1. ¿Chuqui tac an i chaʼañob jiñi chʼitoñob añoʼ bʌ ti congregación?

JATETLA chʼitoñettobʌla wen cabʌl laʼ pʼʌtʌlel yicʼot wen cabʌlto miʼ mejlel laʼ chaʼlen coltaya (Pr. 20:29). Mi laʼ wen chaʼlen coltaya yaʼ ti congregación, i tajol cabʌletla laʼ wom ochel bajcheʼ siervo ministerial. Pero tajol an muʼ bʌ laʼ ñaʼtan chaʼan an hermanojob muʼ bʌ i qʼueletobla chaʼan maxto wen añic laʼ jabilel o chaʼan maxto añic miʼ mejlel laʼ mel jiñi eʼtel (troñel) ñuc tac bʌ i cʼʌjñibal. Mi cheʼ woli (choncol) a ñusan, an chuqui miʼ mejlel a mel chaʼan jiñi hermanojob miʼ qʼueletob ti ñuc yicʼot chaʼan miʼ tech i yʌqʼueñetob ñuc bʌ eʼtel tac.

2. ¿Chuqui mi caj laj qʼuel ti ili estudio?

² Ti ili estudio mi caj la cʌl tiʼ tojlel jiñi rey David, tiʼ tojlel Asá yicʼot Jehosafat. Mi caj laj qʼuel chuqui ti wocol tsiʼ ñusayob, chuqui tsiʼ meleyob yicʼot chuqui miʼ mejlel i cʌñob jiñi chʼitoñob tiʼ tojlelob.

3. ¿Chuqui ti coltaya miʼ mejlel i yʌcʼob jiñi chʼitoñob yaʼ ti congregación?

³ Cʼʌlʌl cheʼ bʌ xcolelto, David miʼ wen cʼuxbin Jehová yicʼot tsiʼ cʌñʌ i mel tsaʼ bʌ i qʼuele ti ñuc yambʌlob. Cheʼ jaʼel, tsiʼ chaʼle wersa chaʼan wen miʼ ñijcan jiñi música, i tsiʼ cʼʌñʌ jiñi yujil bʌ melol chaʼan miʼ coltan jiñi rey Saúl (1 S. 16:16, 23). Ti ili ora, yonlel chʼitoñob cabʌl chuqui yujilob mejl bʌ i cʼʌñob chaʼan miʼ coltañob jiñi hermanojob yaʼ ti congregación. Jiñi hermanojob añobix bʌ i jabilel miʼ wen qʼuelob ti ñuc  cheʼ bʌ an majqui miʼ cʌntesañob i cʼʌn jiñi tableta tac o yan tac bʌ chaʼan miʼ cʼʌñob chaʼan miʼ chaʼleñob estudio o chaʼan miʼ chajpañob i bʌ chaʼan jiñi tempa bʌ. Jin chaʼan, mi jatet a wujil i cʼʌñol tac iliyi, mi caj a wen coltan jiñi hermanojob.

4. ¿Bajcheʼ miʼ mejlel i lajiñob David jiñi chʼitoñob? (Qʼuele jiñi dibujo am bʌ tiʼ tejchibal).

⁴ David tsiʼ pʌsʌ chaʼan mucʼʌch i tsʼʌctesan ti wen jiñi muʼ bʌ i subentel. Jumpʼejl ejemplo, cheʼ bʌ chʼitonto tsiʼ chaʼle wersa i cʌntʌben ti wen i tiñʌmeʼ i tat anquese wocolʌch jiñi eʼtel. Cheʼʌch tsiʼ pʌsʌ cheʼ bʌ tsiʼ colta jiñi tiñʌmeʼ tac i maʼañic tsiʼ chaʼle bʌqʼuen. David tiʼ sube jiñi rey Saúl: «C yum, xcʌnta tiñʌmeʼon i chaʼan c tat. Cheʼ bʌ tsaʼ cʼoti bajlum yicʼot jini bʌteʼel tsʼiʼ chaʼan miʼ cʼux jini tiñʌmeʼ, ti ora jach tsaʼ cajñesa. Tsac jatsʼʌ. Tsac chaʼ chilbe jini alʌ tiñʌmeʼ» (1 S. 17:34, 35). Jiñi chʼitoñob miʼ mejlel i lajiñob David cheʼ bʌ miʼ chaʼleñob wersa i tsʼʌctesañob ti wen jiñi eʼtel muʼ bʌ i yʌqʼuentelob.

