1. ¿Chucoch an hermanojob wocol bʌ miʼ yubiñob chaʼan miʼ chaʼleñob estudio?

ILI ora wen wocol chaʼan mi lac taj chuqui la com. Cabʌl hermanojob tsʼuyul jumpʼejl qʼuin mucʼob ti troñel chaʼan miʼ tajob i cʼʌjñibal bʌ i chaʼan i familia. Yambʌlob cabʌl ora miʼ chaʼleñob xʌmbal ti carro chaʼan miʼ cʼotelob tiʼ troñel yicʼot cheʼ miʼ chaʼ sujtelob tiʼ yotot. I an muʼ bʌ i jisañob i bʌ ti tsʌts bʌ eʼtel (troñel) chaʼan miʼ tajob chuqui i cʼʌjñibal tiʼ yotot. Ili hermanojob wen lujbobix cheʼ miʼ yujtel jiñi qʼuin i tajol mach yomobix i pejcañob jun.

2. ¿Baqui ora maʼ tajben i yorajlel chaʼan maʼ chaʼlen estudio?

² Tiʼ sujm, yom mi lac locʼsʌben i yorajlel chaʼan mi lac pejcʌben i Tʼan Dios yicʼot yambʌ lac jun tac, pero yomʌch mi lac pejcan ti wen. Yaʼʌch cʌyʌl mi lʌcʼʌl la com ajñel la quicʼot Jehová yicʼot chaʼan mi lac taj laj cuxtʌlel maʼañic bʌ i jilibal (1 Ti. 4:15, 16, TNM). An hermanojob sʌcʼan jach bʌ miʼ tejchelob chaʼan miʼ chaʼleñob estudio come ñʌchʼʌcña jiñi otot i maxto añic chuqui woli (choncol) i ñaʼtañob. I an muʼ bʌ i tsʼitaʼ pejcañob i jun yicʼot miʼ wen ñaʼtañob cheʼ ti acʼʌlel baqui ñʌchʼʌcña pañimil.

3, 4. ¿Chuqui tac an qʼuextʌyem ti jiñi lac jun tac muʼ bʌ i loqʼuel, i chucoch?

³ Ti lac pejtelel la cujil chaʼan ñuc i cʼʌjñibal cheʼ mi la cʌqʼuen i yorajlel jiñi estudio. Pero ¿chuqui yom mi lac pejcan? Tajol mi lac ñaʼtan chaʼan an cabʌl, i wocol mi la cubin chaʼan mi lac pejcan pejtelel jiñi chʼujul bʌ bʌlñʌcʼʌl muʼ bʌ la cʌqʼuentel. An mucʼʌch bʌ i mejlelob i mel, pero cabʌl hermanojob wocol miʼ yubiñob. Jiñi Junmojt muʼ bʌ i pʌsob bij yujil iliyi, jin chaʼan maxto wen jalic tsiʼ ñaʼta i juʼsan bajcheʼ  cʼamel chuqui miʼ tsictesʌntel ti lac jun tac o ti Internet.

⁴ Jumpʼejl ejemplo, maʼañix miʼ mejlel jiñi Anuario de los testigos de Jehová come miʼ mejlel lac taj cabʌl wem bʌ experiencia yaʼ ti lac página chaʼan Internet, jw.org^®, yicʼot yaʼ ti JW Broadcasting^®. Yicʼot jaʼel, ti jujumpʼejl jab cojax miʼ loqʼuel uxpʼejl Lac Tsictesʌbentel yicʼot ¡Jamʌx a wut! chaʼan bʌ subtʼan. Iliyi maʼañic tsaʼ mejli chaʼan mi lac ñumen tajben i yorajlel tiʼ melol chuqui la com, chaʼañʌch mi la cʌqʼuen i yorajlel jiñi ñumen ñuc bʌ i cʼʌjñibal (Fil. 1:10). Wʌle mi caj laj qʼuel chuqui yom bʌ mi la cʌcʼ ti ñuc yicʼot bajcheʼ miʼ mejlel lac ñumen tajben i wenlel cheʼ mi lac pejcan lac Biblia.

