1. ¿Chuqui i sujm bʌ tsiʼ yʌlʌ jiñi rey Salomón ti Eclesiastés 7:20?

 JIÑI rey Salomón tsiʼ yʌlʌ: «Maʼanic ti pañimil mi juntiquilic muʼ bʌ i mel chuqui utsʼat tiʼ pejtelel ora. Maʼanic toj bʌ mach bʌ anic miʼ wis chaʼlen mulil» (Ec. 7:20). ¡I sujmʌch iliyi! Luʼ xmulilonla (1 Juan 1:8). Jin chaʼan, i cʼʌjñibal lac chaʼan chaʼan Jehová yicʼot jiñi yambʌ lac piʼʌlob miʼ ñusʌbeñonla lac mul.

2. ¿Bajcheʼ yubil mi la cubin cheʼ bʌ juntiquil la camigo miʼ ñusʌbeñonla lac mul?

² ¿Am ba lac lowbe i pusicʼal juntiquil la camigo? Ti lac pejtelel an ujtemonla bajcheʼ jiñi, i chaʼan bej la camigojixto, tsaʼ laj cʼajtibe chaʼan miʼ ñusʌbeñonla. ¿Bajcheʼ yubil tsaʼ la cubi lac bʌ cheʼ bʌ jiñi la camigo tsiʼ ñusʌbeyonla lac mul? Tijicñayʌch tsaʼ la cubi, ¿mach ba cheʼiqui?

3. ¿Chuqui mi caj laj qʼuel ti ili estudio?

³ Ti lac pejtelel la com chaʼan Jehová jiñʌch jiñi ñumen wem bʌ la camigo, pero an i tajol mi la cʌl i mi lac mel (chaʼlen) maʼañic bʌ miʼ mulan. Jin chaʼan, ¿chucoch miʼ mejlel lac ñop chaʼan Jehová yomʌch i ñusʌbeñonla lac mul? ¿Chucoch mach lajalic bajcheʼ miʼ ñusʌbeñonla lac mul Jehová yicʼot bajcheʼ miʼ melob jiñi lac piʼʌlob? I jiñi cojix bʌ, ¿majqui miʼ ñusʌbeñob i mul?

4. ¿Chucoch miʼ mejlel lac ñop chaʼan Jehová yomʌch i ñusʌbeñonla lac mul?

⁴ Jiñi i Tʼan Dios miʼ subeñonla chaʼan Jehová yomʌch i ñusʌbeñonla lac mul. Jumpʼejl ejemplo, yaʼ ti wits Sinaí, Jehová tiʼ sube Moisés bajcheʼ yilal bʌ Dios. Tsiʼ cʼʌñʌ juntiquil ángel chaʼan miʼ yʌl: «Joñon Yumʌloñʌch, a Yumon, a Dioson, cujil  pʼuntaya, utson, jal mic michʼan, cabʌl mic pʼuntañob, xucʼulon. Mic pʼuntan cabʌlob, mic ñusan mulil, yicʼot i ñusʌntel mandar, yicʼot jontolil» (Éx. 34:6, 7). Jehová juntiquilʌch Dios yujil bʌ cʼuxbiya, am bʌ i pʼuntaya i yomʌch i ñusʌben i mul jiñi muʼ bʌ i chaʼ ñaʼtañob i bʌ (Neh. 9:17; Sal. 86:15).

5. Cheʼ bajcheʼ miʼ yʌl Salmo 103:13, 14, ¿chuqui miʼ mel Jehová ti lac tojlel cheʼ wen i cʌñʌyonla?

⁵ Jehová wen i cʌñʌyonla come jiñʌch tsiʼ meleyonla (pʌtʌyonla). ¿Mach ba muqʼuic i toj sajtel lac pusicʼal cheʼ mi lac ñaʼtan chaʼan wen i cʌñʌ pejtelel lac piʼʌlob ila ti Lum? (Sal. 139:15-17, TNM). Jin chaʼan, miʼ luʼ taj i qʼuel bajcheʼ an i ticʼlayonla jiñi mulil tsaʼ bʌ i ñusʌbeyonla jiñi lac tatob. I mach cojach jiñi, miʼ qʼuel pejtelel chuqui mi lac ñusan, i jin chaʼan añʌch bajcheʼ yilalonla. ¿Chuqui miʼ mel Jehová yicʼot pejtelel jiñi yujil bʌ? Cheʼ wen i cʌñʌyonla miʼ pʌsbeñonla i pʼuntaya (Sal. 78:39; pejcan Salmo 103:13, 14).