5. Cheʼ bajcheʼ miʼ yʌl Salmo 25:14, ¿baqui bʌ jiñi ñumen ñuc bʌ i cʼʌjñibal yom bʌ miʼ melob jiñi chʼitoñob?

⁵ Anquese David wen an i chʼejlel yicʼot wen yujil ñijcʌntel jiñi arpa, cʼʌlʌl cheʼ bʌ chʼitonto tsiʼ chaʼle wersa i sujtesan Jehová tiʼ yamigo come jiñʌch ñumen ñuc bʌ i cʼʌjñibal tsiʼ qʼuele. David mach cojach tsiʼ qʼuele Jehová bajcheʼ i Dios, tsaʼʌch i qʼuele jaʼel bajcheʼ juntiquil wem bʌ i yamigo (pejcan Salmo 25:14). Chʼitoñob, ñumen ñuc bʌ i cʼʌjñibal jiñʌch cheʼ bʌ mi laʼ sujtesan Jehová ti juntiquil laʼ wamigo. Mi cheʼʌch mi laʼ mel, tajol mi caj laʼ ñumen aqʼuentel eʼtel tac yaʼ ti congregación.

6. ¿Chuqui mach bʌ weñic tsaʼ ajli tiʼ tojlel David?

⁶ Junchajp wocol tsaʼ bʌ i ñusa David jiñʌch cheʼ bʌ tsaʼ ajli mach bʌ weñic tiʼ tojlel. Jumpʼejl ejemplo, jiñi i yʌscun tiʼ sube chaʼan maʼañic miʼ tsʼʌctesan ti wen jiñi i yeʼtel (1 S. 17:26-30). I cheʼ jaʼel cheʼ bʌ tsiʼ yʌlʌ chaʼan yom majlel i contrajin jiñi Goliat, jiñi rey Saúl tiʼ sube: «Chʼitoñet jax to» (1 S. 17:31-33). Pero Jehová i wen cʌñʌyʌch David i yujil chaʼan mucʼʌch i tsʼʌctesan ti wen jiñi i yeʼtel yicʼot chaʼan añʌch i ñaʼtʌbal anquese chʼitonto. I come mucʼʌch i wen ñop chaʼan Jehová mi caj i coltan, jin chaʼan tsaʼʌch mejli i tsʌnsan Goliat (1 S. 17:45, 48-51).

7. ¿Chuqui miʼ mejlel a cʌn tiʼ tojlel David?

⁷ Tajol jiñi i cʌñʌyetoʼ bʌ cheʼ bʌ wolito (yʌquelto) a colel majlel, wocolto miʼ yubiñob  chaʼan miʼ qʼueletob bajcheʼ juntiquil chʼiton añix bʌ i jabilel. Pero ¿chuqui miʼ mejlel a cʌn tiʼ tojlel David? Ñaxam bʌ, chaʼan yom an a pijt. Jehová mach cheʼic miʼ qʼuelet cheʼ bajcheʼ jiñi yañoʼ bʌ come i wen cʌñʌyet i yujil chuqui miʼ mejlel a mel (1 S. 16:7). I chaʼpʼejlel, chaʼan yom maʼ ñumen sujtesan ti a wamigo Jehová. David cheʼʌch tsiʼ mele cheʼ bʌ tsiʼ wen qʼuele jiñi melbil (pʌtbil) tac bʌ yicʼot cheʼ tsiʼ wen ñaʼta chuqui miʼ cʌntesan tiʼ tojlel Jehová (Sal. 8:3, 4; 139:14; Ro. 1:20). I yuxpʼejlel, yom maʼ cʼajtiben Jehová jiñi a pʼʌtʌlel. Jumpʼejl ejemplo, cʼajtiben ti oración chaʼan miʼ coltañet cheʼ bʌ jiñi a piʼʌlob ti clase miʼ wajleñetob come i testigojet Jehová. Cheʼ jaʼel, mele jiñi muʼ bʌ i subeñet jiñi Biblia, jiñi lac jun tac yicʼot jiñi video tac. Mi caj i ñumen pʼʌtʼan majlel a ñopoñel ti Jehová cheʼ bʌ maʼ qʼuel bajcheʼ miʼ coltañet. I cheʼ jaʼel, jiñi yambʌlob mi caj i qʼuelob chaʼan wem bʌ chʼitoñet yicʼot chaʼan an a ñaʼtʌbal cheʼ bʌ maʼ sʌclʌben i coltaya Jehová.

