1, 2. a) ¿Chucoch yom miʼ ñopob ti Jehová jiñi tsijib xñujpuñelob? (Salmo 37:3, 4). b) ¿Chuqui mi caj laj qʼuel ti ili estudio?

¿TSAʼ jaxto ba ñujpuñiyet o muqʼuix caj a ñujpuñel? Mi cheʼʌchi, mi la cʌl chaʼan wen tijicña a wom chumtʌl a wicʼot jiñi muʼ bʌ a wen cʼuxbin. I sujmʌch, mi caj a taj wocol tac ti a ñujpuñel i cabʌl chuqui ñuc tac bʌ yom maʼ ñaʼtan. Jiñi muʼ bʌ laʼ mel (chaʼlen) miʼ mejlel i yʌqʼueñetla laʼ tijicñʌyel o maʼañic. Mi mucʼʌch laʼ ñop ti Jehová, mi caj laʼ yajcan chuqui wen, mi caj i pʼʌtʼan jiñi laʼ ñujpuñel i ñumen tijicña mi caj laʼ wajñel. Pero mi maʼañic mi laʼ jacʼben i ticʼojel tac Jehová, tajol mi caj laʼ taj wocol tac muʼ bʌ caj i ticʼlan jiñi laʼ ñujpuñel i mach tijicñayic mi caj laʼ wajñel (pejcan Salmo 37:3, 4).

² Anquese ti ili estudio jin woli (choncol) i tajtʌl ti tʼan tsijib xñujpuñelob, jiñi muʼ bʌ caj laj qʼuel miʼ mejlel i ñusan pejtelel xñujpuñelob. Mi caj laj cʌn jaʼel tiʼ tojlel xucʼul bʌ wiñicob xʼixicob muʼ bʌ i yʌjlelob ti Biblia yicʼot chuqui mi laj cʌn tiʼ tojlelob chaʼan jiñi laj cuxtʌlel yicʼot jiñi ñujpuñel. Mi caj laj qʼuel jaʼel chuqui miʼ mejlel laj cʌn tiʼ tojlel jiñi xñujpuñelob ti ili ora.

3, 4. ¿Chuqui ti wocol tac miʼ mejlel i tajob jiñi tsijib xñujpuñelob?

³ An tejclum tac baqui jiñi lac piʼʌlob miʼ tech i subeñob jiñi tsijib xñujpuñelob chaʼan cheʼ yom miʼ chumtʌlob «bajcheʼ miʼ melob yambʌlob». Jumpʼejl ejemplo, tajol jiñi tatʌlob o jiñi yambʌ i familiajob miʼ subeñob chaʼan ti ora yom miʼ yʌcʼob ti tilel i yalobil. O tajol an i yamigojob o i familiajob muʼ bʌ i subeñob chaʼan miʼ mʌñob i yotot yicʼot  chuqui tac yomob chaʼan wen miʼ chumtʌlob.

⁴ Mi jiñi xñujpuñel maʼañic miʼ cʌntañob i bʌ, tajol mi caj i wen otsañob i bʌ ti bet. I chaʼan miʼ tojob mi caj i ñumen chaʼleñob eʼtel (troñel). I tiʼ caj jiñi maʼañix mi caj i wen tajbeñob i yorajlel jiñi estudio, jiñi chʼujutesaya ti familia yicʼot jiñi subtʼan. Tajol muʼto i cʌyob i bʌ ti tempa bʌ tac chaʼan miʼ ñumen chaʼleñob eʼtel i miʼ ñumen tajob taqʼuin o chaʼan maʼañic miʼ chilbentelob i yeʼtel. Tiʼ caj jiñi maʼañix mi caj i wen mejlel i melbeñob i yeʼtel Jehová.

5. ¿Chuqui maʼ cʌn tiʼ tojlel Klaus yicʼot Marisa?

