1. ¿Chucoch yom mi lac jacʼben i ticʼojel Jesús?

CHEʼ bʌ Jesús tsiʼ yʌcʼʌ jiñi profecía chaʼan jiñi cojix bʌ qʼuin, tsiʼ yʌlʌ: «Chʌcʌ qʼuele laʼ bʌ ame tsʌtsʼac laʼ pusicʼal [...] cheʼ mi laʼ cʼojoʼtan chuqui tac an ti pañimil», ili yom i yʌl, cheʼ bʌ mi lac wen pensalin chuqui i cʼʌjñibal lac chaʼan ti jujumpʼejl qʼuin (Lc. 21:34). ¿Chucoch jiñi xñoptʼañonbʌla yom mi lac jacʼ ili ticʼojel? Come ili ora mi lac ñusan jaʼel jiñi wocol tac muʼ bʌ i ñusañob yambʌ wiñicob xʼixicob (quixtañujob).

2. ¿Chuqui ti wocol tac miʼ ñusañob jiñi la quermañojob?

² An qʼuiñil, mach junchajp jach wocol miʼ yʌqʼueñonla laj cʼojol. Laʼ laj qʼuel ili ejemplo tac. Juntiquil hermano i cʼabaʼ John, * am bʌ i chaʼan esclerosis múltiple, tsiʼ wen taja i chʼijiyemlel cheʼ tsaʼ cʌjyi tiʼ yijñam anquese añix 19 jab ñujpuñemob. Ti wiʼil, jiñi chaʼtiquil i yixicʼal (yixicpʼeñal) tsiʼ cʌyʌ i melbeñob i yeʼtel Jehová. Yambʌ xñujpuñel, Bob yicʼot Linda, tsiʼ ñusayob jaʼel yambʌ wocol. Tiʼ chaʼticlelob maʼañic i yeʼtel (troñel) tsaʼ cʌyleyob i ti wiʼil tsaʼ chʼʌmbentiyob i yotot. Cheʼ jaʼel, Linda tsaʼ tajbenti jumpʼejl cʼamʌjel tiʼ pusicʼal mejl bʌ i tsʌnsan pero tsaʼ tajbenti yambʌ jaʼel.

3. Cheʼ bajcheʼ miʼ yʌl Filipenses 4:6, 7, ¿chuqui miʼ mejlel lac ñop?

³ Miʼ mejlel lac ñop chaʼan Jehová, jiñi lac Tat am bʌ ti panchan, mucʼʌch i chʼʌmben i sujm bajcheʼ cʼamel miʼ ticʼlañonla jiñi wocol tac. I yom i coltañonla lac lʌtʼ (pejcan Filipenses  4:6, 7). Yaʼ tiʼ Tʼan, mi lac taj chuqui ti wocol tsiʼ ñusayob yambʌ i wiñicob Dios i miʼ pʌsbeñonla bajcheʼ tsiʼ coltayob. Laʼ laj qʼuel yambʌ ejemplo tac.

4. ¿Chuqui ti wocol tac tsiʼ ñusa Elías, i chuqui tsiʼ ñopo tiʼ tojlel Jehová?

⁴ Elías tsiʼ melbe (chaʼlibe) i yeʼtel Jehová cheʼ an tsʌts bʌ wocol tac. Juntiquil rey yaʼ ti Israel, mach bʌ xucʼulic ti Jehová, i cʼabaʼ Acab tsaʼ ñujpuñi yicʼot Jezabel, juntiquil xʼixic wen jontol bʌ muʼ bʌ i chʼujutesan Baal. Tiʼ chaʼticlelob tiʼ pucuyob i chʼujutesʌntel Baal yaʼ ti tejclum i tiʼ tsʌnsayob cabʌl xʼaltʼañob i chaʼan Jehová. Pero Elías tsaʼ mejli ti putsʼel. Cheʼ jaʼel, tsiʼ taja i coltʌntel cheʼ bʌ tsaʼ ñumi wiʼñal come tsiʼ ñopo Jehová (1 R. 17:2-4, 14-16). Yicʼot tsiʼ cʼajtibe i coltaya cheʼ bʌ tsiʼ contraji jiñi xʼaltʼañob yicʼot i wiñicob Baal, i tiʼ sube jiñi israelob chaʼan yom miʼ melbeñob i yeʼtel jiñi i sujm bʌ Dios (1 R. 18:21-24, 36-38). Elías cabʌl bajcheʼ tsiʼ qʼuele chaʼan Jehová woli (choncol) i cʌntan yicʼot i coltan ti jiñi tsʌts bʌ wocol tac.

