1. ¿Chuqui miʼ mejlel i jisan lac tijicñʌyel cheʼ mi lac tech lac suben yambʌlob jiñi woli bʌ laj cʌn ti Biblia?

¿CʼAJAL baʼ chaʼan bajcheʼ yubil tsaʼ wubi a bʌ cheʼ bʌ tsaʼ qʼuele chaʼan tsaʼix a taja jiñi i sujmlel? Tsaʼ qʼuele chaʼan wen tsiquil jujumpʼejl cʌntesa am bʌ ti Biblia. Tsaʼ lon ñaʼta chaʼan tiʼ pejtelelob mi caj i mulañob i cʌn. A wujil chaʼan muʼ bʌ i yʌl jiñi Biblia mi caj i yʌqʼueñob i tijicñʌyel yicʼot jumpʼejl i pijtaya (Sal. 119:105). Wen tijicñayet tsaʼ caji a suben a wamigojob yicʼot jiñi a familiajob jiñi woli bʌ a cʌn. Pero ¡toj jilel a tijicñʌyel cheʼ bʌ cabʌlob maʼañic tsiʼ mulayob i cʌn!

2, 3. ¿Chuqui tsiʼ ñaʼta yonlel lac piʼʌlob tiʼ tojlel Jesús yicʼot jiñi tʼan tsaʼ bʌ i subu?

² Mach yomic miʼ toj sajtel lac pusicʼal cheʼ bʌ an lac piʼʌlob mach bʌ añic miʼ chʼʌmob ti ñuc jiñi wen tʼan muʼ bʌ lac sub. Cheʼ bʌ Jesús tsajñi ti pañimil tsiʼ mele milagro tac tsaʼ bʌ i pʌsʌ chaʼan añʌch i chaʼan i coltaya Jehová, pero cabʌl lac piʼʌlob machʌch añic tsiʼ chʼʌmʌyob ti ñuc. Jumpʼejl ejemplo, cheʼ bʌ tsiʼ chaʼ cuxtesa Lázaro, jiñi judíojob ñucoʼ bʌ i yeʼtel maʼañic tsiʼ ñopoyob chaʼan Jesús jiñʌch jiñi Mesías anquese jiñi i contrajob tsiʼ qʼueleyob chaʼan i sujmʌch jiñi milagro, tsaʼto i ñaʼtayob i tsʌnsan Jesús yicʼot Lázaro (Jn. 11:47, 48, 53; 12:9-11).

³ Jesús yujil chaʼan lʌcʼʌ tiʼ pejtelel lac piʼʌlob maʼañic mi caj i qʼuelob bajcheʼ jiñi Mesías (Jn. 5:39-44). Jesús tiʼ sube chaʼtiqui uxtiquil xcʌntʼañob i chaʼan Juan jiñi Xʼacʼ chʼʌmjaʼ: «Tijicña jini mach bʌ anic miʼ lon tejchel tile bixel bʌ i pusicʼal * chaʼan  c melbal» (Mt. 11:2, 3, 6). ¿Chucoch an cabʌlob mach bʌ añic tsiʼ chʼʌmʌyob ti ñuc Jesús?

4. ¿Chuqui mi caj laj qʼuel ti ili estudio?

⁴ Ti ili estudio yicʼot ti jiñi yambʌ mi caj laj qʼuel chucoch cabʌl lac piʼʌlob maʼañic tsiʼ chʼʌmʌyob ti ñuc Jesús cheʼ ti ñaxam bʌ siglo. Cheʼ jaʼel, mi caj laj qʼuel chucoch cabʌlob ti ili ora maʼañic miʼ chʼʌmob ti ñuc jiñi tʼan muʼ bʌ lac sub, pero ñumen ñuc bʌ i cʼʌjñibal jiñʌch cheʼ mi caj laj qʼuel chuqui mi caj i coltañonla chaʼan pʼʌtʌl jiñi lac ñopoñel ti Jesús yicʼot chaʼan maʼañic miʼ tilel tile bixel bʌ lac pusicʼal.

5. ¿Chucoch an tsaʼ bʌ i ñaʼtayob chaʼan Jesús mach jiñic jiñi Mesías wʌn albil bʌ?

