1, 2. Tsictesan yicʼot jumpʼejl ejemplo bajcheʼ miʼ mejlel lac mel muʼ bʌ i yʌl Proverbios 4:25.

LAʼCU lac ñaʼtan ili uxpʼejl ejemplo: Juntiquil hermana añix bʌ i jabilel miʼ chaʼ cʼajtesan chuqui utsʼatax bʌ tsiʼ ñusa tiʼ cuxtʌlel. Woliʼ chaʼlen wersa i melben i yeʼtel (troñel) Jehová, pero wocolix woliʼ yubin ili ora (1 Co. 15:58). Ti jujumpʼejl qʼuin miʼ ñaʼtan chaʼan yaʼix chumul ti Paraíso yicʼot jiñi i cʌñʌyoʼ bʌ. Yambʌ hermana miʼ cʼajtesan cheʼ bʌ juntiquil hermana yaʼ ti congregación tsiʼ melbe mach bʌ weñic, pero maʼañic miʼ lot michʼajel tiʼ pusicʼal (Col. 3:13). I juntiquil hermano maʼañic miʼ ñajʌyel i chaʼan jiñi mach tac bʌ weñic tsiʼ mele ti wajali, pero miʼ chaʼlen wersa chaʼan chʌn xucʼul miʼ yajñel ili ora (Sal. 51:10).

² ¿Chuqui lajal woliʼ melob ili uxtiquil hermanojob? Chaʼan mucʼʌch i cʼajtesañob jiñi tsaʼ tac bʌ i ñusayob, pero mach yaʼic miʼ xucʼchocoñob i pensar. Tojach miʼ qʼuelob majlel i bijlel, yom i yʌl, chaʼan miʼ xucʼchocoñob i pensar ti jiñi talto bʌ qʼuin (pejcan Proverbios 4:25).

3. ¿Chucoch ñuc i cʼʌjñibal cheʼ bʌ mi lac xucʼchocon lac pensar ti jiñi talto bʌ qʼuin?

³ ¿Chucoch ñuc i cʼʌjñibal cheʼ bʌ mi lac xucʼchocon lac pensar ti jiñi talto bʌ qʼuin? Come juntiquil quixtañu muʼ bʌ i sujtel i qʼuel i pat ti bele ora cheʼ woli (choncol) ti xʌmbal, mach mejlic i xʌn ti toj. Joñonla jaʼel, mach mejlic lac bej melben i yeʼtel Jehová mi ti bele ora mi lac ñaʼtan jiñi tsaʼix bʌ lac ñusa (Lc. 9:62).

4. ¿Chuqui miʼ cajel laj qʼuel ti ili estudio?

⁴ Ti ili estudio mi caj lac taj ti tʼan uxchajp mejl bʌ i yʌcʼ chaʼan mi lac ñaʼtan jiñi tsaʼix bʌ lac ñusa: Jiñi chʼijyemlel, cheʼ bʌ mi lac lot michʼajel ti lac pusicʼal yicʼot cheʼ bʌ mi laj cʌlʌx ñaʼtan jiñi mulil tsaʼ bʌ lac mele. Ti ili uxchajp, mi caj laj qʼuel bajcheʼ jiñi principio tac am bʌ ti Biblia miʼ mejlel i coltañonla lac ‹ñajʌtesan jiñi am bʌ ti lac pat› yicʼot mi lac ‹chaʼlen wersa chaʼan mi lac taj jiñi am bʌ tiʼ tojel jiñi lac wut› (Fil. 3:13).

5. ¿Chuqui ti ticʼojel miʼ yʌqʼueñonla Eclesiastés 7:10 (TNM)?

