TSʼITAʼ jachix yom chaʼan jiñi israelob miʼ cʼaxelob yaʼ ti Jordán jaʼ chaʼan miʼ cʼotelob ti jiñi Lum tsaʼ bʌ wʌn Subentiyob. Pero ti jumpʼejl bʌ qʼuin, tsaʼ cʼoti xʼixicob tilemoʼ bʌ ti yambʌ tejclum chaʼan miʼ pʌyob majlel jiñi wiñicob ti jumpʼejl qʼuiñijel. Tajol tsiʼ ñaʼtayob chaʼan miʼ mejlelob ti majlel chaʼan miʼ tajob yambʌ i yamigojob, miʼ chaʼleñob son yicʼot miʼ cʼuxob wem bʌ bʌlñʌcʼʌl. Anquese i costumbre yicʼot i melbal (chaʼlebal) jiñi xʼixicob mach chuculic ti jiñi mandar tsaʼ bʌ i yʌqʼue Jehová jiñi israelob, tajol an wiñicob tsaʼ bʌ i ñaʼtayob chaʼan mejlʌch i cʌntañob i bʌ i chaʼan maʼañic chuqui mi caj i chaʼleñob.

 Pero ¿chuqui tsaʼ ujti? Jiñi Biblia miʼ subeñonla: «Jini winicob tsaʼ caji i melob i tsʼiʼlel yicʼot xʼixicob añoʼ bʌ ti Moab». Tiʼ sujm, jiñi xʼixicob yomob jach chaʼan jiñi israelob miʼ chʼujutesañob diosteʼ tac. I jiñʌch tsaʼ bʌ cʼoti i melob jiñi wiñicob. Jin chaʼan tsaʼʌch michʼa Jehová yicʼot jiñi Israel (Nm. 25:1-3).

Jiñi israelob chaʼchajp bajcheʼ tsiʼ ñusʌbeyob i mandar Dios: Tsiʼ ñocchocoyob i bʌ tiʼ tojlel diosteʼ tac yicʼot tsiʼ meleyob i chaʼan bʌ tsʼiʼlel. Yonlel tsaʼ bʌ chʌmiyob tiʼ caj tsiʼ ñusayob tʼan (Éx. 20:4, 5, 14; Dt. 13:6-9). ¿Chucoch mach weñic tsaʼ bʌ i meleyob? Come mach i yorajlel chaʼan miʼ melob jiñi. Cheʼ tsaʼic i jacʼbeyob i tʼan Dios jiñi yonlel wiñicob, tsaʼʌch mejliyob ti cʼaxel yaʼ ti Jordán jaʼ yicʼot ti ochel yaʼ ti Lum tsaʼ bʌ wʌn Subentiyob (Nm. 25:5, 9).

Jiñi apóstol Pablo tiʼ chaʼ taja ti tʼan iliyi cheʼ bʌ ti yʌcʼʌ ili ticʼojel: «Cheʼʌch tsaʼ ujtiyob chaʼan laj cʌntesʌntel. Tsaʼ tsʼijbunti chaʼan lac ticʼol joñonla cuxulonto bʌ la ti ili ora cheʼ lʌcʼʌlix i jilibal» (1 Co. 10:7-11). Tiʼ sujm, Satanás tsiʼ wen taja i tijicñʌyel cheʼ bʌ jiñi israelob tsiʼ meleyob ili tsʌts bʌ mulil, i tiʼ caj jiñi maʼañic tsaʼ ochiyob ti jiñi Lum tsaʼ bʌ wʌn Subentiyob. Yomʌch mi lac chʼʌm ti ñuc chuqui mi laj cʌn tiʼ tojlelob come la cujil chaʼan Satanás yom chaʼan maʼañic mi la cochel yaʼ ti tsijiʼ bʌ lum am bʌ i subeyonla Jehová.

Chaʼan miʼ yʌcʼonla yajlel ti mulil, Satanás miʼ cʼʌn yac tac wen i cʌñʌ bʌ yicʼot am bʌ cʼʌjñibʌyi i chaʼan tiʼ tojlel cabʌl quixtañu. Cheʼ bajcheʼ tsaʼ ujti laj qʼuel, tsiʼ cʼʌñʌ jiñi tsʼiʼlel chaʼan miʼ yʌcʼ ti yajlel jiñi israelob. Ili ora jiñʌch jumpʼejl yacʼ am bʌ i wocolel. ¿Chuqui miʼ mejlel i yʌcʼonla ti yajlel yaʼi? Jumpʼejl yac muʼ bʌ i wen cʼʌn jiñʌch jiñi pornografía.