⁵ Cabʌl lac piʼʌlob maʼañic tsiʼ ñopoyob ti Jesús tiʼ caj baqui chʼoyol. Yujilob chaʼan juntiquilʌch wen ñuc bʌ xcʌntesa yicʼot chaʼan miʼ mel milagro tac, pero tsaʼ jach i qʼueleyob bajcheʼ i yalobil juntiquil carpintero. Cheʼ jaʼel, chʼoyol ti Nazaret, jumpʼejl tejclum mach bʌ añic i cʼʌjñibal miʼ qʼuelob. Cheʼto jaʼel, Natanael, tsaʼ bʌ sujti ti xcʌntʼan i chaʼan, tsiʼ yʌlʌ ti ñaxan: «¿Am ba chuqui wen chʼoyol bʌ ti Nazaret?» (Jn. 1:46). ¿Chucoch tsiʼ yʌlʌ jiñi? Tajol maʼañic i cʼʌjñibal miʼ qʼuel jiñi tejclum baqui chumul Jesús. O tajol woliʼ ñaʼtan jiñi profecía am bʌ ti Miqueas 5:2 muʼ bʌ i yʌl chaʼan jiñi Mesías mi caj i yilan pañimil ti Belén, mach yaʼic ti Nazaret.

6. ¿Chuqui i wentʌlel tsiʼ meleyob jiñi mach bʌ añic tsiʼ chʼʌmʌyob ti ñuc Jesús bajcheʼ jiñi Mesías?

⁶ ¿Chuqui miʼ yʌl jiñi Biblia? Jiñi xʼaltʼan Isaías tsiʼ wʌn alʌ chaʼan jiñi i contrajob Jesús maʼañic mi caj i mulañob i cʌn chaʼan bʌ jiñi i ñojteʼelob jiñi Mesías (Is. 53:8, TNM). Yaʼ ti profecía tac cabʌl chuqui miʼ yʌjlel chaʼan jiñi i ñojteʼelob. Cheʼ tsaʼic i mulaj i qʼuelob, tsiʼ ñaʼtayob chaʼan Jesús tsiʼ yila pañimil ti Belén yicʼot chaʼan tilem tiʼ pʼolbal jiñi rey David (Lc. 2:4-7). Jin chaʼan, Jesús tsiʼ yila pañimil ti Belén cheʼ bajcheʼ miʼ yʌl Miqueas 5:2. Cheʼ jiñi, ¿baqui bʌ jiñi wocol? Tiʼ caj mach yujilobic ti tsʼʌcʌl chuqui mi caj i yujtel, yambʌ chuqui tsaʼ caji i ñaʼtayob. Tsaʼ tiliyob tile bixel bʌ i pusicʼal i maʼañic tsiʼ chʼʌmʌyob ti ñuc Jesús.

7. ¿Chucoch an cabʌlob maʼañic bʌ miʼ chʼʌmob ti ñuc jiñi i tejclum Jehová?

⁷ ¿Cheʼ ba woliʼ yujtel jaʼel ili ora? Cheʼʌchi. Lʌcʼʌ tiʼ pejtelel jiñi i testigojonbʌla Jehová mach ricojoñicla, jin chaʼan cabʌl lac piʼʌlob miʼ qʼueloñobla bajcheʼ ‹mach bʌ cʌntesʌbilobic ti jun› (Hch. 4:13). Cabʌl muʼ bʌ i yʌlob chaʼan maʼañic miʼ mejlel lac pʌs muʼ bʌ i yʌl jiñi Biblia come maʼañic tsajñonla ti jiñi escuela tac baqui miʼ pʌstʌl chaʼan bʌ jiñi Biblia. An muʼ bʌ i yʌlob jaʼel chaʼan jiñi lac ñopbal tilem ti Estados Unidos, pero tiʼ sujm ti 7 i testigojob Jehová juntiquil jach chumul bʌ ti Estados Unidos. An yambʌlob muʼ bʌ i subentelob chaʼan jiñi Testigojonbʌla maʼañic mi lac ñop ti Jesús. Cʼʌlʌl ti wajali mi lac subentel chaʼan xʼeʼtelonla i chaʼan jiñi yumʌlob ti Estados Unidos, yambʌ miʼ yʌlob chaʼan añonla tiʼ contra yicʼot chaʼan muqʼuix lac ñumel ti pʼis. Pejtelel muʼ bʌ i ñʌchʼtañob jiñi yicʼot mach bʌ yujilobic baqui bʌ jiñi i sujmlel maʼañic miʼ chʼʌmob ti ñuc jiñi i tejclum Jehová.

