1, 2. ¿Chucoch miʼ coltañonla muʼ bʌ i yʌl Isaías 65:16, 17 chaʼan mi lac bej cuch jiñi wocol?

«¡MACH LUJBʼAQUET!». Jiñʌch i cʼabaʼ jiñi uxpʼejl bʌ qʼuin colem tempa bʌ ti 2017. Ti jiñi colem tempa bʌ tsaʼ laj cʌñʌ bajcheʼ miʼ mejlel laj cuch jiñi wocol tac. Tsaʼix ñumi chʌmpʼejl jab i unto baʼañonla. Woli (choncol) lac bej cuch jiñi wocol ti ili pañimil.

² ¿Chuqui ti wocol tsaʼ jaxto bʌ lac poj ñusa? Tajol tsaʼ chʌmi juntiquil ti lac familia, juntiquil la camigo, an tsʌts bʌ laj cʼamʌjel, ñoxoñixla, an jontolil, an lac tsʼaʼlentel, an jiñi COVID-19, tsaʼ ñumi tsʌts bʌ icʼ jaʼal o yan tac bʌ. La comix chaʼan miʼ jilel pejtelel iliyi, ¿ñomach? Maʼañix baʼ ora mi caj lac ñaʼtan iliyi i maʼañix baʼ ora caj i yujtel (pejcan Isaías 65:16, 17).

3. ¿Chuqui yom mi lac mel ili ora, i chucoch?

³ Wocol bajcheʼ añonla ili ora i tajol ñumen wocolto miʼ cajel ti talto bʌ qʼuin (Mt. 24:21). Jin chaʼan, yom mi lac ñumen pʼʌtʼesan lac bʌ chaʼan mi lac ñumen cuch wocol. Jesús tsiʼ yʌlʌ chucoch yom mi lac mel: «Mi bej xucʼuletla cheʼ mi laʼ ñusan wocol mi quejel laʼ cotyʌntyel» (Lc. 21:19, WT). Junchajp muʼ bʌ caj i coltañonla, jiñʌch cheʼ mi lac ñaʼtan bajcheʼ jiñi yambʌlob miʼ ñusañob jiñi wocol lajal bʌ bajcheʼ lac chaʼan.

4. ¿Chucoch mi la cʌl chaʼan Jehová jiñʌch muʼ bʌ i ñumen cuch wocol?

⁴ ¿Majqui jiñi muʼ bʌ i ñumen ñusan wocol? Jehová. Mi tsaʼ  toj sajti a pusicʼal chaʼan i jacʼbal ili cʼajtiya, ñaʼtan iliyi: Ili pañimil an tiʼ cʼʌb jiñi Diablo, jin chaʼan cabʌl wocol. Jehová miʼ mejlel i jisan ili pañimil ti ili jach bʌ ora, pero wolito (yʌquelto) i pijtan chaʼan miʼ cʼotel i yorajlel (Ro. 9:22). Cheʼ bʌ muʼto caj i cʼotel jiñi ora, woliʼ bej cuch. Laʼ laj qʼuel 9 wocol woli bʌ i cuch.

5. ¿Bajcheʼ tsaʼ bibʼesʌbenti i cʼabaʼ Dios, i bajcheʼ yubil maʼ wubin a bʌ chaʼan jiñi?

⁵ I bibʼesʌntel i cʼabaʼ. Jehová miʼ cʼuxbin i cʼabaʼ i yom chaʼan miʼ qʼuejlel ti ñuc (Is. 42:8, TNM). Pero añix cheʼ bʌ 6 mil jab tsaʼ bibʼesʌbenti jiñi i cʼabaʼ (Sal. 74:10, 18, 23). Iliyi tsaʼ tejchi yaʼ ti pʌcʼʌbʌl Edén cheʼ bʌ jiñi Diablo (yom bʌ i yʌl «xjopʼtʼan») tsiʼ yʌlʌ chaʼan Dios woliʼ chʌquiben Adán yicʼot Eva junchajp i cʼʌjñibal bʌ i chaʼañob chaʼan tijicñayob (Gn. 3:1-5). Cʼʌlʌl ti jimbʌ ora miʼ yʌjlel chaʼan Jehová miʼ chʌquibeñonla jiñi i cʼʌjñibal bʌ lac chaʼan. Jesús tsiʼ bʌcʼña chaʼan miʼ ñumen bibʼesʌbentel i cʼabaʼ i Tat. Jin chaʼan, tsiʼ pʌsbe jiñi xcʌntʼañob i chaʼan chaʼan miʼ cʼajtiñob ti oración ili: «C Tat lojon añet bʌ ti panchan, laʼ chʼujutesʌntic a cʼabaʼ» (Mt. 6:9).

