1. ¿Bajcheʼ yilal yom mi laj qʼuel jiñi oración?

 JIÑI tsaʼ bʌ i mele (pʌtʌ) panchan yicʼot Pañimil an i yʌqʼueyonla wen ñuc bʌ lac majtan: Miʼ mejlel lac pejcan ti oración. Laʼcu lac ñaʼtan iliyi. Miʼ mejlel lac jamben lac pusicʼal Jehová ti bajcheʼ jach ora yicʼot ti baqui jach bʌ tʼan, i mach cʼʌñʌlic mi lac locʼsan cita. Miʼ mejlel lac pejcan jiñi lac Tat muʼ bʌ i wen cʼuxbiñonla cheʼ bʌ añonla ti jumpʼejl hospital o cheʼ bʌ ñupʼulonla ti cárcel i mucʼʌch caj i ñʌchʼtañonla. ¿Mach ba mucʼʌch laj qʼuel ti ñuc ili wen ñuc bʌ lac majtan?

2. ¿Bajcheʼ tsiʼ pʌsʌ jiñi rey David chaʼan tsiʼ qʼuele jiñi oración bajcheʼ jumpʼejl ñuc bʌ majtañʌl?

² Jiñi rey David tsiʼ qʼuele jiñi oración bajcheʼ jumpʼejl ñuc bʌ majtañʌl. Ti jumpʼejl cʼay tiʼ sube Jehová: «Laʼ letsic jini coración baʼ añet cheʼ bajcheʼ i butsʼil pom» (Sal. 141:1, 2). Tiʼ yorajlel jiñi rey David miʼ cʼʌjñel chʼujul bʌ pom chaʼan miʼ chʼujutesʌntel Jehová, i jiñi sacerdotejob wen jach bajcheʼ miʼ chajpañob (Éx. 30:34, 35). Jin chaʼan, cheʼ bʌ David tsiʼ taja ti tʼan jiñi pom woli (choncol) i yʌl chaʼan mi caj i wen ñaʼtan chuqui mi caj i suben tiʼ yoración tac jiñi i Tat am bʌ ti panchan. I cheʼʌch la com lac mel (chaʼlen) jaʼel, come la com chaʼan jiñi la coración tac miʼ tijicñesan Jehová.

3. ¿Bajcheʼ yom mi lac pejcan Jehová ti oración, i chucoch?

³ Mach bajcheʼic jach yom mi lac pejcan Jehová ti la coración tac, yomʌch mi lac pʌs chaʼan mi laj qʼuel ti ñuc. Laʼcu lac ñaʼtan jiñi tsaʼ bʌ i qʼuele Isaías, Ezequiel, Daniel yicʼot Juan. Mach lajalic tsaʼ bʌ i qʼueleyob, pero añʌch junchajp muʼ bʌ i taj i bʌ: Miʼ tajob ti tʼan Jehová bajcheʼ juntiquil ñuc bʌ Rey. Isaías tsiʼ qʼuele chaʼan Jehová buchul «ti chan ti ñuc bʌ i yeʼtel» (Is. 6:1-3). Ezequiel tsiʼ qʼuele chaʼan Jehová buchul tiʼ carro yaʼ ti panchan i tiʼ joytʌlel an cheʼ bʌ bajcheʼ arcoíris (Ez.  1:26-28). Daniel tsiʼ qʼuele chaʼan jiñi «Am bʌ Cabʌl i Jabilel» sʌsʌc i pislel i yaʼ tiʼ buchlib woli (yʌquel) i loqʼuel cʼajc woli bʌ ti lejmel (Dn. 7:9, 10). I Juan tsiʼ qʼuele Jehová yaʼ tiʼ buchlib baqui «an jumpʼejl arcoíris cheʼ bʌ yilal bajcheʼ jiñi xajlel i cʼabaʼ esmeralda» (Apoc. 4:2-4). Cheʼ mi lac wen ñaʼtan chaʼan Jehová cabʌl i ñuclel miʼ cʼajtesʌbeñonla chaʼan jumpʼejlʌch ñuc bʌ lac majtan cheʼ miʼ mejlel lac pejcan i cheʼ baʼ ora mi lac mel wen ñuc i cʼʌjñibal chaʼan mi lac pʌs chaʼan mucʼʌch laj qʼuel ti ñuc. Pero ¿chuqui miʼ mejlel lac suben cheʼ bʌ mi lac pejcan ti oración?

