1. ¿Bajcheʼ miʼ mejlel lac lajin Jehová, jiñi lac Tat cʼuxbiya bʌ?

JEHOVÁ, jiñi lac Tat, miʼ wen cʼuxbiñonla (Jn. 3:16). Come la com lac lajin, mi lac chaʼlen wersa chaʼan mi la cubin bajcheʼ miʼ yubiñob i bʌ yambʌlob, mi lac pʌsbeñob laj cʼuxbiya yicʼot lac pʼuntaya, pero ñumento mi lac pʌsbeñob jiñi «la quermañujob jini chʌncol bʌ i chʼujbiñob Dios jeʼel» (Gá. 6:10, Jini wen bʌ tʼan; 1 P. 3:8). La com laj coltan pejtelel la quermañojob cheʼ bʌ miʼ ñusañob wocol.

2. ¿Chuqui mi caj laj qʼuel ti ili temaj?

² Pejtelel yomoʼ bʌ ochel tiʼ familia Jehová mi caj i tajob wocol (Mr. 10:29, 30). Tajol ñumento mi caj lac taj cheʼ lʌcʼʌlix i jilibal ili pañimil (mulawil). ¿Bajcheʼ miʼ mejlel laj coltan lac bʌ? Laʼ lac ñaxan qʼuel jiñi relato tac tiʼ tojlel Lot, Job yicʼot Noemí. Ti wiʼil, mi caj laj qʼuel chuqui tac ti wocol miʼ ñusan jiñi la quermañojob yicʼot bajcheʼ miʼ mejlel laj coltañob i ñusan.

3. Cheʼ bajcheʼ miʼ pʌs 2 Pedro 2:7, 8, ¿chuqui mach bʌ weñic tsiʼ mele Lot, i chuqui ti wocol tsiʼ taja?

³ Mach weñic chuqui tsiʼ mele Lot cheʼ bʌ tiʼ yajca chumtʌl ti Sodoma baqui chumul wiñicob xʼixicob (quixtañujob) muʼ bʌ i wen chaʼleñob tsʼiʼlel (pejcan 2 Pedro 2:7, 8). Tiʼ sujm, weñʌch bʌ lum pero tsiʼ taja cabʌl wocol cheʼ tsaʼ cʌyle yaʼi (Gn. 13:8-13; 14:12). Jiñi i yijñam Lot maʼañic tsiʼ jacʼbe i tʼan Jehová come tajol tsiʼ wen mulaj chumtʌl ti jiñi tejclum o i ñochtan jiñi quixtañujob yaʼ bʌ chumulob. Tsaʼ chʌmi cheʼ bʌ  Dios tsiʼ choco jubel cʼajc ti jiñi tejclum. I tiʼ tojlel jiñi chaʼtiquil i yixicʼal (yixicpʼeñal) Lot, muqʼuix bʌ i cajel i ñujpuñelob, tsaʼ chʌmi i noviojob yaʼ ti Sodoma. Lot tiʼ sʌtʌ i yotot, chuqui an i chaʼan i cheʼto jaʼel i yijñam (Gn. 19:12-14, 17, 26). Pero Jehová maʼañic tsiʼ wis cʌyʌ i pʌs i pijt tiʼ tojlel ti jiñi wocol tac tsaʼ bʌ i ñusa.

4. ¿Bajcheʼ tsiʼ pʌsʌ Jehová chaʼan añʌch i pijt tiʼ tojlel Lot? (Qʼuele jiñi dibujo am bʌ tiʼ tejchibal).

