1. ¿Chuqui jiñi la cujilix bʌ, i chucoch?

 ¿WOCOL ba maʼ wubin chaʼan tijicñayet ti ili ora tiʼ caj jiñi wocol tac? Cabʌl familia maʼañix miʼ cʼuxbiñob i bʌ cheʼ bajcheʼ ti ñaxan. Cabʌl lac piʼʌlob ñumen jontoloʼ (mañajoʼ) bʌ, jin jach miʼ bajñel ñaʼtañob i bʌ yicʼot orajach miʼ michʼañob. I cabʌlob wocol miʼ yubiñob chaʼan miʼ ñopob tiʼ tojlel jiñi añoʼ bʌ i yeʼtel. Pero pejtelel iliyi miʼ coltañonla laj qʼuel chaʼan tal chuqui ñumen wem bʌ. ¿Chucoch? Come jiñi lac piʼʌlob cheʼ woli (choncol) i melob (chaʼleñob) i bʌ cheʼ bajcheʼ miʼ yʌl ti 2 Timoteo 3:1-5, baqui miʼ tilel jumpʼejl profecía chaʼan «jiñi cojix tac bʌ qʼuin». Mi juntiquilic lac piʼʌl wem bʌ i pusicʼal miʼ mejlel i yʌl chaʼan maʼañic woli (yʌquel) i tsʼʌctiyel ili profecía. Cheʼ bʌ woliʼ tsʼʌctiyel miʼ pʌsbeñonla chaʼan Jesucristo añix bajcheʼ Rey yaʼ tiʼ Yumʌntel Dios. Pero an yan tac bʌ profecía chaʼan bʌ ili Yumʌntel. Mi caj laj qʼuel yambʌ profecía tac tsaʼix bʌ tsʼʌctiyi yicʼot muʼ bʌ i pʼʌtʼesan lac ñopoñel.

2. ¿Chuqui mi caj laj qʼuel ti ili estudio, i chucoch? (Taja ti tʼan jiñi dibujo am bʌ tiʼ tejchibal).

² ¿Chuqui mi caj laj qʼuel ti ili estudio? Ñaxan, mi caj laj qʼuel jumpʼejl profecía muʼ bʌ i coltañonla lac ñaʼtan jalixqui tsaʼ waʼchoconti jiñi i Yumʌntel Dios. I chaʼpʼejlel, mi caj lac taj ti tʼan profecía tac muʼ bʌ i coltañonla laj qʼuel chaʼan Jesús wolix ti yumʌntel bajcheʼ Rey tiʼ Yumʌntel Dios. I ti wiʼil mi caj lac taj ti tʼan profecía tac muʼ bʌ i pʌs bajcheʼ mi caj i jisʌntelob jiñi i contrajob i Yumʌntel Dios. Mi caj laj qʼuel chaʼan pejtelel ili profecía tac miʼ luʼ taj i bʌ bajcheʼ i piezajlel jumpʼejl  rompecabeza yicʼot chaʼan jaypʼejlto yom chaʼan Jehová miʼ jisan ili jontol bʌ pañimil (mulawil).

3. ¿Chuqui miʼ pʌsbeñonla jiñi profecía am bʌ ti Daniel 7:13, 14 tiʼ tojlel jiñi Rey chaʼan bʌ i Yumʌntel Dios?

³ Ti Daniel 7:13, 14 mi lac taj jumpʼejl profecía muʼ bʌ i pʌs chaʼan Jesucristo jiñʌch jiñi ñumen wem bʌ Rey chaʼan jiñi i Yumʌntel Dios. Miʼ yʌl chaʼan jiñi lac piʼʌlob tiʼ pejtelel tejclum tac tijicña mi caj i jacʼbeñob i tʼan i chaʼan maʼañic yambʌ yumʌl muʼ bʌ caj i yochel tiʼ qʼuexol. ¿I jalaqui mi caj i tech yumʌntel Jesús? Yambʌ profecía am bʌ ti Daniel, miʼ pʌs chaʼan mi caj ti ujtel iliyi cheʼ bʌ miʼ ñumel 7 jab. Laʼ laj qʼuel bajcheʼ miʼ mejlel lac ñaʼtan jalixqui tsaʼ ujti ili wen utsʼatax bʌ.

