1-3. a) Cheʼ bajcheʼ miʼ yʌl Salmo 5:4-6, ¿bajcheʼ yilal miʼ qʼuel Jehová jiñi jontolil? b) ¿Chucoch mi la cʌl chaʼan jiñi i ticʼlʌntel ti piʼleya alobob an tiʼ contra «i mandar Cristo»?

JEHOVÁ miʼ wen tsʼaʼlen jiñi jontolil (pejcan Salmo 5:4-6). Jin chaʼan, tsʼaʼ miʼ qʼuel cheʼ bʌ miʼ ticʼlʌntel ti piʼleya jiñi alobob come jumpʼejlʌch jontol bʌ yicʼot biʼiltic jax bʌ melbalʌl (chaʼlebal). Joñonla jaʼel tsʼaʼ mi laj qʼuel cheʼ miʼ ticʼlʌntel jiñi alobob yicʼot mach utsʼatic mi laj qʼuel cheʼ miʼ yujtel yaʼ ti congregación (Ro. 12:9; 1 Co. 10:8).

² Jiñi i ticʼlʌntel alobob an tiʼ contra «i mandar Cristo», ili jiñʌch pejtelel tsaʼ bʌ i pʌsʌ Jesús tiʼ melbal yicʼot tiʼ tʼan (Gá. 6:2). ¿Chucoch? Come cheʼ bajcheʼ tsaʼ laj qʼuele ti yambʌ temaj, jiñi i mandar Cristo chucul ti cʼuxbiya i miʼ yʌcʼ ti melol chuqui toj. Jiñi i sujm bʌ xñoptʼañonla mi lac jacʼ ili mandar, jin chaʼan mi lac chaʼlen wersa lac pʌsben jiñi alobob chaʼan tiʼ sujm mi laj cʼuxbiñob yicʼot chaʼan maʼañic chuqui miʼ bʌcʼñañob. Pero jiñi muʼ bʌ i ticʼlan alobob jin jach miʼ bajñel ñaʼtan i bʌ i jontol come miʼ yotsʌben i bʌqʼuen jiñi alob i miʼ yʌqʼuen i ñaʼtan chaʼan maʼañic majqui miʼ cʼuxbin.

³ Chʼijiyemtic jax, pero jiñi i ticʼlʌntel ti piʼleya alobob woli (choncol) i yujtel tiʼ petol pañimil (mulawil) i añix i yʌcʼʌ wocol jaʼel yaʼ ti congregación. ¿Chucoch? Come ti ili qʼuin an cabʌl «jontoloʼ bʌ yicʼot xlotiyajob», i tajol lamital miʼ ñopob ochel yaʼ ti congregación (2 Ti. 3:13). Cheʼ jaʼel, an muʼ bʌ i poj alob chaʼan i testigojob Jehová, pero maʼañic tsiʼ tiqʼuiyob jiñi lecoj bʌ i ñaʼtʌbal i tsaʼ cʼoti i ticʼlañob ti piʼleya jiñi alobob. Wʌle, mi caj laj qʼuel chucoch jiñʌch jumpʼejl mulil wen tsʼaʼlebil bʌ.  Ti wiʼil, mi caj laj qʼuel chuqui miʼ mel jiñi ancianojob cheʼ an majqui miʼ ticʼlan alobob, i chuqui miʼ mejlel i mel jiñi tatʌlob chaʼan miʼ cʌntan i yalobilob. *

4, 5. ¿Chucoch jumpʼejlʌch tsʌts bʌ mulil ti tojlel alob o xchʼoc cheʼ bʌ miʼ ticʼlʌntel?

⁴ Jiñi muʼ bʌ i ticʼlʌntelob cabʌl jab miʼ yubibeñob i wocolel. I mach jiñob jach, cheʼ jaʼel, jiñi i familia yicʼot jiñi hermanojob ti congregación. Jiñi i ticʼlʌntel alobob jumpʼejlʌch tsʌts bʌ mulil.

