1. ¿Chuqui jiñi yom bʌ Dios ili ora?

 JIÑI yom bʌ Dios ti ili ora jiñʌch cheʼ miʼ sujbel jiñi wen tʼan chaʼan bʌ jiñi Yumʌntel tiʼ pejtelel Pañimil (Mar. 13:10; 1 Tim. 2:3, 4). Ili eʼtel (troñel) i chaʼañʌch Jehová i wen ñuc i cʼʌjñibal come tsiʼ yajca jiñi cʼuxbibil bʌ i Yalobil chaʼan jin miʼ chʼʌm tiʼ wenta i qʼuel. Come jiñi subtʼan weñʌch woli (choncol) i qʼuejlel majlel, miʼ mejlel lac ñop chaʼan, cheʼ bʌ miʼ tilel i jilibal ili pañimil (mulawil), Jehová tijicña mi caj i yubin chaʼan pejtelel tsaʼ bʌ mejli (Mat. 24:14).

2. ¿Chuqui mi caj laj qʼuel ti ili estudio?

² Ti ili estudio, mi caj laj qʼuel chaʼan Jesús miʼ cʼʌn «jiñi xucʼul bʌ xyaj eʼtel wen am bʌ i ñaʼtʌbal» chaʼan miʼ yʌqʼueñonla jiñi chʼujul bʌ bʌlñʌcʼʌl yicʼot chaʼan miʼ chajpañonla chaʼan jiñi ñuc bʌ subtʼan muʼ bʌ i mejlel ti ili ora (Mat. 24:45). Cheʼ jaʼel, mi caj laj qʼuel chuqui miʼ mejlel lac mel (chaʼlen) ti jujuntiquilonla chaʼan mi laj coltan Jesús yicʼot jiñi xucʼul bʌ xyaj eʼtel.

3. ¿Chuqui tsaʼ aqʼuenti tiʼ wenta Jesús?

³ Jesús woliʼ qʼuel jiñi subtʼan. ¿Bajcheʼ la cujil? Cheʼ bʌ muqʼuix caj i letsel majlel ti panchan, tsiʼ tempa i bʌ yicʼot chaʼtiqui uxtiquil xucʼul bʌ xcʌntʼañob i chaʼan ti jumpʼejl wits yaʼ ti Galilea i tiʼ subeyob: «Dios tsiʼ yʌqʼueyon queʼtel chaʼan mic chʼʌm tic wenta pejtelel chuqui an ti panchan yicʼot ti pañimil». I tsiʼ bej alʌ: «Jin chaʼan, cucula i sutqʼuinla ti xcʌntʼan jiñi quixtañujob tiʼ pejtelel tejclum» (Mat. 28:18, 19). Jesús tsaʼ  aqʼuenti tiʼ wenta jaʼel chaʼan miʼ qʼuel jiñi subtʼan.

4. ¿Chucoch miʼ mejlel lac ñop chaʼan Jesús wolʌch i bej qʼuel jiñi subtʼan?

⁴ Jesús tsiʼ yʌlʌ chaʼan jiñi subtʼan yicʼot i sutqʼuintel ti xcʌntʼan yambʌlob mi caj i mejlel «tiʼ pejtelel tejclum», yicʼot chaʼan mi caj i yajñel yicʼot jiñi xcʌntʼañob i chaʼan ti jujumpʼejl qʼuin «cʼʌlʌl cheʼ tiʼ yorajlel i jilibal pañimil» (Mat. 28:20). Ili tʼan tac miʼ pʌs chaʼan Jesús mi caj i chʼʌm tiʼ wenta i qʼuel jiñi subtʼan cʼʌlʌlto ili ora.

5. ¿Bajcheʼ mi lac chaʼlen coltaya chaʼan miʼ tsʼʌctiyel Salmo 110:3?

