1, 2. a) ¿Chuqui ti ejemplo miʼ pʌs chaʼan ti lac pejtelel la com mi lac ñuqʼuesʌbentel lac pusicʼal i chaʼan mucʼʌch i mejlel lac mel jaʼel? b) ¿Chuqui ti wocol miʼ ñusan cabʌl xbiʼtalob?

TI LAC pejtelel la com chaʼan mi lac ñuqʼuesʌbentel lac pusicʼal, i cheʼʌch miʼ mejlel lac mel jaʼel tiʼ tojlel yambʌlob. Jumpʼejl ejemplo, cheʼ bʌ juntiquil alob miʼ yajlel cheʼ choncol ti alas i miʼ low i pix, ti ajñel miʼ majlel baʼan i papá o i mamá. Anquese maʼañic miʼ mejlel i lajmesʌbeñob i lojweñal, mucʼʌch i mejlel i ñuqʼuesʌbeñob i pusicʼal. Miʼ cʼajtibeñob chuqui tsiʼ chaʼle, miʼ sujcubeñob i yaʼlel i wut, miʼ mecʼob yicʼot wen jach miʼ pejcañob, i tajol miʼ pocbeñob i lojweñal i miʼ tsʼʌcʌbeñob. Cheʼ jiñi, jiñi alob miʼ ñʌjchʼel i tajol miʼ chaʼ majlel ti alas. Ti wiʼil, miʼ tsoyʼan jiñi i lojweñal.

² Pero an yambʌ ñumen tsʌts bʌ bajcheʼ miʼ lojwelob jiñi alobob. An ticʼlʌbiloʼ bʌ chaʼan piʼleya, tajol junyajl jach o cabʌl jab tsaʼ melbentiyob bajcheʼ jiñi. Tajol wen cʼuxʌch miʼ yubiñob chuqui tsaʼ melbentiyob, i maʼañic miʼ ñajʌyelob i chaʼan. An xticʼlayajob mucʼʌch bʌ i chujquelob i miʼ yʌqʼuentelob i toj i mul, i an muʼ bʌ i mejlel i mucob jiñi i mul. Anquese jiñi xticʼlaya mucʼʌch i yʌqʼuentel i toj i mul, jiñi tsaʼ bʌ ticʼlʌnti muʼto i bej ubin wocol anquese ñuquix.

3. a) Cheʼ bajcheʼ miʼ yʌl 2 Corintios 1:3, 4, ¿chuqui yom Jehová? b) ¿Chuqui ti cʼajtiya tac mi caj lac jacʼ?

³ ¿Chuqui miʼ mejlel i coltan juntiquil xñoptʼan tsaʼ bʌ ticʼlʌnti cheʼ alobto i wolito bʌ i bej chaʼlen wersa i ñajʌtesan? (Pejcan 2 Corintios 1:3, 4). Wen tsiquil chaʼan yom bʌ Jehová jiñʌch cheʼ jiñi i tiñʌmeʼob miʼ pʌsbentelob cʼuxbiya yicʼot miʼ ñuqʼuesʌbentelob i pusicʼal. Jin chaʼan, laʼ laj qʼuelben i jacʼbal  ili uxpʼejl cʼajtiya: ¿Chucoch yom miʼ ñuqʼuesʌbentelob i pusicʼal jiñi tsaʼ bʌ ticʼlʌntiyob? ¿Majqui miʼ mejlel i mel? I ¿chuqui miʼ mejlel lac mel chaʼan mi lac ñuqʼuesʌbeñob i pusicʼal?

4, 5. a) ¿Chucoch ñuc i cʼʌjñibal cheʼ cʼajal lac chaʼan chaʼan jiñi alobob mach lajalobic yicʼot jiñi ñucobix bʌ? b) ¿Baqui bʌ wocol miʼ tajob jiñi alobob muʼ bʌ i ticʼlʌntelob?