6. ¿Bajcheʼ an i pʌsʌ Jehová chaʼan yomʌch i ñusan lac mul?

⁶ Jehová an i pʌsʌ chaʼan yomʌch i ñusʌbeñonla lac mul. Miʼ chʼʌmben i sujm chaʼan tiʼ caj tsaʼ bʌ i mele Adán, xmulilonla yicʼot mi lac chʌmel (sajtel) (Rom. 5:12). I maʼañic chuqui miʼ mejlel lac mel chaʼan mi lac loqʼuel tiʼ pʼʌtʌlel (Sal. 49:7-9). Pero Dios tsiʼ pʼuntayonla i añʌch chuqui tsiʼ mele chaʼan miʼ coltañonla. Cheʼ bajcheʼ miʼ yʌl Juan 3:16, tsiʼ choco tilel jiñi cojim bʌ i Yalobil chaʼan miʼ chʌmel ti laj caj come miʼ cʼuxbiñonla (Mat. 20:28; Rom. 5:19). Jesús tsaʼ chʌmi ti lac wenta chaʼan miʼ coltan jiñi muʼ bʌ i ñopob tiʼ tojlel (Heb. 2:9). ¿Muʼ ba lac ñaʼtan bajcheʼ cʼamel tsiʼ yubi i chʼijyemlel Jehová cheʼ bʌ tsiʼ qʼuele chaʼan pʼumpʼuntic bajcheʼ tsaʼ ticʼlʌnti yicʼot tsaʼ tsʌnsʌnti jiñi i Yalobil? Mi Jehová mach yomic i ñusan lac mul, ¿chucoch tsiʼ yʌcʼʌ ti chʌmel i Yalobil?

7. Taja ti tʼan chaʼtiquil wiñicob muʼ bʌ i yʌjlel ti Biblia chaʼan tsaʼ ñusʌbentiyob i mul ti Jehová.

⁷ Jiñi Biblia miʼ taj ti tʼan cabʌl lac piʼʌlob tsaʼ bʌ ñusʌbentiyob i mul ti Jehová (Efes. 4:32). ¿Am ba cʼajal bʌ a chaʼan? Tajol miʼ tilel ti a jol Manasés. Wen jontol (maña) tsiʼ mele i bʌ yicʼot tsiʼ chaʼle tsʌts bʌ mulil tiʼ contra Jehová. Tsiʼ yʌcʼʌ ti chʼujutesʌntel mach bʌ i sujmic tac dios yicʼot tsiʼ pulu i yalobilob bajcheʼ majtañʌl chaʼan jiñi i dios tac. Tsaʼto i yotsa melbil bʌ dios yaʼ tiʼ templo  Jehová, jiñi chʼujul bʌ ajñibʌl. Jiñi Biblia miʼ yʌl tiʼ tojlel: «Tsiʼ yutsi pʼojlesʌbe i michʼajel lac Yum chaʼan jontol jax i melbal» (2 Cr. 33:2-7). Pero cheʼ bʌ Manasés tsiʼ pʌsʌ chaʼan tsaʼʌch i chaʼ ñaʼta i bʌ, Jehová tsiʼ ñusʌbe i mul yicʼot tsiʼ chaʼ otsa ti rey (2 Cr. 33:12, 13). Yambʌ muʼ bʌ i tilel ti lac jol jiñʌch jiñi rey David, tsaʼ bʌ i mele tsʌts tac bʌ mulil bajcheʼ jiñi tsʼiʼlel yicʼot tsʌnsa. Pero Jehová tsiʼ ñusʌbe i mul jaʼel cheʼ bʌ tsiʼ cʌñʌ jiñi i mul yicʼot tsiʼ chaʼ ñaʼta i bʌ tiʼ sujm (2 S. 12:9, 10, 13, 14). Jin chaʼan, miʼ mejlel lac ñop chaʼan Jehová yomʌch i ñusan lac mul. I cheʼ bajcheʼ mi caj laj qʼuel, mach lajalic bajcheʼ miʼ ñusan lac mul Jehová yicʼot bajcheʼ miʼ mel jiñi lac piʼʌlob.