⁵ Jesús yujil chaʼan cheʼ tiʼ jilibal ili pañimil cabʌl xsubtʼañob miʼ cajel. Yujil chaʼan mi caj i tsʼʌctiyel ili profecía: «A winicob xʼixicob mi caj i yʌcʼob i bʌ ti jumpʼejl i pusicʼal cheʼ maʼ chaʼlen yumʌl tiʼ tojlelob» (Sal. 110:3). Mi jatet maʼ sub jiñi wen tʼan, woli (yʌquel) a coltan Jesús yicʼot jiñi xucʼul bʌ xyaj eʼtel i woli a chaʼlen coltaya chaʼan miʼ tsʼʌctiyel ili profecía. Wolʌch i mejlel jiñi subtʼan, pero mi lac taj wocol tac jaʼel.

6. ¿Baqui bʌ junchajp wocol mi lac ñusan?

⁶ Jumpʼejl wocol muʼ bʌ lac taj jiñʌch cheʼ mi lac tsʼaʼlentel. Jiñi apóstatajob, políticojob yicʼot jiñi añoʼ bʌ i yeʼtel ti ñopbalʌl miʼ pucob cabʌl lot chaʼan jiñi lac subtʼan. Mi jiñi lac familia, laj cʌñʌyoʼ bʌ yicʼot jiñi lac piʼʌlob ti eʼtel miʼ ñopob ili lot tac, tajol mi caj i chaʼleñob wersa chaʼan mi laj cʌy lac melben i yeʼtel Jehová yicʼot chaʼan mi laj cʌy subtʼan. Ti yan tac bʌ país, jiñi laj contrajob miʼ bʌcʼtesañoñobla, miʼ ticʼlañoñobla, miʼ chucoñobla yicʼot miʼ yotsañoñobla ti cárcel. Ili maʼañic miʼ yʌcʼ ti toj sajtel lac pusicʼal come Jesús tsiʼ yʌlʌ chaʼan mi caj lac tsʼaʼlentel tiʼ caj i cʼabaʼ (Mat. 24:9). Pero jiñi lac tsʼaʼlentel miʼ pʌs chaʼan woli lac lajin Jesús yicʼot chaʼan utsʼatʌch miʼ qʼuelonla Jehová (Mat. 5:11, 12). Jiñi Diablo jiñʌch woli bʌ i yʌcʼ ili tsʼaʼlentel, pero maʼañic miʼ mejlel i mʌlben (jotben) Jesús. Tiʼ coltaya Cristo, cabʌl lac piʼʌlob tiʼ pejtelel tejclum tac woliʼ yubiñob jiñi wen tʼan chaʼan bʌ jiñi Yumʌntel.

7. ¿Chuqui tac miʼ pʌsbeñet chaʼan wolʌch i tsʼʌctiyel muʼ bʌ i yʌl Apocalipsis 14:6, 7?

⁷ Yambʌ wocol jiñʌch cheʼ an cabʌl tʼan. Jiñi tsaʼ bʌ i pʌsbe Jesús jiñi apóstol Juan tsiʼ yʌqʼue i ñaʼtan chaʼan maʼañic chuqui mi caj i mʌctan chaʼan miʼ sujbel jiñi wen tʼan (pejcan Apocalipsis 14:6, 7). ¿Bajcheʼ an lac mʌlbe ili wocol? Jiñʌch cheʼ an la cʌqʼue jiñi lac piʼʌlob jumpʼejl página chaʼan internet, jiñi jw.org, baqui miʼ mejlel i tajob jun tac ñumen ti mil tʼan tac. Cheʼ jaʼel, jiñi Junmojt muʼ bʌ i pʌsob bij an i yʌcʼʌ chaʼan miʼ chaʼlentel ti traducir ti ñumen ti 700 tʼan tac jiñi jun muʼ bʌ laj cʼʌn ti acʼ estudio, jiñi libro Ubin a tijicñʌyel. I cheʼ jaʼel, an chʼujul bʌ bʌlñʌcʼʌl ti video tac chaʼan jiñi xʼumaʼob yicʼot jun tac ti braille chaʼan jiñi xpotsʼob. Cheʼ bajcheʼ iliyi, ñumen cabʌl lac piʼʌlob miʼ mejlel i jacʼob jiñi wen tʼan chaʼan bʌ Yumʌntel. Woli laj qʼuel bajcheʼ miʼ tsʼʌctiyel jiñi profecía tac: Jiñi lac piʼʌlob tiʼ pejtelel tʼan ti cabʌl tejclum woliʼ cʌñob jumpʼejl jach bʌ tʼan chaʼan jiñi i sujmlel am bʌ ti Biblia (Zac. 8:23, TNM; Sof. 3:9). Pejtelel iliyi woliʼ tsʼʌctiyel come Jesús weñʌch bajcheʼ woliʼ qʼuel jiñi subtʼan.

