1. ¿Baqui bʌ cʼajtiya tajol mi lac melben lac bʌ?

¿MUʼ ba a tsʼitaʼ chaʼlen bʌqʼuen cheʼ maʼ ñaʼtan jiñi muʼ tac bʌ caj i yujtel, bajcheʼ i jisʌntel jiñi mach bʌ i sujmic ñopbalʌl, cheʼ miʼ contrajiñonla Gog yicʼot cheʼ miʼ tilel Armagedón? ¿Muʼ ba a bixel cʼajtiben a bʌ mi xucʼulʌch mi caj a wajñel cheʼ bʌ miʼ yujtel pejtelel iliyi? Mi cheʼi, mi caj i wen coltañet cheʼ mi lac wen qʼuel tsaʼ bʌ i yʌlʌ Jesús ti jiñi texto baqui chucul ili estudio. Jesús tiʼ sube jiñi xcʌntʼañob i chaʼan: «Mach laʼ cʼojoʼtan laʼ bʌ. Pʌsʌ laʼ ñopoñel» (Juan 14:1). Mi pʼʌtʌlʌch lac ñopoñel, mi caj i mejlel lac lʌtʼ chuqui jach miʼ tilel.

2. ¿Bajcheʼ miʼ mejlel lac pʼʌtʼesan lac ñopoñel, i chuqui mi caj laj qʼuel ti ili estudio?

² Junchajp bajcheʼ mi lac pʼʌtʼesan lac ñopoñel chaʼan mi lac lʌtʼ jiñi wocol tac muʼ bʌ caj i tilel, jiñʌch cheʼ mi laj qʼuel bajcheʼ mi lac ñusan jiñi wocol tac am bʌ lac chaʼan ili ora. Cheʼ bajcheʼ jiñi mi caj laj qʼuel bajcheʼ miʼ mejlel lac ñumen pʼʌtʼesan lac ñopoñel. Jajayajl mi lac lʌtʼ jumpʼejl wocol miʼ ñumen pʼʌtʼan lac ñopoñel, i jiñi mi caj i coltañonla lac lʌtʼ ti talto bʌ qʼuin. Ti ili estudio mi caj laj qʼuel chʌnchajp tsaʼ bʌ i pʌsʌ chaʼan jiñi xcʌntʼañob i chaʼan Jesús anto yom i ñopoñelob. Mi caj laj qʼuel jaʼel bajcheʼ miʼ mejlel lac lʌtʼ wocol tac lʌcʼʌ lajal bʌ ili ora, i bajcheʼ miʼ chajpañonla chaʼan ti talto bʌ qʼuin.

3. Cheʼ bajcheʼ miʼ yʌl Mateo 6:30, 33, ¿chuqui tsiʼ yʌlʌ Jesús chaʼan jiñi ñopoñel?

³ I tilelʌch cheʼ jiñi i jol familia yom i yʌqʼuen i bʌl i ñʌcʼ, i pislel yicʼot i yotot jiñi i yijñam yicʼot i yalobilob. Pero wocolʌch  ti ili ora. An hermanojob tsaʼ bʌ i sʌtʌyob i yeʼtel (troñel) i maʼañic miʼ tajob yambʌ anquese miʼ sʌclañob. Yañoʼ bʌ maʼañic miʼ jacʼob eʼtel tac mach bʌ weñic chaʼan juntiquil xñoptʼan. Tiʼ pejtelel iliyi, yom pʼʌtʌl lac ñopoñel ti Jehová chaʼan mi caj i yʌqʼueñonla jiñi i cʼʌjñibal bʌ lac chaʼan. Cheʼʌch tiʼ sube Jesús jiñi xcʌntʼañob i chaʼan (pejcan Mateo 6:30, 33). Mi mucʼʌch lac ñop chaʼan Jehová maʼañic mi caj i cʌyonla, mi caj i mejlel la cʌcʼ lac ñaʼtʌbal ti jiñi ñumen ñuc bʌ i cʼʌjñibal: Jiñi i Yumʌntel. I cheʼ mi laj qʼuel chaʼan Jehová miʼ yʌqʼueñonla i cʼʌjñibal bʌ lac chaʼan, ñumen lʌcʼʌl mi caj la cubin lac bʌ tiʼ tojlel i mi caj i ñumen pʼʌtʼan lac ñopoñel.

