1, 2. ¿Chucoch yom mi lac pʌsben lac bʌ xucʼul bʌ cʼuxbiya?

CABɅL chucoch yom mi lac pʌsben lac bʌ xucʼul bʌ cʼuxbiya. Mi lac taj chaʼpʼej uxpʼejl i sujmlel ti ili texto tac: «Mach a cʌy pʼuntaya yicʼot xucʼul bʌ tʼan [ . . . ]. Cheʼ jini mux a tajben i yutslel i pusicʼal Dios. Utsʼat mi caj i qʼuelet winicob», «yujil bʌ pʼuntaya miʼ coltan i bʌ» i «jini muʼ bʌ i chʌn ñop i mel chuqui toj yicʼot chuqui utsʼat mi caj i taj i cuxtʌlel» (Pr. 3:3, 4; 11:17; 21:21).

² Ti ili texto tac miʼ yʌl uxchajp chucoch yom mi lac pʌs xucʼul bʌ cʼuxbiya. Ñaxam bʌ, come miʼ qʼuelonla ti ñuc Dios, i chaʼpʼejlel, come miʼ yʌqʼueñonla lac wenlel. Jumpʼejl ejemplo, miʼ coltañonla lac taj wem bʌ la camigojob. I yuxpʼejlel, cheʼ mi lac pʌs xucʼul bʌ cʼuxbiya mi caj lac taj bendición tac ti talto bʌ qʼuin, bajcheʼ jiñi laj cuxtʌlel maʼañic bʌ miʼ jilel. Tiʼ sujm, cabʌl chucoch yom mi lac jacʼ ili i mandar Jehová: «Chaʼlenla chuqui utsʼat tiʼ tojlel laʼ piʼʌlob. Pʌsbeñob i yutslel laʼ pusicʼal» (Zac. 7:9).

3. ¿Chuqui ti cʼajtiya tac mi caj lac jacʼ ti ili estudio?

³ Ti ili estudio, mi caj lac jacʼ chʌmpʼejl cʼajtiya: ¿Majqui yom mi lac pʌsbeñob xucʼul bʌ cʼuxbiya?, ¿chuqui miʼ pʌsbeñonla jiñi libro chaʼan Rut chaʼan jiñi xucʼul bʌ cʼuxbiya?, ¿bajcheʼ miʼ mejlel lac pʌs ili melbalʌl (chaʼlibalʌl) ili ora? I ¿chuqui ti wenlel mi lac taj cheʼ mi lac pʌs?

4. ¿Bajcheʼ mi lac lajin jiñi xucʼul bʌ i cʼuxbiya Jehová? (Marcos 10:29, 30).

⁴ Cheʼ bajcheʼ tsaʼ laj qʼuele ti yambʌ estudio, Jehová jin  jach miʼ pʌsben xucʼul bʌ i cʼuxbiya jiñi muʼ bʌ i cʼuxbiñob yicʼot muʼ bʌ i melbeñob i yeʼtel (troñel), ili jiñʌch cheʼ lʌcʼʌl miʼ yajñel yicʼotob tiʼ pejtelel ora (Dn. 9:4). La com lac mel (chaʼlen) muʼ bʌ i yʌl Efesios 5:1: «Lajinla Dios cheʼ bajcheʼ cʼuxbibil bʌ i yalobilob». Jin chaʼan, lʌcʼʌl la com ajñel tiʼ tojlel la quermañujob tiʼ pejtelel ora (pejcan Marcos 10:29, 30).

5, 6. ¿Chuquiyes jiñi xucʼtʌlel miʼ ñaʼtañob jiñi lac piʼʌlob?

⁵ Miʼ mejlel la cʌl chaʼan cheʼ mi lac ñumen chʼʌmben i sujm chuquiyes jiñi xucʼul bʌ cʼuxbiya, ñumen wen mi caj lac pʌsbeñob la quermañujob. Jin chaʼan, laʼ laj qʼuel jumpʼejl ejemplo muʼ bʌ i pʌs chucoch mach lajalic jiñi xucʼul bʌ cʼuxbiya yicʼot jiñi xucʼtʌlel muʼ bʌ i ñaʼtañob jiñi lac piʼʌlob.