⁴ Anquese Lot tsiʼ yajca chumtʌl yaʼ ti Sodoma, Jehová tsiʼ pʌsbe i pʼuntaya i tiʼ choco majlel ángelob chaʼan miʼ coltan yicʼot i familia. Pero maʼañic tsiʼ jacʼʌ ti ora jiñi mandar chaʼan yom miʼ loqʼuelob ti jiñi tejclum come tsaʼto i jaletesa i bʌ. Jiñi ángelob tsiʼ chucbeyob i cʼʌb Lot, i yijñam yicʼot i yixicʼalob chaʼan miʼ coltañob loqʼuel (Gn. 19:15, 16). Cheʼ jiñi, jiñi ángelob tiʼ subeyob chaʼan miʼ putsʼelob majlel ti wits tac. Pero Lot maʼañic tsiʼ jacʼʌ, tsiʼ cʼajtibe Dios, tiʼ tojlel jiñi ángelob, chaʼan yom majlelob tiʼ jumpʼejl tejclum lʌcʼʌl bʌ an (Gn. 19:17-20). Jehová tsaʼʌch i ñʌchʼtʌbe i tʼan i tiʼ sube chaʼan miʼ mel (chaʼlen) tsaʼ bʌ i cʼajti. Ti wiʼil, Lot tsiʼ bʌcʼña chumtʌl yaʼi i tsaʼ majli yaʼ ti wits tac, yaʼ baqui tsiʼ ñaxan sube Jehová (Gn. 19:30). Tiʼ sujm, Jehová tsaʼʌch i pʌsʌ i pijt tiʼ tojlel. Laʼ laj qʼuel bajcheʼ miʼ mejlel lac lajin.

5, 6. ¿Bajcheʼ miʼ coltañonla muʼ bʌ i yʌl 1 Tesalonicenses 5:14 chaʼan mi lac lajin Dios?

⁵ Lajal bajcheʼ Lot, tajol juntiquil hermano yaʼ ti congregación miʼ yajcan i mel mach bʌ weñic, i tiʼ caj jiñi miʼ taj wocol. Mi cheʼʌch miʼ yujtel, ¿chuqui mi caj lac mel? An qʼuiñil la com lac suben chaʼan jiñʌch tsaʼ bʌ i bajñel sʌcla i wocol, i tiʼ sujm cheʼʌchi (Gá. 6:7). Pero an chuqui ñumen wem bʌ miʼ mejlel lac mel: Laʼ lac mel cheʼ bajcheʼ Jehová tsiʼ colta Lot. ¿Bajcheʼ?

⁶ Jehová mach cojach tsiʼ choco majlel jiñi ángelob chaʼan miʼ suben Lot chaʼan mi caj i jisʌntel jiñi Sodoma, chaʼañʌch miʼ coltañob loqʼuel yaʼi. Lajal jaʼel, tajol mi laj qʼuel chaʼan juntiquil hermano an chuqui mach bʌ weñic woli (choncol) i mel i yom mi lac suben chaʼan maʼañic miʼ taj wocol. Pero miʼ mejlel laj coltan jaʼel. Anquese mach ti orajic mi caj i jacʼ jiñi ticʼojel tac am bʌ ti Biblia, yom la cujil pijt tiʼ tojlel. Yom mi lac mel bajcheʼ jiñi chaʼtiquil ángelob. Mach yomic mi lac lujbʼan mi muqʼuic lac ñajtʼesan lac bʌ tiʼ tojlel, yom mi lac sʌclan bajcheʼ miʼ mejlel laj coltan (1 Jn. 3:18). Miʼ cʼʌjñibalʌch, lajal bajcheʼ mi caj lac chucben i cʼʌb i mi laj coltan chaʼan miʼ jacʼ jiñi ticʼojel am bʌ ti Biblia (pejcan 1 Tesalonicenses 5:14).

7. Cheʼ bajcheʼ Jehová tsiʼ mele tiʼ tojlel Lot, ¿chuqui yom mi lac wen qʼuel ti ñuc?

⁷ Cheʼ yomic Jehová cojach tsaʼ mejli i qʼuelben i sajtemal jiñi Lot, pero mach cheʼic tsiʼ mele. Cheʼ ñumeñix ora, tiʼ tojlel jiñi apóstol Pedro, tiʼ tsictesa chaʼan Lot juntiquilʌch toj bʌ wiñic. Mi wen aqʼueñonla lac tijicñʌyel cheʼ Jehová miʼ ñusan lac sajtemal (Sal. 130:3). Laʼ lac lajiben i melbal i laʼ lac ñumen qʼuel ti ñuc jiñi wem bʌ i melbal la quermañojob. Mi cheʼʌch mi lac mel, mi caj lac ñumen pʌs lac pijt tiʼ tojlelob, i tajol mucʼʌch caj i jacʼob chaʼan mi laj coltañob.

