1. ¿Chuqui ti wocol tac mi lac ñusan jiñi i wiñiconbʌla Jehová?

¿WOLI ba lac ñusan jumpʼejl tsʌts bʌ wocol? Tajol juntiquil hermano tsiʼ mele mach bʌ weñic ti lac tojlel (Stg. 3:2). O tajol jiñi lac piʼʌlob ti escuela o ti eʼtel miʼ wajleñoñobla tiʼ caj mi lac melben i yeʼtel Jehová (1 P. 4:3, 4). ¿Am ba juntiquil ti lac familia woli bʌ i ñop i mʌctañonla chaʼan maʼañic mi lac majlel ti tempa bʌ o chaʼan maʼañic mi la cʌcʼ ti cʌñol jiñi ñopol bʌ lac chaʼan? (Mt. 10:35, 36). Mi ñoj wocol bajcheʼ woli (choncol) lac ñusan tajol mi lac ñaʼtan chaʼan yaʼix chililonla. Pero miʼ mejlel lac ñop chaʼan mach yʌlʌyic chuqui ti wocol mi lac ñusan, Jehová mi caj i yʌqʼueñonla lac ñaʼtʌbal yicʼot lac pʼʌtʌlel chaʼan mi laj cuch.

2. Cheʼ bajcheʼ miʼ yʌl Romanos 15:4, ¿bajcheʼ miʼ mejlel i coltañonla jiñi i pejcʌntel i Tʼan Dios?

² Jehová an i wen tsictesa yaʼ ti Biblia bajcheʼ an i ñusayob tsʌts tac bʌ wocol chaʼtiqui uxtiquil wiñicob xʼixicob. Tsiʼ mele jiñi chaʼan mi laj cʌn tiʼ tojlelob. Jiñʌch tsaʼ bʌ i tsʼijbu jiñi apóstol Pablo yaʼ ti Romanos 15:4 (pejcan). Cheʼ mi lac pejcan ili relato tac miʼ mejlel lac taj i ñuqʼuesʌntel lac pusicʼal yicʼot i yʌqʼueñonla lac pijtaya. Pero chaʼan mi lac taj iliyi mach jasʌlic jach yom mi lac pejcan jiñi Biblia. Yom mi la cʌcʼ chaʼan jiñi muʼ bʌ lac pejcan miʼ qʼuextan lac pensar yicʼot miʼ cʼotel ti lac pusicʼal. Cheʼ baʼ ora la com coltʌntel chaʼan mi lac ñusan jumpʼejl wocol, miʼ mejlel lac mel iliyi: 1) Mi lac chaʼlen oración, 2) mi lac ñop laj qʼuel chuqui tsaʼ ujti, 3) mi lac wen ñaʼtan yicʼot 4) mi lac jacʼ jiñi woli bʌ laj cʌn. Wʌle mi caj laj qʼuel chuqui yom i yʌl jujunchajp iliyi. * Cheʼ jiñi, mi caj laj cʼʌn ili chʌnchajp chaʼan mi laj cʌn tiʼ tojlel jiñi rey David yicʼot jiñi apóstol Pablo.

3. ¿Chuqui yom mi lac mel cheʼ bʌ muʼto caj lac pejcan jiñi Biblia, i chucoch?

 ³ 1) Mi lac chaʼlen oración. Cheʼ mi caj lac pejcan jiñi Biblia, yom mi lac ñaxan cʼajtiben i coltaya Jehová chaʼan mi lac locʼsʌben i wenlel jiñi muʼ bʌ lac pejcan. Jumpʼejl ejemplo, mi woli (yʌquel) lac sʌclan ticʼojel tac chaʼan mi lac tojʼesan jumpʼejl wocol, laʼ laj cʼajtiben Jehová chaʼan miʼ coltañonla lac taj principio tac muʼ bʌ i coltañonla (Fil. 4:6, 7; Stg. 1:5).

