1. Cheʼ bajcheʼ miʼ yʌl Mateo 7:13, 14, ¿chuqui yom i yʌl cheʼ bʌ jiñi xñoptʼañonla woliyonla ti xʌmbal?

JIÑI xñoptʼañonbʌla lajal bajcheʼ woliyonla (choncolonla) ti xʌmbal chaʼan an baqui mi laj cʼotel. ¿I baqui la com cʼotel? La com cʼotel ti jiñi tsijiʼ bʌ pañimil baqui Jehová jiñʌch muʼ bʌ i chaʼlen yumʌntel. Ti jujumpʼejl qʼuin mi lac xʌn majlel ti jiñi bij muʼ bʌ i pʌyonla majlel chaʼan mi lac taj laj cuxtʌlel. Pero cheʼ bajcheʼ tsiʼ yʌlʌ Jesús, jiñi bij chʼoʼchʼoc jach i an tajol wocolʌch mi la cubin chaʼan mi lac majlel ti jiñi bij (pejcan Mateo 7:13, 14). Come xmulilonla, an i tajol mi lac wen loqʼuel ti jiñi bij (Gá. 6:1).

2. ¿Chuqui mi caj laj qʼuel ti ili estudio? (Qʼuele jaʼel jiñi recuadro: « Jiñi pecʼlel miʼ coltañonla chaʼan mi lac tojʼesan jiñi lac melbal tac»).

² Chaʼan maʼañic mi lac loqʼuel ti jiñi chʼoʼchʼoc bʌ bij muʼ bʌ i pʌyonla majlel lac taj laj cuxtʌlel, yom tiʼ pejtelel lac pusicʼal la com laj qʼuextan bajcheʼ mi lac chaʼlen pensar, chuqui mi lac mel yicʼot bajcheʼ yubil mi la cubin cheʼ bʌ an chuqui miʼ qʼuextʌyel. Jiñʌch tsaʼ bʌ i taja ti tʼan jiñi apóstol Pablo cheʼ bʌ tiʼ sube jiñi xñoptʼañob añoʼ bʌ ti Corinto chaʼan yom miʼ chʌn ‹tojʼesañob i bʌ› (2 Co. 13:11, TNM). Ili ticʼojel bej anto i cʼʌjñibal lac chaʼan ili ora. Ti ili estudio, miʼ cajel laj qʼuel bajcheʼ miʼ mejlel i coltañonla jiñi Biblia chaʼan mi lac tojʼesan chuqui mi lac mel yicʼot bajcheʼ miʼ mejlel i coltañonla jiñi la camigojob pʼʌtʌloʼ bʌ tiʼ chaʼan bʌ Dios chaʼan maʼañic mi lac loqʼuel ti jiñi bij muʼ bʌ i pʌyonla majlel lac taj laj cuxtʌlel. Cheʼ jaʼel, miʼ cajel laj qʼuel baqui tac bʌ wocol miʼ mejlel la cubin chaʼan mi lac jacʼ muʼ bʌ i subeñonla jiñi i yorganización Jehová. Yicʼot chucoch ñucʌch i cʼʌjñibal cheʼ an lac pecʼlel mi an chuqui la com laj qʼuextan ti laj cuxtʌlel yicʼot chaʼan mi lac chʌn melben i yeʼtel (troñel) Jehová ti lac tijicñʌyel.

3. ¿Bajcheʼ miʼ coltañonla jiñi i Tʼan Dios?

