TI LAC pejtelel la cujil chaʼan ti ili «cojix bʌ qʼuin tac» Jehová woliʼ pʌsben bij yicʼot woliʼ cʌntan jiñi i tejclum (2 Ti. 3:1). Pero ti jujuntiquilonla an ti lac wenta lac ñaʼtan mi la comʌch lac jacʼben i tʼan. Woli i yujtel ti lac tojel jiñi tsaʼ bʌ ujti tiʼ tojlel jiñi israelitajob yaʼ ti tiquiñal bʌ lum. Jiñi israelitajob yomʌch miʼ jacʼob cheʼ miʼ wustʌl tac jiñi trompeta ti wajali.

Jehová tiʼ sube Moisés: «Mele chaʼpʼejl trompeta ti plata jatsʼbil bʌ ti martillo chaʼan maʼ cʼʌn a pʌy winicob baʼ ora mi laʼ tempan laʼ bʌ, chaʼan maʼ subeñob i chajpañob i bʌ cheʼ i yorajlelix miʼ chaʼ techob xʌmbal» (Nm. 10:2). Jiñi motomajob qʼuexel tac yom miʼ wusob jiñi trompeta tac chaʼan jiñi israelitajob miʼ ñaʼtañob chuqui yom miʼ melob (Nm. 10:3-8). Ili ora, i wiñiconbʌla Dios mi lac «wusbentel jiñi trompeta tac» jaʼel i qʼuexel tacʌch miʼ wustʌl. Laʼ laj qʼuel uxpʼejl ejemplo lajal bʌ yicʼot cheʼ bajcheʼ miʼ wustʌl jiñi trompeta tac ti wajali: Cheʼ mi lac pʌjyel majlel ti colem tempa bʌ tac, cheʼ bʌ jiñi ancianojob miʼ subentelob majlel ti jumpʼejl cʌntesʌntel yicʼot cheʼ an chuqui mi lac tsijib subentel lac mel yaʼ ti congregación.

Cheʼ baqui ora Jehová yom i pʌy pejtelel jiñi «israelob» yaʼ tiʼ tiʼ jiñi tabernáculo, jiñi motomajob chaʼpʼejl trompeta yom miʼ wusob (Nm. 10:3). Jiñi israelitajob chʌnmojt bʌ bajcheʼ tʼoxbilob yaʼ tiʼ joytʌlel tabernáculo, miʼ yubiñob cheʼ miʼ sub i bʌ jiñi trompeta tac. Tajol jiñi israelitajob lʌcʼʌl bʌ añob yaʼ tiʼ tiʼ jiñi tabernáculo orajach miʼ cʼotelob. Pero jiñi ñajt bʌ añob jalto miʼ cʼotelob i yom miʼ chaʼleñob wersa. Bajcheʼic jach, Jehová yom chaʼan tiʼ pejtelelob miʼ tempañob i bʌ yicʼot miʼ ñʌchʼtañob chuqui miʼ subeñob.

Ili ora mi lac pʌjyel majlel jaʼel ti colem tempa bʌ tac. Pero joñonla maʼañic mi lac majlel ti jumpʼejl tabernáculo, mi lac majlel ti uxpʼejl bʌ qʼuin colem tempa bʌ tac yicʼot ti yan tac bʌ tempa bʌ ñuc bʌ i cʼʌjñibal baqui an chuqui mi lac subentel yicʼot mi laj cʌntesʌntel. Tiʼ pejtelel pañimil, jiñi i wiñicob Dios mucʼʌch bʌ i jacʼob majlel i qʼuel jiñi programa tijicñayob bajcheʼ jumpʼejl tejclum. An ñajt bʌ miʼ chaʼleñob xʌmbal chaʼan miʼ cʼotelob, i añob mach bʌ cheʼiqui. Pero pejtelel muʼ bʌ i jacʼob majlel tijicña miʼ yubiñob cheʼ tsiʼ chaʼleyob wersa chaʼan miʼ cʼotelob.