5, 6. Cheʼ bajcheʼ miʼ yʌl 1 Reyes 19:1-4, ¿bajcheʼ tsiʼ yubi i bʌ Elías, i chuqui tsiʼ mele Jehová chaʼan miʼ pʌsben chaʼan mucʼʌch i cʼuxbin?

⁵ (Pejcan 1 Reyes 19:1-4). Cheʼ bʌ jiñi Jezabel tiʼ sube Elías chaʼan mi caj i tsʌnsan, tsiʼ bʌcʼña. Jin chaʼan, tsaʼ putsʼi majlel ti Beer-seba. Tsiʼ wen taja i chʼijiyemlel, jin chaʼan tsiʼ cʼajti chʌmel. ¿Chucoch cheʼ tsiʼ yubi i bʌ bajcheʼ jiñi? Come juntiquilʌch wiñic «lajal [bʌ] bajcheʼonla» (Stg. 5:17). Tajol tiʼ  caj chuqui tsiʼ pensali yicʼot cheʼ tsaʼ lujbʼa, mach cujchix tsiʼ yubi. Tsaʼ cʼoti i ñaʼtan chaʼan maʼañic i cʼʌjñibal pejtelel jiñi tsaʼ bʌ i mele chaʼan jiñi i sujm bʌ chʼujutesaya, chaʼan yaʼ ti Israel maʼañic chuqui tsaʼ tojʼa yicʼot chaʼan i bajñel jach woli (yʌquel) i melben i yeʼtel Jehová (1 R. 18:3, 4, 13; 19:10, 14). Tajol toj sajtel lac pusicʼal bajcheʼ tsiʼ yubi i bʌ ili xʼaltʼan, pero Jehová tsiʼ chʼʌmbe i sujm.

⁶ Cheʼ bʌ Elías tsiʼ yʌlʌ bajcheʼ miʼ yubin i bʌ, Dios maʼañic tsiʼ yʌʼle, tsaʼʌch i colta chaʼan miʼ chaʼ taj i pʼʌtʌlel (1 R. 19:5-7). Ti wiʼil, tiʼ cʼuxbiya tsiʼ tiqʼui cheʼ tsiʼ pʌsbe bajcheʼ cʼamel an i pʼʌtʌlel. Cheʼ jaʼel, tiʼ tsictesʌbe chaʼan anto 7 mil israelob maʼañic bʌ tsiʼ chʼujutesayob Baal (1 R. 19:11-18). Jehová tsiʼ pʌsbe Elías chaʼan mucʼʌch i wen cʼuxbin.

7. ¿Chucoch mucʼʌch i coltañonla cheʼ mi lac wen ñaʼtan bajcheʼ tsiʼ colta Jehová jiñi Elías?

⁷ ¿Woli ba lac ñusan tsʌts bʌ wocol? Cheʼ mi laj qʼuel chaʼan Jehová tsaʼʌch i chʼʌmbe i sujm bajcheʼ tsiʼ yubi i bʌ Elías, miʼ yʌqʼueñonla lac tijicñʌyel. I miʼ yʌqʼueñonla lac ñʌchʼtʌlel cheʼ mucʼʌch i chʼʌmben bajcheʼ mi la cubin lac bʌ. Yujil chaʼan pʼisbil jach chuqui miʼ mejlel lac mel yicʼot yujil chuqui mi lac ñaʼtan i bajcheʼ yubil mi la cubin (Sal. 103:14; 139:3, 4). Cheʼ mucʼʌch lac sʌclan laj coltʌntel ti Jehová cheʼ bajcheʼ tsiʼ mele Elías, mi caj i coltañonla chaʼan mi lac lʌtʼ jiñi wocol tac (Sal. 55:22).

8. ¿Bajcheʼ mi caj i coltañonla Jehová chaʼan mi lac lʌtʼ jiñi wocol tac?