4. ¿Chuqui mi laj cʌn ti jiñi ñaxan tac bʌ tʼan muʼ bʌ i tilel ti jiñi oración chaʼan Padrenuestro? (Mateo 6:9, 10).

⁴ (Pejcan Mateo 6:9, 10). Ti jiñi Cʌntesa yaʼ ti wits, Jesús tiʼ sube jiñi xcʌntʼañob i chaʼan bajcheʼ yom miʼ chaʼleñob oración chaʼan weñʌch miʼ qʼuel Jehová. Cheʼ bʌ tsaʼix i subeyob «cheʼ yom mi laʼ chaʼlen oración bajcheʼ ili», jiñi ñaxan tac bʌ tsaʼ bʌ i yʌlʌ miʼ taj i bʌ yicʼot jiñi yom bʌ Jehová: Chaʼan miʼ sʌqʼuesʌntel i cʼabaʼ, chaʼan miʼ tilel jiñi i Yumʌntel muʼ bʌ caj i jisan jiñi i contrajob yicʼot chaʼan miʼ chʼʌm tilel jiñi bendición tac albil bʌ i chaʼan chaʼan jiñi Lum yicʼot chaʼan jiñi lac piʼʌlob. Mi mucʼʌch lac taj ti tʼan iliyi ti jiñi la coración tac, mi lac pʌs chaʼan jiñi ñumen ñuc bʌ i cʼʌjñibal chaʼañonla jiñʌch chuqui yom bʌ Jehová.

5. ¿Bajcheʼ mi lac ñaʼtan chaʼan maʼañic i wocolel cheʼ mi laj cʼajtin ti oración chuqui la com bʌ?

⁵ Ti jiñi yambʌ parte ili oración, Jesús tsiʼ pʌsʌ chaʼan maʼañic i wocolel cheʼ mi laj cʼajtin chuqui la com bʌ. Miʼ mejlel laj cʼajtiben Jehová chaʼan miʼ yʌqʼueñonla jiñi i bʌl lac ñʌcʼ ti jujumpʼejl qʼuin, chaʼan miʼ ñusʌbeñonla lac mul, chaʼan miʼ cʌntañonla chaʼan maʼañic mi lac yajlel ti mulil i chaʼan miʼ locʼsañonla tiʼ cʼʌb Satanás (Mat. 6:11-13). Cheʼ bʌ mi laj cʼajtiben Jehová pejtelel iliyi, mi lac pʌs chaʼan yaʼʌch chuculonla tiʼ tojlel i mi lac suben chaʼan la com chaʼan utsʼat miʼ qʼuelonla.

6. ¿Cojach ba yom mi laj cʼajtin muʼ bʌ i yʌjlel ti jiñi oración chaʼan Padrenuestro?

⁶ Jesús mach yomic chaʼan jiñi xcʌntʼañob i chaʼan mucʼ jach i cʼajtiñob muʼ bʌ i yʌjlel ti jiñi oración chaʼan Padrenuestro. Tsiʼ mele yan tac bʌ oración baqui tsiʼ taja ti tʼan chuqui  tac miʼ pensarin (Mat. 26:39, 42; Juan 17:1-26). Joñonla jaʼel miʼ mejlel laj cʼajtin ti la coración chuqui tac mi lac pensarin. Jumpʼejl ejemplo, cheʼ bʌ an chuqui woli lac ñaʼtan lac mel, miʼ mejlel laj cʼajtin lac ñaʼtʌbal (Sal. 119:33, 34). Cheʼ bʌ mi caj lac mel jumpʼejl eʼtel (troñel) wocol bʌ mi la cubin, miʼ mejlel laj cʼajtiben Jehová chaʼan miʼ coltañonla lac ñaʼtan bajcheʼ miʼ mejlel lac mel (Pr. 2:6). Jiñi tatʌ ñaʼʌlob miʼ mejlel i cʼajtiñob ti oración tiʼ tojlel i yalobilob, i jiñi alʌlob miʼ mejlel i cʼajtiñob jaʼel tiʼ tojlel i tat i ñaʼ. Cheʼ jaʼel, ti lac pejtelel yom mi laj cʼajtin tiʼ tojlel jiñi muʼ bʌ la cʌqʼueñob estudio yicʼot tiʼ tojlel jiñi muʼ bʌ lac subeñob wen tʼan. Pero jiñi oración mach chaʼañic jach mi laj cʼajtin chuqui la com.