6. ¿Chucoch Jehová an i yʌcʼʌ ti ñumel cabʌl ora chaʼan miʼ tojʼesan jiñi wocol chaʼan bʌ i yumʌntel?

⁶ I contrajintel i yumʌntel. Jehová jin jach am bʌ tiʼ wenta miʼ chaʼlen yumʌntel ti Panchan yicʼot ti pañimil i jiñʌch ñumen wem bʌ yumʌl (Ap. 4:11). Pero jiñi Diablo an i ñopo i lotin jiñi ángelob yicʼot lac piʼʌlob chaʼan miʼ ñaʼtañob chaʼan Dios maʼañic tiʼ wenta jiñi. Ili wocol mach ti orajic miʼ mejlel ti tojʼesʌntel. Jehová tsiʼ pʌsʌ i ñaʼtʌbal cheʼ tsiʼ yʌcʼʌ chaʼan jiñi wiñicob miʼ bajñel yumañob i bʌ, cheʼ bajcheʼ jiñi, tsiquil miʼ cʌytʌl chaʼan mi maʼañic miʼ chʼʌmob ti ñuc Dios mach weñic miʼ loqʼuel chuqui miʼ melob (Jer. 10:23). Pero ili wocol mucʼʌch caj i tojʼesʌntel come Dios yujil pijt. Mi caj i tsictiyel chaʼan jiñʌch ñumen wem bʌ yumʌl i chaʼan cojach jiñi i Yumʌntel mi caj i chʼʌm tilel jiñi i sujm bʌ ñʌchʼtʌlel yicʼot tijicñʌyel.

7. ¿Majqui tsaʼ bʌ i chañʼesayob i bʌ ti Jehová, i chuqui mi caj i tumbentelob?

⁷ Chaʼtiqui uxtiquil i yalobilob tsiʼ chañʼesayob i bʌ. Jehová toj tsiʼ mele (pʌtʌ) jiñi ángelob yicʼot jiñi ñaxam bʌ wiñic yicʼot xʼixic. Pero Satanás (yom bʌ i yʌl «xcontra o xmʌctaya») tsiʼ yʌcʼʌ chaʼan Adán yicʼot Eva miʼ chañʼesañob i bʌ tiʼ tojlel Jehová anquese tojob. An yambʌ ángelob yicʼot lac piʼʌlob tsaʼ bʌ i chañʼesayob i bʌ jaʼel (Jud. 6). Cheʼto jaʼel, yaʼ ti tejclum Israel, jiñi tejclum yajcʌbil bʌ i chaʼan Dios, an tsaʼ bʌ caji i chañʼesañob i bʌ yicʼot i chʼujutesañob melbil tac jach bʌ dios (Is. 63:8, 10). Jin chaʼan, Jehová chʼijyem tsiʼ yubi i bʌ. Pero wolʌch i bej cuch i cheʼʌch mi caj i bej mel jinto miʼ jisan pejtelel jiñi muʼ bʌ i chañʼesañob i bʌ. Tijicña mi caj i yubiñob jiñi xucʼul bʌ i wiñicob woli bʌ i cuchob wocol jaʼel ti ili pañimil.

8, 9. ¿Chuqui tac ti lot miʼ yʌjlel tiʼ tojlel Jehová, i bajcheʼ mi lac pʌs chaʼan mach i sujmic?

⁸ Jiñi i lot tac jiñi Diablo. Cheʼ bʌ Satanás tsiʼ jopʼbe i mul Job, tsiʼ yʌcʼʌ ti ñaʼtʌntel chaʼan pejtelel jiñi muʼ bʌ i melbeñob i yeʼtel (troñel) Jehová woli jach i bajñel sʌclañob i wenlel (Job 1:8-11; 2:3-5). I cheʼʌch woliʼ bej mel ili ora (Ap. 12:10). Miʼ mejlel lac pʌs chaʼan Satanás juntiquilʌch xlot cheʼ mi lac lʌtʼ jiñi wocol tac i xucʼul mi la cajñel ti Jehová chaʼan laj cʼuxbiya. Mi mucʼʌch laj cuch jiñi wocol, Jehová mi caj i yʌqʼueñonla i bendición cheʼ bajcheʼ tsiʼ mele tiʼ tojlel Job (Stg. 5:11).