⁵ An cabʌl ejemplo muʼ bʌ i pʌs chaʼan i sʌclʌntel jiñi chubʌʼañʌl tac maʼañic miʼ yʌcʼ tijicñʌyel. Cheʼ tsiʼ qʼueleyob Klaus yicʼot Marisa. * Cheʼ bʌ tsaʼ ñujpuñiyob, tiʼ chaʼticlelob tsiʼ chaʼleyob eʼtel chaʼan wen miʼ chumtʌlob. Pero tiʼ sujm mach tijicñayobic. Klaus miʼ yʌl: «Wen cabʌl chuqui an lon c chaʼan, pero tiʼ chaʼan bʌ Jehová maʼañic lon c chaʼan mi jumpʼejlic meta. Tiʼ sujm, mach tijicñayoñic lojon i wen lujbon lon». Tajol an a qʼuele jaʼel chaʼan jiñi i sʌclʌntel chubʌʼan tac maʼañic miʼ yʌc tijicñʌyel. Pero mach a wubin a chʼijyemlel. Jiñi wem bʌ i yejemplo yambʌlob miʼ mejlel i coltañet. Laʼ lac ñaxan qʼuel chuqui miʼ mejlel i cʌñob tiʼ tojlel Jehosafat jiñi wiñicob ñujpuñemoʼ bʌ.

6. Cheʼ bajcheʼ miʼ yʌl Proverbios 3:5, 6, ¿chuqui tsiʼ mele jiñi rey Jehosafat cheʼ bʌ tsiʼ ñusa wocol?

⁶ Ñoxiʼaletʌlbʌla, ¿lujbetbala mi laʼ wubin tiʼ caj cabʌl chuqui yom mi laʼ mel? Mi cheʼʌchi, jiñi i yejemplo Jehosafat miʼ mejlel i coltañetla. An tiʼ wenta miʼ qʼuel jiñi tejclum come jiñʌch jiñi rey. Chaʼan miʼ mejlel i mel ili ñuc bʌ eʼtel, tsiʼ chaʼle wersa chaʼan miʼ cʌntan jiñi tejclum. Tsiʼ mele (pʌtʌ) muro tac yaʼ ti tejclum Judá i tsiʼ tempa ñumen ti 1 millón 160 mil soldadojob (2 Cr. 17:12-19). Ti wiʼil, jiñi rey, i familia yicʼot jiñi tejclum tsiʼ ñusayob wocol cheʼ bʌ yonlel i wiñicob Ammón, Moab yicʼot jiñi tejclum tac chaʼan Seír tsaʼ cʼoti i contrajiñob (2 Cr. 20:1, 2). ¿Chuqui tsiʼ mele Jehosafat? Tsiʼ cʼajti i coltaya yicʼot i pʼʌtʌlel ti Jehová, cheʼ bajcheʼ miʼ yʌl Proverbios 3:5, 6 (pejcan). Jiñi i yoración, muʼ bʌ lac taj ti 2 Crónicas 20:5-12, miʼ pʌs bajcheʼ cʼamel miʼ ñop ti jiñi i Tat am bʌ ti panchan. ¿Bajcheʼ tsiʼ jacʼbe Jehová?

7. ¿Bajcheʼ tsiʼ jacʼbe Jehová jiñi i yoración Jehosafat?

⁷ Jehová tsiʼ jacʼbe Jehosafat tiʼ tojlel juntiquil levita i cʼabaʼ Jahaziel. Tsiʼ yʌlʌ: «Cheʼ jach waʼaletla yom. Ajñenla ti ñʌchʼʌl. Pijtan laʼ coltʌntel» (2 Cr. 20:13-17). ¡Mach ñʌmʌlic ti mejlel iliyi! Pero ili tʼan tac mach tilemic ti juntiquil wiñic, tilem ti Jehová. Jehosafat tsiʼ jacʼʌ come miʼ ñop tiʼ  Dios. Cheʼ bʌ jiñi rey yicʼot jiñi tejclum tsaʼ majliyob ti guerra, mach jiñic tsiʼ yʌcʼʌ ti ñaxan jiñi i soldadojob, jiñʌch i wiñicob woliyoʼ (yʌqueloʼ) bʌ ti cʼay. Jehosafat tsiʼ mʌlbe (jotbe) jiñi i contrajob cheʼ bajcheʼ tsiʼ yʌlʌ Jehová (2 Cr. 20:18-23).

8. ¿Chuqui miʼ mejlel i cʌñob tiʼ tojlel Jehosafat jiñi wiñicob ñujpuñemoʼ bʌ?