 ⁶ Miʼ mejlel la cʌl chaʼan juntiquil cabʌlix bʌ jab i cajel ti eʼtel ti jumpʼejl empresa, juntiquilʌch xucʼul bʌ xʼeʼtel. Pero tajol maʼañic baʼ i wis cʌñʌ jiñi i yumob ti eʼtel. Tajol an qʼuiñil maʼañic miʼ mulan bajcheʼ miʼ yujtel jiñi eʼtel. Yaʼan ti eʼtel yaʼi come i cʼʌjñibal chaʼan miʼ taj i cʼʌjñibal bʌ i chaʼan, mach chaʼañic i cʼuxbiya. I mucʼʌch i bej cajel ti eʼtel, jinto miʼ chaʼlen i bʌ ti jubilar o tajol miʼ taj yambʌ ñumen wem bʌ i yeʼtel.

7, 8. a) ¿Chuqui miʼ ñijcan juntiquil chaʼan miʼ pʌs xucʼul bʌ cʼuxbiya? b) ¿Chucoch mi caj lac tsʼitaʼ tsajin muʼ bʌ i yʌl jiñi libro chaʼan Rut?

⁷ Jiñi i xucʼtʌlel jiñi xʼeʼtel  tsaʼ bʌ ajli i jiñi xucʼul bʌ cʼuxbiya mach lajalic come qʼuexel chuqui miʼ ñijcañob chaʼan miʼ pʌsob. ¿Chucoch tsiʼ pʌsʌyob xucʼul bʌ cʼuxbiya jiñi i wiñicob Dios ti wajali? Tsiʼ pʌsʌyob come jiñi i pusicʼal jiñʌch tsaʼ bʌ i ñijcayob, mach chaʼan xicʼbilob. Laʼ laj qʼuel i yejemplo David. Jiñi i pusicʼal tsiʼ ñijca chaʼan miʼ pʌsben xucʼul bʌ cʼuxbiya jiñi i yamigo Jonatán, anquese jiñi i papá i cʼabaʼ Saúl yom i tsʌnsan David. Ti wiʼil, cheʼ bʌ Jonatán chʌmeñix, David tsiʼ bej pʌsbe xucʼul bʌ cʼuxbiya Mefibóset, i yalobil Jonatán (1 S. 20:9, 14, 15; 2 S. 4:4; 8:15; 9:1, 6, 7).

⁸ Cabʌl chuqui miʼ mejlel laj cʌn chaʼan jiñi xucʼul bʌ cʼuxbiya cheʼ mi lac tsʼitaʼ qʼuel muʼ bʌ i yʌl ti Rut. ¿Chuqui miʼ pʌsbeñonla chaʼan xucʼul bʌ cʼuxbiya jiñi muʼ bʌ i yʌjlelob ti jiñi libro? ¿Bajcheʼ miʼ mejlel lac mel iliyi yaʼ ti laj congregación? *

9. ¿Chucoch tsiʼ yʌlʌ Noemí chaʼan Jehová woliʼ ticʼlan?

