1. ¿Chuqui utsʼatax bʌ mi caj i yujtel tiʼ tojlelob jiñi judíojob añoʼ bʌ ti Babilonia?

 WEN tijicña pejtelel lac piʼʌlob. Jehová tsiʼ «ñijcʌbe i pusicʼal Ciro», rey bʌ chaʼan Persia, chaʼan miʼ yʌcʼ ti loqʼuel jiñi israelitajob añix bʌ ora yaʼañob ti Babilonia. Jiñi rey tsiʼ yʌcʼʌ mandar chaʼan jiñi judíojob miʼ chaʼ sujtelob tiʼ lumal i miʼ chaʼ melob (pʌtob) jiñi i templo Jehová, jiñi i Dios Israel (Esd. 1:1, 3). ¡Wen utsʼatax bʌ noticia! Muqʼuix caj i chaʼ tojʼesʌntel i chʼujutesaya jiñi i sujm bʌ Dios ti jiñi lum tsaʼ bʌ i yʌqʼue i tejclum.

2. ¿Chuqui tsiʼ meleyob jiñi judíojob cheʼ bʌ tsaʼix cʼotiyob ti Jerusalén?

² Ti jiñi jabil 537 cheʼ bʌ maxto tilemic Cristo (m.t.C.) tsaʼ cʼotiyob jiñi ñaxam bʌ judíojob ti Jerusalén, jiñi i capital bʌ Judá ti wajali, jiñi yumʌntel am bʌ ti sur. Cheʼ bʌ tsaʼ cʼotiyob, ti ora tsaʼ cajiyob ti eʼtel (troñel), i ti jiñi jabil 536 tsaʼix i melbeyob i yebal jiñi templo.

3. ¿Chuqui ti wocol tsaʼ caji i ñusañob jiñi judíojob?

³ Pero cheʼ bʌ maxto jali cajel i melob jiñi templo, tsaʼ caji tsʌts bʌ contrajintel. Jiñi yambʌ tejclum tac tsaʼ caji i bʌcʼtesañob jiñi judíojob chaʼan miʼ cʌyob eʼtel ti templo (Esd. 4:4, 5). Mach weñix bajcheʼ woli (choncol) i ñusañob, pero tsaʼto ñumen tsʌtsʼa. Ti jiñi jabil 522 m.t.C. tsaʼ caji ti eʼtel yambʌ rey yaʼ ti Persia, jiñʌch Artajerjes. * Jiñi i contrajob jiñi judíojob tsiʼ qʼueleyob chaʼan miʼ mejlel i cʼʌñob iliyi chaʼan miʼ junyaj waʼchocoñob jiñi eʼtel cheʼ miʼ cʼʌñob jiñi mandar chaʼan miʼ ticʼlañob wiñicob (Sal. 94:20). Junchajp tsaʼ bʌ i yʌlʌyob jiñʌch chaʼan jiñi judíojob woli (yʌquel) i contrajiñob jiñi rey (Esd. 4:11-16). Artajerjes tsaʼʌch i ñopo jiñi lot tac i tsiʼ yʌlʌ chaʼan maʼañix miʼ bej mejlel jiñi templo (Esd. 4:17-23). Jin  chaʼan, tsaʼ cʌjyi ti mejlel jiñi eʼtel muʼ bʌ i wen aqʼuen i tijicñʌyel jiñi judíojob (Esd. 4:24).

4. ¿Chuqui tsiʼ mele Jehová cheʼ bʌ tsaʼ jumucʼ cʌjyi ti mejlel jiñi templo? (Isaías 55:11).

⁴ Jiñi yambʌ tejclum tac maʼañic bʌ miʼ chʼujutesañob Jehová yicʼot jiñi añoʼ bʌ i yeʼtel yaʼ ti Persia mach yomobic chaʼan miʼ bej mejlel jiñi templo. Pero Jehová yom chaʼan mucʼʌch i bej mejlel, i mucʼʌch i tsʼʌctesan jiñi yom bʌ (pejcan Isaías 55:11). ¿Chuqui tsiʼ mele (chaʼle)? Tsiʼ waʼchoco Zacarías bajcheʼ xʼaltʼan i an 8 chuqui tsiʼ pʌsbe. Ili chʼejl bʌ xʼaltʼan yom miʼ suben iliyi jiñi judíojob chaʼan miʼ ñuqʼuesʌbeñob i pusicʼal. Tiʼ coltaya iliyi mi caj i ñaʼtañob chaʼan mach yomic miʼ bʌcʼñañob jiñi i contrajob yicʼot chaʼan yom miʼ bej melob jiñi eʼtel tsaʼ bʌ i yʌqʼueyob Jehová chaʼan miʼ melob. Ti jiñi i joʼpʼejlel tsaʼ bʌ pʌsbenti Zacarías tsiʼ qʼuele jumpʼejl candelabro yicʼot chaʼtejc olivo.