⁸ Ñoxiʼaletʌlbʌla, ¿chuqui miʼ mejlel laʼ cʌn tiʼ tojlel Jehosafat? Mi laʼ chaʼlen wersa chaʼan mi laʼ coltan yicʼot chaʼan mi laʼ cʌntan laʼ familia come jatetla an ti laʼ wenta chaʼan wen miʼ yajñel. . Jin chaʼan, cheʼ bʌ an wocol tac, tajol mi laʼ ñaʼtan chaʼan miʼ mejlel laʼ bajñel tojʼesan. Pero mach laʼ mel jiñi, bajñel pejcanla Jehová ti oración i cʼajtibenla i coltaya. Cheʼ jaʼel, chaʼlenla oración laʼ wicʼot laʼ wijñam, sʌclanla chuqui miʼ yʌl Jehová tiʼ Tʼan yicʼot ti jiñi jun tac muʼ bʌ i yʌcʼ jiñi i yorganización, i jacʼʌla jiñi ticʼojel tac muʼ bʌ laʼ taj. Tajol an maʼañic bʌ miʼ mulañob cheʼ mi laʼ chʼʌm ti ñuc muʼ bʌ i yʌl jiñi Biblia cheʼ bʌ an chuqui mi laʼ mel i tajol muʼto i yʌlob chaʼan maʼañic laʼ ñaʼtʌbal. Tajol miʼ yʌlob chaʼan jiñi ñumen wem bʌ chaʼan a familia, jiñʌch jiñi taqʼuin yicʼot chuqui tac an. Pero cʼajtesan i yejemplo Jehosafat, tsaʼ bʌ i ñopo ti Jehová i tsiʼ pʌsʌ tiʼ melbal (chaʼlibal). Jehová maʼañic tsiʼ cʌyʌ ili xucʼul bʌ wiñic i maʼañic mi caj i cʌyetla jaʼel (Sal. 37:28; Heb. 13:5). ¿I chuqui miʼ mejlel i melob jiñi xñujpuñelob chaʼan tijicñayob?

9. ¿Chuqui miʼ mejlel la cʌl chaʼan jiñi xʼaltʼan Isaías yicʼot i yijñam?

⁹ Isaías yicʼot i yijñam tsiʼ yʌcʼʌyob i bʌ tiʼ melol i yeʼtel Jehová. Isaías juntiquilʌch xʼaltʼan i tajol jiñi i yijñam jiñʌch i yeʼtel jaʼel, come jiñi Biblia miʼ yʌl chaʼan jiñʌch «xʼaltʼan» jaʼel (Is. 8:1-4). Jiñi ñumen ñuc bʌ tsiʼ qʼueleyob jiñʌch cheʼ miʼ chʼujutesañob Jehová. Tiʼ sujm, Isaías yicʼot i yijñam jumpʼejlobʌch wem bʌ ejemplo chaʼan jiñi xñujpuñelob ili ora.

10. ¿Chucoch weñʌch cheʼ jiñi xñujpuñelob miʼ tsajiñob jiñi profecía tac chaʼan miʼ ñumen mulañob i melbeñob i yeʼtel Jehová?

¹⁰ ¿Bajcheʼ miʼ mejlel i lajiñob Isaías yicʼot i yijñam jiñi xñujpuñelob? Jiñʌch cheʼ miʼ chaʼleñob wersa tiʼ yeʼtel Jehová. Chaʼan miʼ pʼʌtʼesañob i ñopoñel ti Dios, miʼ mejlel i comol pejcañob jiñi profecía tac yicʼot miʼ qʼuelob chaʼan mucʼʌch i tsʼʌctiyel tiʼ pejtelel ora (Tito 1:2). * Miʼ mejlel i ñaʼtañob bajcheʼ miʼ mejlelob ti coltaya chaʼan miʼ tsʼʌctiyel jiñi profecía tac, cheʼ bajcheʼ jiñi tsaʼ bʌ i yʌlʌ Jesús chaʼan yom miʼ sujbel jiñi wen tʼan tac tiʼ petol Pañimil cheʼ bʌ muʼto caj i tilel jiñi i jilibal (Mat. 24:14). Cheʼ bʌ jumpʼejl xñujpuñel miʼ ñumen ñop chaʼan wolʌch i tsʼʌctiyel jiñi profecía tac, mi caj i ñumen mulañob i melbeñob i yeʼtel Jehová.

11. ¿Chuqui tsaʼ mejli i mel Áquila yicʼot Priscila, i chucoch?