¿Ixcu jiñi añoʼ bʌ ti alʌ grupo tac i ñajt bʌ añob baqui miʼ yujtel jiñi colem tempa bʌ tac? Come cabʌlix chuqui melbil ili ora, cabʌl hermanojob miʼ mejlel i qʼuelob jaʼel jiñi programa i miʼ yubiñob chaʼan yaʼʌch añob ti jiñi colem tempa bʌ tac. Jumpʼejl ejemplo, cheʼ yaʼ ti sucursal i chaʼan Benín tsaʼ cʼoti ti julaʼ juntiquil hermano muʼ bʌ ti eʼtel yaʼ ti central mundial, tsiʼ ñusayob jiñi programa yaʼ ti Arlit (Níger), jumpʼejl lumal baqui an mina tac yaʼ bʌ an tiʼ tiquiñal lum i chaʼan Sahara. Tsaʼ cʼoti uxtiquil hermanojob, chaʼtiquil hermanajob yicʼot 16 quixtañujob mach bʌ Testigojobic. Anquese ñajt añob yicʼot jiñi  44,131 tsaʼ bʌ cʼotiyob ti jiñi colem tempa bʌ, tsiʼ yubiñob chaʼan yaʼʌch añob jaʼel. Juntiquil hermano tiʼ tsʼijbu: «Wen wocolix laʼ wʌlʌ cheʼ tsaʼ wʌqʼueyon lojon j qʼuel jiñi tempa bʌ. An i pʌsbeyon lon jaʼel iliyi chaʼan añon lojon ti laʼ pusicʼal».

Cheʼ bʌ jumpʼejl jach trompeta miʼ wusob jiñi motomajob, jin jach «jini ñuc tacoʼ bʌ i yeʼtel loqʼuemoʼ bʌ tiʼ tojlel pejtel israelob» miʼ cʼotelob yaʼ ti tabernáculo (Nm. 10:4). Yaʼi, Moisés miʼ cʌntesañob yicʼot miʼ subeñob chuqui yom miʼ melob chaʼan miʼ cʌntañob jiñi israelitajob añoʼ bʌ tiʼ wenta. Mi joñoñicla juntiquil jiñi am bʌ ñuc bʌ i yeʼtel, ¿mach ba tsaʼic lac chaʼle wersa chaʼan mi lac majlel ti jiñi tempa i mi lac chʼʌm laj cʌntesʌntel?

Ili ora jiñi ancianojob mach i yumobic jiñi congregación tac i maʼañic miʼ ‹chañʼesañob i bʌ› tiʼ tojlel jiñi i tiñʌmeʼob Dios añoʼ bʌ tiʼ wenta (1 P. 5:1-3). Pero mucʼʌch i wen chaʼleñob wersa chaʼan miʼ cʌntañob i tiñʌmeʼob Dios cheʼ bajcheʼ cʼamel miʼ mejlelob. Jin chaʼan, ti jumpʼejl i pusicʼalob miʼ jacʼob majlel cheʼ baqui ora miʼ pʌjyelob i ñumen chʼʌmob i cʌntesʌntel, bajcheʼ jiñi Cʌntesʌntel tiʼ chaʼan bʌ i Yumʌntel Dios. Cheʼ bajcheʼ jiñi, miʼ ñumen cʌñob chuqui tac yom miʼ melob yaʼ ti congregación. Come miʼ chʼʌmob i cʌntesʌntel, jiñi ancianojob, jiñi hermanojob yicʼot jiñi hermanajob miʼ mejlel i ñumen lʌcʼtesañob i bʌ ti Jehová. Mi maʼañic ajñemonla ti ili cʌntesʌntel tac miʼ mejlel lac tajben i wenlel chuqui cʌmbilob i chaʼan jiñi ancianojob.

An i tajol, jiñi motomajob ti jujumucʼ miʼ wusob jiñi trompeta. Ili miʼ yʌcʼ ti ñaʼtʌntel chaʼan Jehová yom chaʼan pejtelel jiñi israelitajob miʼ tech i chaʼleñob xʌmbal (Nm. 10:5, 6, TNM). Wen chajpʌbil miʼ melob, pero tiʼ pejtelelob jaʼel yomʌch miʼ chaʼleñob wersa. Tajol chaʼtiqui uxtiquil wocolʌch miʼ yubiñob chaʼan miʼ melob. ¿Chucoch?