8, 9. a) ¿Chuqui tsiʼ colta David chaʼan maʼañic miʼ lujbʼan i pijtan chaʼan miʼ yochel bajcheʼ yumʌl? b) ¿Chuqui miʼ mejlel i cʌñob jiñi chʼitoñob tiʼ yejemplo David?

⁸ Yambʌ wocol tsaʼ bʌ i ñusa David jiñʌch cheʼ tsiʼ pijta cabʌl jab chaʼan miʼ yochel bajcheʼ yumʌl anquese añix ora tsaʼ yajcʌnti (1 S. 16:13; 2 S. 2:3, 4). ¿Chuqui tsiʼ colta chaʼan miʼ chʌn pʌs i pijt? Jiñʌch cheʼ bʌ tsiʼ mele jiñi mucʼʌch bʌ mejlel i mel, i maʼañic tsiʼ yʌcʼʌ chaʼan jiñi chʼijyemlel miʼ cʼuñʼesan. Jumpʼejl ejemplo, cheʼ bʌ tsaʼ majli ti chumtʌl yaʼ baqui an jiñi filisteojob, tsiʼ chaʼle guerra yicʼot jiñi i contrajob jiñi israelitajob (1 S. 27:1-12).

⁹ ¿Chuqui miʼ mejlel a cʌn tiʼ tojlel David? Chaʼan añʌch chuqui miʼ mejlel a mel chaʼan maʼ coltan jiñi hermanojob yicʼot chaʼan maʼ melben i yeʼtel Jehová. Laʼ lac ñaʼtan tsaʼ bʌ ujti tiʼ tojlel juntiquil hermano i cʼabaʼ Ricardo * tsaʼ bʌ i ñaʼta ochel ti precursor regular cheʼ bʌ lʌcʼʌ an 10 i jabilel, pero maxto chajpʌbilic. Maʼañic tsiʼ yubi i chʼijyemlel i tsaʼʌch i ñumen chaʼle subtʼan. Ricardo miʼ yʌl: «Cheʼ bʌ mic ñaʼtan jiñi tsaʼ bʌ c ñusa, mij qʼuel chaʼan añixto yom mic ñumen chajpan c bʌ. Tsaʼ c xucʼchoco c pensar c julaʼtañob jiñi tsaʼʌch bʌ i ñʌchʼtayoñob yicʼot tsaʼ caji c chajpan c bʌ chaʼan mic mel jiñi revisita. I cheʼ jiñi, tsaʼ c taja jiñi ñaxam bʌ questudio. Cheʼ bʌ tsaʼ cajiyon ti ñumen subtʼan, tsaʼ caji ti sajtel majlel jiñi c bʌqʼuen». Ili ora, Ricardo an bajcheʼ siervo ministerial yicʼot precursor regular.

10. ¿Chuqui tsiʼ mele David cheʼ bʌ tsiʼ ñusa jumpʼejl tsʌts bʌ wocol?

¹⁰ Laʼ laj qʼuel yambʌ wocol tsaʼ bʌ i ñusa David. Cheʼ bʌ David yicʼot jiñi i wiñicob woliʼ putsʼelob tiʼ tojlel Saúl, tsiʼ cʌyʌyob jiñi i familia chaʼan miʼ majlelob ti guerra. Pero jiñi i contrajob tsaʼ cʼotiyob i tsiʼ pʌybeyob majlel pejtelel i familia. Anquese David jiñʌch juntiquil wiñic wen yujil bʌ guerra, maʼañic tsiʼ bajñel cʼʌñʌ i ñaʼtʌbal chaʼan miʼ ñaʼtan bajcheʼ mi caj i coltan jiñi i familia. Tsaʼ bʌ i mele jiñʌch cheʼ bʌ tsiʼ sʌclʌbe i coltaya Jehová. Yicʼot i coltaya juntiquil sacerdote i cʼabaʼ Abiatar, David tsiʼ cʼajtibe Jehová: «¿Yom ba mic tsajcan majlel ili xujchʼob?». Jehová tsiʼ jacʼbe chaʼan yomʌch i tiʼ sube chaʼan mi caj i mʌl (1 S. 30:7-10). ¿Chuqui miʼ mejlel a cʌn ti ili tsaʼ bʌ i ñusa David?

