1. ¿Chuqui la cujil jiñi xñoptʼañonbʌla, i chuqui mi lac wen ñop?

 MAʼAÑIC miʼ yʌcʼ ti toj sajtel lac pusicʼal cheʼ an muʼ bʌ i tsʼaʼleñob jiñi lac subtʼan, i tajol muʼto caj i ñumen pʼojlel iliyi ti talto bʌ qʼuin (Dn. 11:44; 2 Tim. 3:12; Apoc. 16:21). Pero mi lac wen ñop chaʼan Jehová mi caj i coltañonla. ¿Chucoch mi la cʌl jiñi? Come tiʼ pejtelel ora an i colta jiñi i wiñicob chaʼan miʼ tsʼʌctesañob jiñi eʼtel (troñel) am bʌ i yʌqʼueyob tiʼ wenta, anquese ñoj wocol. Chaʼan mi laj qʼuel chaʼan i sujmʌch iliyi, laʼ laj qʼuel chuqui tac tsiʼ ñusa jiñi xʼaltʼan Ezequiel, tsaʼ bʌ i sube i tʼan Dios jiñi judíojob añoʼ bʌ ti Babilonia.

2. a) ¿Chuqui tsiʼ yʌlʌ Jehová tiʼ tojlel jiñi judíojob yom bʌ miʼ subeñob i tʼan Dios jiñi Ezequiel? (Ezequiel 2:3-6). b) ¿Chuqui mi caj laj qʼuel ti ili estudio?

² ¿Bajcheʼ yilal miʼ melob (chaʼleñob) i bʌ jiñi yom bʌ miʼ subeñob i tʼan Dios jiñi Ezequiel? Jehová tiʼ sube chaʼan jiñi judíojob woli (choncol) i contrajiñob, jontolob yicʼot tsʌtsob i pusicʼal. Tiʼ caj i jontolilob (simaronlelob) lajalob bajcheʼ chʼix yicʼot siñan. Jin chaʼan Jehová tsiʼ wen sube Ezequiel: «Mach yomic maʼ chaʼlen bʌqʼuen» (pejcan Ezequiel 2:3-6). Ezequiel tsaʼ mejli i tsʼʌctesan i yeʼtel come 1) Jehová jiñʌch tsaʼ bʌ i choco majlel, 2) jiñi chʼujul bʌ espíritu tsiʼ yʌqʼue i pʼʌtʌlel i 3) tsiʼ weʼsa i bʌ tiʼ tʼan Dios. ¿Bajcheʼ tsiʼ colta ili uxchajp, i bajcheʼ miʼ coltañonla ili ora?

3. ¿Chuqui tsiʼ wen colta Ezequiel, i bajcheʼ tsiʼ pʌsbe Jehová chaʼan mi caj i coltan?

³ Jehová tiʼ sube Ezequiel: «Wolic choquet majlel» (Ez. 2:3, 4). Ili tsaʼʌch i wen colta. Miʼ mejlel la cʌl chaʼan tsiʼ cʼajtesa chaʼan Jehová tsiʼ cʼʌñʌ tʼan tac lʌcʼʌ lajal bʌ bajcheʼ iliyi cheʼ bʌ tsiʼ yajca Moisés yicʼot Isaías chaʼan miʼ sujtelob ti xʼaltʼan (Éx. 3:10; Is. 6:8). Ezequiel yujil jaʼel chaʼan Jehová tsiʼ colta ili xʼaltʼañob chaʼan miʼ melob tsʌts tac bʌ eʼtel. Jin chaʼan, cheʼ bʌ Dios chaʼyajl tiʼ sube: «Wolic choquet majlel», yujil chaʼan mi caj i coltan. Cheʼ jaʼel, yaʼ ti libro chaʼan Ezequiel mi lac wen taj jiñi tʼan: «Tsaʼ tili i tʼan lac Yum baʼ añon» (Ez. 14:2). I mi lac wen taj jaʼel jiñi tʼan: «Tsaʼ [chaʼ] tili i tʼan lac Yum baʼ añon» (Ez. 6:1). Jin chaʼan, jiñi xʼaltʼan tsaʼʌch i wen ñopo chaʼan Jehová jiñʌch tsaʼ bʌ i choco majlel. Cheʼ jaʼel, sacerdote i papá, jin chaʼan miʼ mejlel la cʌl chaʼan tsiʼ pʌsbe chaʼan Jehová tiʼ pejtelel ora miʼ suben jiñi xʼaltʼañob i chaʼan chaʼan mi caj i coltañob. Cheʼto jaʼel, Jehová tiʼ sube Isaac, Jacob yicʼot Jeremías: «Añon quicʼotet» (Gn. 26:24; 28:15; Jer. 1:8).