⁵ (Pejcan Eclesiastés 7:10, TNM). * Ili texto maʼañic miʼ yʌl chaʼan mach weñic cheʼ mi laj cʼajtiben lac bʌ chucoch ñumen wen tsaʼ lac ñusa ti wajali. I wocolel jiñʌch cheʼ bʌ mi la cʌl chaʼan ñumen wen tsaʼ lac ñusa ti jimbʌ ora i ti ili ora mach cheʼiqui. Come jumpʼejlʌch lac majtan tilem bʌ ti Jehová cheʼ bʌ mi laj cʼajtesan jiñi utsʼatax bʌ tsaʼ lac ñusa. I wocolel jiñʌch cheʼ bʌ mi lac laj jiñi tsaʼix bʌ lac ñusa yicʼot jiñi woli (yʌquel) bʌ lac ñusan ili ora, i miʼ cʼotel lac ñaʼtan chaʼan mach ñumen weñix woli bʌ lac ñusan ili ora. Yambʌ Biblia tsiʼ chaʼle ti traducir bajcheʼ iliyi jiñi texto: «Mach a cʼajtiben a bʌ chucoch ñumen wen tsaʼ ñusa ti wajali come mi caj a pʌs chaʼan maʼañic maʼ ñaʼtan pañimil».

6. ¿Chucoch mi caj lac pʌs chaʼan maʼañic lac ñaʼtʌbal mi tsaʼ lac chʌn ñaʼta chaʼan ñumen wen jiñi tsaʼ bʌ lac ñusa? Alʌ jumpʼejl ejemplo.

⁶ ¿Chucoch mi caj lac pʌs chaʼan maʼañic lac ñaʼtʌbal mi tsaʼ lac chʌn ñaʼta chaʼan ñumen wen jiñi tsaʼ bʌ lac ñusa? Come jiñi chʼijyemlel miʼ mejlel i yʌcʼ chaʼan cojach mi laj cʼajtesan jiñi wen tac bʌ tsaʼ bʌ lac ñusa o miʼ ñajʌyel lac chaʼan jiñi wocol tsaʼ bʌ lac ñusa ti jimbʌ ora. Laʼcu lac ñaʼtan tiʼ tojlel jiñi israelitajob, cheʼ bʌ tsaʼ jaxto loqʼuiyob ti Egipto tsaʼ ñajʌyi i chaʼañob jiñi wocol tsaʼ bʌ i ñusayob yaʼi, i cojach tsaʼ cʼajtiyi i chaʼañob jiñi sumuc bʌ bʌlñʌcʼʌl. Tsiʼ yʌlʌyob: «Sumuc jax jini chʌy, yicʼot pepino, yicʼot melón, yicʼot cebolla, yicʼot xʼaxux, yicʼot xwelux tsaʼ bʌ laj cʼuxu cheʼ yaʼto añonla ti Egipto» (Nm. 11:5). Pero ¿majtan jach ba jiñi tsaʼ bʌ i cʼuxuyob? Maʼañic. Letsʌch tsiʼ tojoyob jiñi bʌlñʌcʼʌl come ti Egipto tsaʼ wen ticʼlʌntiyob ti eʼtel (Éx. 1:13, 14; 3:6-9). Mach jalic tsaʼ ñumi, tsaʼ ñajʌyi i chaʼañob jiñi wocol tac i tsaʼ caji i ñaʼtañob jiñi tsaʼ bʌ i cʌyʌyob. Tsaʼ caji i xucʼchocoñob i pensar ti jiñi tsaʼ bʌ i cʌyʌyob, i maʼañic tsiʼ xucʼchocoyob i pensar ti jiñi tsaʼ bʌ i mele Jehová tiʼ tojlelob. Iliyi maʼañic tsiʼ wis mulaj Jehová (Nm. 11:10).

7. ¿ Chuqui tsiʼ colta juntiquil hermana chaʼan maʼañic miʼ cʌlʌx ubin i chʼijyemlel?

