1. ¿Chuqui tsiʼ mele Jehová cheʼ bʌ tsaʼix i chaʼle mulil Adán yicʼot Eva? (Génesis 3:15).

 CHEʼ bʌ Adán yicʼot Eva tsaʼix i chaʼleyob mulil, Jehová tsiʼ cʼʌñʌ jumpʼejl utsʼatax bʌ profecía chaʼan miʼ yʌqʼueñonla lac pijtaya. Miʼ mejlel lac taj jiñi profecía ti Génesis 3:15 (pejcan).

2. ¿Chucoch wen utsʼatax jiñi profecía am bʌ ti Génesis 3:15?

² Ili profecía mi lac taj ti jiñi ñaxam bʌ libro am bʌ ti Biblia. I mucʼʌch i taj i bʌ yicʼot jiñi yan tac bʌ libro. Cheʼ bajcheʼ i páginajlel jumpʼejl libro an jach baqui tsuyul, jiñi muʼ bʌ i yʌl Génesis 3:15 miʼ yʌcʼ chaʼan jiñi yan tac bʌ libro am bʌ ti Biblia temel an yicʼot junsujm jach chuqui miʼ yʌl. ¿Chuqui jiñi muʼ bʌ i yʌl? Chaʼan Dios mi caj i choc tilel juntiquil la Caj coltaya chaʼan miʼ jisan jiñi Diablo yicʼot pejtelel jiñi jontoloʼ (mañajoʼ) bʌ muʼ bʌ i tsajcañob. * ¡Ili wen utsʼatax chaʼañonla come mi laj cʼuxbin Jehová!

3. ¿Chuqui mi caj laj qʼuel ti ili estudio?

³ Ti ili estudio mi caj lac jacʼ cʼajtiya tac chaʼan bʌ jiñi profecía am bʌ ti Génesis 3:15: ¿Majquiyob jiñi woli (choncol) bʌ i tajtʌlob ti tʼan ti ili profecía?, ¿bajcheʼ tsʼʌctiyem tilel? Yicʼot ¿bajcheʼ miʼ coltañonla ti ili ora?

4. ¿Majqui «jini lucum», i bajcheʼ mi lac ñaʼtan?

⁴ Ti Génesis 3:14, 15 miʼ tajtʌl ti tʼan «jini lucum», jiñi i «pʼolbal» lucum, juntiquil «xʼixic» yicʼot «i pʼolbal» jiñi xʼixic. Jiñi Biblia miʼ coltañonla lac ñaʼtan majquiyob. * Laʼ lac ñaxan al chaʼan jiñi lucum. Mach mero lucumic come cheʼ jiñiqui maʼañic tsiʼ ñaʼta tsaʼ bʌ i sube Jehová yaʼ ti pʌcʼʌbʌl Edén. Juntiquilʌch wen am bʌ i ñaʼtʌbal. I jiñi Biblia miʼ jamʌ subeñonla majqui. Apocalipsis 12:9 miʼ yʌl chaʼan «jiñi wajalix bʌ lucum» jiñʌch jiñi Satanás, jiñi Diablo. ¿I majqui i pʼolbal jiñi lucum?

5. ¿Majquiyob i pʼolbal jiñi lucum?

⁵ Cheʼ bʌ jiñi Biblia miʼ cʼʌn jiñi tʼan «pʼolbal» chaʼan an chuqui miʼ lajin, woli (yʌquel) i tajtʌlob ti tʼan jiñi muʼ bʌ i lajibeñob i pensar yicʼot i melbal (chaʼlibal) jiñi muʼ bʌ i subentel bajcheʼ i tat. Jin chaʼan, tiʼ pʼolbal jiñi lucum yaʼ ochem jiñi espíritujob yicʼot jiñi lac piʼʌlob muʼ bʌ i contrajiñob Jehová yicʼot i tejclum, cheʼ bajcheʼ Satanás. Yaʼ ochemob jiñi ángelob tsaʼ bʌ i cʌyʌyob i yajñib yaʼ ti panchan cheʼ tiʼ yorajlel Noé yicʼot jiñi jontol bʌ lac piʼʌlob cheʼ bʌ miʼ melob (chaʼleñob i bʌ) bajcheʼ jiñi Diablo, jiñi i tatob (Gn. 6:1, 2; Juan 8:44; 1 Juan 5:19; Jud. 6).

