1. ¿Chucoch maʼañic miʼ lajiñonla Jehová yicʼot yambʌlob?

JEHOVÁ miʼ mulan cheʼ mach junlajalic chuqui tac an. Ili miʼ cʼotel laj qʼuel ti tsaʼ bʌ i mele (pʌtʌ) tac bajcheʼ jiñi teʼ, jiñi añimal tac yicʼot ti lac tojlel. Mach junlajaloñicla, jin chaʼan Jehová maʼañic miʼ lajonla yicʼot yambʌlob. Muʼ bʌ i qʼuel jiñʌch am bʌ ti lac pusicʼal (1 S. 16:7). Cheʼ jaʼel, miʼ chʼʌm ti ñuc chuqui muʼ bʌ i mejlel lac mel, chuqui maʼañic bʌ miʼ mejlel lac mel yicʼot jiñi ñusʌbil bʌ lac chaʼan. I mach ñumeñic ti pʼis chuqui miʼ cʼajtibeñonla. Yom mi lac lajin Jehová i cheʼ yom mi laj qʼuel lac bʌ cheʼ bajcheʼ miʼ qʼuelonla. Mi cheʼʌch mi lac mel mi caj lac pʌs chaʼan woli (choncol) laj cʼʌn lac ñaʼtʌbal i mach ñumeñic chuqui mi caj lac ñaʼtan ti lac tojlel (Ro. 12:3).

2. ¿Chucoch mach yomic mi lac lajin lac bʌ la quicʼot yambʌlob?

² Weñʌch cheʼ mi laj qʼuel juntiquil hermano wen yujil bʌ subtʼan (He. 13:7). Jiñi miʼ mejlel i coltañonla chaʼan mi lac sujtel ti ñumen wem bʌ xcʌntesa (Fil. 3:17). Pero mach weñic cheʼ bʌ mi lac wen qʼuel juntiquil chaʼan jach mi lac lajeʼ lac bʌ la quicʼot i mi laj qʼuel majqui ñumen yujil. Cheʼ mi lac lajin lac bʌ la quicʼot yambʌlob miʼ mejlel ti cʼotel lac tsʼaʼleñob, mi la cubin lac chʼijyemlel o mi la cubin chaʼan maʼañic laj cʼʌjñibal. Cheʼ bajcheʼ tsaʼix laj qʼuele ti yambʌ estudio, mi tsaʼ lac ñopo lac pʌs chaʼan ñumen an laj cʼʌjñibal bajcheʼ yambʌ hermanojob yaʼ ti congregación, mi caj lac taj wocol cheʼ bajcheʼ añonla la quicʼot Jehová. Jin chaʼan miʼ subeñonla ti wem bʌ tʼan: «Pero jujuntiquil yom miʼ bajñel tsajin i melbal, i cheʼ bajcheʼ jiñi añʌch chucoch tijicña mi caj i yubin i bʌ chaʼan jiñi tsaʼ bʌ i mele, i mach cʼʌñʌlic miʼ laj i bʌ yicʼot yambʌ» (Gá. 6:4, TNM).

3. ¿Chuqui tac jiñi tajbil bʌ a chaʼan tiʼ yeʼtel Jehová muʼ bʌ i yʌqʼueñet a tijicñʌyel?

 ³ Jehová yom chaʼan mi la cubin lac tijicñʌyel chaʼan chuqui melbil lac chaʼan tiʼ tojlel. Jumpʼejl ejemplo, mi tsaʼix lac chʼʌmʌ jaʼ, yom mi la cubin lac tijicñʌyel. Cheʼʌch tsaʼ lac ñaʼta lac mel come mi laj cʼuxbin Jehová. Laʼcu lac ñaʼtan chuqui weñʼesʌbil bʌ lac chaʼan cʼʌlʌl ti jimbʌ ora. Tajol muqʼuix lac ñumen mulan lac pejcan jiñi Biblia i tajol jiñi la coración tac ñumen weñix mi lac mel (Sal. 141:2). Tajol ñumen weñix bajcheʼ mi lac tech tʼan yicʼot bajcheʼ mi laj cʼʌn jiñi la queʼtijib tac chaʼan bʌ subtʼan. Cheʼ jaʼel, yicʼot i coltaya Jehová tajol ñumen weñix mi lac tsʼʌctesan jiñi la queʼtel (troñel) bajcheʼ ñoxiʼal o ijñamʌl o bajcheʼ tatʌl ñaʼʌl. Miʼ mejlel lac wen ubin lac tijicñʌyel chaʼan pejtelel ili tajbil bʌ lac chaʼan.