³ Wocolʌch mi la cubin chaʼan mi laj cʌn jiñi am bʌ ti lac pensar  yicʼot bajcheʼ yubil mi la cubin lac bʌ. ¿Chucoch? Come jiñi lac pusicʼal miʼ lotiñonla, i wocol mi la cubin chaʼan mi laj cʌn chuqui mi caj i ñijcañonla lac mel (Jer. 17:9). Mi lac lotin lac bʌ ti mach bʌ i sujmic pensar (Stg. 1:22). Jin chaʼan, ñucʌch i cʼʌjñibal cheʼ bʌ mi laj cʼʌn jiñi i Tʼan Dios chaʼan mi laj cʌn lac bʌ. Jiñi Biblia miʼ coltañonla laj qʼuel bajcheʼ yilalonla tiʼ sujm. Miʼ tsictesan chuqui woli (yʌquel) i yʌl lac pusicʼal yicʼot chuqui yom lac pusicʼal (He. 4:12, 13). Miʼ mejlel la cʌl chaʼan lajalʌch bajcheʼ jumpʼejl máquina i chaʼan rayos X, muʼ bʌ i coltañonla laj qʼuel lac malil. Jin chaʼan, mi la com chaʼan miʼ coltañonla jiñi ticʼojel tac am bʌ ti Biblia yicʼot jiñi muʼ bʌ i yʌqʼueñoñobla jiñi hermanojob waʼchocobiloʼ bʌ ti Dios, yom añʌch lac pecʼlel.

4. ¿Bajcheʼ la cujil chaʼan jiñi rey Saúl tsiʼ chanʼesa i bʌ?

⁴ Jiñi tsaʼ bʌ ujti tiʼ tojlel jiñi rey Saúl miʼ pʌs chuqui miʼ mejlel ti ujtel cheʼ maʼañic lac pecʼlel. Tsaʼ cʼoti i wen chanʼesan i bʌ, i maʼañic tsiʼ yʌlʌ chaʼan yomʌch miʼ qʼuextan i pensar yicʼot i melbal (Sal. 36:1, 2; Hab. 2:4). Ili tsiʼ pʌsʌ cheʼ bʌ Jehová an chuqui tiʼ sube i mel tiʼ tojlel jiñi amalequitajob cheʼ bʌ miʼ mʌlbeñob, i Saúl maʼañic tsiʼ jacʼʌ tʼan. Cheʼ bʌ jiñi xʼaltʼan Samuel tiʼ sube chaʼan tsiʼ ñusʌbe i tʼan Jehová, Saúl maʼañic tsiʼ yʌlʌ chaʼan machʌch weñic tsaʼ bʌ i mele. Tsaʼ jach i ñopo i coltan i bʌ i tsiʼ yʌlʌ chaʼan maʼañic i wen wocolel jiñi tsaʼ bʌ i mele, i chaʼan tiʼ caj yambʌlob maʼañic tsiʼ jacʼʌ tʼan (1 S. 15:13-24). I ti jimbʌ ora maxto junyajlelic tsiʼ mele Saúl bajcheʼ jiñi (1 S. 13:10-14). Chʼijyemtic jax ti alol pero tsiʼ chanʼesa i bʌ. Come maʼañic tsiʼ qʼuexta i pensar, Jehová tsiʼ yʌqʼue i toj i mul yicʼot mach chʌn weñix tsiʼ qʼuele bajcheʼ rey.

5. ¿Chuqui miʼ cʌntesañonla jiñi tsaʼ bʌ ujti tiʼ tojlel Saúl?

⁵ Chaʼan mi lac ñaʼtan jiñi tsaʼ bʌ ujti tiʼ tojlel Saúl, yom mi lac melben lac bʌ ili cʼajtiya tac: «¿Muʼ ba c sʌclan c tʼan chaʼan maʼañic mic mel muʼ bʌ c pejcan yaʼ ti Biblia? ¿Muʼ ba c ñaʼtan chaʼan maʼañic i wocolel cheʼ bʌ mic ñusan tʼan? ¿Muʼ ba j cʌcʼ tiʼ wenta yambʌlob jiñi tsaʼ bʌ c mele?». Mi ti ili uxpʼejl cʼajtiya tsaʼ la cʌlʌ chaʼan añʌch jumpʼejl mucʼʌch bʌ lac mel, yom mi laj qʼuextan bajcheʼ mi lac chaʼlen pensar yicʼot jiñi lac melbal (chaʼlibal). Mi maʼañic mi laj qʼuextan lac bʌ miʼ mejlel i cʼotel lac chanʼesan lac bʌ, i Jehová maʼañic mi caj i mulan sujtel ti la camigo (Stg. 4:6).