5, 6. ¿Chuqui yom mi lac pejcan ti wen?

⁵ ¿Chuqui yom mi lac ñumen acʼ ti ñuc? Yom mi la cʌqʼuen i yorajlel chaʼan mi lac wen pejcan i Tʼan Dios ti jujumpʼejl qʼuin. Ili ora, mach cabʌlic capítulo miʼ yajcʌntel chaʼan jiñi i pejcʌntel Biblia ti jujumpʼejl semana yaʼ ti congregación. Cheʼ bajcheʼ jiñi, ñumen an i yorajlel chaʼan mi lac wen ñaʼtan yicʼot chaʼan mi lac ñumen sʌclan i tsictesʌbentel. La com bʌ jiñʌch chaʼan miʼ cʼotel ti lac pusicʼal muʼ bʌ i yʌl jiñi Biblia i miʼ ñumen lʌcʼtesañonla ti Jehová, mach jin jach mi lac pejcan jiñi capítulo tac (Sal. 19:14).

⁶ ¿Chuqui tac yambʌ miʼ mejlel lac wen pejcan? Yomʌch mi lac chajpan lac bʌ jaʼel yicʼot jiñi temaj tac chaʼan bʌ estudio chaʼan Lac Tsictesʌbentel, jiñi laj Cʌntesʌntel chaʼan i Tʼan Dios ti Congregación yicʼot jiñi yan tac bʌ parte muʼ bʌ i qʼuejlel yaʼ ti tempa bʌ cheʼ ti semana. Yicʼot jaʼel yom mi lac pejcan jiñi yan tac bʌ revista Lac Tsictesʌbentel yicʼot ¡Jamʌx a wut!

7. ¿Yom ba mi la cubin lac chʼijiyemlel mi maʼañic miʼ mejlel lac luʼ qʼuel ti yorajlel jiñi muʼ bʌ i letsʌntel yaʼ ti lac página chaʼan Internet yicʼot ti JW Broadcasting?

⁷ Tajol an majqui miʼ yʌl: «Pero ¿chuqui mi c mel yicʼot pejtelel muʼ bʌ i letsʌntel yaʼ ti página chaʼan Internet yicʼot ti JW Broadcasting? Come wen cabʌl chuqui an». Laʼ cu lac ñaʼtan baqui miʼ chojñel cabʌl bʌlñʌcʼʌl. Juntiquil quixtañu maʼañic miʼ mejlel i cʼux tiʼ pejtelel, mucʼ jach i yajcan chaʼpʼejl muʼ bʌ caj i cʼajtin. Lʌcʼʌ lajal ti lac tojlel, mach la cubin lac chʼijiyemlel mi maʼañic miʼ mejlel lac luʼ pejcan tiʼ yorajlel cheʼ bajcheʼ woli (yʌquel) i loqʼuel. Laʼ lac pejcan yicʼot laj qʼuel bajcheʼ cʼamel mi lac mejlel. Pero ¿chuqui yom i yʌl cheʼ mi lac chaʼlen estudio, i bajcheʼ miʼ mejlel lac ñumen locʼsʌben i wenlel?

8. a) ¿Bajcheʼ yom mi lac chajpan lac bʌ chaʼan jiñi Cʌntesʌntel loqʼuem bʌ ti Lac Tsictesʌbentel? b) ¿Bajcheʼ mi caj i coltañonla mi cheʼʌch mi lac mel?