5. ¿Chuqui mi caj laj qʼuel ti ili estudio?

⁵ Jiñi i joʼpʼejlel tsaʼ bʌ i qʼuele Zacarías tsaʼʌch i wen colta jiñi israelitajob ti jiñi bʌ ora. Ili ora, an i tajol ti lac pejtelel mi lac taj lac chʼijyemlel. Jin chaʼan, iliyi miʼ mejlel i coltañonla chaʼan mi lac bej melben i yeʼtel Jehová yicʼot lac xucʼtʌlel anquese mi laj contrajintel, cheʼ bʌ an chuqui miʼ qʼuextʌyel o cheʼ bʌ an chuqui mi lac subentel i maʼañic mi lac chʼʌmben i sujm.

6. ¿Bajcheʼ tsiʼ colta jiñi judíojob am bʌ ti Zacarías 4:1-3 (TNM)? (Qʼuele jiñi dibujo am bʌ tiʼ tejchibal).

⁶ (Pejcan Zacarías 4:1-3, TNM). * Jiñi tsaʼ bʌ qʼuejli chaʼan jiñi candelabro yicʼot jiñi chaʼtejc olivo tsiʼ colta jiñi judíojob chaʼan miʼ tajob i chʼejlel chaʼan miʼ lʌtʼob jiñi contrajintel. ¿Chucoch? Jiñi aceite muʼ bʌ i loqʼuel ti jiñi chaʼtejc olivo miʼ tempʌyel ti jumpʼejl colem tsima, ili miʼ coltan chaʼan maʼañic miʼ yʌjpel jiñi siete lámpara am bʌ i chaʼan jiñi candelabro. Yicʼot jiñi aceite muʼ bʌ i tempʌyel, maʼañic miʼ wis yʌjpel jiñi lámpara tac am bʌ i chaʼan jiñi candelabro. Zacarías tsiʼ cʼajtibe jiñi ángel: «¿Chuqui iliyi, c yum?». Jiñi ángel tiʼ sube albil bʌ i chaʼan Jehová: «‹Mach tiʼ pʼʌtʌlelic winicob, mi tiʼ ñaʼtibalic winicob mi caj i mejlel queʼtel, pero tiʼ pʼʌtʌlel quEspíritu›. Cheʼ tsiʼ yʌlʌ i Yum Panchan yicʼot Pañimil» (Zac. 4:4, 6). Jiñi aceite muʼ bʌ i loqʼuel yaʼ ti chaʼtejc teʼ i wentʌlelʌch jiñi i yespíritu Jehová, mach bʌ añic miʼ wis jilel. Ili yom i yʌl chaʼan jiñi soldadojob ti Persia maʼañic miʼ wis mejlel i lajibeñob i pʼʌtʌlel jiñi i yespíritu Jehová. Jiñi woli bʌ i chaʼ melob jiñi templo mucʼʌch i mejlel i lʌtʼob jiñi contrajintel yicʼot miʼ mejlel i yujtesañob jiñi eʼtel come añob i chaʼan i coltaya Jehová. ¡Wen utsʼatax jiñi! Yom jach miʼ ñopob ti Jehová yicʼot miʼ chaʼ chaʼleñob eʼtel. I jiñʌch tsaʼ bʌ i meleyob, anquese bej mʌctʌbilto.

7. ¿Chuqui tsaʼ ujti tsaʼ bʌ i colta jiñi judíojob?