8. ¿Chuqui tajbil ti jiñi subtʼan cʼʌlʌl ili ora?

⁸ Ti ili ora, ochemob tiʼ yorganización Jehová ñumen ti 8 millón lac piʼʌlob ti 240 país yicʼot territorio tac. ¡I ti jujumpʼejl jab cabʌlob miʼ chʼʌmob jaʼ! Pero jiñi ñumen ñuc bʌ i cʼʌjñibal mach jiñic jaytiquil woliʼ yochelob, jiñʌch jiñi melbal (chaʼlibal) tac am bʌ i tajayob jiñi tsijib xcʌntʼañob, muʼ bʌ i suben jiñi Biblia bajcheʼ tsijiʼ bʌ melbalʌl (Col. 3:8-10). Yonlelob an i cʌyʌyob i chaʼleñob tsʼiʼlel,  jontolil, an i cʌyʌyob i tsʼaʼleñob yañoʼ bʌ yicʼot i chañʼesañob i bʌ tiʼ caj baqui chʼoyolob. Woliʼ tsʼʌctiyel jiñi profecía am bʌ ti Isaías 2:4: «Maʼanix mi caj i chʌn ñopob guerra». Mi lac chaʼlen wersa lac pʌs jiñi tsijiʼ bʌ lac melbal, jin chaʼan jiñi lac piʼʌlob woliʼ mulañob ochel tiʼ yorganización Dios i mi lac pʌs chaʼan woli lac tsajcan Jesucristo, jiñi muʼ bʌ i cʌntañonla (Juan 13:35; 1 Ped. 2:12). Pejtelel iliyi mach cheʼ jach woliʼ bajñel ujtel, Jesús woliʼ coltañonla.

9. Cheʼ bajcheʼ miʼ yʌl Mateo 24:45-47, ¿chuqui tsiʼ yʌlʌ Jesús chaʼan mi caj i yujtel cheʼ lʌcʼʌlix i jilibal ili pañimil?

⁹ (Pejcan Mateo 24:45-47). Jesús tsiʼ yʌlʌ chaʼan cheʼ lʌcʼʌlix i jilibal ili pañimil mi caj i yʌqʼuen tiʼ wenta juntiquil «xucʼul bʌ xyaj eʼtel wen am bʌ i ñaʼtʌbal» chaʼan miʼ yʌqʼueñonla jiñi chʼujul bʌ bʌlñʌcʼʌl. Jin chaʼan, miʼ pijtʌntel chaʼan ili xyaj eʼtel wen tsʌts miʼ chaʼlen eʼtel ti ili ora, i cheʼʌch woliʼ mel. Jesús miʼ cʼʌn ili junmojt xñoptʼañob yajcʌbiloʼ bʌ chaʼan miʼ majlelob ti panchan chaʼan miʼ yʌqʼueñob jiñi chʼujul bʌ bʌlñʌcʼʌl «tiʼ yorajlel» jiñi i wiñicob Dios yicʼot jiñi yomoʼ bʌ i cʌn jiñi i sujmlel. Ili wiñicob maʼañic miʼ qʼuelob i bʌ bajcheʼ i yumob i ñopoñel yañoʼ bʌ (2 Cor. 1:24). Yujilob chaʼan Jesucristo jiñʌch jiñi Yumʌl yicʼot jiñi xcʌntesa ti jiñi i tejclum (Is. 55:4).