⁹ Yaʼ ti libro chaʼan Rut miʼ subeñonla chuqui tsaʼ ujti tiʼ tojlel Noemí, jiñi i yʌʼlib Rut yicʼot juntiquil wiñic i cʼabaʼ Boaz, juntiquil muʼ bʌ i cʼuxbin Dios yicʼot ñajti i familia bʌ i ñoxiʼal Noemí. Tiʼ caj jiñi wiʼñal ti Israel, Noemí, jiñi i ñoxiʼal yicʼot chaʼtiquil i yalobilob tsaʼ majliyob ti Moab. Yaʼʌch tsaʼ chʌmi i ñoxiʼal. Jiñi chaʼtiquil i yalobilob tsaʼ ñujpuñiyob, pero tsaʼ chʌmiyob jaʼel (Rt. 1:3-5; 2:1). Ili wocol tac tsiʼ ñumen aqʼue i chʼijyemlel Noemí. Wen cabʌl i chʼijyemlel i jin chaʼan tsiʼ yʌlʌ chaʼan Jehová woli (choncol) i ticʼlan. Laʼ laj qʼuel tsaʼ bʌ i yʌlʌ tiʼ tojlel Dios: «Lac Yum tsiʼ chilbeyoñob tijicña bʌ [ . . . ]. Cabʌl tsiʼ yʌqʼueyon i chʼijiyemlel c pusicʼal jini Mach Bʌ Anic I Pʼisol I Pʼʌtʌlel». Tsiʼ yʌlʌ jaʼel: «Tsiquil tsiʼ yʌqʼueyon wocol lac Yum. Jini Mach Bʌ Anic I Pʼisol I Pʼʌtʌlel tsiʼ yʌqʼueyon i chʼijiyemlel c pusicʼal» (Rt. 1:13, 20, 21).

10. ¿Bajcheʼ yʌlʌ Jehová chaʼan tsaʼ bʌ i yʌlʌ Noemí?

 ¹⁰ ¿I bajcheʼ yʌlʌ Jehová chaʼan jiñi tsaʼ bʌ i yʌlʌ Noemí? Maʼañic tsiʼ cʌyʌ, tsiʼ chʼʌmbe i sujm jiñi i wocol. Jehová yujil chaʼan jiñi wocol miʼ mejlel «i soc juntiquil am bʌ i ñaʼtʌbal» (Ec. 7:7, TNM). Pero Noemí yomʌch miʼ coltʌntel chaʼan miʼ qʼuel chaʼan Jehová maʼañic woli (yʌquel) i cʌy. ¿Chuqui tsiʼ mele Dios chaʼan miʼ coltan? (1 S. 2:8). Tsiʼ yʌcʼʌ chaʼan Rut miʼ mulan i pʌsben xucʼul bʌ cʼuxbiya. Yicʼot i yutslel i yicʼot i cʼuxbiya, Rut tsiʼ colta i suegra chaʼan miʼ chaʼ taj i tijicñʌyel i chaʼan miʼ qʼuel chaʼan Jehová mucʼʌch i cʼuxbin. ¿Chuqui miʼ pʌsbeñonla tsaʼ bʌ i mele Rut?

11. ¿Chucoch cabʌl hermanojob muʼ bʌ i coltañob jiñi chʼijyemoʼ bʌ?

¹¹ Jiñi xucʼul bʌ cʼuxbiya miʼ ñijcañonla chaʼan mi laj coltan jiñi chʼijyemoʼ bʌ. Cheʼ bajcheʼ Rut maʼañic tsiʼ cʌyʌ Noemí, ili ora an cabʌl hermanojob utsoʼ bʌ maʼañic bʌ miʼ cʌyob jiñi chʼijyemoʼ bʌ o cʼuñoʼ bʌ. Miʼ cʼuxbiñob i yermañujob i yomob i mel pejtelel chuqui i cʼʌjñibal chaʼan miʼ mejlel i coltañob (Pr. 12:25; 24:10). Cheʼ bajcheʼ jiñi, miʼ jacʼbeñob i ticʼojel jiñi apóstol Pablo: «Ñuqʼuesʌbenla i pusicʼal jiñi wen chʼijyemoʼ bʌ, coltanla jiñi cʼuñoʼ bʌ yicʼot yom mi laʼ pʌs laʼ pijt tiʼ tojlel pejtelel lac piʼʌlob» (1 Tes. 5:14).

12. ¿Baqui bʌ junchajp ñumen wem bʌ miʼ mejlel lac mel chaʼan mi laj coltan juntiquil hermano chʼijyem bʌ?