Tajol an muʼ bʌ i yʌlob chaʼan ti bele ora miʼ wusob jiñi trompeta yicʼot cheʼ mach pijtʌbilobic i chaʼan. Jiñi Biblia miʼ yʌl chaʼan an i tajol «tsaʼ cʌle jini Tocal jumpʼejl jach acʼʌlel» cʼʌlʌl miʼ sʌcʼan i an i tajol tsaʼ ñumi «chaʼpʼejl qʼuin», «jumpʼejl uw» o ñumento jinto miʼ chaʼ chaʼlen xʌmbal jiñi tocal (Nm. 9:21, 22). ¿Jayajl tsiʼ qʼuextayob baqui miʼ yajñelob jiñi israelitajob? Jiñi capítulo 33 i chaʼan Número miʼ yʌl chaʼan 40 baqui tsaʼ ajñiyob jiñi israelitajob.

An i tajol chaʼtiqui uxtiquil israelitajob miʼ tajob baqui an axñal, yomʌch bʌ ti jiñi colem bʌ yicʼot ti jiñi «bʌbʌqʼuen bʌ i tiquiñal pañimil» (Dt. 1:19). Jin chaʼan, tsaʼ mejli i ñaʼtañob chaʼan mi tsaʼ loqʼuiyob yaʼi mucʼ jach caj i tajob wocol.

Cheʼ miʼ jujumucʼ wustʌl jiñi trompeta, pejtel jiñi israelitajob miʼ yubiñob, pero mach junlajalobic miʼ techob xʌmbal. Tajol an israelitajob muʼ bʌ cʼojyelob i pijtan come yomobix chaʼan jiñix miʼ wusbentelob jiñi trompeta. Cheʼ mi jujumucʼ wustʌl jiñi trompeta miʼ yʌqʼuen i ñaʼtan jiñi i pʼolbal Judá, Isacar yicʼot Zabulón, añoʼ bʌ tiʼ tojel i pasibal qʼuin, chaʼan jin yom miʼ ñaxan techob xʌmbal (Nm. 2:3-7; 10:5, 6, TNM). Cheʼ tsaʼix i techeyob xʌmbal, jiñi motomajob miʼ chaʼ jujumucʼ wusob jiñi trompeta chaʼan miʼ yʌqʼueñob i ñaʼtan jiñi yambʌ uxpʼejl pʼolbal am bʌ tiʼ tojel sur chaʼan jiñix yom miʼ chaʼleñob xʌmbal. I cheʼʌch miʼ bej mejlel jinto miʼ luʼ chaʼleñob xʌmbal jiñi israelitajob.

Tajol wocol tsaʼ la cubi chaʼan mi lac jacʼ lac mel jiñi tsaʼ bʌ i qʼuexta jiñi organización. An qʼuiñil tsaʼ lac ñaʼta chaʼan cabʌl chuqui tsaʼ qʼuextʌyi i mach pijtʌbilic lac chaʼan. Tajol tsaʼ lac mulaj bajcheʼ mi lac mel eʼtel tac ti ñaxan i maʼañic tsaʼ lac mulaj chaʼan miʼ qʼuextʌyel. Tajol wen wocol tsaʼ la cubi chaʼan miʼ lac pʌs lac pijt cheʼ xucʼu xucʼulto tsaʼ lac chʼujbi jiñi tsaʼ bʌ qʼuextʌyi. Pero la cujil chaʼan yomʌch mi lac mel. Mi mucʼʌch lac chaʼlen wersa, mi caj laj qʼuel i bendición Dios.

Tiʼ yorajlel Moisés, Jehová tsiʼ pʌsbe bij cabʌl wiñicob, xʼixicob yicʼot alʌlob yaʼ tiʼ tiquiñal lum. Tsaʼ mejliyob ti chʌmel machic tsiʼ cʌntayob yicʼot tsiʼ coltayob. Cheʼ jaʼel, ti ili bʌbʌqʼuen bʌ cojix bʌ qʼuin tac, Jehová woliʼ pʌsbeñonla bij yicʼot i coltañonla chaʼan pʼʌtʌlonla tiʼ tojlel. Jin chaʼan, laʼ lac chaʼlen wersa chaʼan mi lac jacʼben i tʼan cheʼ bajcheʼ jiñi israelitajob tsaʼ bʌ i jacʼʌyob cheʼ bʌ ti jujumucʼ wusli jiñi trompeta.