4. ¿Chuqui ti tʼan tac tsiʼ wen tijicñesa Ezequiel?

⁴ ¿Bajcheʼ yilal mi caj i jacʼob lʌcʼʌ tiʼ pejtelel jiñi israelitajob? Jehová tiʼ sube Ezequiel: «Jini israelob maʼanic mi caj i ñichʼtañob a tʼan, come maʼanic miʼ ñichʼtañob c tʼan» (Ez. 3:7). Cheʼ miʼ tsʼaʼleñob muʼ bʌ i yʌl ili xʼaltʼan, woli (yʌquel) i tsʼaʼleñob Jehová. Ili tʼan tac tsaʼʌch i wen colta Ezequiel come mach yomic i yʌl chaʼan juntiquil mach bʌ weñic xʼaltʼan cheʼ maʼañic miʼ jacʼbeñob i tʼan. Cheʼ jaʼel, Jehová tiʼ sube chaʼan cheʼ bʌ miʼ tsʼʌctiyel jiñi woli bʌ i sub, jiñi judíojob mi caj i ñaʼtañob tsaʼix ñumi xʼaltʼan tiʼ tojlelob (Ez. 2:5; 33:33). Miʼ mejlel la cʌl chaʼan ili tʼan  tac tsaʼʌch i wen colta Ezequiel chaʼan miʼ tsʼʌctesan i yeʼtel.

5. ¿Chucoch miʼ wen coltañonla Isaías 44:8?

⁵ Miʼ wen coltañonla jaʼel cheʼ la cujil chaʼan Jehová jiñʌch muʼ bʌ i choconla majlel ti subtʼan. Mi laj qʼuel ti ñuc cheʼ i Testigojonla (Is. 43:10). Jehová tiʼ sube Ezequiel: «Mach yomic maʼ chaʼlen bʌqʼuen», i miʼ subeñonla jaʼel: «Mach laʼ chaʼlen bʌqʼuen». ¿Chucoch mach yomic mi lac bʌcʼñan laj contrajob? Come cheʼ bajcheʼ Ezequiel, Jehová jiñʌch muʼ bʌ i choconla majlel i miʼ wen coltañonla (pejcan Isaías 44:8).

6. a) ¿Bajcheʼ miʼ subeñonla Jehová chaʼan miʼ coltañonla? b) ¿Chuqui jiñi muʼ bʌ i tijicñesañonla?

⁶ Jehová miʼ subeñonla chaʼan mi caj i coltañonla. Jumpʼejl ejemplo, cheʼ bʌ muʼto caj i yʌl: «C testigojetla», tsiʼ yʌlʌ: «Cheʼ maʼ ñumel yaʼ ti jaʼ, cheʼ cabʌl a wocol, yaʼ añon quicʼotet. Cheʼ maʼ ñumel yaʼ baʼ tam jaʼ, cheʼ cabʌl a ticʼlʌntel, maʼanic mi caj a sujpʼel ochel. Cheʼ maʼ cʼaxel ti cʼajc, maʼanic chuqui mi caj i tumbeñet. Maʼanic mi caj i pulet cʼajc» (Is. 43:2). An i tajol cheʼ bʌ mi lac chaʼlen subtʼan, mi lac taj wocol tac lajal bʌ bajcheʼ tam bʌ jaʼ yicʼot lajal bʌ bajcheʼ cʼajc. Pero, tiʼ coltaya Jehová mi lac bej chaʼlen subtʼan (Is. 41:13). Cheʼʌch mi lac ñusan jaʼel bajcheʼ Ezequiel: Lʌcʼʌ tiʼ pejtelel lac piʼʌlob maʼañic miʼ jacʼob jiñi wen tʼan. Pero la cujil chaʼan iliyi mach yomic i yʌl chaʼan mach weñic bʌ i testigojonla Dios. Miʼ tijicñesañonla yicʼot miʼ ñuqʼuesan lac pusicʼal cheʼ la cujil chaʼan Jehová tijicña cheʼ mi lac bej chaʼlen subtʼan. Jiñi apóstol Pablo tsiʼ yʌlʌ: «Jujuntiquil mi caj i taj i chobejtʌbal cheʼ bajcheʼ tsiʼ chaʼle eʼtel» (1 Cor. 3:8; 4:1, 2). Juntiquil hermana añix bʌ cabʌl jab bajcheʼ precursora tsiʼ yʌlʌ: «Miʼ yʌqʼueñon c tijicñʌyel cheʼ cujil chaʼan Jehová miʼ yʌqʼueñonla i bendición cheʼ mi lac bej chaʼlen wersa».