⁸ Cheʼ mi lac chaʼlen estudio yom i yʌl chaʼan mi lac wen tsajin jiñi lac jun woli bʌ lac pejcan majlel chaʼan an chuqui la com laj cʌn, mach cheʼ jach mi lac pam pejcan i mi lac sʌp i jacʼbal jiñi cʼajtiya tac. Laʼ laj qʼuel bajcheʼ yom mi lac mel cheʼ mi lac chajpan lac bʌ chaʼan jiñi Cʌntesʌntel loqʼuem bʌ ti Lac Tsictesʌbentel. Ñaxan, laʼ lac pejcan i tejchibal baqui miʼ yʌl chuqui mi caj laj qʼuel. Cheʼ jiñi, laʼ lac tsajin jiñi i título, subtítulo yicʼot jiñi cʼajtiya tac chaʼan repaso. Ti wiʼil, laʼ lac xucʼu pejcan majlel. Laʼ laj qʼuel jiñi tʼan tac muʼ bʌ i taj i bʌ yicʼot jiñi temaj, lʌcʼʌ ti bele ora yaʼ miʼ tilel tiʼ tejchibal jujumpʼejl párrafo. I miʼ pʌs chuqui mi caj i tsictesʌntel yaʼ ti párrafo. Cheʼ bʌ woli lac pejcan majlel, laʼ lac ñaʼtan bajcheʼ jujumpʼejl párrafo miʼ coltan jiñi subtítulo i miʼ taj i bʌ yicʼot jiñi temaj. Laʼ lac tsʼijbun jiñi tʼan  tac maxto bʌ la cujilic yicʼot jiñi la com bʌ lac ñumen sʌclʌben i sujmlel.

9. a) ¿Chucoch yom mi lac wen chʼʌm ti ñuc jiñi texto tac chaʼan Biblia cheʼ woli laj qʼuel jiñi Lac Tsictesʌbentel, i chucoch yom mi lac mel? b) Cheʼ bajcheʼ miʼ yʌl Josué 1:8, ¿chuqui yom mi lac mel cheʼ mi lac pejcan jiñi texto tac?

⁹ Jiñi i tsajintel Lac Tsictesʌbentel miʼ coltañonla chaʼan mi lac chʼʌmben i sujm muʼ bʌ i yʌl jiñi Biblia. Jin chaʼan, laʼ lac wen chʼʌm ti ñuc jiñi texto tac, ñumento jiñi muʼ bʌ caj i pejcʌntel cheʼ bʌ miʼ qʼuejlel yaʼ ti congregación. Laʼ lac wen qʼuel jiñi tʼan tac ñuc bʌ i cʼʌjñibal muʼ bʌ i coltan jiñi woli bʌ i tsictesʌntel yaʼ ti párrafo. Cheʼ jaʼel, laʼ la cʌqʼuen i yorajlel chaʼan mi lac wen ñaʼtan jiñi texto tac yicʼot bajcheʼ miʼ mejlel lac pʌs ti laj cuxtʌlel (pejcan Josué 1:8).

10. Cheʼ mi lac ñaʼtan muʼ bʌ i yʌl Hebreos 5:14, ¿chucoch jiñi tatʌlob yom miʼ cʼʌñob jiñi chʼujutesaya ti familia chaʼan miʼ cʌntesan i yalobilob bajcheʼ yom miʼ chaʼleñob estudio?

¹⁰ Wʌle laʼ la cʌl chaʼan jiñi chʼujutesaya ti familia. I sujm chaʼan jiñi tatʌlob yomob chaʼan jiñi i yalobilob tijicña miʼ ñusañob ti ili chʼujutesaya ti jujumpʼejl semana. Anquese jiñi tatʌlob yom miʼ chʌcʌ chajpañob chuqui mi caj i melob, mach cʼʌñʌlic chaʼan tiʼ pejtelel ora wen ñuc chuqui miʼ chajpañob i mel. I sujmʌch chaʼan miʼ mejlel laʼ qʼuel jiñi programa muʼ bʌ i ñumel ti jujumpʼejl uw yaʼ ti JW Broadcasting o tajol miʼ mejlel laʼ bixe mel jumpʼejl eʼtel, bajcheʼ jiñi arca i chaʼan Noé. Pero ñucʌch i cʼʌjñibal jaʼel cheʼ jiñi tatʌlob miʼ cʌntesan i yalobilob bajcheʼ yom miʼ chaʼleñob estudio. Jiñi alobob yom miʼ cʌñob i chajpañob i bʌ chaʼan jiñi tempa bʌ o chaʼan jumpʼejl temaj tsaʼ bʌ ajli ti escuela (pejcan Hebreos 5:14). Mi mucʼʌch i yʌqʼueñob i yorajlel chaʼan miʼ wen tsajiñob jiñi temaj tac chaʼan Biblia, mach wocolic mi caj i yubiñob chaʼan miʼ xucʼchocoñob i pensar yaʼ ti tempa bʌ yicʼot colem tempa bʌ tac come yaʼi mach tiʼ pejtelel ora miʼ pʌstʌl video tac. I sujm, jiñi tatʌlob yom miʼ chʼʌmob ti ñuc jaypʼejl i jabilel yicʼot bajcheʼ yilal jiñi i yalobilob chaʼan miʼ ñaʼtañob bajcheʼ jalel mi caj i chajpañob i bʌ.