6. ¿Chucoch qʼuexel David yicʼot Saúl?

⁶ Laʼ laj qʼuel chuqui tsiʼ mele jiñi rey David, juntiquil wiñic tsaʼ bʌ ochi tiʼ qʼuexol bajcheʼ rey jiñi Saúl, tsaʼ bʌ i wen cʼuxbi i «mandar lac Yum» Jehová (Sal. 1:1-3). David yujil chaʼan Jehová miʼ coltan jiñi añoʼ bʌ i pecʼlel, pero tsʼaʼ miʼ qʼuel jiñi muʼ bʌ i chanʼesañob i bʌ (2 S. 22:28, TNM). Jin chaʼan, David tsiʼ yʌcʼʌ chaʼan jiñi i mandar Dios miʼ tojʼesʌben i pensar. Tiʼ tsʼijbu: «Mi caj c chʼujutesan c Yum muʼ bʌ i cʌntesañon. Miʼ cʌntesañon tic pusicʼal cheʼ ti acʼʌlel» (Sal. 16:7).

7. Mi añʌch lac pecʼlel, ¿chuqui miʼ cajel lac mel?

⁷ Mi añʌch lac pecʼlel, miʼ cajel la cʌcʼ chaʼan jiñi Biblia miʼ tojʼesan jiñi lac pensar mach bʌ weñic chaʼan maʼañic miʼ cʼotel lac mel mach tac bʌ weñic. Jiñi i Tʼan Dios lajalʌch bajcheʼ mi caj i subeñonla: «Wʌ jach an jini bij. Wʌʼ yom mi laʼ chaʼlen xʌmbal». Mi caj i subeñonla mi wolix lac loqʼuel ti jiñi bij (Is. 30:21). Mi caj i wen coltañonla mi mucʼʌch lac wen ñʌchʼtʌben i Tʼan Jehová (Is. 48:17). Jumpʼejl ejemplo, maʼañic baqui ora an majqui mi caj i subeñonla chaʼan mach weñic chuqui woli lac mel i maʼañic mi caj la cubin quisin. I ñumen lʌcʼʌl miʼ cajel la cubin lac bʌ tiʼ tojlel Jehová come mi caj i qʼuelonla bajcheʼ juntiquil cʼuxbibil bʌ i yalobil (He. 12:7).

8. Cheʼ bajcheʼ miʼ yʌl Santiago 1:22-25, ¿bajcheʼ miʼ mejlel i sujtel ti jumpʼejl espejo jiñi i Tʼan Dios?

⁸ Jiñi i Tʼan Dios lajalʌch bajcheʼ jumpʼejl espejo (pejcan Santiago 1:22-25). Ti jujumpʼejl sʌcʼan, lʌcʼʌl ti lac pejtelel mi laj qʼuel lac bʌ ti jumpʼejl espejo cheʼ bʌ muʼto caj lac loqʼuel ti la cotot. Cheʼ bajcheʼ iliyi, mi lac taj laj qʼuel mi an chuqui yom «lac tojʼesan» ti lac ñiʼ lac wut cheʼ bʌ maxto i qʼueleyoñobla jiñi yambʌlob. Lajalʌch  jaʼel, cheʼ bʌ mi lac pejcan jiñi Biblia ti jujumpʼejl qʼuin, mi lac taj laj qʼuel mi yomʌch mi lac tojʼesan bajcheʼ mi lac chaʼlen pensar o jiñi lac melbal. Yonlel hermanojob miʼ pejcañob ti jujumpʼejl sʌcʼan jiñi folleto Laʼ lac tsajin jiñi Biblia ti jujumpʼejl qʼuin cheʼ bʌ muʼto caj i loqʼuelob majlel tiʼ yotot. I miʼ yʌcʼob chaʼan jiñi muʼ bʌ i pejcañob miʼ coltañob chaʼan bajcheʼ yilal yom miʼ chaʼleñob pensar. Cheʼ jiñi, ti jujumpʼejl qʼuin miʼ wen ñaʼtañob bajcheʼ miʼ mejlel i melob jiñi ticʼojel i chaʼan bʌ Dios. Cheʼ jaʼel, yomʌch mi lac pejcan jiñi Biblia yicʼot mi lac wen ñaʼtan chuqui miʼ yʌl ti jujumpʼejl qʼuin. Ili mach poj wocolic yilal, pero jiñʌch junchajp ñuc bʌ i cʼʌjñibal i yom bʌ mi lac mel chaʼan mi lac bej chaʼlen xʌmbal ti jiñi chʼoʼchʼoc bʌ bij muʼ bʌ i pʌyonla majlel lac taj laj cuxtʌlel.