8. Cheʼ bajcheʼ miʼ yʌl Hechos 17:11, ¿chuqui yom maʼ mel mi a wom a cʌñob jiñi i wiñicob Dios ili ora?

⁸ ¿Chuqui mi caj i coltañet chaʼan maʼañic miʼ tilel tile bixel bʌ a pusicʼal? Maʼ wen tsajin chuqui tac tsaʼ ujti. Jiñʌch tsaʼ bʌ i chaʼle wersa i mel Lucas. Cheʼ bʌ mi caj i tsʼijbun jiñi Evangelio tsiʼ wen tsaji «chuqui tsaʼ ujti cʼʌlʌl tiʼ cajibal». Yom chaʼan jiñi muʼ bʌ i pejcañob jiñi Evangelio miʼ wen cʌñob i sujmlel chaʼan jiñi tsaʼ bʌ i yubiyob tiʼ tojlel Jesús (Lc. 1:1-4). Cheʼʌch miʼ mejlel la cʌl jaʼel tiʼ tojlel jiñi judíojob tsaʼ bʌ chumleyob ti jiñi tejclum Berea am bʌ ti wajali. Cheʼ bʌ cojaxto tsiʼ yubiyob jiñi  wen tʼan tiʼ tojlel Jesús, tsiʼ wen tsajiyob jiñi Tsʼijbujel hebreo chaʼan miʼ qʼuelob miʼ sujmʌch jiñi woli bʌ i subentelob (pejcan Hechos 17:11). Miʼ mejlel la cʌl chaʼan jiñʌch yom bʌ maʼ mel jaʼel. Qʼuele mi jiñi woli bʌ i pʌsbeñetob jiñi i testigojob Jehová lajalʌch bajcheʼ miʼ yʌl jiñi Biblia. Cheʼ jaʼel, wen cheʼ maʼ pejcan chuqui tac ujtem tiʼ tojlel jiñi i testigojob Jehová. Mi mucʼʌch lac mel pejtelel iliyi, mach jiñic jach mi caj lac ñop jiñi muʼ bʌ i yʌjlel.

9. ¿Chuqui tsaʼ ujti cheʼ bʌ Jesús maʼañic tsiʼ jacʼʌ i pʌs i yejtal i pʼʌtʌlel?

⁹ Tiʼ yorajlel Jesús, an tsaʼ bʌ i ñaʼtayob chaʼan mach jasʌlic jach jiñi wen utsʼatax bʌ i cʌntesa. Tsiʼ cʼajtibeyob chaʼan miʼ pʌsbeñob «i yejtal i pʼʌtʌlel ti panchan» chaʼan miʼ pʌs chaʼan jiñʌch jiñi Mesías (Mt. 16:1). Tajol tsiʼ cʼajtiyob iliyi come mach weñic bajcheʼ tsiʼ chʼʌmbeyob i sujm muʼ bʌ i yʌl Daniel 7:13, 14. Pero Jehová yujil chaʼan maxto i yorajlelic miʼ tsʼʌctiyel ili profecía. I wentʌlel jasʌl tsiʼ yubiyob jiñi i cʌntesa Jesús chaʼan miʼ ñopob chaʼan jiñʌch jiñi Mesías. Pero tiʼ caj maʼañic tsiʼ qʼueleyob jiñi milagro, tsaʼ tiliyob tile bixel bʌ i pusicʼal i maʼañic tsiʼ chʼʌmʌyob ti ñuc (Mt. 16:4).

10. ¿Bajcheʼ tiʼ tsʼʌctesa Jesús tsaʼ bʌ i wʌn alʌ Isaías tiʼ tojlel jiñi Mesías?