⁹ Satanás miʼ cʼʌn jiñi añoʼ bʌ i yeʼtel ti ñopbalʌl tac mach bʌ i sujmic chaʼan miʼ yʌlob chaʼan Jehová jontol yicʼot chaʼan i mulʌch pejtelel jiñi wocol am bʌ. Cheʼ bʌ miʼ chʌmel (sajtel) juntiquil alʌl, an muʼ bʌ i yʌlob  chaʼan Dios tsiʼ pʌyʌ majlel come yomto juntiquil i yángel. ¡Jumpʼejlʌch ñuc bʌ lot tiʼ contra Jehová! Pero joñonla la cujil baqui bʌ jiñi i sujmlel. Jin chaʼan, maʼañic mi la cʌqʼuen i mulin Dios cheʼ bʌ mi lac taj jumpʼejl tsʌts bʌ cʼamʌjel o an majqui miʼ chʌmel lac chaʼan. Mi lac ñop chaʼan ti jumpʼejl bʌ qʼuin mi caj i jisan jiñi wocol tac. Majqui jach miʼ ñʌchʼtañonla miʼ mejlel lac suben chaʼan Jehová yujilʌch cʼuxbiya. Cheʼ bajcheʼ jiñi, miʼ mejlel i pʌs chaʼan Satanás juntiquilʌch xlot (Pr. 27:11).

10. ¿Chuqui miʼ pʌsbeñonla Salmo 22:23, 24 tiʼ tojlel Jehová?

¹⁰ I wocol tac jiñi cʼuxbibil bʌ i wiñicob. Jehová wen yujil pʼuntaya. Jin chaʼan, cʼux miʼ yubin cheʼ bʌ mi lac ñusan wocol tac tiʼ caj jiñi tsʼaʼlentel, jumpʼejl cʼamʌjel o tiʼ caj lac sajtemal (pejcan Salmo 22:23, 24). Miʼ yubin jiñi lac wocol, yom i jisan i mucʼʌch caj i mel (laja yicʼot Éxodo 3:7, 8; Isaías 63:9). Mi caj i cʼotel i yorajlel chaʼan miʼ tsʼʌctesan ili tʼan: «Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora» (Ap. 21:4).

11. ¿Bajcheʼ yubil miʼ yubin Jehová cheʼ bʌ miʼ ñaʼtan jiñi xucʼul bʌ i wiñicob tsaʼ bʌ chʌmiyob?

¹¹ Cheʼ chʌmen jiñi i yamigojob. ¿Bajcheʼ yubil miʼ yubin Jehová cheʼ miʼ ñaʼtan jiñi xucʼul bʌ i wiñicob tsaʼix bʌ chʌmiyob? Chaʼ yomix i qʼuelob (Job 14:15). ¿Muʼ ba lac ñaʼtan bajcheʼ cʼamel miʼ ñaʼtan jiñi Abrahán, jiñi i yamigo? (Stg. 2:23). ¿O bajcheʼ cʼamel miʼ ñaʼtan Moisés, tsaʼ bʌ i pejca «tiʼ wut»? (Éx. 33:11). ¡Wen yomix i chaʼ ubiben i cʼay David yicʼot yambʌ salmistajob! (Sal. 104:33). Maʼañic ñajʌyem i chaʼan ili i yamigojob anquese chʌmeñobix (Is. 49:15). Jehová cʼajal i chaʼan bajcheʼ yilalob «come laj cuxulob» miʼ qʼuel (Lc. 20:38). Ti jumpʼejl bʌ qʼuin, mi caj i chaʼ chʼojyesañob, mi caj i ñʌchʼtʌbeñob i yoración yicʼot mi caj i mulʌbeñob jiñi i chʼujutesaya. Iliyi miʼ  ñuqʼuesan lac pusicʼal pejtelel jiñi am bʌ majqui chʌmen lac chaʼan, ¿ñomach?

12. ¿Chuqui jiñi ñumen cʼux bʌ miʼ yubin Jehová ili ora cheʼ cabʌl jax jontolil?

