1. ¿Chuqui an i mele Jehová ti lac tojlel?

LAʼCU lac ñaʼtan bajcheʼ tsaʼ sujtiyonla tiʼ testigo Jehová. Ñaxan, an majqui tiʼ subeyonla jiñi «wen tʼan», tajol jiñi lac tatob, juntiquil lac piʼʌl ti eʼtel (troñel), lac piʼʌl ti escuela, o juntiquil Testigo woli (choncol) bʌ ti subtʼan ti ototʌl tac (Mr. 13:10). Cheʼ jiñi, an majqui tiʼ chaʼle wersa i tsiʼ yʌqʼue i yorajlel chaʼan miʼ pʌsbeñonla am bʌ ti Biblia. Wocolix i yʌlʌ jiñi, tsaʼ cʼoti laj cʼuxbin Jehová i tsaʼ laj cʌñʌ chaʼan miʼ cʼuxbiñonla jaʼel. Jehová tsiʼ pʌyʌyonla ochel tiʼ sujmlel. I wʌle, an lac pijtaya chaʼan mi lac chumtʌl tiʼ pejtelel ora come xcʌntʼañonla i chaʼan Jesucristo (Jn. 6:44). Mi la cʌqʼuen wocolix i yʌlʌ Jehová cheʼ tsiʼ cʼʌñʌ juntiquil lac piʼʌl chaʼan miʼ pʌsbeñonla jiñi i sujmlel i cheʼ miʼ yʌqʼueñonla lac melben i yeʼtel.

2. ¿Chuqui mi caj laj qʼuel ti ili estudio?

² Wʌle, laj cʌñʌyix jiñi i sujmlel, jin chaʼan miʼ mejlel laj coltan yambʌlob chaʼan miʼ yochelob jaʼel ti jiñi bij muʼ bʌ i yʌqʼueñob i taj i cuxtʌlel. An hermanojob mach bʌ wocolic miʼ yubiñob chaʼan miʼ chaʼleñob subtʼan ti ototʌl tac, pero wocol miʼ yubiñob chaʼan miʼ subeñob estudio yambʌlob o chaʼan miʼ yʌcʼob estudio. ¿Cheʼ ba mi la cujtel jaʼel? Mi cheʼʌchi, mi caj i coltañonla jiñi muʼ bʌ caj i yʌjlel ti ili estudio. Mi caj laj qʼuel chuqui miʼ ñijcañonla chaʼan mi lac sutqʼuin ti xcʌntʼan yambʌlob. Mi caj laj qʼuel jaʼel bajcheʼ miʼ mejlel lac ñusan jiñi wocol tac muʼ bʌ i mʌctañonla chaʼan mi la cʌcʼ jumpʼejl estudio. Pero mi caj lac ñaxan  qʼuel chucoch mach jiñic jach yom mi lac sub jiñi wen tʼan, yom mi lac chaʼlen cʌntesa jaʼel.

3. ¿Chucoch mi lac chaʼlen subtʼan?

³ Cheʼ bʌ Jesús wʌʼ an ti Pañimil, tsiʼ yʌqʼue jiñi xcʌntʼañob i chaʼan jumpʼejl eʼtel tʼoxbil bʌ ti chaʼpʼejl parte. Ñaxan, tiʼ subeyob chaʼan miʼ subob jiñi wen tʼan chaʼan bʌ i Yumʌntel Dios i tiʼ pʌsbeyob bajcheʼ miʼ melob (Mt. 10:7; Lc. 8:1). Tiʼ tsictesa chuqui yom miʼ melob cheʼ bʌ jiñi lac piʼʌlob miʼ jacʼob jiñi wen tʼan yicʼot cheʼ bʌ maʼañic miʼ jacʼob (Lc. 9:2-5). Tsiʼ wʌn alʌ jaʼel baqui jaxʌl mi caj i cʼotel jiñi subtʼan come tsiʼ yʌlʌ chaʼan mi caj i yubintel «tiʼ pejtelel pañimil» (Mt. 24:14; Hch. 1:8). Yom miʼ subob jiñi wen tʼan chaʼan bʌ i Yumʌntel Dios yicʼot chuqui mi caj i mel, mach yʌlʌyic bajcheʼ miʼ jacʼob jiñi lac piʼʌlob.