4, 5. ¿Chuqui an i colta jumpʼejl familia chaʼan maʼañic miʼ cʌlʌx cʼojoʼtan bajcheʼ mi caj i tajob i cʼʌjñibal bʌ i chaʼan?

⁴ Laʼ laj cʌn tiʼ tojlel jiñi familia Castro chʼoyoloʼ bʌ ti Venezuela. An i qʼueleyob bajcheʼ an i coltayob Jehová cheʼ miʼ wen ñaʼtañob bajcheʼ mi caj i tajob i cʼʌjñibal bʌ i chaʼañob. Ti ñaxan, miʼ chaʼleñob eʼtel tiʼ lum i cheʼʌch miʼ tajob jiñi i cʼʌjñibal bʌ i chaʼañob. Pero ti jumpʼejl bʌ qʼuin tsaʼ cʼotiyob jontoloʼ bʌ (mañajoʼ bʌ), tsaʼ chilbentiyob jiñi i lum i tsaʼ chojquiyob loqʼuel. Miguel, jiñi tatʌl, miʼ yʌl: «Wʌle, cʌyʌl lon jax lon ti muʼ bʌ i colel ti jumpejt lum tsaʼ bʌ majñʌbentiyon lojon. Muʼ bʌ c ñaxan mel (chaʼlen) ti jujumpʼejl qʼuin, jiñʌch cheʼ mij cʼajtiben Jehová chaʼan miʼ yʌqʼueñon lon i cʼʌjñibal bʌ lon c chaʼan ti jiñi qʼuin». Wocolʌch miʼ ñusan ili familia, pero miʼ ñopob chaʼan Jehová mi caj i yʌqʼueñob i cʼʌjñibal bʌ ti jujumpʼejl qʼuin. Jin chaʼan, maʼañic miʼ cʌyob jiñi tempa bʌ tac mi jiñicto jiñi subtʼan. Miʼ yʌcʼob ti ñaxan jiñi i Yumʌntel i Dios, i Jehová miʼ cʌntañob.

⁵ Ti bele ora, Miguel yicʼot i yijñam i cʼabaʼ Yurai, an i yʌcʼʌyob i ñaʼtʌbal ti bajcheʼ an i cʌntayob Jehová. An i tajol Jehová miʼ cʼʌn jiñi hermanojob chaʼan miʼ yʌqʼueñob i cʼʌjñibal bʌ i chaʼan o chaʼan miʼ coltañob Miguel chaʼan miʼ taj i yeʼtel. Ti yan tac bʌ, an i cʼʌñʌ jiñi coltaya muʼ bʌ i yʌcʼ jiñi sucursal ti chuqui i cʼʌjñibal i chaʼañob. Jehová maʼañic baʼ i cʌyʌyob, jin chaʼan tsaʼ ñumen pʼʌtʼayob i ñopoñel. Cheʼ bʌ Yoselin, jiñi ñaxam bʌ i yixicʼal (yixicpʼeñal) tsaʼ ujti i yʌl junchajp baqui tsiʼ coltayob Jehová, tsiʼ yʌlʌ: «Miʼ ñijcʌyel c pusicʼal cheʼ mic jamʌ qʼuelben i coltaya Jehová. Mij qʼuel bajcheʼ juntiquil camigo am bʌ c chaʼan tiʼ pejtelel ora». Tsiʼ bej alʌ: «Jiñi wocol tac am bʌ c ñusa lojon an i chajpayon lojon chaʼan jiñi ñumen tsʌts tac bʌ wocol muʼ bʌ caj i tilel».

6. ¿Bajcheʼ miʼ mejlel a pʼʌtʼesan a ñopoñel mi wocol woli a ñusan tiʼ caj taqʼuin?

