1. ¿Chucoch Jehová tsiʼ laji i bʌ yicʼot juntiquil ñaʼʌl?

CHEʼ tiʼ yorajlel jiñi xʼaltʼan Isaías, Jehová tiʼ sube i tejclum: «¿Muʼ ba ñajʌyel i chaʼan xʼixic i yalobil? [...] Añʌch muʼ bʌ i cʌy muʼ bʌ i ñajʌyel i chaʼan. Pero joñon mach cheʼicon. Mach ñajʌyiyetic c chaʼan» (Is. 49:15). Mach ti bele orajic miʼ lajin i bʌ Jehová yicʼot juntiquil ñaʼʌl, pero ti jimbʌ ora tsaʼʌch i mele. Tsiʼ laji i bʌ chaʼan miʼ yʌcʼ ti ñaʼtʌntel bajcheʼ cʼamel miʼ cʼuxbin i wiñicob, lajal bajcheʼ juntiquil ñaʼʌl miʼ cʼuxbin i yalobil. Cabʌl ñaʼʌlob miʼ cʼotel i yubiñob i bʌ bajcheʼ jiñi hermana i cʼabaʼ Jasmín, tsaʼ bʌ i yʌlʌ: «Cheʼ baqui ora maʼ tsuʼsan a walobil, miʼ pʼʌtʼan a cʼuxbiya i miʼ jalijel tiʼ pejtelel ora».

2. ¿Bajcheʼ yubil miʼ yubin i bʌ Jehová cheʼ bʌ juntiquil i yalobil miʼ tʌtsʼ i bʌ tiʼ tojlel?

² Jehová yujil cheʼ bʌ juntiquil i yalobil maʼañix miʼ loqʼuel ti subtʼan yicʼot maʼañix miʼ majlel ti tempa bʌ tac. Miʼ mejlel lac ñaʼtan chaʼan wen cʼux miʼ yubin cheʼ bʌ ti jujumpʼejl jab yonlel i wiñicob miʼ yajñelob bajcheʼ inactivo. *

3. ¿Chuqui yom Jehová?

³ Cabʌl hermanojob miʼ chaʼ sujtelob ti congregación i mi lac wen ubin lac tijicñʌyel cheʼ bʌ miʼ melob. Jehová yom chaʼan miʼ chaʼ sujtelob, i jiñʌch la com bʌ jaʼel (1 P. 2:25). ¿Bajcheʼ miʼ mejlel laj coltañob? Chaʼan mi lac jacʼ, yom mi lac ñaxan ñaʼtan chucoch an muʼ bʌ i cʌyob majlel ti tempa bʌ tac yicʼot ti subtʼan.

4. ¿Chuqui an i chaʼleyob chaʼtiqui uxtiquil tiʼ caj i yeʼtelob?

⁴ An chaʼtiqui uxtiquil yaʼ jach bʌ miʼ wen acʼob i bʌ tiʼ yeʼtel. Juntiquil hermano i cʼabaʼ Hung,  * chumul bʌ ti sureste i chaʼan Asia, miʼ yʌl: «Tsaʼ c wen acʼʌ c bʌ tiʼ melol jiñi queʼtel. Tsaʼ c lon ñaʼta chaʼan ñumen wen mi caj c melben i yeʼtel Jehová cheʼ mic taj cabʌl taqʼuin. Cheʼ jiñi, tsaʼ cajiyon ti ñumen eʼtel i tsaʼ j cʌyʌ majlel ti tempa bʌ tac. Ti wiʼil, tsaʼ c tʌtsʼʌ c bʌ ti congregación. Ili i pañimil Satanás miʼ yʌcʼ chaʼan jiñi quixtañujob cʼunteʼ cʼunteʼ miʼ tʌtsʼob i bʌ ti Dios».

5. ¿Chuqui tsiʼ chaʼle juntiquil hermana tiʼ caj jiñi i wocol tac?