4. Cheʼ bajcheʼ miʼ yʌl Mateo 28:18-20, ¿chuqui yambʌ yom mi lac mel?

⁴ ¿Baqui bʌ jiñi i chaʼpʼejlel parte jiñi eʼtel tsaʼ bʌ i sube Jesús jiñi xcʌntʼañob i chaʼan? Tiʼ subeyob chaʼan yom miʼ cʌntesañob jiñi lac piʼʌlob chaʼan miʼ jacʼob pejtelel chuqui tsiʼ yʌlʌ. Pero ¿jin jach ba cheʼ ti ñaxam bʌ siglo miʼ cajel jiñi subtʼan yicʼot cʌntesa cheʼ bajcheʼ miʼ yʌlob chaʼtiqui uxtiquilob? Maʼañic, come Jesús tsiʼ yʌlʌ chaʼan ili wen ñuc bʌ eʼtel miʼ cajel cʼʌlʌl ili ora, «cʼʌlʌl tiʼ jilibal pañimil» (pejcan Mateo 28:18-20). Tajol Jesús tsiʼ yʌlʌ iliyi, cheʼ bʌ tsiʼ pʌsʌ i bʌ tiʼ tojlel ñumen ti 500 xcʌntʼañob i chaʼan (1 Co. 15:6). Ti jiñi tsaʼ bʌ pʌsbenti Juan, jamʌ tsiquil tsiʼ yʌlʌ chaʼan yom chaʼan pejtelel jiñi xcʌntʼañob miʼ coltañob yambʌ lac piʼʌlob chaʼan miʼ cʌñob Jehová (Ap. 22:17).

5. ¿Chuqui ti lajiya tsiʼ cʼʌñʌ Pablo ti 1 Corintios 3:6-9 chaʼan miʼ pʌs bajcheʼ miʼ taj i bʌ jiñi subtʼan yicʼot jiñi cʌntesa?

⁵ Jiñi apóstol Pablo tsiʼ laji jiñi eʼtel chaʼan bʌ i sutqʼuintel ti xcʌntʼan yambʌlob bajcheʼ pacʼ, i cheʼ bajcheʼ jiñi, tsiʼ pʌsʌ chaʼan mach jasʌlic jach yom mi lac chaʼlen pacʼ. Tsiʼ cʼajtesʌbe jiñi añoʼ bʌ ti Corinto: «Joñon tsac chaʼle pacʼ. Apolos tsiʼ mulu. [...] Jatetla i choletla Dios» (pejcan 1 Corintios 3:6-9). Jiñi xʼeʼtelonbʌla tiʼ cholel Dios mach muqʼuic jach lac chaʼlen pacʼ, mi lac mul jaʼlen yicʼot mi laj qʼuel bajcheʼ miʼ colel majlel (Jn. 4:35). Pero la cujil chaʼan Dios jiñʌch muʼ bʌ i yʌcʼ ti colel.

6. ¿Chuqui tac ochem ti jiñi la queʼtel bajcheʼ xcʌntesa?

⁶ Mi lac sʌclañob jiñi yomoʼ bʌ ajñel ti jiñi bij muʼ bʌ i pʌyob majlel i taj jiñi «cuxtʌlel mach bʌ añic miʼ jilel» (Hch. 13:48, TNM). Chaʼan miʼ sujtelob ti xcʌntʼan, yom mi laj coltañob 1) i ñaʼtan, 2) i ñopob i 3) i jacʼob jiñi woli (yʌquel) bʌ i cʌñob ti Biblia (Jn. 17:3; Col. 2:6, 7; 1 Ts. 2:13). Pejtelel jiñi hermanojob miʼ mejlel i coltañob jiñi estudiante cheʼ bʌ miʼ pʌsbeñob i cʼuxbiya yicʼot i yutslel cheʼ bʌ miʼ majlel ti tempa bʌ (Jn. 13:35). Jiñi xcʌntesa tajol yom miʼ yʌqʼuen i yorajlel yicʼot miʼ chaʼlen wersa i coltan «chaʼan miʼ jem jiñi wen tsʌts tac bʌ chucul» tiʼ tojlel (2 Co. 10:4, 5, TNM). Tajol miʼ ñumel cabʌl uw chaʼan mi laj coltan juntiquil chaʼan miʼ qʼuextan majlel jiñi i cuxtʌlel jinto miʼ mejlel ti chʼʌmjaʼ, pero tiʼ sujm wen ñucʌch jiñi.