7. ¿Bajcheʼ yubil tsiʼ yubi i bʌ Ezequiel cheʼ bʌ tsiʼ chʌcʌ cʼajtesa jiñi tsaʼ bʌ pʌsbenti? (Qʼuele jiñi dibujo am bʌ tiʼ tejchibal).

⁷ Ezequiel tsiʼ qʼuele bajcheʼ cʼamel i pʼʌtʌlel jiñi chʼujul bʌ i yespíritu Dios. Tsaʼ pʌsbenti bajcheʼ jiñi espíritu miʼ mel i yeʼtel tiʼ tojlel pʼʌtʌl espíritujob yicʼot ti colem tac bʌ i ruedajlel i carro Jehová (Ez. 1:20, 21). Ezequiel miʼ yʌl: «Cheʼ bʌ tsaj qʼuele, tsaʼ ñuc yajliyon ti lum». Tsaʼ toj sajti i pusicʼal, jin chaʼan tsaʼ ñuc yajli ti lum (Ez. 1:27-28). Tajol cheʼ bʌ tsiʼ chʌcʌ cʼajtesa ili tsaʼ bʌ pʌsbenti, tsiʼ colta i ñumen ñop chaʼan mucʼʌch caj i mejlel i tsʼʌctesan i yeʼtel tiʼ coltaya i yespíritu de Dios.

8, 9. a) ¿Chuqui tsaʼ subenti Ezequiel? b) ¿Chuqui yambʌ tsiʼ mele Jehová chaʼan miʼ pʼʌtʼesan Ezequiel?

⁸ Jehová tiʼ sube Ezequiel: «I yalobil winic, [...] yom maʼ waʼtʌl chaʼan com c pejcañet». Ili yicʼot jiñi i yespíritu Dios tsiʼ yʌqʼue i pʼʌtʌlel i cʼʌjñibal bʌ i chaʼan chaʼan miʼ waʼtʌl. Tiʼ tsʼijbu: «Jini Espíritu tsaʼ ochi tic pusicʼal. Tsiʼ yʌcʼʌyon ti waʼtʌl» (Ez. 2:1, 2). Jiñi «i cʼʌb» Jehová, ili jiñʌch jiñi chʼujul bʌ espíritu, tiʼ pejtelel ora tsiʼ colta chaʼan miʼ tsʼʌctesan i yeʼtel (Ez. 3:22; 8:1; 33:22; 37:1; 40:1). Ili espíritu tsiʼ yʌqʼue Ezequiel jiñi i pʼʌtʌlel i cʼʌjñibal bʌ i chaʼan chaʼan miʼ suben i tʼan Dios jiñi judíojob jontoloʼ bʌ yicʼot tsʌtsob jax bʌ i pusicʼal (Ez. 3:7). Jehová tiʼ sube: «Wolic pʼʌtʼesañet chaʼan lajal a chʼejlel cheʼ bajcheʼ i chʼejlelob. Michʼicña a wut cheʼ bajcheʼ i wutob. Cheʼ bajcheʼ i tsʌtslel diamante, cheʼʌch wolic mel a pam. Mach yomic maʼ bʌcʼñañob. Mach a bʌcʼñʌbeñob i wut anquese wen jontol» (Ez. 3:8, 9). Lajal bajcheʼ Jehová tiʼ sube: «Mach a taj  a chʼijyemlel tiʼ caj jiñi i tsʌtslelob i pusicʼal. Joñon mi caj c pʼʌtʼesañet».