⁷ Pero an chuqui tsaʼ qʼuextʌyi tsaʼ bʌ i colta jiñi judíojob. Ti jiñi jabil 520 m.t.C. tsaʼ caji ti yumʌntel yambʌ rey yaʼ ti Persia jiñʌch Darío I. Cheʼ bʌ chaʼpʼejlix jab i cajel ti yumʌntel tsiʼ qʼuele chaʼan tsaʼ jach toʼol mʌctʌnti jiñi eʼtel yaʼ ti templo, jin chaʼan tsiʼ yʌlʌ chaʼan miʼ bej mejlel (Esd. 6:1-3). Wen utsʼatax jiñi noticia, pero an chuqui yambʌ tsaʼ ujti. Jiñi rey tiʼ sube jiñi yambʌ tejclum tac am bʌ ti lʌcʼʌl chaʼan miʼ cʌy i mʌctañob jiñi judíojob i miʼ yʌqʼueñob taqʼuin yicʼot chuqui tac i cʼʌjñibal i chaʼañob chaʼan miʼ chaʼleñob eʼtel (Esd. 6:7-12). Cheʼ bajcheʼ jiñi, pʼis ñumen ti chʌmpʼejl jab tsaʼ ujti i melob jiñi templo, ti jiñi jabil 515 (Esd. 6:15).

8. ¿Chucoch miʼ mejlel a pʌs a chʼejlel anquese maʼ contrajintel?

 ⁸ Ili ora cabʌl i wiñicob Jehová miʼ tsʼaʼlentelob jaʼel. An chumuloʼ bʌ baqui mʌctʌbil jiñi eʼtel. Yaʼi tajol miʼ chujquelob i miʼ pʌjyelob majlel «tiʼ tojlel gobernadorob yicʼot reyob», ili miʼ mejlel i yʌcʼ chaʼan miʼ cʌjñel jiñi wen tʼan (Mat. 10:17, 18). An i tajol miʼ tojʼan jiñi wocol cheʼ bʌ miʼ qʼuextʌyel jiñi yumʌl. O tajol juntiquil juez an chuqui miʼ yʌl muʼ bʌ i coltan jiñi eʼtel. An yambʌ Testigojob muʼ bʌ i ñusañob yambʌ wocol. Chumulob ti jumpʼejl país baqui librejobʌch chaʼan miʼ chʼujutesañob Jehová, pero jiñi i familiajob miʼ ñopob i mʌctan (Mat. 10:32-36). Pero an i tajol cheʼ bʌ jiñi i familiajob miʼ qʼuelob chaʼan maʼañic mi caj i mʌjlelob i chaʼan, miʼ cʌy i mʌctañob. An wen jontoloʼ (mañajoʼ) bʌ ti ñaxan, pero miʼ sujtelob ti chʼejl bʌ Testigojob. Jin chaʼan, mach yomic maʼ lujbʼan cheʼ bʌ maʼ tsʼaʼlentel. Yom chʼejlet. An a chaʼan i coltaya Jehová yicʼot jiñi chʼujul bʌ i yespíritu, ¡jin chaʼan maʼañic chuqui yom maʼ bʌcʼñan!

9. ¿Chucoch an judíojob tsaʼ bʌ i yubiyob i chʼijyemlel cheʼ bʌ tsaʼ melbenti i yebal jiñi tsijiʼ bʌ templo?

⁹ An judíojob ñumen ñoxobix bʌ tsaʼ bʌ cajiyob ti uqʼuel cheʼ bʌ tsaʼ melbenti i yebal jiñi templo (Esd. 3:12). Tsiʼ wen ubiyob i chʼijyemlel cheʼ bʌ tsiʼ qʼueleyob chaʼan ili templo mach lajalic i ñuclel bajcheʼ jiñi tsaʼ bʌ i mele Salomón (Hag. 2:2, 3). ¿Bajcheʼ miʼ mejlel i coltañob tsaʼ bʌ i qʼuele Zacarías chaʼan miʼ chaʼ tajob i tijicñʌyel?

10. ¿Bajcheʼ tsiʼ colta chaʼan miʼ chaʼ tajob i tijicñʌyel jiñi judíojob jiñi tsaʼ bʌ i yʌlʌ jiñi ángel ti Zacarías 4:8-10 (TNM)?