⁸ Cheʼ cabʌl jax bajcheʼ mi la cubin lac bʌ, miʼ mejlel lac ñaʼtan mach bʌ weñic i miʼ cʼuñʼesañonla. Mi cheʼ mi la cujtel bajcheʼ jiñi, laʼ laj cʼajtesan chaʼan Jehová mi caj i coltañonla. ¿Bajcheʼ? Miʼ subeñonla chaʼan mi lac tsictesʌben lac wocol i miʼ yʌqʼueñonla i tʼan chaʼan mucʼʌch caj i jacʼbeñonla chuqui mi laj cʼajtin (Sal. 5:3; 1 P. 5:7). Jin chaʼan, laʼ lac suben tiʼ pejtelel ora jiñi lac wocol. Anquese maʼañic mi caj i yoque pejcañonla bajcheʼ tsiʼ pejca Elías, mi caj i cʼʌn jiñi Biblia yicʼot i yorganización chaʼan miʼ mel. Jiñi relato tac am bʌ ti Biblia mi caj i ñuqʼuesan lac pusicʼal yicʼot mi caj i yʌqʼueñonla lac pijtaya. Cheʼ jaʼel, jiñi hermanojob mi caj i coltañoñobla (Ro. 15:4; He. 10:24, 25).

9. ¿Bajcheʼ miʼ mejlel i coltañonla juntiquil la camigo wen ñʌmʌl bʌ la quicʼot?

⁹ Jehová tiʼ sube Elías chaʼan miʼ tʼox aqʼuen i yeʼtel jiñi Eliseo. Cheʼ bajcheʼ jiñi, tsiʼ yʌqʼue juntiquil i yamigo muʼ bʌ i mejlel i coltan cheʼ bʌ chʼijiyem miʼ yubin. Cheʼ jaʼel, mi an juntiquil la camigo ñʌmʌl bʌ la quicʼot, mi caj i coltañonla cheʼ bʌ choncol lac ñusan wocol (2 R. 2:2; Pr. 17:17). ¿Ixcu mi tsaʼ laj qʼuele chaʼan maʼañic majqui miʼ mejlel lac suben lac wocol? Laʼ laj cʼajtiben Jehová chaʼan miʼ coltañonla lac taj juntiquil hermano añix bʌ i colel tiʼ chaʼan bʌ Jehová chaʼan miʼ coltañonla.

10. a) ¿Baqui bʌ pijtaya miʼ yʌqʼueñonla jiñi tsaʼ bʌ ujti tiʼ tojlel Elías? b) ¿Bajcheʼ miʼ coltañonla muʼ bʌ i yʌl Isaías 40:28, 29?

¹⁰ Jehová tsiʼ colta Elías chaʼan miʼ lʌtʼ majlel i wocol i miʼ melben i yeʼtel ti xucʼul ti cabʌl jab. Jiñi tsaʼ bʌ ujti tiʼ tojlel ili xʼaltʼan miʼ yʌqʼueñonla pijtaya. Tajol miʼ cʼotel i yorajlel jaʼel cheʼ bʌ mi lac ñusan cabʌl wocol muʼ bʌ i cʼuñʼesañonla yicʼot miʼ yʌqʼueñonla lac chʼijiyemlel. Pero mi mucʼʌch lac ñop ti Jehová, jiñʌch muʼ bʌ caj i yʌqʼueñonla lac pʼʌtʌlel chaʼan mi lac bej melben i yeʼtel (pejcan Isaías 40:28, 29).

11-13. ¿Chuqui tsaʼ ujti tiʼ tojlel uxtiquil i wiñicob Dios?

¹¹ Yaʼ ti Biblia, miʼ yʌjlel yambʌ i wiñicob Dios tsaʼ bʌ i wen tajayob wocol jaʼel. Jumpʼejl  ejemplo, Ana tsiʼ cuchu jiñi quisin cheʼ maʼañic i yalobil yicʼot i wajlentel tiʼ tojlel jiñi yambʌ i yijñam i ñoxiʼal (1 S. 1:2, 6). Tsiʼ wen taja i chʼijiyemlel, jin chaʼan tsaʼ caji ti uqʼuel yicʼot maʼañix tsaʼ caji i cʼux i waj (1 S. 1:7, 10).