¹⁰ ¿Chuqui miʼ yʌl jiñi Biblia? Isaías tsiʼ wʌn alʌ tiʼ tojlel jiñi Mesías: «Utsʼat i pusicʼal. Mach yujilic leto. Mach cʼamic miʼ chaʼlen tʼan ti calle» (Is. 42:1, 2). Cheʼ bʌ Jesús tsiʼ mele i yeʼtel maʼañic tsiʼ yʌcʼʌ i bʌ ti wen qʼuejlel ti ñuc, maʼañic tsiʼ mele ñuqui templo tac, maʼañic tsiʼ lʌpʌ i pislel bajcheʼ jiñi ñucoʼ bʌ i yeʼtel ti ñopbalʌl, mi tsaʼicto i yʌlʌ chaʼan miʼ pejcʌntel bajcheʼ juntiquil ñuc bʌ i yeʼtel. Cheʼ bʌ woliʼ yujtel meloñel tiʼ tojlel maʼañic tsiʼ jacʼʌ i mel jumpʼejl milagro chaʼan jach miʼ qʼuel jiñi rey Herodes, anquese bʌbʌqʼuen miʼ tsʌnsʌntel (Lc. 23:8-11). I sujmʌch chaʼan tsiʼ mele milagro tac cheʼ bʌ tsiʼ chaʼle subtʼan, pero jiñi ñuc bʌ i cʼʌjñibal tsiʼ qʼuele jiñʌch i subol jiñi wen tʼan. Tiʼ sube jiñi xcʌntʼañob  i chaʼan: «Jini chaʼan tsaʼ loqʼuiyon tilel» (Mr. 1:38).

11. ¿Chuqui miʼ pijtañob jiñi lac piʼʌlob ti lac tojlel?

¹¹ ¿Cheʼ ba woliʼ yujtel jaʼel ili ora? Cheʼʌchi. Cabʌl lac piʼʌlob miʼ toj sajtelob i pusicʼal chaʼan jiñi ñuqui templo tac am bʌ i chaʼan chuqui tac wen lets bʌ i tojol, chaʼan jiñi añoʼ bʌ i yeʼtel ti ñopbalʌl tac poj utsʼatax bʌ bajcheʼ miʼ subentelob yicʼot chaʼan jiñi qʼuiñijel tac mach bʌ weñic baqui tilem anquese an yujilobix bʌ iliyi. Pero jiñi muʼ bʌ i yajñelob ti jiñi ñopbalʌl tac maʼañic chuqui woliʼ wen cʌñob tiʼ tojlel Dios yicʼot chaʼan jiñi ñaʼtʌbil bʌ i chaʼan, i jiñi muʼ bʌ i yajñelob ti lac tempa bʌ tac woliʼ cʌñob chuqui yom Jehová ti lac tojlel yicʼot bajcheʼ yom mi lac mel chuqui miʼ mulan. Jiñi i yotlel tac lac tempa bʌ mach jiñic ili wen lets tac bʌ i tojol chuqui an i chaʼan, wen jach yicʼot sʌc. Jiñi añoʼ bʌ tiʼ wenta congregación tac maʼañic miʼ lʌpob i pislel wen yajcʌbil bʌ i maʼañic miʼ cʌjñelob ti jumpʼejl cʼabaʼʌl poj wen utsʼatax bʌ. Jiñi laj cʌntesa tac yicʼot muʼ bʌ lac ñop yaʼʌch chucul tiʼ Tʼan Dios. Pero jiñi lac piʼʌlob mucʼʌch i wersa tilelob tile bixel bʌ i pusicʼal come maʼañic miʼ mulañob bajcheʼ mi lac chʼujutesan Dios yicʼot tiʼ caj jiñi laj cʌntesa mach cheʼic bajcheʼ miʼ mulañob i yubin.