6. ¿Chucoch mach jiñic Eva «jini xʼixic» muʼ bʌ i taj ti tʼan Génesis 3:15?

⁶ Wʌle laʼ laj qʼuel majqui jiñi xʼixic. ¿Jimba Eva? Mach jiñiqui. Laʼcu lac ñaʼtan iliyi. Jiñi profecía miʼ yʌl chaʼan i pʼolbal jiñi xʼixic mi caj i lowben i jol jiñi lucum. Cheʼ bajcheʼ tsaʼ laj qʼuele, jiñi lucum juntiquilʌch espíritu, jiñʌch Satanás. Jin chaʼan, juntiquil i pʼolbal Eva, xmulil bʌ, mach mejlic i jisan Satanás. Anto chuqui yom chaʼan miʼ mejlel jiñi.

7. ¿Bajcheʼ miʼ coltañonla lac ñaʼtan Apocalipsis 12:1, 2, 5, 10 majqui jiñi xʼixic muʼ bʌ i yʌl Génesis 3:15?

 ⁷ Jiñi cojix bʌ libro am bʌ ti Biblia miʼ subeñonla majqui jiñi xʼixic muʼ bʌ i yʌl Génesis 3:15 (pejcan Apocalipsis 12:1, 2, 5, 10). Mach juntiquilic quixtañu. An uw tiʼ yebal i yoc i tiʼ jol an jumpʼejl corona melbil (pʌtbil) bʌ ti 12 ecʼ. Cheʼ jaʼel, miʼ yʌcʼ ti pañimil juntiquil i yalobil wen ñuc bʌ i cʼʌjñibal, jiñi i Yumʌntel Dios. Ili Yumʌntel yaʼan ti panchan, jin chaʼan jiñi xʼixic yom an ti panchan jaʼel. Jiñʌch jumpʼejl parte i yorganización Jehová yaʼ ti panchan, baqui ochem jiñi xucʼul bʌ ángelob (Gál. 4:26).

8. ¿Majqui jiñi ñaxam bʌ parte i pʼolbal jiñi xʼixic, i jalixqui tsaʼ sujti ti jiñi ñaxam bʌ parte? (Génesis 22:15-18).

⁸ Tiʼ coltaya jiñi Biblia miʼ mejlel lac ñaʼtan jaʼel majqui jiñi ñaxam bʌ parte tilem bʌ tiʼ pʼolbal jiñi xʼixic. Ili pʼolbal mi caj i tilel ti Abrahán (pejcan Génesis 22:15-18). I jiñi profecía tsaʼʌch tsʼʌctiyi come Jesús juntiquilʌch i pʼolbal jiñi xucʼul bʌ wiñic (Luc. 3:23, 34). Pero jiñi i pʼolbal jiñi xʼixic mach juntiquilic quixtañu chaʼan cheʼ jiñi miʼ mejlel i lowben i jol Satanás yicʼot miʼ jisan. Jin chaʼan, cheʼ bʌ Jesús 30 i jabilel, tsaʼ yajcʌnti, i cheʼ bajcheʼ jiñi tsaʼ sujti tiʼ Yalobil Dios tsaʼ bʌ i yʌcʼʌ tiʼ coltaya jiñi espíritu. Ti jimbʌ ora, tsaʼ sujti ti jiñi ñaxam bʌ parte tiʼ pʼolbal jiñi xʼixic (Gál. 3:16). Cheʼ bʌ tsaʼ chʌmi yicʼot tsaʼ chaʼ chʼojyi, Dios tsiʼ yʌqʼue «jiñi corona chaʼan bʌ ñuclel» i tsiʼ yʌqʼue i yeʼtel chaʼan miʼ chʼʌm tiʼ wenta pejtelel chuqui an ti panchan yicʼot ti Pañimil yicʼot chaʼan «miʼ jisʌben i yeʼtel jiñi Diablo» (Heb. 2:7; Mat. 28:18; 1 Juan 3:8).

9, 10. a) ¿Majquiyob ochemob jaʼel ti jiñi yambʌ parte tiʼ pʼolbal jiñi xʼixic, i baqui ora miʼ yujtel jiñi? b) ¿Chuqui mi caj laj qʼuel?