4. ¿Bajcheʼ miʼ coltañonla lac ñaʼtan Daniel 4:10-17 chuqui ti jabil mi caj i tech i yumʌntel Jesús? (Qʼuele jaʼel jiñi nota).

⁴ (Pejcan Daniel 4:10-17). Jiñi 7 jab yom i yʌl 2,520 jab. Iliyi tsaʼ tejchi ti jiñi jabil 607 cheʼ bʌ maxto tilemic Cristo, cheʼ bʌ jiñi babiloniojob tsiʼ locʼsayob tiʼ yumʌntel Jehová jiñi cojix bʌ rey am bʌ ti Jerusalén. I tsaʼ ujti ti 1914, cheʼ bʌ Jehová tsiʼ yotsa Jesús bajcheʼ Rey tiʼ Yumʌntel Dios come jiñʌch «jini Toj bʌ Winic yajcʌbil bʌ, muʼ bʌ caj i chʼʌm tiʼ wenta» jiñi Yumʌntel (Ez. 21:25-27). *

5. ¿Bajcheʼ junchajp miʼ coltañonla cheʼ bʌ mi lac chʼʌmben i sujm jiñi profecía chaʼan bʌ jiñi 7 jab?

⁵ ¿Bajcheʼ miʼ coltañonla ili profecía? Cheʼ mi lac chʼʌmben i sujm ili profecía miʼ coltañonla lac ñop chaʼan Jehová miʼ tsʼʌctesan cheʼ tiʼ yorajlel jiñi albil tac bʌ i chaʼan. Jiñʌch tsaʼ bʌ i qʼuele jalaqui mi caj i waʼchocon jiñi i Yumʌntel. I, cheʼ bʌ tsiʼ qʼuele chaʼan tsaʼix cʼoti i yorajlel, cheʼʌch tsiʼ mele. Cheʼ jaʼel, Jehová mi caj i tsʼʌctesan jiñi yan tac bʌ profecía ti jiñi i yorajlel albil bʌ i chaʼan. Jin chaʼan, jiñi i qʼuiñilel Jehová mi caj i cʼotel «cheʼ tiʼ yorajlel» (Hab. 2:3).

6. a) ¿Chuqui tac woli laj qʼuel woli bʌ i pʌs chaʼan Cristo wolix ti yumʌntel yaʼ ti panchan? b) ¿Bajcheʼ miʼ coltan iliyi jiñi profecía am bʌ ti Apocalipsis 6:2-8?

⁶ Cheʼ bʌ lʌcʼʌlix chaʼan miʼ yujtel i subtʼan Jesús, tsiʼ yʌlʌ chaʼan an chuqui tac mi caj i yujtel tiʼ petol pañimil muʼ bʌ caj i coltan jiñi xcʌntʼañob i chaʼan chaʼan miʼ ñaʼtañob chaʼan tsaʼix i teche yumʌntel yaʼ ti panchan. Jumpʼejl ejemplo, tsiʼ taja ti tʼan guerra tac, wiʼñal yicʼot yujquel lum. Cheʼ jaʼel, tsiʼ yʌlʌ chaʼan mi caj i tilel cʼamʌjel tac muʼ bʌ i pam puc i bʌ «ti cabʌl tejclum», cheʼ bajcheʼ jiñi COVID-19. Pejtelel iliyi jiñʌch muʼ bʌ i yʌl jiñi Biblia chaʼan muʼ bʌ caj i pʌs chaʼan wʌʼix an Cristo (Mat. 24:3, 7; Luc. 21:7, 10, 11). I cheʼ bʌ ñumeñix ti 60 jab i chʌmel (sajtel) yicʼot chaʼ sujtemix majlel ti panchan, Jesús tiʼ sube jiñi apóstol Juan chaʼan pejtelel iliyi miʼ caj ti ujtel (pejcan Apocalipsis 6:2-8). Pejtelel iliyi an ujti cʼʌlʌl cheʼ bʌ Jesús tsaʼ sujti ti Rey chaʼan jiñi i Yumʌntel Dios ti 1914.

7. ¿Chucoch tsaʼ wen caji wocol ila ti Pañimil cheʼ bʌ Jesús tsiʼ teche yumʌntel?