8. ¿Chucoch Jehová jiñʌch jiñi ñumen wem bʌ juez, i bajcheʼ miʼ coltan jiñi cheʼ baʼ ora miʼ ñusan lac mul?

⁸ Jehová jiñʌch «jini xMeloñel muʼ bʌ i mel pejtel añoʼ bʌ ti pañimil» (Gn. 18:25). Juntiquil wem bʌ juez yom wen i cʌñʌ jiñi mandar tac. I Jehová mucʼʌch i tsʼʌctesan iliyi come mach cojach jiñi lac Juez, jiñʌch jaʼel muʼ bʌ i yʌcʼ jiñi mandar (Is. 33:22). Maʼañic yambʌ bajcheʼ Jehová wen i cʌñʌ bʌ chuqui jiñi wem bʌ yicʼot mach bʌ weñic. ¿Chuqui tac yambʌ yom miʼ mel juntiquil wem bʌ juez? Cheʼ bʌ muʼto caj i yʌl chuqui mi caj i mejlel tiʼ tojlel juntiquil tsaʼ bʌ i chaʼle mulil, yom miʼ chʼʌm ti ñuc pejtelel chuqui tsaʼ ujti, i chaʼan iliyi, maʼañic yambʌ ñumen chajpʌbil bʌ bajcheʼ Jehová.

9. ¿Chuqui tac yujil Jehová cheʼ bʌ miʼ qʼuel mi mucʼʌch caj i ñusan lac mul o maʼañic?

⁹ Jehová mach lajalic bajcheʼ jiñi juezob añoʼ bʌ ti pañimil (mulawil). Wen i cʌñʌ pejtelel chuqui ochem ti jujumpʼejl wocol muʼ bʌ i qʼuel (Gn. 18:20, 21; Sal. 90:8). Mach jin jach miʼ qʼuel muʼ bʌ laj qʼuel o muʼ bʌ la cubin joñonla. Miʼ chʼʌmben i sujm chaʼan jiñi muʼ tac bʌ lac mel tiʼ cajʌch bajcheʼ tsaʼ coliyonla, baqui tsaʼ coliyonla, tiʼ caj chuqui an ti lac ñaʼtʌbal o mi mach tijicñayoñicla. Cheʼ jaʼel, miʼ qʼuel chuqui an ti lac pusicʼal. Ili yom i yʌl chaʼan miʼ ñaʼtan chuqui tac muʼ bʌ i ñijcañonla chaʼan an chuqui mi lac mel yicʼot chuqui jiñi la com bʌ. Maʼañic chuqui miʼ ñumel i chaʼan, miʼ luʼ taj i qʼuel (Heb. 4:13). Jin chaʼan, Jehová miʼ ñusan lac mul come wen i cʌñʌ jujunchajp muʼ bʌ i yujtel.

10. ¿Chucoch miʼ mejlel la cʌl chaʼan tojʌch chuqui miʼ mel Jehová tiʼ pejtelel ora? (Deuteronomio 32:4).

¹⁰ Weñʌch chuqui miʼ mel Jehová tiʼ pejtelel ora. Junlajal miʼ qʼuelonla. Chaʼan miʼ ñusan lac mul, mach jiñic miʼ qʼuel bajcheʼ yilalonla, mi an lac taqʼuin, mi an ñuc bʌ la queʼtel (lac troñel) o chuqui tac jiñi la cujil bʌ melol (1 S. 16:7; Sant. 2:1-4). Jehová maʼañic miʼ mejlel ti xijqʼuel yicʼot maʼañic miʼ chon i bʌ (2 Cr. 19:7). I mach tiʼ caj jach michʼ o an bajcheʼ yubil miʼ yubin an chuqui mi caj i mel (Éx. 34:7). Tiʼ sujm, Jehová jiñʌch ñumen wem bʌ Juez come miʼ wen chʼʌmbeñonla i sujm yicʼot miʼ chʼʌmben i sujm bajcheʼ yilal añonla (pejcan Deuteronomio 32:4).