4. ¿Chuqui miʼ mejlel i coltañonla chaʼan mi lac chumtan jiñi muʼ bʌ lac pejcan?

⁴ 2) Mi lac ñop laj qʼuel chuqui tsaʼ ujti. Cheʼ mi laj cʼʌn lac ñaʼtʌbal chaʼan mi lac ñop laj qʼuel chuqui tsaʼ ujti jumpʼejlʌch utsʼatax bʌ lac majtan tilem bʌ ti Jehová. Chaʼan mi lac chumtan jiñi woli bʌ lac pejcan, laʼ lac ñop laj qʼuel jiñi tsaʼ bʌ ujti, i laʼ lac ñop lac ñaʼtan chaʼan joñonla jiñi yaʼ bʌ añonla yaʼi. Laʼ lac chaʼlen wersa laj qʼuel jiñi tsaʼ tac bʌ i qʼueleyob yicʼot laʼ la cubin cheʼ bajcheʼ yubil tsiʼ yubiyob i bʌ.

5. ¿Chuqui yom i yʌl cheʼ an chuqui mi lac wen ñaʼtan, i chuqui mi caj i coltañonla chaʼan mi lac mel?

⁵ 3) Mi lac wen ñaʼtan. Ili yom i yʌl chaʼan mi lac wen ñaʼtan jiñi woli bʌ lac pejcan yicʼot mi laj qʼuel chuqui miʼ mejlel i pʌsbeñonla. Miʼ coltañonla laj qʼuel bajcheʼ miʼ taj i bʌ jujunchajp woli bʌ i yʌjlel yicʼot lac ñumen chʼʌmben i sujm jiñi temaj. Cheʼ bʌ mi lac pejcan jiñi Biblia i maʼañic mi la cʌqʼuen i yorajlel lac wen ñaʼtan, lajal bajcheʼ an lac chaʼan i xajb tac jumpʼejl bʌlñʌcʼʌl, pero mi maʼañic mi lac xʌb maʼañic mi caj lac tijicñesan lac bʌ ti jiñi sumuc bʌ bʌlñʌcʼʌl. Junchajp muʼ bʌ i coltañonla lac wen ñaʼtan jin cheʼ mi lac sʌclʌben i jacʼbal cʼajtiya tac bajcheʼ iliyi: «¿Chuqui tsiʼ mele chaʼan miʼ tojʼesan jiñi i wocol? ¿Bajcheʼ tsiʼ colta Jehová? ¿Bajcheʼ miʼ mejlel j cʼʌn jiñi tsaʼ bʌ j cʌñʌ chaʼan mij cuch jiñi c wocol tac?».

6. ¿Chucoch yom mi lac jacʼ jiñi muʼ bʌ laj cʌn?

⁶ 4) Mi lac jacʼ jiñi woli bʌ laj cʌn. Jesús tsiʼ yʌlʌ chaʼan mi maʼañic mi lac jacʼ jiñi muʼ bʌ laj cʌn, lajalonla bajcheʼ juntiquil wiñic muʼ bʌ i mel (pʌt) i yotot tiʼ pam jiʼ. Miʼ chaʼlen tsʌts bʌ eʼtel, pero maʼañic miʼ cʼʌjñibʌyel. ¿Chucoch? Come jiñi otot mi caj i jejmel cheʼ bʌ miʼ tilel tsʌts bʌ icʼ jaʼal yicʼot butʼjaʼ (Mt. 7:24-27). Cheʼʌch mi lac mejlel ti ujtel jaʼel, anquese mucʼʌch lac chaʼlen oración, mi lac ñop laj qʼuel chuqui tsaʼ ujti yicʼot mi lac wen ñaʼtan, toʼol jach tsaʼ lac chaʼle wersa mi maʼañic mi lac jacʼ chuqui tsaʼ laj cʌñʌ. Cheʼ bʌ mi lac taj wocol o laj contrajintel mach pʼʌtʌlic an jiñi lac ñopoñel. Pero mi mucʼʌch lac wen tsajin jiñi Biblia yicʼot mi lac jacʼ chuqui mi laj cʌn, mi caj lac yajcan lac mel chuqui wen, mi caj lac taj ñʌchʼtʌlel i mi caj i pʼʌtʼan jiñi lac ñopoñel (Is. 48:17, 18). Laʼ lac mel ili chʌnchajp chaʼan mi laj qʼuel chuqui miʼ mejlel laj cʌn tiʼ tojlel jiñi rey David.