⁷ ¿Chuqui mi caj i coltañonla chaʼan maʼañic mi laj cʌlʌx ubin lac chʼijyemlel? Laʼ laj qʼuel  tsaʼ bʌ ujti tiʼ tojlel juntiquil hermana tsaʼ bʌ i teche eʼtel ti Betel i chaʼan Brooklyn ti 1945. Mach cabʌlic jab tsaʼ ñumi, tsaʼ ñujpuñi yicʼot juntiquil betelita i cabʌl jab tsiʼ melbeyob i yeʼtel Jehová yaʼi. Cheʼ ti 1976, jiñi hermano tsaʼ cʼamʼa. Cheʼ bʌ tsiʼ qʼuele chaʼan mach jalix yom chaʼan miʼ chʌmel (sajtel), tsiʼ yʌqʼue wem bʌ ticʼojel tac jiñi i yijñam cheʼ bʌ i bajñelix mi caj i cʌytʌl. Jiñi hermano tsiʼ yʌlʌ: «Tijicña tsaʼ lac ñusa ti lac ñujpuñel, i cabʌlob mach cheʼic miʼ ñusañob». I tsiʼ bej sube: «Anquese mach ñajʌyic a chaʼan jiñi tsaʼ tac bʌ lac ñusa, mach a chʌn cʼajtesan tiʼ pejtelel ora jiñi tsaʼix bʌ ñumi. Cheʼ bʌ mi caj i ñumel majlel jiñi qʼuin maʼañix mi caj a wen ubin a chʼijyemlel. Mach cʼunʼac a pusicʼal chaʼan jiñi woli bʌ a ñusan. Yom tijicñayet chaʼan jiñi wen utsʼatax bʌ tsaʼ bʌ lac tem ñusa cheʼ bʌ tsaʼ lac melbe i yeʼtel Jehová. [...] Jumpʼejlʌch lac majtan tilem bʌ ti Dios cheʼ bʌ mi lac cʼajtesan jiñi tsaʼix bʌ lac ñusa». ¡Weñʌch bʌ ticʼojel tsiʼ yʌcʼʌ jiñi hermano!

8. ¿Chuqui tiʼ bendición tsiʼ taja jiñi hermana chaʼan tsiʼ jacʼbe chuqui tiʼ sube jiñi i ñoxiʼal?

⁸ Jiñi hermana tsaʼʌch i jacʼʌ jiñi tsaʼ bʌ subenti ti ñoxiʼal. Cheʼ bʌ 92 i jabilel, jiñi hermana tsaʼ chʌmi i chʌn xucʼul tsiʼ melbe i yeʼtel Jehová. I cheʼ cuxulto tsiʼ yʌlʌ: «Cheʼ bʌ mic ñaʼtan chaʼan an ñumen ti 63 jab cajel c melben i yeʼtel Jehová tiʼ pejtelel ora, miʼ mejlel j cʌl chaʼan wen tijicña an chumleyon». Jiñi hermana miʼ yʌl chucoch tijicña miʼ yubin i bʌ: «Muʼ bʌ i wen aqʼueñon c tijicñʌyel jiñʌch cheʼ an la quermañujob tiʼ pejtelel Pañimil yicʼot mi lac pijtan chaʼan temel mi lac chumtʌl yicʼotob yaʼ ti Paraíso cheʼ bʌ tiʼ pejtelel ora miʼ cajel lac melben i yeʼtel Jehová, jiñi i sujm bʌ lac Dios». * Jiñi hermana tsiʼ pʌsbeyonla wem bʌ ejemplo come tiʼ pejtelel ora tsiʼ xucʼchoco i pensar ti jiñi talto bʌ qʼuin.