8. ¿Chuqui mi caj i ñijcañonla lac mel jiñi lac pʼuntaya?

⁸ Job tsiʼ ñusa tsʌts bʌ wocol tac, pero mach tiʼ caj chaʼan tsiʼ yajca i mel mach bʌ weñic cheʼ bajcheʼ lot. Cheʼ bajcheʼ la cujilix, tiʼ sʌtʌ chuqui an i chaʼan, jiñi quixtañujob mach weñix tsaʼ caji i qʼuelob yicʼot tsaʼ cʼamʼa. I ñumen cʼux tsiʼ yubi cheʼ tsaʼ chʌmi pejtelel i yalobil. Cheʼ jaʼel, uxtiquil i yamigojob  tiʼ subeyob mach bʌ tojic i maʼañic tsiʼ ñuqʼuesʌbeyob i pusicʼal. ¿Chucoch maʼañic tsiʼ pʼuntayob? Junchajp, come maʼañic tsiʼ ñopo i chʼʌmbeñob i sujm bajcheʼ cʼamel woli (yʌquel) i ñusan wocol jiñi Job. Jin chaʼan, mach weñic chuqui tsaʼ cʼoti i ñaʼtañob i tsʌts bajcheʼ tsiʼ tiqʼuiyob. ¿Chuqui mi caj i coltañonla chaʼan mach cheʼic mi lac mel? Ti ñaxan, yom mi lac ñaʼtan chaʼan cojach Jehová yujil pejtelel chuqui woliʼ ñusan juntiquil quixtañu. Cheʼ jaʼel, yom mi lac wen ñʌchʼtan chuqui miʼ subeñonla juntiquil hermano woli bʌ i ñusan wocol. Mach cojach yom mi lac ñʌchʼtan, laʼ lac ñop lac ñaʼtan bajcheʼ woliʼ ticʼlan. Cheʼ bajcheʼ jiñi, mi caj lac chumtan bajcheʼ miʼ yubin i bʌ.

9. ¿Chuqui mi caj lac mel mi añʌch lac pʼuntaya, i chucoch?

⁹ Mi añʌch lac pʼuntaya, maʼañic mi caj lac suben yambʌlob chuqui ti wocol woliʼ ñusan juntiquil hermano. Jiñi muʼ bʌ i yʌl yambʌlob, miʼ jem jiñi congregación, maʼañic miʼ coltan (Pr. 20:19; Ro. 14:19). Maʼañic miʼ pʌs i yutslel i maʼañic miʼ chʼʌm ti ñuc yambʌ, i jiñi i tʼan miʼ mejlel i low jiñi woliyix bʌ i yilan wocol (Pr. 12:18; Ef. 4:31, 32). Jin chaʼan, ñumen wen cheʼ mi laj qʼuelben wen tac bʌ i melbal jiñi quixtañu i mi lac ñaʼtan bajcheʼ miʼ mejlel laj coltan chaʼan miʼ ñusan jiñi wocol.

10. ¿Chuqui miʼ cʌntesañonla muʼ bʌ i yʌl Job 6:2, 3?

¹⁰ (Pejcan Job 6:2, 3). An i tajol, Job ‹cʌlʌx jax tsiʼ chaʼle tʼan›. Pero ti wiʼil, tsiʼ chaʼ ñaʼta chaʼan mach tojic tsaʼ bʌ i yʌlʌ (Job 42:6). Lajal bajcheʼ Job, jiñi muʼ bʌ i ñusan tsʌts bʌ wocol tac, tajol mach tojic chuqui miʼ yʌl i ti wiʼil miʼ chaʼ ñaʼtan i bʌ. ¿Chuqui yom mi lac mel? Laʼ lac pʌsben lac pʼuntaya  i mach la cʌʼlen. Laʼ laj cʼajtesan chaʼan Jehová mach yomic chaʼan jiñi quixtañujob miʼ ñusañob wocol tac yicʼot jiñi cʌlʌx pensar am bʌ ili ora. Jin chaʼan, mucʼʌch lac chʼʌmben i sujm cheʼ juntiquil xucʼul bʌ i wiñic Dios woli bʌ i ñusan tsʌts bʌ wocol miʼ yʌl mach bʌ tojic. Anquese miʼ yʌl mach bʌ i sujmic tiʼ tojlel Jehová yicʼot ti lac tojlel, mach yomic mi lac michʼan ti ora mi muqʼuic la cʌʼlen (Pr. 19:11).