Ti ili ora, jiñi wiñicob xʼixicob (quixtañujob) miʼ mejlel i mucul qʼuelob jiñi pornografía. Ti wajali, cheʼ an majqui yom i qʼuel, yom miʼ majlel ti cine, miʼ mʌn revista o libro tac chaʼan jiñi. Tajol an maʼañic bʌ tsiʼ meleyob come tsiʼ quisñayob chaʼan miʼ qʼuejlelob yaʼi. Pero ili ora, majqui jach am bʌ i chaʼan Internet miʼ mejlel i qʼuel jiñi pornografía baqui mucʼ ti troñel o cheʼ yaʼan tiʼ carro. Ti cabʌl país, mach wersajic chaʼan jiñi quixtañujob miʼ loqʼuelob tiʼ yotot chaʼan miʼ qʼuelob.

Pero mach yaʼ jach cʌyʌl yaʼi. An tacʌch chuqui miʼ mejlel ti cʼʌjñel ili ora chaʼan miʼ waʼ qʼuejlel jiñi pornografía. Tajol juntiquil quixtañu woli (choncol) ti xʌmbal ti calle, an ti autobús o ti jumpʼejl tren i choncol i qʼuel majlel jiñi pornografía tiʼ celular o tiʼ tableta.

Come ili ora miʼ mejlel i waʼ mucul qʼuejlel jiñi pornografía, woli (yʌquel) i yʌcʼ cabʌl wocol. Tiʼ caj jiñi, cabʌlob an i jemeyob i ñujpuñel, maʼañix miʼ chʼʌmob i bʌ ti ñuc yicʼot an i ticʼlayob i conciencia, i cheʼto jaʼel bajcheʼ an yicʼotob Jehová. Tiʼ sujm, jiñi pornografía miʼ wen ticʼlan juntiquil quixtañu. I cabʌlob mach tijicñayix miʼ yubiñob i bʌ tiʼ caj jiñi. Tajol xucʼu xucʼul miʼ tojʼañob majlel, pero miʼ mejlel i ñumel cabʌl jab i muʼto i chʌn acʼ wocol.

Pero, laʼ laj cʼajtesan chaʼan Jehová miʼ coltañonla laj cʌntan lac bʌ chaʼan ili i yac Satanás. Mi la com chaʼan miʼ cʌntañonla yom mi lac mel jiñi maʼañic bʌ tsiʼ meleyob jiñi israelob: Yom mi lac wen jacʼ tsaʼ bʌ i sube Jehová jiñi i tejclum Israel (Éx. 19:5). Yom mi lac ñaʼtan chaʼan Jehová miʼ tsʼaʼlen jiñi pornografía. ¿Chucoch mi la cʌl chaʼan cheʼʌchi?

Laʼ lac ñaʼtan iliyi: Jiñi mandar tsaʼ bʌ i yʌqʼue Dios jiñi tejclum Israel ñumen weñʌch. Lajal bajcheʼ jumpʼejl tsʼajc muʼ bʌ i cʌntan jiñi israelob chaʼan jiñi bibiʼ jax bʌ i melbal jiñi yambʌ tejclum tac (Dt. 4:6-8). Ili mandar tac miʼ jamʌ pʌs  jumpʼejl ñuc bʌ i sujmlel: Jehová tsʼaʼ miʼ qʼuel jiñi tsʼiʼlel.

Cheʼ bʌ tsiʼ taja ti tʼan jiñi lecoj jax bʌ i melbal jiñi yambʌ tejclum tac, Jehová tiʼ sube jiñi israelob: «Mach yomic mi laʼ tsajcʌbeñob i melbal jini añoʼ bʌ ti Canaán baʼ mi caj c pʌyetla majlel. [...] Come tsaʼ wen pʼojli jontolil ti jini tejclum. Wolix cʌqʼueñob i toj i mul». Chaʼan jiñi chʼujul bʌ Dios ti Israel, i melbal jiñi cananeojob wen biʼiltic jax, jin chaʼan tsiʼ yʌlʌ chaʼan jiñi lum baqui añob mach weñix o tsaʼix bibaʼ (Lv. 18:3, 25).