⁵ Jumpʼejlʌch tsʌts bʌ mulil tiʼ contra tsaʼ bʌ ticʼlʌnti. * Jumpʼejlʌch mulil cheʼ mi lac melben mach bʌ tojic yambʌlob o mi la cʌqʼueñob i yilan wocol. I cheʼ bajcheʼ mi caj laj qʼuel ti yambʌ temaj, iliyi jiñʌch muʼ bʌ i mel jiñi muʼ bʌ i ticʼlan juntiquil alob come cabʌl jax miʼ yʌqʼuen i yilan wocol. Miʼ yʌqʼuen i ñaʼtan chaʼan maʼañix i cʼʌjñibal i miʼ yotsʌben i bʌqʼuen. Jin chaʼan, yom mi laj cʌntan jiñi alobob chaʼan ili jontol jax bʌ melbalʌl. Cheʼ jaʼel, yom mi lac ñuqʼuesʌbeñob i pusicʼal yicʼot mi laj coltañob jiñi am bʌ ticʼlʌntiyob (1 Ts. 5:14).

6, 7. ¿Chucoch jumpʼejlʌch mulil tiʼ tojlel jiñi congregación yicʼot ti añoʼ bʌ i yeʼtel cheʼ miʼ ticʼlʌntel jiñi alobob?

⁶ Jumpʼejlʌch mulil tiʼ contra jiñi congregación. Cheʼ bʌ an majqui miʼ ticʼlan ti piʼleya juntiquil alob, miʼ yʌcʼ ti lecoj ajlel jiñi congregación (Mt. 5:16; 1 P. 2:12). Pero mach tojic cheʼ tiʼ cajach juntiquil miʼ taj wocol yonlel xucʼul bʌ xñoptʼañob woliyoʼ (yʌqueloʼ) bʌ ti wersa i melob muʼ bʌ i yʌqʼuen i ñuclel Jehová (Jud. 3). Mach utsʼatic mi laj qʼuel cheʼ an la quicʼot juntiquil muʼ bʌ i chaʼlen jontolil yicʼot maʼañic miʼ cʌy i mul i miʼ bibʼesʌben i cʼabaʼ jiñi congregación.

⁷ Jumpʼejlʌch mulil tiʼ contra añoʼ bʌ i yeʼtel. Jiñi xñoptʼañob yom miʼ ‹jacʼbeñob i tʼan jini añoʼ bʌ i yeʼtel ti pañimil› (Ro. 13:1). Cheʼ bʌ mi laj qʼuel ti ñuc jiñi mandar tac am bʌ ti jujumpʼejl tejclum mi lac pʌs chaʼan mi lac jacʼbeñob i tʼan jiñi añoʼ bʌ i yeʼtel. Mi juntiquil yaʼ ti congregación miʼ ñusan ti pʼis jumpʼejl mandar, bajcheʼ i ticʼlʌntel alobob, miʼ taj i mul tiʼ tojlel jiñi añoʼ bʌ i yeʼtel (lajin yicʼot Hechos 25:8). Jiñi ancianojob maʼañobic tiʼ wenta chaʼan miʼ yʌcʼob ti tsʼʌctesʌntel i mandar tac jiñi xʼeʼtelob. Pero maʼañic miʼ coltañob jaʼel jiñi muʼ bʌ i chaʼlen ticʼlaya mi jiñi xʼeʼtelob miʼ yʌqʼuen i toj i mul (Ro. 13:4). Jiñi muʼ bʌ i chaʼlen mulil mucʼʌch i taj wocol (Gá. 6:7).

8. ¿Bajcheʼ yilal miʼ qʼuel Dios cheʼ bʌ juntiquil miʼ chaʼlen mulil tiʼ tojlel yambʌlob?

⁸ Jumpʼejlʌch mulil tiʼ contra Jehová (Sal. 51:4). Cheʼ bʌ an majqui miʼ chaʼlen mulil tiʼ tojlel yambʌ, miʼ chaʼlen mulil tiʼ contra Dios jaʼel. Laʼ laj qʼuel jumpʼejl ejemplo ti jiñi Mandar tsaʼ bʌ i yʌqʼue Jehová jiñi i tejclum Israel. Jiñi Mandar miʼ yʌl chaʼan jiñi muʼ bʌ i lotin yambʌ i piʼʌl «ñucʌch i mul» tiʼ tojlel Jehová (Lv. 6:2-4). Tiʼ sujm, mi juntiquil yaʼ ti congregación miʼ ticʼlan juntiquil alob, mach xucʼulix miʼ yajñel tiʼ tojlel Dios i miʼ wen bibʼesʌben i cʼabaʼ come tsaʼ jach i loti jiñi alob. Jiñi alob tsiʼ lon ñopbe i tʼan, pero jiñi xticʼlaya tsaʼ jach i cʼʌñʌ jiñi lot chaʼan miʼ melben chuqui yom, i jiñi alob añix i bʌqʼuen miʼ cʌytʌl. Jin chaʼan mi laj qʼuel jiñi ticʼlaya cheʼ bajcheʼ yom: Jumpʼejl mulil wen biʼiltic jax bʌ tiʼ contra Dios, tsʼaʼ bʌ mi laj qʼuel.