⁶ ¿Wocol ba woli (choncol) a ñusan tiʼ caj taqʼuin? Mi cheʼʌchi, wocolʌch jiñi. Anquese wocol woli (yʌquel) a ñusan, miʼ mejlel a pʼʌtʼesan a ñopoñel ili ora. Melben oración Jehová, pejcan tsaʼ bʌ i yʌlʌ Jesús ti Mateo  6:25-34 i wen ñaʼtan muʼ bʌ i yʌl yaʼi. Ñaʼtan ejemplo tac chaʼan bʌ ili ora muʼ bʌ i pʌs chaʼan Jehová miʼ cʌntan jiñi muʼ bʌ i wen melbeñob i yeʼtel (1 Cor. 15:58). Jiñi mi caj i pʼʌtʼesan a ñopoñel chaʼan mi caj i coltañet jaʼel cheʼ bajcheʼ an i mele tiʼ tojlel yañoʼ bʌ. Yujil chuqui i cʼʌjñibal a chaʼan yicʼot bajcheʼ mi caj i yʌqʼueñet. Cheʼ bʌ maʼ qʼuelben i coltaya Jehová mi caj i pʼʌtʼan a ñopoñel i mi caj a lʌtʼ ñumen tsʌts tac bʌ wocol ti talto bʌ qʼuin (Hab. 3:17, 18).

7. Cheʼ bajcheʼ miʼ yʌl Mateo 8:23-26, ¿bajcheʼ tsaʼ qʼuelbentiyob i ñopoñel jiñi xcʌntʼañob cheʼ bʌ tsaʼ caji tsʌts bʌ icʼ jaʼal?

⁷ Ti jumpʼejl bʌ qʼuin cheʼ bʌ Jesús yicʼot jiñi xcʌntʼañob i chaʼan añob ti jumpʼejl barco, tsaʼ caji tsʌts bʌ icʼ jaʼal. Jesús tsiʼ colta i qʼuelob ti jimbʌ ora chaʼan anto yom i ñopoñelob (pejcan Mateo 8:23-26). Wen tsʌts jiñi icʼ jaʼal i jiñi jaʼ muʼto i cʼotel yaʼ ti barco, pero Jesús wen wʌyʌl. Jiñi xcʌntʼañob tsaʼ majli i ñijcañob chʼojyel yicʼot i subeñob chaʼan miʼ coltañob come wen woliyob ti bʌqʼuen. Jesús tiʼ subeyob: «Wiñicob maʼañic bʌ mi laʼ wen ñop, ¿chucoch wen woliyetla ti bʌqʼuen?». Jiñi xcʌntʼañob yom miʼ ñaʼtañob chaʼan Jehová mucʼʌch i mejlel i cʌntan Jesús yicʼot jiñi yaʼ bʌ añob. ¿Chuqui mi laj cʌn? Chaʼan jiñi pʼʌtʌl bʌ lac ñopoñel miʼ coltañonla lac lʌtʼ jiñi tsʌts tac bʌ wocol.

8, 9. ¿Bajcheʼ tsaʼ qʼuejli i ñopoñel Anel, i chuqui tsiʼ colta?

⁸ Laʼ laj qʼuel bajcheʼ tsaʼ pʼʌtʼa i ñopoñel juntiquil hermana i bajñelto bʌ, chʼoyol bʌ ti Puerto Rico, cheʼ bʌ tsiʼ ñusa jumpʼejl tsʌts bʌ wocol. Tiʼ caj jiñi huracán María, tsaʼ bʌ ñumi ti Puerto Rico cheʼ ti 2017, Anel tsiʼ sʌtʌ i yotot yicʼot i yeʼtel. Miʼ yʌl: «Ti jiñi qʼuin tac cheʼ bʌ wen wocol, tsaʼ c wen chaʼle bʌqʼuen. Pero tsaʼ j cʌñʌ c chuc c bʌ ti Jehová ti oración yicʼot chaʼan maʼañic mi cʌcʼ chaʼan miʼ mʌlbeñon (jotbeñon) jiñi pensar».