7. ¿Chucoch yom mi la cʌqʼuen i ñuclel Jehová ti jiñi la coración tac?

⁷ Yom mi laj cʼajtesan jaʼel la cʌqʼuen i ñuclel Jehová ti jiñi la coración tac. Maʼañic majqui yambʌ yom bʌ mi lac ñumen aqʼuen i ñuclel. Juntiquil salmista tsiʼ yʌlʌ: «Isujm utsʼatet, c Yum, maʼ ñusʌbeñon lojon c mul». I tsiʼ bej alʌ: «C Yum, maʼ pʼuntan winicob xʼixicob. Maʼ pʌsbeñob i yutslel a pusicʼal. Maʼ cuchbeñob i sajtemal. Cabʌlʌch a wutslel, wen xucʼulet» (Sal. 86:5, 15). Cabʌl chucoch yom mi la cʌqʼuen i ñuclel Jehová chaʼan jiñi melbil bʌ i chaʼan yicʼot chaʼan bajcheʼ yilal ti lac tojlel.

8. ¿Chucoch tac la com la cʌqʼuen wocolix i yʌlʌ Jehová ti oración? (Salmo 104:12-15, 24).

⁸ Mach yomic jach mi la cʌqʼuen i ñuclel Jehová ti jiñi la coración, la com la cʌqʼuen wocolix i yʌlʌ jaʼel chaʼan pejtelel muʼ bʌ i yʌqʼueñonla, bajcheʼ jiñi utsʼatax bʌ i colorlel jiñi ñichteʼ tac, chaʼan jiñi cabʌl sumuc tac bʌ bʌlñʌcʼʌl yicʼot cheʼ wen mi lac ñusan la quicʼot jiñi wem bʌ la camigojob. Jiñi lac Tat muʼ bʌ i wen cʼuxbiñonla miʼ yʌqʼueñonla pejtelel iliyi yicʼot yan tac bʌ come yom chaʼan tijicñayonla (pejcan Salmo 104:12-15, 24). Cheʼ jaʼel, mi la cʌqʼuen wocolix i yʌlʌ chaʼan jiñi cabʌl chʼujul bʌ bʌlñʌcʼʌl muʼ bʌ i yʌqʼueñonla yicʼot chaʼan jiñi utsʼatax bʌ lac pijtaya.

9. ¿Chuqui miʼ mejlel lac mel chaʼan mi laj cʼajtesan la cʌqʼuen wocolix i yʌlʌ Jehová? (1 Tesalonicenses 5:17, 18).

⁹ Orajach miʼ mejlel ti ñajʌyel lac chaʼan la cʌqʼuen wocolix i yʌlʌ Jehová chaʼan pejtelel melbil bʌ i chaʼan ti lac tojlel. ¿Chuqui miʼ mejlel lac mel chaʼan maʼañic mi la cujtel bajcheʼ  jiñi? Miʼ mejlel lac tsʼijbun chuqui tac an laj cʼajtibe i mi lac chʌcʌ qʼuel bajcheʼ an i jacʼbeyonla. Cheʼ jiñi, miʼ mejlel la cʌqʼuen wocolix i yʌlʌ chaʼan i coltaya (pejcan 1 Tesalonicenses 5:17, 18). Tijicñayonla yicʼot mucʼʌch laj cʼuxbintel mi la cubin cheʼ bʌ mi la cʌqʼuentel wocolix la cʌlʌ. Jehová jaʼel tijicña miʼ yubin cheʼ bʌ mi laj cʼajtesan la cʌqʼuen wocolix i yʌlʌ cheʼ an i jacʼʌ la coración tac (Col. 3:15). Pero anto yambʌ chucoch yom mi la cʌqʼuen wocolix i yʌlʌ Jehová, i wen ñuc i cʼʌjñibal. Laʼ laj qʼuel chuquiyes.