9. ¿Chuqui an tsictesa i yorganización Jehová ti jiñi jabil tac ñumen bʌ tilel, i chucoch?

 ⁹ Ti jiñi jabil tac ñumen bʌ tilel, jiñi i yorganización Jehová cabʌl chuqui an i tsictesa yicʼot jiñi Biblia chaʼan jiñi i ticʼlʌntel alobob. Jumpʼejl ejemplo, ti jiñi revista Lac Tsictesʌbentel yicʼot ¡Jamʌx a wut! an loqʼuem cabʌl temaj muʼ bʌ i tsictesan chuqui miʼ mejlel i melob jiñi tsaʼ bʌ ticʼlʌntiyob ti piʼleya chaʼan miʼ mʌlbeñob (jotbeñob) majlel jiñi i chʼijiyemlel, chuqui miʼ mejlel lac mel chaʼan mi laj coltañob yicʼot lac ñuqʼuesʌbeñob i pusicʼal, i bajcheʼ miʼ mejlel i cʌntañob i yalobilob jiñi tatʌlob. Jiñi ancianojob miʼ wen tsictesʌbentelob jaʼel chaʼan chuqui yom miʼ melob cheʼ bʌ an majqui miʼ mel ili mulil. Jiñi i yorganización Jehová miʼ chʌcʌ tsajin chuqui yom miʼ mel jiñi ancianojob cheʼ bʌ miʼ yujtel ili wocol. Cheʼ bajcheʼ jiñi, miʼ cʌntʌntel chaʼan jiñi ancianojob miʼ jacʼob cheʼ bajcheʼ an tiʼ mandar Cristo cheʼ bʌ miʼ qʼuejlel ili wocol.

10-12. a) Cheʼ bʌ jiñi ancianojob woliʼ qʼuelob jumpʼejl tsʌts bʌ mulil, ¿chuqui yom cʼajalob i chaʼan, i chuqui tac miʼ cʼojoʼtañob? b) Cheʼ bajcheʼ miʼ yʌl Santiago 5:14, 15, ¿chuqui miʼ ñopob i mel jiñi ancianojob?

¹⁰ Cheʼ an majqui miʼ chaʼlen jumpʼejl tsʌts bʌ mulil, jiñi ancianojob woli bʌ i qʼuelob ili wocol wen cʼajalob i chaʼan chaʼan yom miʼ pʌsob i cʼuxbiya yicʼot miʼ melob chuqui toj tiʼ wut Dios chaʼan cheʼ jiñi miʼ jacʼob i mandar Cristo. Chaʼan iliyi, añʌch chuqui tac miʼ cʼojoʼtañob. Muʼ bʌ i ñumen cʼojoʼtañob jiñʌch chaʼan chʌn sʌc miʼ yajñel i cʼabaʼ Dios (Lv. 22:31, 32; Mt. 6:9). Yicʼot jaʼel, wen yomob i cʌntan jiñi hermanojob chaʼan utsʼat añob yicʼot Jehová yicʼot yomob i coltan jiñi tsaʼ bʌ ticʼlʌnti.

¹¹ Cheʼ jaʼel, jiñi ancianojob miʼ ñop i coltañob jiñi tsaʼ bʌ i chaʼle mulil chaʼan, mi mejlʌch, miʼ tojʼesan i wocol yicʼot Jehová (pejcan Santiago 5:14, 15). Juntiquil xñoptʼan muʼ bʌ i mel mach bʌ weñic i miʼ chaʼlen tsʌts bʌ mulil, lajal bajcheʼ cʼam. Ili yom i yʌl chaʼan mach tojic an yicʼot Jehová. * Jiñi ancianojob lajalob bajcheʼ doctorob mucʼoʼ bʌ ti wersa i coltan jiñi cʼam bʌ, o jiñi tsaʼ bʌ i chaʼle mulil, chaʼan miʼ chaʼ cʼocʼan. Miʼ yʌcʼob ticʼojel chucul bʌ ti Biblia muʼ bʌ mejlel i coltan chaʼan miʼ chaʼ lʌcʼtesan i bʌ ti Jehová. Pero ili cojach miʼ mejlel mi tiʼ sujm miʼ cʌy i mul (Hch. 3:19; 2 Co. 2:5-10).