4. ¿Chuqui mi caj laj qʼuel ti ili estudio?

⁴ Miʼ mejlel laj coltan yambʌlob chaʼan miʼ yubiñob i tijicñʌyel tiʼ melol i yeʼtel Jehová i chaʼan maʼañic miʼ lajiñob i bʌ yicʼot yambʌlob. Ti ili estudio mi caj laj qʼuel bajcheʼ miʼ mejlel i coltañob i yalobil jiñi tatʌlob, bajcheʼ miʼ mejlel i coltañob i bʌ jiñi ñujpuñemoʼ bʌ, i bajcheʼ jiñi ancianojob yicʼot jiñi hermanojob miʼ mejlel i coltañob yambʌ i yermañujob. Tiʼ yujtibal, mi caj laj qʼuel principio tac muʼ bʌ caj i coltañonla chaʼan jiñi muʼ bʌ lac ñaʼtan lac mel jiñʌch muʼ bʌ mejlel lac mel i mach ñumeñic ti pʼis.

5. Cheʼ bajcheʼ miʼ yʌl Efesios 6:4, ¿chuqui mach yomic miʼ melob jiñi tatʌlob?

⁵ Jiñi tatʌlob mach yomic miʼ lajiñob i yalobilob yicʼot yambʌ, i mach yomic ñumen ti pʼis chuqui miʼ cʼajtibeñob. Come cheʼ bajcheʼ jiñi mucʼ jach caj i yʌqʼueñob i chʼijyemlel i pusicʼal (pejcan Efesios 6:4). Juntiquil hermana i cʼabaʼ Sachiko * miʼ yʌl: «Jiñi c maestrojob yomob chaʼan ñumen cʼʌjquem mic locʼsan jiñi j calificación cheʼ bajcheʼ jiñi yambʌ c piʼʌlob tij clase. Cheʼ jaʼel, jiñi c mamá yom chaʼan wem bʌ alumnajon chaʼan wen chuqui miʼ ñaʼtañob jiñi c maestrojob yicʼot jiñi c papá come mach testigojic. Yom tsiʼ yʌlʌ chaʼan ñoj wen mic loqʼuel tij calificación, pero jiñi wocolʌch. Añix ora tsaʼ loqʼuiyon ti escuela, i anquese cabʌl chuquiyes mic mel an qʼuiñil mi cubin chaʼan Jehová mach ñuquic miʼ qʼuelon».

6. ¿Chuqui miʼ mejlel i cʌñob jiñi tatʌlob ti jiñi muʼ bʌ i yʌl Salmo 131:1, 2?

⁶ Jiñi tatʌlob an chuqui ñuc bʌ i cʼʌjñibal miʼ mejlel i cʌñob yaʼ ti Salmo 131:1, 2  (pejcan). Jiñi rey David tsiʼ yʌlʌ: «Maʼanic mic mel c pusicʼal chaʼan jini ñuc tac bʌ am bʌ ti a wenta, mach bʌ anic mic chʼʌmben isujm [o jiñi mach bʌ mejlic taj]». Come an i pecʼlel tsaʼ jach i ‹ñʌchʼchoco i pusicʼal›. Ili miʼ pʌsben jiñi tatʌlob chaʼan yom añob i pecʼlel cheʼ bʌ an chuqui miʼ pijtañob tiʼ tojlel yicʼot tiʼ tojlel jiñi i yalobilob. Yom miʼ chʼʌmob ti ñuc chuqui yujiloʼ bʌ melol yicʼot jiñi maʼañic bʌ cheʼ bʌ an chuqui mi caj i subeñob jiñi i yalobilob chaʼan miʼ melob chaʼan cheʼ jiñi wen miʼ yubiñob i bʌ. Juntiquil hermana i cʼabaʼ Marina miʼ cʼajtesan: «Jiñi c mamá maʼañic baʼ ora tsiʼ lajayon quicʼot jiñi uxtiquil querañob mi jiñicto yicʼot yambʌ alobob. Tsiʼ cʌntesayon chaʼan ti lac pejtelel mach junlajalic chuqui la cujil melol yicʼot chaʼan ti lac pejtelel miʼ qʼuelonla ti ñuc Jehová. Wocolix i yʌlʌ jiñi c mamá maʼañic baʼ ora mi lac laj c bʌ quicʼot yambʌlob».