¹² Junchajp bajcheʼ ñumen wen mi laj coltan juntiquil hermano chʼijyem bʌ, jiñʌch cheʼ mi lac ñʌchʼtan yicʼot mi lac suben chaʼan mi laj cʼuxbin. Jehová miʼ qʼuel pejtelel chuqui mi lac mel chaʼan mi laj coltan juntiquil i tiñʌmeʼ (Sal. 41:1). Proverbios 19:17 miʼ yʌl: «Jini muʼ bʌ i yʌqʼuen pobre chuqui anto yom i chaʼan woliʼ yʌqʼuen lac Yum ti majan. Mi caj i chaʼ qʼuextʌbentel bajcheʼ cʼamel tsiʼ yʌqʼue».

13. ¿Chuqui tsiʼ mele Rut maʼañic bʌ tsiʼ mele Orpá, i bajcheʼ tsiʼ pʌsʌ xucʼul bʌ i cʼuxbiya? (Qʼuele jiñi dibujo am bʌ tiʼ tejchibal).

¹³ Chaʼan mi lac ñumen chʼʌmben i sujm chuquiyes jiñi xucʼul bʌ cʼuxbiya, laʼ laj qʼuel tsaʼ bʌ ujti tiʼ tojlel Noemí cheʼ bʌ tsaʼix chʌmi i ñoxiʼal yicʼot jiñi chaʼtiquil i yalobil. Cheʼ bʌ Noemí «tsiʼ yubi chaʼan añix i bʌl i ñʌcʼ i piʼʌlob chaʼan tsiʼ pʼuntayob lac Yum», tsaʼ chaʼ sujti majlel tiʼ lumal (Rt. 1:6). Jiñi chaʼtiquil i yʌʼlib tsaʼ majliyob yicʼot. Pero yaʼ ti bij, Noemí uxyajl tiʼ subeyob chaʼan miʼ chaʼ majlelob ti Moab. ¿Chuqui tsaʼ ujti? Jiñi relato miʼ yʌl: «Orfa (Orpá) tsiʼ tsʼujtsʼu i yʌʼlib (suegra) chaʼan wolix ti sujtel. Tsʌts tsiʼ tul meqʼue i yʌʼlib Rut, come mach yomic i cʌy» (Rt. 1:7-14). Orpá tsiʼ jacʼbe i tʼan Noemí i tsaʼ chaʼ majli ti Moab. Pero Rut ñumen ñuc chuqui tsiʼ mele. Cheʼ cheʼic yom, Rut tsaʼ majli jaʼel,  pero tsaʼ cʌyle yicʼot i suegra chaʼan miʼ coltan come miʼ cʼuxbin (Rt. 1:16, 17). Tsaʼ cʌyle yicʼot come yomʌch i mel, mach chaʼañic xicʼbil, chaʼañʌch an xucʼul bʌ i cʼuxbiya. ¿Chuqui miʼ pʌsbeñonla ili relato?

14. a) ¿Chuqui an i meleyob cabʌl hermanojob? b) Cheʼ bajcheʼ miʼ yʌl Hebreos 13:16, ¿chuqui muʼ bʌ i yʌqʼuen i tijicñʌyel Dios?