9. ¿Jalaqui ñuc i cʼʌjñibal chaʼan juntiquil la camigo miʼ yʌqʼueñonla ticʼojel?

⁹ ¿Am ba chuqui tsaʼ lac teche lac mel tsaʼ bʌ caji i ñajtʼesañonla tiʼ bijlel Jehová? (Sal. 73:2, 3). Mi juntiquil la camigo tsiʼ yʌqʼueyonla ticʼojel, ¿tsaʼʌch ba lac ñʌchʼta yicʼot tsaʼʌch ba lac mele jiñi tsaʼ bʌ i subeyonla? Weñʌch mi tsaʼʌch lac mele, i miʼ mejlel la cʌl chaʼan mi la cʌqʼuen wocolix i yʌlʌ chaʼan tsiʼ pejcayonla (Pr. 1:5).

10. ¿Chuqui yom mi lac mel cheʼ bʌ juntiquil la camigo miʼ yʌqʼueñonla ticʼojel?

¹⁰ Jiñi Biblia miʼ cʼajtesʌbeñonla chaʼan «miʼ cʼuxbiñonla jini muʼ bʌ i jecʼonla ti isujm bʌ tʼan» (Pr. 27:6). ¿Chuqui yom i yʌl iliyi? Laʼcu lac ñaʼtan chaʼan mi caj laj cʼaxel ti jumpʼejl calle baqui miʼ wen ñumel carro i mi laj qʼuel jiñi lac celular. Mi lac tech xʌmbal i maʼañic mi lac joy qʼuel miʼ yaʼ tilel carro. Cheʼ jiñi, juntiquil la camigo tsʌts miʼ chuc laj cʼʌb i miʼ chʼaʼ choconla. Wen tsʌts miʼ chuconla i yʌx miʼ cʌy laj cʼʌb. Pero come ti ora tsiʼ coltayonla maʼañic tsiʼ juchʼuyonla carro. Tajol cheʼ bʌ miʼ ñumel majlel jiñi qʼuin cʼux mi caj la cubin jiñi laj cʼʌb, pero maʼañic miʼ cajel lac michʼ qʼuel jiñi la camigo. Tijicñayʌch mi caj la cubin lac bʌ chaʼan tsiʼ coltayonla. Lajal jaʼel, mi juntiquil la camigo miʼ coltañonla laj qʼuel chaʼan cheʼ bajcheʼ mi lac chaʼlen tʼan o jiñi lac melbal, mach cheʼic bajcheʼ yom Dios tajol ti ñaxan cʼux mi caj la cubin, pero mach yomic mi lac michʼan come mi caj lac pʌs chaʼan tontojonla (Ec. 7:9). Yom mi la cʌqʼuen wocolix i yʌlʌ come maʼañic tsiʼ bʌcʼña i pejcañonla.

11. ¿Chucoch juntiquil maʼañic miʼ jacʼ jiñi ticʼojel tsaʼ bʌ i yʌqʼue tiʼ pejtelel i pusicʼal juntiquil wem bʌ i yamigo?