⁹ Cʼʌlʌl ti jimbʌ ora, jiñi i yespíritu Dios tsiʼ pʌyʌ majlel Ezequiel yaʼ baqui yom miʼ chaʼlen subtʼan. Ezequiel tiʼ tsʼijbu: «Jini Espíritu tsiʼ chʼuyuyon majlel». Jumpʼejl semana tsaʼ ñumi chaʼan jiñi xʼaltʼan miʼ wen ñaʼtan jiñi yom bʌ miʼ sub (Ez. 3:14, 15). Cheʼ jiñi, Jehová tiʼ sube chaʼan miʼ majlel ti jumpʼejl joctʌl, baqui jiñi espíritu tsaʼ ochi tiʼ pusicʼal (Ez. 3:23, 24). Ezequiel chajpʌbilix chaʼan miʼ tech subtʼan.

10. ¿Chuqui ti coltaya i cʼʌjñibal lac chaʼan chaʼan mi lac tsʼʌctesan la queʼtel, i chucoch?

¹⁰ ¿Chuqui ti coltaya i cʼʌjñibal lac chaʼan chaʼan mi lac tsʼʌctesan la queʼtel? Chaʼan mi lac jacʼ ili cʼajtiya, laʼ lac ñaʼtan tiʼ tojlel Ezequiel. Cheʼ bʌ muʼto i cajel ti subtʼan, jiñi chʼujul bʌ espíritu tsiʼ yʌqʼue jiñi i pʼʌtʌlel i cʼʌjñibal bʌ i chaʼan. Cheʼ bajcheʼ Ezequiel, joñonla maʼañic mi lac mejlel ti subtʼan cheʼ maʼañic lac chaʼan i coltaya jiñi chʼujul bʌ espíritu. ¿Chucoch mi la cʌl iliyi? Come Satanás woliʼ contrajiñonla chaʼan miʼ mʌctan jiñi subtʼan (Apoc. 12:17). Tajol mi lac ñaʼtan chaʼan Satanás juntiquilʌch laj contra ñumen pʼʌtʌl bajcheʼ joñonla. Pero woli lac mʌlben (jotben) ti lac subtʼan (Apoc. 12:9-11). Cheʼ bʌ mi lac chaʼlen subtʼan mi lac pʌs chaʼan maʼañic mi lac bʌcʼñan muʼ bʌ i mel Satanás. Jajayajl mi lac chaʼlen subtʼan woli lac mʌlben Satanás. Jin chaʼan, cheʼ mi lac mejlel ti subtʼan anquese mi lac tsʼaʼlentel miʼ pʌs chaʼan jiñi chʼujul bʌ espíritu woliʼ yʌqʼueñonla lac pʼʌtʌlel yicʼot chaʼan Jehová woliʼ coltañonla (Mat. 5:10-12; 1 Ped. 4:14).

11. ¿Bajcheʼ miʼ coltañonla jiñi chʼujul bʌ espíritu, i chuqui yom mi lac mel chaʼan mi lac bej taj?

¹¹ Cheʼ Jehová tsiʼ pʼʌtʼesa Ezequiel an chuqui yambʌ miʼ pʌsbeñonla: Chaʼan jiñi chʼujul bʌ espíritu miʼ mejlel i coltañonla lac ñusan baqui jach bʌ wocol mi lac taj ti lac subtʼan (2 Cor. 4:7-9). Jin chaʼan, ¿chuqui  yom mi lac mel chaʼan mi lac bej taj jiñi chʼujul bʌ espíritu? Yom mi lac chʌcʌ cʼajtin ti oración, i yom mi lac ñop chaʼan Jehová mi caj i ñʌchʼtañonla. Jesús tiʼ sube jiñi xcʌntʼañob i chaʼan: «Chʌn cʼajtinla», «chʌn sʌclanla» i «chʌn jatsʼʌla i tiʼ otot». ¿Chuqui mi caj i mel Jehová? «Mi caj i yʌqʼuen chʼujul bʌ espíritu jiñi muʼ bʌ i cʼajtibeñob» (Luc. 11:9, 13; Hech. 1:14; 2:4).

