1. ¿Baqui bʌ jiñi chaʼchajp muʼ bʌ i mejlel lac ñop?

JEHOVÁ miʼ cʼuxbin jiñi muʼ bʌ i melbeñob (chaʼlebeñob) i yeʼtel. Cheʼʌch an i mele cʼʌlʌl wajali, i cheʼʌch mi caj i bej mel. Cheʼ jaʼel, miʼ cʼuxbin jiñi i melol chuqui toj (Sal. 33:5). Jin chaʼan miʼ mejlel lac ñop ili chaʼchajp. Ñaxam bʌ, chaʼan Dios cʼux miʼ yubin cheʼ miʼ yilan wocol jiñi i wiñicob. I chaʼpʼejlel, chaʼan mi caj i chʼʌm tiʼ wenta chaʼan miʼ mejlel chuqui toj. Yaʼ ti ñaxam bʌ chaʼan jiñi chʌmpʼejl temaj woli (choncol) bʌ laj qʼuel tilel, * tsaʼ laj cʌñʌ chaʼan jiñi Mandar tsaʼ bʌ i yʌqʼue Dios jiñi tejclum Israel chucul ti cʼuxbiya i miʼ ñijcʌben i pusicʼal tiʼ pejtelelob chaʼan miʼ melob chuqui toj, jinto tiʼ tojlel jiñi maʼañic bʌ i coltʌntelob (Dt. 10:18). Ili Mandar miʼ pʌs chaʼan Jehová miʼ wen chʼʌm ti ñuc jiñi muʼ bʌ i chʼujutesañob.

2. ¿Chuqui ti cʼajtiya tac mi caj lac jacʼ?

² Jiñi i Mandar Moisés tsaʼ jili i cʼʌjñibal cheʼ ti jabil 33, cheʼ bʌ tsaʼ waʼchoconti jiñi ñaxam bʌ congregación. Pero ¿yom ba i yʌl chaʼan maʼañix jumpʼejl mandar chucul bʌ ti cʼuxbiya yicʼot i melol chuqui toj chaʼan miʼ coltan jiñi xñoptʼañob? Mach cheʼiqui. Jiñi xñoptʼañob añob i chaʼan tsijiʼ bʌ mandar. Ti ili temaj mi caj lac ñaxan qʼuel baqui bʌ ili tsijib mandar, i ti wiʼil mi caj lac jacʼ ili cʼajtiya tac: ¿Chucoch mi la cʌl chaʼan ili mandar chucul ti cʼuxbiya? ¿Chucoch miʼ mejlel la cʌl chaʼan miʼ yʌcʼ ti melol chuqui toj? Yicʼot ili mandar, ¿bajcheʼ yom miʼ pʌsob i melbal jiñi añoʼ bʌ i yeʼtel tiʼ tojlel yambʌlob?

3. ¿Chuqui ochem ti jiñi «i mandar Cristo» cheʼ bajcheʼ miʼ yʌl Gálatas 6:2?

³ (Pejcan Gálatas 6:2). Jiñi xñoptʼañob chuculob ti «i mandar Cristo». Jesús maʼañic tiʼ tsol tsʼijbu pejtelel jiñi mandar tac yom bʌ miʼ tsajcañob jiñi xcʌntʼañob i chaʼan, pero tsaʼʌch i yʌqʼueyob cʌntesa tac, mandar yicʼot principio tac yom bʌ miʼ jacʼob. Pejtelel i cʌntesa Jesús yaʼʌch ochem ti jiñi «i mandar Cristo». Chaʼan mi lac ñumen chʼʌmben i sujm, laʼ lac jacʼ chaʼpʼej uxpʼejl cʼajtiya tac.

4, 5. a) ¿Bajcheʼ tsiʼ chaʼle cʌntesa Jesús? b) ¿Baqui ora tsiʼ mele?