11. ¿Chuqui yom maʼ mel cheʼ bʌ an chuqui woli a ñaʼtan a mel?

¹¹ Cʼajtin a coltʌntel cheʼ bʌ an chuqui woli a ñaʼtan a mel. Jiñi a tatob yicʼot jiñi ancianojob  añobix bʌ i ñaʼtʌbal miʼ mejlel i yʌqʼueñetob wem bʌ ticʼojel. Jehová tsiʼ waʼchoco jiñi ancianojob come miʼ ñop chaʼan mucʼʌch caj i melob ti wen jiñi i yeʼtel, jin chaʼan cheʼʌch yom maʼ mel jaʼel. Jiñi ancianojob lajalob bajcheʼ ‹majtañʌl› tsaʼ bʌ i yʌcʼʌ Jehová yaʼ ti congregación (Ef. 4:8). Mi mucʼʌch a lajibeñob jiñi i ñopoñel i maʼ ñʌchʼtʌbeñob jiñi wem bʌ i ticʼojel tac, wen mi caj i loqʼuel jiñi muʼ bʌ a ñaʼtan a mel. Wʌle laʼ laj qʼuel chuqui miʼ cʌntesañonla jiñi i yejemplo jiñi rey Asá.

12. ¿Baqui tac bʌ melbalʌl an i chaʼan Asá cheʼ bʌ tsiʼ teche yumʌntel?

¹² Cheʼ bʌ Asá chʼitonto wen añʌch i pecʼlel yicʼot wen chʼejlʌch. Jumpʼejl ejemplo, cheʼ bʌ jiñi i papá i cʼabaʼ Abías tsaʼ chʌmi (sajti) i tsaʼ waʼchoconti bajcheʼ yumʌl ‹tsiʼ yʌcʼʌ mandar ti Judá chaʼan maʼanic miʼ tsajcañob yambʌ dios, cojach lac Yum, i Dios i ñojteʼelob yicʼot chaʼan wersa yom miʼ chʌn jacʼbeñob i mandar tiʼ pejtelel ora› (2 Cr. 14:1-7). I cheʼ bʌ Zérah, jiñi etíope, tsaʼ cʼoti yicʼot 1 millón i soldadojob chaʼan miʼ contrajiñob Judá, Asá tsiʼ cʼʌñʌ i ñaʼtʌbal i tsiʼ cʼajtibe i coltaya Jehová: «C Yum Dios, maʼanic yambʌ cheʼ bajcheʼ jatet. Miʼ mejlel a coltan jini mach bʌ anic i pʼʌtʌlel. Coltañon lojon ti ili ora c Yum Dios, come yaʼ cʌyʌlon lojon ti a tojlel». Ili wen utsʼatax bʌ tʼan tsiʼ pʌsʌ chaʼan Asá tsaʼʌch i wen ñopo chaʼan Jehová mucʼʌch caj i coltañob, i Jehová tsaʼʌch i «jisa jini etiopejob» (2 Cr. 14:8-12).

13. ¿Chuqui tsaʼ wiʼil ujti tiʼ tojlel Asá, i chucoch?

¹³ Wocolʌch tsiʼ yubiyob cheʼ bʌ 1 millón soldadojob tsaʼ cʼoti i contrajiñob. Pero come Asá tsiʼ ñopo chaʼan Jehová mi caj i coltañob, jin chaʼan tsaʼ mʌjli i chaʼañob. Ti wiʼil, tsaʼʌch i ñusayob yambʌ wocol mach bʌ ñoj tsʌtsic. Cheʼ bʌ jiñi jontol bʌ rey i chaʼan Israel i cʼabaʼ Baasá tsaʼ cʼoti i contrajiñob, Asá tsiʼ cʼajtibe i coltaya jiñi rey i chaʼan Siria i maʼañic tsiʼ cʼajtibe i coltaya Jehová. Jin chaʼan tsaʼʌch i taja cabʌl wocol. Jehová tsiʼ cʼʌñʌ jiñi xʼaltʼan Hananí chaʼan miʼ suben Asá: «Tsaʼ bajñel colta a bʌ tiʼ tojlel jini rey ti Siria. Maʼanic tsaʼ cʼajti a coltʌntel ti lac Yum Dios. Jini chaʼan tsaʼix coli ti a cʼʌb i soldadojob jini rey ti Siria». Cʼʌlʌl ti jimbʌ ora Asá maʼañic tsaʼ ñʌjchʼi ti guerra (2 Cr. 16:7, 9; 1 R. 15:32).