⁹ Anel miʼ yʌl chaʼan an yambʌ tsaʼ bʌ i colta ti jiñi wocol: Jiñʌch cheʼ miʼ jacʼ tʼan. Miʼ yʌl: «Tsaʼ bʌ i coltayon chaʼan maʼañic mic wen chaʼlen pensar jiñʌch cheʼ tsaʼ c jacʼʌ tsaʼ bʌ i yʌlʌ jiñi organización. Jehová tsiʼ coltayon tiʼ tojlel jiñi hermanojob, tsiʼ ñuqʼuesʌbeyoñob c pusicʼal i tsiʼ yʌqʼueyoñob i cʼʌjñibal bʌ c chaʼan». I miʼ bej al: «Jehová ñumento tsiʼ yʌqʼueyon cheʼ bajcheʼ tsaʼ c ñaʼta, i tsaʼ wen pʼʌtʼa c ñopoñel».

10. ¿Chuqui miʼ mejlel a mel mi woli a ñusan tsʌts bʌ wocol?

¹⁰ ¿Woli ba a ñusan jumpʼejl tsʌts bʌ wocol? Tajol tiʼ caj tsʌts bʌ icʼ jaʼal o yan tac bʌ. O tajol jiñi a wocol jiñʌch jumpʼejl tsʌts bʌ cʼamʌjel muʼ bʌ i wen aqʼuet ti pensar i maʼañix maʼ ñaʼtan chuqui yom maʼ mel. Tajol maʼ wen chaʼlen pensar, pero mach a cʌy a ñop ti Jehová tiʼ caj jiñi. Jamben a pusicʼal i laj suben bajcheʼ yubil maʼ wubin. Wen ñaʼtan bajcheʼ  tsiʼ coltayet Jehová ti wajali chaʼan maʼ pʼʌtʼesan a ñopoñel (Sal. 77:11, 12). Miʼ mejlel a ñop chaʼan maʼañic baʼ ora mi caj i cʌyet, mi jiñicto ili ora.

11. ¿Chucoch yomʌch mi lac jacʼbeñob i tʼan jiñi waʼchocobiloʼ bʌ?

¹¹ ¿Chuqui yambʌ mi caj i coltañet a lʌtʼ jiñi wocol tac? Cheʼ bajcheʼ tsiʼ yʌlʌ Anel, jiñʌch cheʼ maʼ jacʼ tʼan. Jehová miʼ ñop tiʼ tojlel jiñi yajcʌbiloʼ bʌ i chaʼan, ñopo tiʼ tojlelob jaʼel. An i tajol jiñi muʼ bʌ i subeñoñobla jiñi waʼchobiloʼ bʌ, mach jiñic ñumen wem bʌ mi laj qʼuel. Pero cʼajtesan chaʼan Jehová miʼ yʌcʼ i bendición cheʼ mi lac jacʼ tʼan. Jiñi i Tʼan yicʼot ujtem bʌ tiʼ tojlel jiñi hermanojob miʼ pʌsbeñonla chaʼan jiñi jacʼtʼan miʼ coltañonla (Éx. 14:1-4; 2 Cr. 20:17). Ñaʼtan ti jiñi ejemplo tac, cheʼ bajcheʼ jiñi mi caj a ñumen jacʼ muʼ bʌ i yʌl jiñi organización ti ili ora yicʼot ti talto bʌ qʼuin (Heb. 13:17). Cheʼ jiñi maʼañic chucoch mi caj lac bʌcʼñan jiñi ñuc bʌ wocol woli bʌ i lʌcʼtiyel (Pr. 3:25).

