«Cheʼ bʌ jiñi c primo tsaʼ caji ti leto yicʼoton, tsaʼ c chucbe i bicʼ i tsaʼ caji c yʌtsʼ. Tsaʼ c mulaj c tsʌnsan» (Paul).

«Yaʼ ti cotot, cheʼ bʌ mic tsʼitaʼ cajbentel, orajach mic michʼan. Mic xul chuqui tac an ti cotot, alasʌl tac yicʼot chuqui tac jach mic taj» (Marco).

Tajol joñonla maʼañic mi caj i cʼotel lac mel tac jiñi. Pero an qʼuiñil, ti lac pejtelel wocol mi la cubin chaʼan mi lac ticʼ lac bʌ. ¿Chucoch? Come jiñi Adán tsiʼ ñusʌbeyonla jiñi mulil (Ro. 5:12) An wocol bʌ miʼ yubiñob chaʼan maʼañic miʼ waʼ michaʼñob, cheʼ bajcheʼ Paul yicʼot Marco. An muʼ bʌ i chaʼleñob wersa chaʼan maʼañic miʼ chaʼleñob bʌqʼuen o chaʼan miʼ locʼob pensar tac mach bʌ weñic. An wocol bʌ miʼ yubiñob chaʼan miʼ ticʼob i bʌ cheʼ yom i melob tsʼiʼlel, i japob lembal o i cʼʌñob droga tac.

Miʼ mejlel i ticʼlañob i bʌ jiñi maʼañic bʌ miʼ ticʼob i pensar, i melbal yicʼot chuqui yomob i pusicʼal. ¿Chuqui miʼ mejlel lac mel chaʼan mach cheʼic mi la cujtel? Jiñʌch cheʼ yom mi lac ticʼ lac bʌ. Chaʼan miʼ mejlel lac mel, laʼ laj qʼuel uxpʼejl cʼajtiya. Ñaxam bʌ, ¿chuqui yom i yʌl cheʼ mi lac ticʼ lac bʌ? I chaʼpʼejlel, ¿chucoch ñuc i cʼʌjñibal lac chaʼan? I yuxpʼejlel, ¿bajcheʼ miʼ mejlel lac taj ili melbalʌl ochem bʌ tiʼ «wut muʼ bʌ i yʌcʼ jiñi espíritu»? (Gá. 5:22, 23, TNM). Ti wiʼil, mi caj laj qʼuel chuqui yom mi lac mel ti jujuntiquil cheʼ an qʼuiñil wocol mi la cubin chaʼan mi lac ticʼ lac bʌ.

Jiñi quixtañu muʼ bʌ i ticʼ i bʌ maʼañic mi caj i mel muʼ bʌ i xicʼben i pusicʼal. Maʼañic miʼ yʌl o miʼ mel muʼ bʌ i tsʼaʼlen Dios.

Jesús tsiʼ pʌsʌ tiʼ melbal chuqui yom i yʌl cheʼ mi lac ticʼ lac bʌ. Jiñi Biblia miʼ yʌl: «Cheʼ bʌ tsaʼ aʼlenti, maʼanic tsiʼ qʼuexta aʼleya. Cheʼ bʌ tsaʼ aqʼuenti wocol, maʼanic tsiʼ chaʼle bʌcʼtesaya. Cheʼ jach tsiʼ yʌcʼʌ i bʌ tiʼ wenta jini muʼ bʌ i chaʼlen meloñel ti toj» (1 P. 2:23) Jiñi i Yalobil Dios tsiʼ pʌsʌ chaʼan miʼ mejlel i ticʼ i bʌ cheʼ yaʼ chʼijil ti teʼ i jiñi i contrajob woliʼ wajleñob (Mt. 27:39-44) Cheʼ jaʼel, tsiʼ pʌsʌ cheʼ jiñi ñaxam bʌ miʼ yʌcʼob i bʌ ti ñopbalʌl tsiʼ ñopo i tajbeñob i mul ti chuqui miʼ yʌl (Mt. 22:15-22) I tsiʼ pʌsbeyonla wem bʌ ejemplo cheʼ bʌ jiñi wen michʼ bʌ judíojob tsiʼ chʼʌmʌyob xajlel chaʼan miʼ julob. Maʼañic tsiʼ yʌqʼueyob i xotʼ i mul, tsaʼ jach i mujcuj i bʌ i «tsaʼ loqʼui ti Templo» (Jn. 8:57-59).

¿Mejlʌch ba lac ticʼ lac bʌ cheʼ bajcheʼ tsiʼ mele Jesús? Muʼcu, añʌch baqui jaxʌl miʼ mejlel lac mel. Jiñi apóstol Pedro tsiʼ yʌlʌ: «Cristo jaʼel tsiʼ yubi wocol chaʼañonla. Tsiʼ pʌsbeyonla bajcheʼ yom mi lac mel. Tsajcanla majlel» (1 P. 2:21) Anquese xmulilonla, mejlʌch lac lajin Jesús cheʼʌch bajcheʼ cʼamel miʼ mejlel. ¿Chucoch ñuc i cʼʌjñibal mi lac mel?