7. ¿Chuqui ti relato mi caj laj qʼuel?

⁷ ¿Am ba juntiquil la camigo o juntiquil ti lac familia tsaʼ bʌ i contrajiyonla? Mi añʌch, mi caj i wen coltañonla cheʼ mi laj qʼuel chuqui tsiʼ mele juntiquil i yalobil jiñi rey David i cʼabaʼ Absalón, tsaʼ bʌ i contraji i tat i tsiʼ ñopo i chilben i yumʌntel (2 S. 15:5-14, 31; 18:6-14).

8. ¿Chuqui miʼ mejlel laj cʼajtiben Jehová chaʼan miʼ coltañonla?

⁸ 1) Mi lac chaʼlen oración. Cheʼ bʌ mi lac ñaʼtan ili relato, laʼ lac jamʌ suben Jehová bajcheʼ yubil mi la cubin lac bʌ tiʼ caj an majqui tsiʼ ticʼlayonla (Sal. 6:6-9). Cheʼ jiñi, laʼ laj cʼajtiben chaʼan miʼ coltañonla lac taj principio tac muʼ bʌ i pʌsbeñonla chuqui yom mi lac mel.

9. ¿Bajcheʼ miʼ mejlel a wʌl ti tsʼitaʼ tʼan tsaʼ bʌ ujti tiʼ tojlel David yicʼot Absalón?

⁹ 2) Mi lac ñop laj qʼuel chuqui tsaʼ ujti. Laʼ lac ñaʼtan woli bʌ i subeñonla ili relato i laʼ lac ñop laj qʼuel bajcheʼ tsiʼ ticʼla David pejtelel iliyi.  Absalón cabʌl jab tsiʼ chaʼle wersa chaʼan jiñi lac piʼʌlob miʼ cʼuxbiñob (2 S. 15:7). Cheʼ bʌ tsiʼ ñaʼta chaʼan i yorajlelix miʼ yochel bajcheʼ rey, tsiʼ choco majlel wiñicob tiʼ petol Israel chaʼan miʼ chajpañob jiñi tejclum chaʼan miʼ chʼʌmob Absalón bajcheʼ rey. Tsaʼto i ñijcʌbe i pusicʼal Ahitofel chaʼan miʼ tem i bʌ yicʼot. Ahitofel ti ñaxan jiñʌch juntiquil wem bʌ i yamigo yicʼot i yaj ticʼojel David. Cheʼ jiñi, Absalón tsiʼ bajñel subu i bʌ bajcheʼ rey i tsiʼ ñopo i chuc yicʼot i tsʌnsan David, tajol wen cʼam ti jimbʌ ora (Sal. 41:1-9). Cheʼ bʌ David tsiʼ yubi pejtelel iliyi, tsaʼ putsʼi loqʼuel ti Jerusalén. Ti wiʼil, jiñi i wiñicob Absalón tsiʼ contrajiyob jiñi xucʼul bʌ i wiñicob David. Jiñi tsaʼ bʌ i chañʼesayob i bʌ tiʼ sʌtʌyob, i Absalón ti tsʌnsʌnti.

10. ¿Chuqui tsaʼ mejli i mel jiñi rey David cheʼ cheʼic yom?