7. ¿Chucoch mi lac chaʼlen subtʼan yicʼot mi lac sutqʼuin ti xcʌntʼan yambʌlob?

⁷ ¿Chucoch mi lac chaʼlen subtʼan yicʼot mi lac sutqʼuin ti xcʌntʼan yambʌlob? Ñaxan, come mi laj cʼuxbin Jehová. Cheʼ bʌ mi lac chaʼlen wersa subtʼan yicʼot mi lac sutqʼuin ti xcʌntʼan yambʌlob, mi lac pʌs chaʼan mi laj cʼuxbin Dios (1 Jn. 5:3). Laʼcu lac ñaʼtan iliyi: Jiñi laj cʼuxbiya ti Jehová tsiʼ ñijcayonla chaʼan mi lac majlel ti subtʼan ti ototʌl tac. ¿Wocol ba tsaʼ la cubi? Tajol cheʼʌchi. Tajol an lac bʌqʼuen  cheʼ bʌ tsaʼ cʼotiyonla ti jiñi ñaxam bʌ otot. Pero tsaʼ lac mele come la cujil chaʼan jiñʌch yom bʌ Jesús chaʼan mi lac mel. Tajol wʌle maʼañix mi lac wen bʌcʼñan jiñi subtʼan, pero ¿ixcu chaʼan mi la cʌcʼ jumpʼejl estudio? Tajol muʼto lac bʌcʼñan. Pero mi mucʼʌch laj cʼajtiben Jehová chaʼan miʼ coltañonla lac mʌlben (jotben) lac bʌqʼuen yicʼot chaʼan miʼ yʌqʼueñonla lac chʼejlel chaʼan mi la cʌcʼ jumpʼejl estudio, mucʼʌch i mejlel i coltañonla chaʼan mi lac ñumen mulan lac sutqʼuin ti xcʌntʼan yambʌlob.

8. Cheʼ bajcheʼ miʼ yʌl Marcos 6:34, ¿baqui bʌ jiñi i chaʼpʼejlel i sujmlel cheʼ mi laj cʌntesañob jiñi lac piʼʌlob?

⁸ I chaʼpʼejlel, mi lac pʌs jiñi i sujmlel come mi laj cʼuxbin lac piʼʌlob. Ti jumpʼejl bʌ qʼuin Jesús yicʼot jiñi xcʌntʼañob i chaʼan, wen lujbob come jumpʼejl qʼuin tiʼ chaʼleyob subtʼan, jin chaʼan tsiʼ sʌclayob baqui miʼ cʼajob i yo. Pero yonlel lac piʼʌlob woliʼ pijtañob. Jesús tsiʼ pʼuntayob i «cabʌl chuqui tsaʼ caji i cʌntesañob» (pejcan Marcos 6:34). ¿Chucoch tsiʼ mele jiñi? Come tsiʼ ñaʼta bajcheʼ an jiñi lac piʼʌlob i yom i coltañob. Yujil chaʼan woliʼ wen ñusañob wocol, i yomob jumpʼejl i pijtaya. Ili ora, jiñi lac piʼʌlob yomobʌch i pijtaya jaʼel anquese poj tijicñayob yilal. Lajalob bajcheʼ tiñʌmeʼ tac sajtem bʌ yicʼot pam pujquem bʌ, mach bʌ añic majqui miʼ pʌsbeñob bij. Jiñi apóstol Pablo tsiʼ yʌlʌ chaʼan maʼañobic i Dios yicʼot i pijtaya (Ef. 2:12). Añob ti jiñi bij «muʼ bʌ i majlel ti toj mulil» (Mt. 7:13). Jiñi laj cʼuxbiya yicʼot jiñi lac pʼuntaya miʼ ñijcañonla laj coltañob jiñi lac piʼʌlob yaʼ ti territorio cheʼ bʌ mi lac ñaʼtañob yicʼot cheʼ bʌ mi laj qʼuel bajcheʼ añob tiʼ chaʼan bʌ Dios. I jiñi ñumen wem bʌ miʼ mejlel lac mel jiñʌch cheʼ bʌ mi lac subeñob jumpʼejl estudio.