7, 8. ¿Bajcheʼ miʼ mejlel i qʼuel ti ñuc i yijñam jiñi wiñic?

⁷ Jiñi hermanojob yom miʼ qʼuelob ti ñuc i yijñam (1 P. 3:7). Ili yom i yʌl chaʼan yom miʼ pʌsbeñob chaʼan miʼ cʼuxbiñob yicʼot chaʼan miʼ qʼuelob ti ñuc. ¿Bajcheʼ miʼ mejlelob i mel? Chaʼan miʼ pʌsob chaʼan mucʼʌch i qʼuelob ti ñuc mach yomic ñumen ti pʼis chuqui miʼ cʼajtibeñob mi yomicto miʼ lajob yicʼot yambʌ xʼixicob. ¿Chucoch mach yomic miʼ lajob i yijñam yicʼot yambʌ xʼixicob? Laʼ laj qʼuel tiʼ tojlel jiñi hermana Rosa. Jiñi i ñoxiʼal mach bʌ i testigojic Jehová ñʌmʌl i laj yicʼot yambʌ xʼixicob. Jiñi i tʼan tac mach cojach an i yʌqʼue i yubin chaʼan maʼañic i cʼʌjñibal, an i yʌqʼue i ñaʼtan jaʼel chaʼan maʼañic majqui miʼ cʼuxbin. Rosa miʼ yʌl: «Tiʼ pejtelel ora com chaʼan mij cʼajtesʌbentel chaʼan Jehová miʼ qʼuelon ti ñuc». Pero jiñi xñoptʼañob ñujpuñemoʼ bʌ miʼ qʼuelob ti ñuc i yijñam come yujilob chaʼan cheʼ bajcheʼ jiñi, woli (yʌquel) i cʌntañob i bʌ tiʼ chaʼticlelob yicʼot bajcheʼ añob tiʼ tojlel Jehová. *

⁸ Jiñi hermanojob muʼ bʌ i qʼuelob ti ñuc i yijñam, wen chuqui miʼ yʌlob tiʼ tojlelob, miʼ subeñob chaʼan miʼ cʼuxbiñob yicʼot chaʼan weñʌch chuqui miʼ melob (Pr. 31:28, 29). Jiñʌch tsaʼ bʌ i mele jiñi i ñoxiʼal Katerina, tsaʼ bʌ ajli yaʼ ti yambʌ estudio, chaʼan miʼ yʌqʼuen i yubin chaʼan añʌch i cʼʌjñibal. Cheʼ bʌ Katerina chutto, jiñi i mamá mach yomic i qʼuel, i miʼ lajeʼ yicʼot yambʌ xchʼocob yicʼot i yamigajob jiñi Katerina. Jin chaʼan, Katerina tsaʼ caji i laj i bʌ yicʼot yambʌlob, i cheʼʌch tsaʼ caji i bej mel cheʼ i cʌñʌyix jiñi i sujmlel. Pero jiñi i ñoxiʼal tsiʼ colta chaʼan mach cheʼic miʼ mel bajcheʼ jiñi, i chaʼan pʼisbil jach miʼ qʼuel i bʌ. Katerina miʼ yʌl: «Jiñi c ñoxiʼal miʼ cʼuxbiñon, wen chuqui miʼ subeñon cheʼ bʌ an chuqui wem bʌ mic mel yicʼot miʼ tajon ti tʼan ti oración. Cheʼ jaʼel, miʼ cʼajtesʌbeñon jiñi wen tac bʌ i melbal (chaʼlibal) Jehová yicʼot miʼ coltañon c tojʼesan cheʼ an chuqui mach weñic mic ñaʼtan».