9. Cheʼ bajcheʼ miʼ yʌl Levítico 19:18, ¿baqui ora wocol mi la cubin chaʼan mi lac locʼ jiñi michʼajel ti lac pusicʼal?

⁹ (Pejcan Levítico 19:18). Lʌcʼʌl tiʼ pejtelel ora, ñumen wocol mi la cubin chaʼan mi lac ñusʌben i mul juntiquil hermano, juntiquil wem bʌ la camigo o juntiquil ti lac familia. Juntiquil  hermana tsiʼ yʌlʌ chaʼan juntiquil hermana tsiʼ xujchʼibe i taqʼuin. Tiʼ wiʼil tsiʼ cʼajti i ñusʌntel i mul come mach i sujmic tsaʼ bʌ i yʌlʌ, pero jiñi hermana tsaʼ bʌ ajli chaʼan tsiʼ chaʼle xujchʼ wocol tsiʼ yubi chaʼan miʼ ñajʌtesan jiñi tsaʼ bʌ ujti. Tajol joñonla maʼañic an lac ñusa ili wocol, pero cabʌlonla tajol an chuqui tsaʼ bʌ lac ñusa tsaʼ bʌ i yʌcʼʌ chaʼan wocol mi lac locʼsan jiñi michʼajel ti lac pusicʼal.

10. ¿Chuqui miʼ mejlel i coltañonla chaʼan mi lac locʼ jiñi michʼajel ti lac pusicʼal?

¹⁰ ¿Chuqui miʼ mejlel i coltañonla chaʼan mi lac locʼ jiñi michʼajel ti lac pusicʼal? Ñaxan, laʼ laj cʼajtesan chaʼan Jehová miʼ qʼuel tiʼ pejtelel muʼ bʌ i yujtel. Miʼ qʼuel tiʼ pejtelel jiñi wocol tac muʼ bʌ lac ñusan yicʼot cheʼ bʌ mi lac melbentel mach bʌ weñic (He. 4:13). Cʼux miʼ yubin cheʼ bʌ miʼ qʼuel chaʼan mi lac ñusan wocol (Is. 63:9). I miʼ yʌcʼ i tʼan chaʼan miʼ cajel i jisan pejtelel jiñi wocol tac muʼ bʌ i ticʼlañonla (Ap. 21:3, 4).

11. ¿Bajcheʼ miʼ coltañonla cheʼ bʌ mi lac locʼsan jiñi michʼajel ti lac pusicʼal?

¹¹ Yom mi laj cʼajtesan jaʼel chaʼan miʼ coltañonla cheʼ mi lac locʼ jiñi michʼajel am bʌ ti lac pusicʼal. Cheʼʌch tsaʼ ujti tiʼ tojlel jiñi hermana tsaʼ bʌ ajli chaʼan tsiʼ xujchʼi taqʼuin. Cheʼ bʌ tsaʼ ñumi majlel jiñi qʼuin, tsaʼ mejli i locʼsan jiñi michʼajel tiʼ pusicʼal. Tsaʼ cʼoti i chʼʌmben i sujm chaʼan cheʼ bʌ mi lac ñusʌben i mul yambʌlob, Jehová miʼ ñusʌbeñonla lac mul jaʼel (Mt. 6:14). Yujil chaʼan machʌch weñic tsaʼ bʌ i melbe jiñi hermana, pero tsiʼ chaʼle wersa chaʼan miʼ locʼsan jiñi michʼajel am bʌ tiʼ pusicʼal. Jin chaʼan, ñumen tijicña tsiʼ yubi i bʌ yicʼot tsiʼ xucʼchoco i pensar i melben i yeʼtel Jehová.

12. ¿Chuqui miʼ cʌntesañonla 1 Juan 3:19, 20?