⁵ Yambʌ hermanojob miʼ ñusañob wocol tac muʼ bʌ i cʼunʼesañob. Laʼ laj qʼuel tiʼ tojlel Anne, am bʌ ti Gran Bretaña i an joʼtiquil i yalobil. Miʼ yʌl: «Juntiquil chʼiton bʌ calobil wen cʼam tsiʼ yila pañimil. Ti wiʼil, juntiquil quixicʼal tsaʼ chaʼlenti ti expulsar i jiñi yambʌ chʼiton bʌ calobil tsaʼ tajbenti cʼamʌjel tiʼ jol. Tsaʼ c wen taja c chʼijiyemlel, i cheʼ jiñi, tsaʼ c junyaj cʌyʌ majlel ti tempa bʌ tac yicʼot ti subtʼan». Cʼux mi la cubin cheʼ an hermanojob yicʼot i familiajob muʼ bʌ i ñusañob tsʌts bʌ wocol tac cheʼ bajcheʼ Anne.

6. ¿Chuqui miʼ mejlel lac chaʼlen mi maʼañic mi laj jacʼ jiñi ticʼojel am bʌ ti Colosenses 3:13 (TNM)?

⁶ (Pejcan Colosenses 3:13, TNM). * An i wiñicob Jehová cʼux bʌ miʼ yubiñob cheʼ juntiquil hermano an chuqui tsiʼ melbeyob. Jiñi apóstol Pablo tsiʼ cʌñʌ chaʼan an i tajol añʌch i sujmlel cheʼ mi cʼotel lac michʼan yicʼot yambʌlob. Tajol tsiʼ melbeyonla mach bʌ weñic. Pero mi mach tsajaloñicla, miʼ mejlel lac lot lac michʼajel yicʼot miʼ mejlel lac ñajtʼesan lac bʌ tiʼ tejclum Jehová. Laʼ laj qʼuel tiʼ tojlel juntiquil hermano i cʼabaʼ Pablo am bʌ ti Sudamérica. An majqui tsiʼ yʌlʌ chaʼan tsiʼ mele mach bʌ weñic, pero lot jach. Jin chaʼan, tiʼ sʌtʌ jiñi eʼtel am bʌ i chaʼan ti congregación ¿Chuqui tsiʼ mele? Miʼ yʌl: «Tsaʼ wen michʼayon i tsaʼ caji c ñajtʼesan c bʌ ti congregación».

7. ¿Chuqui miʼ mejlel i chaʼlen juntiquil quixtañu cheʼ cʼuxto miʼ yubin tsaʼ bʌ i mele?

⁷ Cheʼ jaʼel, jiñi tsaʼ bʌ i chaʼleyob tsʌts bʌ mulil ti wajali, tajol bej cʼuxto miʼ yubiñob i miʼ ñaʼtañob chaʼan mach yomix miʼ cʼuxbintelob ti Dios. Cheʼto jaʼel cheʼ tsaʼix i chaʼ ñaʼtayob i bʌ yicʼot cheʼ miʼ pʌsbentelob pʼuntaya, tajol miʼ ñaʼtañob chaʼan mach mejlix i chaʼ ajñelob tiʼ tejclum Dios. Cheʼʌch tsiʼ yubi i bʌ juntiquil hermano i cʼabaʼ Francisco. Miʼ yʌl: «Tsaʼ chaʼlentiyon ti censurar come tsaʼ c chaʼle tsʼiʼlel. Anquese tsaʼto cajiyon majlel ti tempa bʌ tac, tsaʼ c wen taja c chʼijiyemlel i tsaʼ c ñaʼta chaʼan mach mejlix c chaʼ ajñel tiʼ tejclum Jehová. Jiñi j conciencia muʼto i bej ticʼlañon i tsaʼ cʼoti c ñop chaʼan Jehová maxto ñusʌbilic i chaʼan c mul. Ti wiʼil, tsaʼ j cʌyʌ majlel ti subtʼan yicʼot ti tempa bʌ tac». ¿Chuqui mi lac ñaʼtan tiʼ tojlel jiñi hermanojob am bʌ i ñusayob jiñi wocol tac tsaʼ bʌ laj qʼuele? ¿Cheʼ ba mi la cubin lac bʌ cheʼ bajcheʼ miʼ yubiñob i bʌ? I ñumen ñuc bʌ i cʼʌjñibal, ¿chuqui miʼ ñaʼtan Dios tiʼ tojlelob?