⁹ Pero jiñi i pʼolbal jiñi xʼixic anto i chaʼpʼejlel parte. Jiñi apóstol Pablo tsiʼ yʌcʼʌ ti cʌñol iliyi cheʼ bʌ tiʼ tsʼijbube majlel jiñi xñoptʼañob judíojoʼ bʌ yicʼot jiñi yambʌ tejclum tac yajcʌbiloʼ bʌ chaʼan miʼ majlelob ti panchan: «Mi i chaʼañetla Cristo i pʼolbaletla Abrahán, jatetla mi caj laʼ taj jiñi tsaʼ bʌ wʌn ajli» (Gál. 3:28, 29). Cheʼ bʌ Jehová miʼ yajcan juntiquil xñoptʼan ti jiñi chʼujul bʌ espíritu, miʼ yochel ti jiñi yambʌ parte i pʼolbal jiñi xʼixic. Jin chaʼan, ti jiñi pʼolbal yaʼ ochem Jesucristo yicʼot jiñi 144 mil muʼ bʌ caj i chaʼleñob yumʌntel yicʼot (Apoc. 14:1). Tiʼ pejtelelob miʼ chaʼleñob wersa chaʼan cheʼ miʼ chaʼleñob pensar yicʼot miʼ pʌsob i melbal cheʼ bajcheʼ i chaʼan Jehová, jiñi i Tatob.

¹⁰ La cujilix majquiyob jiñi woli bʌ i tajtʌlob ti tʼan ti Génesis 3:15. Wʌle mi caj lac tsʼitaʼ qʼuel chuqui an i mele tilel Jehová chaʼan miʼ tsʼʌctesan i tʼan, i cheʼ jiñi mi caj laj qʼuel bajcheʼ miʼ coltañonla ili profecía ti ili ora.

11. ¿Bajcheʼ tsaʼ lowbenti i «tunʼoc» i pʼolbal jiñi xʼixic?

¹¹ Génesis 3:15 miʼ yʌl chaʼan jiñi lucum mi caj i lowben i tunʼoc i pʼolbal jiñi xʼixic. Ili tsaʼ tsʼʌctiyi cheʼ bʌ Satanás tsiʼ ñijcʌbe i pusicʼal jiñi judíojob yicʼot jiñi romanojob chaʼan miʼ tsʌnsañob i Yalobil Dios (Luc. 23:13, 20-24). Cheʼ bʌ an majqui miʼ lojwel i tunʼoc tajol maʼañic mi caj i mejlel ti xʌmbal. Cheʼ jaʼel, cheʼ bʌ tsaʼ chʌmi Jesús maʼañix chuqui tsaʼ mejli i mel, i uxpʼejl qʼuin tsaʼ ajñi ti mucoñibʌl (Mat. 16:21).

12. ¿Jalaqui yicʼot bajcheʼ mi caj i lowbentel i jol jiñi lucum?

¹² Chaʼan miʼ tsʼʌctiyel Génesis 3:15, Jesús maʼañic miʼ mejlel ti cʌytʌl ti jiñi mucoñibʌl come jiñi profecía miʼ yʌl chaʼan i pʼolbal jiñi xʼixic mi caj i lowben i jol jiñi lucum. Jin chaʼan, jiñi i lojweñal i tunʼoc Jesús yomʌch miʼ lajmel. ¡I cheʼʌch tsaʼ ujti! Cheʼ bʌ uxpʼejlix  qʼuin chʌmen (sajtem) Jesús, tsaʼ chʼojyi bajcheʼ juntiquil pʼʌtʌl bʌ espíritu mach bʌ yujilic chʌmel. I cheʼ bʌ miʼ cʼotel jiñi i yorajlel albil bʌ i chaʼan Dios, mi caj i lowben i jol Satanás, yom i yʌl chaʼan mi caj i jisan (Heb. 2:14). Jiñi muʼ bʌ i chaʼleñob yumʌntel yicʼot Cristo mi caj i coltañob i sʌqʼuesan ili Lum cheʼ bʌ miʼ jisañob pejtelel i contrajob Dios, i pʼolbal jiñi lucum (Apoc. 17:14; 20:4, 10). *

13. ¿Bajcheʼ miʼ coltañonla cheʼ woliʼ tsʼʌctiyel ili profecía?