⁴ An quixtañujob tsaʼ bʌ ticʼlʌntiyob cheʼ bʌ chutobto i yom miʼ bej ñuqʼuesʌbentelob i pusicʼal, anquese ñumeñix cabʌl jab. Chaʼan mi lac chʼʌmben i sujm chucoch, ñaxan yom cʼajal lac chaʼan chaʼan jiñi alobob mach lajalobic bajcheʼ jiñi ñucobix bʌ i mach lajalic miʼ ñusʌbeñob i wocolel chaʼan tsaʼ bʌ tumbentiyob. Laʼ laj qʼuel chucoch.

⁵ Jiñi chutobto bʌ i cʼʌjñibalob i chaʼan cheʼ wen ñocholob yicʼot jiñi muʼ bʌ i cosañob i miʼ cʌntañob. Jiñʌch muʼ bʌ i coltañob chaʼan cʌntʌbil miʼ yubiñob i bʌ yicʼot maʼañic miʼ bʌcʼñañob i miʼ ñopbeñob i tʼan muʼ bʌ i cʼuxbiñob (Sal. 22:9). Chʼijiyemtic jax ti alol, pero jiñi ticʼlʌntel ti piʼleya an ujtem tiʼ yotot jiñi alobob, i muʼ bʌ i melob jiñobʌch i cʌñʌyoʼ bʌ yicʼot i familia. Jin chaʼan, cheʼ bʌ juntiquil alob o xchʼoc miʼ ticʼlʌntel tiʼ tojlel juntiquil wen i cʌñʌ bʌ, wocolix mi caj i yubin chaʼan miʼ jacʼben o miʼ ñopben i tʼan yambʌlob.

6. ¿Chucoch jiñi ticʼlʌntel ti piʼleya jiñʌch wen jontol bʌ melbalʌl i miʼ yʌcʼ cabʌl wocol?

⁶ Jiñi chutobto bʌ maxto mejlic i bajñel cʌntañob i bʌ. Jiñi ticʼlʌntel ti piʼleya wen jontol bʌ melbalʌl (chaʼlebal) i miʼ wen aqʼueñob i yubin wocol. Ñumento miʼ ñusañob wocol jiñi chutobto bʌ cheʼ miʼ xijqʼuelob ti piʼleya come maxto chajpʌbilobic i bʌcʼtal yicʼot ti bajcheʼ miʼ yubiñob i bʌ, i maxto yujilobic chuquiyes jiñi ñujpuñel yicʼot piʼleya. Jiñi ticʼlʌntel miʼ qʼuextʌbeñob i pensar chaʼan bajcheʼ yilal yom miʼ qʼuelob jiñi piʼleya, bajcheʼ yilal miʼ qʼuelob i bʌ yicʼot jiñi majqui jach bʌ yom i ñochtan.

7. a) ¿Chucoch juntiquil xticʼlaya mach wocolic miʼ yubin chaʼan miʼ lotin juntiquil alob, i bajcheʼ miʼ mejlel i mel? b) ¿Baqui tac bʌ wocol miʼ yʌcʼ jiñi lot tac?

⁷ Jiñi chutobto bʌ maxto muqʼuic i wen mejlelob i ñaʼtan, i chʼʌmbeñob i sujm, i cʌñob yicʼot i tʌtsʼob i bʌ baʼan wocol tac (1 Co. 13:11). Jin chaʼan, juntiquil xticʼlaya mach wocolic miʼ yubin chaʼan miʼ lotin juntiquil alob. Miʼ suben lot tac muʼ bʌ i wen aqʼuen wocol, chaʼan jiñʌch tiʼ sʌcla i ticʼlʌntel, chaʼan mach yomic miʼ sub, chaʼan maʼañic majch mi caj i ñopben i tʼan mi an chuqui tsiʼ yʌlʌ i chaʼan tsaʼ bʌ i melbe cheʼʌch bajcheʼ miʼ yoque pʌstʌl jiñi cʼuxbiya. Tiʼ caj jiñi, cabʌl jab mi caj i ñumel chaʼan jiñi alob miʼ cʼotel i ñaʼtan chaʼan lot jach pejtelel tsaʼ bʌ subenti. Tajol cheʼ bʌ miʼ colel majlel jiñi alob o xchʼoc bibiʼ jax miʼ yubin i bʌ, chaʼan maʼañix i cʼʌjñibal i mach yomix miʼ chʼʌjmel ti ñuc mi chaʼañic miʼ pʌsbentel cʼuxbiya.