Anquese Jehová tsiʼ yʌqʼue i toj i mul jiñi cananeojob, maʼañic tsaʼ lajmi jiñi tsʼiʼlel. Cheʼ bʌ ñumeñix ti 1500 jab, Pablo tsiʼ yʌlʌ chaʼan ti jiñi tejclum tac baqui chumulob jiñi xñoptʼañob «tsaʼ ñʌmʼayob i pusicʼal ti mulil». Tiʼ sujm, «tsaʼix i junyajlel acʼʌyob i bʌ ti jontolil. Añob i woʼlel ti jujunchajp i bibiʼlel» (Ef. 4:17-19). Ili ora jaʼel, jiñi quixtañujob maʼañobix i quisin tiʼ melol jiñi tsʼiʼlel. Jiñi i sujm bʌ xñoptʼañob yom miʼ chaʼleñob wersa chaʼan maʼañic miʼ qʼuelob i chaʼan tac bʌ tsʼiʼlel ti ili pañimil.

Jiñi pornografía maʼañic miʼ yʌcʼ ti qʼuelol ti ñuc Dios. Tsiʼ meleyonla (pʌtʌyonla) tiʼ yejtal yicʼot chaʼan miʼ mejlel lac ñaʼtan chuqui wem bʌ. Tiʼ ñaʼtʌbal, tsiʼ yʌcʼʌ mandar tac chaʼan jiñi piʼleya, i tsiʼ yʌcʼʌ jiñi piʼleya chaʼan jiñi wiñic yicʼot xʼixic ñujpuñem bʌ miʼ mejlel i ñusañob i bʌ (Gn. 1:26-28; Pr. 5:18, 19). Pero jiñi muʼ bʌ i locʼob yicʼot miʼ pucob i chaʼan bʌ pornografía, miʼ pʼajob jiñi wem bʌ i mandar tac Dios yicʼot maʼañobic miʼ qʼuelob ti ñuc. Jin chaʼan, mi caj i mel jiñi quixtañujob (Ro. 1:24-27).

Pero ¿ixcu jiñi quixtañujob mucʼ jach bʌ i yʌlol qʼuelob o i pejcañob i chaʼan bʌ pornografía? Tajol an muʼ bʌ i yʌlob chaʼan maʼañic i wocolel cheʼ miʼ qʼuelob. Pero tiʼ sujm, choncol i coltañob jiñi muʼ bʌ i pʼajob jiñi i mandar tac Dios. Tajol mach cheʼic tsiʼ lon ñaʼtayob cheʼ bʌ tsaʼ caji i qʼuelob jiñi pornografía. Pero tiʼ sujm, jiñi muʼ bʌ i melbeñob i yeʼtel (troñel) Dios, yom miʼ tsʼaʼleñob. Jiñi Biblia miʼ yʌl: «Jatetla muʼ bʌ laʼ cʼuxbin lac Yum, tsʼaʼlenla jontolil» (Sal. 97:10).

Jinto jaʼel jiñi mach bʌ yomobic i qʼuel jiñi pornografía miʼ yʌlob chaʼan wocolʌch chaʼan maʼañic miʼ yajlelob tiʼ melol jiñi. Come xmulilonla, tajol woli lac chaʼlen wersa chaʼan mi lac mʌlben (jotben) jiñi lac tsucul pensar. Cheʼ jaʼel,  jiñi lac pusicʼal miʼ mejlel i yʌqʼueñonla lac ñaʼtan chaʼan maʼañic i wocolel cheʼ maʼañic mi lac jacʼben i mandar tac Dios (Jer. 17:9). Pero cabʌlob ochemobix bʌ bajcheʼ xñoptʼan ili ora tsaʼix i cʌyʌyob i qʼuel jiñi pornografía. Cheʼ mi lac ñaʼtan iliyi, miʼ mejlel i ñuqʼuesʌben i pusicʼal jiñi choncol bʌ i chaʼlen wersa i mʌlben jiñi pornografía. Laʼ laj qʼuel bajcheʼ miʼ mejlel i coltañonla jiñi i Tʼan Dios chaʼan maʼañic mi lac yajlel ti ili i yac Satanás.