12. Cheʼ bajcheʼ miʼ yʌl Ezequiel 2:9-3:3, ¿baqui tsaʼ tili jiñi bʌlʌl bʌ jun, i chuqui miʼ yʌl?

¹² Ezequiel mach tsaʼ jach aqʼuenti jiñi chʼujul bʌ espíritu, tsiʼ weʼsa i bʌ jaʼel ti jiñi i Tʼan Dios. Tsaʼ pʌsbenti jumpʼejl cʼʌbʌl am bʌ i chaʼan bʌlʌl bʌ jun (pejcan Ezequiel 2:9–3:3). ¿Baqui tsaʼ tili jiñi bʌlʌl bʌ jun? ¿Chuqui miʼ yʌl? ¿I bajcheʼ tsiʼ weʼsa Ezequiel? Jiñi bʌlʌl bʌ jun tsaʼ tili tiʼ trono Jehová. Tajol Dios tsiʼ cʼʌñʌ juntiquil ángel tsaʼ bʌ i qʼuele Ezequiel chaʼan miʼ yʌqʼuen jiñi bʌlʌl bʌ jun (Ez. 1:8; 10:7, 20). Yaʼi miʼ yʌl jiñi i tʼan Dios: Ezequiel yom miʼ suben jiñi judíojob xñusatʼañoʼ bʌ chaʼan mi caj i tojob i mul (Ez. 2:7). Ili tʼan tsʼijbubil tiʼ chaʼwejlel jiñi bʌlʌl bʌ jun.

13. ¿Chuqui tiʼ sube Jehová jiñi Ezequiel chaʼan yom miʼ mel yicʼot jiñi bʌlʌl bʌ jun, i chucoch wen tsaj?

¹³ Jehová tiʼ sube jiñi xʼaltʼan i chaʼan: «Cʼuxu ili jun. […] Laʼ ñajʼaquet yicʼot ili muʼ bʌ cʌqʼueñet». Ezequiel tsaʼʌch i jacʼʌ tʼan i tsiʼ laj cʼuxu. ¿Chuqui yom i yʌl ili tsaʼ bʌ pʌsbenti? Chaʼan Ezequiel yom miʼ wen chʼʌmben i sujm jiñi muʼ bʌ caj i sub. Ili tʼan yom miʼ yochel tiʼ pusicʼal. Pero an chuqui tsaʼ ujti. Ezequiel wen tsaj tsiʼ yubi bajcheʼ chab jiñi bʌlʌl bʌ jun (Ez. 3:3). ¿Chucoch? Come wen utsʼatax tsiʼ qʼuele cheʼ miʼ mejlel ti tʼan tiʼ wenta Jehová (Sal. 19:8-11). Tsiʼ wen qʼuele ti ñuc cheʼ Jehová tsiʼ yajca chaʼan miʼ sujtel ti xʼaltʼan i chaʼan.

14. ¿Chuqui tsiʼ colta Ezequiel chaʼan chajpʌbil chaʼan miʼ tsʼʌctesan i yeʼtel?

¹⁴ Ti wiʼil Jehová tiʼ sube Ezequiel: «Otsan ti a pusicʼal pejtelel jini c tʼan tsaʼ bʌ c subeyet. Yom maʼ wen ubin» (Ez. 3:10). Jehová woliʼ suben chaʼan miʼ ñop i cʼajtesan jiñi tsʼijbubil bʌ yaʼ ti bʌlʌl bʌ jun yicʼot chaʼan miʼ wen ñaʼtan. Jiñi mi caj i pʼʌtʼesʌben i ñopoñel Ezequiel i mi caj i jamʌ pʌsben chuqui yom miʼ suben jiñi lac piʼʌlob (Ez. 3:11). Mi añix i chaʼan jiñi i tʼan Dios tiʼ yej yicʼot tiʼ pusicʼal, muqʼuix caj i mejlel ti subtʼan yicʼot i tsʼʌctesan i yeʼtel (laja yicʼot Salmo 19:14).

15. ¿Chuqui yom mi lac wen ñop ti lac pusicʼal chaʼan maʼañic mi laj cʌy lac subtʼan?

¹⁵ Yom mi lac bej weʼsan lac bʌ jaʼel tiʼ tʼan Dios chaʼan maʼañic mi laj cʌy lac subtʼan. Yom mi lac ñop ti jumpʼejl lac pusicʼal pejtelel muʼ bʌ i subeñonla Jehová. Ti ili ora Jehová miʼ cʼʌn jiñi i Tʼan chaʼan miʼ pejcañonla. ¿Chuqui miʼ mejlel lac mel chaʼan mi laj qʼuel mi jiñi i Tʼan Dios woliʼ bej ñijcan jiñi muʼ bʌ lac ñaʼtan, bajcheʼ yubil mi la cubin yicʼot jiñi muʼ bʌ i ñijcañonla lac mel chuqui tac mi lac mel?