¹² (Pejcan 1 Juan 3:19, 20). An i tajol cʼuxʌch mi la cubin chaʼan tsaʼ lac mele mach bʌ weñic. Tajol tiʼ caj an chuqui tac tsaʼ lac mele cheʼ bʌ maxto laj cʌñʌyic Jehová o tiʼ caj tsaʼ lac mele mach bʌ weñic cheʼ bʌ tsaʼix lac chʼʌmʌ jaʼ. Mach yʌlʌyic chuqui tsaʼ lac mele, i tilelʌch cheʼ mi la cubin lac bʌ bajcheʼ iliyi (Ro. 3:23). Anquese mi lac chaʼlen wersa lac mel chuqui wem bʌ, «ti lac pejtelel cabʌl mi lac taj lac sajtemal» (Stg. 3:2; Ro. 7:21-23). Machʌch añic mi lac mulan cheʼ bʌ bej cʼuxto mi la cubi jiñi tsaʼ bʌ lac mele, pero mucʼʌch mejlel i coltañonla. Come miʼ mejlel i coltañonla lac tojʼesan lac melbal yicʼot chaʼan maʼañix mi lac chaʼ mel jiñi tsaʼix bʌ lac mele (He. 12:12, 13).

13. ¿Chucoch ñuc i cʼʌjñibal cheʼ maʼañic mi laj cʌlʌx ñaʼtan jiñi mulil tsaʼ bʌ lac mele?

¹³ An i tajol bej cʼuxto mi la cubin jiñi mulil tsaʼ bʌ lac mele anquese tsaʼ laj cʼajtibe Jehová chaʼan miʼ ñusʌbeñonla lac mul i tsaʼʌch i ñusʌbeyonla. Mejlʌch i ticʼlañonla cheʼ bʌ mi laj cʌlʌx ñaʼtan jiñi mulil tsaʼ bʌ lac mele (Sal. 31:10; 38:3, 4). ¿Chucoch cheʼ mi la cʌl? Laʼ laj qʼuel tsaʼ bʌ ujti tiʼ tojlel juntiquil hermana bej cʼuxto bʌ tsiʼ yubi jiñi mach bʌ weñic tsiʼ mele ti wajali. Miʼ yʌl: «Tsaʼ caji c ñaʼtan chaʼan maʼañix i cʼʌjñibal cheʼ bʌ mic chaʼlen wersa c melben i yeʼtel Jehová come tajol maʼañic mi caj c taj j coltʌntel». Tajol cabʌlonla cheʼ mi la cubin lac bʌ bajcheʼ iliyi. Jin chaʼan, ñuc i cʼʌjñibal cheʼ bʌ maʼañic mi laj cʌlʌx ñaʼtan jiñi mulil tsaʼ bʌ lac mele. Satanás mi caj i wen ubin i tijicñʌyel mi tsaʼ cʼoti laj cʌy lac melben i yeʼtel Jehová, anquese Jehová muqʼuixto i wen cʼuxbiñonla (laja yicʼot 2 Corintios 2:5-7, 11).

14. ¿Bajcheʼ miʼ mejlel lac ñaʼtan chaʼan Jehová muqʼuixto i cʼuxbiñonla?

¹⁴ Pero tajol mi laj cʼajtiben lac bʌ: «¿Bajcheʼ cujil chaʼan Jehová muqʼuixto i cʼuxbiñon?». Cheʼ maʼ melben a bʌ ili cʼajtiya, miʼ pʌs chaʼan Jehová mejlʌch i ñusʌbeñet a mul. ¿Chucoch cheʼ mi la cʌl? Ti jumpʼejl revista La Atalaya añix bʌ cabʌl jab tsaʼ loqʼui, tsiʼ taja ti tʼan bajcheʼ yubil miʼ mejlel la cubin lac bʌ mi tsaʼ chaʼ yajliyonla ti jiñi mulil tsaʼ bʌ lac mele ti wajali. Jiñi artículo tsiʼ yʌlʌ: «Mach lujbʼaquet, mach a  ñaʼtan chaʼan jiñi mulil tsaʼ bʌ a mele maʼañic i ñusʌntel. Jiñʌch yom bʌ Satanás chaʼan maʼ ñaʼtan. Miʼ chʼijyem maʼ wubin a bʌ yicʼot maʼ michʼ qʼuel a bʌ tiʼ caj jiñi mulil, miʼ pʌs chaʼan uts a pusicʼal yicʼot chaʼan Jehová miʼ mejlel i ñusʌbeñet a mul. Chʌn pʌsʌ a pecʼlel yicʼot chʌn cʼajtiben Dios chaʼan miʼ ñusʌbeñet a mul, chaʼan miʼ sʌqʼuesʌbeñet a conciencia yicʼot chaʼan maʼ cʌy a mel jiñi mulil. Cʼajtiben i coltaya Jehová cheʼ bʌ maʼ yajlel ti jiñi mulil, cheʼ bajcheʼ juntiquil chʼiton miʼ cʼajtiben i coltaya i papá cheʼ bʌ miʼ yajlel ti jumpʼejl wocol. I Jehová mi caj i coltañet come jiñʌch juntiquil Dios wen am bʌ i yutslel». *

