1, 2. ¿Chuqui tac ti wocol miʼ ñusañob cabʌl Testigojob?

JIÑI apóstol Pablo tiʼ sube Timoteo chaʼan miʼ mel ti tsʼʌcʌl jiñi i yeʼtel i yaʼʌch ochem jaʼel tiʼ pejtelel xñoptʼañob (2 Ti. 4:5). Ti lac pejtelel mi lac chaʼlen wersa lac jacʼ ili ticʼojel, pero an i tajol wocolʌch. Cabʌl hermanojob yomʌch añob i chʼejlel chaʼan miʼ loqʼuelob ti subtʼan (2 Ti. 4:2). Laʼcu lac ñaʼtan tiʼ tojlel jiñi hermanojob chumuloʼ bʌ baqui mʌctʌbil jiñi la queʼtel o maʼañic miʼ mejlel i melob ti tsʼʌcʌl. Jajayajl miʼ loqʼuelob ti subtʼan bʌbʌqʼuen miʼ chujquelob.

² Jiñi i wiñiconbʌla Jehová mi lac ñusan wocol tac muʼ bʌ i yʌqʼueñonla lac chʼijyemlel. Cabʌlob yom bʌ miʼ wen chaʼleñob eʼtel chaʼan miʼ yʌqʼueñob chuqui i cʼʌjñibal bʌ jiñi i familia. Muʼca i ñumen mulañob loqʼuel ti subtʼan, pero lujbobix cheʼ tiʼ yujtibal semana. Yambʌlob maʼañic miʼ cʌlʌx mejlel i melbeñob i yeʼtel Jehová tiʼ caj añob tsʌts bʌ i cʼamʌjel o tiʼ caj i ñoxlel. I tajol an mach bʌ añic mi junyajl mejlelob ti loqʼuel tiʼ yotot. I an yañoʼ bʌ mach bʌ añobic i cʼʌjñibal miʼ yubiñob i bʌ. Juntiquil hermana ti Oriente Medio i cʼabaʼ Mary * miʼ yʌl: «Wen chʼijyem mi cubin c bʌ tiʼ caj maʼañic j cʼʌjñibal mi cubin. Ti wiʼil mach tijicñayic mi cubin c bʌ, tiʼ caj jiñi maʼañix mic wen cʼʌn jiñi i yorajlel am bʌ c chaʼan yicʼot jiñi c pʼʌtʌlel ti subtʼan».

3. ¿Chuqui mi caj laj qʼuel ti ili estudio?

³ Mach yʌlʌyic chuqui ti wocol woli lac ñusan, Jehová mi caj i yʌqʼueñonla lac pʼʌtʌlel chaʼan mi lac lʌtʼ yicʼot chaʼan mi lac  chʌn melben jiñi i yeʼtel cheʼ bajcheʼ cʼamel mi lac mejlel. Ti ili estudio mi caj laj qʼuel, bajcheʼ miʼ coltañonla Jehová. Pero mi caj lac ñaxan qʼuel bajcheʼ tsiʼ pʼʌtʼesa Pablo yicʼot Timoteo chaʼan miʼ tsʼʌctesañob jiñi i yeʼtel anquese añob i wocol.

4. ¿Chuqui tac ti wocol tsiʼ ñusa Pablo?

⁴ Pablo tsiʼ ñusa cabʌl wocol. Cheʼ bʌ tsaʼ jajtsʼi, cheʼ bʌ tsaʼ jujli ti xajlel yicʼot cheʼ bʌ tsaʼ otsʌnti ti cárcel tsaʼ cʼʌjñibʌyi i chaʼan miʼ pʼʌtʼesʌntel (2 Co. 11:23-25). Tsiʼ yʌlʌ jaʼel chaʼan an i tajol maʼañic i cʼʌjñibal miʼ yubin i bʌ (Ro. 7:18, 19, 24). Cheʼ jaʼel, tsiʼ wen cʼajtibe Dios chaʼan miʼ locʼsʌben jumpʼejl wocol am bʌ tiʼ bʌcʼtal (2 Co. 12:7, 8).

5. ¿Chuqui tac tsiʼ mele Pablo anquese an i wocol?