11. ¿Chucoch ñuc i cʼʌjñibal cheʼ mi lac pʌsbeñob bajcheʼ yom miʼ ñumen tsajiñob jiñi Biblia jiñi quixtañujob muʼ bʌ laj cʌntesañob?

¹¹ Jiñi muʼ bʌ laj cʌntesañob chaʼan Biblia yomʌch miʼ cʌñob jaʼel bajcheʼ miʼ chaʼleñob estudio. Ti ñaxan, utsʼat mi laj qʼuel cheʼ mucʼʌch i sʌpob i jun cheʼ miʼ chajpañob i bʌ chaʼan jiñi cʌntesa o chaʼan jiñi tempa bʌ. Pero yom mi laj cʌntesañob i ñumen sʌclañob i sujmlel yicʼot i wen ñaʼtañob jiñi woli bʌ i qʼuelob cheʼ i bajñelob jach. Cheʼ bajcheʼ ili, cheʼ an chuqui maʼañic miʼ ñaʼtañob, mi caj  i mejlelob i sʌclan yicʼot i tajbeñob i sujmlel yaʼ ti lac jun tac i mach ti orajic mi caj i cʼajtiben i coltaya yambʌlob yaʼ ti congregación.

12. ¿Chuqui miʼ mejlel lac ñaʼtan lac taj cheʼ mi lac chaʼlen estudio?

¹² Mi maʼañic chuqui mi lac mulan lac pejcan, tajol mi lac ñaʼtan chaʼan wocol mi caj la cubin chaʼan mi lac ñusan lac bʌ. Pero mucʼʌch lac mejlel. Tajol jumucʼ jach mi lac mel cheʼ wolito lac tech i ti wiʼil miʼ mejlel lac ñumen aqʼuen i yorajlel. La com bʌ jiñʌch chaʼan ñumen lʌcʼʌl mi la cajñel yicʼot Jehová. Pero yambʌ chuqui miʼ mejlel lac ñaʼtan i orajach bʌ miʼ mejlel lac taj, jin cheʼ miʼ mejlel lac jacʼben i cʼajtiya juntiquil quixtañu o chaʼan mi lac chʼʌmben i sujm chuqui wocol bʌ mi la cubin.

13. a) ¿Chuqui miʼ mejlel i mel juntiquil xcolel am bʌ ti escuela chaʼan miʼ coltan chuqui ñopol i chaʼan? b) ¿Bajcheʼ miʼ mejlel a jacʼ muʼ bʌ i yʌl Colosenses 4:6?