¹² Tiʼ sujm, wen ñucʌch jiñi eʼtel (troñel) muʼ bʌ i melob jiñi ancianojob. Miʼ wen chʼʌmob ti ñuc i tiñʌmeʼ Jehová aqʼuebiloʼ bʌ tiʼ wenta (1 P. 5:1-3). Yomob chaʼan jiñi hermanojob cʌntʌbil miʼ yubiñob i bʌ yaʼ ti congregación. Jin chaʼan, cheʼ miʼ yubiñob chaʼan an juntiquil muʼ bʌ i ticʼlan alobob, ti orajach miʼ qʼuelob chuqui yom miʼ mejlel. ¿Chuqui miʼ melob? Laʼ laj qʼuel jiñi cʼajtiya tac am bʌ tiʼ tejchibal jiñi  párrafo 13,  15 yicʼot  17.

13, 14. ¿Muʼ ba i jacʼbeñob i mandar xʼeʼtelob jiñi ancianojob chaʼan yom miʼ subob mi an majqui tsiʼ ticʼla alobob? Tsictesan.

 ¹³ ¿Muʼ ba i jacʼbeñob i mandar xʼeʼtelob jiñi ancianojob chaʼan yom miʼ subob mi an majqui tsiʼ ticʼla alobob? Mucʼʌch. An tacʌch baqui waʼchocobil ili mandar, i jiñi ancianojob mucʼʌch i jacʼob (Ro. 13:1). Jiñi mandar tac maʼañic tiʼ contra i mandar Dios (Hch. 5:28, 29). Jin chaʼan, cheʼ bʌ jiñi ancianojob miʼ yubiñob chaʼan an majqui tsiʼ mele jiñi mulil, ti orajach miʼ chaʼleñob tʼan ti sucursal i miʼ cʼajtiñob chuqui yom miʼ melob chaʼan miʼ jacʼob jiñi mandar chaʼan yom miʼ sujbel cheʼ an majqui miʼ ticʼlan alobob.

 ¹⁴ Jiñi ancianojob miʼ subeñob jiñi tsaʼ bʌ ticʼlʌnti, jiñi i tatob yicʼot majqui jach yujil jiñi tsaʼ bʌ ujti chaʼan miʼ mejlelob i sub ti xʼeʼtelob jiñi mulil. Pero ¿ixcu mi jiñi tsaʼ bʌ i chaʼle mulil juntiquilʌch am bʌ yaʼ ti congregación i cabʌl majqui miʼ yubin jiñi tsaʼ bʌ ujti? ¿Yom ba miʼ ñaʼtan jiñi hermano muʼ bʌ ti suboñel chaʼan woliʼ bibʼesʌben i cʼabaʼ Dios? Maʼañic. Jiñi woli bʌ i bibʼesan jiñʌch jiñi tsaʼ bʌ i chaʼle mulil.

15, 16. a) Cheʼ bajcheʼ miʼ yʌl 1 Timoteo 5:19, ¿chucoch yom an chaʼtiquil testigo chaʼan jiñi ancianojob miʼ mejlel i chaʼleñob meloñel? b) ¿Chuqui miʼ melob jiñi ancianojob cheʼ bʌ miʼ sujbel juntiquil yaʼ ti congregación chaʼan tsiʼ chaʼle ticʼlaya?

 ¹⁵ Yaʼ ti congregación, ¿chucoch yomʌch chaʼtiquil testigo chaʼan jiñi ancianojob miʼ mejlelob i tech jumpʼejl meloñel? Come cheʼʌch miʼ yʌl jiñi Biblia. Ili jiñʌch jumpʼejl ñuc bʌ mandar toj bʌ. Cheʼ bʌ juntiquil maʼañic miʼ sub i mul, yom an chaʼtiquil testigo tsaʼ bʌ i qʼueleyob jiñi tsaʼ bʌ ujti chaʼan jiñi ancianojob miʼ mejlel i techob jumpʼejl meloñel (Dt. 19:15; Mt. 18:16; pejcan 1 Timoteo 5:19). Pero ¿yom ba i yʌl chaʼan wersa yomʌch jiñi chaʼtiquil testigojob chaʼan miʼ mejlel ti sujbel ti jiñi xʼeʼtelob jiñi mulil? Maʼañic. Jiñi ancianojob o yambʌlob mach yʌlʌyic i chaʼañob chaʼtiquil testigo chaʼan miʼ subob ti xʼeʼtelob jiñi mulil.