10. ¿Baqui bʌ jiñi libro tac muʼ bʌ a taj a qʼuel ti jiñi dibujo tac tsiʼ coltayet chaʼan maʼ wochel ti jiñi bij muʼ bʌ i pʌyet majlel a taj jiñi a cuxtʌlel maʼañic bʌ i jilibal?

¹⁰ Cʼʌlʌl ti 1919, jiñi xucʼul bʌ xyaj eʼtel an i chajpa cabʌl jun tac chaʼan jiñi lac piʼʌlob miʼ tajob jiñi chʼujul bʌ bʌlñʌcʼʌl. Cheʼ ti 1921, jiñi xucʼul bʌ xyaj eʼtel tsiʼ locʼsa ti inglés jiñi libro El Arpa de Dios chaʼan miʼ pʌsben jiñi lac piʼʌlob jiñi ñaxan tac bʌ cʌntesʌntel am bʌ ti Biblia. Cheʼ bʌ tsaʼ qʼuextʌyi majlel jiñi pañimil, tsaʼ caji i locʼsan yan tac bʌ libro. ¿Baqui bʌ tsiʼ  coltayet chaʼan maʼ cʌn yicʼot maʼ cʼuxbin jiñi lac Tat am bʌ ti panchan? Tajol jiñʌch: «Sea Dios veraz», La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Chuqui miʼ cʌntesañonla tiʼ sujmlel jiñi Biblia?, o ¿Chuqui miʼ cʌntesañonla jiñi Biblia? O tajol woli a cʼʌn jiñi tsijib libro Ubin a tijicñʌyel. Tsaʼ locʼsʌnti ili libro tac chaʼan mi laj coltʌntel lac sutqʼuin ti xcʌntʼan yañoʼ bʌ, i tiʼ pejtelel ora an cʼoti ti laj cʼʌb cheʼ tiʼ yorajlel.

11. ¿Chucoch wen ñuc i cʼʌjñibal chaʼan ti lac pejtelel mi la cʌqʼuentel jiñi chʼujul bʌ bʌlñʌcʼʌl?

¹¹ Mach jiñic jach jiñi estudiantejob i cʼʌjñibalob i chaʼan jiñi chʼujul bʌ bʌlñʌcʼʌl. Tiʼ sujm, ti lac pejtelel i cʼʌjñibal lac chaʼan. Jiñi apóstol Pablo tiʼ tsʼijbu: «Jiñi bʌlñʌcʼʌl i chaʼañob jiñi ñucobix bʌ». Cheʼ jaʼel, tsiʼ yʌlʌ chaʼan cheʼ mucʼʌch lac mel jiñi cʌmbilix bʌ lac chaʼan mi caj i coltañonla chaʼan mi laj cʌn «chuqui wem bʌ yicʼot chuqui mach bʌ weñic» (Heb. 5:14). Ti ili ora cheʼ bʌ wen asiyemix i melbal jiñi lac piʼʌlob, tajol wocol mi la cubin chaʼan mi lac jacʼben i tʼan Jehová. Pero Jesús miʼ chʼʌm tiʼ wenta chaʼan miʼ yʌqʼueñonla sumuc tac bʌ chʼujul bʌ bʌlñʌcʼʌl tilem bʌ tiʼ Tʼan Dios yicʼot muʼ bʌ i coltañonla chaʼan pʼʌtʌlonla. Jiñi xucʼul bʌ xyaj eʼtel miʼ chajpan yicʼot miʼ puc jiñi bʌlñʌcʼʌl tiʼ coltaya Jesús.