¹² Jiñi rey David cabʌl wocol tsiʼ ñusa jaʼel. Laʼ laj qʼuel baqui tac bʌ. Tsiʼ wen taja i chʼijiyemlel tiʼ caj chuqui cabʌl mach bʌ weñic tsiʼ mele (Sal. 40:12). Cheʼ jaʼel, tsiʼ cuchu cheʼ bʌ jiñi i yalobil i cʼabaʼ Absalón tsaʼ sujti tiʼ contra, tsaʼ bʌ chʌmi ti wiʼil (2 S. 15:13, 14; 18:33). Cheʼ jaʼel, juntiquil wem bʌ i yamigo tsiʼ contraji (2 S. 16:23-17:2; Sal. 55:12-14). Ti jiñi salmo tac tsaʼ bʌ i tsʼijbu miʼ pʌs bajcheʼ tsiʼ yubi i bʌ, pero miʼ pʌs jaʼel chaʼan tsaʼʌch i ñopo ti tsʼʌcʌl Jehová (Sal. 38:5-10; 94:17-19).

¹³ Cheʼ ñumeñix ora, juntiquil salmista, tajol juntiquil i pʼolbal Asaf tsaʼ bʌ i chaʼle eʼtel yaʼ ti «Chʼujul bʌ Ajñibʌl i chaʼan Dios», tsiʼ wen taja i chʼijiyemlel jaʼel. Tsaʼ caji i mulan bajcheʼ yilal chumulob jiñi jontoloʼ bʌ, i jin tsaʼ bʌ caji i chilben i tijicñʌyel. I maʼañix tsaʼ caji i qʼuel ti ñuc jiñi bendición tac muʼ bʌ i taj i wiñicob Dios (Sal. 73:2-5, 7, 12-14, 16, 17, 21).

14, 15. ¿Chuqui mi laj cʌn ti ili uxpʼejl ejemplo am bʌ ti Biblia?

¹⁴ Ili uxtiquil i wiñicob Jehová tiʼ sʌclayob i coltʌntel tiʼ tojlel. Tsiʼ wen pejcayob ti oración. Tiʼ jamʌ tsictesʌbeyob chucoch woliyob ti cʌlʌx pensar. I cheʼ jaʼel, maʼañic tsiʼ cʌyʌyob majlel baqui miʼ chʼujutesañob Jehová (1 S. 1:9, 10; Sal. 55:22; 73:17; 122:1).

¹⁵ Jiñi lac Dios yujil bʌ pʼuntaya tsaʼʌch i colta ili uxtiquil i wiñicob. Ana tiʼ taja i ñʌchʼtʌlel i pusicʼal (1 S. 1:18). David tiʼ tsʼijbu: «Miʼ taj cabʌl wocol jini toj bʌ. Lac Yum miʼ yʌcʼ ti  colel tiʼ pejtelel i wocol» (Sal. 34:19). I jiñi salmista tiʼ yubi chaʼan Jehová tsiʼ chucbe ‹jini ñoj bʌ i cʼʌb› i tsiʼ tojʼesa majlel ti jiñi wem bʌ i ticʼojel. Tsiʼ chaʼle cʼay: «Pero joñon mic taj c wenlel cheʼ mic ñochtan Dios. Tsaʼix c xucʼchoco c bʌ ti lac Yum» (Sal. 73:23, 28; 73:24, TNM). ¿Chuqui mi laj cʌn ti ili ejemplo tac? Chaʼan añʌch baqui ora mi caj lac taj lac chʼijiyemlel jaʼel tiʼ caj jiñi wocol tac. Pero mi caj lac lʌtʼ majlel cheʼ mucʼʌch lac ñaʼtan chaʼan bajcheʼ an i colta Jehová yambʌ i wiñicob, mi lac pejcan ti oración yicʼot mi lac jacʼben tiʼ pejtelel chuqui miʼ subeñonla (Sal. 143:1, 4-8).

16, 17. a) ¿Chucoch mach yomic mi lac ñajtʼesan lac bʌ? b) ¿Bajcheʼ miʼ mejlel lac chaʼ taj lac pʼʌtʌlel?