⁴ ¿Bajcheʼ tsiʼ cʌntesa Jesús jiñi wiñicob xʼixicob (quixtañujob)? Ñaxan, yicʼot i tʼan. Añʌch i pʼʌtʌlel come jiñʌch miʼ cʌntesan i sujmlel tiʼ tojlel Dios, chaʼan i sujmlel laj cuxtʌlel, i chaʼan cojach jiñi i Yumʌntel Dios miʼ mejlel i lajmesʌben i wocol jiñi quixtañujob (Lc. 24:19). Jesús tsiʼ chaʼle cʌntesa yicʼot i melbal. Cheʼ bajcheʼ tsaʼ chumle tsiʼ pʌsʌ bajcheʼ yom miʼ yajñelob jiñi xcʌntʼañob i chaʼan (Jn. 13:15).

⁵ ¿Baqui ora tsiʼ chaʼle cʌntesa Jesús? Cheʼ bʌ tsiʼ chaʼle subtʼan ila ti Pañimil (Mt. 4:23). Tsiʼ cʌntesa jiñi xcʌntʼañob i chaʼan cheʼ bʌ maxto jalic i chaʼ cuxtʌyel. Jumpʼejl ejemplo, tsiʼ pʌsʌ i bʌ tiʼ tojlel junmojt quixtañujob, tajol ñumen ti 500, i tiʼ subeyob chaʼan miʼ sujtesañob ti xcʌntʼan yambʌ quixtañujob (Mt. 28:19, 20; 1 Co. 15:6). Jesús jiñʌch i Jol jiñi congregación, jin chaʼan tsiʼ bej cʌntesa jiñi xcʌntʼañob cheʼ bʌ majlemix ti panchan. Jumpʼejl ejemplo, cheʼ ti jabil 96, tiʼ tojlel jiñi apóstol Juan tsiʼ ñuqʼuesʌbe i pusicʼal yicʼot tsiʼ yʌqʼue ticʼojel jiñi xñoptʼañob bombiloʼ bʌ (Col. 1:18; Ap. 1:1).

6, 7. a) ¿Baqui tsaʼ tsʼijbunti cʌytʌl i cʌntesa Jesús? b) ¿Chuqui yom mi lac mel chaʼan mi lac jacʼben i mandar Cristo?

⁶ ¿Baqui tsaʼ tsʼijbunti cʌytʌl i cʌntesa Jesús? Jiñi chʌmpʼejl Evangelio miʼ pʌs pejtelel chuqui tsiʼ mele yicʼot tsiʼ yʌlʌ wʌʼ ti Pañimil. Jiñi yan tac bʌ libro am bʌ yaʼ ti Tsʼijbujel Griego miʼ coltañonla lac ñumen chʼʌmben i sujm i pensar Jesús, come jiñi xtsʼijbayajob tsaʼ coltʌntiyob ti chʼujul bʌ espíritu yicʼot añob i chaʼan «i ñaʼtʌbal Cristo» (1 Co. 2:16).

⁷ Muʼ bʌ laj cʌn. Jiñi i cʌntesa Jesús miʼ luʼ  cʼʌjñibʌyel ti laj cuxtʌlel. Jin chaʼan, jiñi i mandar Cristo miʼ cʼʌjñibʌyel lac chaʼan ti la cotot, ti la queʼtel (troñel), ti escuela yicʼot ti congregación. Ili mandar mi laj cʌn cheʼ mi lac pejcan jiñi Tsʼijbujel Griego i mi lac wen ñaʼtan. Mi lac jacʼ cheʼ mi lac pʌs ti lac melbal muʼ bʌ i yʌjlel yaʼ ti cʌntesa tac, mandar yicʼot principio tac muʼ bʌ lac taj ti Biblia. Cheʼ mi lac jacʼ jiñi i mandar Cristo, woli (yʌquel) lac jacʼben i tʼan jiñi cʼuxbibil bʌ lac Dios, Jehová, baqui chʼoyol pejtelel i cʌntesa Jesús (Jn. 8:28).

8. ¿Baqui chucul jiñi i mandar Cristo?