¹³ Jumpʼejl ejemplo, ¿xcoleleto baʼ i muʼto a majlel ti escuela? Tajol jiñi a piʼʌlob ti clase miʼ wajleñetob come maʼañic miʼ cʼʌyin jiñi himno nacional. A wom a coltan muʼ bʌ i yʌl jiñi Biblia, pero mach chajpʌbiletic maʼ wubin a bʌ. Jin chaʼan, yom maʼ sʌclan ti lac jun tac. Tajol an chaʼchajp chuqui a wom a taj. Ti ñaxan, maʼ ñumen xucʼchocon a pusicʼal chaʼan machʌch yomic maʼ wotsan a bʌ ti ili pañimil (mulawil). I chaʼpʼejlel, maʼ weñʼesan bajcheʼ maʼ tsictesan jiñi i sujmlel am bʌ ti Biblia (Jn. 17:16; 1 P. 3:15). Yom bʌ maʼ ñaxan cʼajtiben a bʌ jiñʌch: «¿Chucoch miʼ ñaʼtañob c piʼʌlob ti clase chaʼan yom miʼ cʼʌyintel jiñi himno nacional?». I ti wiʼil, miʼ mejlel a wen tsajin chuqui miʼ yʌl lac jun tac. Cheʼ maʼ coltan chuqui ñopol a chaʼan, mi caj a qʼuel chaʼan mach wocolic bajcheʼ tsaʼ lon ñaʼta. Cabʌl wiñicob xʼixicob (quixtañujob) miʼ jacʼob i cʼʌyin jiñi himno nacional chaʼan jach juntiquil muʼ bʌ i qʼuelob ti ñuc tiʼ subeyob chaʼan yom miʼ melob. Pero cheʼ maʼ cʼotel a taj jiñi ñuc tac bʌ i sujmlel, majqui jach mi caj i mejlel a jacʼben i cʼajtiya (pejcan Colosenses 4:6).

14-16. a) ¿Bajcheʼ miʼ mejlel lac ñumen cʌn jumpʼejl libro i chaʼan jiñi Biblia mach bʌ wen cʌmbilic lac chaʼan? b) ¿Bajcheʼ miʼ coltañonla jiñi texto tac chaʼan mi laj cʌn jiñi libro i chaʼan Amós? (Qʼuele jaʼel jiñi recuadro « ¡Laʼ lac ñumen cʌn muʼ bʌ i yʌjlelob yaʼ ti Biblia!»).

¹⁴ Laʼ lac ñaʼtan chaʼan yaʼ ti tempa mi caj i qʼuejlel jumpʼejl libro mach bʌ wen tamic yaʼ ti Biblia muʼ bʌ i yʌl chaʼan profecía tac i tajol mach bʌ wen laj cʌñʌyic. Yom bʌ mi lac ñaxan mel jiñʌch mi lac mulan lac ñumen cʌn tsaʼ bʌ i tsʼijbu jiñi xʼaltʼan. ¿Bajcheʼ miʼ mejlel lac mel?

¹⁵ Miʼ mejlel lac ñaxan cʼajtiben lac bʌ chuqui la cujil tiʼ tojlel jiñi tsaʼ bʌ i tsʼijbu jiñi libro: Majqui, baqui tsaʼ chumle yicʼot chuqui i yeʼtel. Iliyi mi caj i coltañonla lac ñaʼtan chucoch tsiʼ cʼʌñʌ tʼan tac o lajiya tac bej qʼuexel bʌ. Cheʼ bʌ woli lac pejcan majlel, laʼ lac sʌclan jiñi tʼan tac muʼ bʌ i coltañonla laj qʼuel bajcheʼ yilal bʌ quixtañu jiñi tsaʼ bʌ i tsʼijbu.

