1. Cheʼ bajcheʼ miʼ yʌl Colosenses 2:4, 8, ¿bajcheʼ woliʼ ñop Satanás i qʼuextʌbeñonla lac pensar?

SATANÁS yom chaʼan mi laj cʌy laj cʼuxbin Jehová. Jin chaʼan, woli (choncol) i ñop i qʼuextʌbeñonla lac pensar come yom chaʼan lajal lac pensar bajcheʼ i chaʼan. Miʼ cʼʌn chuqui tac mi lac mulan chaʼan miʼ lotiñonla i yom i yʌqʼueñonla lac ñop chaʼan ñumen wen cheʼ jin mi lac jacʼben i tʼan (pejcan Colosenses 2:4, 8).

2, 3. a) ¿Chucoch yom mi lac chʼʌm ti ñuc muʼ bʌ i yʌl Colosenses 2:8? b) ¿Chuqui mi caj laj qʼuel ti ili temaj?

² ¿I sujm ba chaʼan cabʌl i wocolel cheʼ miʼ lotiñonla Satanás? I sujmʌch. Laʼ laj cʼajtesan chaʼan jiñi ticʼojel tsaʼ bʌ i tsʼijbu Pablo yaʼ ti Colosenses 2:8 chaʼañʌch tiʼ tojlel jiñi xñoptʼan bombiloʼ bʌ ti chʼujul bʌ espíritu, mach tiʼ tojlelic jiñi mach bʌ xñoptʼañobic (Col. 1:2, 5). Añob ti wocol ti jiñi bʌ ora, pero wʌle ñumento joñonla (1 Co. 10:12). ¿Chucoch? Come Satanás tsaʼ chojqui jubel ila ti Pañimil i an jach tiʼ ñaʼtʌbal i lotin jiñi xucʼul bʌ i wiñicob Dios (Ap. 12:9, 12, 17). I cheʼ jaʼel, chumulonla ti jumpʼejl pañimil baqui jiñi wiñicob xʼixicob (quixtañujob) «utsi utsijax miʼ chʌn melob i jontolil» (2 Ti. 3:1, 13).

³ Ti ili temaj, mi caj laj qʼuel bajcheʼ woli (yʌquel) i ñop Satanás i qʼuextʌbeñonla lac pensar cheʼ miʼ cʼʌn i «sajtemal  loqʼuem bʌ tiʼ bajñel pusicʼal». Mi caj laj qʼuel uxchajp muʼ bʌ i cʼʌn chaʼan miʼ ‹lotiñonla› (Ef. 6:11). Yaʼ ti yambʌ temaj mi caj lac tsajin bajcheʼ miʼ mejlel lac locʼsan ti lac pensar jiñi i lot tac. Pero laʼ lac ñaxan qʼuel chuqui tsiʼ cʼʌñʌ Satanás chaʼan miʼ lotin jiñi israelob cheʼ tsaʼix ochiyob ti jiñi Lum tsaʼ bʌ wʌn Subentiyob yicʼot chuqui miʼ cʌntesañonla.

4-6. Cheʼ bajcheʼ miʼ yʌl Deuteronomio 11:10-15, ¿chuqui tsaʼ qʼuextʌyi chaʼan bajcheʼ yom miʼ melob i cholel jiñi israelob cheʼ tsaʼ ochiyob ti jiñi Lum tsaʼ bʌ wʌn Subentiyob?

⁴ Satanás tsiʼ wen chajpa chaʼan jiñi israelob miʼ chʼujutesañob diosteʼ tac. Come yujil chaʼan yomob i taj chuqui miʼ cʼuxob, jiñʌch tsiʼ cʼʌñʌ chaʼan miʼ melob (chaʼleñob) chuqui yom. Cheʼ tsaʼ ochiyob ti jiñi Lum tsaʼ bʌ wʌn Subentiyob, tiʼ tsijib cʌñʌyob bajcheʼ yom miʼ melob (pʌtob) i cholel. Cheʼ bʌ yaʼto añob ti Egipto, miʼ cʼʌñob jiñi jaʼ Nilo chaʼan miʼ mulob i cholel. Pero yaʼ baqui tsaʼ cʼotiyob maʼañic colem jaʼ, cojach miʼ cʼʌñob jiñi yeʼeb yicʼot jiñi jaʼal (pejcan Deuteronomio 11:10-15; Is. 18:4, 5). Jin chaʼan, yom miʼ cʌñob tsijib tac bʌ bajcheʼ miʼ melob i cholel. I wocolʌch jiñi, come lʌcʼʌ tiʼ pejtelelob yujiloʼ bʌ i chaʼan bʌ pʌcʼʌbʌl, tsaʼ chʌmiyob yaʼ ti tiquin bʌ lum.