8. ¿Chucoch miʼ mejlel lac ñop chaʼan Jehová miʼ mejlel i ñuqʼuesʌbeñob i pusicʼal jiñi tsaʼ bʌ i yilayob wocol?

⁸ Cheʼ bajcheʼ woli (choncol) laj qʼuel, i sujmʌch cheʼ miʼ yʌcʼ cabʌl wocol jiñi ticʼlʌntel ti piʼleya. Jumpʼejlʌch tsʌts bʌ mulil. Tsiquil chaʼan chumuloñixla ti cojix tac bʌ qʼuin cheʼ mi laj qʼuel miʼ yujtel ili wocol, come ili ora an cabʌl quixtañujob maʼañobic bʌ i «cʼuxbiya» i jiñi wiñicob ‹jontolob yicʼot xlotiyajob utsi utsijax miʼ chʌn melob i jontolil› (2 Ti. 3:1-5, 13). Wen jontol jax muʼ bʌ i cʼʌn Satanás, i chʼijiyemtic jax cheʼ cabʌl quixtañujob mi melob chuqui yom. Pero Jehová ñumen pʼʌtʌl bajcheʼ Satanás yicʼot jiñi quixtañujob muʼ bʌ jacʼbeñob i tʼan. Cheʼ jaʼel, Dios wen i cʌmbe i melbal. Jin chaʼan, miʼ mejlel lac ñop chaʼan Dios mucʼʌch i chʼʌm ti ñuc bajcheʼ mi la cubin lac bʌ i chaʼan mucʼʌch mejlel  i ñuqʼuesan lac pusicʼal. Miʼ yʌqʼueñonla lac tijicñʌyel cheʼ woli lac chʼujutesan jiñi ‹Dios muʼ bʌ i ñuqʼuesan lac pusicʼal tiʼ pejtelel lac wocol chaʼan mi lac ñuqʼuesʌbeñob i pusicʼal yañoʼ bʌ tiʼ pejtelel [«baqui jach bʌ», TNM] i wocol. Cheʼ jini, mi lac ñuqʼuesʌbeñob i pusicʼal cheʼ bajcheʼ Dios tsiʼ ñuqʼuesʌbeyonla lac pusicʼal› (2 Co. 1:3, 4). Cheʼ jiñi, ¿majqui miʼ cʼʌn Jehová chaʼan miʼ ñuqʼuesan lac pusicʼal?

9. Cheʼ bajcheʼ tiʼ tsʼijbu jiñi rey David yaʼ ti Salmo 27:10, ¿chuqui mi caj i mel Jehová tiʼ tojlel jiñi maʼañic bʌ tsaʼ chʼʌjmiyob ti ñuc tiʼ familia?

⁹ Tajol yom miʼ ñumen ñuqʼuesʌbentelob i pusicʼal jiñi maʼañic bʌ tsaʼ chʼʌjmiyob ti ñuc tiʼ tatob cheʼ bʌ tsaʼ ticʼlʌntiyob o jiñi tsaʼ bʌ ticʼlʌntiyob tiʼ tojlel juntiquil i cʌñʌ bʌ. Jiñi rey David yujil chaʼan Jehová jiñʌch muʼ bʌ i mejlel i ñuqʼuesan lac pusicʼal (pejcan Salmo 27:10). Yujil chaʼan Dios miʼ cʌntan i miʼ pʌsben i yutslel jiñi maʼañic bʌ tsaʼ chʼʌjmiyob ti ñuc tiʼ familia. ¿Bajcheʼ miʼ mel? Miʼ cʼʌn jiñi xucʼul bʌ i wiñicob. Jiñi hermanojob jiñobʌch lac familia. Jumpʼejl ejemplo, Jesús tsiʼ yʌlʌ chaʼan muʼ bʌ i chʼujutesañob Jehová cheʼob bajcheʼ i yerañob, i yijtsʼiñob yicʼot i mamá (Mt. 12: 48-50).

10. ¿Chuqui tsiʼ yʌlʌ Pablo chaʼan i yeʼtel bajcheʼ anciano?