¹³ Mi chʼʌmʌlix a chaʼan jaʼ, wolix a wʌcʼ chaʼan miʼ coltañet ti a cuxtʌlel ili profecía. Jesús tsaʼ tili ila ti Lum chaʼan miʼ chumtʌl bajcheʼ wiñic i tsiʼ pʌsʌ jiñi wen tac bʌ melbalʌl am bʌ i chaʼan i Tat (Juan 14:9). Tiʼ yejemplo an i coltayonla laj cʌn yicʼot laj cʼuxbin Jehová. Cheʼ jaʼel, Jesús an i coltayonla ti jiñi i cʌntesa tac yicʼot ti bajcheʼ woliʼ cʌntan jiñi congregación ti ili ora. Miʼ pʌsbeñonla bajcheʼ yom mi lac chumtʌl chaʼan mi lac tijicñesan Jehová. I jiñi i chʌmel, lajal bʌ bajcheʼ jiñi i lojweñal ti jiñi i tunʼoc, miʼ mejlel i coltañonla ti lac pejtelel. Cheʼ bʌ tsaʼ chaʼ chʼojyi tsiʼ yʌcʼʌ jiñi i cuxtʌlel bajcheʼ toj bʌ majtañʌl chaʼan «miʼ sʌqʼuesañonla tiʼ pejtelel mulil» (1 Juan 1:7).

14. ¿Bajcheʼ la cujil chaʼan jiñi profecía tsaʼ bʌ i yʌlʌ Jehová yaʼ ti Edén mach ti orajic mi caj i tsʼʌctiyel?

¹⁴ Jiñi tsaʼ bʌ i yʌlʌ Jehová yaʼ ti Edén miʼ pʌs chaʼan mach ti orajic mi caj i tsʼʌctiyel ili profecía. Yomto miʼ ñumel cabʌl jab chaʼan jiñi xʼixic miʼ tilel i pʼolbal, chaʼan jiñi Diablo miʼ tempan i wiñicob yicʼot chaʼan miʼ contrajiñob i bʌ o miʼ tsʼaʼleñob i bʌ ili chaʼmojt. ¿Bajcheʼ miʼ coltañonla cheʼ la cujil iliyi? Jumpʼejlʌch ticʼojel chaʼañonla: Ili pañimil (mulawil) am bʌ tiʼ cʼʌb Satanás mi caj i tsʼaʼlen jiñi i wiñicob Dios. Jesús cheʼʌch tiʼ sube jaʼel jiñi xcʌntʼañob i chaʼan cheʼ bʌ ñumeñix cabʌl jab (Mar. 13:13; Juan 17:14). Tsiquil chaʼan añʌch laj qʼuele bajcheʼ an tsʼʌctiyi ili profecía, ñumento ti jiñi 100 jab ñumen bʌ. ¿Chucoch cheʼ mi la cʌl?

15. a) ¿Chucoch mi lac ñumen tsʼaʼlentel ti ili ora? b) ¿Chucoch mach yomic mi lac bʌcʼñan Satanás?

¹⁵ Jesús tsaʼ sujti tiʼ Rey jiñi i Yumʌntel Dios ti 1914 i cheʼ jiñi tsiʼ choco loqʼuel Satanás yaʼ ti panchan. Ili ora, jiñi Diablo cojach miʼ mejlel i mel i yeʼtel (troñel) ila ti Lum i woli jach i pijtan i jisʌntel (Apoc. 12:9, 12). Pero mach meqʼuel jach i chaʼan i cʼʌb woliʼ pijtan. Wen michʼ woliʼ contrajin i tejclum Dios (Apoc. 12:13, 17). Jiñʌch tiʼ caj woli lac wen tsʼaʼlentel ti ili ora. Pero mach yomic mi lac bʌcʼñan Satanás yicʼot jiñi muʼ bʌ i tsajcañob. Miʼ mejlel la cʌl tsaʼ bʌ i tsʼijbu jiñi apóstol Pablo: «Mi Dios an yicʼotonla, ¿majqui mi caj i mejlel i contrajiñonla?» (Rom. 8:31). Miʼ mejlel lac ñop ti Jehová tiʼ pejtelel lac pusicʼal, come cheʼ bajcheʼ tsaʼix laj qʼuele, lʌcʼʌ tiʼ pejtelel jiñi profecía am bʌ ti Génesis 3:15 tsaʼix tsʼʌctiyi.

16-18. ¿Bajcheʼ an i colta Curtis, Ursula yicʼot Jessica cheʼ miʼ chʼʌmbeñob i sujm Génesis 3:15?