⁵ Jehová tiʼ subeyob chaʼan mach lajalix bajcheʼ chumulob. Ti wiʼil, an chuqui tiʼ subeyob maʼañic bʌ miʼ wen coltañob yilal chaʼan miʼ melob i cholel. Tsiʼ yʌlʌ: «Yom chʌn xucʼul laʼ pusicʼal. Mach yomic mi laʼ tʌtsʼ laʼ bʌ chaʼan mi laʼ chʼujutesan jini melbil tac bʌ dios. Mach yomic mi laʼ ñocchocon laʼ bʌ tiʼ tojlel» (Dt. 11:16, 17). ¿Chucoch tiʼ subeyob  jiñi mi woliʼ subeñob chaʼan bajcheʼ yom miʼ melob i cholel?

⁶ Jehová yujil chaʼan jiñi israelob miʼ mejlel i mulañob i cʌn tiʼ tojlel jiñi yambʌ tejclum tac chaʼan bajcheʼ yambʌ miʼ mejlel i cʼʌñob jiñi lum. Tiʼ sujm, jiñi cananeojob wen yujilob i chaʼan bʌ pʌcʼʌbʌl tac ñumento bajcheʼ jiñi i wiñicob Dios, i chaʼan mejlʌch i cʌñob tiʼ tojlelob. Pero añʌch i wocolel. Jiñi i ñaʼtʌbal jiñi cananeojob yaʼ chucul tiʼ chʼujutesʌntel Baal, muʼ bʌ i yʌlob chaʼan jiñʌch i yum panchan muʼ bʌ i yʌqʼueñob jaʼal. Jehová mach yomic chaʼan jiñi israelob miʼ ñopob jiñi lot tac. Pero mach junyajl jach tsiʼ yajcayob i chʼujutesan Baal (Nm. 25:3, 5; Jue. 2:13; 1 R. 18:18). ¿Bajcheʼ tsaʼ mejli i lotin Satanás jiñi israelob? Laʼ laj qʼuel.

7. ¿Bajcheʼ tsaʼ ajqʼui ti wocol i ñopoñel jiñi israelob cheʼ bʌ tsaʼ ochiyob yaʼ ti Lum tsaʼ bʌ wʌn Subentiyob?

⁷ Tsaʼ bʌ i ñaxan cʼʌñʌ Satanás jiñʌch cheʼ jiñi israelob ñuc i cʼʌjñibalob i chaʼan jiñi jaʼal chaʼan miʼ colel jiñi cholel tac. Yaʼ ti Lum tsaʼ bʌ wʌn Subentiyob, cojach miʼ tsʼitaʼ chaʼlen jaʼal cheʼ tiʼ yujtibal abril cʼʌlʌl ti septiembre. Chaʼan miʼ colel wem bʌ pʌcʼʌbʌl tac, ñuc i cʼʌjñibal jiñi jaʼal muʼ bʌ i tejchel cheʼ ti octubre. Jiñi tejclum tac lʌcʼʌ bʌ an ti Israel miʼ ñaʼtañob chaʼan añʌch chuqui tac yom miʼ melob tiʼ tojlel jiñi diosteʼ tac chaʼan miʼ chocbeñob cʼotel jaʼal, wen ñuc bʌ i cʼʌjñibal i chaʼañob. Satanás tsiʼ yʌqʼue i ñop jiñi israelob chaʼan wen mi caj i chumtʌlob mi mucʼʌch i melob jiñi costumbre tac i chaʼan bʌ diosteʼ tac. Jiñi maʼañic bʌ tsiʼ ñopoyob Jehová tsiʼ ñaʼtayob chaʼan cojach jiñi miʼ mejlel i coltañob chaʼan miʼ chaʼlen jaʼal, jin chaʼan tsiʼ chʼujutesayob Baal.

8. ¿Chuqui ti yambʌ yac tsiʼ cʼʌñʌ Satanás? Tsictesan bajcheʼ tsiʼ cʼʌñʌ.