¹⁰ Wʌle, laʼ lac ñaʼtan bajcheʼ yubil tsiʼ yubi David. Miʼ cʼuxbin Absalón yicʼot miʼ ñop tiʼ tojlel Ahitofel. Pero tiʼ chaʼticlelob tsiʼ contrajiyob. Tsiʼ wen aqʼueyob i cʼuxel i pusicʼal, i tsaʼto i ñopoyob i tsʌnsan. David tsaʼ mejli i ñaʼtan chaʼan jiñi yambʌ i yamigojob tsiʼ temeyob i bʌ yicʼot Absalón, i miʼ cʌy i ñop tiʼ tojlelob. Cheʼ cheʼic yom, tsaʼ bajñel caji i ñaʼtan i bʌ yicʼot miʼ bajñel putsʼel loqʼuel yaʼ ti tejclum o miʼ ñaʼtan chaʼan yaʼix jaxʌl tsaʼ cʌyle. Pero maʼañic tsiʼ mele ili, tsaʼʌch i cuchu ili tsʌts bʌ wocol. ¿Chuqui tsiʼ colta?

11. ¿Chuqui tsiʼ mele jiñi rey David cheʼ bʌ tsiʼ ñusa ili tsʌts bʌ wocol?

¹¹ 3) Mi lac wen ñaʼtan. ¿Chuqui ti principio tac miʼ mejlel laj cʌn ti ili relato? Miʼ mejlel laj cʼajtiben lac bʌ: «¿Chuqui tsiʼ mele David chaʼan miʼ coltan i bʌ?». Maʼañic tsiʼ yʌqʼue i mʌlben (jotben) jiñi bʌqʼuen, mi chaʼañicto ti ora miʼ waʼ yajcan chuqui miʼ mel i miʼ yajcan chuqui mach weñic. Tsiʼ pejca Jehová ti oración chaʼan miʼ cʼajtiben i coltaya, i tsiʼ cʼajtibe i coltaya i yamigojob jaʼel. I cheʼ bʌ an chuqui miʼ ñaʼtan i mel, ti ora miʼ mel. Anquese cabʌl i cʼuxel i pusicʼal, maʼañic tsaʼ michʼa, mi tsaʼicto i cʌyʌ i ñop tiʼ tojlel yambʌlob. Tsiʼ chʌn ñopo tiʼ tojlel Jehová yicʼot i yamigojob.

12. ¿Bajcheʼ tsaʼ coltʌnti David ti Jehová?

¹² ¿Bajcheʼ tsaʼ coltʌnti David ti Jehová? Cheʼ muqʼuic lac tsʼitaʼ wen sʌclan, mi caj laj qʼuel chaʼan Jehová tsiʼ yʌqʼue i pʼʌtʌlel David chaʼan miʼ lʌtʼ jiñi wocol (Sal. 3:1-8; qʼuele jiñi tʼan tac am bʌ tiʼ yujtibal ili capítulo). Jehová tsiʼ yʌcʼʌ i bendición ti chuqui tac tsiʼ yajca i mel David. Cheʼ jaʼel, tsiʼ coltʌbe jiñi xucʼul bʌ i yamigojob cheʼ bʌ tsiʼ chaʼleyob wersa chaʼan miʼ cʌntañob.

13. ¿Bajcheʼ miʼ mejlel lac lajin David cheʼ bʌ an majqui miʼ low lac pusicʼal? (Mateo 18:15-17).