¹⁶ Mi laj cʌn yambʌ ñuc bʌ i cʼʌjñibal ti jiñi uxpʼejl ejemplo: Mach yomic mi lac ñajtʼesan lac bʌ ti Jehová mi tiʼ wiñicob (Pr. 18:1). Nancy tsiʼ wen ila wocol cheʼ bʌ tsaʼ cʌjyi tiʼ ñoxiʼal. Miʼ yʌl: «Ti cabʌl qʼuin maʼañic majqui com j qʼuel yicʼot c pejcan. Pero cheʼ bʌ mi c ñumen ñajtʼesan c bʌ, ñumento mi c taj c chʼijiyemlel». Tsaʼ caji ti qʼuextʌyel majlel cheʼ bʌ tsaʼ caji i sʌclan chaʼan miʼ coltan jiñi añoʼ bʌ i wocol. Miʼ yʌl: «Mi c ñʌchʼtañob  cheʼ bʌ miʼ subeñoñob bajcheʼ miʼ yubiñob i bʌ. Tsaʼ cʼoti j qʼuel chaʼan cheʼ bʌ mi c chumtan bajcheʼ miʼ yubiñob, tsaʼix caji ti yʌjñel bajcheʼ mi j qʼuel c bʌ».

¹⁷ Miʼ mejlel lac chaʼ taj lac pʼʌtʌlel cheʼ maʼañic mi laj cʌy majlel ti tempa bʌ. Cheʼ mi lac mel jiñi, miʼ mejlel i ñumen coltañonla Jehová yicʼot i ñuqʼuesan lac pusicʼal (Sal. 86:17). Yaʼi miʼ cʼʌn jiñi chʼujul bʌ i yespíritu, i Tʼan yicʼot i wiñicob chaʼan miʼ pʼʌtʼesañonla. Cheʼ jaʼel yaʼ ti tempa bʌ miʼ mejlel lac ñuqʼuesʌben i pusicʼal yambʌlob i miʼ mejlel i melob ti lac tojlel jaʼel (Ro. 1:11, 12). Juntiquil hermana i cʼabaʼ Sofía, tsiʼ yʌlʌ: «Jehová yicʼot jiñi hermanojob tsiʼ coltayoñob chaʼan mi c bej chaʼlen wersa. Ñumen ñuc bʌ ti j qʼuele joñon jiñʌch jiñi tempa bʌ. Tsaʼ cʼoti j qʼuel chaʼan cheʼ bʌ mi c ñumen chaʼlen subtʼan yicʼot mi c ñumen chaʼlen coltaya ti congregación mach wocolic mi c ñusan majlel jiñi c wocol yicʼot jiñi j cʼojol tac».

18. ¿Chuqui miʼ mejlel i yʌqʼueñonla Jehová cheʼ bʌ an lac chʼijiyemlel?

¹⁸ Cheʼ bʌ chʼijiyemonla, yom mi laj cʼajtesan chaʼan Jehová mach cojach miʼ yʌcʼ i tʼan chaʼan mi caj i yoque jisan jiñi wocol, miʼ coltañonla jaʼel chaʼan mi lac lʌtʼ majlel ili ora. Miʼ yʌqʼueñonla lac pʼʌtʌlel yicʼot miʼ yʌcʼ ti lac pusicʼal chaʼan la com lac mʌlben (jotben) lac chʼijiyemlel yicʼot laj cʌlʌx pensar (Fil. 2:13).

19. ¿Chuqui miʼ subeñonla Romanos 8:37-39?

¹⁹ (Pejcan Romanos 8:37-39). Jiñi apóstol Pablo miʼ subeñonla chaʼan maʼañic majqui miʼ mejlel i ñajtʼesañonla tiʼ cʼuxbiya Dios. Cheʼ jiñi, ¿bajcheʼ miʼ mejlel laj coltan jiñi hermanojob woli bʌ i chaʼleñob wersa chaʼan miʼ lʌtʼob majlel jiñi wocol tac? Ti yambʌ temaj mi caj laj cʌn chuqui yom mi lac mel chaʼan mi lac pʌs lac pʼuntaya yicʼot mi laj coltañob cheʼ bajcheʼ miʼ mel Jehová.