⁸ Satanás tsiʼ cʼʌñʌ jiñi i mulʌntel piʼleya tiʼ tojlel jiñi israelob. Jiñi yambʌ tejclum tac miʼ chaʼleñob tsʼiʼlel chaʼan miʼ chʼujutesañob i diosob. Wen bibiʼ jax chuqui miʼ melob, jiñi xʼixicob yic’ot wiñicob miʼ choñob i bʌ yaʼ ti templo tac. Cheʼ jaʼel, wen jach bajcheʼ miʼ qʼuelob jiñi muʼ bʌ i wʌlʌc piʼleñob i bʌ yicʼot i chaʼan tac bʌ tsʼiʼlel (Dt. 23:17, 18; 1 R. 14:24). Miʼ ñaʼtañob chaʼan jiñʌch muʼ bʌ i cʼʌjñibʌyel chaʼan jiñi diosob miʼ sujtesañob ti wem bʌ lum baqui añob i cholel. Yonlel israelob tsiʼ mulayob i mel i chaʼan bʌ tsʼiʼlel yicʼot tsiʼ chʼujutesayob diosteʼ tac. Tiʼ sujm, tsaʼ jach i yʌcʼʌyob i bʌ ti lotintel ti Satanás.

9. Cheʼ bajcheʼ miʼ yʌl Oseas 2:16, 17, ¿chuqui tsiʼ mele Satanás chaʼan maʼañix miʼ ñaʼtʌntel majqui Jehová?

⁹ I yuxchajplel tsaʼ bʌ i cʼʌñʌ Satanás jiñʌch iliyi: Tsiʼ yʌcʼʌ ti ñajʌtesʌntel majqui Jehová. Tiʼ yorajlel jiñi xʼaltʼan Jeremías, Jehová tsiʼ yʌlʌ chaʼan jiñi mach bʌ i sujmic xʼaltʼañob woliʼ yʌqʼueñob i ñajʌtesan jiñi israelob jiñi i cʼabaʼ i miʼ subeñob ti Baal (Jer. 23:27). Jiñi israelob maʼix tsaʼ caji i cʼʌñob i cʼabaʼ Dios i tsaʼix caji i subeñob ti Baal, yom bʌ i yʌl «yum». Cheʼ bajcheʼ jiñi, tiʼ ñaʼtʌbal i wiñicob Dios lajalix tsaʼ caji i qʼuelob Jehová yicʼot Baal, jin chaʼan, mach wocolix tsiʼ xʌbʌyob jiñi melbal tac tiʼ chʼujutesʌntel Baal yicʼot i chʼujutesʌntel Jehová (pejcan Oseas 2:16, 17).

10. ¿Chuqui ti yac tac miʼ cʼʌn Satanás ili ora?

¹⁰ Satanás muʼto i cʼʌn jiñi yac tac ili ora. Miʼ lotin quixtañujob ti chuqui i cʼʌjñibalob i chaʼan, miʼ cʼʌn jiñi i mulʌntel piʼleya yicʼot miʼ yʌcʼ ti ñajʌtesʌntel majqui Jehová. Ili cojix bʌ jiñʌch muʼ bʌ caj lac ñaxan taj ti tʼan.

11. ¿Bajcheʼ an i yʌcʼʌ ti ñajʌtesʌntel Satanás majqui Jehová?

 ¹¹ Satanás miʼ yʌcʼ ti ñajʌtesʌntel majqui Jehová. Cheʼ bʌ tsaʼix luʼ chʌmiyob jiñi i apóstolob Jesús, an tsaʼ bʌ caji i subob i bʌ bajcheʼ xñoptʼañob i tsiʼ pucuyob cʌntesa tac mach bʌ i sujmic (Hch. 20:29, 30; 2 Ts. 2:3). Jiñiyob tsaʼ caji i yʌcʼob ti ñajʌtesʌntel majqui jiñi Jehová. Jumpʼejl ejemplo, maʼañix tsaʼ caji i cʼʌñob i cʼabaʼ Dios yaʼ ti Biblia, i tsaʼ jach i cʌyʌyob bajcheʼ lac «Yum» o yan tac bʌ. Tiʼ caj jiñi, jiñi yom bʌ i pejcan jiñi Biblia, wocolix miʼ yubin chaʼan miʼ ñaʼtan majqui Jehová yicʼot jiñi yambʌlob muʼ bʌ i subentelob ti lac «Yum» yaʼ tiʼ Tsʼijbujel (1 Co. 8:5). Tsiʼ cʼʌñʌyob jiñi tʼan lac «Yum» chaʼan miʼ tajob ti tʼan Jehová yicʼot Jesús, jiñʌch tsaʼ bʌ i yʌcʼʌ chaʼan wocol miʼ ñaʼtʌntel chucoch mach lajalic Dios yicʼot i Yalobil (Jn. 17:3). Iliyi tsaʼ cʼʌjñi chaʼan miʼ ñumen ñojpel chaʼan an uxtiquil Dios, jumpʼejl cʌntesʌntel mach bʌ chuculic ti Biblia. Jin chaʼan, yonlel quixtañu miʼ ñaʼtañob chaʼan mach mejlic lac wis cʌn Dios. Ili jiñʌch jumpʼejl ñuc bʌ lot (Hch. 17:27).