9, 10. ¿Bajcheʼ tsiʼ coltayob jiñi ancianojob juntiquil hermana ñʌmʌl bʌ i laj i bʌ yicʼot jiñi yambʌlob?

⁹ ¿Bajcheʼ miʼ mejlel i coltañob jiñi ancianojob jiñi ñʌmʌl bʌ i lajob i bʌ yicʼot yambʌlob? Laʼ laj cʌn tiʼ tojlel juntiquil hermana i cʼabaʼ Hanuni, cheʼ bʌ chutto maʼañic baʼ ora tsaʼ wen subenti chaʼan an chuqui wem bʌ miʼ mel. Miʼ yʌl: «Wen cujil bʌqʼuen i tsaʼ c ñaʼta chaʼan ñumen weñob jiñi yambʌ xcolelob cheʼ bajcheʼ joñon. Cheʼ bajcheʼ cʼajal c chaʼan, tiʼ pejtelel ora an c laja c bʌ yicʼot yambʌlob». I cheʼ bʌ Testigojix, Hanuni tsaʼto caji i bej laj i bʌ yicʼot yambʌlob i jiñi tsiʼ yʌqʼue i yubin i bʌ chaʼan maʼañic chuqui woliʼ wen mel yaʼ ti congregación. Pero ili ora juntiquil precursora wen tijicña bʌ. ¿Chuqui tsiʼ colta?

¹⁰ Hanuni miʼ yʌl chaʼan jiñi ancianojob tsiʼ coltayob yicʼot tsiʼ pʌsbeyob i cʼuxbiya. Tiʼ subeyob chaʼan miʼ qʼuelob ti ñuc yicʼot chaʼan  añʌch wem tac bʌ i melbal. Hanuni miʼ yʌl: «An qʼuiñil jiñi ancianojob tiʼ subeyoñob chaʼan mij coltañob jiñi hermanajob yomoʼ bʌ coltʌntel. Jiñi tsiʼ yʌqʼueyon cubin chaʼan añʌch j cʼʌjñibal yaʼ ti congregación. Cʼajal c chaʼan chaʼan jiñi ancianojob tsiʼ yʌqʼueyoñob wocolix cʌlʌ cheʼ tsaʼ j colta chaʼtiqui uxtiquil hermanajob xcolelobto bʌ. I cheʼ jiñi tsiʼ pejcʌbeyoñob 1 Tesalonicenses 1:2, 3. Jiñi tsaʼ wen cʼoti tic pusicʼal. Wocolix i yʌlʌ jiñi wem bʌ i yeʼtelob jiñi ancianojob, wʌle cujil chaʼan añʌch j cʼʌjñibal tiʼ yorganización Jehová».

11. Cheʼ bajcheʼ miʼ yʌl Isaías 57:15, ¿bajcheʼ miʼ mejlel laj coltañob ‹jiñi añoʼ bʌ i wocol›?

¹¹ (Pejcan Isaías 57:15). Jehová miʼ wen cʼojoʼtan ‹jiñi añoʼ bʌ i wocol›. Ti lac pejtelel, mach cojach jiñi ancianojob, miʼ mejlel lac ñuqʼuesʌben i pusicʼal jiñi cʼuxbibil bʌ la quermañujob cheʼ bʌ miʼ yubiñob i bʌ bajcheʼ jiñi. Junchajp bajcheʼ miʼ mejlel lac mel jiñʌch cheʼ bʌ tiʼ pejtelel lac pusicʼal mi lac pʌsbeñob chaʼan mi lac chʼʌmob ti ñuc. Jehová yom chaʼan mi lac pʌsbeñob bajcheʼ cʼamel miʼ cʼuxbin jiñi i tiñʌmeʼob (Pr. 19:17). Yambʌ bajcheʼ miʼ mejlel laj coltañob jiñʌch cheʼ bʌ mi lac pʌs lac pecʼlel. Maʼañic mi laj cʌlʌx acʼ lac bʌ ti qʼuelol ti ñuc come mach la comic chaʼan mi lac tsʼaʼlentel. La com laj cʼʌn chuqui la cujil melol yicʼot jiñi lac ñaʼtʌbal chaʼan mi lac ñuqʼuesʌben lac bʌ lac pusicʼal (1 P. 4:10, 11).