8. ¿Bajcheʼ la cujil chaʼan Jehová maʼañic miʼ ñajʌyel i chaʼan jiñi am bʌ i melbeyob i yeʼtel ti wajali?

⁸ Jehová maʼañic miʼ ñajʌyel i chaʼan jiñi am bʌ i melbeyob i yeʼtel anquese an i jumucʼ ñajtʼesayob i bʌ tiʼ tejclum. Maʼañic miʼ ñajʌyel i chaʼan jaʼel jiñi eʼtel tsaʼ bʌ i meleyob  tiʼ xucʼtʌlel (He. 6:10). Jiñi xʼaltʼan Isaías tsiʼ cʼʌñʌ utsʼatax lajiya chaʼan bajcheʼ Jehová miʼ cʌntan yicʼot miʼ cʼuxbin jiñi i tejclum. Tiʼ tsʼijbu: «Mi caj i cʌntan i chaʼañoʼ bʌ cheʼ bajcheʼ xcʌnta tiñʌmeʼ. Mi caj i tempan tilel jini alʌ to bʌ. Mi caj i mecʼ majlel tiʼ tajn» (Is. 40:11). ¿Bajcheʼ yubil miʼ yubin i bʌ Jehová, jiñi Ñuc bʌ xcʌnta tiñʌmeʼ, cheʼ bʌ juntiquil i wiñic miʼ cʌy i melben i yeʼtel? Jesús tsiʼ yʌcʼʌ ti cʌjñel bajcheʼ yubil miʼ yubin i bʌ Jehová cheʼ bʌ tsiʼ melbe cʼajtiya tac jiñi xcʌntʼañob i chaʼan: «¿Bajcheʼ mi laʼ wʌl? Mi an juntiquil winic am bʌ joʼcʼal [100] i tiñʌmeʼ mi tsaʼ sajti juncojt, ¿mach ba anic miʼ cʌy jini bolonlujuncojt i joʼcʼal [99] chaʼan miʼ majlel i sajcan jini sajtem bʌ yaʼ ti bujtʌl? Mi tsiʼ taja, isujm mic subeñetla, ñumen tijicña i pusicʼal miʼ qʼuel jini juncojt bajcheʼ jini bolonlujuncojt i joʼcʼal [99] mach bʌ anic tsaʼ sajtiyob» (Mt. 18:12, 13).

9. ¿Bajcheʼ miʼ cʌntan i tiñʌmeʼ jiñi wem bʌ xcʌnta tiñʌmeʼ? (Qʼuele jiñi dibujo am bʌ tiʼ tejchibal).

⁹ ¿Chucoch weñʌch cheʼ mi lajintel Jehová bajcheʼ juntiquil xcʌnta tiñʌmeʼ? Come jiñi wem bʌ xcʌnta tiñʌmeʼ miʼ cʼuxbin jiñi i tiñʌmeʼ tac. Jumpʼejl ejemplo. David, tiʼ tsʌnsa juncojt bajlum yicʼot juncojt oso chaʼan miʼ cʌntan i tiñʌmeʼ (1 S. 17:34, 35). Jiñi wem bʌ xcʌnta tiñʌmeʼ miʼ ñaʼtan mi tsaʼ sajti juncojt i tiñʌmeʼ (Jn. 10:3, 14). Miʼ cʌy jiñi 99 yaʼ tiʼ corral o miʼ suben yambʌ xcʌnta tiñʌmeʼ chaʼan mi cʌntʌben chaʼan miʼ majlel i sajcan jiñi tsaʼ bʌ sajti. Jesús tsiʼ cʼʌñʌ ili lajiya chaʼan mi cʌntesañonla jumpʼejl ñuc bʌ i sujmlel ti tojlel i Tat: «Mach yomic miʼ sajtel mi juntiquilic jini chʼoʼchʼocoʼ bʌ» (Mt. 18:14).