12. a) ¿Chuqui an i pʌsʌ jiñi mach bʌ i sujmic ñopbalʌl? b) Cheʼ bajcheʼ miʼ yʌl Romanos 1:28-31, ¿chuqui an ujtem tiʼ caj jiñi?

¹² Satanás miʼ cʼʌn i mulʌntel piʼleya. Tiʼ yorajlel israelob, Satanás tsiʼ cʼʌñʌ jiñi mach bʌ i sujmic ñopbalʌl chaʼan miʼ pʌs jiñi tsʼiʼlel. Ti ili ora cheʼʌch miʼ mel jaʼel. Jiñi mach bʌ i sujmic ñopbalʌl mach lecojic miʼ qʼuel jiñi bibiʼ bʌ melbal tac i miʼ yʌcʼ ti ñaʼtʌntel chaʼan jiñʌch ñʌmʌl bʌ ti mejlel. Jin chaʼan, yonlel muʼ bʌ i yʌlob chaʼan miʼ chʼujutesañob Dios an i cʌyʌ i jacʼob muʼ bʌ i yʌl jiñi Biblia. ¿Chuqui an ujtem tiʼ caj jiñi? Jiñi apóstol Pablo miʼ tsictesan ti jiñi carta tsaʼ bʌ i tsʼijbu tiʼ tojlel jiñi romanojob (pejcan Romanos 1:28-31). Ti jiñi ‹mach tac bʌ wenic› yaʼ ochem jiñi pejtelel i chaʼan bʌ tsʼiʼlel yicʼot jaʼel jiñi muʼ bʌ i wʌlʌc piʼleñob i bʌ (Ro. 1:24-27, 32; Ap. 2:20). Tiʼ sujm, ñuc i cʼʌjñibal cheʼ mi lac jacʼ jiñi cʌntesa tac am bʌ ti Biblia.

13. ¿Baqui bʌ jiñi yambʌ yac miʼ cʼʌn Satanás?

¹³ Satanás miʼ cʼʌn chuqui i cʼʌjñibal bʌ lac chaʼan. I tilelʌch cheʼ com lac taj taqʼuin chaʼan mi lac mʌcʼlan lac bʌ yicʼot lac familia. I la com lac wen chajpan lac bʌ (1 Ti. 5:8). ¿Bajcheʼ mi lac mel? Jiñʌch cheʼ mi lac majlel  ti escuela, i cheʼ wem bʌ xqʼueljuñonla. Pero yom tsajilonla. Ti cabʌl país, mach cojic jach miʼ cʌntesʌntel jiñi alobob jiñi ñuc tac bʌ i cʼʌjñibal chaʼan i cuxtʌlelob, miʼ cʌntesʌntelob jaʼel tiʼ ñaʼtʌbal wiñicob. Miʼ subentelob chaʼan maʼañic Dios yicʼot chaʼan miʼ tsʼaʼleñob muʼ bʌ i yʌl jiñi Biblia. Miʼ subentelob i chaʼan bʌ evolución chaʼan jiñʌch ñumen wem bʌ muʼ bʌ i tsictesan chaʼan bajcheʼ tsaʼ caji jiñi laj cuxtʌlel (Ro. 1:21-23). Jiñi i ñaʼtʌbalʌl miʼ contrajin muʼ bʌ i yʌl Jehová (1 Co. 1:19-21; 3:18-20).

14. ¿Chuqui miʼ cʌntesañonla jiñi i ñaʼtʌbal wiñicob?

¹⁴ Jiñi i ñaʼtʌbal wiñicob maʼañic miʼ chʼʌm ti ñuc o miʼ contrajin i mandar tac Jehová. Maʼañic miʼ pʌs i yʌcʼbal jiñi i yespíritu Dios, cojach i chaʼan bʌ «lac tsucul pusicʼal» (Gá. 5:19-23). Miʼ yʌcʼ chanʼesʌntel, jin chaʼan jiñi quixtañujob cojach miʼ bajñel cʼuxbiñob i bʌ (2 Ti. 3:2-4). Ili melbal tac mach lajalic bajcheʼ jiñi pecʼlel o utslel yom bʌ Jehová chaʼan mi lac taj (1 P. 5:5). ¿Chuqui an i chaʼleyob chaʼtiquil uxtiquil hermanojob ajñemoʼ bʌ ti universidad? An i jacʼbeyob i pensar ili pañimil i mach jiñic i chaʼan bʌ Dios. Laʼ la cʌl jumpʼejl ejemplo.