⁷ ¿Chucoch mach ñumen weñix chuqui tac tsaʼ caji ti ujtel ila ti Pañimil cheʼ bʌ Cristo tsaʼ sujti ti Rey? Apocalipsis 6:2 an chuqui ñuc bʌ i cʼʌjñibal miʼ subeñonla: Tsaʼ bʌ i ñaxan mele jiñi tsijiʼ bʌ Rey jiñʌch jumpʼejl guerra. ¿Majqui yicʼotob? Tsiʼ chaʼle guerra tiʼ contra jiñi Diablo yicʼot i xibajob. Apocalipsis capítulo 12 miʼ yʌl chaʼan Satanás tiʼ sʌtʌ jiñi guerra i yicʼotob i xibajob tsaʼ chojquiyob jubel ila ti Lum. Come maʼañic tsiʼ mulaj iliyi, tsaʼ caji i wen pʌs i michʼajel tiʼ tojlel jiñi  chumuloʼ bʌ ila ti Lum. Jin chaʼan jiñi Biblia miʼ yʌl: «¡Pʼumpʼun jax jiñi pañimil yicʼot jiñi mar!» (Apoc. 12:7-12).

8. ¿Bajcheʼ miʼ coltañonla cheʼ bʌ woli laj qʼuel chaʼan woliʼ tsʼʌctiyel jiñi profecía tac chaʼan bʌ jiñi Yumʌntel?

⁸ ¿Bajcheʼ miʼ coltañonla ili profecía tac? Jiñi woli tac bʌ i yujtel ti pañimil yicʼot cheʼ añix qʼuextʌyi i melbalob (chaʼlibalob) jiñi lac piʼʌlob miʼ pʌs chaʼan Jesús añix bajcheʼ Rey. Jin chaʼan, maʼañic mi lac wen pensarin cheʼ bʌ mi laj qʼuel chaʼan jiñi lac piʼʌlob miʼ tsʼaʼleñob i bʌ i chaʼan jin jach miʼ bajñel ñaʼtañob i bʌ. Mi laj cʼajtesan chaʼan jiñi woli bʌ i melob woliʼ tsʼʌctesan muʼ bʌ i yʌl jiñi Biblia. ¡Tsiquil chaʼan tsaʼix waʼchoconti jiñi i Yumʌntel Dios! (Sal. 37:1). Cheʼ jaʼel, mi lac pijtan chaʼan muʼto i ñumen asiyel ili pañimil cheʼ bʌ miʼ lʌcʼtiyel tilel Armagedón (Mar. 13:8; 2 Tim. 3:13). Jiñi lac Tat am bʌ ti panchan miʼ wen cʼuxbiñonla i miʼ coltañonla lac chʼʌmben i sujm chucoch an cabʌl wocol. Tiʼ sujm cabʌlʌch chucoch la com la cʌqʼuen wocolix i yʌlʌ.

9. Cheʼ bajcheʼ miʼ yʌl Daniel 2:28, 31-35, ¿bajcheʼ yilal jiñi cojix bʌ yumʌntel, i jalix tsaʼ tejchi?

⁹ (Pejcan Daniel 2:28, 31-35). Ili ora woli laj qʼuel ti tsʼʌctiyel ili profecía. Nabucodonosor tsiʼ ñajle chuqui miʼ caj ti ujtel «ti yanto bʌ ora», cheʼ bʌ Jesús tsaʼix i teche yumʌntel. Juntiquil i contra Jesús ila ti Lum mi caj i sujtel ti jiñi cojix bʌ yumʌntel muʼ bʌ i taj ti tʼan jiñi Biblia. Ili yumʌntel, lamital ocʼol bʌ i yoc, i lamital tsucu taqʼuin, añix ili ora. Tsaʼ tejchi cheʼ ti Primera Guerra Mundial, cheʼ bʌ jiñi Reino Unido yicʼot Estados Unidos tsiʼ temeyob i bʌ. Jiñi i yejtal wiñic tsaʼ bʌ i qʼuele Nabucodonosor an chaʼchajp muʼ bʌ i pʌsbeñonla chaʼan ili yumʌntel qʼuexel miʼ cajel bajcheʼ jiñi yan tac bʌ yumʌntel.