¹⁰ (Pejcan Zacarías 4:8-10, TNM). * ¿Chuqui yom i yʌl jiñi ángel cheʼ bʌ tsiʼ yʌlʌ chaʼan jiñi judíojob mi caj i yubiñob i tijicñʌyel yicʼot chaʼan mi caj i qʼuelob jiñi plomo tiʼ cʼʌb Zorobabel? Jiñi plomo jumpʼejlʌch eʼtijibʌl muʼ bʌ i cʼʌjñel ti construcción chaʼan miʼ qʼuejlel mi tojʌch waʼal jiñi woli bʌ i mejlel. Jin chaʼan, jiñi ángel woliʼ suben jiñi i tejclum Dios chaʼan mucʼʌch caj i yujtesʌntel jiñi templo i mi caj i tsʼʌctesan chuqui miʼ cʼajtin Jehová anquese an mach bʌ wen ñuquic miʼ qʼuelob jiñi templo. Mi Jehová tijicña mi caj i yubin chaʼan bajcheʼ mi caj i cʌytʌl, ¿chucoch mach tijicñayic mi caj  i yubiñob i bʌ jiñi judíojob? Jiñi ñumen ñuc bʌ i cʼʌjñibal tiʼ tojel Jehová jiñʌch cheʼ ti jiñi tsijiʼ bʌ templo miʼ chʼujutesañob cheʼ bajcheʼ miʼ mulan. Jin chaʼan, jiñi judíojob mi caj i chaʼ ubiñob i tijicñʌyel mi mucʼʌch i chaʼleñob wersa chaʼan miʼ chʼujutesañob Jehová cheʼ bajcheʼ miʼ mulan yicʼot chaʼan utsʼat miʼ qʼuejlelob.

11. ¿Chuqui wocol bʌ miʼ yubiñob chaʼtiqui uxtiquil i wiñicob Jehová?

¹¹ An wocol bʌ mi la cubin cheʼ bʌ an chuqui miʼ qʼuextʌyel. Cabʌlob cabʌlix jab cajel i melbeñob i yeʼtel Jehová ti tsʼʌcʌl tsaʼ bʌ qʼuextʌbentiyob i yasignación. I an yañoʼ bʌ tsaʼ bʌ i cʌyʌyob jumpʼejl i privilegio muʼ bʌ i wen mulañob tiʼ caj ñoxobix. I tilelʌch cheʼ bʌ mi la cubin lac chʼijyemlel. Tajol maʼañic mi lac mulan jiñi tsaʼ bʌ ujti ti lac tojlel o mach weñic mi laj qʼuel. Yicʼot mi laj cʼajtesan bajcheʼ miʼ mejlel ti wajali. Tajol mi caj la cubin lac chʼijyemlel come mi lac ñaʼtan chaʼan maʼañix chuqui miʼ wen mejlel lac mel (Pr. 24:10). Laʼ laj qʼuel bajcheʼ miʼ mejlel i coltañonla tsaʼ bʌ pʌsbenti Zacarías chaʼan ñumen wen mi lac bej melben i yeʼtel Jehová.

12. ¿Bajcheʼ miʼ coltañonla tsaʼ bʌ pʌsbenti Zacarías chaʼan maʼañic mi la cubin lac chʼijyemlel cheʼ bʌ an chuqui miʼ qʼuextʌyel?

¹² Junchajp muʼ bʌ caj i coltañonla jiñʌch cheʼ mi laj qʼuel jiñi muʼ bʌ i yujtel cheʼ bajcheʼ yilal miʼ qʼuel Jehová. Cabʌl chuqui ñuc bʌ woliʼ mel ili ora, i an lac chaʼan jiñi ñuc bʌ majtañʌl chaʼan mi lac chaʼlen eʼtel la quicʼot (1 Cor. 3:9). Jiñi eʼtel tac am bʌ lac chaʼan miʼ mejlel ti qʼuextʌyel, pero maʼañic baʼ ora mi caj i qʼuextʌyel jiñi i cʼuxbiya Jehová ti lac tojlel. Jin chaʼan, mi an chuqui miʼ qʼuextan jiñi organización i miʼ tajet jaʼel, mach a chʌn ñaʼtan chucoch tsaʼ ujti jiñi. Mach a chʌn cʼajtesan «jiñi qʼuin tac tsaʼix bʌ ñumi», cʼajtiben Dios chaʼan miʼ coltañet a qʼuel chuqui tac wem bʌ ti jiñi tsaʼ bʌ qʼuextʌyi (Ec. 7:10, TNM). Mach a chʌn ñaʼtan jiñi maʼañic bʌ miʼ mejlel a mel, acʼʌ a ñaʼtʌbal ti chuqui tac mucʼʌch bʌ i mejlel a mel. Jiñi tsaʼ bʌ pʌsbenti Zacarías miʼ pʌsbeñonla chaʼan wen ñuc i cʼʌjñibal cheʼ mi lac ñaʼtan chuqui wem bʌ chaʼan chʌn tijicñayonla yicʼot xucʼul mi la cajñel anquese an chuqui miʼ qʼuextʌyel.