10. ¿Chucoch yom mi la cʌqʼuen wocolix i yʌlʌ Jehová cheʼ tsiʼ choco tilel i Yalobil ila ti Lum? (1 Pedro 2:21).

¹⁰ (Pejcan 1 Pedro 2:21). Yom mi la cʌqʼuen wocolix i yʌlʌ Jehová cheʼ tsiʼ choco tilel i Yalobil chaʼan miʼ cʌntesañonla. Cheʼ mi lac pejcan bajcheʼ yilal tsaʼ chumle Jesús, cabʌl chuqui mi laj cʌn tiʼ tojlel Jehová yicʼot chaʼan chuqui yom mi lac mel chaʼan mi lac tijicñesan. Mi mucʼʌch lac pʌs lac ñopoñel ti jiñi i cuxtʌlel tsaʼ bʌ i yʌcʼʌ Jesús, lʌcʼʌl mi lac mejlel ti ajñel tiʼ tojlel Jehová i mi lac taj lac ñʌchʼtʌlel la quicʼot (Rom. 5:1).

11. ¿Chucoch mi lac chaʼlen oración tiʼ cʼabaʼ Jesús?

¹¹ Mi la cʌqʼuen wocolix i yʌlʌ Jehová come miʼ mejlel lac chaʼlen oración tiʼ cʼabaʼ i Yalobil. Jehová miʼ cʼʌn Jesús chaʼan miʼ yʌqʼueñonla chuqui mi laj cʼajtiben. Mi mucʼʌch lac chaʼlen oración tiʼ cʼabaʼ i Yalobil, Jehová mi caj i ñʌchʼtañonla i mi caj i jacʼbeñonla. Jesús tsiʼ yʌlʌ: «Jin jach chuqui mi laʼ cʼajtin tij cʼabaʼ, joñon mi caj c mel, chaʼan jiñi Tatʌl miʼ ñuqʼuesʌntel tiʼ tojlel i Yalobil» (Juan 14:13, 14).

12. ¿Chucoch yambʌ yom mi la cʌqʼuen wocolix i yʌlʌ Jehová chaʼan i Yalobil?

¹² Jehová miʼ ñusʌbeñonla lac mul come Jesús tsiʼ yʌcʼʌ i bʌ ti laj caj. Jiñi Biblia miʼ yʌl chaʼan Jesús jiñʌch «ñumen ñuc bʌ sacerdote» yicʼot chaʼan «tsaʼ buchle yaʼ tiʼ ñoj jiñi Ñuc bʌ Dios yaʼ ti panchan» (Heb. 8:1). Miʼ yʌl jaʼel chaʼan «an juntiquil la caj coltaya yaʼ bʌ an yicʼot jiñi Tatʌl: Jesucristo» (1 Juan 2:1). Mi la cʌqʼuen wocolix i yʌlʌ Jehová cheʼ tsiʼ yʌqʼueyonla juntiquil Ñumen ñuc bʌ sacerdote muʼ bʌ i pʼuntañonla, muʼ bʌ i chʼʌmbeñonla i sujm yicʼot muʼ bʌ i «cʼajtin ti wocol tʼan chaʼañonla» (Rom. 8:34; Heb. 4:15). Cheʼ machic tsiʼ yʌcʼʌ i bʌ Jesús ti laj caj, maʼañic mi lac mejlel lac pejcan Jehová come xmulilonla. Maʼañic mi lac taj lac tʼan chaʼan mi la cʌqʼuen wocolix i yʌlʌ Jehová chaʼan ili wen ñuc bʌ lac majtan: Jiñi cʼuxbibil bʌ i Yalobil.

13. ¿Bajcheʼ tsiʼ pʌsʌ Jesús cheʼ bʌ an jachix yom jumpʼejl acʼʌlel miʼ chʌmel chaʼan mucʼʌch i cʼuxbin jiñi xcʌntʼañob i chaʼan?