12. Cheʼ bajcheʼ miʼ yʌl Lucas 18:1-8, ¿bajcheʼ miʼ taj i bʌ jiñi lac ñopoñel yicʼot cheʼ mi laj cuch wocol?

¹² Jesús yujil chaʼan jiñi toʼol ticʼlʌntel mi caj i pʌs mi pʼʌtʌlʌch i ñopoñel jiñi xcʌntʼañob i chaʼan. Chaʼan miʼ coltañob i lʌtʼ tiʼ subeyob jumpʼejl relato muʼ bʌ lac taj ti Lucas. Tsiʼ taja ti tʼan juntiquil mebaʼ xʼixic tsaʼ bʌ i chʌn cʼajtibe juntiquil juez chaʼan miʼ coltan. Yujil chaʼan mucʼʌch caj i coltan mi mucʼʌch i chʌn cʼajtin. I cheʼʌch tsaʼ ujti. ¿Chuqui mi laj cʌn? Jehová miʼ mel chuqui toj. Jesús tsiʼ yʌlʌ: «Jin chaʼan, ¿mach ba añic mi caj i chʼʌm tiʼ wenta Dios chaʼan miʼ melbentel chuqui toj jiñi yajcʌbiloʼ bʌ i chaʼan muʼ bʌ i cʼajtibeñob i coltʌntel ti qʼuiñil yicʼot ti acʼʌlel [ . . . ]?» (pejcan Lucas 18:1-8). Jesús tsiʼ bej alʌ: «Cheʼ bʌ miʼ julel jiñi i Yalobil wiñic, ¿muʼ ba caj i taj cheʼ bʌ ñopoñel bajcheʼ jiñi ti pañimil?». Cheʼ mi lac pʌs lac pijt yicʼot mi laj cuch jiñi toʼol ticʼlʌntel, mi lac pʌs chaʼan pʼʌtʌlʌch lac ñopoñel bajcheʼ i chaʼan jiñi mebaʼ xʼixic. Jiñi lac ñopoñel yom miʼ yʌqʼueñonla lac ñop chaʼan Jehová mucʼʌch caj i coltañonla. Yom mi lac ñop jaʼel chaʼan añʌch i pʼʌtʌlel jiñi oración. An i tajol mach pijtʌbilic lac chaʼan bajcheʼ mi lac jacʼbentel.

13. ¿Bajcheʼ tsiʼ colta jiñi oración jumpʼejl familia tsaʼ bʌ toʼol ticʼlʌnti?

¹³ Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Vero, chumul bʌ ti República Democrática del Congo yicʼot i ñoxiʼal mach bʌ Testigojic yicʼot i yixicʼal am bʌ 15 i jabilel. Tsaʼ chojquiyob loqʼuel tiʼ lumal cheʼ bʌ tsaʼ ticʼlʌntiyob ti soldadojob. Yaʼ ti bij tsiʼ tajayob jumpʼejl bloqueo i jiñi soldadojob maʼañic tsiʼ yʌcʼʌyob ti cʼaxel i tiʼ subeyob chaʼan mi caj i tsʌnsañob. Vero tsaʼ caji ti uqʼuel, pero jiñi i yixicʼal tsaʼ caji ti oración ti cʼam bʌ tʼan chaʼan miʼ ñop i ñʌjchʼesan i tsiʼ  wen albe i cʼabaʼ Jehová. Cheʼ bʌ tsaʼ ujti ti oración, jiñi am bʌ tiʼ wenta soldadojob tsiʼ cʼajtibe: «Alʌ xchʼoc, ¿majqui tsiʼ cʌntesayet oración?». Tsiʼ jacʼʌ: «C mamá, tsiʼ cʼʌñʌ Mateo 6:9-13». Jiñi wiñic tiʼ sube: «Cucu ti ñʌchʼtʌlel a wicʼotob a papá i laʼ i cʌntañetla laʼ Dios Jehová».

14. ¿Chuqui miʼ mejlel i yʌcʼ ti wocol lac ñopoñel, i bajcheʼ miʼ mejlel laj cuch?

