¿A wujilix ba?
¿Tsaʼ ba cʼʌjñi jiñi papiro chaʼan miʼ mejlel barco tac ti wajali?
I teʼel papiro.
CABɅL lac piʼʌlob yujilob chaʼan ti wajali jiñi egipciojob tsiʼ cʼʌñʌyob jiñi papiro chaʼan miʼ chaʼleñob tsʼijb. Jiñi griegojob yicʼot romanojob tsiʼ cʼʌñʌyob chaʼan miʼ chaʼleñob tsʼijb jaʼel. * Pero cabʌl lac piʼʌlob mach yujilobic chaʼan jiñi papiro tsaʼ cʼʌjñi chaʼan miʼ mejlel barco tac, i mach chaʼañic jach jiñi tsʼijb.
I yejtal chaʼpʼejl barco melbil bʌ ti papiro tsaʼ bʌ tajle ti jumpʼejl mucoñibʌl am bʌ ti Egipto.
Ñumeñix ti 2,500 jab, jiñi xʼaltʼan Isaías tiʼ tsʼijbu chaʼan jiñi lac piʼʌlob chumuloʼ bʌ «yaʼ ti lum baqui an jiñi colem jaʼ tac am bʌ ti Etiopía» tsiʼ chocoyob majlel «xsuboñelob ti mar, ti barco tac melbil bʌ ti papiro». Ti wiʼil, jiñi xʼaltʼan Jeremías tsiʼ wʌn alʌ chaʼan cheʼ bʌ jiñi medojob yicʼot persajob miʼ yochelob ti Babilonia, mi caj i pulob «jiñi barco tac melbil bʌ ti papiro» chaʼan maʼañic miʼ putsʼelob jiñi babiloniojob (Is. 18:1, 2, TNM; Jer. 51:32, TNM).
Jiñi Biblia tilemʌch ti Dios, jin chaʼan jiñi muʼ bʌ i pejcañob maʼañic miʼ toj sajtelob i pusicʼal cheʼ jiñi arqueólogojob an i tajayob muʼ bʌ i pʌs chaʼan jiñi papiro tsaʼ cʼʌjñi chaʼan miʼ mejlel barco tac (2 Ti. 3:16). Laʼ laj qʼuel chaʼpʼej uxpʼejl tajbil bʌ ti Egipto muʼ bʌ i pʌs bajcheʼ cʼʌmbil jiñi papiro chaʼan miʼ mejlel barco tac.
¿BAJCHEʼ MIʼ MEJLEL JIÑI BARCO TAC TI PAPIRO?
Yaʼ ti Egipto an mucoñibʌl baqui tajlem dibujo tac muʼ bʌ i pʌs bajcheʼ miʼ tempʌntel jiñi papiro yicʼot bajcheʼ miʼ mejlel jiñi barco tac. Jiñi wiñicob miʼ tsepbeñob i teʼel jiñi papiro i wen tsʌts miʼ seset cʌchob. Jiñi i teʼel tac cheʼ bajcheʼ triángulo, jin chaʼan cheʼ bʌ miʼ seset cʌjchel wen tsʌts ñetʼel miʼ cʌytʌl. Jumpʼejl libro miʼ yʌl chaʼan jiñi barco tac melbil bʌ ti papiro an i tajol an i chaʼan 17 metro i tamlel i an i chaʼan 10 o 12 remo ti jujunwejl (A Companion to Ancient Egypt).
Jumpʼejl dibujo muʼ bʌ i pʌs bajcheʼ miʼ mejlel jiñi barco tac ti papiro.
¿CHUCOCH TSAʼ MEJLI BARCO TAC TI PAPIRO?
Jiñi papiro miʼ wen tajtʌl yaʼ ti joctʌl am bʌ ti Nilo. Mach wocolic chaʼan miʼ cʼʌjñel chaʼan miʼ mejlel jiñi barco tac. Anquese tsaʼ caji ti wen cʼʌjñel jiñi teʼ chaʼan miʼ mejlel ñuqui barco tac, jiñi xchuc chʌyob yicʼot muʼ bʌ i chucob yambʌ añimal tac jiñʌch tsaʼ caji i bej cʼʌñob jiñi alʌ barco tac melbil bʌ ti papiro.
Jiñi barco tac melbil bʌ ti papiro cabʌlto jab tsaʼ wen cʼʌjñi. Juntiquil historiador chʼoyol bʌ ti Grecia i cʼabaʼ Plutarco, tsaʼ bʌ chumle tiʼ yorajlel jiñi ñaxam bʌ xñoptʼañob, tsiʼ yʌlʌ chaʼan jiñi wiñicob xʼixicob ti jiñi bʌ ora tsaʼto i bej cʼʌñʌyob jiñi alʌ barco tac melbil bʌ ti papiro.
^ parr. 3 Jiñi papiro miʼ colel ti pantano tac yicʼot ti jaʼ mach bʌ añic i corrientejlel. An i tajol 5 metro miʼ taj i chanlel, i jiñi i bontʌlel an cheʼ bʌ 15 centímetro.