¹⁶ Ti wiʼil, laʼ lac sʌclan baqui ora tsaʼ tsʼijbunti. Chaʼan mi lac mel, tajol miʼ mejlel laj qʼuel jiñi «Tabla de los libros de la Biblia», am bʌ tiʼ tejchibal jiñi Traducción del Nuevo Mundo de las Santas Escrituras (con referencias). Yicʼot miʼ mejlel laj qʼuel jiñi tabla muʼ bʌ i yʌl chaʼan jiñi xʼaltʼañob yicʼot reyob, muʼ bʌ i tilel yaʼ ti sección 3 chaʼan jiñi folleto Guía para el estudio de la Palabra de Dios. Come jiñi libro woli bʌ laj qʼuel miʼ yʌl chaʼan profecía tac, miʼ mejlel laj qʼuel bajcheʼ yilal chumul jiñi quixtañujob cheʼ bʌ tsaʼ tsʼijbunti. Miʼ mejlel lac sʌclan bajcheʼ yilal jiñi melbalʌl (chaʼleya) tac yom bʌ jiñi xʼaltʼan chaʼan miʼ tojʼesʌntel yicʼot majqui tsaʼ bʌ chumleyob jaʼel ti jimbʌ ora.  I chaʼan ñumen tsʼʌcʌl chuqui yom bʌ mi lac ñaʼtan, tajol yom mi laj qʼuel jiñi yan tac bʌ libro chaʼan jiñi Biblia. Jumpʼejl ejemplo, chaʼan mi lac wen chʼʌmben i sujm chuqui woliʼ yujtel tiʼ yorajlel xʼaltʼan Amós, miʼ mejlel lac pejcan 2 Reyes 14:25-28 yicʼot 2 Crónicas 26:1-15. * Miʼ mejlel i coltañonla jaʼel cheʼ mi lac pejcan jiñi libro i chaʼan Oseas, tajol tsaʼ bʌ chumle cheʼ ti yorajlel Amós. Pejtelel iliyi miʼ coltañonla lac ñumen chʼʌmben i sujm bajcheʼ yilal cheʼ ti yorajlel Amós (Os. 1:1-11; Am. 1:1).

17, 18. Tsictesan bajcheʼ miʼ coltañonla chaʼan mi lac ñusan lac bʌ tiʼ pejcʌntel jiñi Biblia cheʼ mi lac tsajin jiñi mach bʌ wen ñuquic tac yilal. Cʼʌñʌ jiñi ejemplo tac muʼ bʌ i tilel o yan tac bʌ.

¹⁷ Cheʼ mi lac pejcan jiñi Biblia yom mi lac mulan lac luʼ cʌn. Jumpʼejl ejemplo, laʼ lac ñaʼtan chaʼan woli lac pejcan majlel jiñi capítulo 12 i chaʼan Zacarías, baqui miʼ yʌl chaʼan jiñi Mesías mi caj i chʌmel (sajtel) (Zac. 12:10). Cheʼ mi laj cʼotel yaʼ ti versículo 12, mi lac taj lac pejcan chaʼan «jiñi familia tiʼ yotot Natán» mi caj i wen ucʼtañob cheʼ bʌ miʼ chʌmel jiñi Mesías. Chaʼan maʼañic mi lac toʼol ñusan, miʼ mejlel laj cʼajtiben lac bʌ: «¿Chucoch miʼ yotsʌntel jiñi i yotot o i familia Natán yicʼot jiñi Mesías? ¿Chuqui miʼ mejlel i coltañon c ñumen ñaʼtan?». Cheʼ jiñi, mi lac bej sʌclan. Jumpʼejl ejemplo, miʼ mejlel lac sʌclan jiñi chaʼpʼejl referencia muʼ bʌ i chʼʌm tilel Zacarías 12:12 yaʼ ti Traducción del Nuevo Mundo de las Santas Escrituras. Jiñi ñaxam bʌ, miʼ choconla majlel ti 2 Samuel 5:13, 14, baqui miʼ yʌl chaʼan Natán jiñʌch juntiquil i yalobil David. Jiñi yambʌ jiñʌch Lucas 3:31, baqui miʼ pʌs chaʼan Jesús tilemʌch tiʼ pʼolbal Natán tiʼ tojlel jiñi María (qʼuele jiñi Lac Tsictesʌbentel i chaʼan agosto, 2017, i yopol 32, párrafo 4). ¡Toj sajtel  lac pusicʼal cheʼ mi laj cʌn iliyi! La cujil chaʼan wʌn albil chaʼan Jesús mi caj i tilel tiʼ pʼolbal David (Mt. 22:42). Pero David ñumen ti 20 i yalobil. Cheʼ mi laj cʌn iliyi, mi lac chʼʌmben i sujm chucoch tsiʼ yʌlʌ Zacarías chaʼan yaʼ tiʼ yotot Natán mi caj i yucʼtʌntel cheʼ miʼ chʌmel Jesús.