¹⁴ Experiencia tac bajcheʼ ili miʼ pʌsbeñonla chaʼan añʌch i pʼʌtʌlel jiñi oración. Pero ¿ixcu mi mach ti orajic miʼ jajqʼuel jiñi a woración i mach wen ñuquic bajcheʼ miʼ jajqʼuel? Cheʼ bajcheʼ jiñi mebaʼ xʼixic tsaʼ bʌ i yʌlʌ Jesús, bej chaʼlen oración i ñopo chaʼan Jehová maʼañic mi caj i cʌyet yicʼot chaʼan mi caj i cʼotel i yorajlel i añʌch bajcheʼ mi caj i jacʼbeñet. Bej cʼajtiben Jehová chaʼan miʼ yʌqʼueñet chʼujul bʌ i yespíritu (Filip. 4:13). Cʼajtesan chaʼan ti lʌcʼʌl Jehová mi caj i yʌqʼueñet cabʌl bendición i muʼto caj i ñajʌyel a chaʼan jiñi wocol tac tsaʼ bʌ a ñusa. Cheʼ xucʼulet maʼ cuch pejtelel jiñi wocol tiʼ coltaya Jehová, mi caj a ñumen pʼʌtʼan chaʼan jiñi muʼ bʌ caj i tilel (1 Ped. 1:6, 7).

15. Cheʼ bajcheʼ miʼ yʌl Mateo 17:19, 20, ¿chuqui ti wocol an i chaʼañob jiñi xcʌntʼañob i chaʼan Jesús?

¹⁵ Jesús tiʼ sube jiñi xcʌntʼañob chaʼan jiñi ñopoñel mi caj i coltañob i ñusan wocol tac (pejcan Mateo 17:19, 20). Anquese tsaʼix i wen chocoyob loqʼuel xibajob an junsujtel baqui maʼañic tsaʼ mejliyob. ¿Chucoch? Jesús tiʼ subeyob chaʼan anto yom i ñopoñelob. Tiʼ subeyob chaʼan cheʼ cabʌlic i ñopoñelob miʼ mejlel i lʌtʼob ñuc tac bʌ wocol cheʼ bʌ bajcheʼ wits. Ili ora, joñonla jaʼel mi lac ñusan wocol tac mach bʌ lʌjtʼic lac chaʼan yilal.

16. ¿Bajcheʼ an i colta Geydi jiñi i ñopoñel chaʼan miʼ ñusan tsʌts bʌ wocol?

¹⁶ Laʼ laj qʼuel tsaʼ bʌ ujti tiʼ tojlel Geydi, juntiquil hermana ti Guatemala. Jiñi i ñoxiʼal i cʼabaʼ Edi tsaʼ tsʌnsʌnti cheʼ bʌ sujtel mucʼob ti tempa bʌ. Geydi miʼ yʌl bajcheʼ tsiʼ colta jiñi i ñopoñel ti jiñi ñuc bʌ i wocol: «Ti oración mi cʌqʼuen tiʼ wenta Jehová jiñi j cuch i jiñi miʼ yʌqʼueñon ñʌchʼtʌlel. Mij qʼuel bajcheʼ Jehová miʼ cʼʌn jiñi c familia yicʼot jiñi hermanojob chaʼan miʼ cʌntañon. Cheʼ mic wen melben i yeʼtel Jehová jiñʌch muʼ bʌ i lajmesan jiñi c chʼijyemlel i miʼ coltañon chaʼan maʼañic mic wen cʼojoʼtan (pensalin) jiñi muʼ bʌ i mejlel ti ujtel. Jiñi ñusʌbil bʌ c chaʼan an i pʌsbeyon chaʼan mach yʌlʌyic chuqui ti wocol miʼ tilel, mi caj i lʌjtʼel c chaʼan tiʼ coltaya Jehová, Jesús yicʼot jiñi organización».

17. ¿Chuqui miʼ mejlel lac mel cheʼ mi lac ñusan tsʌts bʌ wocol lajal bʌ bajcheʼ wits?