¹¹ Jiñi muʼ bʌ i chanʼesan i bʌ maʼañic miʼ jacʼ jiñi ticʼojel tsaʼ bʌ i yʌqʼue tiʼ pejtelel i pusicʼal juntiquil wem bʌ i yamigo. Jiñi muʼ bʌ i chanʼesañob i bʌ yomob chaʼan miʼ subentelob chuqui miʼ mulañob i miʼ cʌyob i yubin chuqui tac i sujm (2 Ti. 4:3, 4). Maʼañic miʼ ñʌchʼtañob chuqui miʼ yʌlob yambʌlob come miʼ ñaʼtañob chaʼan ñumento chuqui yujilob yicʼot chaʼan ñumen ñucob i cʼʌjñibal. Pero jiñi apóstol Pablo tsiʼ yʌlʌ: «Mi an majqui miʼ lon ñaʼtan an i bajñel wenlel, woli jach i bajñel lotin i bʌ» (Gá. 6:3). I jiñi rey Salomón tsiʼ yʌlʌ: «Tijicña jini chʼiton cabʌl bʌ i pusicʼal anquese maʼanic i chubʌʼan. Pero tonto jini ñoxix bʌ yumʌl mach bʌ yomix i jacʼben i tʼan jini yujiloʼ bʌ» (Ec. 4:13).

12. Cheʼ bʌ mi lac pejcan muʼ bʌ i yʌl Gálatas 2:11-14, ¿chuqui miʼ cʌntesañonla jiñi i yejemplo Pedro?

¹² Jiñi apóstol Pedro tsiʼ pʌsbeyonla wem bʌ ejemplo cheʼ bʌ jiñi apóstol Pablo tiʼ sube chaʼan mach weñic chuqui woliʼ mel i cabʌl yaʼ bʌ tempʌbilob (pejcan Gálatas 2:11-14). Pedro añʌch i ñaʼtʌbal, tsiʼ jacʼʌ jiñi ticʼojel i maʼañic tsiʼ loto michʼajel tiʼ pusicʼal anquese Pablo tsiʼ yʌqʼue jiñi ticʼojel cheʼ bʌ cabʌl yaʼ tempʌbilob yicʼot ti toj bʌ tʼan tiʼ sube. Pedro tsaʼ cʼoti i suben Pablo bajcheʼ ‹cʼuxbibil bʌ i yermaño› (2 P. 3:15).

13. ¿Chuqui yom mi lac ñaxan ñaʼtan cheʼ bʌ an majqui mi caj lac ticʼ?

¹³ Mi tsaʼ laj qʼuele chaʼan yom mi la cʌqʼuen ticʼojel juntiquil la camigo, ¿chuqui yom mi lac ñaxan ñaʼtan? Cheʼ bʌ maxto lac pejca, laʼ laj  cʼajtiben lac bʌ: «¿Woli ba c pʌs chaʼan com chaʼan luʼ wen chuqui miʼ mejlel?» (Ec. 7:16). Jiñi quixtañu yom bʌ chaʼan luʼ wen chuqui miʼ mejlel, i bajñel ñaʼtʌbal jach miʼ cʼʌn cheʼ yom i yʌcʼ ticʼojel i mach i chaʼañic Jehová yicʼot maʼañic miʼ pʌs i pʼuntaya. Miʼ tsaʼix lac wen ñaʼta chucoch la com la cʌqʼuen ticʼojel jiñi la camigo i mi lac bej qʼuel chaʼan yomixto mi lac bej pejcan, laʼ lac suben baqui bʌ jiñi wocol yicʼot laʼ lac melben cʼajtiya tac chaʼan mi laj coltan i ñaʼtan chuqui jiñi mach bʌ weñic tsiʼ mele. Yom chaʼan jiñi muʼ bʌ caj lac suben yaʼʌch chucul ti Biblia, i mach yomic miʼ ñajʌyel a chaʼan chaʼan maʼañic ti a wenta maʼ chaʼlen meloñel tiʼ tojlel a wamigo. Yom jach bʌ maʼ mel, jiñʌch maʼ suben bajcheʼ yubil miʼ yubin Jehová chaʼan jiñi woli bʌ i mel (Ro. 14:10). Laʼ laj cʼʌn jiñi wen tac bʌ tʼan am bʌ ti Biblia. I cheʼ bʌ an majqui mi caj lac ticʼ, laʼ lac pʌs lac pʼuntaya cheʼ bajcheʼ Jesús (Pr. 3:5; Mt. 12:20). Laʼ laj cʼajtesan chaʼan Jehová mi caj i melbeñonla cheʼ bajcheʼ mi lac melben yambʌlob (Stg. 2:13).