¹² Cheʼ jiñi jontoloʼ bʌ miʼ ticʼlañob yambʌlob. Cheʼ bʌ jiñi i contrajob tsiʼ chañʼesayob i bʌ yaʼ ti pʌcʼʌl bʌ Edén, Jehová tsaʼʌch i ñaʼta chaʼan ñumen wocolto miʼ cajel. Miʼ tsʼaʼlen jiñi jontolil, jiñi mach bʌ weñic yicʼot jiñi ticʼlʌntel am bʌ ili ora. Miʼ ñumen ñaʼtan jiñi wocol bʌ añob, bajcheʼ jiñi cʼuñoʼ bʌ mach bʌ añic miʼ mejlel i coltañob i bʌ, tajol jiñi mebaʼoʼ bʌ o jiñi viudajoʼ bʌ (Zac. 7:9, 10). Pero ñumen cʼuxto miʼ yubin cheʼ miʼ ticʼlʌntel o miʼ yotsʌntel ti cárcel jiñi i wiñicob. Jatetla woli bʌ laʼ ñusan jaʼel ili wocol miʼ mejlel laʼ ñop chaʼan Jehová miʼ cʼuxbiñetla ti laʼ pejtelel.

13. ¿Baqui bʌ melbalʌl mach bʌ weñic miʼ qʼuel Jehová ti jiñi lac piʼʌlob, i chuqui mi caj i mel?

¹³ Cheʼ woliʼ yʌsiyel majlel i melbal (chaʼlibal) jiñi lac piʼʌlob. Joñonla tsaʼ mejliyonla tiʼ yejtal Dios, pero Satanás miʼ mulan i jemonla. Tiʼ yorajlel Noé, cheʼ bʌ Jehová «tsiʼ qʼuele cabʌlix i jontolil winicob ti pañimil», «tsiʼ mele i pusicʼal [...] chaʼan tsiʼ mele winicob ti pañimil. Chʼijiyem i pusicʼal» (Gn. 6:5, 6, 11). ¿Tsaʼix ba tojʼa jiñi pañimil? Maʼañic. Jiñi Diablo miʼ mulan cheʼ weñix miʼ qʼuejlel jiñi tsʼiʼlel, mach yʌlʌyic mi juntiquil wiñic o juntiquil xʼixic mach bʌ ñujpuñemobic miʼ piʼleñob i bʌ o laj bʌ wiñicob o laj bʌ xʼixicob (Ef. 4:18, 19). I ñumen tijicñato miʼ yubin cheʼ bʌ juntiquil i wiñic Jehová miʼ chaʼlen mulil. Jehová mi caj i pʌs bajcheʼ cʼamel miʼ tsʼaʼlen baqui jach bʌ tsʼiʼlel cheʼ bʌ miʼ jilel i pijt.

14. ¿Chuqui woliʼ tumben jiñi wiñic jiñi Pañimil yicʼot añimal tac?

¹⁴ I jisʌntel jiñi Pañimil. Jiñi wiñicob mach cojach miʼ cʼʌñob i pʼʌtʌlel chaʼan miʼ jisañob i piʼʌlob, maʼañic woliʼ cʌntañob jaʼel jiñi Pañimil yicʼot jiñi añimal tac cheʼ bajcheʼ miʼ mulan Jehová (Ec. 8:9; Gn. 1:28). An científicojob muʼ bʌ i yʌlob chaʼan ti jiñi jabil tac talto bʌ, jiñi wiñicob miʼ mejlel i jisañob 1 millón añimal tac. ¡Jin chaʼan woliʼ wen pensariñob! Jin chaʼan, mi la cʌqʼuen wocolix i yʌlʌ Jehová cheʼ tsiʼ yʌcʼʌ i tʼan chaʼan mi caj i jisan «jini muʼ bʌ i jisañob pañimil» i chaʼan mi caj i sujtesan ti jumpʼejl Paraíso (Ap. 11:18; Is. 35:1).

15, 16. ¿Chuqui jiñi yom bʌ miʼ ñijcañonla chaʼan mi lac ñusan wocol la quicʼot Jehová? Tsictesan yicʼot jumpʼejl lajiya.

¹⁵ Laʼcu lac ñaʼtan pejtelel jiñi wocol woli bʌ i cuch Jehová cʼʌlʌl ti wajali (qʼuele jiñi recuadro « Wocol tac woli bʌ i cuch Jehová»). Jehová miʼ mejlel i jisan ti ora ili jontol bʌ pañimil. Pero ¡añʌch i coltayonla cheʼ bʌ miʼ pʌs i pijt! Laʼcu lac ñaʼtan ti ili lajiya. Jumpʼejl xñujpuñel woli bʌ i pijtañob i yalobil miʼ subentelob chaʼan jiñi alʌl cʼam mi caj i yilan pañimil (chʼocʼan), mach jalic cuxul mi caj i yajñel yicʼot wocol mi caj i ñusan. Anquese yujilob chaʼan mi caj i ñusañob cabʌl wocol, tijicñayob cheʼ bʌ mi caj i yilan pañimil. Miʼ ñusañob jiñi wocol tac chaʼan wen miʼ cosañob i yalobil come miʼ cʼuxbiñob.