12. ¿Chucoch jiñi wiñicob xʼixicob añoʼ bʌ i pecʼlel tsiʼ mulayob ajñel yicʼot Jesús? (Qʼuele jiñi dibujo am bʌ tiʼ tejchibal).

¹² Cabʌl chuqui miʼ mejlel laj cʌn chaʼan bajcheʼ yom mi lac mel tiʼ tojlel yambʌlob cheʼ bʌ mi lac tsajin bajcheʼ yilal tsiʼ mele Jesús tiʼ tojlel jiñi xcʌntʼañob i chaʼan. Anquese juntiquil wiñic wen ñuc bʌ cʼʌlʌl ti wajali, tsiʼ pʌsʌ chaʼan uts yicʼot chaʼan pecʼ miʼ mel i bʌ (Mt. 11:28-30). Maʼañic tiʼ subu ñumel chaʼan cʌlʌx i ñaʼtʌbal. Cheʼ bʌ tsiʼ chaʼle cʌntesa tsiʼ cʼʌñʌ tʼan tac mach bʌ wen wocolic i tsiʼ cʼʌñʌ wen utsʼatax bʌ ejemplo tac tsaʼ bʌ cʼoti tiʼ pusicʼal jiñi wiñicob xʼixicob (quixtañujob) añoʼ bʌ i pecʼlel (Lc. 10:21). Jesús tsiʼ yʌqʼue i yubin jiñi wiñicob xʼixicob chaʼan añob i cʼʌjñibal miʼ qʼuejlelob ti Dios, mach cheʼic tsiʼ mele bajcheʼ jiñi ñucoʼ bʌ i yeʼtel ti ñopbalʌl muʼ bʌ i chanʼesañob i bʌ (Jn. 6:37). Tiʼ pejtelel ora tsiʼ pʌsʌ chaʼan junlajal miʼ qʼuel ti ñuc jiñi wiñicob xʼixicob.

13. ¿Chucoch mi la cʌl chaʼan Jesús tsiʼ pʌsbe i yutslel yicʼot i cʼuxbiya jiñi xcʌntʼañob i chaʼan?

¹³ Jesús tsiʼ pʌsbe i yutslel yicʼot i cʼuxbiya jiñi xcʌntʼañob i chaʼan. Yujil chaʼan mach junlajalic chuqui yujilob melol yicʼot chuqui woliʼ ñusañob, jin chaʼan mach junlajalic jiñi eʼtel muʼ bʌ mejlel i yʌqʼuentelob i mel i mach junlajalic chuqui miʼ mejlel i melob ti subtʼan. Pero Jesús tsiʼ qʼuele ti ñuc cheʼ bʌ miʼ chaʼleñob wersa tiʼ pejtelel i pusicʼal. Cheʼʌch miʼ mejlel laj qʼuel cheʼ bʌ tsiʼ yʌcʼʌ jiñi lajiya chaʼan jiñi talento tac. Ti ili relato, jiñi yumʌl tsiʼ yʌqʼue eʼtel jujuntiquil jiñi xʼeʼtelob i chaʼan «cheʼ bajcheʼ añob i cʼʌjñibal» o cheʼ bajcheʼ cʼamel miʼ mejlelob i mel. Ti jiñi chaʼtiquil xʼeʼtelob wem bʌ tsiʼ meleyob i yeʼtel an juntiquil tsaʼ bʌ i ñumen chaʼle ganar. Pero jiñi i yumob tiʼ subeyob jiñi jach bʌ tʼan: «Utsʼat bajcheʼ tsaʼ chaʼle. Utsʼatet xucʼul bʌ xʼeʼtelet» (Mt. 25:14-23).