⁸ Jiñi chumuloʼ bʌ ti jumpʼejl otot wen bʌ waʼchocobil yicʼot wen melbil i yebal, maʼañobic i bʌqʼuen. Cheʼʌch miʼ yujtel jaʼel tiʼ tojlel muʼ bʌ i jacʼob jumpʼejl wem bʌ mandar utsʼat bʌ baqui chucul. I jiñi i mandar Cristo wen utsʼat baqui chucul: Ti cʼuxbiya. ¿Chucoch mi la cʌl bajcheʼ jiñi?

9, 10. a) ¿Chuqui tac ti ejemplo miʼ pʌs chaʼan pejtelel chuqui tsiʼ mele Jesús chaʼañʌch i cʼuxbiya? b) ¿Bajcheʼ miʼ mejlel lac lajin?

⁹ Ñaxan, come pejtelel chuqui tsiʼ mele Jesús chaʼañʌch i cʼuxbiya. Jiñi pʼuntaya jiñʌch junchajp bajcheʼ miʼ pʌstʌl jiñi cʼuxbiya, i jiñʌch tsaʼ bʌ i ñijca Jesús chaʼan miʼ cʌntesan cabʌl quixtañujob, miʼ cʼoqʼuesan cʼamoʼ bʌ, miʼ weʼsan jiñi wiʼñaloʼ bʌ yicʼot miʼ chaʼ cuxtesan jiñi chʌmeñoʼ bʌ (Mt. 14:14; 15:32-38; Mr. 6:34; Lc. 7:11-15). Chaʼan miʼ mel pejtelel iliyi, tsaʼʌch i cʼʌñʌ i pʼʌtʌlel yicʼot i yorajlel am bʌ i chaʼan, pero tiʼ tijicñʌyel i pusicʼal tsiʼ ñaxan acʼʌ ti ñuc chuqui i cʼʌjñibal i chaʼan yambʌlob. I cheʼ bʌ tsiʼ yʌcʼʌ i cuxtʌlel ti lac tojlel tsiʼ pʌsʌ jiñi ñumen ñuc bʌ i cʼuxbiya (Jn. 15:13).

¹⁰ Muʼ bʌ laj cʌn. Miʼ mejlel lac lajin Jesús cheʼ mi la cʌcʼ ti ñaxan chuqui i cʼʌjñibal i chaʼan yambʌlob.Yicʼot cheʼ mi lac pʌs lac pʼuntaya tiʼ tojlel jiñi quixtañujob ti lac territorio. Cheʼ bʌ jiñi lac pʼuntaya miʼ ñijcañonla chaʼan mi lac subeñob jiñi wen tʼan yicʼot mi laj cʌntesan jiñi yambʌlob, woli lac jacʼ i mandar Cristo.

11, 12. a) ¿Bajcheʼ la cujil chaʼan Jehová miʼ wen chʼʌmonla ti ñuc? b) ¿Bajcheʼ miʼ mejlel lac lajin i cʼuxbiya Jehová?

¹¹ I chaʼpʼejlel, come Jesús tsiʼ yʌcʼʌ ti cʌjñel i cʼuxbiya i Tat. Cheʼ bʌ tsiʼ chaʼle subtʼan, tsiʼ pʌsʌ chaʼan Jehová mucʼʌch i chʼʌm ti ñuc i wiñicob. Jumpʼejl ejemplo, tsiʼ pʌsʌ chaʼan ti jujuntiquilonla Jehová miʼ qʼuelonla ti ñuc (Mt. 10:31). Cheʼ jaʼel, tsiʼ pʌsʌ chaʼan Jehová miʼ pijtan chaʼan jiñi tsaʼ bʌ i chaʼle mulil miʼ tojʼesan i melbal i miʼ chaʼ sujtel yaʼ ti congregación (Lc. 15:7, 10). I tsiʼ yʌlʌ chaʼan Dios tsiʼ pʌsʌ i cʼuxbiya ti lac tojlel cheʼ bʌ tsiʼ yʌcʼʌ i Yalobil chaʼan miʼ coltañonla (Jn. 3:16).