11. ¿Bajcheʼ miʼ mejlel i lajiñob Elihú jiñi ancianojob cheʼ miʼ yʌqʼueñob ticʼojel juntiquil hermano?

¹¹ An i tajol, jiñi hermano woli bʌ i ñusan tsʌts bʌ wocol yom miʼ yʌqʼuentel ticʼojel o miʼ tojʼesʌntel (Gá. 6:1). ¿Bajcheʼ miʼ mejlel i coltañob jiñi ancianojob? Jiñʌch cheʼ mi lajiñob Elihú, tsaʼ bʌ i ñʌchʼtʌbe i tʼan Job i tsiʼ ñaʼta bajcheʼ tsiʼ yubi i bʌ (Job 33:6, 7). Elihú tsiʼ ñaxan chʼʌmbe i sujm chuqui woliʼ ñaʼtan Job chaʼan miʼ yʌqʼuen ticʼojel. Jiñi ancianojob miʼ mejlel i lajiñob cheʼ miʼ wen ñʌchʼtañob chuqui miʼ yʌl jiñi woli bʌ i ñusan wocol, i miʼ ñop i chʼʌmbeñob i sujm chuqui woliʼ ñusan. Cheʼ bajcheʼ jiñi, jiñi ticʼojel muʼ bʌ i yʌcʼob mi caj i cʼotel tiʼ pusicʼal jiñi hermano.

12. ¿Bajcheʼ tsiʼ yubi i bʌ Noemí cheʼ tsaʼ chʌmi i ñoxiʼal yicʼot chaʼtiquil i yalobil?

¹² Noemí, juntiquilʌch xucʼul bʌ xʼixic tsaʼ bʌ i cʼuxbi Jehová. Pero cheʼ bʌ tsaʼ chʌmi i ñoxiʼal yicʼot chaʼtiquil i yalobil, tsiʼ ñaʼta i qʼuextan i cʼabaʼ bajcheʼ Mará, yom bʌ i yʌl «chʼijiyem bʌ» (Rt. 1:3, 5, 20, 21). Juntiquil i yʌʼlib i cʼabaʼ Rut, maʼañic tsiʼ cʌyʌ ti jiñi wocol tac. Mach cojach tsiʼ wen sʌcla bajcheʼ miʼ mejlel i coltan, tsaʼʌch i ñuqʼuesʌbe i pusicʼal tiʼ tʼan. Ti wen tac bʌ tʼan tsiʼ sube chaʼan miʼ cʼuxbin yicʼot chaʼan mach i bajñelic (Rt. 1:16, 17).

13. ¿Chucoch i cʼʌjñibalob i chaʼan laj coltaya juntiquil tsaʼ bʌ chʌmi i ñoxiʼal o i yijñam?

¹³ Cheʼ bʌ juntiquil ti congregación miʼ chʌmel (sajtel) i yijñam o i ñoxiʼal, i cʼʌjñibal i chaʼan laj coltaya. Jumpʼejl xñujpuñel miʼ mejlel i lajintel bajcheʼ chaʼtejc teʼ muʼ bʌ i lajal colel majlel. Cheʼ mi ñumel jiñi jabil tac, jiñi i wiʼ tac miʼ bechʼ i bʌ majlel. Mi tsaʼ bojqui juntejc yicʼot miʼ chʌmel, jiñi yambʌ miʼ taj wocol. Lajal jaʼel, cheʼ miʼ sʌt i piʼʌl juntiquil ñujpuñem bʌ cʌlʌxix bajcheʼ miʼ yʌqʼuen i yubin i bʌ mach bʌ orajic miʼ lajmel. Laʼ laj qʼuel tiʼ tojlel Paula, * tsaʼ bʌ chʌmi i ñoxiʼal. Miʼ tsictesan: «Ti ora tsaʼ waʼ qʼuextʌyi j cuxtʌlel i maʼañix majch an c chaʼan tsaʼ cubi. Tsaʼ chʌmi jiñi wem bʌ camigo. Chuqui jachix mi cʌl quicʼot c ñoxiʼal. Temel mi lon c taj lon c tijicñʌyel yicʼot miʼ coltañon cheʼ bʌ mi c ñusan wocol. Jiñʌch tsaʼ bʌ i wen ñʌchʼtayon cheʼ bʌ chʼijiyemon. Lajal bajcheʼ an chuqui tsaʼ chʌmi ti c bʌcʼtal tsaʼ cubi».

