1. ¿Baqui bʌ ticʼojel tsiʼ yʌqʼue jiñi apóstol Pablo jiñi xñoptʼañob bombiloʼ bʌ?

«I CɅYɅX laʼ wʌcʼ laʼ bʌ ti tojʼesʌntel ti jiñi chubʌʼan tac ila ti pañimil», cheʼ tiʼ sube jiñi apóstol Pablo jiñi xñoptʼañob ti ñaxam bʌ siglo (Ro. 12:2, TNM). ¿Chucoch tsaʼ aqʼuentiyob ili ticʼojel jiñi wiñicob yicʼot xʼixicob wolix (choncolix) bʌ i melbeñob i yeʼtel Dios yicʼot bombilobix ti chʼujul bʌ espíritu? (Ro. 1:7).

2, 3. a) ¿Chuqui miʼ ñop i mel Satanás chaʼan mi laj contrajin Jehová? b) ¿Bajcheʼ miʼ mejlel lac locʼsan jiñi ñaʼtʌbalʌl tac wen pʼʌtʌlix bʌ ti lac pensar?

² Pablo tsiʼ wen cʼojoʼta cheʼ jiñi xñoptʼañob tsaʼ caji i ñopob i ñaʼtʌbal pañimil (mulawil) tilem bʌ ti Satanás (Ef. 4:17-19). Iliyi mejlʌch i yujtel ti lac tojlel jaʼel. Satanás, i dios ili pañimil, miʼ cʼʌn cabʌl yac come wersa yom chaʼan mi lac ñajtʼesan lac bʌ tiʼ tojlel Jehová. Junchajp jiñʌch cheʼ miʼ chaʼlen wersa i ñijcañonla lac sʌclan jiñi lac bajñel wenlel o chaʼan mi lac mulan sujtel ti wen cʌmbil bʌ ila ti pañimil. Cheʼ jaʼel, miʼ mejlel i cʼʌn chuqui ñusʌbil lac chaʼan, laj cultura o bajcheʼ cʌntesʌbilonla come yom chaʼan lajal lac pensar bajcheʼ i chaʼan.

³ ¿Muʼ ba i mejlel lac locʼsan jiñi ñaʼtʌbalʌl tac wen pʼʌtʌlix bʌ ti lac pensar? (2 Co. 10:4). Laʼ laj qʼuel chuqui miʼ yʌl jiñi Pablo: «Mic lʌmben lojon pejtel lolom jach bʌ i tʼan winicob, yicʼot  pejtel i ñaʼtʌbal muʼ bʌ i mʌctan yañoʼ bʌ tiʼ cʌñol i sujmlel Dios. Mic ticʼ lojon pejtelel chuqui miʼ lon tejchel tic bajñel pusicʼal lojon chaʼan mic jacʼben lojon i tʼan Cristo» (2 Co. 10:5). Tiʼ sujm, tiʼ coltaya Jehová miʼ mejlel lac ticʼ jiñi lac pensar tac mach bʌ weñic. Cheʼ bajcheʼ jumpʼejl tsʼac miʼ mejlel i coltañonla cheʼ cʼamonla, cheʼ jaʼel jiñi i Tʼan Dios miʼ mejlel i coltañonla chaʼan maʼix miʼ chʌn ticʼlan lac pensar i pañimil Satanás.

4. ¿Chuqui tac ti laj qʼuexta ti laj cuxtʌlel cheʼ bʌ tsaʼ laj cʌñʌ jiñi i sujmlel?

⁴ Laʼ laj cʼajtesan chuqui tac ti laj qʼuexta ti laj cuxtʌlel cheʼ bʌ tsaʼ laj cʌñʌ jiñi i sujmlel am bʌ ti Biblia i tsaʼ lac ñaʼta lac melben i yeʼtel (troñel) Jehová. Cabʌlonla tsaʼ laj cʌyʌ lac mel (chaʼlen) mach tac bʌ weñic (1 Co. 6:9-11). Mi la cʌqʼuen wen wocolix i yʌlʌ Dios cheʼ tsiʼ coltayonla laj cʌy jiñi melbal tac.

5. ¿Chuqui chaʼchajp miʼ subeñonla lac mel Romanos 12:2, TNM?