⁵ Jehová tsiʼ yʌqʼue i pʼʌtʌlel Pablo chaʼan miʼ tsʼʌctesan jiñi i yeʼtel anquese an i wocol tac. Laʼ lac ñaʼtan chuqui tac tsiʼ mele Pablo. Cheʼ bʌ cʌchʌl yaʼ baqui chumul ti Roma tiʼ sube wen tʼan jiñi judíojob ñucoʼ bʌ i yeʼtel i tajol yicʼot jiñi i wiñicob yumʌlob (Hch. 28:17; Fil. 4:21, 22). Cheʼ jaʼel, tiʼ sube wen tʼan jiñi soldadojob yicʼot muʼ bʌ i cʼotelob ti julaʼ (Hch. 28:30, 31; Fil. 1:13). Ti jimbʌ ora jaʼel Dios tsiʼ cʼʌñʌ jiñi apóstol Pablo chaʼan miʼ tsʼijbun carta tac am bʌ i yʌqʼue i wenlel jiñi xñoptʼañob cʼʌlʌl ili ora. Jiñi hermanojob yaʼ ti Roma tsaʼ pʼʌtʼayob chaʼan jiñi ejemplo tsaʼ bʌ i pʌsʌ. Tsiʼ ñumen pʌsʌyob i chʼejlel tiʼ subol jiñi wen tʼan, maʼañobix i bʌqʼuen (Fil. 1:14). Anquese maʼañic tsaʼ mejli i mel cheʼ bajcheʼ cʼamel yom, tsaʼʌch i mele cheʼ bajcheʼ miʼ mejlel i tsiʼ yʌlʌ chaʼan jiñi i wocol tsiʼ yʌcʼʌ chaʼan miʼ ñumen pujquel jiñi wen tʼan (Fil. 1:12).

6. Cheʼ bajcheʼ miʼ yʌl 2 Corintios 12:9, 10, ¿chuqui tsiʼ colta Pablo chaʼan miʼ tsʼʌctesan i yeʼtel?

⁶ Pablo yujil chaʼan pejtelel chuqui tsiʼ mele mach tiʼ bajñel pʼʌtʌlelic, yicʼotʌch i pʼʌtʌlel Dios. Pablo tiʼ tsʼijbu chaʼan jiñi i pʼʌtʌlel Dios miʼ tsʼʌctiyel tiʼ cʼunlel wiñicob (pejcan 2 Corintios 12:9, 10). Jehová tsiʼ cʼʌñʌ jiñi chʼujul bʌ i yespíritu chaʼan miʼ pʼʌtʼesan Pablo chaʼan miʼ tsʼʌctesan jiñi i yeʼtel anquese an i ticʼlʌntel, miʼ yotsʌntel ti cárcel yicʼot yan tac bʌ wocol.

7. ¿Chuqui ti wocol tac tsiʼ ñusa Timoteo chaʼan miʼ tsʼʌctesan jiñi i yeʼtel?

⁷ Timoteo tsaʼʌch cʼʌjñibʌyi i chaʼan i pʼʌtʌlel  Dios jaʼel chaʼan miʼ tsʼʌctesan jiñi i yeʼtel. Jumpʼejl ejemplo, tsajñi yicʼot Pablo ti subtʼan ti ñajt. Cheʼ jaʼel, Pablo tsiʼ choco majlel i julaʼtan yicʼot i pʼʌtʼesan jiñi congregación tac (1 Co. 4:17). Tajol Timoteo mach mejlic i mel jiñi eʼtel tsiʼ yubi. Tajol jin chaʼan Pablo tiʼ sube: «Mach a wʌcʼ a bʌ ti tsʼaʼlentel tiʼ tojlel winicob chaʼan chʼiton winiquet to» (1 Ti. 4:12). Cheʼ jaʼel, ti jimbʌ ora, Timoteo an i wocol tiʼ bʌcʼtal come jiñi Biblia miʼ yʌl chaʼan wen yujil cʼamʼan (1 Ti. 5:23). Pero Timoteo yujil chaʼan jiñi chʼujul bʌ i yespíritu Jehová mi caj i yʌqʼuen i pʼʌtʌlel chaʼan miʼ sub jiñi wen tʼan yicʼot chaʼan miʼ coltan jiñi i yermañujob (2 Ti. 1:7).

8. ¿Bajcheʼ miʼ pʼʌtʼesañonla Jehová ili ora?

⁸ Ili ora, Jehová miʼ yʌqʼueñonla «jiñi ñuc bʌ lac pʼʌtʌlel» chaʼan mi lac bej melben i yeʼtel (2 Co. 4:7). Laʼ laj qʼuel chʌnchajp tsaʼ bʌ i yʌqʼueyonla Jehová chaʼan miʼ pʼʌtʼesañonla yicʼot chaʼan xucʼul mi la cajñel: Jiñi oración, jiñi Biblia, jiñi la quermañujob yicʼot jiñi subtʼan.

9. ¿Bajcheʼ miʼ coltañonla jiñi oración?