16. ¿Chuqui yom mi lac mel yicʼot jiñi i Tʼan Dios, i bajcheʼ miʼ mejlel lac mel?

¹⁶ Jiñi lac bʌcʼtal miʼ pʼʌtʼan cheʼ bʌ mi laj cʼux ti wen jiñi i bʌl lac ñʌcʼ. Cheʼ jaʼel, mi lac wen ñop Dios cheʼ bʌ mi lac pejcʌben i Tʼan i mi lac wen ñaʼtan muʼ bʌ i yʌl. Ili jiñʌch muʼ bʌ i pʌsbeñonla jiñi bʌlʌl bʌ jun tsaʼ bʌ i qʼuele Ezequiel. Jehová yom chaʼan «mi lac ñajʼesan lac bʌ ti jiñi i Tʼan» yicʼot mi lac wen chʼʌmben i sujm. I jiñi mi lac mel cheʼ bʌ mi lac chaʼlen oración, mi lac pejcan jiñi i Tʼan yicʼot mi lac wen ñaʼtan. Mi lac ñaxan chajpan lac pusicʼal chaʼan mi lac taj jiñi i ñaʼtʌbal Dios. Cheʼ jiñi mi lac pejcan jiñi Biblia. I ti  wiʼil mi la cʌqʼuen i yorajlel chaʼan mi lac wen ñaʼtan jiñi tsaʼ bʌ lac pejca. ¿Chuqui mi caj i yujtel? Cheʼ bʌ mi lac ñumen ñaʼtan tsaʼ bʌ lac pejca yaʼ tiʼ Tʼan Dios, mi caj lac ñumen chʼʌmben i sujm.

17. ¿Chucoch ñucʌch i cʼʌjñibal cheʼ mi lac wen ñaʼtan muʼ bʌ lac pejcan yaʼ ti Biblia?

¹⁷ ¿Chucoch ñucʌch i cʼʌjñibal cheʼ mi lac pejcan jiñi Biblia yicʼot mi lac wen ñaʼtan muʼ bʌ i yʌl? Come miʼ pʼʌtʼesañonla chaʼan mi lac bej sub jiñi wen tʼan yicʼot chaʼan tajol mi lac sub jiñi wocol muʼ bʌ caj i tilel. Cheʼ jaʼel, mi lac ñumen sujtel tiʼ yamigo Jehová cheʼ bʌ mi lac wen ñaʼtan jiñi melbalʌl (chaʼlibal) tac am bʌ i chaʼan. I cheʼ bajcheʼ jiñi an chuqui utsʼatax bʌ mi lac taj: Lac ñʌchʼtʌlel yicʼot tijicñʌyel (Sal. 119:103).

18. ¿Chuqui mi caj i cʌñob jiñi lac piʼʌlob, i chucoch?

¹⁸ Anquese mach xʼaltʼañoñicla cheʼ bajcheʼ Ezequiel, Jehová tsaʼʌch i cʌybeyonla i Tʼan. Mucʼʌch caj lac bej sub jinto Jehová miʼ subeñonla chaʼan maʼañix mi lac bej chaʼlen subtʼan. Cheʼ bʌ Jehová miʼ jisan jiñi jontoloʼ bʌ maʼañic mi caj i mejlel i yʌlob chaʼan maʼañic tsaʼ subentiyob yicʼot chaʼan Dios maʼañic tsiʼ chʼʌmʌyob ti ñuc (Ez. 3:19; 18:23). Mi caj i cʌñob chaʼan jiñi tʼan tsaʼ bʌ lac subu tilem ti Dios.

19. ¿Baqui mi caj lac taj lac pʼʌtʌlel chaʼan mi lac bej chaʼlen subtʼan?

¹⁹ ¿Baqui mi caj lac taj lac pʼʌtʌlel chaʼan mi lac bej chaʼlen subtʼan? Jiñʌch ti jiñi uxchajp tsaʼ bʌ i colta Ezequiel: Mi lac bej chaʼlen subtʼan come la cujil chaʼan Jehová jiñʌch muʼ bʌ i subeñonla, jiñi chʼujul bʌ espíritu miʼ yʌqʼueñonla lac pʼʌtʌlel yicʼot mi lac weʼsan lac bʌ tiʼ Tʼan Dios. Tiʼ coltaya Jehová la com lac bej chaʼlen subtʼan yicʼot laj cuch «cʼʌlʌl tiʼ yujtibal» (Mat. 24:13).