13. ¿Chucoch tajol an judíojob tsaʼ bʌ i ñaʼtayob chaʼan mach weñic cheʼ tsaʼ caji ti bej mejlel jiñi templo?

¹³ Anquese bej mʌctʌbilto jiñi eʼtel ti templo, jiñi ñumen ñuc bʌ sacerdote Jesúa (Josué) yicʼot jiñi gobernador Zorobabel, jiñi  añoʼ bʌ tiʼ wenta jiñi tejclum, «tsaʼ chaʼ cajiʼ i melob i Templo Dios» (Esd. 5:1, 2). Tajol an judíojob tsaʼ bʌ i ñaʼtayob chaʼan mach weñic iliyi, come jiñi i contrajob mi caj i qʼuelob i mi caj i chaʼleñob wersa chaʼan miʼ mʌctañob jiñi eʼtel. Josué yicʼot Zorobabel, jiñi añoʼ bʌ tiʼ wenta jiñi eʼtel, yom i ñaʼtañob mi Jehová wolʌch i coltañob. I Jehová tsaʼʌch i yʌqʼueyob chuqui tac i cʼʌjñibal i chaʼañob. Laʼ laj qʼuel bajcheʼ.

14. ¿Chuqui tsiʼ pʌsbe jiñi ñumen ñuc bʌ sacerdote Josué yicʼot jiñi gobernador Zorobabel muʼ bʌ i yʌl Zacarías 4:12, 14 (TNM)?

¹⁴ (Pejcan Zacarías 4:12, 14, TNM). * Ilayi jiñi ángel tiʼ sube jiñi xʼaltʼan chaʼan jiñi chaʼtejc olivo «jiñobʌch jiñi chaʼtiquil yajcʌbiloʼ bʌ»: Josué yicʼot Zorobabel. Miʼ yʌl chaʼan jiñi chaʼtiquil wiñicob lajal bajcheʼ waʼaloʼ bʌ tiʼ tʼejl Jehová, jiñi i Yum i petol Pañimil. Ili miʼ pʌs chaʼan Jehová mucʼʌch i wen ñop tiʼ tojlelob. Jin chaʼan, jiñi yambʌ judíojob mucʼʌch i mejlel i ñopob chaʼan weñʌch chuqui miʼ ñaʼtañob i mel come Jehová woliʼ cʼʌñob chaʼan miʼ coltañob jiñi i tejclum.

15. ¿Bajcheʼ mi lac pʌs chaʼan mucʼʌch laj qʼuel ti ñuc muʼ bʌ i subeñonla Jehová tiʼ Tʼan?

¹⁵ Junchajp bajcheʼ miʼ bej coltan Jehová jiñi i tejclum ili ora jiñʌch tiʼ Tʼan. Yaʼi miʼ subeñonla bajcheʼ yom mi lac chʼujutesan. ¿I bajcheʼ mi lac pʌs chaʼan mucʼʌch laj qʼuel ti ñuc muʼ bʌ i subeñonla yaʼ tiʼ Tʼan? Jiñʌch cheʼ mi la cʌqʼuen i yorajlel chaʼan mi lac wen pejcan yicʼot mi lac chʼʌmben i sujm. Cʼajtiben a bʌ: «Cheʼ bʌ mic pejcan jiñi Biblia o jiñi lac jun tac, ¿muʼ ba c jumucʼ waʼtʌl chaʼan mic wen ñaʼtan jiñi woli bʌ c pejcan? ¿Muʼ ba c sʌclan jiñi ‹wocol bʌ ti chʼʌmbentel i sujm›? ¿O mucʼ jach c pam pejcan jiñi información?» (2 Ped. 3:16). Mi mucʼʌch la cʌqʼuen i yorajlel chaʼan mi lac wen ñaʼtan muʼ bʌ i pʌsbeñonla Jehová, mi caj i mejlel lac jacʼ muʼ bʌ i subeñonla yicʼot lac tsʼʌctesan la queʼtel (1 Tim. 4:15, 16).

16. ¿Chuqui mi caj i coltañonla chaʼan mi lac jacʼ muʼ bʌ i subeñonla «jiñi xucʼul bʌ xyaj eʼtel wen am bʌ i ñaʼtʌbal» anquese maʼañic mi lac wen chʼʌmben i sujm?