⁵ Mach yomic mi lac ñaʼtan chaʼan jasʌl jach yom mi lac mel jiñi. Anquese tsaʼix laj cʌyʌ lac mel jiñi tsʌts tac bʌ mulil cheʼ bʌ maxto lac chʼʌmʌ jaʼ, yom mi lac bej chaʼlen wersa chaʼan maʼañic chuqui miʼ chaʼ ñijcañonla tiʼ melol jiñi melbalʌl tac. ¿Bajcheʼ mi lac mel? Pablo miʼ yʌl: «Cʌyʌx laʼ wʌcʼ laʼ bʌ ti tojʼesʌntel ti jiñi chubʌʼan tac ila ti pañimil, pero yom mi laʼ qʼuextan laʼ bʌ cheʼ mi laʼ chaʼ tsijibtesan laʼ pensar» (Ro. 12:2, TNM). Jin chaʼan an chaʼchajp yom bʌ mi lac mel. Ñaxam bʌ, mach la cʌcʼ chaʼan ili pañimil miʼ bej qʼuextʌbeñonla lac pensar. I chaʼchajplel, yom mi laj qʼuextan o mi lac chʌn tsijibtesan jiñi lac pensar.

6. ¿Chuqui miʼ cʌntesañonla jiñi tsaʼ bʌ i yʌlʌ Jesús yaʼ ti Mateo 12:43-45?

⁶ Cheʼ tsiʼ taja ti tʼan Pablo chaʼan an chuqui yom mi laj qʼuextan mach cojach ochem chaʼan bajcheʼ yilalonla. Yaʼ cʌyʌl tiʼ pejtelel laj  cuxtʌlel (qʼuele jiñi recuadro « ¿Muʼ baʼ laj qʼuextan lac bʌ tiʼ sujm o maʼañic?»). Yom mi laj qʼuextan lac pensar, ili yom i yʌl, jiñi muʼ bʌ lac ñaʼtan, lac melbal tac yicʼot bajcheʼ yilal mi la cubin lac bʌ. Jin chaʼan yom mi laj cʼajtiben lac bʌ: ¿Woli ba j qʼuextan c bʌ chaʼan com c lajin Cristo o cheʼ jach woli c pam mel? ¿Woli ba j qʼuextan c pusicʼal yicʼot c pensar tiʼ sujm? I jacʼbal ili cʼajtiya tac ñucʌch i cʼʌjñibal. Yaʼ ti Mateo 12:43-45, tsiʼ yʌcʼʌ jumpʼejl ejemplo Jesús muʼ bʌ i subeñonla chuqui yom mi lac mel (pejcan). Ili ejemplo miʼ pʌsbeñonla ñuc bʌ i sujmlel: Mach cojach yom mi lac locʼsan jiñi mach tac bʌ weñic ti lac pensar, yom mi la cotsan jaʼel chuqui tac miʼ mulan Dios.

7. ¿Bajcheʼ miʼ mejlel laj qʼuextan lac bʌ tiʼ sujm?

⁷ ¿Mejl ba laj qʼuextan lac bʌ tiʼ sujm? Jiñi i Tʼan Dios miʼ yʌl: «Laʼ mejlic laʼ pusicʼal ti tsijib yicʼot laʼ ñaʼtʌbal. Yom mi laʼ chʼʌm tsijiʼ bʌ laʼ pusicʼal melbil bʌ ti toj ti isujm chaʼan chʼujul mi laʼ wajñel cheʼ bajcheʼ Dios» (Ef. 4:23, 24). Cheʼ bajcheʼ mi laj qʼuel, mejlʌch laj qʼuextan lac bʌ, pero mach cʼuñic ti melol. Mach cojach yom mi lac ticʼ lac pensar o mi laj cʌy lac mel mach tac bʌ weñic. Yom mi laj qʼuextan lac pensar. Ili yom i yʌl chaʼan yom mi laj qʼuextan jiñi muʼ bʌ lac mulan, jiñi ñʌmʌl bʌ lac mel yicʼot muʼ bʌ i ñijcañonla. Pero ñuc i cʼʌjñibal cheʼ ti bele ora mi lac chaʼlen wersa.

8, 9. ¿Bajcheʼ miʼ pʌsbeñonla jiñi i ejemplo juntiquil hermano chaʼan ñuc i cʼʌjñibal cheʼ mi laj qʼuextan lac bʌ tiʼ sujm?

