1, 2. a) ¿Chuqui mi caj laj qʼuel ti ili estudio? b) ¿Chuqui miʼ pʌs chaʼan Jehová yomʌch i coltañonla?

 JEHOVÁ miʼ mejlel i coltañonla lac lʌtʼ jiñi lac wocol tac yicʼot chaʼan tijicña mi lac melben (chaʼleben) i yeʼtel. Ti ili estudio, mi caj laj qʼuel bajcheʼ miʼ coltañonla yicʼot chuqui miʼ mejlel lac mel chaʼan mucʼʌch lac jacʼ jiñi i coltaya. Pero mi caj lac ñaxan jacʼ ili cʼajtiya «¿Tiʼ sujm ba yom i coltañonla Jehová?».

² Chaʼan mi lac tajben i jacʼbal, laʼ laj qʼuel jiñi tʼan tsaʼ bʌ i cʼʌñʌ jiñi apóstol Pablo ti jiñi i carta tsaʼ bʌ i chocbe majlel jiñi hebreojob. Tiʼ tsʼijbu: «Jehová jiñʌch caj coltaya. Maʼañic mi caj c chaʼlen bʌqʼuen. ¿Chuqui miʼ mejlel i tumbeñon jiñi wiñic?» (Heb. 13:6). An diccionario tac muʼ bʌ i yʌl chaʼan jiñi tʼan muʼ bʌ i chaʼlentel ti traducir bajcheʼ «caj coltaya» ti ili versículo woli (choncol) i taj ti tʼan juntiquil lac piʼʌl ti ajñel bʌ miʼ majlel i coltan juntiquil woli (yʌquel) bʌ i cʼajtin i coltʌntel. Laʼcu lac ñaʼtan chaʼan Jehová ti ajñel miʼ majlel i coltan juntiquil woli bʌ i ñusan wocol. Pero iliyi mach muqʼuic jach i pʌs chaʼan Jehová yomʌch i coltañonla, miʼ pʌs chaʼan yomʌch i mel ti jumpʼejl i pusicʼal. Mi an la quicʼot Jehová, mi caj i mejlel laj cuch jiñi wocol tac i maʼañic mi caj lac sʌt lac tijicñʌyel.

3. ¿Bajcheʼ uxchajp miʼ coltañonla Jehová chaʼan tijicña mi lac lʌtʼ jiñi wocol tac?

³ ¿Bajcheʼ tac miʼ coltañonla Jehová chaʼan tijicña mi lac lʌtʼ  jiñi wocol tac? Mi lac tajben i jacʼbal yaʼ ti libro chaʼan Isaías. Cabʌl profecía tsaʼ bʌ i tsʼijbu Isaías mucʼʌch i wen coltañonla jiñi i wiñiconbʌla Dios ti ili ora. Cheʼ jaʼel, cheʼ bʌ Isaías tsiʼ taja tac ti tʼan Jehová tsiʼ cʼʌñʌ tʼan tac mach bʌ wocolic ti chʼʌmbentel i sujm. Jumpʼejl ejemplo, yaʼ ti capítulo 30 miʼ cʼʌn utsʼatax bʌ lajiya tac chaʼan miʼ tsictesan bajcheʼ Jehová miʼ coltan i tejclum. Yaʼi miʼ yʌl chaʼan Jehová 1) miʼ wen ñʌchʼtan jiñi la coración yicʼot chaʼan mucʼʌch i jacʼ, 2) miʼ pʌsbeñonla jiñi bij yicʼot 3) miʼ yʌqʼueñonla bendición ti ili ora yicʼot ti talto bʌ qʼuin. Laʼ laj qʼuel ti jujumpʼejl ili uxchajp.

4. a) ¿Chuqui tsiʼ yʌlʌ Jehová tiʼ tojlel jiñi judíojob cheʼ tiʼ yorajlel Isaías, i chuqui tsiʼ yʌcʼʌ ti ujtel? b) ¿Chuqui tiʼ sube Jehová jiñi judíojob xucʼuloʼ bʌ? (Isaías 30:18, 19).