Cheʼ bajcheʼ tsaʼ laj qʼuele tiʼ tejchibal ili temaj, yonlel israelob tsiʼ jacʼbeyob i tsucul pensar i tsiʼ tajayob wocol. I miʼ mejlel ti ujtel ili ora jaʼel. Santiago, juntiquil i majan yeran Jesús, tiʼ tsictesa: «Cheʼ an majqui woliʼ pʌjyel ti mulil, jiñʌch i colosojlel i pusicʼal muʼ bʌ i pʌy, muʼ bʌ i xicʼ. I colosojlel i pusicʼal miʼ colel tiʼ pusicʼal. Miʼ ñijcan ti mulil» (Stg. 1:14, 15). Cheʼ an majqui miʼ yʌcʼ chaʼan jiñi i tsucul pensar miʼ colel majlel tiʼ pusicʼal, tajol miʼ mejlel i chaʼlen mulil. Jin chaʼan, mach yomic mi lac bej ñaʼtan i chaʼan bʌ tsʼiʼlel, yom mi lac locʼsan ti lac pensar.

Mi tsaʼ laj qʼuele chaʼan maʼañic miʼ loqʼuel jiñi lac tsucul pensar, an chuqui yom bʌ mi lac mel ti ora. Jesús tsiʼ yʌlʌ: «Mi woliʼ yʌsañet ti mulil a cʼʌb mi a woc, tsepe loqʼuel. Choco. [...] Cheʼ jaʼel, mi woliʼ yʌsañet ti mulil a wut, locʼsan. Choco» (Mt. 18:8, 9). Jesús maʼañic tsiʼ yoque alʌ chaʼan mi lac mel iliyi. Yom bʌ i yʌl jiñʌch chaʼan ñuc i cʼʌjñibal mi lac locʼsan ti ora jiñi muʼ bʌ i yʌcʼonla ti yajlel ti mulil. ¿Bajcheʼ miʼ mejlel lac jacʼ ili ticʼojel chaʼan i qʼuelol jiñi pornografía?

Laʼ cu lac ñaʼtan chaʼan miʼ lac taj laj qʼuel i chaʼan bʌ pornografía. Mach lac ñaʼtan chaʼan maʼañic chuqui mi caj i yujtel ti lac tojlel. Laʼ lac mʌy lac wut ti ora. Laʼ lac yʌp ti ora jiñi televisión, computadora, jiñi celular o tableta. Laʼ lac ñaʼtan chuqui tac sʌc bʌ. Mi mucʼʌch lac mel, mi caj i coltañonla lac ticʼ lac pensar, i maʼañic mi caj la cʌcʼ chaʼan jiñi lac tsucul pensar miʼ mʌlbeñonla.

Jiñi i chaʼan bʌ pornografía mach ti orajic miʼ loqʼuel ti lac pensar, i an qʼuiñil miʼ chaʼ tilel cheʼ  mach pijtʌbilic lac chaʼan. Mi an majqui miʼ yujtel bajcheʼ jiñi, tajol mi caj i mulan i chaʼlen i bʌ ti masturbar. Mi jatet maʼañix maʼ qʼuel jiñi pornografía, pero an qʼuiñil mi chaʼ cʼotel ti a pensar tsaʼ bʌ a qʼuele, mi caj i coltañet cheʼ maʼ ñaʼtan chaʼan mucʼʌch i mejlel ti ujtel jiñi i chaʼan yom chajpʌbilet chaʼan maʼ mʌlben jiñi a tsucul pensar.

Mulan a chaʼlen pensar yicʼot a pʌs a melbal cheʼ bajcheʼ yom Dios. Tsajcʌben i melbal jiñi apóstol Pablo, tsaʼ bʌ i yʌlʌ: «Mic ticʼ c bʌcʼtal chaʼan miʼ wersa jacʼbeñon» (1 Co. 9:27). Mach a wʌcʼ chaʼan jiñi a tsucul pensar miʼ mʌlbeñet. Mele muʼ bʌ i yʌl Romanos 12:2, TNM: «Yom mi laʼ qʼuextan laʼ bʌ cheʼ mi laʼ chaʼ tsijibtesan laʼ pensar, chaʼan miʼ mejlel laʼ ñop ti laʼ bajñelil jiñi wem bʌ, muʼ bʌ i chʼʌm yicʼot jiñi toj bʌ chuqui yom Dios». Mach a ñajʌtesan chaʼan cheʼ maʼ chaʼlen pensar yicʼot maʼ pʌs a melbal cheʼ bajcheʼ yom Jehová mi caj i ñumen aqʼueñet a tijicñʌyel, i mach jiñic cheʼ a wom a mel mulil.