14. a) ¿Bajcheʼ miʼ mejlel a pʌs chaʼan mucʼʌch a ñop chaʼan Jehová mi caj i coltañet? b) Cheʼ bajcheʼ miʼ yʌl 1 Timoteo 4:12, ¿chuqui ti wenlel mi caj a taj?

 ¹⁴ ¿Chuqui maʼ cʌn tiʼ yejemplo Asá? Chaʼan tiʼ pejtelel ora yom maʼ pʌs a pecʼlel yicʼot maʼ ñop chaʼan Jehová mi caj i coltañet. Cheʼ bʌ tsaʼ chʼʌmʌ jaʼ, Jehová tsiʼ pʌyʌyet ochel tiʼ familia come tsaʼ pʌsʌ chaʼan wen añʌch a ñopoñel yicʼot chaʼan maʼ ñop chaʼan mucʼʌch caj i coltañet. Jin chaʼan, mach yomic maʼ cʌy a cʼajtin a coltʌntel ti Jehová. Tajol mach wocolic maʼ wubin a mel iliyi cheʼ bʌ woli a ñaʼtan a mel ñumen ñuc bʌ i cʼʌjñibal. Pero yomʌch maʼ cʼajtiben i coltaya tiʼ pejtelel chuqui maʼ mel, tajol cheʼ bʌ maʼ ñaʼtan chuqui ti ñusaqʼuin mi caj a mel o jiñi a weʼtel o jiñi a wom bʌ a taj tac. Sʌclan principio tac muʼ bʌ i mejlel i coltañet i mach a bajñel mel jiñi muʼ bʌ a ñaʼtan (Pr. 3:5, 6). Cheʼ bajcheʼ ili, mi caj a wʌqʼuen i tijicñʌyel Jehová yicʼot mi caj i qʼueletob ti ñuc jiñi hermanojob (pejcan 1 Timoteo 4:12).

15. Cheʼ bajcheʼ miʼ yʌl 2 Crónicas 18:1-3 yicʼot 19:2, ¿baqui tac bʌ i sajtemal tsaʼ cʼoti i taj jiñi rey Jehosafat?

¹⁵ Come xmulilonla yicʼot mi lac mel mach bʌ weñic. Iliyi mach yomic i yʌl chaʼan maʼañic miʼ cajel a chaʼlen wersa a melben i yeʼtel Jehová. Laʼ lac tsʼitaʼ qʼuelben i yejemplo Jehosafat. Jehosafat an wen tac bʌ i melbal (chaʼlibal). Cheʼ tsiʼ teche yumʌntel «ti jumpʼejl i pusicʼal tsiʼ chʌn tsajca lac Yum i Dios i ñojteʼelob». Cheʼ jaʼel, tsiʼ choco majlel jiñi añoʼ bʌ i yeʼtel tac chaʼan miʼ cʌntesañob jiñi tejclum tac i chaʼan Judá tiʼ chaʼan bʌ Dios (2 Cr. 17:4, 7). Pero tsaʼʌch cʼoti i mel mach bʌ weñic jaʼel, i tiʼ caj iliyi juntiquil i wiñic Jehová tsiʼ yʌqʼue ticʼojel (pejcan 2 Crónicas 18:1-3; 19:2). Laʼ laj qʼuel chuqui miʼ mejlel a cʌn ti ili relato.

16. ¿Chuqui miʼ cʌntesañet jiñi i yexperiencia Rajeev?