⁸ Laʼ laj qʼuel tiʼ tojlel juntiquil hermano wen jontol bʌ ti wajali, muʼ bʌ i wen jap lembal yicʼot miʼ wen mulan jatsʼ. Cheʼ bʌ tsiʼ qʼuexta i melbal, tiʼ tsʼʌctesa muʼ bʌ i cʼajtintel chaʼan jiñi chʼʌmjaʼ, i jiñi wiñicob xʼixicob (quixtañujob) yaʼ tiʼ saj lumal tsiʼ qʼueleyob bajcheʼ tsiʼ wen qʼuextʌbe i cuxtʌlel jiñi i sujmlel. Pero ti jumpʼej bʌ ochʼajel qʼuin cheʼ bʌ mach jalix yom chaʼan miʼ chaʼlen chʼʌmjaʼ, jiñi la quermaño tsiʼ taja jumpʼejl wocol mach bʌ pijtʌbilic i chaʼan: Yaʼ tiʼ yotot tsaʼ cʼoti juntiquil xqʼuixñijel yom bʌ jatsʼ. Ti ñaxan, tsaʼ mejli i ticʼ i bʌ jiñi hermano. Pero maʼix tsiʼ cuchu cheʼ bʌ jiñi wiñic tsiʼ pʼajbe i cʼabaʼ Jehová. Jin chaʼan, tsaʼ loqʼui i tsiʼ jatsʼʌ. ¿Chucoch cheʼ tsiʼ mele bajcheʼ jiñi? Anquese jiñi Biblia tsaʼʌchix i colta chaʼan miʼ ticʼ i bʌ, maxto i tsijibtesa jiñi i pensar. Yom i yʌl chaʼan maxto i qʼuexta i bʌ tiʼ sujm.

⁹ Anquese tsiʼ mele jiñi, tsaʼʌch i bej chaʼle wersa (Pr. 24:16). Tiʼ coltaya jiñi ancianojob tsaʼ bej coli majlel tiʼ chaʼan bʌ Dios, i ti wiʼil tsiʼ qʼueleyob chaʼan mejlix ti ochel bajcheʼ anciano. Pero tsiʼ taja yambʌ wocol ti jumpʼejl bʌ acʼʌlel cheʼ bʌ yaʼan tiʼ jumpatlel i Yotlel Tempa bʌ, juntiquil wiñic qʼuixin bʌ tsiʼ mulaj i jatsʼ yambʌ anciano. ¿Chuqui tsiʼ mele jiñi la quermaño? Ti uts bʌ tʼan yicʼot tiʼ pecʼlel tsiʼ pejca jiñi wiñic chaʼan miʼ ñʌjchʼel i tsiʼ colta chaʼan miʼ cʼotel tiʼ yotot. ¿Chucoch cheʼ tsiʼ mele bajcheʼ jiñi? Come tsaʼix i tsijibtesa jiñi i pensar. Tsiʼ qʼuexta i bʌ tiʼ sujm, tsaʼ sujti ti juntiquil quixtañu wen uts bʌ yicʼot am bʌ i pecʼlel, i jiñi tsiʼ yʌqʼue i ñuclel Jehová.

10. ¿Chuqui yom mi lac mel chaʼan mi laj qʼuextan lac bʌ tiʼ sujm?

¹⁰ Jiñi muʼ bʌ laj qʼuextan ti lac tojlel mach ti orajic miʼ mejlel, añʌch chuqui yom mi lac mel. Tajol cabʌl jab yom mi lac chaʼlen wersa (2 P. 1:5). Mach jasʌlic cheʼ añix ora laj cʌñʌ i sujmlel. Yom mi lac wen chaʼlen wersa laj qʼuextan lac bʌ tiʼ sujm. ¿Chuqui mi caj i coltañonla? Laʼ laj qʼuel ñuc tac bʌ i cʼʌjñibal yom bʌ mi lac mel.

11. ¿Bajcheʼ miʼ coltañonla jiñi oración chaʼan mi laj qʼuextan lac pensar?

¹¹ Ñaxam bʌ, yom mi lac chaʼlen oración. Yom mi laj cʼajtin jaʼel cheʼ bajcheʼ jiñi salmista, tsaʼ bʌ i yʌlʌ: «Dios, chaʼ melbeñon c pusicʼal ti sʌc. Chaʼ mele quespíritu ti tsijib yicʼot ti toj» (Sal. 51:10). Yom mi lac ñaʼtan chaʼan i cʼʌjñibal lac chaʼan cheʼ mi laj qʼuextan lac pensar i chaʼan la com i coltaya Jehová. ¿Chucoch miʼ mejlel lac ñop chaʼan mi caj i coltañonla? Laʼ laj qʼuel tsaʼ bʌ i sube jiñi israelob cheʼ tiʼ yorajlel Ezequiel: «Mi caj cʌqʼueñob tsijiʼ bʌ i pusicʼal yicʼot tsijiʼ bʌ Espíritu. [...] Mi caj cʌqʼueñob wen bʌ i pusicʼal [...] am bʌ tiʼ bʌcʼtal», yom i yʌl, yujil bʌ jacʼol i cʌntesʌntel Dios (Ez. 11:19). Ili tʼan tac miʼ wen ñuqʼuesan lac pusicʼal. Jehová tsiʼ ñaʼta i coltan jiñi israelob chaʼan miʼ qʼuextañob i melbal i yom i coltañonla jaʼel.