14. Cheʼ bajcheʼ Jesús, ¿bajcheʼ yilal yom lac melbal tiʼ tojlel yambʌlob?

¹⁴ Jesús miʼ pʌsbeñonla i yutslel yicʼot i cʼuxbiya. Yujil chaʼan mach junlajalic chuqui miʼ mejlel lac mel yicʼot bajcheʼ yilal mi lac ñusan, i tijicña miʼ yubin i bʌ cheʼ bʌ miʼ qʼuel chaʼan mi lac chaʼlen wersa lac mel bajcheʼ cʼamel mi lac mejlel. ¿Bajcheʼ miʼ mejlel lac lajin Jesús? Mach la comic chaʼan juntiquil hermano maʼañic i cʼʌjñibal miʼ yubin i bʌ o miʼ quisñin i bʌ chaʼan mach cabʌlic chuqui miʼ mejlel i mel cheʼ bajcheʼ joñonla. Yom bʌ mi lac mel jiñʌch cheʼ mi lac sʌclan bajcheʼ mi la cʌqʼuen  i yubin i tijicñʌyel jiñi hermanojob chaʼan chuqui woli bʌ i melob tiʼ tojlel Jehová.

15, 16. ¿Bajcheʼ tsiʼ colta juntiquil hermana cheʼ pʼisbil jach chuqui tsiʼ ñaʼta i mel?

¹⁵ Cheʼ mi lac ñaʼtan chuqui com bʌ lac mel tiʼ yeʼtel Jehová miʼ yʌqʼuen i sujmlel jiñi laj cuxtʌlel. Pero yomʌch mi lac chʼʌm ti ñuc jiñi muʼ bʌ i mejlel lac mel yicʼot bajcheʼ yilal woli lac ñusan, mach yomic mi lac lajeʼ lac bʌ yicʼot yambʌlob. Come cheʼ bajcheʼ jiñi, mucʼ jach caj lac taj lac chʼijyemlel (Lc. 14:28). Laʼ laj qʼuel jiñi ejemplo tiʼ tojlel juntiquil precursora i cʼabaʼ Midori.

¹⁶ Cheʼ bʌ Midori chutto, jiñi i papá mach bʌ i testigojic Jehová tsiʼ yʌqʼue i yubin quisin cheʼ bʌ miʼ lajeʼ yicʼot yambʌ i yerañob yicʼot jiñi i piʼʌlob ti clase. Midori miʼ yʌl chaʼan maʼañic i cʼʌjñibal tsiʼ yubi i bʌ. Pero cheʼ bajcheʼ tsaʼ ñumi majlel jiñi jabil weñix tsaʼ caji i yubin i bʌ. Midori miʼ yʌl: «Tsaʼ caji c pejcan jiñi Biblia ti jujumpʼejl qʼuin come miʼ yʌqʼueñon i ñʌchʼtʌlel c pusicʼal i tsiʼ yʌqʼueyon cubin chaʼan Jehová miʼ cʼuxbiñon». Cheʼ jaʼel, pʼisbil jach chuqui tsiʼ ñaʼta i mel tiʼ yeʼtel Jehová i tsiʼ cʼajtibe i coltaya chaʼan miʼ mejlel i mel. Cheʼ bajcheʼ jiñi, tijicña tsiʼ yubi i bʌ chaʼan jiñi mucʼʌch bʌ i mejlel i mel tiʼ chaʼan bʌ Jehová.

17. ¿Bajcheʼ miʼ mejlel i chʌn tsijibtesañob majlel i ñaʼtʌbal jiñi xñoptʼañob, i baqui bʌ i wenlel mi caj i tajob?

¹⁷ Mach ti orajic miʼ mejlel lac waʼ locʼ ti la col jiñi pensar tac mach bʌ weñic yicʼot jiñi am bʌ ti lac pusicʼal. Jin chaʼan, Jehová miʼ subeñonla chaʼan yom mi lac chʌn mel ti tsijib jiñi lac ñaʼtʌbal (Ef. 4:23, 24). Pero chaʼan miʼ mejlel lac mel yom mi lac chaʼlen oración, mi lac pejcʌben i Tʼan Dios yicʼot mi lac wen ñaʼtan. Mach laj cʌy lac mel iliyi i laʼ laj cʼajtiben Jehová chaʼan miʼ yʌqʼueñonla lac pʼʌtʌlel. Jiñi chʼujul bʌ i yespíritu  mi caj i coltañonla chaʼan maʼañic mi lac bej lajeʼ lac bʌ yicʼot yambʌlob. Jehová mi caj i coltañonla laj qʼuel mi woli lac chañʼesan lac bʌ o mi an majqui woli lac tsʼaʼlen, chaʼan ti orajach mi laj cʌy lac mel.