¹¹ Jiñi chʼejlobto bʌ xñujpuñel miʼ mejlel i tajob i wenlel tiʼ yejemplo Priscila yicʼot Áquila, jumpʼej xñujpuñel chumul bʌ ti Roma. Tsiʼ yubiyob jiñi wen tʼan i tsaʼ sujtiyob ti xñoptʼan. Miʼ mejlel la cʌl chaʼan wen tijicñayob bajcheʼ chumulob. Pero cheʼ jiñi an chuqui ora bʌ tsaʼ qʼuextʌyi, jiñi emperador  Claudio tsiʼ yʌlʌ chaʼan jiñi judíojob miʼ loqʼuelob ti Roma. Laʼcu lac ñaʼtan bajcheʼ yubil tsiʼ yubiyob i bʌ Áquila yicʼot Priscila. Tsiʼ cʌyʌyob jiñi tejclum wen i cʌñʌyoʼ bʌ, tsiʼ chaʼ sʌclayob baqui miʼ chumtʌlob i tiʼ sʌclayob yambʌ tejclum baqui miʼ melob pisil bʌ otot. Pero ¿wiʼilix ba tsiʼ cʌyʌyob i chaʼan bʌ i Yumʌntel Dios cheʼ bʌ tsiʼ meleyob iliyi? La cujilix i jacʼbal. Cheʼ bʌ yaʼix añob ti Corinto, tsaʼ caji i coltañob jiñi congregación i tsiʼ tem chaʼleyob eʼtel yicʼot jiñi apóstol Pablo chaʼan miʼ pʼʌtʼesañob jiñi hermanojob. Ti wiʼil, tsaʼ majliyob ti yambʌ tejclum tac baqui ñumen yomto coltʌntel ti subtʼan (Hech. 18:18-21; Rom. 16:3-5). ¡Wen cabʌlob i yeʼtel i wen tijicñayob!

12. ¿Chucoch yom miʼ yʌqʼueñob i bʌ meta tac jiñi xñujpuñelob?

¹² Jiñi xñujpuñelob ili ora miʼ mejlel i lajiñob Priscila yicʼot Áquila cheʼ miʼ yʌcʼob ti ñaxan jiñi i Yumʌntel Dios. Ñumen wen cheʼ miʼ yʌlob iliyi cheʼ bʌ i noviojobto i bʌ. Cheʼ bʌ jiñi xñujpuñelob yujilob bajcheʼ yom i melbeñob i yeʼtel Jehová i miʼ chaʼleñob wersa i tajob, miʼ mejlel i ñumen qʼuelob i coltaya jiñi chʼujul bʌ espíritu (Ec. 4:9, 12). Laʼ laj cʌn tiʼ tojlel Russell yicʼot Elizabeth. Russell miʼ yʌl: «Cheʼ bʌ noviojonto lojon tsaʼ lon c jamʌ alʌ jiñi lon c meta tac». Elizabeth miʼ yʌl: «Tsaʼ lon cʌlʌ jiñi, chaʼan cheʼ baʼ ora an chuqui mi lon c mel, maʼañic miʼ mʌctañon lojon chaʼan mic taj lon c meta tac». Russell yicʼot Elizabeth tsaʼ mejliyob ti majlel ti Micronesia chaʼan miʼ chaʼleñob coltaya baqui ñumen yomto subtʼan.

13. Cheʼ bajcheʼ miʼ yʌl Salmo 28:7, ¿chuqui mi caj i yujtel mi mucʼʌch lac ñop ti Jehová?

¹³ Cheʼ bajcheʼ Russell yicʼot Elizabeth, cabʌl xñujpuñelob mach cabʌlic chuqui añob i chaʼan chaʼan miʼ ñumen aqʼueñob i yorajlel jiñi subtʼan yicʼot cʌntesa. Mi jumpʼejl xñujpuñel miʼ yʌqʼuen i bʌ meta tac chaʼan miʼ melben i yeʼtel Jehová tiʼ pejtelelob i pusicʼal i miʼ chaʼleñob wersa chaʼan miʼ tsʼʌctesañob, mi caj i tajob cabʌl  bendición. Mi caj i qʼuelob bajcheʼ Jehová miʼ cʌntañob, mi caj i ñumen ñopob tiʼ tojlel i mi caj i tajob i sujm bʌ tijicñʌyel (pejcan Salmo 28:7).