15, 16. ¿Bajcheʼ tsiʼ yubi i bʌ juntiquil hermano yicʼot juntiquil hermana cheʼ bʌ tsaʼ cʼoti i ñaʼtañob chaʼan Jehová muqʼuixto i cʼuxbiñob?

¹⁵ Cabʌl hermanojob miʼ ñuqʼuesʌbeñob i pusicʼal cheʼ bʌ miʼ qʼuelob chaʼan Jehová muqʼuixto i cʼuxbiñob. Jumpʼejl ejemplo, juntiquil hermano tsaʼ cʼoti tiʼ pusicʼal jumpʼejl experiencia tsaʼ bʌ i pejca ti jiñi sección: «Jiñi Biblia tsiʼ qʼuextʌbeyob i pensar». Ti jiñi artículo, jiñi hermana tsiʼ yʌlʌ chaʼan wocol miʼ yubin chaʼan Jehová miʼ cʼuxbin tiʼ caj chuqui tsiʼ mele ti wajali. Iliyi tsaʼʌch caji i bej ticʼlan anquese jiñi hermana añix cabʌl jab tsiʼ chʼʌmʌ jaʼ. Pero cheʼ bʌ tsaʼ caji i ñaʼtan jiñi i cuxtʌlel tsaʼ bʌ i yʌcʼʌ Jesús chaʼañonla, tsiʼ colta i ñop chaʼan Jehová mucʼʌch i cʼuxbin. *

¹⁶ ¿Bajcheʼ tsiʼ colta jiñi hermano ili experiencia? Miʼ yʌl: «Cheʼ bʌ xcolelonto tsaʼ c wen mulaj j qʼuel pornografía, pero tsaʼ j cʌyʌ j qʼuel. Chʼijyemtic jax ti alol pero maxto jali tsaʼ chaʼ caji j qʼuel. Tsaʼ j cʼajtibe jiñi ancianojob tij congregación chaʼan miʼ coltañoñob, i añix chuqui an c mele chaʼan mij cʌy j qʼuel jiñi pornografía. An i subeyoñob chaʼan Dios miʼ cʼuxbiñon yicʼot chaʼan miʼ pʼuntañon. Pero an i tajol mic ñaʼtan chaʼan maʼañic j cʼʌjñibal yicʼot chaʼan Dios maʼañic miʼ cʼuxbiñon». Jiñi hermano tsaʼʌch i tsictesa chaʼan jiñi tsaʼ bʌ i yʌlʌ jiñi hermana tsaʼʌch i colta. Tsiʼ yʌlʌ: «Muqʼuix c chʼʌmben i sujm chaʼan cheʼ bʌ mic ñaʼtan chaʼan maʼañic baqui ora mi caj i ñusʌbeñon c mul Jehová woli c pʌs chaʼan maʼañic i cʼʌjñibal c chaʼan jiñi i cuxtʌlel tsaʼ bʌ i yʌcʼʌ Jesús chaʼan miʼ ñusʌntel c mul.  Tsaʼ c setʼe ili artículo chaʼan mic pejcan yicʼot mic wen ñaʼtan cheʼ bʌ miʼ tilel tic ñaʼtʌbal mach tac bʌ weñic».