12. Cheʼ bajcheʼ miʼ yʌl Hebreos 11:1, 6, ¿baqui yom chucul jiñi lac ñopoñel?

¹² ¿Chuqui mi caj i coltañet chaʼan maʼañic miʼ tilel tile bixel bʌ a pusicʼal? Jiñi apóstol Pablo tiʼ sube jiñi xñoptʼañob añoʼ bʌ ti Roma: «Mi lac ñop chuqui mi la cubin. Mi la cubin i tʼan Cristo cheʼ mi lac subentel» (Ro. 10:17). Jiñi pʼʌtʌl bʌ lac ñopoñel mach yaʼic mi lac taj ti jiñi muʼ bʌ i melob jiñi ñopbalʌl tac anquese wen utsʼatax yilal, mi lac taj cheʼ mi lac wen tsajin jiñi Tsʼijbujel. Jiñi lac ñopoñel yom pʼʌtʌl i yom chucul ti jiñi cʌmbil bʌ lac chaʼan, come «mi maʼanic mi lac ñop Dios, mach mejlic i qʼuelonla ti utsʼat» (pejcan Hebreos 11:1, 6). Jin chaʼan, mach cʼʌñʌlic lac chaʼan jumpʼejl milagro chaʼan mi lac ñop chaʼan tsaʼix lac taja jiñi i sujmlel. Chaʼan mi lac pʼʌtʼesan jiñi lac ñopoñel i maʼañic tile bixel bʌ lac pusicʼal yom mi lac wen tsajin jiñi cʌntesa tac am bʌ ti Biblia.

13. ¿Chucoch cabʌlob maʼañic bʌ tsiʼ mulayob chuqui tsiʼ mele Jesús?

¹³ Tiʼ yorajlel Jesús, jiñi i wiñicob Juan jiñi Xʼacʼ chʼʌmjaʼ tsaʼ toj sajtiyob i pusicʼal come jiñi xcʌntʼañob i chaʼan Jesús maʼañic miʼ chaʼleñob chʼajb. Jesús tiʼ tsictesʌbeyob chaʼan maʼañic chucoch miʼ chaʼleñob chʼajb mi cuxulto (Mt. 9:14-17). Pero jiñi fariseojob yicʼot yambʌ i contrajob Jesús maʼañic tsiʼ mulayob cheʼ maʼañic woliʼ tsajcan jiñi i costumbrejob. Tsaʼ wen michʼayob cheʼ bʌ tiʼ tsʼʌca cʼamoʼ bʌ cheʼ ti sábado (Mr. 3:1-6; Jn. 9:16). Miʼ poj qʼuelob i bʌ ti ñuc tiʼ caj miʼ tsʼʌctesañob chuqui miʼ yʌl jiñi mandar chaʼan bʌ jiñi sábado, pero maʼañic i wocolel miʼ qʼuelob cheʼ bʌ miʼ chaʼleñob choñoñel yaʼ ti templo. Tsaʼ michʼayob cheʼ bʌ Jesús tiʼ subeyob chaʼan mach weñic chuqui woliʼ melob (Mt. 21:12, 13, 15). Cheʼ bʌ Jesús tsiʼ chaʼle subtʼan yaʼ ti sinagoga am bʌ ti Nazaret, tsaʼ wen michʼayob jiñi yaʼ bʌ añob i ñʌchʼtan come tsiʼ yʌlʌ tsaʼ bʌ ujti tiʼ tojlel Israel chaʼan miʼ pʌs chaʼan woli jach i bajñel ñaʼtañob i bʌ yicʼot chaʼan maʼañobic i ñopoñel (Lc. 4:16, 25-30). Cabʌlob tsaʼ bʌ yajliyob come Jesús maʼañic tsiʼ mele jiñi woli bʌ i lon pijtañob (Mt. 11:16-19).

14. ¿Chucoch tsiʼ yʌlʌ Jesús chaʼan mach weñic jiñi i costumbre lac piʼʌlob am bʌ tiʼ contra jiñi Tsʼijbujel?

¹⁴ ¿Chuqui miʼ yʌl jiñi Biblia? Tiʼ tojlel jiñi xʼaltʼan Isaías, Jehová tsiʼ yʌlʌ: «Jini winicob xʼixicob miʼ pejcañoñob tiʼ yum, pero maʼanic miʼ yumañoñob. Miʼ lon chʼujutesañoñob tiʼ tʼan, cheʼ ñajt añob i pusicʼal. Woli jach i ñopob i cʌntesʌbal winicob» (Is. 29:13). Weñʌch tsaʼ bʌ i mele Jesús cheʼ tsiʼ yʌlʌ chaʼan mach weñic jiñi i cʌntesajob wiñicob i chaʼan an tiʼ contra jiñi Tsʼijbujel. Jiñi muʼ bʌ i ñumen qʼuelob ti ñuc jiñi i costumbrejob yicʼot i cʌntesajob wiñicob i mach jiñic jiñi i Tʼan Dios maʼañic tsiʼ chʼʌmʌyob ti ñuc Jehová yicʼot jiñi Mesías tsaʼ bʌ i choco tilel.