9. Cheʼ bajcheʼ miʼ yʌl Filipenses 2:13, ¿bajcheʼ miʼ mejlel i coltañonla Jehová?

⁹ Tajol maʼañic mi lac suben estudio juntiquil lac piʼʌl come la cujil chaʼan yom mi la cʌqʼuen cabʌl i yorajlel. Mi cheʼ bajcheʼ jiñi, laʼ lac suben Jehová bajcheʼ yubil mi la cubin i laʼ laj cʼajtiben i coltaya chaʼan mi lac mulan lac taj juntiquil yom bʌ i cʌn am bʌ ti Biblia (pejcan Filipenses 2:13). Jiñi apóstol Juan miʼ subeñonla chaʼan Dios mucʼʌch i jacʼ jiñi la coración cheʼ jiñi muʼ bʌ laj cʼajtin jiñʌch muʼ bʌ i mulan (1 Jn. 5:14, 15). Jin chaʼan, miʼ mejlel lac ñop chaʼan Jehová mucʼʌch caj i coltañonla lac mulan lac sutqʼuin ti xcʌntʼan yambʌlob.

10, 11. ¿Chucoch tajol maʼañic mi lac mulan la cʌcʼ jumpʼejl estudio?

¹⁰ La cujil chaʼan ñuc i cʼʌjñibal cheʼ mi lac sutqʼuin ti xcʌntʼan yambʌlob, pero an wocol tac muʼ bʌ i mʌctañonla chaʼan mi lac mel pejtelel chuqui la com. Laʼ laj qʼuel baqui tac bʌ yicʼot bajcheʼ miʼ mejlel lac ñusan.

¹¹ Maʼañic chuqui miʼ wen mejlel lac mel mi la cubin tiʼ caj jiñi wocol tac. Jumpʼejl ejemplo, an hermanojob ñoxobix bʌ o cʼamoʼ bʌ. Mi cheʼ woli lac ñusan bajcheʼ jiñi, laʼ lac ñaʼtan junchajp am bʌ i pʌsbeyonla jiñi COVID-19: An i pʌsbeyonla chaʼan miʼ mejlel la cʌcʼ estudio ti teléfono o ti Internet. Jin chaʼan, tajol miʼ mejlel la cʌcʼ jumpʼejl estudio anquese añonla ti la cotot. I mach jiñic jach jiñi, an yomoʼ bʌ estudio pero maʼañic miʼ mejlelob ti jiñi bʌ ora cheʼ bʌ miʼ chaʼleñob subtʼan jiñi hermanojob. ¿Muʼ ba i mejlel lac subeñob chaʼan mi la cʌqʼueñob estudio cheʼ bajcheʼ hora yomob, tajol ti wen sʌcʼan o ti acʼʌlel? Jesús tiʼ cʌntesa Nicodemo ti acʼʌlel come cheʼʌch tsiʼ mulaj Nicodemo (Jn. 3:1, 2).

12. ¿Chuqui uxchajp mi caj i coltañonla mi mach chajpʌbiloñicla chaʼan mi lac chaʼlen cʌntesa mi la cubin?

¹² Mach chajpʌbiloñicla chaʼan mi la cʌcʼ jumpʼejl estudio mi la cubin. Tajol mi lac ñaʼtan chaʼan anto chuqui yom mi laj cʌn o chaʼan  yomto mi lac sujtel ti wem bʌ xcʌntesa. Mi cheʼ mi la cubin bajcheʼ jiñi, laʼ lac ñaʼtan uxchajp muʼ bʌ i mejlel i coltañonla. Ñaxam bʌ, Jehová miʼ ñaʼtan chaʼan chajpʌbiloñʌchla chaʼan mi laj cʌntesan yañoʼ bʌ (2 Co. 3:5). I chaʼpʼejlel, Jesús, am bʌ i pʼʌtʌlel chaʼan bʌ miʼ mel pejtelel chuqui yom ti panchan yicʼot ti Pañimil, tiʼ subeyonla chaʼan mi lac chaʼlen cʌntesa (Mt. 28:18). I yuxpʼejlel, mach lac bajñelic. Cheʼ bajcheʼ tsiʼ mele Jesús, miʼ mejlel lac ñop chaʼan Jehová mi caj i coltañonla lac ñaʼtan chuqui mi la cʌl (Jn. 8:28; 12:49). Cheʼ jaʼel, mi lac mejlel ti tʼan la quicʼot jiñi am bʌ tiʼ wenta jiñi grupo chaʼan bʌ subtʼan, juntiquil chʼejl bʌ precursor o juntiquil xsubtʼan añix bʌ i ñaʼtʌbal chaʼan miʼ coltañonla chaʼan mi lac tech la cʌcʼ jumpʼejl estudio. Cheʼ mi lac majlel ti acʼ estudio la quicʼotob mi caj lac sujtel ti ñumen wem bʌ xcʌntesa.