¹² Muʼ bʌ laj cʌn. ¿Bajcheʼ miʼ mejlel lac lajiben i cʼuxbiya Jehová? (Ef. 5:1, 2). Jiñʌch cheʼ mi lac wen qʼuel ti ñuc jiñi la quermañojob i cheʼ mi lac pʌsbeñob lac tijicñʌyel jiñi muʼ bʌ i chaʼ sujtelob ti Jehová (Sal. 119:176). Mi lac pʌs chaʼan mucʼʌch laj cʼuxbin la quermañojob cheʼ mi la cʌcʼ lac bʌ tiʼ tojlelob, miʼ mejlel laj coltañob cheʼ an chuqui i cʼʌjñibal i chaʼañob (1 Jn. 3:17). Cheʼ mi lac pʌsben cʼuxbiya jiñi yambʌlob, woli lac jacʼben i mandar Cristo.

13, 14. a) ¿Baqui bʌ i mandar Jesús mi lac taj yaʼ ti Juan 13:34, 35, i chucoch tsijib? b) ¿Bajcheʼ mi lac jacʼ jiñi tsijib mandar?

¹³ I yuxpʼejlel, come Jesús tiʼ sube jiñi xcʌntʼañob i chaʼan chaʼan yom miʼ pʌsob jiñi ñuc bʌ cʼuxbiya (pejcan Juan 13:34, 35). Ili mandar tsijibʌch come mach yaʼic ochem ti jiñi Mandar tsaʼ bʌ i yʌqʼue Dios jiñi israelob. Jesús tsiʼ yʌlʌ chaʼan yom mi laj cʼuxbin la quermañojob cheʼ bajcheʼ tsiʼ cʼuxbiyonla. Ñumento yom mi laj cʼuxbiñob cheʼ bajcheʼ mi laj cʼuxbin lac bʌ, jumpʼejl cʼuxbiya muʼto bʌ i ñijcañonla la cʌcʼ laj cuxtʌlel tiʼ tojlelob, cheʼ bajcheʼ tsiʼ mele  Jesús. Chaʼan mi lac mel iliyi yomʌch an lac chaʼan jiñi ñuc bʌ cʼuxbiya. *

¹⁴ Muʼ bʌ laj cʌn. ¿Bajcheʼ mi lac jacʼ jiñi tsijib mandar? Jiñʌch cheʼ mi la cʌcʼ lac bʌ tiʼ tojlel la quermañojob. Jiñi laj cʼuxbiya miʼ ñijcañonla lac mel chuqui ñuc bʌ tiʼ tojlelob, bajcheʼ la cʌcʼ laj cuxtʌlel. Pero cheʼ jaʼel, mi lac mel chuqui tac mach wen ñuquic yilal. Jumpʼejl ejemplo, tajol mi lac mejlel ti ñumel lac taj juntiquil hermano añix bʌ i jabilel cheʼ mi lac majlel ti tempa bʌ, mi laj cʌy lac mel chuqui mi lac mulan chaʼan wen miʼ qʼuelonla juntiquil la quermaño o mi laj cʼʌn lac vacación chaʼan mi lac chaʼlen coltaya baqui tsaʼ ujti wocol. Cheʼ mi lac mel tac iliyi, woli lac jacʼben i mandar Cristo i mi lac chaʼlen coltaya chaʼan tijicña miʼ yajñel jujuntiquil yaʼ ti congregación.

15-17. a) ¿Bajcheʼ tsiʼ pʌsʌ i melbal tac Jesús chaʼan ñuc miʼ qʼuel jiñi i melol chuqui toj? b) ¿Bajcheʼ miʼ mejlel lac lajin Jesús?

¹⁵ Yaʼ ti Biblia, jiñi i melol chuqui toj yom i yʌl chaʼan mi lac mel chuqui miʼ yʌl Dios chaʼan utsʼat, i mach yajcʌbilic majqui mi lac pʌsben. ¿Chucoch mi la cʌl chaʼan jiñi i mandar Cristo miʼ yʌcʼ ti melol chuqui toj?