14. ¿Chuqui miʼ chajpʌbeñonla jiñi i yorganización Dios?

¹⁴ Jehová miʼ cʼʌn jiñi i yorganización am bʌ ila ti Pañimil chaʼan miʼ coltañonla chaʼan maʼañic mi lac loqʼuel ti jiñi bij muʼ bʌ i pʌyonla majlel lac taj laj cuxtʌlel. Ili i yorganización Jehová am bʌ ti ili Pañimil (Mulawil) miʼ chajpan video tac, jun tac yicʼot jiñi tempa bʌ tac muʼ bʌ i coltañonla chaʼan mi lac jacʼ jiñi ticʼojel tac am bʌ ti Biblia. Pejtelel iliyi, mucʼʌch lac ñop come yaʼʌch loqʼuem ti jiñi Tsʼijbujel tac. Jiñi Junmojt muʼ bʌ i pʌsob bij miʼ cʼajtibeñob Jehová i coltaya yicʼot jiñi chʼujul bʌ i yespíritu chaʼan miʼ yʌlob bajcheʼ ñumen yom miʼ mejlel jiñi subtʼan. Pero mucʼʌch i chaʼ qʼuelob jiñi tsaʼix bʌ i yʌlʌyob chaʼan miʼ mejlel «come ili pañimil ili ora woliʼ qʼuextʌyel majlel» i jiñi i yorganización añʌch chuqui yom i qʼuextan (1 Co. 7:31, TNM).

15. ¿Chuqui ti wocol an i ñusayob chaʼtiqui uxtiquil hermanojob?

¹⁵ Mucʼʌch lac jacʼ cheʼ bʌ jiñi i yorganización Dios miʼ subeñonla jumpʼejl tsijib tsictesʌntel chaʼan jumpʼejl cʌntesa am bʌ ti Biblia o miʼ subeñonla chuqui yom mi lac mel chaʼan mi lac pʌs wem bʌ lac melbal tac. Pero ¿chuqui mi lac mel cheʼ bʌ jiñi i yorganización Jehová an chuqui mi qʼuextan i wocolʌch mi la cubin? Jumpʼejl ejemplo, ti jiñi jabil tac ñumen bʌ tilel an wen cʼʌjñem taqʼuin chaʼan miʼ mejlel o miʼ tojʼesʌntel yaʼ baqui mi lac chʼujutesan Jehová. Jin chaʼan, jiñi Junmojt muʼ bʌ i pʌsob bij an i yʌlʌyob chaʼan chaʼpʼej uxpʼejl congregación miʼ mejlel i laja cʼʌñob jumpʼejl i Yotlel tempa bʌ, i jin chaʼan an tac  i Yotlel tempa bʌ an taquix bʌ chojñem. Jiñi taqʼuin woliʼ cʼʌjñel chaʼan miʼ mejlel tac i Yotlel tempa bʌ baqui jiñi hermanojob maʼañobic i chaʼan. Tajol wocolʌch mi la cubin chaʼan mi lac ñʌmʼan cheʼ bʌ jiñi laj congregación miʼ tem i bʌ yicʼot yambʌ congregación ti jumpʼejl i Yotlel tempa bʌ, i jiñi i Yotlel tempa bʌ baqui mi lac tempan lac bʌ ti ñaxan miʼ chojñel. An hermanojob ñajt bʌ miʼ majlelob ti tempa bʌ. An tsaʼ bʌ i chaʼleyob wersa chaʼan miʼ melob o miʼ tojʼesañob jumpʼejl i Yotlel tempa bʌ muʼ bʌ i cʼajtibeñob i bʌ chucoch mi caj i chojñel. Tajol miʼ ñaʼtañob chaʼan maʼañic i cʼʌjñibal cheʼ bʌ tsiʼ yʌqʼueyob i yorajlel yicʼot cheʼ bʌ tsiʼ chaʼleyob wersa i melob jiñi eʼtel. Pero wolʌch i bej jacʼob i mi lac subeñob chaʼan weñʌch chuqui woliʼ melob.