10. a) ¿Chuqui miʼ yʌl jiñi profecía am bʌ ti Daniel chaʼan bajcheʼ yilal jiñi yumʌntel chaʼan bʌ Reino Unido yicʼot Estados Unidos? b) ¿Ti chuqui yom mi laj cʌntan lac bʌ? (Qʼuele jiñi recuadro « ¡Cʌntan a bʌ ti jiñi ocʼol!»).

 ¹⁰ Laʼ laj qʼuel junchajp muʼ bʌ i pʌs chucoch qʼuexelʌch jiñi yumʌntel chaʼan bʌ Reino Unido yicʼot Estados Unidos. Ili yumʌntel mach lajalic bajcheʼ yan tac bʌ come mach wolic jach i cʼʌjñel jiñi oro yicʼot jiñi plata chaʼan miʼ lajintel, miʼ yʌjlel chaʼan lamital ocʼol yicʼot lamital tsucu taqʼuin. Jiñi ocʼol yom i yʌl jiñi lac piʼʌlob (Dn. 2:43, nota, TNM). Cabʌlob yujilob chaʼan ili yumʌntel wocol woliʼ yubin chaʼan miʼ taj chuqui yom tiʼ caj chuqui miʼ melob jiñi lac piʼʌlob cheʼ bʌ miʼ yujtel votación tac, cheʼ bʌ miʼ chaʼleñob marcha chaʼan miʼ cʼajtiñob chuqui yomob yicʼot yan tac bʌ.

11. ¿Chuqui miʼ pʌs chaʼan chumuloñixla ti cojix tac bʌ qʼuin?

¹¹ I chaʼpʼejlel jiñʌch chaʼan ili yumʌntel miʼ lajintel bajcheʼ i yoc i yejtal jiñi wiñic. Jiñi yumʌntel chaʼan bʌ Reino Unido yicʼot Estados Unidos, jiñʌch jiñi cojix bʌ muʼ bʌ i taj ti tʼan jiñi Biblia. Ili yom i yʌl chaʼan maʼañix yambʌ yumʌntel muʼ bʌ caj i tilel. Ili yumʌntel yicʼot yan tac bʌ mi caj i jilel cheʼ bʌ jiñi i Yumʌntel Dios miʼ jisañob ti Armagedón (Apoc. 16:13, 14, 16; 19:19, 20). *

12. ¿Chuqui tac yambʌ miʼ yʌl jiñi profecía chaʼan Daniel, i bajcheʼ miʼ coltañonla yicʼot miʼ yʌqʼueñonla lac pijtaya?

¹² ¿Bajcheʼ miʼ coltañonla ili profecía? Jiñi profecía chaʼan Daniel miʼ wen pʌsbeñonla chucoch chumuloñixla ti cojix tac bʌ qʼuin. Añix ñumen cheʼ bʌ 2,500 jab cheʼ bʌ tsiʼ wʌn alʌ chaʼan cheʼ bʌ tsaʼix jisʌnti Babilonia, yambʌ chʌmpʼejl yumʌntel an chuqui mi caj i tumben jiñi i tejclum Dios. Cheʼ jaʼel, tsiʼ yʌlʌ chaʼan jiñi yumʌntel baqui ochem Reino Unido yicʼot Estados Unidos jiñʌch jiñi cojix bʌ. Ili miʼ ñuqʼuesan lac pusicʼal yicʼot miʼ yʌqʼueñonla lac pijtaya come la cujil chaʼan jiñi i Yumʌntel Dios lʌcʼʌlix mi caj i jisan jiñi yumʌlob añoʼ bʌ ila ti Pañimil i mi caj i chʼʌm tiʼ wenta ili Lum (Dn. 2:44).

13. ¿Majquiyob jiñi i yochojlel bʌ rey yicʼot jiñi «10 reyob» muʼ bʌ i yʌl Apocalipsis 17:9-12, i bajcheʼ an tsʼʌctiyi ili profecía?