¹⁶ Cheʼ bʌ an majqui miʼ sujbel yaʼ ti congregación chaʼan tsiʼ ticʼla juntiquil chutto bʌ, jiñi ancianojob chaʼchajp chuqui miʼ melob. Ñaxam bʌ, miʼ wen qʼuelob chaʼan mucʼʌch i sujbel jiñi xticʼlayajob, cheʼ bajcheʼ waʼchocobil i chaʼan jiñi xʼeʼtelob. Cheʼ jiñi tiʼ coltaya jiñi Biblia, miʼ wen tsajiñob chaʼan miʼ ñaʼtañob chuqui tsaʼ bʌ ñoj ujti i miʼ qʼuelob mi yomʌch miʼ mejlel jumpʼejl comité chaʼan meloñel. Mi jiñi quixtañu miʼ yʌl chaʼan mach i sujmic woli bʌ i yʌjlel, jiñi ancianojob miʼ pejcañob jiñi testigojob. Mi tsaʼ cʼoti ti ñaʼtʌntel tiʼ coltaya jiñi chaʼtiquil testigo chaʼan tsaʼʌch ujti jumpʼejl mulil, miʼ mejlel jiñi comité chaʼan meloñel. Jiñi chaʼtiquil testigo jiñobʌch: Juntiquil muʼ bʌ i chaʼlen suboñel yicʼot yambʌ muʼ bʌ i pʌs chaʼan jiñi quixtañu tsaʼʌch i chaʼle ticʼlaya. * Cheʼ maʼañic yambʌ testigo mach yomic i yʌl chaʼan woli ti lot jiñi xsuboñel. Anquese maʼañic miʼ mejlel ti pʌstʌl tiʼ coltaya jiñi chaʼtiquil testigo chaʼan i sujmʌch woli bʌ ti ajlel, jiñi ancianojob yujilob chaʼan jiñi woli bʌ i sujbel tajol tsaʼʌch i mele tsʌts bʌ mulil tsaʼ bʌ i wen ticʼla yambʌlob. Jin chaʼan, miʼ bej coltañob jiñi tsaʼ bʌ tajleyob ti wocol yicʼot chʌn yʌxʌlob i yoj chaʼan miʼ cʌntañob jiñi congregación tiʼ tojlel jiñi tsaʼ bʌ sujbi (Hch. 20:28).

17, 18. Tsictesan chuqui miʼ mejlel ti jiñi comité chaʼan meloñel.

 ¹⁷ ¿Chuqui miʼ mejlel ti jiñi comité chaʼan meloñel? Jiñi ancianojob ochemoʼ bʌ ti ili comité miʼ wen ñaʼtañob mi jiñi tsaʼ bʌ i chaʼle mulil muqʼuixto i bej mejlel ti ajñel yaʼ ti congregación. Jiñi tʼan meloñel mach yom i yʌl chaʼan jin miʼ ñaʼtañob mi jiñi xʼeʼtelob yom miʼ yʌqʼueñob i toj i mul o maʼañic. Jiñi ancianojob maʼañobic tiʼ wenta chaʼan miʼ yʌcʼob ti tsʼʌctesʌntel i mandar xʼeʼtelob tiʼ tojlel jiñi tsaʼ bʌ i chaʼle mulil, jiñʌch miʼ cʌybeñob tiʼ wenta (Ro. 13:2-4; Tit. 3:1).

¹⁸ Ti jumpʼejl comité chaʼan meloñel, i yeʼtel jiñi ancianojob jiñʌch tiʼ chaʼan bʌ Dios. Tiʼ coltaya jiñi Biblia, mi cʼotel i ñaʼtañob mi tsaʼix i cʌyʌ i mul jiñi quixtañu o maxto. Mi mach cheʼiqui, miʼ chaʼlentel ti expulsar i miʼ sujbel yaʼ ti congregación chaʼan mach i testigojix Jehová (1 Co. 5:11-13). Pero mi tsaʼix i cʌyʌ i mul, mucʼʌch i mejlel ti bej ajñel yaʼ ti congregación. Cojach chaʼan jiñi ancianojob  mi caj i tsictesʌbeñob chaʼan tajol maʼañic baqui ora mi caj i taj jumpʼejl eʼtel yaʼ ti congregación. Cheʼ jaʼel, come yomob chaʼan wen miʼ yajñelob jiñi alobob, tajol miʼ subeñob tiʼ bajñel jiñi tatʌlob añoʼ bʌ i yalobilob chutob to bʌ chaʼan miʼ wen cʌntañob tiʼ tojlel jiñi tsaʼ bʌ i chaʼle mulil. Cheʼ bʌ miʼ melob, tsajilob jach chaʼan maʼañic mi caj i yʌlob majqui tsaʼ ticʼlʌnti.