14, 15. ¿Bajcheʼ miʼ mejlel lac ñuqʼuesʌben i pusicʼal juntiquil tsaʼ bʌ chʌmi i piʼʌl?

¹⁴ ¿Bajcheʼ miʼ mejlel lac ñuqʼuesʌben i pusicʼal juntiquil tsaʼ bʌ chʌmi i piʼʌl? Muʼ bʌ mejlel lac ñaxan mel jiñʌch cheʼ mi lac pejcan anquese mach la cujilic chuqui mi caj lac suben. Paula miʼ yʌl: «Cujil chaʼan maʼañic majqui miʼ wen mulan i yʌl chaʼan bʌ jiñi chʌmel. Mi cʼojoʼtañob chaʼan mejl i yʌlob mach bʌ weñic. Pero maʼañic i cʼʌjñibal cheʼ ñʌchʼʌl jach mi laj cʌytʌl. Chaʼ wen cheʼ añixto chuqui mi la cʌl». Tajol jiñi woli bʌ i ñusan wocol maʼañic miʼ pijtan chaʼan an chuqui ñuc bʌ mi caj lac suben. Paula miʼ yʌl: «Mi cʌqʼuen wocolix i yʌlʌ jiñi camigojob cheʼ tiʼ subeyoñob chaʼan tsaʼʌch i yubiyob i chʼijiyemlel jaʼel».

¹⁵ William, añix bʌ ora tsaʼ chʌmi i yijñam,  miʼ yʌl: «Mi c mulan cheʼ bʌ utsʼatax chuqui miʼ yʌlob tiʼ tojlel quijñam. Jiñi miʼ yʌqʼueñon c ñaʼtan chaʼan tsaʼʌch i cʼuxbiyob yicʼot tsiʼ qʼueleyob ti ñuc. Ili an i ñumen coltayon. Jiñi i tʼan tac yambʌlob an i ñuqʼuesʌbeyon c pusicʼal come ti c wen cʼuxbi quijñam i jiñʌch ñumen ñuc bʌ tsaʼ ajñi ti j cuxtʌlel». Bianca miʼ tsictesan: «Miʼ ñuqʼuesan c pusicʼal cheʼ jiñi yambʌlob miʼ chaʼleñob oración yicʼoton i cheʼ miʼ pejcʌbeñoñob chaʼpʼejl uxpʼejl texto. Miʼ wen coltañon cheʼ miʼ cʼajtesañob c ñoxiʼal i cheʼ miʼ ñʌchʼtañob muʼ bʌ cʌl tiʼ tojlel».

16. a) ¿Chuqui yom mi lac bej mel tiʼ tojlel jiñi tsaʼ bʌ chʌmiyob i piʼʌl? b) Cheʼ bajcheʼ miʼ yʌl Santiago 1:27, ¿chuqui an ti lac wenta lac mel?