¹³ 4) Mi lac jacʼ jiñi woli bʌ laj cʌn. Laʼ laj cʼajtiben lac bʌ: «¿Bajcheʼ miʼ mejlel c lajin jiñi tsaʼ bʌ i mele David?». Junchajp jin cheʼ ti ora mi lac sʌclan bajcheʼ yom mi lac tojʼesan jiñi wocol. Yaʼ tsiquil ti chuqui woli i yujtel, miʼ mejlel lac mel tsaʼ bʌ i yʌlʌ Jesús yaʼ ti Mateo capítulo 18 o mi lac tsajcan jiñi principio am bʌ yaʼ ti ticʼojel (pejcan Mateo 18:15-17). Pero mach yomic mi la cʌcʼ chaʼan jiñi muʼ bʌ la cubin miʼ mʌlbeñonla o chaʼan maʼañic mi lac wen ñaʼtan chuqui mi lac yajcan lac mel. Laʼ laj cʼajtiben Jehová chaʼan miʼ yʌqʼueñonla lac ñʌchʼtʌlel yicʼot lac ñaʼtʌbal chaʼan mi lac lʌtʼ jiñi wocol. Mach laj cʌy lac ñop tiʼ tojlel la camigojob i laʼ lac jacʼ jiñi coltaya muʼ bʌ i yʌqʼueñoñobla (Pr. 17:17). I jiñi ñumen ñuc bʌ i cʼʌjñibal jiñʌch cheʼ mi lac jacʼ jiñi ticʼojel muʼ bʌ i yʌqʼueñonla Jehová tiʼ Tʼan (Pr. 3:5, 6).

14. ¿Baqui ora miʼ mejlel i coltañonla jiñi i pejcʌntel 2 Timoteo 1:12-16 yicʼot 4:6-11, 17-22?

¹⁴ ¿Mach ba yomic jiñi lac familia chaʼan mi lac melben i yeʼtel Jehová? O ¿chumulonbala ti jumpʼejl país baqui maʼañic mi lac wen mejlel lac melben i yeʼtel Jehová o junyajl mʌctʌbil? Mi cheʼʌchi, miʼ mejlel i coltañonla cheʼ bʌ mi  lac pejcan 2 Timoteo 1:12-16 yicʼot 4:6-11, 17-22. * Pablo tiʼ tsʼijbu ili texto tac cheʼ bʌ an ti cárcel.

15. ¿Chuqui miʼ mejlel laj cʼajtiben Jehová?

¹⁵ 1) Mi lac chaʼlen oración. Cheʼ bʌ muʼto caj lac pejcan jiñi texto tac, laʼ lac suben Jehová jiñi lac wocol yicʼot bajcheʼ yubil mi la cubin. Yom jamʌl tsiquil mi lac suben. Cheʼ jiñi, laʼ laj cʼajtiben Jehová chaʼan miʼ coltañonla lac taj principio tac muʼ bʌ i coltañonla ti lac wocol ti jiñi relato tac chaʼan bajcheʼ Pablo tsiʼ ñusa wocol.

16. ¿Chuqui ti wocol woliʼ ñusan Pablo?

¹⁶ 2) Mi lac ñop laj qʼuel chuqui tsaʼ ujti. Laʼ lac ñaʼtan chaʼan joñonla woli lac ñusan jiñi wocol tac tsaʼ bʌ i ñusa Pablo. An ti cárcel yaʼ ti Roma. Anquese tsaʼix ajñi ti cárcel ti wajali, ili ora yujil chaʼan mi caj ti tsʌnsʌntel. An i piʼʌlob tsaʼ bʌ i cʌyʌyob i wen lujbix (2 Ti. 1:15).

17. ¿Chuqui tsaʼ mejli i mel Pablo cheʼ cheʼic yom?

¹⁷ Cheʼ cheʼic yom, Pablo tsaʼ mejli i yʌcʼ i ñaʼtʌbal cheʼ bajcheʼ yilal an ti ñaxan yicʼot i ñaʼtan chaʼan maʼañic ti cárcel cheʼ yambʌlic chuqui tsiʼ yajca i mel. Cheʼ jaʼel, tsaʼ mejli ti michʼan yicʼotob jiñi wiñicob chʼoyoloʼ bʌ ti tejclum tac chaʼan Asia tsaʼ bʌ i cʌyʌyob i miʼ cʌy i ñop tiʼ tojlel jiñi yambʌ i yamigojob. Pero maʼañic tsiʼ wis mele jiñi. ¿Chuqui tsiʼ colta chaʼan miʼ chʌn ñop tiʼ tojlel i yamigojob yicʼot ti Jehová?