¹⁰ Laʼ laj qʼuel jumpʼejl ejemplo yaʼ ti congregación. Jiñi apóstol Pablo tsiʼ yʌcʼʌ wem bʌ ejemplo come jiñʌch juntiquil anciano wen yujil bʌ eʼtel (troñel) yicʼot xucʼul bʌ. Tiʼ coltaya i yespíritu Dios tiʼ sube jiñi xñoptʼañob chaʼan yom miʼ lajiñob cheʼ bajcheʼ woli (yʌquel) i lajin Cristo (1 Co. 11:1). Ti jumpʼejl bʌ qʼuin, Pablo tsiʼ yʌlʌ chaʼan jiñi i yeʼtel bajcheʼ anciano: «Uts tsaʼ ajniyon lojon ti laʼ tojlel cheʼ bajcheʼ xʼixic muʼ bʌ i cʼuxbin i yalobilob» (1 Ts. 2:7). Ti ili ora, jiñi xucʼul bʌ ancianojob miʼ cʼʌñob jaʼel jiñi Biblia chaʼan miʼ ñuqʼuesʌbeñob i pusicʼal jiñi añoʼ bʌ i chaʼan ili wocol, i miʼ melob yicʼot i yutslel i ti wen jach bʌ tʼan.

11. ¿Chuqui miʼ pʌs chaʼan mach cojic jach jiñi ancianojob miʼ mejlel i ñuqʼuesʌben i pusicʼal yambʌlob?

¹¹ Mach cojic jach jiñi ancianojob miʼ mejlel i ñuqʼuesʌben i pusicʼal jiñi tsaʼ bʌ ticʼlʌntiyob. Ti lac pejtelel yom mi lac jacʼ ili mandar: «Ñuqʼuesʌben  laʼ bʌ laʼ pusicʼal» (1 Ts. 4:18). Jiñi hermanajob añoʼ bʌ i colel tiʼ chaʼan bʌ Dios miʼ mejlel i wen coltañob jiñi hermanajob yomoʼ bʌ i ñuqʼuesʌntel i pusicʼal. Jinto jaʼel jiñi Jehová miʼ laj i bʌ bajcheʼ juntiquil ñaʼʌl muʼ bʌ i tijicñesʌben i pusicʼal i yalobil (Is. 66:13). Yaʼ ti Biblia mi lac taj wen tac bʌ ejemplo chaʼan xʼixicob tsaʼ bʌ i ñuqʼuesʌbe i pusicʼal yañoʼ bʌ (Jue. 11:37-40). Jehová wen utsʼat miʼ qʼuel jiñi hermanajob muʼ bʌ i coltañob jiñi woli bʌ i yubiñob chʼijiyemlel. An i tajol jiñi ancianojob miʼ mejlel i cʼajtibeñob juntiquil hermana añix bʌ i colel mi mejl i coltan yambʌ hermana woli bʌ i ñusan wocol. *

12. ¿Chuqui mach yomic mi lac mel cheʼ woli laj coltan juntiquil hermano?

¹² Cheʼ bʌ mi laj coltan juntiquil hermano, yom tsajilonla chaʼan maʼañic mi laj cʼajtiben tac chuqui mach bʌ yom i yʌl (1 P. 4:15). Cheʼ jiñi, ¿chuqui miʼ mejlel lac mel tiʼ tojlel yomoʼ bʌ coltʌntel yicʼot i ñuqʼuesʌbentelob i pusicʼal? Laʼ laj qʼuel joʼchajp muʼ bʌ i pʌsbeñonla jiñi Biblia.

13. a) Cheʼ bajcheʼ miʼ yʌl 1 Reyes 19:5-8, ¿chuqui tsiʼ mele i yángel Jehová tiʼ tojlel Elías? b) ¿Bajcheʼ miʼ mejlel lac lajin jiñi ángel?