17. ¿Chuqui tsiʼ colta Pablo chaʼan maʼañic miʼ cʌlʌx pensarin jiñi mulil tsaʼ bʌ i mele?

¹⁷ Cheʼ bʌ mi lac pejcan ili experiencia tac miʼ yʌqʼueñonla lac ñaʼtan jiñi tsaʼ bʌ i ñusa jiñi apóstol Pablo. Tsiʼ mele tsʌts tac bʌ mulil cheʼ bʌ maxto xñoptʼañic. I tsaʼʌch i cʼajtesa jiñi tsaʼ bʌ i mele, pero mach yaʼic tsiʼ xucʼchoco i pensar (1 Ti. 1:12-15). Tsiʼ qʼuele jiñi i cuxtʌlel tsaʼ bʌ i yʌcʼʌ Jesús bajcheʼ jumpʼejl i majtan tilem bʌ ti Dios (Gá. 2:20). Cheʼ bajcheʼ iliyi, maʼañic tsiʼ cʌlʌx pensari jiñi mulil tsaʼ bʌ i mele yicʼot ti bele ora tsiʼ yʌqʼue Jehová chuqui wem bʌ.

18. ¿Chuqui tsaʼ laj cʌñʌ ti ili estudio?

¹⁸ ¿Chuqui tsaʼ laj cʌñʌ ti ili estudio? Ñaxam bʌ, chaʼan jumpʼejlʌch majtañʌl tilem bʌ ti Jehová cheʼ bʌ mi laj cʼajtesan jiñi wen utsʼatax bʌ tsaʼ lac ñusa. Anquese wen utsʼatax tsaʼ lac ñusa, ñumen wen chuqui mi caj lac ñusan ti jiñi tsijiʼ bʌ pañimil (mulawil). I chaʼpʼejlel, jiñi yambʌlob miʼ mejlel i melbeñoñobla mach bʌ weñic, pero mi tsaʼʌch lac ñusʌbeyob i mul miʼ mejlel lac chʌn melben i yeʼtel Jehová. I yuxpʼejlel, cheʼ bʌ mi laj cʌlʌx pensarin jiñi mulil tsaʼ bʌ lac mele miʼ mejlel i yʌcʼ chaʼan mach tijicñayic mi lac melben i yeʼtel Jehová. Jin chaʼan, lajal bajcheʼ Pablo yom mi lac ñop chaʼan Jehová tsaʼix i ñusʌbeyonla lac mul.

19. ¿Bajcheʼ la cujil chaʼan yaʼ ti tsijiʼ bʌ pañimil maʼañix mi caj lac chʌn cʼajtesan jiñi mach bʌ weñic tsaʼ lac ñusa?

¹⁹ Cheʼ bʌ mi caj lac chumtʌl yaʼ ti tsijiʼ bʌ pañimil, baqui mi caj lac taj laj cuxtʌlel mach bʌ añic i jilibal, maʼañix mi caj lac chʌn cʼajtesan jiñi mach bʌ weñic. Jiñi Biblia miʼ yʌl chaʼan ti jimbʌ ora «maʼanic mi caj i chʌn ñaʼtʌntel jini tsaʼix bʌ ñumi. Maʼanix majch mi caj i chʌn cʼajtesan» (Is. 65:17). An cabʌlix bʌ jab cajel lac melben i yeʼtel Jehová i añix lac jabilel, pero yaʼ ti tsijiʼ bʌ pañimil mi caj lac chaʼ sujtel bajcheʼ juntiquil xcolel (Job 33:25). Jin chaʼan, la com lac xucʼchocon lac pensar ti jiñi tsijiʼ bʌ pañimil yicʼot com lac chaʼlen wersa ili ora chaʼan mi lac chumtʌl yaʼi.