⁹ Jiñi oración. Ti Efesios 6:18, Pablo tsiʼ yʌlʌ: «Chalenla oración ti pejtelel ora». Mi mucʼʌch lac mel, Dios mi caj i pʼʌtʼesañonla. Jonnie, chumul bʌ ti Bolivia, tsiʼ qʼuelbe i coltaya Jehová cheʼ bʌ tsiʼ ñusa cabʌl wocol. Jiñi i tat i ñaʼ yicʼot i yijñam tsaʼ tem cʼamʼayob. Wocol tsiʼ yubi chaʼan miʼ cʌntañob. Jiñi i mamá tsaʼ chʌmi, i jiñi i yijñam yicʼot i papá jalto tsaʼ cʼocʼayob. Jonnie miʼ yʌl: «Cheʼ bʌ wen wocol mi cubin, jamʌ tsiquil mic suben Jehová bajcheʼ yubil mi cubin». Jehová tsiʼ colta chaʼan miʼ cuch jiñi wocol. Ti jin jach bʌ país, juntiquil anciano i cʼabaʼ Ronald tsiʼ yubi chaʼan jiñi i mamá an i chaʼan cáncer, i tiʼ jumpʼejlel uw tsaʼ chʌmi. ¿Chuqui tsiʼ colta? Miʼ yʌl: «Jiñi oración tsiʼ coltayon c jamben c pusicʼal Jehová. Cujil chaʼan jiñʌch muʼ bʌ i mejlel i ñumen chʼʌmben i sujm bajcheʼ yubil mi cubin». Tajol an qʼuiñil cabʌl jax chuqui an ti lac jol o mach la cujilic chuqui yom mi la cʌl ti la coración, pero Jehová miʼ subeñonla chaʼan mi lac suben anquese tajol wocol mi la cubin (Ro. 8:26, 27).

10. Cheʼ bajcheʼ miʼ yʌl Hebreos 4:12, ¿chucoch ñuc i cʼʌjñibal mi lac pejcan jiñi Biblia yicʼot mi lac wen ñaʼtan?

¹⁰ Jiñi Biblia. Cheʼ bajcheʼ Pablo, joñonla jaʼel miʼ mejlel lac pejcan jiñi Tsʼijbujel chaʼan mi lac pʼʌtʼesʌntel yicʼot miʼ ñuqʼuesʌntel lac pusicʼal (Ro. 15:4). Cheʼ bʌ mi lac pejcan yicʼot mi lac wen ñaʼtan jumpʼejl texto, Jehová miʼ mejlel i cʼʌn jiñi i yespíritu chaʼan miʼ coltañonla lac ñaʼtan bajcheʼ miʼ coltañonla (pejcan Hebreos 4:12). Ronald, tsaʼix bʌ lac taja ti tʼan, miʼ yʌl: «Tijicñayon cheʼ tsaʼ ñʌmʼayon c pejcan jiñi Biblia ti jujumpʼejl acʼʌlel. Mic wen ñaʼtan jiñi i melbal tac Jehová yicʼot jiñi cʼuxbiya muʼ bʌ i pʌsben i wiñicob, ili miʼ chaʼ pʼʌtʼesañon».

11. ¿Bajcheʼ tsiʼ pʼʌtʼesa juntiquil hermana jiñi Biblia?

¹¹ Cheʼ mi lac wen ñaʼtan muʼ bʌ i yʌl jiñi i Tʼan Dios miʼ coltañonla chaʼan wen jach mi laj qʼuel jiñi lac wocol tac. Laʼ laj qʼuel chuqui tsaʼ ujti tiʼ tojlel juntiquil hermana tsaʼ bʌ chʌmi i ñoxiʼal. Juntiquil anciano tiʼ sube chaʼan miʼ pejcan jiñi libro chaʼan Job i tiʼ sube chaʼan mi caj i coltan. Cheʼ bʌ tsiʼ pejca tsiʼ yʌlʌ chaʼan mach weñic bajcheʼ woliʼ ñaʼtan Job. Tsiʼ ñaʼta: «Job, mach weñic bajcheʼ woli a ñaʼtan». Tsiʼ qʼuele chaʼan cheʼʌch woliʼ mel cheʼ bajcheʼ Job. Ili tsiʼ colta chaʼan miʼ tojʼesan chuqui miʼ ñaʼtan yicʼot tsiʼ pʼʌtʼesa chaʼan miʼ cuch jiñi i chʼijyemlel.

12. ¿Bajcheʼ miʼ cʼʌn Jehová jiñi la quermañujob chaʼan miʼ pʼʌtʼesañonla?