¹⁶ Jiñi tsaʼ bʌ i yʌlʌ Jehová ti Génesis 3:15 miʼ coltañonla lac ñusan baqui jach bʌ wocol miʼ tilel ti lac tojlel. Curtis, juntiquil hermano misionero bʌ ti Guam, miʼ yʌl: «An c ñusa wocol tac yicʼot an cubi c chʼijyemlel am bʌ i yʌcʼʌ ti wocol jiñi c xucʼtʌlel ti Jehová. Pero cheʼ bʌ mic wen ñaʼtan jiñi profecía am bʌ ti Génesis 3:15 an i coltayon chaʼan mic chʌn ñop ti jiñi c Tat am bʌ ti panchan». Curtis yomix i qʼuel jiñi qʼuin cheʼ bʌ Jehová miʼ jisan pejtelel lac wocol.

 ¹⁷ Juntiquil hermana chʼoyol bʌ ti Baviera (Alemania) i cʼabaʼ Ursula miʼ yʌl chaʼan cheʼ bʌ tsiʼ chʼʌmbe i sujm Génesis 3:15 tsiʼ pʌsbe chaʼan jiñi Biblia jiñʌch i Tʼan Dios. Junchajp am bʌ i wen colta Ursula jiñʌch cheʼ jiñi yambʌ profecía tac mucʼʌch i taj i bʌ yicʼot muʼ bʌ i i yʌl Génesis 3:15. Miʼ bej al: «Tsiʼ wen ñijca c pusicʼal cheʼ bʌ tsaʼ j qʼuele chaʼan Jehová an chuqui tsiʼ mele ti ora chaʼan miʼ yʌqʼueñonla lac pijtaya».

¹⁸ Jessica, juntiquil hermana ti Micronesia, miʼ yʌl: «Cʼajalto c chaʼan bajcheʼ yubil tsaʼ cubi c bʌ cheʼ bʌ tsaʼ j qʼuele chaʼan tsaʼ c taja jiñi i sujmlel. ¡Woli ti tsʼʌctiyel jiñi profecía am bʌ ti Génesis 3:15! Cheʼ mic chʼʌmben i sujm miʼ cʼajtesʌbeñon chaʼan jiñi cuxtʌlel am bʌ ili ora mach jiñic jiñi i sujm bʌ cuxtʌlel. Ili profecía miʼ coltañon c ñumen ñop chaʼan cheʼ mi lac melben i yeʼtel Jehová miʼ coltañonla chaʼan ñumen wen mi lac chumtʌl ti ili ora yicʼot ti talto bʌ qʼuin».

19. ¿Bajcheʼ la cujil chaʼan mucʼʌch caj i tsʼʌctiyel jiñi yambʌ parte chaʼan jiñi profecía?

¹⁹ Cheʼ bajcheʼ tsaʼix laj qʼuele, wolix i tsʼʌctiyel Génesis 3:15. La cujilix majquiyob i pʼolbal jiñi xʼixic yicʼot i pʼolbal jiñi lucum. Jesús, jiñi ñaxam bʌ parte i pʼolbal jiñi xʼixic, tsaʼix lajmi i lojweñal i tunʼoc, ili ora juntiquilix Rey mach bʌ yujilic chʌmel i cabʌl i ñuclel. Cheʼ jaʼel, tsʼitaʼ jax yom chaʼan miʼ yujtel ti yajcʌntel jiñi ochemoʼ bʌ ti jiñi yambʌ parte i pʼolbal jiñi xʼixic. Tsaʼix tsʼʌctiyi jiñi ñaxam bʌ parte chaʼan ili profecía, jin chaʼan la cujil chaʼan mi caj i tsʼʌctiyel jiñi yambʌ parte: ¡Mi caj i lowbentel i jol jiñi lucum! Mi caj i wen aqʼueñonla lac tijicñʌyel cheʼ bʌ miʼ jisʌntel Satanás. Cheʼ bʌ wolito lac pijtan chaʼan miʼ yujtel jiñi, laʼ lac chʌn chaʼlen wersa. Yomʌch mi lac ñop tiʼ pejtelel lac pusicʼal ti jiñi lac Dios. Mi caj i cʼʌn i pʼolbal jiñi xʼixic chaʼan miʼ yʌqʼuen cabʌl bendición «winicob xʼixicob tiʼ pejtelel pañimil» (Gn. 22:18).