¹³ Laʼ lac sʌclan bajcheʼ miʼ mejlel laj coltañob. Cheʼ bʌ jiñi xʼaltʼan Elías tsaʼ putsʼi come yom i tsʌnsañob, tsiʼ wen mele i pusicʼal i tsiʼ ñaʼta chʌmel (sajtel). Jin chaʼan, Jehová tsiʼ chocbe cʼotel juntiquil ángel chaʼan miʼ ñuqʼuesʌben i pusicʼal, tsiʼ yʌqʼue i waj i ti uts bʌ tʼan tiʼ sube chaʼan miʼ cʼux (pejcan 1 Reyes 19:5-8). Ili miʼ pʌsbeñonla chaʼan cheʼ bʌ an chuqui wen mi lac mel tiʼ tojlel jiñi woli bʌ i ñusan wocol anquese mach ñoj ñuquic yilal, mucʼʌch i mejlel i wen coltan. Tajol mi lac pʌy ti uchʼel, mi la cʌqʼuen alʌ majtan o mi lac tsʼijbuben jumpʼejl carta baqui mi lac suben chaʼan mi laj cʼuxbin yicʼot mi lac chʼʌm ti ñuc. Miʼ mejlel lac mel pejtelel ili mi wocol mi la cubin chaʼan mi la cʌl yicʼotob tsaʼ bʌ i ñusayob.

14. ¿Chuqui yambʌ mi laj cʌn tiʼ tojlel jiñi Elías?

¹⁴ Yom cʌntʌbil yicʼot tijicña mi la cʌqʼueñob i yubin i bʌ jiñi tsaʼ bʌ ticʼlʌntiyob. Laʼ lac chaʼ ñaʼtan tiʼ tojlel Elías. Jehová tsiʼ yʌqʼue i pʼʌtʌlel chaʼan miʼ chaʼlen ajñel cʼʌlʌl yaʼ ti wits Horeb, yaʼ baqui tsiʼ mele jumpʼejl trato yicʼot i tejclum ti wajali. Yaʼi, Elías tajol cʌntʌbil tsiʼ yubi i bʌ come ñajtix an tiʼ tojlel jiñi yom bʌ i tsʌnsan. ¿Chuqui yambʌ mi laj cʌn? Chaʼan mi la com laj coltan jiñi ticʼlʌbiloʼ bʌ, ñaxan yom mi la cʌqʼueñob i yubin chaʼan cʌntʌbilob. Jumpʼejl ejemplo, jiñi ancianojob yom miʼ ñaʼtañob chaʼan jiñi quixtañujob mach junlajalobic. Tajol juntiquil hermana ñumen wen yicʼot cʌntʌbil miʼ yubin i bʌ cheʼ miʼ pejcʌntel tiʼ yotot cheʼ an chuqui woliʼ jap o i cʼux, pero tajol yambʌ hermana ñumen wen miʼ yubin cheʼ yaʼ miʼ pejcʌntel tiʼ Yotlel Tempa bʌ.

15, 16. ¿Chuqui yom i yʌl cheʼ la cujil ñʌchʼtʌntel tʼan?

¹⁵ Yom la cujil i ñʌchʼtʌntel tʼan. Jiñi Biblia miʼ yʌqʼueñonla ili ticʼojel: «Yom pʼipʼetla cheʼ mi laʼ ñichʼtan tʼan. Mach yomic ora mi laʼ chaʼlen tʼan» (Stg. 1:19). ¿La cujil ba ñʌchʼtʌntel tʼan? Tajol mi lac ñaʼtan chaʼan yom jach ñʌchʼʌlonla, mi laj qʼuel cheʼ woliʼ pejcañonla i maʼañic chuqui mi la cʌl. Pero mach jin jach yom i yʌl jiñi. Laʼ laj qʼuel bajcheʼ tsiʼ mele Jehová tiʼ tojlel Elías. Cheʼ bʌ ili xʼaltʼan tsaʼ caji ti tʼan i tsiʼ yʌlʌ pejtelel chuqui miʼ cʼojoʼtan, Jehová tsiʼ wen ñʌchʼta. Tsiʼ qʼuele chaʼan Elías an i bʌqʼuen, i bajñel jach miʼ yubin bʌ yicʼot miʼ ñaʼtan chaʼan maʼañic i cʼʌjñibal pejtelel tsaʼ bʌ i mele. Jin chaʼan, Jehová wen jach bajcheʼ tsiʼ colta. Cheʼ bajcheʼ jiñi, tsiʼ  pʌsʌ chaʼan tsaʼʌch i chʼʌmʌ ti ñuc tsaʼ bʌ i yʌlʌ Elías (1 R. 19:9-11, 15-18).