10. Cheʼ bajcheʼ miʼ yʌl Ezequiel 34:11-16, ¿chuqui tsiʼ wʌn alʌ Jehová chaʼan mi caj i mel tiʼ tojlel jiñi i tiñʌmeʼob sajtemoʼ bʌ?

¹⁰ Jehová miʼ cʼuxbiñonla, cheʼto jaʼel jiñi «chʼoʼchʼocoʼ bʌ» tsaʼ bʌ i ñajtʼesayob i bʌ tiʼ tejclum. Tiʼ tojlel jiñi xʼaltʼan Ezequiel, Dios tsiʼ yʌcʼʌ i tʼan chaʼan mi caj i sajcan jiñi i tiñʌmeʼ tsaʼ bʌ sajti yicʼot mi caj i coltan chaʼan pʼʌtʌl miʼ chaʼ ajñelob tiʼ tojlel. I tsiʼ yʌlʌ chuqui tac mi caj i mel chaʼan miʼ coltañob. Lajal tsiʼ  mele bajcheʼ juntiquil xcʌnta tiñʌmeʼ cheʼ bʌ miʼ sajtel juncojt i tiñʌmeʼ (pejcan Ezequiel 34:11-16). Ñaxam bʌ, miʼ sʌclan jiñi i tiñʌmeʼ anquese cabʌl ora miʼ ñusan yicʼot miʼ wen chaʼlen wersa. Ti wiʼil, cheʼ bʌ tsaʼix i taja, miʼ pʌy majlel yaʼ baqui an jiñi yan tac bʌ tiñʌmeʼ. Cheʼ jaʼel, mi an i lojwel o an i wiʼñal, mi caj i yʌqʼuen chuqui i cʼʌjñibal i chaʼan, miʼ pixben i lojweñal, miʼ mecʼ majlel yicʼot miʼ yʌqʼuen i bʌl i ñʌcʼ. Jiñi ancianojob, añoʼ bʌ tiʼ wenta i cʌntañob i «tiñʌmeʼ Dios», cheʼʌch yom miʼ melob jaʼel cheʼ bʌ mi caj i coltañob jiñi tsaʼ bʌ i ñajtʼesayob i bʌ ti congregación (1 P. 5:2, 3). Jiñi ancianojob miʼ sʌclañob, miʼ coltañob chaʼan miʼ chaʼ sujtelob tiʼ tejclum Jehová i miʼ pʌsbeñob cʼuxbiya cheʼ bʌ miʼ yʌqʼueñob chuqui i cʼʌjñibal i chaʼañob chaʼan miʼ chaʼ pʼʌtʼañob tiʼ chaʼan bʌ Dios. *

11. ¿Chuqui yujil juntiquil wem bʌ xcʌnta tiñʌmeʼ?

¹¹ Juntiquil wem bʌ xcʌnta tiñʌmeʼ yujil chaʼan miʼ mejlel i sajtel juncojt i tiñʌmeʼ. Jin chaʼan, cheʼ bʌ mi yujtel iliyi, maʼañic miʼ jatsʼ. Laʼ laj qʼuel chuqui tsiʼ mele Jehová cheʼ bʌ chaʼtiqui uxtiquil i wiñicob ti wajali maʼañic tsiʼ ñaxan jacʼʌyob i mel chuqui tsiʼ cʼajtibeyob.

12. ¿Chuqui tsiʼ mele Jehová tiʼ tojlel Jonás?