13. ¿Chucoch yom mi lac ñʌmʼan laj cʼʌn jiñi tsijib eʼtijib tac muʼ bʌ i loqʼuel?

¹³ Wocol mi la cubin chaʼan mi lac ñʌmʼan laj cʼʌn jiñi tsijib eʼtijib tac. Tsaʼ qʼuextʌyi bajcheʼ tac mi la cʌcʼ estudio. Jiñi jun muʼ bʌ lac ñumen cʼʌn wʌleʼli, jiñʌch jiñi libro Tijicña maʼ mejlel ti chumtʌl tiʼ pejtelel ora, i yomʌch mi lac chajpan lac bʌ chaʼan mi la cʌcʼ jiñi estudio yicʼot mach lajalic mi lac mel bajcheʼ ti wajali. Mach cabʌlix párrafo mi lac pejcan, i mi lac ñumen chaʼlen tʼan la quicʼot jiñi estudiante. Mi lac ñumen cʼʌn video tac yicʼot eʼtijib tac am bʌ ti Internet, bajcheʼ JW Library^®. Mi wocol mi la cubin chaʼan mi laj cʼʌn tac iliyi, laʼ laj cʼajtiben i coltaya yambʌ. Wocol mi la cubin chaʼan mi lac ñʌmʼan cheʼ bʌ an chuqui miʼ qʼuextʌyel. Come mi lac ñumen mel cheʼ bajcheʼ an lac mele tilel. Pero yicʼot i coltaya Jehová yicʼot i chaʼan la quermañujob, mi caj lac ñʌmʼan i muʼto caj lac ñumen ñusan lac bʌ ti cʌntesa. Cheʼ bajcheʼ tsiʼ yʌlʌ juntiquil precursor, «ili tsijib eʼtijib mi caj i coltan jiñi estudiante yicʼot jiñi xcʌntesa».

14. a) ¿Chuqui yom cʼajal lac chaʼan mi wocol subtʼan yaʼ ti lac territorio? b) ¿Bajcheʼ miʼ coltañonla 1 Corintios 3:6, 7?

¹⁴ Wocol mi la cubin chaʼan mi lac tech jumpʼejl estudio yaʼ ti lac territorio. Tajol an maʼan bʌ miʼ mulan i ñʌchʼtan jiñi wen tʼan o añob tiʼ contra jiñi eʼtel muʼ bʌ lac mel. ¿Chuqui mi caj i coltañonla chaʼan chʌn tijicñayonla? Laʼ laj cʼajtesan chaʼan ti ili jontol jax bʌ pañimil (mulawil), ti ora miʼ mejlel ti qʼuextʌyel bajcheʼ añob jiñi lac piʼʌlob. I tajol jiñi mach bʌ añic miʼ mulañob jiñi i chaʼan bʌ Dios ti ñaxan muqʼuix caj i mulañob ti wiʼil (Mt. 5:3). An lac piʼʌlob tsaʼ bʌ i jacʼʌyob estudio anquese ti ñaxan maʼañic miʼ chʼʌmob jiñi lac jun tac. Cheʼ jaʼel, la cujil chaʼan Jehová jiñʌch i yum jiñi eʼtel (Mt. 9:38). Yom chaʼan mi lac bej chaʼlen pacʼ yicʼot mi laj qʼuel majlel, pero jiñʌch Jehová am bʌ tiʼ wenta chaʼan miʼ yʌcʼ ti colel (1 Co. 3:6, 7). Cheʼ jaʼel, anquese ili ora maʼañic woli la cʌcʼ jumpʼej estudio, miʼ wen tijicñesañonla cheʼ mi laj cʼajtesan chaʼan Jehová miʼ yʌqʼueñonla lac chobejtʌbal chaʼan woli lac chaʼlen wersa. Mach jiñic chuqui woli lac taj ti lac subtʼan. *

15. ¿Bajcheʼ yubil miʼ yubin Jehová cheʼ bʌ juntiquil lac piʼʌl miʼ jacʼ jumpʼejl estudio i miʼ jacʼ jiñi muʼ bʌ i cʌn majlel?