15. ¿Chuqui jiñi mach bʌ weñic miʼ qʼuelob cabʌl lac piʼʌlob tiʼ tojlel jiñi i testigojob Jehová?

¹⁵ ¿Cheʼ ba woliʼ yujtel jaʼel ili ora? Cheʼʌchi. Cabʌl lac piʼʌlob miʼ michʼañob yicʼotob jiñi i testigojonbʌla Jehová come maʼañic mi lac mel qʼuiñijel tac am bʌ tiʼ contra jiñi Biblia, bajcheʼ jiñi cumpleaño tac yicʼot jiñi Navidad. Yambʌlob miʼ michʼañob tiʼ caj maʼañic mi la cotsan lac bʌ ti chuqui tac miʼ mejlel tiʼ tojlel jiñi lac país o maʼañic mi lac tsajcan jiñi costumbre tac muʼ bʌ i mejlel cheʼ bʌ an majqui miʼ chʌmel. Tajol ili lac piʼʌlob utsobʌch tiʼ pusicʼal i miʼ lon ñaʼtañob chaʼan Dios weñʌch miʼ qʼuel chuqui miʼ melob. Pero mi jin miʼ tsajcañob jiñi i costumbre tac ili pañimil i mach jiñic jiñi cʌntesa tac am bʌ ti Biblia, Jehová maʼañic mi caj i qʼuelob ti utsʼat (Mr. 7:7-9).

16. ¿Chuqui yom mi lac mel i chuqui mach bʌ yomic mi lac mel? (Salmo 119:97, 113, 163-165).

¹⁶ ¿Chuqui mi caj i coltañet chaʼan maʼañic miʼ tilel tile bixel bʌ a pusicʼal? Acʼʌ ti colel a cʼuxbiya tiʼ mandar Dios yicʼot tiʼ principio tac (pejcan Salmo 119:97, 113, 163-165). Mi mucʼʌch a cʼuxbin Jehová, maʼañic mi caj a mel costumbre tac mach bʌ añic miʼ mulan. Mi caj a chaʼlen wersa chaʼan jiñi a cʼuxbiya ti Jehová jiñʌch ñumen ñuc bʌ i cʼʌjñibal.

17. ¿Chuqui tsiʼ ñaʼtayob cabʌl lac piʼʌlob tiʼ tojlel jiñi Mesías?

¹⁷ Tiʼ yorajlel Jesús, an yomoʼ bʌ chaʼan ti ora miʼ qʼuextʌyel jiñi yumʌl. Tsiʼ ñaʼtayob chaʼan jiñi Mesías mi caj i locʼsañob tiʼ pʼʌtʌlel jiñi romanojob. Pero cheʼ bʌ tsiʼ ñopo i yotsañob Jesús bajcheʼ rey maʼañic tsiʼ jacʼʌ (Jn. 6:14, 15). Yambʌlob, bajcheʼ jiñi sacerdotejob, tsiʼ bʌcʼñayob chaʼan Jesús miʼ qʼuextan jiñi chaʼan tac bʌ política i jiñi romanojob miʼ michʼañob yicʼot miʼ chilbentelob i yeʼtel jiñi ñucoʼ bʌ  i yeʼtel ti ñopbalʌl tac. Cabʌl judíojob tsaʼ bʌ tiliyob tile bixel bʌ i pusicʼal tiʼ caj jiñi política.

18. ¿Baqui bʌ profecía tac tiʼ tojlel jiñi Mesías maʼañic tsiʼ chʼʌmʌyob ti ñuc jiñi judíojob?