14. ¿Bajcheʼ tsiʼ pʌsʌ jiñi apóstol Pedro yicʼot i yijñam chaʼan mucʼʌch i ñopob muʼ bʌ i yʌl Mateo 6:25, 31-34?

¹⁴ Yambʌ wem bʌ ejemplo chaʼan jiñi xñujpuñelob jiñʌch jiñi apóstol Pedro yicʼot i yijñam. Cheʼ bʌ añix 6 uw o jumpʼejl jab i cʌñʌ Jesús, jiñi apóstol an chuqui wen ñuc bʌ i cʼʌjñibal tsiʼ mele. Jesús tiʼ sube chaʼan miʼ tsajcan, Pedro tsaʼʌch i ñaxan wen qʼuele bajcheʼ an i familia come jiñi i yeʼtel jiñʌch chuc chʌy (Luc. 5:1-11). Tsaʼʌch majli ti subtʼan yicʼot Jesús. ¡Jumpʼejlʌch wem bʌ desición! I miʼ mejlel la cʌl chaʼan jiñi i yijñam tsaʼʌch i colta jaʼel. Jiñi Biblia miʼ yʌl chaʼan cheʼ bʌ tsaʼix chaʼ chʼojyi Jesús, Pedro tsaʼ majli yicʼot i yijñam ti subtʼan (1 Cor. 9:5). Tiʼ sujm, jiñi wem bʌ i yejemplo i yijñam tsiʼ colta chaʼan miʼ mejlel i yʌqʼuen ticʼojel jiñi ñujpuñemoʼ bʌ (1 Ped. 3:1-7). Tsiquil chaʼan Pedro yicʼot i yijñam tsaʼʌch i ñopoyob chaʼan Jehová mi caj i yʌqʼueñob chuqui i cʼʌjñibal i chaʼañob mi mucʼʌch i yʌcʼob ti ñaxan jiñi i Yumʌntel (pejcan Mateo 6:25, 31-34).

15. ¿Chuqui maʼ cʌn tiʼ tojlel Tiago yicʼot Esther?

¹⁵ Pero mi añix chaʼpʼej uxpʼejl jab a ñujpuñel, ¿chuqui miʼ mejlel laʼ mel chaʼan mi laʼ ñumen mulan laʼ melben i yeʼtel Jehová? Junchajp jiñʌch cheʼ mi laʼ qʼuel chuqui an i meleyob yambʌ xñujpuñelob. Jumpʼejl ejemplo, miʼ mejlel laʼ pejcan jiñi temaj «Ti jumpʼejlob i pusicʼal tsaʼ majliyob». Jiñʌch tsaʼ bʌ i meleyob Tiago yicʼot Esther, jumpʼejl xñujpuñel chʼoyol bʌ ti Brasil. Ili temaj tac tsiʼ coltayob chaʼan miʼ ñumen melbeñob i yeʼtel Jehová. Tiago miʼ yʌl: «Cheʼ tsaʼ c pejca bajcheʼqui Jehová an i colta i wiñicob ti ili ora, tsiʼ yʌcʼʌ chaʼan mic mulan lon j qʼuel bajcheʼ miʼ coltañon lon i miʼ cʌntañon lojon». Ti wiʼil, ili xñujpuñel tsaʼ majli ti Paraguay, baqui woliyob ti coltaya ti jiñi tʼan portugués cʼʌlʌl 2014. Esther miʼ yʌl: «Jumpʼejl texto muʼ bʌ lon c wen mulan jiñʌch Efesios 3:20. Ili tʼan tac an lon j qʼuele ti tsʼʌctiyel cheʼ mic melben lojon i yeʼtel Jehová». Ti jiñi carta tsaʼ bʌ i choco majlel Pablo tiʼ tojlel jiñi xñoptʼañob ti Éfeso, tsiʼ yʌlʌ chaʼan Jehová ñumento mi caj i yʌqʼueñonla cheʼ bajcheʼ mi laj cʼajtiben. I an laj qʼuele ti tsʼʌctiyel ili tʼan tiʼ pejtelel ora.

16. ¿Majqui miʼ mejlel i cʼajtibeñob ticʼojel tac jiñi xñujpuñelob maxto bʌ ñoxobic woli bʌ i ñaʼtañob i meta tac?