15, 16. ¿Chuqui miʼ cʌntesañonla tsaʼ bʌ ujti tiʼ tojlel juntiquil hermana?

¹⁵ Juntiquil hermana ñumeñix bʌ ti 15 jab ochem bajcheʼ precursora, miʼ yʌl: «Chʼʌmʌlix c chaʼan jaʼ bajcheʼ i testigo Jehová, i pejcʌbilix yicʼot ubibilix c chaʼan i wocolel tac cheʼ mi lac majlel ti universidad. Pero maʼañic tsaʼ c jacʼʌ. Tsaʼ c ñaʼta chaʼan jiñi ticʼojel maʼañic i cʼʌjñibal ti c tojlel». ¿Chuqui ti wocol tac tsiʼ taja? Miʼ yʌl: «Mi c wen  chaʼlen wersa yicʼot cabʌl mi cʌqʼuen i yorajlel jiñi qʼueljun, i maʼañix miʼ yʌcʼon chaʼan mi c pejcan Jehová ti oración cheʼ bajcheʼ ñʌmʌl c mel. Mi c wen lujbʼan i maʼañix mi c ñusan c bʌ ti subtʼan yicʼot maʼañix mi c chajpan c bʌ ti wen chaʼan jiñi tempa bʌ tac. Tsaʼ cʼoti j qʼuel chaʼan mi c wen qʼuel ti ñuc i chaʼan bʌ jiñi universidad i chaʼan woliʼ ñajtʼesañon ti Jehová. Weñʌch cheʼ tsaʼ cʼoti c ñaʼtan chaʼan yom mi j cʌy. I cheʼʌch tsaʼ c mele».

¹⁶ ¿Bajcheʼ tsiʼ ticʼlʌbe i pensar jiñi universidad? Miʼ yʌl: «Quisintic ti alol pero jiñi universidad tsiʼ cʌntesayon chaʼan yom mi j qʼuelben i sajtemal yambʌlob, ñumento i chaʼan bʌ hermanojob. Chaʼan cabʌl chuqui yom miʼ melob i mi c ñajtʼesan c bʌ tiʼ tojlelob. Cabʌl jab tsaʼ ñumi chaʼan mi c tojʼesan jiñi c pensar. Ili tsaʼ bʌ c ñusa tsiʼ pʌsbeyon chaʼan añʌch i wocolel cheʼ mi lac ñusan jiñi ticʼojel tac muʼ bʌ i yʌqʼueñonla lac Tat yaʼ tiʼ yorganización. Jehová jiñʌch i cʌñʌyon bʌ ñumento bajcheʼ joñon. ¡Maʼañic tsaʼ c taja cabʌl wocol cheʼ tsaʼic jacʼbe i tʼan!».

17. a) ¿Chuqui yom mi lac mel ti jumpʼejl lac pusicʼal? b) ¿Chuqui mi caj la cʌl ti yambʌ temaj?

¹⁷ Ti jumpʼejl lac pusicʼal yom mi la cʌcʼ lac tʼan chaʼan maʼañic mi caj i lotiñonla jiñi i ñaʼtʌbal yicʼot i sajtemal ili i pañimil Satanás. Laʼ lac chʌn chaʼlen wersa chaʼan maʼañic mi lac yajlel tiʼ yac tac (1 Co. 3:18; 2 Co. 2:11). Mach la cʌcʼ chaʼan miʼ yʌqʼueñonla lac ñajʌtesan majqui Jehová yicʼot bajcheʼ yom mi lac melben i yeʼtel (troñel). Laʼ lac jacʼ jiñi ñuc bʌ i ticʼojel tac. I mach la cʌcʼ chaʼan jiñi Diablo miʼ xicʼonla chaʼan mi lac ñusʌben i ticʼojel tac Jehová. Jin chaʼan, ¿chuqui yom mi lac mel mi tsaʼ laj qʼuele chaʼan tsaʼix i qʼuexta lac pensar jiñi i ñaʼtʌbal pañimil? Jiñi yambʌ temaj mi caj i pʌs bajcheʼ miʼ mejlel i coltañonla i Tʼan Dios chaʼan mi lac jem jiñi pʼʌtʌl bʌ ñaʼtʌbal yicʼot melbal tac am bʌ ti pañimil (2 Co. 10:4, 5).