¹² Jiñi xʼaltʼan Jonás tsaʼ putsʼi come mach yomic i tsʼʌctesan jiñi eʼtel tsaʼ bʌ subenti i mel. Cheʼ bajcheʼ juntiquil wem bʌ xcʌnta tiñʌmeʼ, Jehová tsiʼ colta i tsiʼ yʌqʼue i pʼʌtʌlel chaʼan miʼ mejlel i tsʼʌctesan jiñi eʼtel (Jon. 2:7; 3:1, 2). Ti wiʼil, Dios tsiʼ cʼʌñʌ acʼ chaʼan miʼ cʌntesan chaʼan añʌch i cʼʌjñibal i cuxtʌlel jujuntiquil quixtañu (Jon. 4:10, 11). ¿Chuqui mi laj cʌn? Jiñi ancianojob mach yomic miʼ ñaʼtañob chaʼan maʼañix mi caj i mejlel i coltañob jiñi inactivojoʼ bʌ. Yom miʼ chaʼleñob wersa i chʼʌmbeñob i sujm chucoch tsiʼ ñajtʼesayob i bʌ. I cheʼ bʌ juntiquil miʼ chaʼ sujtel ti Jehová, yomʌch miʼ bej pʌsbeñob cʼuxbiya yicʼot miʼ chʼʌmob ti ñuc.

13. ¿Chuqui mi laj cʌn chaʼan bajcheʼ tsiʼ jacʼbe Jehová tsaʼ bʌ i yʌlʌ jiñi salmista yaʼ ti Salmo 73?

¹³ Jiñi tsaʼ bʌ i tsʼijbu jiñi Salmo 73 tsiʼ taja  i chʼijiyemlel cheʼ bʌ tsiʼ qʼuele chaʼan wen chuqui miʼ tajob jiñi jontoloʼ bʌ. Tsaʼ cʼoti i ñaʼtan chaʼan maʼañix i cʼʌjñibal cheʼ miʼ bej melben i yeʼtel Dios (Sal. 73:12, 13, 16). ¿Chuqui tsiʼ mele Jehová? Maʼañic tsiʼ yʌʼle. Tsaʼto i yʌcʼʌ chaʼan jiñi i tʼan tac miʼ tsʼijbuntel cʌytʌl yaʼ ti Biblia. Cheʼ ñumeñix ora, jiñi salmista tsaʼ cʼoti i chʼʌmben i sujm chaʼan ñumen ñuc bʌ ti laj cuxtʌlel, jiñʌch cheʼ i yamigojonla Jehová (Sal. 73:23, 24, 26, 28). ¿Chuqui mi laj cʌn? Jiñi ancianojob mach ti orajic yom miʼ ñaʼtañob mach bʌ weñic tiʼ tojlelob jiñi muʼ bʌ i tech i yʌlob chaʼan mi añixto i cʼʌjñibal cheʼ miʼ melbeñob i yeʼtel Jehová. Mach yomic miʼ yʌʼleñob, yom miʼ chaʼleñob wersa i chʼʌmbeñob i sujm chucoch cheʼ miʼ yʌlob o an chuqui miʼ melob. Mi cheʼʌch miʼ melob, mi caj i mejlel i cʼʌñob jiñi Biblia chaʼan miʼ ñuqʼuesʌbeñob i pusicʼal.

14. ¿Chucoch yom coltʌntel Elías, i bajcheʼ tsiʼ colta Jehová?