¹³ (Pejcan Apocalipsis 17:9-12). Jiñi Primera Guerra Mundial tsiʼ wen teche cabʌl wocol, i jiñi tsiʼ yʌcʼʌ chaʼan miʼ tsʼʌctiyel yambʌ profecía chaʼan jiñi cojix tac bʌ qʼuin. Cheʼ ti enero chaʼan 1920, jiñi yumʌlob tsiʼ meleyob jiñi Sociedad de Naciones come yomob chaʼan an ñʌchʼtʌlel tiʼ pejtelel pañimil, pero cheʼ ti octubre chaʼan 1945 tsaʼ qʼuextʌyi bajcheʼ Naciones Unidas. Jiñi Biblia miʼ yʌl chaʼan ili organización jiñʌch i yochojlel bʌ rey. Pero mach jumpʼejlic yumʌntel. Jiñi yumʌlob miʼ yʌqʼueñob i pʼʌtʌlel yicʼot miʼ coltañob chaʼan añʌch chuqui miʼ mel. Ili yumʌlob miʼ subentelob ti jiñi Biblia bajcheʼ «10 reyob».

14, 15. a) ¿Chuqui miʼ yʌl Apocalipsis 17:3-5 chaʼan «jiñi Ñuc bʌ Babilonia»? b) ¿Chuqui woliʼ yujtel yicʼot jiñi coltaya muʼ bʌ i yʌqʼuentel jiñi mach tac bʌ i sujmic ñopbalʌl?

¹⁴ (Pejcan Apocalipsis 17:3-5). Jehová tsiʼ pʌsbe jiñi apóstol Juan juntiquil xʼixic muʼ bʌ i chon i bʌ i cʼabaʼ «Ñuc bʌ Babilonia». Ili xʼixic miʼ lajintel bajcheʼ pejtelel jiñi mach bʌ i sujmic ñopbalʌl am bʌ ti Pañimil. ¿Chuqui miʼ pʌsbeñonla ili tsaʼ bʌ pʌsbenti Juan? Chaʼan jiñi mach bʌ i sujmic ñopbalʌl tac añix ora cajel i coltañob i bʌ yicʼot jiñi yumʌlob añoʼ bʌ ila ti pañimil i an i yʌqʼueyob i bendición. Pero tsʼitaʼ jachix yom chaʼan Jehová miʼ yʌqʼuen tiʼ pusicʼal ili yumʌlob chaʼan miʼ melob «jiñi ñaʼtʌbil bʌ i chaʼan». ¿Chuqui mi caj i yujtel? Jiñi «10 reyob», yom i yʌl, jiñi yumʌlob, mi caj i jisañob pejtelel jiñi mach bʌ i sujmic ñopbalʌl (Apoc. 17:1, 2, 16, 17).

¹⁵ ¿Bajcheʼ mi lac ñaʼtan chaʼan lʌcʼʌlix mi  caj i jisʌntel jiñi Ñuc bʌ Babilonia? Junchajp muʼ bʌ caj i coltañonla chaʼan mi la cʌqʼuen i jacʼbal ili cʼajtiya jiñʌch cheʼ bʌ mi laj cʼajtesan chaʼan junchajp tsaʼ bʌ i wen colta jiñi Babilonia ti wajali jiñʌch jiñi colem jaʼ i cʼabaʼ Éufrates. Apocalipsis miʼ yʌl chaʼan jiñi yonlel lac piʼʌlob muʼ bʌ i coltañob jiñi Ñuc bʌ Babilonia lajalob bajcheʼ «jaʼ tac» (Apoc. 17:15). Pero cheʼ jaʼel miʼ yʌl chaʼan ili jaʼ tac mi caj i tiquin, iliyi miʼ pʌs chaʼan jiñi mach bʌ i sujmic ñopbalʌl tac maʼañix mi caj i chʌn coltʌntel ti cabʌl lac piʼʌlob (Apoc. 16:12). Wolix i tsʼʌctiyel ili profecía: Cabʌl lac piʼʌlob añix i cʌyʌyob jiñi mach tac bʌ i sujmic ñopbalʌl i yambʌ baqui woliʼ sʌclañob i coltʌntel chaʼan miʼ lʌtʼob i wocol.

16. ¿Bajcheʼ miʼ coltañonla cheʼ bʌ mi lac chʼʌmben i sujm jiñi profecía tac chaʼan bʌ jiñi Naciones Unidas yicʼot chaʼan i jisʌntel jiñi Ñuc bʌ Babilonia?