¹⁶ Ñaxan, laʼ laj qʼuel bajcheʼ tsiʼ pʌsʌ jiñi i melbal tac Jesús chaʼan miʼ qʼuel ti ñuc i melol chuqui toj. Ti jimbʌ ora, jiñi judíojob ñucoʼ bʌ i yeʼtel ti ñopbalʌl miʼ tsʼaʼleñob jiñi quixtañujob chʼoyoloʼ bʌ ti yan tac bʌ tejclum, miʼ pʼajob jiñi maʼañobic bʌ i cʌntesʌntel tiʼ ñopbalob yicʼot maʼañic miʼ qʼuelob ti ñuc jiñi xʼixicob. Pero Jesús toj chuqui tsiʼ mele tiʼ tojlelob i junlajal bajcheʼ tsiʼ qʼueleyob. Maʼañic tsiʼ pʼaja jiñi chʼoyoloʼ bʌ ti yambʌ tejclum tsaʼ bʌ i ñopoyob tiʼ tojlel (Mt. 8:5-10, 13). Junlajal tiʼ sube wen tʼan tiʼ pejtelel quixtañujob, jiñi añoʼ bʌ i taqʼuin yicʼot jiñi pʼumpʼuñoʼ bʌ (Mt. 11:5; Lc. 19:2, 9). Maʼañic tsiʼ pʼaja jiñi xʼixicob mi tsaʼic i pejcayob ti tsʌts bʌ tʼan. Tsiʼ pʌsʌ i yutslel tiʼ tojlelob yicʼot tsiʼ qʼueleyob ti ñuc, jinto jaʼel tiʼ tojlel jiñi xʼixicob mach bʌ yomobic i qʼuejlel (Lc. 7:37-39, 44-50).

¹⁷ Muʼ bʌ laj cʌn. Miʼ mejlel lac lajin Jesús cheʼ junlajal mi laj qʼuel yambʌlob yicʼot cheʼ mi lac suben wen tʼan majqui jach miʼ ñʌchʼtañonla, mach yʌlʌyic mi wen añob i taqʼuin o mi pʼumpʼuñob, o mi yambʌlob i ñopbal. Jiñi hermanojob miʼ lajiñob Jesús cheʼ miʼ qʼuelob ti ñuc jiñi xʼixicob. Cheʼ mi lac mel iliyi woli lac jacʼben i mandar Cristo.

18, 19. ¿Chuqui tsiʼ pʌsʌ Jesús chaʼan jiñi i melol chuqui toj, i chuqui mi laj cʌn?

¹⁸ I chaʼpʼejlel, laʼ laj qʼuel chuqui tsiʼ yʌlʌ Jesús chaʼan jiñi i melol chuqui toj. Tsiʼ pʌsbe jiñi xcʌntʼañob i chaʼan principio tac muʼ bʌ caj i coltañob chaʼan toj chuqui miʼ melob. Jumpʼejl ejemplo, chaʼan cheʼʌch yom mi lac melben yambʌlob cheʼ bajcheʼ la com melbentel (Mt. 7:12). Ti lac pejtelel la com chaʼan mi lac melbentel chuqui toj, i cheʼʌch yom mi lac mel jaʼel tiʼ tojlel yambʌlob. ¿Baqui bʌ i wenlel? Tajol jiñi muʼ bʌ lac melbeñob chuqui toj cheʼʌch mi caj i melob yicʼotonla jaʼel. Pero ¿chuqui miʼ yujtel mi an i melbeyoñobla mach bʌ tojic? Jesús tsiʼ cʌntesa jaʼel jiñi xcʌntʼañob i chaʼan chaʼan yom miʼ ñopob ti Jehová, chaʼan jiñʌch mi caj i mel chuqui toj tiʼ tojlel jiñi woli bʌ «i chʌn pejcañob ti qʼuiñil yicʼot ti acʼʌlel» (Lc. 18:6, 7). Tiʼ sujm, ili tʼan tac jumpʼejlʌch pijtaya am bʌ lac chaʼan: Jiñi Dios yujil bʌ melol chuqui toj wen yujil chuqui tac ti wocol mi lac ñusan ti ili cojix bʌ qʼuin i jin mi caj i chʼʌm tiʼ wenta chaʼan miʼ tojʼesan cheʼ bʌ yom miʼ qʼuel (2 Ts. 1:6).