12. ¿Chuqui an lac mele chaʼan mi lac pʌs chaʼan mi laj qʼuel ti ñuc i cʼabaʼ Dios cheʼ bajcheʼ Jesús?

¹² Cheʼ bajcheʼ tsiʼ mele Jesús, an lac pʌsʌ chaʼan mi laj qʼuelben ti ñuc i cʼabaʼ Dios (Juan 17:6, 26). Jumpʼejl ejemplo, cheʼ ti 1931 tsaʼ lac yajca laj cʼabaʼ bajcheʼ i testigojob Jehová, jumpʼejl cʼabaʼʌl loqʼuem bʌ ti Biblia. Cheʼ bajcheʼ jiñi mi lac pʌs chaʼan la com lac chʼʌm majlel i cʼabaʼ jiñi lac Tat am bʌ ti panchan, wen ñuc bʌ i cʼʌjñibal chaʼañonla (Is. 43:10-12). I cheʼ ti octubre ti jiñi jach bʌ jabil, jiñi i cʼabaʼ Dios tsaʼ caji ti loqʼuel tiʼ pat ili revista ti inglés. Cheʼ jaʼel, jiñi Traducción del Nuevo Mundo tsiʼ  yotsa jiñi chʼujul bʌ i cʼabaʼ Dios baqui yom miʼ tilel ti jiñi i Tʼan Dios. Pero cabʌl ñopbalʌl mach cheʼic miʼ melob come miʼ locʼsañob jiñi i cʼabaʼ Jehová ti jiñi Biblia tac añoʼ bʌ i chaʼan.

13. ¿Chuqui miʼ pʌsbeñet chaʼan Jesús wolʌch i cʼʌn ti ili ora «jiñi xucʼul bʌ xyaj eʼtel wen am bʌ i ñaʼtʌbal»? (Juan 6:68).

¹³ Jesús an i cʼʌñʌ «jiñi xucʼul bʌ xyaj eʼtel wen am bʌ i ñaʼtʌbal» chaʼan jiñi xcʌntʼañob i chaʼan miʼ sujtelob ti jumpʼejl utsʼatax bʌ organización ila ti Pañimil chaʼan miʼ yʌcʼob ti cʌñol jiñi sʌc bʌ chʼujutesaya. ¿Chuqui maʼ ñaʼtan jatet chaʼan ili organización? Tajol cheʼ maʼ wubin a bʌ bajcheʼ Pedro, tsaʼ bʌ i sube Jesús: «¿Majqui tiʼ tojlel mi caj lon c majlel? Jiñi a tʼan miʼ yʌcʼ cuxtʌlel mach bʌ añic miʼ jilel» (Juan 6:68). ¿Baqui añonla cheʼ machic tsaʼ laj cʌñʌ i yorganización Jehová? Cristo woliʼ cʼʌn ili organización chaʼan mi lac taj cabʌl chʼujul bʌ bʌlñʌcʼʌl i miʼ chajpañonla chaʼan mi lac sujtel ti ñumen wem bʌ xcʌntesa. Cheʼ jaʼel, miʼ coltañonla chaʼan mi lac taj tsijiʼ bʌ lac melbal chaʼan mi lac tijicñesan Jehová (Efes. 4:24).

14. ¿Bajcheʼ an i coltayet ti ili pandemia chaʼan COVID-19 cheʼ ochemet tiʼ yorganización Jehová?