¹⁶ Cheʼ bʌ woli lac ñʌchʼtan jiñi tsaʼ bʌ ticʼlʌnti, ¿bajcheʼ miʼ mejlel lac pʌs laj cʼuxbiya yicʼot lac pʼuntaya? An i tajol jumpʼejl wem bʌ tʼan miʼ mejlel i pʌsben chuqui mi la cubin. Miʼ mejlel lac suben: «Wen chʼijiyem mi cubin chaʼan tsaʼ bʌ a ñusa. Mach utsʼatic miʼ melbentel juntiquil chut bʌ bajcheʼ jiñi». I chaʼan mi lac ñaʼtan mi wolʌch lac chʼʌmben i sujm woli bʌ i subeñonla miʼ mejlel la cʌl: «Cheʼ bʌ tsaʼ wʌlʌ iliyi, tsaʼ c ñaʼta chaʼan..., ¿jiñʌch ba a wom bʌ a wʌl?». Mi cheʼʌch mi lac mel, mi caj i qʼuel chaʼan tiʼ sujm woli lac ñʌchʼtʌben i tʼan i chaʼan la com lac ñaʼtan bajcheʼ miʼ yubin i bʌ (1 Co. 13:4, 7).

17. ¿Chucoch yom la cujil pijt i mach ti orajic mi lac chaʼlen tʼan?

¹⁷ Yom tsajilonla chaʼan mach ti orajic mi lac chaʼlen tʼan. Mach yomic mi lac waʼ tsʼocben i tʼan chaʼan mi lac ticʼ o mi lac tojʼesan. Yom la cujil pijt. Cheʼ bʌ Elías tsiʼ pejca Jehová tsiʼ jamʌ sube bajcheʼ woliʼ yubin i bʌ. I cheʼ bʌ Jehová tsiʼ pʼʌtʼesʌbe i ñopoñel, Elías tsiʼ chaʼ sube bajcheʼ miʼ yubin i bʌ (1 R. 19:9, 10, 13, 14). Ili miʼ pʌsbeñonla chaʼan jiñi wolito bʌ i yubiñob i cʼuxel jiñi wocol, mach junyajlic jach mi caj i yʌlob. Cheʼ miʼ yujtel jiñi, wen jach mi caj lac ñʌchʼtañob, bajcheʼ tsiʼ mele Jehová. Mach lac subeñob chuqui yom miʼ melob, yom jach mi lac pʼuntañob yicʼot mi lac pʌsbeñob la cutslel (1 P. 3:8).

18. ¿Bajcheʼ yom mi lac chaʼlen oración chaʼan miʼ mejlel i coltan jiñi woli bʌ i ñusan wocol, i chucoch?

¹⁸ Laʼ lac chaʼlen oración ti jumpʼejl lac pusicʼal la quicʼotob. Juntiquil wem chʼijiyem bʌ tajol maʼañic miʼ mejlel i mel oración. Tajol mach tijicñayic miʼ yubin i bʌ chaʼan miʼ pejcan Jehová. Mi la com laj coltan, laʼ lac chaʼlen oración la quicʼot i mi la cʌlben i cʼabaʼ. Laʼ lac suben Jehová chaʼan joñonla yicʼot jiñi congregación mi lac wen cʼuxbin. Laʼ laj cʼajtiben ti wocol tʼan chaʼan miʼ coltan i lajmesʌben i chʼijiyemlel jiñi i tiñʌmeʼ. Jiñi oración tac  bajcheʼ iliyi miʼ mejlel i wen ñuqʼuesʌben i pusicʼal yambʌlob (Stg. 5:16).

19. ¿Chuqui mi caj i coltañonla lac chajpan lac bʌ chaʼan mi lac ñuqʼuesʌben i pusicʼal yambʌlob?