12, 13. a) Cheʼ bajcheʼ miʼ yʌl Salmo 119:59, ¿chuqui yom mi lac wen ñaʼtan? b) ¿Chuqui ti cʼajtiya tac yom mi lac melben lac bʌ?

¹² I chaʼpʼejlel, ñuc i cʼʌjñibal cheʼ mi lac wen ñaʼtan muʼ bʌ lac pejcan. Tiʼ pejtelel ora yom mi lac pejcan jiñi Biblia i yom mi la cʌqʼuen i yorajlel chaʼan mi lac wen ñaʼtan chuqui tac bʌ ñaʼtʌbal o pensar yom mi laj qʼuextan (pejcan Salmo 119:59; He. 4:12; Stg. 1:25). Laʼ laj qʼuel chuqui tac bʌ ñaʼtʌbal i chaʼan ili pañimil an i ticʼla lac pensar. Yom mi laj cʌn tiʼ sujm baqui tac bʌ laj cʼunlel i yom mi lac chaʼlen wersa lac mʌlben (jotben).

¹³ Jin chaʼan, miʼ mejlel laj cʼajtiben lac bʌ: «¿Am ba tsʼaʼleya yicʼot tsʌytsʌyñiyel ti c pusicʼal?» (1 P. 2:1). «¿Muʼ ba j cʌlʌx qʼuel c bʌ ti ñuc chaʼan baqui chʼoyolon, baqui jaxʌl tsaʼ c chaʼle qʼueljun o chaʼan bajcheʼ chumulon?» (Pr. 16:5). «¿Muʼ ba c chʼʌmob ti ñuc jiñi quixtañujob maʼañobic bʌ i chubʌʼan o yʌñʌl bʌ i colorlel i pʌchʌlel bajcheʼ c chaʼan?» (Stg. 2:2-4). «¿Muʼ ba c mulan chuqui miʼ pʌs i pañimil Satanás?» (1 Jn. 2:15-17). «¿Muʼ ba c mulan j qʼuel baqui miʼ ñumel chaʼan bʌ tsʼiʼlel yicʼot leto?» (Sal. 97:10; 101:3; Am. 5:15). Tajol i jacʼbal ili cʼajtiya tac miʼ ñumen pʌsbeñonla baqui tac yom mi lac tojʼesan lac bʌ. Mi mucʼʌch lac locʼsan ili ñaʼtʌbalʌl wen pʼʌtʌlix bʌ ti lac pensar mi caj la cʌqʼuen i tijicñʌyel jiñi lac Tat am bʌ ti panchan (Sal. 19:14).

14. ¿Chucoch ñuc i cʼʌjñibal cheʼ mi lac sʌclan wem bʌ la camigojob?

¹⁴ I yuxpʼejlel, ñuc i cʼʌjñibal cheʼ mi lac sʌclan wem bʌ la camigojob. Anquese mi lac taj laj qʼuel o maʼañic, miʼ mejlel lac toybeñob i melbal jiñi muʼ bʌ lac wen ñochtañob (Pr. 13:20). Yaʼ ti escuela o ti la queʼtel joyolonla ti quixtañujob maʼañic bʌ miʼ coltañoñobla lac chaʼlen pensar bajcheʼ Jehová. Pero yaʼ ti tempa bʌ tac miʼ mejlel lac taj wem bʌ la camigojob muʼ bʌ caj i coltañoñobla o i ñijcañoñobla lac pʌs laj cʼuxbiya yicʼot wem bʌ lac melbal tac (He. 10:24, 25).

15, 16. ¿Bajcheʼ woliʼ ñop Satanás i qʼuextʌbeñonla lac pensar?