 ¹² Jiñi la quermañujob. Jehová miʼ cʼʌn jaʼel jiñi la quermañujob chaʼan miʼ pʼʌtʼesañonla. Pablo tiʼ tsʼijbu chaʼan yomix i qʼuel jiñi hermanojob chaʼan miʼ comol pʼʌtʼesañob i bʌ (Ro. 1:11, 12). Mary, tsaʼ bʌ ajli yaʼ ti párrafo 2, miʼ wen mulan ajñel yicʼot yambʌ hermanojob. Miʼ yʌl: «Jehová an i cʼʌñʌ jiñi hermanojob chaʼan miʼ coltañon anquese mach yujilobic chuqui woli c chaʼlen. Miʼ subeñoñob chuqui tac wem bʌ o miʼ chocbeñoñob tilel jumpʼejl alʌ jun, i jiñʌch jiñi com bʌ. Miʼ coltañon jaʼel cheʼ mic pejcañob jiñi hermanojob am bʌ i ñusayob jaʼel ili wocol i mij cʌn tiʼ tojlelob. I jiñi ancianojob miʼ yʌqʼueñoñob cubin chaʼan añʌch j cʼʌjñibal yaʼ ti congregación».

13. ¿Bajcheʼ miʼ mejlel laj comol pʼʌtʼesan lac bʌ yaʼ ti tempa bʌ?

¹³ Junchajp baqui miʼ mejlel lac ñuqʼuesʌben lac bʌ lac pusicʼal yaʼʌch ti tempa bʌ. Cheʼ mi la cajñel yaʼ ti tempa bʌ, miʼ mejlel lac pʼʌtʼesan yambʌlob cheʼ mi lac subeñob chaʼan mi laj cʼuxbiñob yicʼot chaʼan mi laj qʼuel ti ñuc chuqui miʼ melob. Jumpʼejl ejemplo, cheʼ bʌ muʼto caj i tejchel jumpʼejl tempa bʌ, juntiquil anciano i cʼabaʼ Peter tiʼ sube juntiquil hermana mach bʌ xñoptʼañic i ñoxiʼal: «Wen tijicñayon lon cheʼ wʌʼañeti. Chajpʌbilob a chaʼan jiñi seis a walobilob i miʼ yʌcʼob i comentario». Jiñi hermana yicʼot i yaʼlel i wut tiʼ sube wocolix i yʌlʌ, i tiʼ sube: «Mach a wujilic bajcheʼ cʼamel miʼ coltañon jiñi».

14. ¿Bajcheʼ miʼ coltañonla jiñi subtʼan?

¹⁴ Jiñi subtʼan. Jiñi subtʼan miʼ yʌqʼueñonla lac tijicñʌyel yicʼot miʼ ñuqʼuesan lac pusicʼal, mach yʌlʌyic mi jiñi lac piʼʌlob miʼ ñʌchʼtañoñobla o maʼañic (Pr. 11:25). Juntiquil hermana i cʼabaʼ Stacy tsiʼ qʼuele chaʼan i sujmʌch iliyi. Cheʼ bʌ tsaʼ chaʼlenti ti expulsar juntiquil tiʼ familia, wen chʼijyem tsiʼ yubi i bʌ. Maʼañic tsiʼ cʌyʌ i cʼajtiben i bʌ mi anto chuqui yambʌ tsaʼ mejli i mel chaʼan miʼ coltan. Maʼañic chuqui yambʌ miʼ ñaʼtan. ¿Chuqui tsiʼ colta? Jiñʌch jiñi subtʼan. Cheʼ bʌ tsaʼ loqʼui ti subtʼan tsaʼ caji i ñaʼtan bajcheʼ miʼ mejlel i coltan jiñi lac piʼʌlob. Miʼ yʌl: «Ti jiñi bʌ ora, Jehová tsiʼ yʌqʼueyon juntiquil c estudiante tsaʼ bʌ i wen chaʼle wersa i jiñi tsiʼ wen coltayon. Jiñi subtʼan miʼ yʌqʼueñon c ñʌchʼtʌlel».

15. ¿Chuqui mi laj cʌn ti jiñi tsaʼ bʌ i yʌlʌ Mary?