¹⁶ Xñujpuñelob maxto bʌ ñoxeticla, jatetla jaʼel miʼ mejlel laʼ taj laʼ wenlel tiʼ tojlel jiñi am bʌ i ñopoyob ti Jehová. An xñujpuñelob cabʌlix bʌ jab i cajelob i melben i yeʼtel Jehová. ¿Ixcu cheʼ mi laʼ cʼajtiben ticʼojel tac mi laʼ wom coltʌntel chaʼan mi laʼ ñaʼtan jiñi laʼ meta tac? Jiñʌch junchajp bajcheʼ mi laʼ pʌs chaʼan mi laʼ ñop ti Jehová (Pr. 22:17, 19). Jiñi ancianojob miʼ mejlel i coltañetla jaʼel chaʼan mi laʼ wʌqʼuen laʼ bʌ meta tac i mi laʼ taj.

17. ¿Chuqui tsaʼ ujti tiʼ tojlel Klaus yicʼot Marisa, i chuqui mi laj cʌn?

¹⁷ An i tajol jiñi muʼ bʌ lac ñaʼtan lac mel tiʼ yeʼtel Jehová mach cheʼic miʼ loqʼuel bajcheʼ ñaʼtʌbil lac chaʼan. Laʼ lac chaʼ taj ti tʼan Klaus yicʼot Marisa, tsaʼ bʌ lac tajayob ti  tʼan ti ñaxan. Cheʼ bʌ añix uxpʼejl jab i ñujpuñelob, tsiʼ cʌyʌyob i yotot i tsaʼ majliyob ti coltaya ti construcción ti jiñi sucursal am bʌ ti Finlandia. Pero tsaʼ subentiyob chaʼan maʼañic miʼ mejlelob ti cʌytʌl ñumen ti 6 uw. Ti ñaxan, wen chʼijyem tsiʼ yubiyob i bʌ. Pero ti wiʼil tsaʼ pʌjyiyob ti jumpʼejl curso ti jiñi tʼan árabe, i wʌle wen tijicñayob woliyob ti coltaya ti jiñi tʼan árabe ti yambʌ país. Cheʼ bʌ Marisa miʼ ñaʼtan tsaʼ bʌ ujti, miʼ yʌl: «Maʼ bʌcʼñan a mel jiñi mach bʌ ñʌmʌlic a mel yicʼot cheʼ yaʼ jach maʼ chuc a bʌ ti Jehová. Pero an j qʼuele chaʼan Jehová miʼ wen coltañonla, i mach pijtʌbilic lac chaʼan bajcheʼ miʼ mel. Wʌle, tsaʼix ñumen pʼʌtʼa c ñopoñel ti Jehová». Cheʼ bajcheʼ mi laj qʼuel, miʼ mejlel lac ñop chaʼan Jehová mi caj i yʌqʼueñonla i bendición cheʼ mi lac ñop tiʼ tojlel tiʼ pejtelel lac pusicʼal.

18. ¿Chuqui miʼ mejlel i melob jiñi xñujpuñelob chaʼan miʼ bej ñopob ti Jehová?

¹⁸ Jiñi ñujpuñel jumpʼejlʌch majtañʌl tilem bʌ ti Jehová, i Jehová yom chaʼan jiñi ñujpuñemoʼ bʌ miʼ ñusañob i bʌ (Pr. 5:18; Mat. 19:5, 6). Xñujpuñelob maxto bʌ ñoxeticla, ¿chucoch maʼañic mi laʼ qʼuel chuqui woli laʼ mel ti laʼ cuxtʌlel? ¿Woli ba laʼ chaʼlen wersa laʼ pʌsben Jehová chaʼan mi laʼ qʼuel ti ñuc jiñi majtañʌl tac am bʌ i yʌqʼuetla? Pejcanla Jehová, sʌclanla principio tac yaʼ tiʼ Tʼan muʼ bʌ i coltañetla i jacʼʌla jiñi ticʼojel tac muʼ bʌ i yʌqʼueñetla. Miʼ mejlel laʼ ñop chaʼan, mi mucʼʌch laʼ wʌcʼ laʼ bʌ tiʼ melol i yeʼtel Jehová, tijicña mi caj laʼ wajñel ti laʼ ñujpuñel.