¹⁸ ¿Chuqui miʼ yʌl jiñi Biblia? I sujmʌch chaʼan tsaʼ wʌn ajli chaʼan jiñi Mesías mi caj i chaʼlen guerra i mi caj i mʌl, pero tsaʼ wʌn ajli jaʼel chaʼan yom miʼ ñaxan chʌmel tiʼ caj jiñi lac mul (Is. 53:9, 12). Yubil cheʼ jiñi, ¿chucoch cabʌlob mach bʌ weñic bajcheʼ tsiʼ ñaʼtayob? Come jin jach tsiʼ chʼʌmʌyob ti ñuc jiñi profecía tac muʼ bʌ i yʌl bajcheʼ mi caj i tojʼesʌntel ti ora jiñi wocol tac i jiñi yan tac bʌ maʼañic tsiʼ chʼʌmʌyob ti ñuc (Jn. 6:26, 27).

19. ¿Chucoch cabʌl lac piʼʌlob maʼañic bʌ miʼ ñopob ili ora?

¹⁹ ¿Cheʼ ba woliʼ yujtel jaʼel ili ora? Cheʼʌchi. Cabʌl lac piʼʌlob miʼ tilel tile bixeloʼ bʌ i pusicʼal tiʼ caj maʼañic mi la cotsan lac bʌ ti política. Miʼ ñaʼtañob chaʼan yom mi lac chaʼlen votación, pero joñonla la cujil chaʼan mi tsaʼ lac yajca juntiquil yumʌl ila ti pañimil Jehová woli lac choc mi caj i yubin (1 S. 8:4-7). Tajol miʼ ñaʼtañob jaʼel chaʼan yom mi lac mel hospital tac, escuela tac o yan tac bʌ bajcheʼ mi laj coltan lac piʼʌlob. Miʼ tilel tile bixeloʼ bʌ i pusicʼal come mi la cʌcʼ lac bʌ ti subtʼan i mach jiñic tiʼ tojʼesʌntel jiñi wocol tac.

20. Cheʼ bajcheʼ tsiʼ yʌlʌ Jesús ti Mateo 7:21-23, ¿chuqui jiñi ñumen ñuc bʌ i cʼʌjñibal?

²⁰ ¿Chuqui mi caj i coltañet chaʼan maʼañic miʼ tilel tile bixel bʌ a pusicʼal? (Pejcan Mateo 7:21-23). Cʼajtesan chaʼan jiñi ñumen ñuc bʌ i cʼʌjñibal jiñʌch cheʼ mi lac mel jiñi eʼtel tsaʼ bʌ i yʌlʌ Jesús (Mt. 28:19, 20). Mach a wʌcʼ chaʼan jiñi wocol tac am bʌ ti pañimil yicʼot jiñi i chaʼan tac bʌ política miʼ yʌn jiñi a pensar. Jiñi i testigojonbʌla Jehová mi laj cʼuxbin jiñi lac piʼʌlob i mi lac ñaʼtʌbeñob jiñi i wocol, pero la cujil chaʼan jiñi ñumen wem bʌ miʼ mejlel lac mel tiʼ tojlelob jiñʌch cheʼ mi la cʌqʼueñob i cʌn jiñi i Yumʌntel Dios yicʼot mi laj coltañob chaʼan miʼ sujtelob tiʼ yamigo Jehová.

21. ¿Chuqui yom bʌ mi lac chaʼlen wersa lac mel?

²¹ Ti ili estudio, tsaʼ laj qʼuele chʌnchajp i sujmlel chucoch an tsaʼ bʌ tiliyob tile bixeloʼ bʌ i pusicʼal yicʼot chucoch maʼañic tsiʼ chʼʌmʌyob ti ñuc Jesús cheʼ ti ñaxam bʌ siglo, i chucoch ili ora an mach bʌ añic miʼ chʼʌmob ti ñuc jiñi xcʌntʼañob i chaʼan Jesús. Pero mach jiñic jach jiñi. Yaʼ ti yambʌ estudio mi caj laj qʼuel yambʌ chʌnchajp. Laʼ lac chaʼlen wersa ti lac pejtelel chaʼan pʼʌtʌl jiñi lac ñopoñel yicʼot chaʼan maʼañic chuqui miʼ yʌcʼ tile bixel bʌ lac pusicʼal.