18. ¿Bajcheʼ yilal tsiʼ qʼuele jiñi i wocol tac Pablo?

¹⁸ 3) Mi lac wen ñaʼtan. Miʼ mejlel laj cʼajtiben lac bʌ: «¿Chuqui tsiʼ mele Pablo chaʼan miʼ coltan i bʌ?». Anquese yujil chaʼan mi caj i tsʌnsʌntel, maʼañic tsiʼ wis ñajʌtesa chaʼan jiñi ñumen ñuc bʌ i cʼʌjñibal jiñʌch cheʼ miʼ yʌqʼuentel i ñuclel Jehová. Cheʼ jaʼel, tsiʼ chʌn sʌcla bajcheʼ miʼ mejlel i pʼʌtʼesan yañoʼ bʌ, i yicʼot i ñopoñel tsiʼ chʌn pejca Jehová ti oración (2 Ti. 1:3). Maʼañic tsiʼ cʌyʌ tiʼ jol chaʼan an tsaʼ bʌ i cʌyʌyob, tsiʼ yʌqʼue wocolix i yʌlʌ Dios chaʼan jiñi xucʼul bʌ i yamigojob tsiʼ cʼuxbiyob yicʼot tsiʼ coltayob. Cheʼ jaʼel, tsiʼ chʌn tsaji jiñi i Tʼan Dios (2 Ti. 3:16, 17; 4:13). I jiñi ñumen ñuc bʌ i cʼʌjñibal jin cheʼ mucʼʌch i ñop chaʼan Jehová yicʼot Jesús mucʼʌch i cʼuxbiñob, chaʼan maʼañic tsiʼ cʌyʌyob yicʼot chaʼan mi caj i yʌqʼueñob i chobejtʌbal chaʼan jiñi i xucʼtʌlel.

19. ¿Bajcheʼ tsaʼ coltʌnti Pablo ti Jehová?

¹⁹ Jehová tsiʼ wʌn sube Pablo chaʼan mi caj i tsʼaʼlentel tiʼ caj xñoptʼan (Hch. 21:11-13). ¿Bajcheʼ tsaʼ coltʌnti Pablo ti Jehová? Tsiʼ jacʼbe i yoración yicʼot tsiʼ pʼʌtʼesa (2 Ti. 4:17). Cheʼ jaʼel, tiʼ sube chaʼan mi caj i yʌqʼuen jiñi i majtan tsaʼ bʌ i wen chaʼle wersa i taj yicʼot Jehová tsiʼ ñijcʌbe i pusicʼal jiñi xucʼul bʌ i yamigojob Pablo chaʼan miʼ coltañob.

20. ¿Bajcheʼ miʼ mejlel lac lajin jiñi ñopoñel tsaʼ bʌ i taja ti tʼan Pablo ti Romanos 8:38, 39?

²⁰ 4) Mi lac jacʼ jiñi woli bʌ laj cʌn. Laʼ laj cʼajtiben lac bʌ: «¿Bajcheʼ miʼ mejlel c lajin Pablo?». Cheʼ bajcheʼ Pablo, la cujil chaʼan mi caj lac tsʼaʼlentel tiʼ caj lac ñopoñel (Mr. 10:29, 30). Chaʼan xucʼul mi la cajñel, yom an lac ñopoñel cheʼ mi lac pejcan Jehová i yom ñʌmʌlonla ti wem bʌ estudio. Mach yomic miʼ ñajʌyel lac chaʼan chaʼan junchajp wen ñuc bʌ i cʼʌjñibal jin cheʼ mi la cʌqʼuen i ñuclel Jehová. Miʼ mejlel lac ñop chaʼan maʼañic baʼ ora mi caj i cʌyonla yicʼot chaʼan maʼañic majqui miʼ mejlel i mʌctan chaʼan miʼ cʼuxbiñonla (pejcan Romanos 8:38, 39; He. 13:5, 6).