¹⁴ Jesús weñʌch bajcheʼ miʼ cʌntañonla cheʼ bʌ mi lac ñusan tsʌts tac bʌ wocol. Ili tsiquil tsaʼ laj qʼuele cheʼ bʌ tsaʼ caji jiñi pandemia chaʼan COVID-19. Cabʌl lac piʼʌlob maʼañic tsiʼ ñaʼtayob chuqui yom miʼ melob, pero Jesús tsiʼ chʼʌmʌ tiʼ wenta chaʼan mi lac ñaʼtan chuqui yom mi lac mel chaʼan miʼ cʌntañonla. Tsaʼ subentiyonla laj cʼʌn cubreboca baqui an cabʌl lac piʼʌlob yicʼot chaʼan maʼañic mi lac wen lʌcʼtesan lac bʌ tiʼ tojlel yambʌlob. Tsaʼ subenti jiñi ancianojob chaʼan yom miʼ pejcañob pejtelel jiñi publicadorob chaʼan miʼ ñaʼtañob bajcheʼ yilal añob yicʼot chaʼan miʼ qʼuelob chuqui  i cʼʌjñibalob i chaʼan (Is. 32:1, 2). I jiñi informe tac am bʌ i locʼsa jiñi Junmojt muʼ bʌ i pʌsob bij añʌch i coltayonla yicʼot i pʌsbeyonla chuqui yom mi lac bej mel.

15. ¿Chuqui tac yambʌ an subentiyonla ti ili pandemia, i chuqui tac tajbil?

¹⁵ Cheʼ bʌ tsaʼ caji jiñi pandemia, tsaʼ subentiyonla jaʼel bajcheʼ mi caj lac mel lac tempa bʌ yicʼot mi laj cajel ti subtʼan. Ti orajach tsaʼ caji lac mel lac tempa bʌ yicʼot laj colem tempa bʌ ti videollamada, i tsaʼ cajiyonla ti subtʼan ti carta yicʼot ti teléfono. Jehová an i yʌqʼueyonla i bendición come añʌch lac chaʼle wersa. Cabʌl sucursal tac an i subuyob chaʼan an wen pʼojli jiñi publicadorob. Cheʼ jaʼel, cabʌl hermanojob tajbilob i chaʼan wen utsʼatax bʌ experiencia (qʼuele jiñi recuadro « Jehová miʼ yʌqʼuen i bendición jiñi subtʼan»).

16. ¿Chuqui jiñi muʼ bʌ i mejlel lac ñop?

¹⁶ Tajol an hermanojob tsaʼ bʌ i ñaʼtayob chaʼan ñumeñix ti pʼis bajcheʼ tiʼ subeyonla jiñi organización chaʼan yom mi laj cʌntan lac bʌ ti ili pandemia. Pero wen tsiquil an laj qʼuele chaʼan weñʌch bajcheʼ tsaʼ subentiyonla laj cʌntan lac bʌ (Mat. 11:19). Mi mucʼʌch lac wen ñaʼtan bajcheʼ tsiquil i cʼuxbiya Jesús ti bajcheʼ miʼ cʌntañonla, miʼ mejlel lac ñop chaʼan, mach yʌlʌyic chuqui miʼ tilel, Jehová yicʼot jiñi cʼuxbibil bʌ i Yalobil maʼañic mi caj i cʌyoñobla (pejcan Hebreos 13:5, 6).

17. ¿Bajcheʼ yubil maʼ wubin cheʼ bʌ jiñʌch Jesús miʼ qʼuelonla ti la queʼtel?

¹⁷ ¡Wen tijicña mi la cubin come jiñʌch Jesús woli bʌ i qʼuelonla ti la queʼtel! Ochemonla ti jumpʼejl organización baqui maʼañic tʼox bʌ tiʼ caj baqui chʼoyolonla, jiñi laj cultura o jiñi lac tʼan. An lac chaʼan cabʌl chʼujul bʌ bʌlñʌcʼʌl i chajpʌbilonla chaʼan mi lac chaʼlen subtʼan. I jujuntiquilonla wolʌch lac bej cʌn bajcheʼ miʼ mejlel lac taj jiñi tsijiʼ bʌ lac melbal yicʼot laj cʼuxbin yañoʼ bʌ. ¡Wen tijicñayonla come Jesucristo jiñʌch muʼ bʌ i cʌntañonla!