¹³ Cheʼ bʌ jumpʼejl jax acʼʌlel yom chaʼan miʼ chʌmel (sajtel) Jesús, jal tsiʼ mele oración, tsiʼ wen cʼajti tiʼ tojlel jiñi xcʌntʼañob i chaʼan, i tiʼ sube i Tat chaʼan miʼ cʌntañob tiʼ tojlel Satanás (Juan 17:15). ¡Tsaʼʌch i wen pʌsʌ i cʼuxbiya! Anquese tsʼitaʼ jachix yom chaʼan miʼ ñusan tsʌts bʌ wocol, tsaʼʌch i wen pensari chaʼan wen miʼ yajñel jiñi i yapóstolob.

14. ¿Bajcheʼ mi lac pʌs chaʼan mucʼʌch laj cʼuxbin la quermañujob?

¹⁴ Cheʼ bajcheʼ Jesús, joñonla jaʼel mach cojach mi laj cʼajtin chuqui la com bʌ. Mi lac chaʼlen oración jaʼel tiʼ tojlel yambʌ la quermañujob. Cheʼ bajcheʼ jiñi, mi lac jacʼ jiñi i mandar Jesús chaʼan mi laj cʼuxbin lac bʌ i mi lac pʌsben Jehová chaʼan mi lac wen cʼuxbin jiñi la quermañujob (Juan 13:34). I la cujil chaʼan maʼañic woli lac sʌt lac tiempo cheʼ mi laj cʼajtin ti oración tiʼ tojlel yambʌ i wiñicob Jehová. Jiñi Biblia miʼ yʌl chaʼan «jiñi oración  muʼ bʌ i mel ti wocol tʼan jiñi toj bʌ wiñic añʌch i pʼʌtʌlel» (Sant. 5:16).

15. ¿Chucoch yomʌch mi laj cʼajtin ti oración tiʼ tojlel jiñi la quermañujob?

¹⁵ Jiñi la quermañujob miʼ ñusañob tsʌts tac bʌ wocol, jin chaʼan yomʌch mi laj cʼajtin tiʼ tojlelob. Miʼ mejlel laj cʼajtiben Jehová chaʼan miʼ coltañob chaʼan miʼ cuchob jiñi cʼamʌjel tac, jiñi tsʌts tac bʌ icʼ jaʼal, jiñi guerra tac o jiñi ticʼlʌntel. Miʼ mejlel laj cʼajtin jaʼel tiʼ tojlel jiñi hermanojob muʼ bʌ i chaʼleñob wersa chaʼan miʼ chaʼleñob coltaya cheʼ bʌ miʼ yujtel wocol tac. Tajol jatet a cʌñʌ woli bʌ i ñusan wocol tac bajcheʼ iliyi. ¿Ixcu cheʼ muqʼuic a tajob ti tʼan tiʼ cʼabaʼ ti a woración tac? Cheʼ mi laj cʼajtiben Jehová chaʼan miʼ coltan ili hermanojob chaʼan miʼ chʌn chaʼleñob wersa, mi lac pʌs chaʼan mucʼʌch laj cʼuxbiñob tiʼ sujm.

16. ¿Chucoch yom mi lac chaʼlen oración tiʼ tojlel jiñi hermanojob añoʼ bʌ tiʼ wenta jiñi congregación?

¹⁶ Jiñi hermanojob añoʼ bʌ tiʼ wenta jiñi congregación miʼ wen qʼuelob ti ñuc cheʼ mi lac chaʼlen oración tiʼ tojlelob, i jiñi oración tac mucʼʌch i coltañob. Cheʼʌch tsiʼ yubi i bʌ jiñi apóstol Pablo. Tiʼ tsʼijbu: «Chaʼlenla oración tic tojlel jaʼel chaʼan cheʼ bʌ mic chaʼlen tʼan, mic taj c tʼan chaʼan yicʼot c chʼejlel miʼ mejlel cʌcʼ ti cʌñol jiñi chʼujul bʌ tʼan mucul bʌ chaʼan bʌ jiñi wen tʼan» (Efes. 6:19). Ili ora jaʼel an cabʌl hermanojob muʼ bʌ i chaʼleñob tsʌts bʌ eʼtel chaʼan miʼ cʌntañonla. Cheʼ mi laj cʼajtiben Jehová chaʼan miʼ yʌcʼ i bendición tiʼ pejtelel muʼ bʌ i melob, mi lac pʌs chaʼan mucʼʌch laj cʼuxbiñob.