¹⁵ Laʼ laj cʼajtesan chaʼan Satanás woliʼ chaʼlen wersa chaʼan miʼ qʼuextan lac pensar. Miʼ cʼʌn baqui jach bʌ ñaʼtʌbalʌl chaʼan maʼan mi lac jacʼ jiñi i sujmlel am bʌ ti Biblia.

¹⁶ Satanás woliʼ bej mel ili cʼajtiya tsaʼ bʌ i sube jiñi Eva yaʼ ti pʌcʼʌbʌl Edén: «¿Isujm ba tsiʼ yʌlʌ Dios...?» (Gn. 3:1). Ti ili pañimil mi lac melbentel cʼajtiya tac mejl bʌ i yʌcʼ chaʼan wocol mi lac ñop jiñi i sujmlel, bajcheʼ tac iliyi: «¿Isujm ba cheʼ Dios mach yomic i qʼuel cheʼ miʼ ñujpuñel lajal bʌ xʼixicob o wiñicob? ¿Isujm ba cheʼ Dios maʼañic miʼ yʌqʼueñetla laʼ  mel Navidad yicʼot cumpleaño? ¿Isujm ba cheʼ jiñi laʼ Dios maʼañic miʼ yʌcʼ chaʼan mi laʼ wotsʌbentel chʼichʼ? ¿Isujm ba cheʼ jiñi Dios am bʌ i cʼuxbiya maʼañic miʼ yʌcʼ chaʼan mi laʼ ñochtan juntiquil ti laʼ familia tsaʼ bʌ chaʼlenti ti expulsar?»

17. a) ¿Chuqui yom mi lac mel cheʼ an majqui miʼ melbeñonla cʼajtiya tac chaʼan yom i socbeñonla lac pensar? b) Cheʼ bajcheʼ miʼ yʌl Colosenses 2:6, 7, ¿bajcheʼ mi caj i coltañonla cheʼ mucʼʌch lac mel iliyi?

¹⁷ Yom mi lac ñaʼtan chucoch mi lac ñop jiñi i sujmlel. Mi an cʼajtiya tac muʼto bʌ lac bej cʼajtiben lac bʌ miʼ mejlel i soc lac pensar yicʼot mi laj cʌy lac ñop Dios. Cheʼ jiñi, ¿chuqui yom mi lac mel? Jiñi i Tʼan Dios miʼ subeñonla chaʼan yom mi laj qʼuextan lac pensar chaʼan miʼ cʼotel lac bajñel ñaʼtan baqui bʌ «jiñi wem bʌ, muʼ bʌ i chʼʌm yicʼot jiñi toj bʌ chuqui yom Dios» (Ro. 12:2, TNM). Jiñi i pejcʌntel Biblia tiʼ pejtelel ora mi caj i coltañonla chaʼan mi lac ñop chaʼan i sujmʌch chuqui an laj cʌñʌ ti Biblia. Cheʼ jaʼel, mi caj lac ñumen ñop chaʼan jiñi i mandar tac Jehová jiñʌch ñumen wem bʌ. Cheʼ jiñi, mi caj lac sujtel bajcheʼ juntejc colem teʼ wen tsʌts bʌ i wiʼ yicʼot wen waʼchocobil mi caj la cajñel, ‹xucʼul› mi caj i yajñel lac ñopoñel (pejcan Colosenses 2:6, 7).

18. ¿Chuqui mi caj i coltañonla chaʼan maʼix miʼ ticʼlañonla i pañimil Satanás?

¹⁸ Maʼañic majqui miʼ mejlel i pʼʌtʼesan lac ñopoñel, joñonla yom mi lac mel. Jin chaʼan, laʼ lac chʌn tsijibtesan jiñi lac pensar. Laʼ lac bej pejcan ti oración Jehová i laʼ laj cʼajtiben chʼujul bʌ i yespíritu. Laʼ lac wen ñaʼtan tiʼ pejtelel ora i laʼ lac tsajin jiñi lac pensar yicʼot chuqui miʼ ñijcañonla. Laʼ lac sʌclan wem bʌ la camigojob, laʼ lac ñochtan jiñi muʼ bʌ caj i coltañoñobla laj qʼuextan lac pensar. Mi mucʼʌch lac mel tiʼ pejtelel iliyi, mi caj i coltañonla chaʼan maʼix miʼ ticʼlañonla i pañimil Satanás, i mi caj lac jem «pejtel lolom jach bʌ i tʼan winicob, yicʼot pejtel i ñaʼtʌbal muʼ bʌ i mʌctan yañoʼ bʌ tiʼ cʌñol i sujmlel Dios» (2 Co. 10:5).