¹⁵ Tajol mach cabʌlic mi lac mejlel ti subtʼan mi la cubin tiʼ caj cabʌl lac wocol. Pero yom cʼajal lac chaʼan chaʼan Jehová tijicña yicʼotonla cheʼ mi lac mel cheʼ bajcheʼ cʼamel mi lac mejlel. Cheʼ bʌ Mary, tsaʼ bʌ lac taja ti tʼan yaʼ ti yambʌ párrafo, tsaʼ majli ti jumpʼejl congregación am bʌ ti yambʌ tʼan, maʼañic miʼ wen chaʼlen coltaya tsiʼ yubi. Miʼ yʌl: «Ti ñaxan mucʼ jach i mejlel cʌcʼ pʼots bʌ j comentario, c pejcan jumpʼejl texto o mi cʌcʼ jumpʼejl tratado yaʼ ti subtʼan». Maʼañic i cʼʌjñibal tsiʼ yubi i bʌ come mach yujilic jiñi tʼan. Pero tsiʼ qʼuexta i ñaʼtʌbal come tsiʼ qʼuele chaʼan Jehová miʼ mejlel i cʼʌn anquese mach wen yujilic jiñi tʼan. Miʼ yʌl: «Jiñi i sujmlel am bʌ ti Biblia mach wocolic ti chʼʌmbentel i sujm, i jiñʌch muʼ bʌ i qʼuextan lac piʼʌlob».

16. ¿Chuqui mi caj i coltañonla mi maʼañic mi lac mejlel ti loqʼuel?

¹⁶ Mi maʼañic mi lac mejlel ti loqʼuel ti la cotot, Jehová miʼ qʼuel chaʼan la comʌch subtʼan. Tajol miʼ mejlel lac suben wen tʼan jiñi muʼ bʌ i cʌntañonla o jiñi doctorob. Cheʼ bʌ mi lac chʌn ñaʼtan bajcheʼ cʼamel miʼ mejlel lac mel ti ñaxan, tajol mi caj la cubin lac chʼijyemlel. Pero mi mucʼʌch laj qʼuel bajcheʼ woliʼ coltañonla Jehová, mi caj lac lʌtʼ baqui jach bʌ wocol i maʼañic mi caj lac sʌt lac tijicñʌyel.

17. Cheʼ bajcheʼ miʼ yʌl Eclesiastés 11:6, ¿chucoch yom mi lac bej chaʼlen subtʼan anquese mach ti orajic mi laj qʼuelben i wenlel?

 ¹⁷ Mach la cujilic majqui mi caj i jacʼ jiñi wen tʼan (pejcan Eclesiastés 11:6). Jumpʼejl ejemplo, juntiquil hermana i cʼabaʼ Barbara ñumeñix bʌ ti 80 i jabilel, miʼ chaʼlen subtʼan ti teléfono yicʼot ti carta. Ti jumpʼejl sobre tsiʼ yotsa jiñi La Atalaya 1 chaʼan marzo 2014, baqui miʼ tilel jiñi temaj i cʼabaʼ «¿Qué ha hecho Dios por usted?». Mach yujilic chaʼan jiñi carta tsiʼ chocbe majlel jumpʼejl xñujpuñel mach bʌ i testigojobix Jehová. Jiñi xñujpuñel tsiʼ wen pejcayob jiñi revista. Jiñi wiñic lajal bajcheʼ Jehová woliʼ pejcan tsiʼ yubi. Tsaʼ chaʼ majliyob ti tempa bʌ, ti wiʼil, anquese ñumeñix cheʼ bʌ 27 jab, tsaʼ chaʼ sujtiyob ti Testigo. ¿Muʼ ba i mejlel lac ñaʼtan bajcheʼ cʼamel tsaʼ pʼʌtʼa yicʼot tsiʼ yubi i tijicñʌyel Barbara cheʼ bʌ tsiʼ qʼuele jiñi? ¡I tiʼ caj jach jumpʼejl carta!

18. ¿Chuqui yom mi lac mel chaʼan Jehová miʼ yʌqʼueñonla lac pʼʌtʌlel?

¹⁸ Cheʼ bajcheʼ tsaʼix laj qʼuele, cabʌl bajcheʼ miʼ mejlel i yʌqʼueñonla i pʼʌtʌlel Jehová. Laʼ lac locʼsʌben i wenlel jiñi oración, jiñi Biblia, jiñi la quermañujob yicʼot jiñi subtʼan. Mi mucʼʌch lac mel mi caj lac pʌs chaʼan mucʼʌch lac ñop chaʼan yomʌch i coltañonla yicʼot chaʼan mucʼʌch i mejlel. Laʼ laj coltan lac bʌ ti jiñi lac Tat am bʌ ti panchan come ‹woliʼ sʌclan ñumel jiñi xucʼuloʼ bʌ i pusicʼal chaʼan miʼ pʌsbeñob ñuc bʌ i coltaya› (2 Cr. 16:9).