¹⁴ Cheʼ an xucʼul bʌ laj cʼuxbiya mi lac chaʼlen wersa laj coltan yambʌlob. Cheʼ bajcheʼ ti wajali, ili ora cabʌl Testigojob muʼ bʌ i pʌsbeñob xucʼul bʌ cʼuxbiya i yermañujob anquese mach i cʌñʌyobic. Jumpʼejl ejemplo, cheʼ bʌ miʼ yubiñob chaʼan tsaʼ ñumi tsʌts bʌ wocol, ti ora miʼ cʼajtiñob bajcheʼ miʼ mejlelob ti coltaya. O mi yujilob chaʼan an juntiquil hermano maʼañic bʌ i taqʼuin, miʼ qʼuelob chuqui i cʼʌjñibal i chaʼan i miʼ coltañob. Miʼ lajiñob jiñi xñoptʼañob ti Macedonia cheʼ ti ñaxam bʌ siglo, tsaʼ bʌ i yʌcʼʌyob «ñumento cheʼ bajcheʼ miʼ mejlelob» (2 Cor. 8:3). Cheʼ bajcheʼ jiñi xñoptʼañob ti ñaxam bʌ siglo, ili ora ñumento miʼ melob jaʼel cheʼ bajcheʼ pijtʌbilic. Cabʌl chuqui miʼ melob chaʼan miʼ coltañob jiñi hermanojob yomoʼ bʌ coltʌntel. Tiʼ sujm, Jehová tijicña miʼ yubin cheʼ miʼ qʼuel jiñi xucʼul bʌ i cʼuxbiya i wiñicob (pejcan Hebreos 13:16).

15, 16. ¿Bajcheʼ tsiʼ pʌsʌ Rut chaʼan maʼañic mi caj i lujbʼan?

¹⁵ Cabʌl chuqui miʼ mejlel laj cʌn ti tsaʼ bʌ ujti tiʼ tojlel Rut yicʼot Noemí. Laʼ laj qʼuel chaʼpʼej uxpʼejl.

¹⁶ Mach lujbʼaconla. Cheʼ bʌ Rut tsiʼ yʌlʌ chaʼan miʼ majlel yicʼot Noemí ti Judá, Noemí maʼañic tsiʼ jacʼʌ ti ñaxan. Pero Rut maʼañic tsaʼ lujbʼa i suben. ¿Chuqui tsaʼ ujti? «Cheʼ bʌ tsiʼ ñaʼta Noemí chaʼan ti jumpʼejl jach i pusicʼal yom i piʼlen majlel Rut, tsiʼ cʌyʌ i suben sujtel» (Rt. 1:15-18).

17. ¿Chuqui mi caj i coltañonla chaʼan mach ti orajic mi lac lujbʼan?

¹⁷ Muʼ bʌ laj cʌn: Yom la cujil pijt chaʼan miʼ mejlel laj coltan juntiquil chʼijyem bʌ, pero mach yomic mi lac lujbʼan. Jumpʼejl ejemplo, tajol juntiquil hermana i cʼʌjñibal bʌ i chaʼan coltʌntel mach ti orajic miʼ jacʼ jiñi coltaya. * Pero jiñi xucʼul bʌ cʼuxbiya mi caj i ñijcañonla chaʼan lʌcʼʌl mi la cajñel tiʼ tojlel (Gál. 6:2). I mi lac chʌn pijtan chaʼan ti wiʼil mi caj i jacʼ jiñi laj coltaya yicʼot chaʼan mi lac ñuqʼuesʌben i pusicʼal.

18. ¿Chuqui jiñi wen cʼux bʌ tsaʼ mejli i yubin Rut?

¹⁸ Mach michʼaconla. Cheʼ bʌ Noemí yicʼot Rut tsaʼ cʼotiyob ti Belén, Noemí tsiʼ taja i bʌ yicʼot jiñi i cʌñʌyoʼ bʌ i tiʼ subeyob: «Tsʼʌcʌlon lojon tsaʼ majliyon lojon quicʼot lojon c chubʌʼan. C bajñelix tsiʼ chaʼ pʌyʌyon sujtel lac Yum, jocholix j cʼʌb» (Rt. 1:21). ¿Muʼ ba lac ñaʼtan bajcheʼ yubil tsiʼ yubi Rut cheʼ bʌ tsiʼ yubi ili tʼan? Cabʌl chuqui tsiʼ mele chaʼan miʼ coltan Noemí: Tsiʼ chaʼle uqʼuel yicʼot tsiʼ ñuqʼuesʌbe i pusicʼal, i cabʌl qʼuin tsiʼ chaʼle xʌmbal yicʼot. Pero Noemí, tsiʼ yʌlʌ: «C bajñelix tsiʼ chaʼ pʌyʌyon sujtel lac Yum, jocholix j cʼʌb». Anquese Rut yaʼan yicʼot, Noemí maʼañic tsiʼ qʼuele ti ñuc yilal jiñi i coltaya. Tajol jiñi wen cʼuxʌch tsiʼ yubi Rut. Pero tsaʼ chʌn ajñi yicʼot Noemí.