21. ¿Chuqui tsiʼ colta Aya yicʼot Hector chaʼan miʼ ñusañob jiñi i wocol?

²¹ Mach yʌlʌyic chuqui woli lac ñusan, jiñi ejemplo tac am bʌ ti Biblia miʼ mejlel i pʼʌtʼesañonla.  Jumpʼejl ejemplo, juntiquil precursora chʼoyol bʌ ti Japón i cʼabaʼ Aya tsiʼ yʌlʌ chaʼan jiñi tsaʼ bʌ ujti tiʼ tojlel Jonás tsiʼ colta chaʼan miʼ mʌlben jiñi bʌqʼuen ti jiñi subtʼan baqui an cabʌl lac piʼʌlob. I juntiquil hermano chʼoyol bʌ ti Indonesia i cʼabaʼ Hector muʼ bʌ i melben i yeʼtel Jehová anquese mach testigojobic jiñi i tatob, tsiʼ yʌlʌ chaʼan jiñi tsaʼ bʌ ujti tiʼ tojlel Rut miʼ coltan i ñumen mulan i cʌn i chaʼan bʌ Jehová yicʼot i melben i yeʼtel.

22. ¿Bajcheʼ miʼ mejlel lac ñumen locʼsʌben i wenlel jiñi video tac, jiñi audio tac loqʼuem bʌ ti Biblia yicʼot jiñi sección «Cʌñʌ am bʌ ti Biblia»?

²² ¿Baqui miʼ mejlel lac ñumen taj ejemplo tac loqʼuem bʌ ti Biblia muʼ bʌ i pʼʌtʼesañonla? Jiñi video tac, i pejcʌntel jiñi drama tac loqʼuem bʌ ti Biblia yicʼot jiñi temaj tac am bʌ ti jiñi libro «Cʌñʌ am bʌ ti Biblia» utsʼatax bajcheʼ miʼ taj ti tʼan jiñi relato tac. * Cheʼ bʌ muʼto caj laj qʼuel, lac ñʌchʼtan o lac pejcan jiñi lac jun tac, laʼ lac suben Jehová chaʼan miʼ coltañonla lac taj chuqui tac miʼ mejlel laj cʼʌn ti laj cuxtʌlel. Laʼ lac ñaʼtan chaʼan joñonla jiñi woli bʌ i yʌjlel yaʼi. Laʼ lac wen ñaʼtan chuqui tsiʼ mele yicʼot bajcheʼ Jehová tsiʼ colta jiñi xucʼul bʌ i wiñic chaʼan miʼ lʌtʼ jiñi wocol. Cheʼ jiñi, laʼ lac mel jiñi tsaʼ bʌ laj cʌñʌ. Ti wiʼil, laʼ la cʌqʼuen wocolix i yʌlʌ Jehová chaʼan tsiʼ coltayonla, i laʼ lac pʌs cheʼ bʌ mi lac sʌclan bajcheʼ miʼ lac pʼʌtʼesan yicʼot mi laj coltan yambʌlob.

23. ¿Chuqui miʼ subeñonla Jehová ti Isaías 41:10, 13?

²³ Tajol wen wocol bajcheʼ mi lac ñusan ti ili pañimil (mulawil) am bʌ tiʼ cʼʌb Satanás, i an i tajol maʼañic mi caj lac ñaʼtan chuqui yom mi lac mel (2 Ti. 3:1). Pero mach yomic an lac bʌqʼuen o mi laj cʌlʌx cʼojoʼtan. Jehová yujil chuqui woli lac ñusan. Miʼ yʌcʼ i tʼan chaʼan cheʼ baʼ ora la com coltʌntel mi caj i chuconla ti jiñi ñoj bʌ i cʼʌb wen pʼʌtʌl bʌ (pejcan Isaías 41:10, 13). Mi lac ñop chaʼan Jehová mi caj i coltañonla, i jiñi Biblia miʼ pʼʌtʼesañonla chaʼan mi lac ñusan baqui jach bʌ wocol.