¹⁶ Ñuc i cʼʌjñibal cheʼ bʌ maʼ chʼʌm ti ñuc jiñi ticʼojel muʼ bʌ a wʌqʼuentel. Cabʌl chʼitoñob wocol miʼ yubiñob chaʼan miʼ yʌcʼob ti ñaxan jiñi i melol i yeʼtel Jehová. Mi cheʼ woli a ñusan, mach lujbʼaquet. Ñaʼtan tsaʼ bʌ i ñusa juntiquil hermano i cʼabaʼ Rajeev. Rajeev miʼ chaʼ al tsaʼ bʌ i ñusa cheʼ bʌ chʼitonto: «Ti jimbʌ ora maʼañic mic ñaʼtan chuqui yom mic mel, mic mulan alas yicʼot c tijicñesan c bʌ cheʼ bajcheʼ miʼ melob jiñi yambʌ chʼitoñob i maʼañic mic wen mulan majlel ti tempa bʌ  yicʼot ti subtʼan». ¿Chuqui tsiʼ colta Rajeev? Miʼ yʌl chaʼan juntiquil anciano tsiʼ yʌqʼue utsʼatax bʌ ticʼojel: «Jiñi hermano tsiʼ coltayon c ñaʼtan jiñi principio am bʌ ti 1 Timoteo 4:8». Rajeev tsaʼʌch i jacʼʌ tiʼ pecʼlel jiñi ticʼojel i tsaʼʌch caji i ñaʼtan baqui bʌ jiñi ñaxam bʌ yom miʼ yʌcʼ tiʼ cuxtʌlel. Miʼ yʌl: «Tsaʼʌch c ñaʼta cʌcʼ ti ñaxan tij cuxtʌlel jiñi i chaʼan tac bʌ Dios». Rajeev miʼ yʌl chuqui ti wenlel tsiʼ taja: «Tsaʼ ñumi chaʼpʼej uxpʼejl jab cheʼ bʌ tsaʼ aqʼuentiyon jiñi ticʼojel i tsaʼ mejliyon ti ochel ti siervo ministerial».

17. ¿Chuqui miʼ ñaʼtañob jiñi hermanojob añobix bʌ i jabilel tiʼ tojlel jiñi chʼitoñob woli bʌ i melbeñob i yeʼtel Jehová?

¹⁷ Chʼiton, jiñi hermanojob añobix bʌ i jabilel miʼ wen qʼuelob ti ñuc cheʼ bʌ maʼ tem melben i yeʼtel Jehová yicʼotob (Sof. 3:9). Wen utsʼatax miʼ qʼuelob cheʼ bʌ jiñi eʼtel muʼ bʌ a wʌqʼuentel a mel, maʼ mel yicʼot a tijicñʌyel yicʼot a chʼejlel. Jiñi hermanojob miʼ qʼueletob ti ñuc yicʼot yujilob chaʼan wem bʌ chʼitoñet (1 Jn. 2:14).

18. Cheʼ bajcheʼ miʼ yʌl Proverbios 27:11, ¿chuqui miʼ ñaʼtan Jehová tiʼ tojlel jiñi chʼitoñob woli bʌ i melbeñob i yeʼtel?

¹⁸ Mach ñajʌyic a chaʼan chaʼan Jehová miʼ wen cʼuxbiñet yicʼot chaʼan miʼ ñop chaʼan wen chuqui miʼ cajel a mel. Jehová tsiʼ wʌn alʌ chaʼan ti cojix bʌ qʼuin yonlel xcolelob miʼ cajel i yʌcʼob i bʌ chaʼan miʼ melbeñob i yeʼtel (Sal. 110:1-2; 110:3, TNM). Jehová yujil chaʼan maʼ cʼuxbin yicʼot chaʼan a wom a wʌqʼuen jiñi ñumen wem bʌ ti a tojlel. Jin chaʼan, chʌn pʌsʌ a pijt tiʼ tojlel yambʌlob yicʼot ti a tojlel jaʼel. Mi tsaʼ mele mach bʌ weñic, chʼʌmʌ ti ñuc jiñi ticʼojel muʼ bʌ a wʌqʼuentel come tilemʌch ti Jehová (He. 12:6). Mele ti wen jiñi eʼtel muʼ bʌ a wʌqʼuentel. Pero yom bʌ maʼ ñumen acʼ ti ñuc jiñʌch cheʼ maʼ tijicñesʌben i pusicʼal Jehová (pejcan Proverbios 27:11).