19-22. ¿Bajcheʼ miʼ mejlel i cʌntañob i yalobil jiñi tatʌlob? (Qʼuele jiñi foto am bʌ tiʼ tejchibal).

¹⁹ Jiñi tatʌlob añob tiʼ wenta chaʼan miʼ cʌntan i yalobilob. * Tatʌlob, jiñi laʼ walobilob ‹laʼ majtañʌch aqʼuebiletbʌla i chaʼan lac Yum› (Sal. 127:3). An ti laʼ wenta chaʼan mi laʼ cʌntan ili majtañʌl. ¿Chuqui miʼ mejlel laʼ mel chaʼan maʼañic miʼ ticʼlʌntelob?

²⁰ Ñaxam bʌ, wen cʌñʌla chuqui miʼ yʌjlel tiʼ tojlel jiñi xticʼlaya alobob. Cʌñʌla bajcheʼ yilal bʌ wiñicob xʼixicob (quixtañujob) yicʼot chuqui miʼ melob chaʼan miʼ lotiñob. Yom yʌxʌl laʼ wo chaʼan jiñi wocol tac mejl bʌ ti ujtel (Pr. 22:3; 24:3). Cʼajtesanla chaʼan jiñi xticʼlaya jiñʌch juntiquil i cʌñʌ bʌ la walobil i maʼañic bʌ miʼ bʌcʼñañob.

²¹ I chaʼpʼejlel, chʌn chaʼlenla tʼan la wicʼot la walobilob (Dt. 6:6, 7). Ili yom i yʌl chaʼan mi la wen ñʌchʼtan chuqui miʼ yʌlob (Stg. 1:19). Cʼajtesanla chaʼan jiñi alobob wocol miʼ yubiñob chaʼan miʼ subob chuqui tsaʼ ujti. Tajol miʼ bʌcʼñañob chaʼan maʼañic mi caj la ñopben i tʼan. O tajol chʼʌcbilob tiʼ tojlel jiñi xticʼlaya mi an chuqui tsiʼ yʌlʌyob. Mi an chuqui mach weñic woli ti ujtel mi laʼ wubin, melbenla cʼajtiya ti wen jach bʌ tʼan i ñʌchʼtanla chuqui miʼ subeñetla.

²² I yuxpʼejlel, cʌntesan laʼ walobilob. Subenla chuqui yom yujilob chaʼan jiñi piʼleya cheʼʌch bajcheʼ woliʼ colelob majlel. Cʌntesanla chuqui yom miʼ melob o miʼ yʌlob mi an majqui miʼ ñop i tʌlob baqui mach bʌ yomic. Cʼʌñʌla jiñi am bʌ i tsictesa i yorganización Dios chaʼan i cʌntʌntel jiñi alobob (qʼuele jiñi recuadro « Coltʌntel chaʼan tatʌlob yicʼot i yalobilob»).

23. ¿Bajcheʼ yilal mi laj qʼuel cheʼ miʼ ticʼlʌntel ti piʼleya jiñi alobob, i chuqui ti cʼajtiya mi caj laj qʼuel ti yambʌ temaj?

²³ Jiñi i testigojob Jehová mi qʼuelob bajcheʼ biʼiltic jax bʌ mulil yicʼot jontol bʌ melbalʌl jiñi i ticʼlʌntel alobob. Jiñi congregación tac miʼ tsajcañob muʼ bʌ i yʌl i mandar Cristo, jin chaʼan maʼañic miʼ coltañob tiʼ wocolel muʼ bʌ i tajob jiñi muʼ bʌ i ticʼlan alobob. Pero ¿bajcheʼ miʼ mejlel laj coltan jiñi tsaʼ bʌ ticʼlʌntiyob? Ili cʼajtiya mi caj i jajqʼuel ti yambʌ temaj.