¹⁶ Cheʼʌch miʼ yujtel ti lac tojlel jaʼel, xmulilonla mi la quilan pañimil come i pʼolbalonla Adán yicʼot Eva. Pero Jehová mucʼʌch i cʼuxbiñonla yicʼot miʼ cʌntañonla (1 Jn. 4:19). Jehová añʌch chuqui miʼ mejlel i mel ti lac tojlel. Tsaʼix i yajca jala mi caj i jisan jiñi wocol tac (Mt. 24:36). ¿Mach ba muqʼuic i ñijcañonla jiñi cʼuxbiya chaʼan mi lac ñusan wocol la quicʼot Jehová jiñʌch bajcheʼ jalel yom?

17. ¿Chucoch miʼ coltañonla laj cuch wocol muʼ bʌ i yʌl Hebreos 12:2, 3 tiʼ tojlel Jesús?

¹⁷ Jehová jiñʌch muʼ bʌ i ñumen cuch wocol.  Jesús tsiʼ laji ti wen. Cheʼ bʌ tsajñi wʌʼ ti Pañimil, tsiʼ cuchu jiñi i pʼajtʌl, i ticʼlʌntel yicʼot jiñi teʼ chaʼan bʌ wocol (pejcan Hebreos 12:2, 3). Tiʼ sujm, jiñi i yejemplo i Tat jiñʌch tsaʼ bʌ i colta i cuch i jiñʌch muʼ bʌ i mejlel i pʼʌtʼesañonla jaʼel.

18. ¿Bajcheʼ miʼ coltañonla 2 Pedro 3:9 chaʼan mi lac chʼʌmben i sujm chuqui woliʼ tajtʌl chaʼan jiñi i pijt Jehová?

¹⁸ (Pejcan 2 Pedro 3:9). Jehová yujil baqui ora ñumen wen chaʼan miʼ jisan ili jontol bʌ pañimil. Wocolix i yʌlʌ chaʼan jiñi i pijt, ili ora yonlel lac piʼʌlob miʼ melbeñob i yeʼtel yicʼot miʼ chʼujutesañob. Tiʼ pejtelelob miʼ yʌqʼueñob wocolix i yʌlʌ Jehová cheʼ woliʼ pʌs i pijt come tsaʼ mejli i yilañob pañimil, i cʼuxbiñob yicʼot i yʌqʼueñob i cuxtʌlel. Cheʼ bʌ mi lac taj jiñi lac chobejtʌbal cheʼ mi laj cuch cʼʌlʌl tiʼ yujtibal, mi caj i tsictiyel chaʼan weñʌch cheʼ Jehová tsiʼ cuchu jiñi wocol.

19. ¿Chuqui yom mi lac mel, i chuqui mi caj lac taj?

¹⁹ Jehová chʌn tijicña anquese Satanás woliʼ pʼol cabʌl wocol. Jiñi i yejemplo Jehová miʼ pʌsbeñonla chaʼan miʼ mejlel laj cuch jiñi wocol yicʼot lac tijicñʌyel (1 Ti. 1:11, TNM). Joñonla jaʼel miʼ mejlel lac pʌs jiñi lac tijicñʌyel cheʼ bʌ wolito lac pijtan chaʼan Jehová miʼ sʌqʼuesan jiñi i cʼabaʼ, miʼ pʌs chaʼan an tiʼ wenta miʼ chaʼlen yumʌntel i miʼ jisan jiñi jontolil yicʼot wocol tac. Laʼ lac chʌn chaʼlen wersa chaʼan mi laj cuch wocol i laʼ lac chʌn ñaʼtan chaʼan Jehová woliʼ cuch wocol jaʼel. Jiñʌch muʼ bʌ caj i ñuqʼuesan lac pusicʼal. Mi cheʼʌch mi lac mel mi caj i tsʼʌctiyel ti lac tojlel ili tʼan: «Tijicña jini muʼ bʌ i cuch wocol ti utsʼat, come cheʼ ñumenix i yilʌbentel i pusicʼal, mi caj i yʌqʼuentel i cuxtʌlel i wenta corona cheʼ bajcheʼ albil i chaʼan Dios. Dios mi caj i yʌqʼueñob pejtelel muʼ bʌ i cʼuxbiñob» (Stg. 1:12).