19. ¿Chuqui mi caj i coltañonla chaʼan lʌcʼʌl mi la cajñel tiʼ tojlel juntiquil chʼijyem bʌ?

¹⁹ Muʼ bʌ laj cʌn: Tajol juntiquil hermana chʼijyem bʌ ti ñaxan miʼ subeñonla tʼan tac  muʼ bʌ i lowonla anquese mi lac chaʼlen wersa laj coltan. Pero mi lac chaʼlen wersa chaʼan maʼañic mi lac michʼan. Lʌcʼʌl mi la cajñel la quicʼot i mi laj cʼajtiben i coltaya Jehová chaʼan miʼ mejlel lac ñuqʼuesʌben i pusicʼal (Pr. 17:17).

20. ¿Chuqui tiʼ pʼʌtʼesa Rut chaʼan miʼ bej chaʼlen wersa?

²⁰ Laʼ lac ñuqʼuesʌben i pusicʼal jiñi i cʼʌjñibal bʌ i chaʼan. Rut tsiʼ pʌsbe xucʼul bʌ i cʼuxbiya Noemí, pero yomix miʼ ñuqʼuesʌbentel i pusicʼal jaʼel. Jin chaʼan, Jehová tsiʼ ñijca Boaz chaʼan miʼ suben ili tʼan tac: «Laʼ i yʌqʼueñet lac Yum a chobejtʌbal chaʼan jini tsaʼ bʌ a mele. Tsʼʌcʌl yom maʼ wʌqʼuentel ti lac Yum, come tsaʼ wʌcʼʌ a bʌ tiʼ wenta i Dios Israel chaʼan maʼ taj a coltʌntel ti yebal i wichʼ». Ili utsʼatax bʌ tʼan tac tsiʼ ñijcʌbe i pusicʼal Rut. Tsiʼ yʌlʌ: «Cabʌl tsaʼ pʌsbeyon i yutslel a pusicʼal, c yum. Tsaʼ wen ñuqʼuesʌbeyon c pusicʼal. Wen uts tsaʼ pejcayon» (Rt. 2:12, 13). Jiñi tsaʼ bʌ i yʌlʌ Boaz, tsiʼ pʼʌtʼesa Rut chaʼan miʼ bej chaʼlen wersa.

21. Cheʼ bajcheʼ miʼ yʌl Isaías 32:1, 2, ¿chuqui mi caj i melob jiñi ancianojob chaʼañob i cʼuxbiya?

²¹ Muʼ bʌ laj cʌn: An i tajol yom miʼ ñuqʼuesʌbentelob i pusicʼal jaʼel jiñi muʼ bʌ i pʌsob xucʼul bʌ i cʼuxbiya. Boaz tiʼ sube Rut chaʼan weñʌch cheʼ tsiʼ pʌsbe i yutslel Noemí. Ili ora jaʼel, jiñi ancianojob miʼ subeñob jiñi hermanojob ti congregación chaʼan tijicñayob cheʼ miʼ pʌsbeñob i cʼuxbiya yicʼot miʼ coltañob yañoʼ bʌ. Cheʼ bajcheʼ iliyi, miʼ pʼʌtʼesañob chaʼan miʼ bej chaʼleñob wersa (pejcan Isaías 32:1, 2).

22, 23. ¿Chuqui tsaʼ qʼuextʌyi tiʼ tojlel Noemí, i chuqui tsiʼ colta? (Salmo 136:23, 26).