17, 18. ¿Baqui miʼ mejlel lac subentel lac mel oración, i chuqui yom cʼajal lac chaʼan?

¹⁷ Tajol mi lac subentel lac mel oración baqui an yambʌ lac piʼʌlob. Jumpʼejl ejemplo, juntiquil hermana woli bʌ i yʌcʼ estudio miʼ suben jiñi hermana tsaʼ bʌ i pʌyʌ majlel chaʼan miʼ mel jumpʼejl oración. Tajol ili hermana miʼ yʌl chaʼan jin miʼ mel jiñi cojix bʌ oración come mach wen i cʌñʌyic jiñi estudiante. Cheʼ bajcheʼ jiñi mi caj i mejlel i cʼajtin chuqui i cʼʌjñibal i chaʼan jiñi estudiante.

¹⁸ ¿Ixcu mi tsaʼ subenti juntiquil hermano chaʼan miʼ chaʼlen oración ti jiñi tempa bʌ chaʼan subtʼan o ti jiñi tempa bʌ yaʼ ti congregación? Jiñi hermanojob añoʼ bʌ tiʼ wenta iliyi  yom cʼajalob i chaʼan chucoch woliʼ mejlel jiñi tempa bʌ. Jiñi oración tac mach chaʼañic miʼ tijqʼuel jiñi hermanojob o chaʼan miʼ mejlel anuncio tac. Lʌcʼʌ tiʼ pejtelel jiñi tempa bʌ miʼ yʌjqʼuel 5 minuto chaʼan jiñi cʼay yicʼot jiñi oración. Jin chaʼan, jiñi hermano muʼ bʌ i mel jiñi oración mach yomic miʼ cʼʌn «cabʌl tʼan tac», ñumento tiʼ tejchibal jiñi tempa bʌ (Mat. 6:7).

19. ¿Chuqui mi caj i coltañonla chaʼan chajpʌbilonla chaʼan jiñi i qʼuiñilel Jehová?

¹⁹ Lʌcʼʌlix jiñi i qʼuiñilel Jehová, jin chaʼan yomto mi lac ñumen qʼuel ti ñuc jiñi oración. Jesús tsiʼ taja ti tʼan iliyi cheʼ bʌ tsiʼ yʌlʌ: «Yom chʌn yʌxʌl laʼ wo i chʌn cʼajtinla ti wocol tʼan tiʼ pejtelel ora chaʼan miʼ mejlel laʼ putsʼtan jiñi yom tac bʌ miʼ yujtel» (Luc. 21:36). Mi mucʼʌch lac chʌn chaʼlen oración, yʌxʌl la co mi caj la cajñel i chajpʌbilonla chaʼan jiñi i qʼuiñilel Jehová.

20. ¿Chuqui miʼ mejlel lac mel chaʼan jiñi la coración tac cheʼʌch bajcheʼ xojocña bʌ pom?

²⁰ ¿Chuqui tsaʼ laj qʼuele ti ili estudio? Mi lac wen qʼuel ti ñuc cheʼ miʼ mejlel lac pejcan Jehová ti oración. Jiñi ñumen ñuc bʌ i cʼʌjñibal yom bʌ mi laj cʼajtin jiñʌch jiñi lajal bʌ yicʼot jiñi yom bʌ Jehová. Cheʼ jaʼel, mi la cʌqʼuen wocolix i yʌlʌ chaʼan jiñi i Yalobil, jiñi i Yumʌntel, i mi laj cʼajtin tiʼ tojlel la quermañujob. Cheʼ jaʼel, miʼ mejlel laj cʼajtiben Jehová chaʼan miʼ yʌqʼueñonla i bʌl lac ñʌcʼ yicʼot jiñi chʼujul bʌ bʌlñʌcʼʌl. Cheʼ mi lac wen ñaʼtan chuqui mi caj la cʌl ti jiñi la coración tac, mi lac pʌs chaʼan mucʼʌch laj qʼuel ti ñuc ili wen ñuc bʌ lac majtan. Jehová mi caj i qʼuel jiñi lac tʼan bajcheʼ xojocña bʌ pom, mi caj i tijicñesʌben i pusicʼal (Pr. 15:8).