñob i melbal yicʼot miʼ mucʼʌch i laja tajob i bʌ.

Cheʼ bʌ juntiquil i bajñelto bʌ miʼ jacʼ jiñi principio tac cheʼ bʌ mi caj i sʌclan majqui mi caj i ñujpuñel yicʼot, tijicña mi caj i yajñel tiʼ ñujpuñel. Cheʼʌch bajcheʼ miʼ yʌl jiñi proverbio: «Jiñi muʼ bʌ i taj wem bʌ i yijñam [o wem bʌ i ñoxiʼal] lajal bajcheʼ woliʼ taj junchajp wen lets bʌ i tojol i utsʼat miʼ qʼuejlel ti Jehová» (Pr. 18:22, TNM).