¹⁴ Jiñi xʼaltʼan Elías tsiʼ putsʼta jiñi Jezabel (1 R. 19:1-3). Tsiʼ ñaʼta chaʼan maʼañix yambʌ xʼaltʼañob cuxulobto bʌ yicʼot chaʼan maʼañix i cʼʌjñibal jiñi eʼtel woli bʌ i mel. Wen chʼijiyem tsiʼ yubi i bʌ i tsaʼto i mulaj chʌmel (1 R. 19:4, 10). Jehová maʼañic tsiʼ yʌʼle jiñi Elías. Tiʼ sube chaʼan mach i bajñel jach, chaʼan mi caj i coltan yicʼot chaʼan cabʌlto eʼtel yom bʌ miʼ mejlel. Wen jach tsiʼ ñʌchʼta jiñi Elías cheʼ bʌ tiʼ subu chuqui tac miʼ cʼojoʼtan yicʼot tsiʼ yʌqʼue yambʌ eʼtel tac (1 R. 19:11-16, 18). ¿Chuqui mi laj cʌn? Chaʼan ti lac pejtelel, ñumento jiñi ancianojob, wen jach yom mi lac pejcan i tiñʌmeʼob Jehová. Mi juntiquil hermano chʼijiyem miʼ chaʼlen tʼan o mach weñic miʼ yubin i bʌ chaʼan Jehová tsiʼ pʼunta, jiñi ancianojob mi  caj i ñʌchʼtañob cheʼ bʌ miʼ sub chuqui an ti pusicʼal. Cheʼ jiñi, mi caj i subeñob chaʼan ñuc i cʼʌjñibal tiʼ wut Jehová.

15. Cheʼ bajcheʼ miʼ yʌl Juan 6:39, ¿bajcheʼ yilal tsiʼ qʼuele Jesús jiñi i tiñʌmeʼob i Tat?

¹⁵ ¿Bajcheʼ yom Jehová chaʼan mi laj qʼuel jiñi i tiñʌmeʼob sajtemoʼ bʌ? Jesús tsiʼ pʌsbeyonla wem bʌ ejemplo. Yujil chaʼan ñuc i cʼʌjñibal i chaʼan Dios pejtelel i tiñʌmeʼob. Jin chaʼan, tsiʼ wen chaʼle wersa chaʼan miʼ coltan «jini sajtemoʼ bʌ tiñʌmeʼ ti Israel» chaʼan miʼ chaʼ sujtelob baʼan Jehová (Mt. 15:24; Lc. 19:9, 10). Come Jesús jiñʌch jiñi wem bʌ xcʌnta tiñʌmeʼ, tsiʼ wen chaʼle wersa jaʼel chaʼan maʼañic miʼ sʌt mi juntiquilic i tiñʌmeʼ i Tat (pejcan Juan 6:39).

16, 17. ¿Bajcheʼ yom miʼ qʼuelob jiñi ancianojob cheʼ yom miʼ coltʌntel jiñi inactivojoʼ bʌ? (Qʼuele jiñi recuadro « ¿Bajcheʼ miʼ yubin i bʌ jiñi sajtem bʌ tiñʌmeʼ?»).

¹⁶ Jiñi apóstol Pablo tiʼ sube jiñi ancianojob añoʼ bʌ ti jiñi congregación ti Éfeso chaʼan yom miʼ lajibeñob i melbal Jesús. Tiʼ subeyob: «Yom mi lac chaʼlen eʼtel chaʼan mi laj coltan jini mach bʌ pʼʌtʌlobic. Yom mi laʼ ñaʼtan i tʼan lac Yum Jesús tsaʼ bʌ i yʌlʌ: ‹Ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan›» (Hch. 20:17, 35). Cheʼ bajcheʼ mi laj qʼuel, jiñi ancianojob añob ñuc bʌ i yeʼtel. Juntiquil anciano chʼoyol bʌ ti España i cʼabaʼ Salvador, miʼ yʌl iliyi: «Cheʼ mic wen ñaʼtan chaʼan Jehová miʼ wen cʼuxbin jiñi i tiñʌmeʼob sajtemoʼ bʌ, miʼ ñijcañon chaʼan mic wen chaʼlen wersa j coltañob. Jehová yom chaʼan mij cʌntañob».

¹⁷ Pejtelel jiñi inactivojoʼ bʌ tsaʼ bʌ tajliyob ti tʼan ti ili estudio tsaʼ coltʌntiyob yicʼot tsaʼ chaʼ sujtiyob ti Jehová. Pero anto cabʌl hermanojob yomoʼ bʌ chaʼ sujtel jeʼel. ¿Bajcheʼ miʼ mejlel laj coltañob? Ti jiñi yambʌ estudio mi caj lac wen tsictesʌbentel.