¹⁷ ¿Am ba majqui chʌmen (sajtem) a chaʼan? Pejcan relato tac chaʼan tsaʼ bʌ chaʼ chʼojyesʌntiyob chaʼan maʼ pʼʌtʼesan jiñi a ñopoñel ti jiñi chaʼ chʼojyel. ¿Chʼijyemet ba  chaʼan tsaʼ chaʼlenti ti expulsar juntiquil a familia? Chaʼlen estudio chaʼan maʼ qʼuel chaʼan jiñi tojʼesʌntel tilem bʌ ti Dios jiñʌch ñumen wem bʌ. Mach yʌlʌyic chuqui ti wocol maʼ ñusan qʼuele bajcheʼ junchajp baqui miʼ mejlel a pʼʌtʼesan a ñopoñel. Jamben a pusicʼal Jehová. Ajñen a wicʼot jiñi hermanojob, mach a tʌtsʼ a bʌ tiʼ tojlelob (Pr. 18:1). Mele chuqui tac miʼ coltañet a cuch anquese maʼ chaʼlen uqʼuel cheʼ maʼ cʼajtesan jiñi ñusʌbil bʌ a chaʼan (Sal. 126:5, 6). Mach a cʌy tempa bʌ, subtʼan yicʼot a pejcan jiñi Biblia. Bej ñaʼtan jiñi utsʼatax bʌ bendición tac albil bʌ i chaʼan Jehová. Cheʼ maʼ qʼuel bajcheʼ woliʼ coltañet Jehová, mi caj i ñumen pʼʌtʼan a ñopoñel tiʼ tojlel.

18. ¿Chuqui miʼ mejlel a mel mi tsaʼ qʼuele chaʼan anto yom maʼ pʼʌtʼesan a ñopoñel?

¹⁸ Mach a wubin a chʼijyemlel mi jumpʼejl wocol tsiʼ pʌsʌ chaʼan anto yom a ñopoñel. Qʼuele bajcheʼ junchajp muʼ bʌ i coltañet chaʼan maʼ ñumen pʼʌtʼesan. Cʼajtin tsaʼ bʌ i cʼajtiyob jiñi i yapóstolob Jesús: «Coltañon lon chaʼan miʼ ñumen pʼʌtʼan lon c ñopoñel» (Luc. 17:5). Ñaʼtan jiñi ejemplo tac tsaʼ bʌ ujti laj qʼuel. Cheʼ bajcheʼ Miguel yicʼot Yurai, cʼajtesan pejtelel bajcheʼ an i coltayet Jehová. Cheʼ bajcheʼ Anel yicʼot i yixicʼal Vero, pejcan Jehová ti jumpʼejl a pusicʼal, ñumento cheʼ bʌ wocol woli a ñusan. I cheʼ bajcheʼ Geydi, jacʼʌ jiñi coltaya muʼ bʌ i yʌqʼueñet Jehová tiʼ tojlel a familia yicʼot jiñi hermanojob. Mi mucʼʌch a wʌcʼ chaʼan Jehová miʼ coltañet a lʌtʼ jiñi wocol tac am bʌ a chaʼan ili ora, mi caj a ñumen ñop chaʼan mi caj i coltañet jaʼel ti jiñi muʼ bʌ caj i tilel.

19. ¿Chuqui jiñi tsaʼʌch bʌ i ñopo Jesús, i chuqui miʼ mejlel a ñop jatet?

¹⁹ Jesús tsiʼ yʌlʌ baquito yom miʼ pʼʌtʼesañob i ñopoñel jiñi xcʌntʼañob i chaʼan, pero tsaʼʌch i ñopo chaʼan yicʼot i coltaya Jehová mi caj i lʌtʼob jiñi wocol tac muʼ bʌ caj i tajob (Juan 14:1; 16:33). Cheʼ jaʼel, tsiʼ ñopo chaʼan yonlel lac piʼʌlob cuxul mi caj i ñumelob ti jiñi cabʌl wocol come pʼʌtʌlob i ñopoñel (Apoc. 7:9, 14). ¿Yaʼ ba ochemet jaʼel? Chaʼan jiñi ñuc bʌ i yutslel Jehová, yaʼʌch mi caj a wajñel mi mucʼʌch a pʼʌtʼesan a ñopoñel ili ora cheʼ bʌ muʼto i mejlel (Heb. 10:39).