Ñopo a cʌy ti a pensar texto tac muʼ bʌ i coltañet a tsʼaʼlen jiñi pornografía cheʼ bajcheʼ miʼ mel Jehová yicʼot chaʼan maʼ chʼʌmben i sujm chuqui yom ti a tojlel. Cheʼ jiñi, cheʼ miʼ tilel mach bʌ weñic ti a pensar, chaʼlen wersa a ñaʼtan jiñi texto tac. Jiñʌch bajcheʼ Salmo 119:37, Isaías 52:11, Mateo 5:28, Efesios 5:3, TNM, Colosenses 3:5 yicʼot 1 Tesalonicenses 4:4-8.

¿Ixcu mi ti jumpʼejl bʌ qʼuin a wom a ñumen qʼuel mach bʌ weñic o maʼ ñaʼtan? Tsajcʌben i melbal Jesús (1 P. 2:21). Cheʼ bʌ tsaʼ ujti i chaʼlen chʼʌmʌ jaʼ, Satanás tsiʼ ñopbe i xucʼtʌlel. ¿Chuqui tsiʼ mele Jesús? Tsiʼ chaʼle wersa chaʼan miʼ mʌlben. Mach junyajl jach tsiʼ taja tʼan jiñi Tsʼijbujel chaʼan miʼ jacʼben i tʼan. Tiʼ sube: ‹Cucux, Satanás› i tsaʼ majli. Cheʼ bajcheʼ Jesús maʼañic tsiʼ yʌcʼʌ chaʼan miʼ mʌlbentel tiʼ tojlel jiñi Diablo, cheʼ yom maʼ mel jatet (Mt. 4:1-11). Satanás yicʼot i pañimil mi caj i bej chaʼleñob wersa chaʼan miʼ yochel ti lac pensar jiñi i chaʼan bʌ tsʼiʼlel, pero mach yom mi lac lujbʼan. Miʼ mejlel lac jotben i qʼuelol pornografía. Tiʼ coltaya Jehová, miʼ mejlel lac mʌlben jiñi laj contra.

Laʼ lac chʌn pejcan ti oración Jehová i laʼ laj cʼajtiben chaʼan miʼ coltañonla. Pablo tsiʼ yʌlʌ: «Pejtelel chuqui tac miʼ yujtel subenla Dios chuqui tac yom ti oración. [...] Cheʼ jini, i ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal ti Cristo Jesús. Maʼanic i pʼisol i ñʌchʼtʌlel lac pusicʼal muʼ bʌ i yʌqʼueñonla» (Fil. 4:6, 7). Jehová mi caj i yʌqʼueñonla i ñʌchʼtʌlel lac pusicʼal chaʼan maʼañic miʼ mʌlbeñonla jiñi mulil. Mi mucʼʌch lac lʌcʼtesan lac bʌ ti Dios, mi caj i lʌcʼtesan i bʌ ti lac tojlel jaʼel (Stg. 4:8).

Muʼ bʌ i ñumen cʌntañonla chaʼan maʼañic mi lac yajlel ti wocol jiñʌch cheʼ lʌcʼʌl la quicʼot jiñi Yumʌl bʌ ti panchan yicʼot ti pañimil. Jesús tsiʼ yʌlʌ tiʼ tojlel Satanás: «Tal i yum pañimil. Maʼanic i pʼʌtʌlel tij contra» (Jn. 14:30). ¿Chucoch tsiʼ wen ñopo iliyi? Ti jumpʼejl bʌ qʼuin tsiʼ yʌlʌ: «Jini tsaʼ bʌ i chocoyon tilel an quicʼot. Maʼanic tsiʼ cʌyʌyon c Tat tic bajñelil come tiʼ pejtelel ora mic mel chuqui tac miʼ mulan» (Jn. 8:29). Mi mucʼʌch lac mel chuqui miʼ mulan Jehová, maʼañic mi caj i bajñel cʌyonla jaʼel. Laʼ lac putsʼtan i qʼuelol pornografía, i jiñi Satanás maʼañic mi caj i mʌl ti lac tojlel.