¹⁹ Laʼ lac yajcan wen tac bʌ tʼan muʼ bʌ i ñuqʼuesʌbeñob i pusicʼal. Yom mi lac ñaxan wen ñaʼtan chuqui mi caj la cʌl. Cheʼ maʼañic mi lac wen ñaʼtan muʼ bʌ la cʌl miʼ mejlel i low yambʌlob, pero jiñi wen tac bʌ tʼan miʼ mejlel i coltañob (Pr. 12:18). Jin chaʼan, laʼ laj cʼajtiben i coltaya Jehová chaʼan miʼ mejlel lac taj wen tac bʌ tʼan muʼ bʌ mejlel i yʌqʼuen i ñʌchʼtʌlel yicʼot miʼ pʼʌtʼesan jiñi lojwem bʌ i pusicʼal. Laʼ laj cʼajtesan chaʼan jiñi tʼan tac ñumen am bʌ i pʼʌtʌlel yaʼan ti Biblia come chʼoyolʌch ti Jehová (He. 4:12).

20. Tiʼ caj tsaʼ bʌ i ñusayob wajali, ¿chuqui miʼ ñopob jiñi tsaʼ bʌ ticʼlʌntiyob, i chuqui la com laj cʼajtesʌbeñob?

²⁰ An tsaʼ bʌ ticʼlʌntiyob wajali muʼ bʌ i ñopob chaʼan maʼañobic i cʼʌjñibal, bibiʼ jax miʼ yubiñob i bʌ yicʼot chaʼan maʼañix miʼ cʼuxbintelob. I tajol muʼto i ñaʼtañob chaʼan maʼañix chucoch yom miʼ cʼuxbintelob. Pero ili jumpʼejlʌch ñuc bʌ lot. Jin chaʼan, laʼ laj cʼajtesʌbeñob yicʼot jiñi Biblia chaʼan Jehová miʼ wen qʼuelob ti ñuc (qʼuele jiñi recuadro « Texto tac muʼ bʌ i ñuqʼuesan lac pusicʼal»). Laʼ laj cʼajtesan chaʼan cheʼ jiñi xʼaltʼan Daniel cʼuñix tsiʼ yubi i bʌ yicʼot wen chʼijiyem, Dios tsiʼ choco cʼotel juntiquil ángel chaʼan miʼ pʼʌtʼesan come yom i yʌqʼuen i ñaʼtan chaʼan ñucʌch i cʼʌjñibal yicʼot miʼ cʼuxbintel (Dn. 10:2, 11, 19). Cheʼʌch jaʼel ili ora, Jehová miʼ wen qʼuel ti ñuc jiñi la quermañojob chʼijiyemoʼ bʌ.

21. a) ¿Chuqui mi caj i chaʼleñob jiñi xticʼlayajob maʼañic bʌ miʼ cʌyob i mul? b) Pero ¿chuqui yom mi lac mel ili ora?

²¹ Cheʼ mi lac ñuqʼuesʌben i pusicʼal yambʌlob mi laj cʼajtesʌbeñob chaʼan Jehová jiñʌch juntiquil Dios yujil bʌ cʼuxbiya. Mach wis ñajʌyic lac chaʼan chaʼan juntiquilʌch Dios muʼ bʌ i mel chuqui toj. Maʼañic chuqui mucul miʼ cʌytʌl tiʼ tojlel. Miʼ luʼ taj i qʼuel i wersa mi caj i yʌqʼuen i toj i mul jiñi xticʼlayajob maʼañic bʌ miʼ cʌyob i mul (Nm. 14:18). Pero wʌle, laʼ lac chaʼlen wersa chaʼan mi lac pʌsbeñob laj cʼuxbiya jiñi tsaʼ bʌ ticʼlʌntiyob. Miʼ wen aqʼueñonla lac tijicñʌyel cheʼ la cujil chaʼan Jehová mi caj i junyajl jisan jiñi wocol muʼ bʌ i yubiñob am bʌ ticʼlʌntiyob tiʼ tojlel Satanás yicʼot i pañimil (mulawil). Tsʼitaʼ jax yom chaʼan maʼañix mi caj lac chʌn cʼajtesan pejtelel jiñi (Is. 65:17).