¹⁶ Lajal bajcheʼ Rut maʼañic tsiʼ cʌyʌ Noemí, joñonla jaʼel yom mi lac bej cʌntan jiñi tsaʼ bʌ chʌmi i piʼʌl. Paula, tsaʼ bʌ lac taja ti tʼan, miʼ yʌl: «Cheʼ bʌ maxto jalic i chʌmel c ñoxiʼal tsaʼ wen coltʌntiyon. Cheʼ ñumeñix ora, jiñi yambʌlob miʼ chaʼ tech i melob ñʌmʌl bʌ i melob. Pero jiñi j cuxtʌlel tsaʼ junyajl qʼuextʌyi. Ñuc i cʼʌjñibal cheʼ jiñi yambʌlob miʼ ñaʼtañob, chaʼan cheʼ an majqui miʼ chʌmel lac chaʼan, la com coltʌntel ti cabʌl uw o ti cabʌl jab». Tiʼ sujm, jiñi quixtañujob mach lajalobic yicʼot yʌñʌl bajcheʼ miʼ yubiñob i bʌ. An muʼ bʌ i seb ñʌmʼañob chaʼan jiñi. Pero an muʼ bʌ i wen ubiñob i chʼijiyemlel cheʼ miʼ melob chuqui ñʌmʌl bʌ i melob yicʼot jiñi tsaʼ bʌ chʌmi. Yom mi lac wen cʼajtesan chaʼan Jehová tsiʼ yʌcʼʌ ti lac wenta chaʼan mi laj cʌntan jiñi mebaʼob (pejcan Santiago 1:27).

17. ¿Chucoch ñuc i cʼʌjñibal cheʼ mi laj coltañob jiñi tsaʼ bʌ cʌjyiyob tiʼ ñoxiʼal o tiʼ yijñam?

 ¹⁷ Yambʌ muʼ bʌ i wen acʼ cʼojol yicʼot wocol, jiñʌch cheʼ jiñi ñujpuñem bʌ miʼ cʌy i piʼʌl. Jumpʼejl ejemplo, Joyce tsaʼ cʌjyi tiʼ ñoxiʼal tiʼ caj yambʌ xʼixic. Miʼ yʌl: «Ñumen cʼux tsaʼ cubi jiñi divorcio, ñumento cheʼ tsaʼic chʌmi jiñi c ñoxiʼal. Cheʼ tsaʼic chʌmi tiʼ caj cʼamʌjel o tiʼ caj yambʌ, mach jiñic tsiʼ ñaʼta i mel. Pero ti ili wocol, jiñʌch tsiʼ ñaʼta i cʌyon. Tsiʼ yʌcʼʌyon ti quisin».

18. ¿Chuqui miʼ mejlel lac mel chaʼan mi laj coltan jiñi maʼañobix bʌ i piʼʌl?

¹⁸ Jiñi maʼañobix bʌ i piʼʌl i cʼʌjñibalob i chaʼan wem bʌ i yamigojob (Pr. 17:17). ¿Bajcheʼ miʼ mejlel lac pʌsbeñob chaʼan i yamigojonla? Jiñʌch cheʼ mi lac pʌsbeñob la cutslel anquese mach wen ñuquic chuqui mi lac mel. Tajol, miʼ mejlel lac pʌyob ti uchʼel, mi lac ñusan qʼuin la quicʼotob o mi lac tem loqʼuel ti subtʼan. Miʼ mejlel lac pʌyob jaʼel ti lac chʼujutesaya ti familia. Mi mucʼʌch lac mel mi caj lac tijicñesan Jehová come lʌcʼʌl an tiʼ tojlel jiñi chʼijiyemoʼ bʌ yicʼot miʼ cʌntan jiñi mebaʼ xʼixicob (Sal. 34:18; 68:5).

19. Cheʼ bajcheʼ miʼ yʌl 1 Pedro 3:8, ¿chuqui la com lac mel ti jumpʼejl lac pusicʼal?

¹⁹ Mach jalix, cheʼ bʌ jiñi i Yumʌntel Dios miʼ yuman ili Pañimil, mi caj lac ñajʌtesan pejtelel laj cʼojol tsaʼ bʌ lac taja wajali. La comix chaʼan miʼ cʼotel jiñi ora cheʼ «maʼanic mi caj i chʌn ñaʼtʌntel jini tsaʼix bʌ ñumi. Maʼanix majch mi caj i chʌn cʼajtesan» (Is. 65:16, 17). Pero ili ora laʼ lac chʌn coltan lac bʌ i la lac pʌs ti lac melbal yicʼot ti lac tʼan chaʼan mucʼʌch laj cʼuxbin jiñi ochemoʼ bʌ tiʼ familia Jehová (1 Pedro 3:8).