¹⁵ Jehová tijicña miʼ yubin cheʼ bʌ juntiquil lac piʼʌl miʼ chʼʌm ti ñuc jiñi cʌntesa tac am bʌ ti Biblia i miʼ suben yambʌlob (Pr. 23:15, 16). Miʼ mejlel la cʌl chaʼan wen tijicña miʼ yubin cheʼ bʌ miʼ qʼuel pejtelel woli bʌ i mejlel ili ora. Jumpʼejl ejemplo, anquese ti jiñi jabil chaʼan bʌ subtʼan ti 2020 an jiñi pandemia, tsaʼ ajqʼui 7,705,765 estudio, tsaʼ bʌ i colta 241,994 lac  piʼʌlob chaʼan miʼ yʌcʼob i bʌ ti Jehová i miʼ chʼʌmob jaʼ. Iliyob miʼ cajelob ti cʌntesa i mi caj i sutqʼuiñob ti xcʌntʼan yambʌlob (Lc. 6:40). Tiʼ sujm, mi lac tijicñesʌben i pusicʼal Jehová cheʼ mi lac sutqʼuin ti xcʌntʼan yañoʼ bʌ.

16. ¿Chuqui miʼ mejlel lac chaʼlen wersa lac taj?

¹⁶ Cheʼ mi lac pʌsben juntiquil lac piʼʌl chaʼan miʼ cʼuxbin Jehová, yomʌch mi lac chaʼlen wersa, pero yicʼot i coltaya Jehová mucʼʌch i mejlel lac sutqʼuin ti xcʌntʼan yambʌlob. ¿Muʼ ba i mejlel lac chaʼlen wersa lac tech la cʌcʼ jumpʼej estudio? Mi mucʼʌch i mejlel, laʼ lac suben estudio majqui jach mi lac pejcan. Cheʼ bʌ mucʼʌch lac subeñob tajol mucʼʌch caj i jacʼob. Laʼ lac ñop chaʼan Jehová mi caj i yʌqʼueñonla i bendición cheʼ bʌ mi lac chaʼlen wersa.

17. ¿Bajcheʼ yubil mi caj la cubin cheʼ mi lac tech la cʌcʼ jumpʼejl estudio?

¹⁷ Jumpʼejlʌch ñuc bʌ eʼtel cheʼ bʌ mi lac chaʼlen subtʼan yicʼot cʌntesa. Jumpʼejlʌch eʼtel muʼ bʌ i yʌqʼueñonla i sujm bʌ lac tijicñʌyel. Jiñi apóstol Pablo, tsaʼ bʌ i colta cabʌl lac piʼʌlob ti Tesalónica chaʼan miʼ sujtelob ti xcʌntʼan tsiʼ yʌlʌ bajcheʼ yubil miʼ yubin i bʌ: «Come ¿chuqui c pijt lojon? ¿Chuqui jini c tijicñʌyel lojon? ¿Chuqui jini c ñuclel lojon? ¿Mach ba jateticla tiʼ tojlel lac Yum Jesucristo cheʼ miʼ tilel? Come c ñuclelet lojon, c tijicñʌyelet lojon» (1 Ts. 2:19, 20; Hch. 17:1-4). Ili ora, cabʌl xñoptʼañob muʼ bʌ i yubiñob jaʼel ili tijicñʌyel. Juntiquil hermana i cʼabaʼ Stéphanie, temel bʌ yicʼot i ñoxiʼal an i colta cabʌl estudiantejob chaʼan miʼ chʼʌmob jaʼ, miʼ yʌl: «Jiñi muʼ bʌ i ñumen aqʼueñonla lac tijicñʌyel jiñʌch cheʼ mi laj coltan yañoʼ bʌ chaʼan miʼ yʌcʼob i bʌ ti Jehová».