11. ¿Chucoch maʼañic i lajintel bajcheʼ miʼ ñusan lac mul Jehová?

¹¹ Jiñi tsaʼ bʌ i tsʼijbuyob jiñi Tsʼijbujel Hebreo yujilob chaʼan maʼañic i lajintel bajcheʼ miʼ ñusan lac mul Jehová. An i tajol tsiʼ cʼʌñʌyob jumpʼejl tʼan hebreo bʌ, i jumpʼejl libro miʼ yʌl chaʼan iliyi «mucʼ jach i cʼʌjñel chaʼan miʼ tsictesʌntel bajcheʼ yilal miʼ ñusan lac mul Jehová». I miʼ bej al: «Maʼañic baʼ ora miʼ cʼʌjñel chaʼan miʼ tsictesʌntel bajcheʼ juntiquil lac piʼʌl miʼ ñusʌben i mul yambʌ lac piʼʌl» (Sinónimos del Antiguo Testamento, traducción y adaptación de Santiago Escuain).  Jin jach Jehová miʼ mejlel i junyajl ñusʌben i mul juntiquil muʼ bʌ i chaʼ ñaʼtan i bʌ. ¿I bajcheʼ yubil mi la cubin cheʼ bʌ Jehová miʼ ñusan lac mul?

12, 13. a) ¿Chuqui miʼ taj jiñi muʼ bʌ i ñusʌbentel i mul ti Jehová? b) ¿An jach ba bajcheʼ jalel miʼ ñusʌbeñonla lac mul Jehová?

¹² Cheʼ bʌ mi lac ñop chaʼan Jehová tsaʼʌch i ñusa lac mul, mi lac taj lac ñʌchʼtʌlel, i jiñi miʼ yʌqʼueñonla la cubin lac tijicñʌyel yicʼot sʌc bʌ laj conciencia. Iliyi maʼañic miʼ mejlel la cubin cheʼ bʌ miʼ ñusan lac mul juntiquil lac piʼʌl, jin jach cheʼ miʼ ñusan lac mul Jehová (Hech. 3:19). Cheʼ bʌ miʼ ñusan lac mul, miʼ yʌcʼonla ti chaʼ sujtel tiʼ yamigo. Lajal bajcheʼ maʼañic tsaʼ lac chaʼle mulil.

¹³ Cheʼ bʌ Jehová tsaʼix i ñusʌbe i mul juntiquil lac piʼʌl, maʼañic baʼ ora miʼ chaʼ taj ti tʼan o miʼ yʌqʼuen i toj i mul (Is. 43:25; Jer. 31:34). Jehová ñajt miʼ yʌcʼ jiñi lac mul «cheʼ bajcheʼ i ñajtlel pañimil cʼʌlʌl tiʼ pasibal qʼuin cʼʌlʌl tiʼ bʌjlibal qʼuin» (Sal. 103:12). * Cheʼ mi lac ñaʼtan chaʼan wen ñucʌch bajcheʼ miʼ ñusan lac mul, miʼ yʌcʼ chaʼan mi la cʌqʼuen wocolix i yʌlʌ yicʼot chaʼan mi laj qʼuel ti ñuc (Sal. 130:4). Pero ¿majqui yom miʼ ñusʌben i mul bajcheʼ iliyi?

14. ¿Chuqui tac tsaʼ ujti laj cʌn chaʼan bajcheʼ miʼ ñusan lac mul Jehová?

¹⁴ Cheʼ bajcheʼ tsaʼ laj qʼuele, Jehová mach jiñic miʼ qʼuel bajcheʼ cʼamel i tsʌtslel jiñi lac mul chaʼan miʼ ñaʼtan mi mucʼʌch caj i ñusʌbeñonla. Cheʼ jaʼel, come jiñʌch tsaʼ bʌ i meleyonla, jiñʌch muʼ bʌ i yʌcʼ jiñi mandar yicʼot jiñʌch jiñi Juez, miʼ cʼʌn chuqui tac jiñi yujil bʌ cheʼ bʌ mi caj i ñaʼtan mi mucʼʌch caj i ñusan jiñi mulil. Yubil cheʼ jiñi, ¿chuqui tac miʼ qʼuel Jehová?