¹⁸ Yambʌ ejemplo. Yaʼ ti capítulo 1 i chaʼan Lucas, mi laj qʼuel chaʼan jiñi ángel Gabriel tsiʼ julaʼta María i tiʼ sube chaʼan jiñi i yalobil muʼ bʌ caj i taj: «Mi caj i qʼuejlel ti ñuc. Mi caj i pejcʌntel tiʼ Yalobil jini Cʼax Ñuc bʌ. Lac Yum Dios mi caj i yʌqʼuen i yeʼtel ti Rey tiʼ qʼuexol i ñojteʼel, i cʼabaʼ David. Mi caj i chaʼlen i yeʼtel ti Rey tiʼ tojlel i pʼolbal Jacob ti pejtelel ora» (Lc. 1:32, 33). Tajol mi lac ñumen tsajin cheʼ bʌ jiñi ángel tsiʼ yʌlʌ chaʼan Jesús mi caj i subentel tiʼ «Yalobil jini Cʼax Ñuc bʌ». Pero Gabriel tsiʼ yʌlʌ jaʼel chaʼan Jesús mi caj i yochel ti rey. Jin chaʼan, miʼ mejlel laj cʼajtiben lac bʌ chuqui tsiʼ ñaʼta María cheʼ tsiʼ yubi jiñi tʼan. ¿Tsaʼ ba i ñaʼta chaʼan yom i yʌl chaʼan Jesús mi caj i yochel bajcheʼ rey tiʼ qʼuexol Herodes, o ti jiñi wiʼil bʌ rey ti Israel? ¿Tsaʼ ba i ñaʼta chaʼan mi cheʼ bajcheʼ jiñi mi caj i sujtel ti ñaʼ jiñi rey i jiñi i familia mi caj i chumtʌl ti jumpʼejl palacio? Yaʼ ti Biblia maʼañic baqui miʼ pʌs chaʼan María cheʼ tsiʼ yʌqʼue i ñaʼtan jiñi ángel Gabriel. I maʼañic baqui mi laj qʼuel chaʼan tsiʼ cʼajti ñuc bʌ i yeʼtel tiʼ Yumʌntel Dios, cheʼ bajcheʼ tsiʼ mele chaʼtiquil xcʌntʼañob i chaʼan Jesús (Mt. 20:20-23). Ili miʼ pʌsbeñonla chaʼan María wen añʌch i pecʼlel.

19, 20. Cheʼ bajcheʼ miʼ yʌl Santiago 1:22-25 yicʼot 4:8, ¿chuqui la com lac taj cheʼ mi lac chaʼlen estudio?

¹⁹ Laʼ laj cʼajtesan chaʼan cheʼ mi lac pejcan i Tʼan Dios yicʼot jiñi lac jun tac chaʼañʌch la com lac ñumen lʌcʼtesan lac bʌ ti Jehová. Pero yicʼot jaʼel la com lac ñumen cʌn lac bʌ i mi laj qʼuel baqui yom mi lac ñumen tojʼan chaʼan utsʼat miʼ qʼuelonla Dios (pejcan Santiago 1:22-25; 4:8). Jin chaʼan, yom mi laj cʼajtiben chʼujul bʌ i yespíritu Jehová cheʼ jajayajl mi lac chaʼlen estudio. Cheʼ jaʼel, yom mi laj cʼajtiben ti wocol tʼan chaʼan miʼ coltañonla lac tajben i wenlel yicʼot chaʼan mi laj cʌn chuqui yom mi laj qʼuextan ti lac tojlel.

²⁰ Ti lac pejtelel cheʼ yomonla bajcheʼ jiñi i wiñic Dios muʼ bʌ i yʌjlel ti Salmo 1:2, 3: «Miʼ taj i tijicñʌyel tiʼ mandar lac Yum, miʼ chʌn ñaʼtan chuqui yom lac Yum ti qʼuinil yicʼot ti acʼʌlel. [...] Pejtel chuqui miʼ mel jini winic utsʼat miʼ yujtel».