¹⁹ Muʼ bʌ laj cʌn. Mi mucʼʌch lac chʼʌm ti ñuc jiñi principio tac tsaʼ bʌ i pʌsʌ Jesús, mi caj lac  mel chuqui toj tiʼ tojlel yambʌlob. I mi añʌch i meleyob mach bʌ weñic ti lac tojlel, miʼ ñuqʼuesan lac pusicʼal cheʼ la cujil chaʼan Jehová mi caj i chʼʌm tiʼ wenta chaʼan mi lac melbentel chuqui toj.

20, 21. a) ¿Bajcheʼ yom miʼ pʌsob i melbal tiʼ tojlel yambʌlob jiñi añoʼ bʌ i yeʼtel? b) ¿Bajcheʼ miʼ pʌsob ñuc bʌ cʼuxbiya jiñi ñoxiʼalob? c) ¿Bajcheʼ yom miʼ chaʼleñob jiñi tatʌlob tiʼ tojlel i yalobilob?

²⁰ Cheʼ bajcheʼ tsaʼix laj qʼuele, jiñi i mandar Cristo chucul ti cʼuxbiya. Jin chaʼan, ti ili mandar, jiñi añoʼ bʌ i yeʼtel yom miʼ pʌsob tiʼ melbal chaʼan miʼ cʼuxbiñob yicʼot miʼ qʼuelob ti ñuc jiñi yambʌlob. Yom miʼ cʼajtesañob chaʼan Jesús miʼ pijtan chaʼan miʼ pʌsob cʼuxbiya tiʼ pejtelel i melbalob.

²¹ Yaʼ ti familia. Jiñi ñoxiʼalob yom miʼ cʼuxbiñob i yijñam «cheʼ bajcheʼ Cristo tsiʼ cʼuxbi i chaʼañoʼ bʌ» (Ef. 5:25, 28, 29). Miʼ lajibeñob jiñi ñuc bʌ i cʼuxbiya cheʼ ñaxan miʼ ñaʼtañob chuqui i cʼʌjñibalob i chaʼan i yijñam yicʼot i wenlel, mach ñaxañic i chaʼañob. An wiñicob wocol bʌ miʼ yubiñob chaʼan miʼ melob iliyi, come tajol tsaʼ coliyob ti jumpʼejl familia baqui maʼañic miʼ pʌsob cʼuxbiya yicʼot maʼañic miʼ melob chuqui toj tiʼ tojlel yambʌlob. Anquese wocolʌch miʼ yubiñob chaʼan miʼ cʌyob i costumbre, yomʌch miʼ chaʼleñob wersa chaʼan miʼ jacʼob i mandar Cristo. Jiñi ñoxiʼalob muʼ bʌ i pʌsob ñuc bʌ cʼuxbiya miʼ qʼuejlelob ti ñuc tiʼ yijñam. I jiñi tatʌlob muʼ bʌ i cʼuxbiñob tiʼ sujm i yalobilob maʼañic baʼ ora mi caj i lowob tiʼ tʼan yicʼot tiʼ melbalob (Ef. 4:31). Miʼ chaʼleñob wersa i pʌsbeñob i cʼuxbiya yicʼot i qʼuelob ti ñuc. Cheʼ miʼ melob iliyi, jiñi i yalobilob mi caj i cʼuxbiñob yicʼot mi caj i chʼʌmob ti ñuc.