Yom mi lac ticʼ lac bʌ mi la com chaʼan wen miʼ qʼuelonla Jehová. Anquese añix cabʌl jab xucʼulonla tiʼ tojlel Jehová, maʼañix mi caj i chʌn ajñel bajcheʼ la camigo mi maʼañic mi laj cʌntan chuqui mi la cʌl yicʼot chuqui mi lac mel.

Laʼ laj cʌn tiʼ tojlel Moisés, jiñi ñumen ‹uts bʌ i pusicʼal› «bajcheʼ pejtelel winicob ti pañimil» ti  jimbʌ ora (Nm. 12:3) Cabʌl jab tsiʼ wen cuchu cheʼ bʌ jiñi israelitajob tsiʼ yʌlʌyob mach tac bʌ weñic. Pero ti jumpʼejl bʌ qʼuin maʼañic tsiʼ tiqʼui i bʌ i tsaʼ wen michʼa come jiñi israelitajob tsaʼ caji i yʌlob mach tac bʌ weñic tiʼ caj maʼañic jaʼ. Tiʼ subeyob ti tsʌts bʌ tʼan: «Ubinla c tʼan wʌle, winicob cabʌl jax bʌ laʼ jontolil. Wʌle mi caj c locʼsʌbeñetla jaʼ ila ti colem xajlel» (Nm. 20:2-11).

Moisés maʼañic tsiʼ tiqʼui i bʌ. Maʼañic tsiʼ yʌqʼue i ñuclel Jehová cheʼ bʌ tsiʼ yʌqʼue jaʼ jiñi israelitajob (Sal. 106:32, 33) Jin chaʼan, Jehová maʼañic tsiʼ yʌcʼʌ ti ochel yaʼ ti Lum tsaʼ bʌ wʌn subentiyob (Nm. 20:12) Moisés tsaʼʌch i wen ñaʼta jiñi mach bʌ weñic tsiʼ mele cʼʌlʌl cheʼ tsaʼ chʌmi (Dt. 3:23-27).

¿Chuqui mi laj cʌn? Chaʼan, anquese añix cabʌl jab ajñemonla tiʼ sujmlel, mach yomic mi lac suben mach bʌ weñic juntiquil muʼ bʌ i michʼesañonla o yom bʌ tojʼesʌntel (Ef. 4:32; Col. 3:12). I sujmʌch chaʼan mach wen la cujilix pijt cheʼ mi lac ñoxʼan majlel. Pero laʼ laj cʼajtesan jiñi Moisés. Mach la com chaʼan mach weñic miʼ qʼuelonla Jehová tiʼ caj maʼañic mi lac ticʼ lac bʌ. Jin chaʼan, ¿bajcheʼ miʼ mejlel lac taj ili melbalʌl wen ñuc bʌ i cʼʌjñibal?

Laʼ laj cʼajtin ti oración jiñi chʼujul bʌ espíritu. ¿Chucoch yom mi laj cʼajtin? Come jiñi i ticʼol lac bʌ jiñʌch jumpʼejl melbal ochem bʌ tiʼ wut muʼ bʌ i yʌcʼ jiñi i yespíritu Dios, i miʼ yʌqʼuen jiñi muʼ bʌ i cʼajtin (Lc. 11:13) Jehová miʼ cʼʌn jiñi i yespíritu chaʼan miʼ yʌqʼueñonla lac pʼʌtʌlel i cʼʌjñibal bʌ lac chaʼan chaʼan mi lac ticʼ lac bʌ (Is. 12:2). Cheʼ jaʼel, miʼ coltañonla lac pʌs yambʌ melbal tac ochem bʌ tiʼ wut muʼ bʌ i yʌcʼ jiñi espíritu, bajcheʼ jiñi cʼuxbiya, muʼ bʌ caj i coltañonla chaʼan mi lac ticʼ lac bʌ (1 Co. 13:5).

Mach lac mel maʼañic bʌ miʼ coltañonla chaʼan mi lac ticʼ lac bʌ. Laʼ lac tʌtsʼ lac bʌ ti jiñi página tac i chaʼan Internet yicʼot ñusaqʼuin tac muʼ bʌ i pʌs mach tac bʌ weñic melbal (Ef. 5:3, 4) Yom mi lac tʌtsʼ lac bʌ tiʼ pejtelel chuqui miʼ ñijcañonla lac mel mach bʌ weñic (Pr. 22:3; 1 Co. 6:12) Jumpʼejl ejemplo, juntiquil quixtañu muʼ bʌ i xicʼben i pusicʼal chaʼan miʼ mel tsʼiʼlel, mach yom miʼ pejcan libro tac o i qʼuel película tac i chaʼan bʌ mulaya.