¹⁶ ¿Bajcheʼ miʼ coltañonla ili profecía tac? Cheʼ tsaʼ mejli jiñi Naciones Unidas yicʼot cheʼ jiñi lac piʼʌlob maʼañix woliʼ wen coltañob jiñi mach tac bʌ i sujmic ñopbalʌl miʼ pʌsbeñonla jaʼel chaʼan chumuloñixla ti jiñi cojix tac bʌ qʼuin. I sujmʌch chaʼan jiñi jaʼ tac muʼ bʌ i coltan jiñi Ñuc bʌ Babilonia wolix i tiquin,  pero jiñi mach yomic i yʌl chaʼan jiñʌch mi caj i jisan. Cheʼ bajcheʼ tsaʼ laj qʼuele, Jehová mi caj i yʌqʼuen tiʼ pusicʼal jiñi «10 reyob», jiñi yumʌlob muʼ bʌ i coltañob jiñi Naciones Unidas, chaʼan miʼ melob «jiñi ñaʼtʌbil bʌ i chaʼan». Jiñi yumʌlob orajach mi caj i jisañob jiñi mach tac bʌ i sujmic ñopbalʌl, i jiñi mach pijtʌbilic i chaʼan cabʌl lac piʼʌlob (Apoc. 18:8-10). * Cheʼ miʼ jisʌntel jiñi Ñuc bʌ Babilonia mi caj i yʌcʼ ti toj sajtel i pusicʼal cabʌl lac piʼʌlob, i tajol jiñi mi caj i tech wocol tac. Pero joñonla muʼ bʌ lac chʼujutesan Jehová an chaʼchajp muʼ bʌ i yʌqʼueñonla lac tijicñʌyel. Ñaxam bʌ, ili wajalix bʌ i contra Jehová mi caj i jisʌntel tiʼ pejtelel ora. I chaʼpʼejlel, lʌcʼʌlix laj coltʌntel ti ili jontol bʌ pañimil (Luc. 21:28).

17, 18. a) ¿Chuqui yom mi lac mel chaʼan mi lac pʼʌtʼesan lac ñopoñel? b) ¿Chuqui mi caj laj qʼuel ti jiñi yambʌ estudio?

¹⁷ Daniel tsiʼ wʌn alʌ: «Mi caj i pʼojlel [i sujm bʌ] ñaʼtʌbal». I cheʼʌch ujtem. Ili ora muqʼuix lac wen chʼʌmben i sujm jiñi profecía tac chaʼan bʌ ili ora (Dn. 12:4, 9, 10). I sujmʌch chuqui tac miʼ yʌl ili profecía tac i miʼ yʌqʼueñonla lac ñumen qʼuel ti ñuc Jehová yicʼot jiñi i Tʼan (Is. 46:10; 55:11). Jin chaʼan, laʼ lac chʌn pʼʌtʼesan jiñi lac ñopoñel. ¿Bajcheʼ? Jiñʌch cheʼ bʌ mi lac chaʼlen wersa chaʼan mi lac wen pejcan jiñi Biblia yicʼot cheʼ mi laj coltan yañoʼ bʌ chaʼan miʼ sujtelob tiʼ yamigo Jehová. Jiñi lac Dios mi caj i cʌntan pejtelel muʼ bʌ i ñopob tiʼ tojlel ti jumpʼejlob i pusicʼal i mi caj i yʌqʼueñob ñʌchʼtʌlel (Is. 26:3).

¹⁸ Ti jiñi yambʌ estudio mi caj laj qʼuel chaʼpʼej uxpʼejl profecía muʼ bʌ i yʌl chaʼan jiñi congregación ti ili cojix tac bʌ qʼuin. Mi caj laj qʼuel chaʼan mucʼʌch i taj i bʌ yicʼot jiñi yan tac bʌ profecía chaʼan jiñi cojix tac bʌ qʼuin. Mi caj laj qʼuel chuqui tac yambʌ miʼ pʌs chaʼan Jesús, jiñi lac Rey am bʌ ti panchan, wolʌch i coltan jiñi xucʼul bʌ xcʌntʼañob i chaʼan.