22. Cheʼ bajcheʼ miʼ yʌl 1 Pedro 5:1-3, ¿majqui i chaʼan jiñi tiñʌmeʼob, i bajcheʼ yom miʼ chaʼlentelob?

²² Yaʼ ti congregación. Jiñi ancianojob yom miʼ cʼajtesañob chaʼan jiñi tiñʌmeʼob mach i  chaʼañobic (Jn. 10:16; pejcan 1 Pedro 5:1-3). Jiñi tʼan «i tiñʌmeʼ Dios» miʼ yʌqʼueñob i cʼajtesan chaʼan i chaʼañʌch Jehová, i yom chaʼan miʼ pʌsbentelob cʼuxbiya (1 Ts. 2:7, 8). Jiñi ancianojob cheʼ bʌ miʼ melob bajcheʼ iliyi miʼ qʼuejlelob ti wen ti Jehová, cheʼ jaʼel, jiñi hermanojob miʼ qʼuelob ti ñuc yicʼot miʼ cʼuxbiñob.

23, 24. a) ¿Baqui bʌ i yeʼtel jiñi ancianojob cheʼ bʌ an majqui miʼ chaʼlen tsʌts bʌ mulil yaʼ ti congregación? b) Cheʼ miʼ yujtel iliyi, ¿chuqui yom miʼ tsajiñob jiñi ancianojob?

²³ Ti jiñi Mandar tsaʼ bʌ i yʌqʼue Jehová jiñi israelob, jiñi juezob yicʼot ancianojob miʼ chʼʌmob tiʼ wenta jiñi wocol tac chaʼan bʌ i chʼujutesʌntel Dios yicʼot cheʼ miʼ yujtel leto o miʼ ñusʌntel mandar tac. Pero tiʼ mandar Cristo yambʌlix i yeʼtel jiñi ancianojob. Cheʼ bʌ an majqui miʼ mel tsʌts bʌ mulil yaʼ ti congregación, cojach miʼ chʼʌmob tiʼ wenta jiñi chaʼan bʌ i chʼujutesʌntel Dios. Yujilob chaʼan Dios an i cʌybeyob tiʼ wenta jiñi xʼeʼtelob ila ti pañimil (mulawil) chaʼan miʼ qʼuelob jiñi yan tac bʌ wocol o mi tsaʼ ñusʌbentiyob ti pʼis i mandar. Jin chaʼan, jin miʼ mejlel i yʌlob mi yom miʼ tojtʌl multa o miʼ yochelob ti cárcel (Ro. 13:1-4).

²⁴ Jin chaʼan, ¿chuqui miʼ melob jiñi ancianojob cheʼ bʌ an majqui miʼ mel tsʌts bʌ mulil? Miʼ cʼʌñob jiñi Biblia chaʼan miʼ tsajiñob chuqui tsaʼ mejli yicʼot chaʼan miʼ ñaʼtañob chuqui mi caj i melob. Yujilob chaʼan jiñi i mandar Cristo chucul ti cʼuxbiya. Iliyi miʼ ñijcañob i wen tsajin chuqui yom miʼ melob chaʼan miʼ coltañob juntiquil tsaʼ bʌ yajli ti mulil yaʼ ti congregación. I jiñi cʼuxbiya mi caj i ñijcañob i wen qʼuelob mi tsaʼix i cʌyʌ i mul yicʼot mi an bajcheʼ miʼ mejlel ti coltʌntel chaʼan miʼ chaʼ sujtel tiʼ yamigo Jehová.

25. ¿Chuqui mi caj laj qʼuel ti yambʌ temaj?

²⁵ Tiʼ sujm, wen tijicñayonla come an lac chaʼan jiñi i mandar Cristo. Cheʼ mi lac chaʼlen wersa lac jacʼ, mi lac chaʼlen coltaya chaʼan majqui jach yaʼ ti congregación cʼuxbibil miʼ yubin i bʌ, miʼ qʼuejlel ti ñuc yicʼot chaʼan cʌntʌbil. Pero chumulonla ti jumpʼejl pañimil baqui jiñi quixtañujob «utsi utsijax miʼ chʌn melob i jontolil» (2 Ti. 3:13). Jin chaʼan, yom mi lac chʌn cʌntan lac bʌ. ¿Bajcheʼ miʼ mejlel i pʌs jiñi congregación chaʼan miʼ mel chuqui toj tiʼ wut Dios cheʼ miʼ ticʼlʌntel alobob? Yaʼ ti yambʌ temaj mi caj laj qʼuelben i jacʼbal.