Tajol wocol mi la cubin chaʼan mi lac jacʼ ili ticʼojel tac. Pero mi mucʼʌch lac chaʼlen wersa chaʼan mi lac jacʼ, Jehová mi caj i yʌqʼueñonla lac pʼʌtʌlel  i cʼʌjñibal bʌ lac chaʼan chaʼan mi lac ticʼ jiñi lac pusicʼal (2 P. 1:5-8) Mi caj i coltañonla chaʼan mi lac ticʼ jiñi lac pensar, bajcheʼ mi lac chaʼlen tʼan yicʼot jiñi lac melbal tac. Jiñʌch tsaʼ bʌ ujti tiʼ tojlel Paul yicʼot Marco, tsaʼ bʌ lac tajayob ti tʼan tiʼ tejchibal ili artículo, come tsaʼ mejli i ticʼob i bʌ i mach ti orajix miʼ michʼañob. Laʼ la cʌl tiʼ tojlel juntiquil hermano orajach bʌ miʼ michʼan cheʼ bʌ miʼ ñijcan majlel i carro. Miʼ wen chaʼlen leto yicʼot yambʌ xñijca carrojob. ¿Chuqui tsiʼ mele chaʼan mach ti orajix miʼ michʼan? Miʼ yʌl: «Ti jujumpʼejl qʼuin mic wen pejcan Jehová ti oración. Tsaʼ c pejca jiñi lac jun tac muʼ bʌ i yʌl chaʼan jiñi i ticʼol lac bʌ i tsaʼ j cʌyʌ tic jol texto tac mejl bʌ i coltañon. Anquese cabʌl jab an c chaʼle wersa chaʼan mach ti orajic mic michʼan, miʼ bej coltañon cheʼ ti jujumpʼejl qʼuin mic ñaʼtan chaʼan yomʌch mic ticʼ c bʌ. I cheʼ an baqui mic majlel, seb jach mic loqʼuel chaʼan mach ajñe ajñel mic majlel».

An qʼuiñil maʼañic mi caj lac mejlel lac ticʼ lac bʌ. Cheʼ miʼ cʼotel i yujtel jiñi, tajol mach weñic mi caj la cubin lac bʌ chaʼan mi lac pejcan Jehová ti oración. Pero ti jimbʌ ora, ñumento yom mi lac mel oración. Yom mi lac mel ti ora. Laʼ laj cʼajtiben Jehová chaʼan miʼ ñusʌbeñonla lac mul, chaʼan miʼ coltañonla i chaʼan ti jumpʼejl lac pusicʼal mi la cʌl chaʼan maʼañix mi caj lac mel jiñi mach bʌ weñic tsaʼ bʌ lac mele (Sal. 51:9-11). Maʼañic mi caj i pʼaj la coración cheʼ tiʼ pejtelel lac pusicʼal mi laj cʼajtiben chaʼan miʼ pʼuntañonla (Sal. 102:17) Jiñi apóstol Juan miʼ cʼajtesʌbeñonla chaʼan jiñi i chʼichʼel i Yalobil Dios miʼ «sʌqʼuesañonla tiʼ pejtelel mulil» (1 Jn. 1:7; 2:1; Sal. 86:5) Mach ñajʌyiconla chaʼan Jehová miʼ subeñonla chaʼan mach junyajlic jach yom mi lac ñusʌben i mul yambʌlob. Jin chaʼan, miʼ mejlel lac ñop chaʼan miʼ mejlel i ñusʌbeñonla lac mul jaʼel (Mt. 18:21, 22; Col. 3:13, TNM).

Jehová maʼañic tsiʼ mulaj cheʼ bʌ Moisés maʼañic tsiʼ tiqʼui i bʌ yaʼ tiʼ tiquiñal lum. Pero tsaʼʌch i ñusʌbe i mul. Yaʼ tiʼ Tʼan Dios miʼ yʌl chaʼan Moisés juntiquilʌch wiñic tsaʼ bʌ i wen pʌsʌ i ñopoñel (Dt. 34:10; He. 11:24-28). I sujmʌch chaʼan Jehová maʼañic tsiʼ yʌcʼʌ ti ochel yaʼ ti Lum tsaʼ bʌ wʌn subentiyob, pero mi caj i yʌcʼ ti chumtʌl tiʼ pejtelel ora ila ti Lum cheʼ sujtemix ti jumpʼejl Paraíso. Cheʼʌch mi caj i yujtel ti lac tojlel jaʼel mi mucʼʌch lac chʌn chaʼlen wersa chaʼan mi lac ticʼ lac bʌ (1 Co. 9:25, TNM).