15. Cheʼ bajcheʼ miʼ yʌl Lucas 12:47, 48, ¿chuqui miʼ qʼuel Jehová chaʼan miʼ ñaʼtan mi mucʼʌch caj i ñusan lac mul?

¹⁵ Junchajp muʼ bʌ i chʼʌm ti ñuc Jehová jiñʌch mi jiñi xmulil yujil chaʼan mach weñic jiñi woli (choncol) bʌ i mel. Jesús jamʌ tsiquil tsiʼ yʌlʌ ti Lucas 12:47, 48 (pejcan). Cheʼ bʌ juntiquil lac piʼʌl miʼ yʌlo mel mach bʌ weñic tiʼ wut Jehová, woli (yʌquel) i mel tsʌts bʌ mulil i woliʼ yʌcʼ i bʌ ti wocol chaʼan  Jehová maʼañic miʼ ñusʌben (Mar. 3:29; Juan 9:41). Pero yomʌch mi laj cʌn chaʼan an i tajol mi laj qʼuel chaʼan tsaʼ lac mele mach bʌ weñic. Cheʼ bʌ miʼ yujtel iliyi, ¿mucʼʌch ba i mejlel i ñusʌbeñonla Jehová? Mucʼʌch. Ilayi añix chuqui yambʌ miʼ chʼʌm ti ñuc Jehová.

16. ¿Chuqui yom i yʌl cheʼ mi lac chaʼ ñaʼtan lac bʌ, i chucoch ñucʌch i cʼʌjñibal cheʼ mi lac mel?

¹⁶ Yambʌ muʼ bʌ i chʼʌm ti ñuc Jehová jiñʌch mi jiñi xmulil mucʼʌch i chaʼ ñaʼtan i bʌ tiʼ sujm. ¿Chuqui yom i yʌl cheʼ mi lac chaʼ ñaʼtan lac bʌ? Jiñʌch cheʼ mi laj qʼuextan lac ñaʼtʌbal, lac melbal (chaʼlibal) o chuqui jiñi la com bʌ. Cheʼ jaʼel, jiñi muʼ bʌ i chaʼ ñaʼtan i bʌ cʼux miʼ yubin i miʼ yubin i chʼijyemlel chaʼan jiñi mach bʌ weñic tsiʼ mele o chaʼan maʼañic tsiʼ mele chuqui wem bʌ. Mach chʼijyemic jach miʼ yubin i bʌ chaʼan jiñi mach bʌ weñic tsiʼ mele, yicʼotʌch chaʼan mach weñix an yicʼot Jehová cheʼ bʌ tsiʼ mele jiñi. Laʼ lac chaʼ taj ti tʼan jiñi rey Manasés yicʼot David. Anquese tsiʼ meleyob tsʌts bʌ mulil, Jehová tsiʼ ñusʌbeyob come tsaʼʌch i chaʼ ñaʼtayob i bʌ tiʼ pejtelelob i pusicʼal (1 R. 14:8). Jehová jin jach miʼ ñusʌben i mul jiñi muʼ bʌ i pʌs chaʼan mucʼʌch i chaʼ ñaʼtan i bʌ. Mach jasʌlic mi la cubin lac chʼijyemlel chaʼan jiñi mach bʌ weñic tsaʼ lac mele. Añʌch chuqui yom mi lac mel. * Iliyi miʼ coltañonla laj qʼuel chuqui yambʌ miʼ chʼʌm ti ñuc Jehová.

17. ¿Chuqui yom i yʌl cheʼ mi lac sutqʼuin lac bʌ, i bajcheʼ miʼ coltañonla chaʼan maʼañic mi lac chaʼ mel jiñi tsaʼ bʌ lac mele? (Isaías 55:7).