¹⁶ Yambʌ woli bʌ i cʼʌn Jehová chaʼan miʼ coltan jiñi i tejclum jiñʌch «jiñi xucʼul bʌ xyaj eʼtel wen am bʌ i ñaʼtʌbal» (Mat. 24:45). Tajol jiñi xucʼul bʌ xyaj eʼtel an chuqui miʼ subeñonla lac mel, pero maʼañic mi lac wen ñaʼtan chucoch. Jumpʼejl ejemplo, tajol miʼ subeñonla chuqui yom mi lac mel cheʼ bʌ miʼ yujtel jumpʼejl wocol  cheʼ bajcheʼ yujquel, butʼjaʼ o yan tac bʌ, pero mi lac ñaʼtan chaʼan jiñi mach ujtic baqui chumulonla. O tajol mi lac ñaʼtan chaʼan ñumeñix ti pʼis chuqui woliʼ subeñonla chaʼan bajcheʼ yom mi laj cʌntan lac bʌ ti jumpʼejl pandemia. Cheʼ jiñi, ¿chuqui yom mi lac mel mi mach ñoj weñic mi laj qʼuel jiñi muʼ bʌ lac subentel? Tajol yom mi laj cʼajtesan bajcheʼ tsiʼ tajayob i wenlel jiñi judíojob cheʼ tsaʼʌch i jacʼʌyob tsaʼ bʌ i subeyob Josué yicʼot Zorobabel. Cheʼ jaʼel, miʼ mejlel lac ñaʼtan yan tac bʌ relato pejcʌbil bʌ lac chaʼan. ¡Dios mach junsujtelic jach tiʼ sube jiñi i wiñicob chuqui tac yom miʼ melob anquese mach weñic tiʼ tojlel lac piʼʌlob, pero tsaʼʌch i coltayob! (Jue. 7:7; 8:10).

17. ¿Bajcheʼ tsiʼ colta jiñi judíojob jiñi tsaʼ bʌ qʼuejli chaʼan jiñi candelabro yicʼot jiñi chaʼtejc olivo?

¹⁷ Tajol mach cabʌlic tsaʼ bʌ i qʼuele Zacarías ti jiñi i joʼpʼejlel tsaʼ bʌ pʌsbenti, pero tsaʼʌch i colta jiñi judíojob chaʼan wen miʼ qʼuelob jiñi eʼtel woli bʌ i melob yicʼot jiñi i chʼujutesaya. I cheʼ bʌ tsiʼ meleyob tsaʼ bʌ i qʼuele Zacarías, tsiʼ yubiyob chaʼan Jehová woliʼ coltañob yicʼot woliʼ tojʼesañob yicʼot cʼuxbiya. Jehová tsiʼ cʼʌñʌ jiñi chʼujul bʌ i yespíritu chaʼan miʼ bej melob jiñi eʼtel yicʼot miʼ chaʼ tajob i tijicñʌyel (Esd. 6:16).

18. ¿Bajcheʼ mi caj i coltañet tsaʼ bʌ i qʼuele Zacarías?

¹⁸ Miʼ mejlel i coltañonla ti laj cuxtʌlel jiñi tsaʼ bʌ qʼuejli chaʼan jiñi candelabro yicʼot jiñi chaʼtejc olivo. Cheʼ bajcheʼ tsaʼix laj qʼuele, miʼ mejlel i yʌqʼueñonla lac pʼʌtʌlel cheʼ bʌ mi lac tsʼaʼlentel, lac tijicñʌyel cheʼ bʌ an chuqui miʼ qʼuextʌyel yicʼot chaʼan mi lac ñop cheʼ bʌ an chuqui mi lac subentel lac mel anquese maʼañic mi lac chʼʌmben i sujm. ¿I chuqui yom maʼ mel cheʼ bʌ miʼ tajet wocol? Ñaxan, qʼuele tsaʼ bʌ i qʼuele Zacarías, qʼuele chuqui tac miʼ pʌs chaʼan Jehová woliʼ cʌntan i tejclum. Cheʼ jiñi mele cheʼ bajcheʼ tsaʼ qʼuele: Ñopo ti Jehová i bej chʼujutesan tiʼ pejtelel a pusicʼal (Mat. 22:37). Cheʼ bajcheʼ jiñi, Jehová mi caj i coltañet chaʼan maʼ melben i yeʼtel yicʼot a tijicñʌyel tiʼ pejtelel ora (Col. 1:10, 11).