18. ¿Bajcheʼ miʼ ñuqʼuesʌbeñet a pusicʼal muʼ bʌ i yʌl 2 Crónicas 6:29, 30?

¹⁸ (Pejcan 2 Crónicas 6:29, 30). Jehová miʼ qʼuel lac pusicʼal. Cheʼ jaʼel, yujil chaʼan woli lac chaʼlen wersa chaʼan maʼañic miʼ mʌlbeñonla (jotbeñonla) ili pañimil (mulawil) yicʼot jiñi lac sajtemal tac. I cheʼ bʌ miʼ qʼuel bajcheʼ woli lac chaʼlen wersa ñumento miʼ cʼuxbiñonla.

19. ¿Chuqui ti ejemplo miʼ cʼʌn Jehová chaʼan miʼ yʌqʼueñonla lac ñaʼtan bajcheʼ yubil miʼ yubin i bʌ ti lac tojlel?

¹⁹ Chaʼan mi lac ñaʼtan jiñi cʼuxbiya muʼ bʌ i yubin Jehová ti lac tojlel miʼ cʼʌn jiñi ejemplo chaʼan juntiquil ñaʼʌl muʼ bʌ i wen cʼuxbin i yalʌl (Is. 49:15). Jiñi hermana Rachel miʼ yʌl: «Jiñi calʌ chʼoc Stephanie tsiʼ yila pañimil (chʼocʼa) cheʼ maxto i yorajlelic. Cheʼ bʌ cojaxto tsaʼ j qʼuele maxto añic chuquiyes yilal i cʌntʌntelto yom. Ti jiñi ñaxam bʌ uw tsaʼ ajñi ti jumpʼejl incubadora, pero jiñi doctor tiʼ subeyon chaʼan miʼ mejlel c mecʼ ti jujumpʼejl qʼuin. Jiñi tsiʼ coltayon lojon chaʼan wen lʌcʼʌl mi lon cubin lon c bʌ. Wʌle añix 6 i jabilel i ñumen chʼoʼchʼoc bajcheʼ jiñi yambʌ alobob lajaloʼ bʌ i jabilel yicʼot, pero mic wen cʼuxbin tiʼ pejtelel c pusicʼal come tsiʼ chaʼle wersa chaʼan maʼañic miʼ chʌmel (sajtel). An i wen aqʼueyon c tijicñʌyel». Cheʼ bʌ Jehová miʼ qʼuel chaʼan mi lac chaʼlen wersa la cʌqʼuen chuqui wen miʼ wen cʼuxbiñonla jaʼel. ¿Mach ba muqʼuic i wen ñuqʼuesan lac pusicʼal cheʼ la cujil iliyi?

20. ¿Chucoch miʼ mejlel la cubin lac tijicñʌyel?

²⁰ Jujuntiquilonla i wiñiconbʌla Jehová añʌch laj cʼʌjñibal tiʼ familia yicʼot mi laj qʼuejlel ti ñuc. Jehová maʼañic tsiʼ yʌqʼueyonla laj cʌn come ñumen weñonla bajcheʼ yambʌlob, chaʼañʌch tsiʼ qʼuele lac pusicʼal i tsiʼ qʼuele chaʼan an lac pecʼlel, chaʼan la comʌch chaʼan mi laj cʌntesʌntel yicʼot chaʼan la comʌch laj qʼuextan lac pensar yicʼot lac melbal (Sal. 25:9). Miʼ mejlel lac ñop chaʼan tijicña miʼ yubin i bʌ cheʼ bʌ mi lac melben i yeʼtel cheʼ bajcheʼ cʼamel mi lac mejlel. Cheʼ mi laj cuch wocol yicʼot cheʼ xucʼulonla mi lac pʌs chaʼan toj lac pusicʼal yicʼot chaʼan utsʼat lac pusicʼal (Lc. 8:15). Jin chaʼan, laʼ lac chaʼlen wersa chaʼan mi la cʌqʼuen Jehová jiñi ñumen wem bʌ ti lac tojlel. Mi cheʼʌch mi lac mel, tijicña mi caj la cubin lac bʌ chaʼan jiñi tsaʼ bʌ lac mele.