¹⁷ ¿Chuqui yambʌ miʼ qʼuel Jehová? Jiñʌch cheʼ mi lac sutqʼuin lac bʌ. Ili yom i yʌl chaʼan mi laj cʌy jiñi mach bʌ weñic bij i mi lac tech chumtʌl cheʼ bajcheʼ miʼ mulan Jehová (pejcan Isaías 55:7). Jiñi muʼ bʌ i sutqʼuin i bʌ yom miʼ qʼuextan i ñaʼtʌbal chaʼan miʼ tech i jacʼ muʼ bʌ i yʌl Jehová (Rom. 12:2; Efes. 4:23). Yomʌch miʼ cʌy jiñi mach bʌ weñic i ñaʼtʌbal yicʼot i melbal (Col. 3:7-10). Pero mach ñajʌyic lac chaʼan chaʼan muʼ bʌ i yʌcʼ chaʼan Jehová miʼ ñusʌbeñonla lac mul yicʼot miʼ sʌqʼuesañonla jiñʌch cheʼ mi lac pʌs chaʼan mucʼʌch lac ñop ti jiñi i cuxtʌlel tsaʼ bʌ i yʌcʼʌ Jesús. Cheʼ bʌ Jehová miʼ qʼuel chaʼan wolʌch lac chaʼlen wersa chaʼan mi laj qʼuextan  lac melbal, miʼ ñusʌbeñonla lac mul come Jesús tsiʼ yʌcʼʌ i cuxtʌlel ti lac tojlel (1 Juan 1:7).

18. ¿Chuqui tsaʼ laj cʌñʌ chaʼan bajcheʼ miʼ ñusan lac mul Jehová?

¹⁸ Laʼ lac chaʼ tsʼitaʼ qʼuel jiñi ñuc tac bʌ i cʼʌjñibal tsaʼix bʌ laj qʼuele ti ili estudio. Tiʼ sujm, maʼañic yambʌ cheʼ bʌ miʼ ñusan lac mul bajcheʼ Jehová. ¿Chucoch cheʼ mi la cʌl? Ñaxam bʌ, come tiʼ pejtelel ora yom i ñusan lac mul. I chaʼpʼejlel, come luʼ yujil chaʼañonla i jiñʌch muʼ bʌ i mejlel i qʼuel mi mucʼʌch lac chaʼ ñaʼtan lac bʌ tiʼ pejtelel lac pusicʼal. I yuxpʼejlel, come cheʼ bʌ Jehová miʼ ñusan lac mul maʼañix miʼ chʌn cʼajtesan. Wocolix i yʌlʌ iliyi, miʼ mejlel lac taj sʌc bʌ laj conciencia yicʼot utsʼat miʼ qʼuelonla.

19. ¿Chucoch mucʼʌch i mejlel la cubin lac tijicñʌyel anquese mucʼʌch caj lac bej taj lac sajtemal tiʼ caj xmulilonla?

¹⁹ Tiʼ sujm, mucʼʌch caj lac bej taj lac sajtemal come xmulilonla. Pero miʼ wen ñuqʼuesan lac pusicʼal muʼ bʌ i yʌl Perspicacia para comprender las Escrituras, volumen 1, página 209: «Come Jehová miʼ pʼuntan jiñi i wiñicob chaʼan jiñi i cʼunlelob, mach yomic cʼux miʼ yubiñob tiʼ pejtelel ora chaʼan jiñi i sajtemalob muʼ bʌ i tajob come toj xmulilobʌch (Sal. 103:8-14; 130:3). Mi mucʼʌch i chʌn jacʼob chuqui miʼ yʌl Dios, mi caj i yubiñob i tijicñʌyel (Filip. 4:4-6; 1 Juan 3:19-22)». ¡Mucʼʌch i wen aqʼueñonla lac tijicñʌyel ili tʼan!

20. ¿Chuqui mi caj laj qʼuel yaʼ ti yambʌ estudio?

²⁰ Mucʼʌch lac wen aqʼuen wocolix i yʌlʌ Jehová come yomʌch i ñusan lac mul cheʼ bʌ mucʼʌch lac chaʼ ñaʼtan lac bʌ tiʼ sujm chaʼan jiñi tsaʼ bʌ lac mele. Pero ¿bajcheʼ miʼ mejlel lac lajin i yejemplo? ¿Chuqui tac jiñi lajal bʌ o qʼuexel bʌ bajcheʼ miʼ ñusan lac mul Jehová yicʼot bajcheʼ mi lac mel joñonla? ¿I chucoch ñuc i cʼʌjñibal mi lac chʼʌmben i sujm iliyi? Yaʼ ti yambʌ estudio mi caj lac tajben i jacʼbal ili cʼajtiya tac.