16. ¿Bajcheʼ miʼ coltañonla 2 Corintios 6:1 chaʼan maʼañic mi lac sʌt lac tijicñʌyel?

¹⁶ Mi caj i coltañonla chaʼan maʼañic mi lac sʌt lac tijicñʌyel cheʼ bʌ mi laj cʼajtesan chaʼan woli lac melben i yeʼtel Jehová yicʼot chaʼan jiñʌch woliʼ qʼuel jiñi i yorganización (pejcan 2 Corintios 6:1). Jiñi rey David tsiʼ pʌsbeyonla wem bʌ ejemplo cheʼ bʌ tsiʼ yʌcʼʌ taqʼuin chaʼan miʼ mejlel jiñi templo. Tsiʼ yʌlʌ: «¿Majquiyon? ¿Chuqui j cʼʌjñibal lojon chaʼan maʼ chʼʌm a majtan muʼ bʌ cʌqʼueñet lojon? Come laj a chaʼañʌch c chubʌʼan lojon. Chuqui tac jach mi cʌqʼueñet lojon, jatet tsaʼ wʌn aqʼueyon lojon» (1 Cr. 29:14). Cheʼ bʌ mi la cʌcʼ taqʼuin mi lac chaʼ aqʼuen Jehová jiñi i chaʼañʌch bʌ. Pero Jehová wen tijicña miʼ yubin i bʌ cheʼ bʌ mi la cʌqʼuen i yorajlel, mi laj cʼʌn lac pʼʌtʌlel yicʼot mi laj cʼʌn chuqui an lac chaʼan chaʼan mi lac melben i yeʼtel (2 Co. 9:7).

17. ¿Chucoch mach yomic mi la cubin lac chʼijyemlel mi yomʌch chaʼan mi lac tojʼesan jiñi lac melbal tac?

¹⁷ Chaʼan maʼañic mi lac loqʼuel ti jiñi chʼoʼchʼoc bʌ bij muʼ bʌ i pʌyonla majlel lac taj laj cuxtʌlel, ti lac pejtelel yom mi lac mel bajcheʼ tsiʼ mele Jesús (1 P. 2:21). Mach la cubin lac chʼijyemlel mi tsaʼ laj qʼuele chaʼan yom mi lac tojʼesan jiñi lac melbal tac. Ili weñʌch come miʼ pʌs chaʼan comʌch lac mel muʼ bʌ i subeñonla Jehová. Yujil chaʼan xmulilonla, jin chaʼan maʼañic miʼ pijtan chaʼan luʼ toj chuqui mi lac mel cheʼ bajcheʼ tsiʼ mele Jesús.

18. ¿Chuqui yom mi lac mel chaʼan mi laj cʼotel yaʼ baqui la com?

¹⁸ Laʼ lac xucʼchocon lac pensar ti jiñi talto bʌ qʼuin yicʼot laʼ laj qʼuextan bajcheʼ mi lac chaʼlen pensar, jiñi lac melbal yicʼot bajcheʼ yubil mi la cubin lac bʌ cheʼ bʌ an chuqui miʼ qʼuextʌyel (Pr. 4:25; Lc. 9:62). Laʼ lac bej pʌs lac pecʼlel yicʼot laʼ lac bej mel muʼ bʌ i yʌl 2 Corintios 13:11 (TNM): «Chʌn ubinla laʼ tijicñʌyel, tojʼesan laʼ bʌ». Mi mucʼʌch lac mel mi caj i yajñel yicʼotonla, «jiñi Dios chaʼan bʌ cʼuxbiya yicʼot ñʌchʼtʌlel». I mach cojach mi caj laj cʼotel yaʼ baqui la com, tijicña mi caj la cubin lac chaʼlen xʌmbal ti jiñi bij muʼ bʌ i pʌyonla majlel lac taj laj cuxtʌlel.