²² Ti wiʼil, Boaz tsiʼ chʼʌmʌ tiʼ wenta chaʼan Rut yicʼot Noemí miʼ tajob i bʌl i ñʌcʼ (Rt.  2:14-18). ¿Chuqui tsiʼ yʌlʌ Noemí cheʼ bʌ tsiʼ qʼuelbe i yutslel Boaz? Tsiʼ yʌlʌ: «Laʼ i yʌqʼuen i yutslel i pusicʼal lac Yum, come uts i pusicʼal Booz (Boaz). Lajal miʼ pʌsbeñob i yutslel i pusicʼal jini cuxuloʼ bʌ cheʼ bajcheʼ tsiʼ pʌsbeyob lac piʼʌlob tsaʼ bʌ chʌmiyob» (Rt. 2:20a). ¡Noemí tsaʼix i wen qʼuexta i bʌ! Ti ñaxan tsiʼ yʌlʌ: «Lac Yum tsiʼ chilbeyon tijicña bʌ». Pero ili ora wen tijicña tsiʼ yʌlʌ: «Miʼ pʌsben i yutslel i pusicʼal jiñi cuxuloʼ bʌ». ¿Chuqui tsiʼ colta chaʼan miʼ qʼuextan i bʌ?

²³ Noemí tsaʼix caji i qʼuelben i coltaya Jehová tiʼ cuxtʌlel. Tiʼ tojlel Rut, Jehová tsiʼ colta chaʼan miʼ mejlel ti chaʼ sujtel ti Judá (Rt. 1:16). Noemí tsiʼ chʼʌmbe i sujm jaʼel chaʼan Jehová tsiʼ cʼʌñʌ Boaz chaʼan miʼ coltañob tiʼ chaʼticlel (Rt. 2:19, 20b). Tajol tsiʼ ñaʼta: «Muqʼuix c ñaʼtan, Jehová maʼañic tsiʼ wis cʌyʌyon. Tsaʼʌch i coltayon tiʼ pejtelel ora» (pejcan Salmo 136:23, 26). Miʼ mejlel la cʌl chaʼan tsaʼʌch i yʌqʼue wocolix i yʌlʌ Rut yicʼot Boaz cheʼ maʼañic tsaʼ lujbʼayob i tsiʼ chʌn coltayob. Wen tijicña tsiʼ yubiyob tiʼ yuxticlelob cheʼ Noemí tsiʼ chaʼ taja i tijicñʌyel yicʼot i pʼʌtʌlel.

24. ¿Chucoch la com lac bej pʌsbeñob xucʼul bʌ cʼuxbiya jiñi la quermañujob?

²⁴ ¿Chuqui tsaʼ laj cʌñʌ chaʼan xucʼul bʌ cʼuxbiya ti jiñi libro chaʼan Rut? Jiñi xucʼul bʌ cʼuxbiya miʼ ñijcañonla chaʼan mi lac bej coltañob jiñi hermanojob chʼijyemoʼ bʌ, i chaʼan maʼañic mi lac lujbʼan ti ora. Miʼ coltañonla jaʼel chaʼan mi lac chaʼlen wersa lac bej coltañob. Jiñi ancianojob yom miʼ coltañob jaʼel jiñi muʼ bʌ i pʌsbeñob xucʼul bʌ cʼuxbiya yañoʼ bʌ. Wen tijicña mi la cubin cheʼ mi laj qʼuel chaʼan jiñi la quermañujob miʼ chaʼ tajob i pʼʌtʌlel tiʼ melbentel i yeʼtel Jehová (Hech. 20:35). Pero mach ñajayic lac chaʼan chaʼan jiñi ñumen ñuc bʌ i cʼʌjñibal woli bʌ i ñijcañonla chaʼan mi lac pʌs xucʼul bʌ cʼuxbiya jiñʌch cheʼ la com lac lajin yicʼot la cʌqʼuen i tijicñʌyel Jehová, jiñi Dios cabʌl bʌ i pʼuntaya (Éx. 34:6; Sal. 33:22).