⁴ Tiʼ tejchibal Isaías capítulo 30, Jehová tiʼ sube jiñi judíojob: «Calobilob muʼ bʌ laʼ chañʼesan laʼ bʌ», i tsiʼ bej alʌ: «Mi laʼ pʼojlesan laʼ mul». I ti wiʼil tsiʼ yʌlʌ: «Tsʌtsob i pusicʼal» (Is. 30:1, 9). Tiʼ caj i ñusatʼañob, Isaías tsiʼ wʌn alʌ chaʼan Jehová mi caj i yʌcʼ ti tilel tsʌts bʌ wocol tiʼ tojlelob (Is. 30:5, 17; Jer. 25:8-11). I cheʼʌch tsaʼ ujti come jiñi babiloniojob tsiʼ chucuyob majlel. Pero añixto judíojob xucʼuloʼ bʌ, i jiñi xʼaltʼan Isaías tiʼ subeyob junchajp tsaʼ bʌ i yʌqʼueyob i pijtaya: Jehová ti jumpʼejl bʌ qʼuin mi caj i coltañob (pejcan Isaías 30:18, 19). I tsaʼʌch tsʼʌctiyi jiñi. Jehová tsiʼ coltayob loqʼuel ti Babilonia, pero mach ti orajic tsiʼ mele. Jiñi tʼan «lac Yum woli to i pijtañetla [...] chaʼan miʼ pʌsbeñetla i yutslel i pusicʼal» miʼ yʌcʼ ti ñaʼtʌntel chaʼan jalixto mi caj i ñumel chaʼan jiñi judíojob miʼ locʼsʌntelob ti Babilonia. Tsaʼ ñumi 70 jab jinto cheʼ bʌ Jehová tsiʼ colta ojlil judíojob chaʼan miʼ chaʼ majlelob ti Jerusalén (Is. 10:21; Jer. 29:10). Cheʼ bʌ tsaʼ chaʼ cʼotiyob tiʼ lumal, tsiʼ chaʼleyob uqʼuel chaʼañob i tijicñʌyel i mach chaʼañix i chʼijyemlelob cheʼ bajcheʼ cheʼ bʌ tsaʼ chujquiyob majlel ti Babilonia.

5. ¿Chuqui miʼ subeñonla Isaías 30:19?

⁵ Mucʼʌch i wen coltañonla jaʼel ili tʼan tac ti ili ora: «Mi caj i pʌsbeñetla i yutslel cheʼ miʼ yubin laʼ wuqʼuel» (Is. 30:19). Isaías miʼ yʌl chaʼan Jehová mi caj i ñʌchʼtan la coración yicʼot chaʼan ti ora mi caj i jacʼ. Jiñi xʼaltʼan tsiʼ bej alʌ: «Mi caj i jacʼbeñetla». Ili tʼan tac miʼ pʌsbeñonla chaʼan jiñi lac Tat mach yomic jach i coltañonla cheʼ bʌ mi laj cʼajtiben, yomʌch i mel tiʼ pejtelel i pusicʼal. ¿Mach ba muqʼuic i coltañonla chaʼan tijicña mi lac ñusan wocol tac cheʼ mi laj cʼajtesan iliyi?

6. ¿Bajcheʼ miʼ pʌs muʼ bʌ i yʌl Isaías chaʼan Jehová mucʼʌch i ñʌchʼtan jiñi oración muʼ bʌ i mel jujuntiquil i wiñic?

⁶ Ili versículo miʼ pʌsbeñonla chaʼan Jehová mucʼʌch i wen ñʌchʼtan jiñi la coración tac muʼ bʌ lac mel ti jujuntiquil. ¿Chucoch mi la cʌl iliyi? Tiʼ tejchibal majlel Isaías capítulo 30, Jehová tsiʼ pejca jiñi i tejclum bajcheʼ junmojtob. Pero ti jiñi tʼan tsaʼ bʌ tsʼijbunti jiñi Biblia ti wajali ti versículo 19 tsiʼ cʼʌñʌ jiñi tʼan «jatet». Ti hebreo ili yom i yʌl chaʼan woliʼ tajob ti tʼan ti jujuntiquilob. Cheʼ bʌ Isaías tiʼ tsʼijbu: «Jatet maʼañix mi caj a chʌn chaʼlen uqʼuel», «mi caj i pʌsbeñet i yutslel cheʼ miʼ yubin a wuqʼuel», «mi caj i jacʼbeñet» woliʼ taj ti tʼan chaʼan Jehová miʼ chʼʌmonla ti ñuc ti jujuntiquil. Jehová juntiquilʌch tatʌl yujil bʌ cʼuxbiya, cheʼ bʌ chʼijyem juntiquil i yalobil maʼañic miʼ suben: «Yom pʼʌtʌlet bajcheʼ a wermañu». I wentajonla ti jujuntiquil yicʼot miʼ ñʌchʼtan ti jujuntiquil la coración muʼ bʌ lac mel (Sal. 116:1; Is. 57:15).

7. ¿Bajcheʼ miʼ pʌs Isaías yicʼot Jesús chaʼan wen ñuc i cʼʌjñibal cheʼ mi lac chʌn chaʼlen oración?

⁷ Cheʼ bʌ an chuqui mi lac pensarin i mi lac suben Jehová ti oración, tajol miʼ ñaxan aqʼueñonla lac pʼʌtʌlel chaʼan mi laj cuch  jiñi wocol. I mi mach ti orajic miʼ jilel jiñi lac wocol cheʼ bajcheʼ la com, tajol miʼ mejlel lac wen cʼajtiben lac pʼʌtʌlel chaʼan miʼ mejlel laj cuch. Jiñʌch muʼ bʌ i subeñonla lac mel. Cheʼʌch miʼ yʌcʼ ti ñaʼtʌntel muʼ bʌ i yʌl Isaías: «Mach mi laʼ wʌqʼueñon j cʼaj co», ila woliʼ taj ti tʼan Jehová (Is. 62:6, 7). ¿Chuqui yom i yʌl iliyi? Chaʼan yomʌch mi lac chʌcʌ mel oración, lajal bajcheʼ maʼañic mi la cʌqʼuen i cʼaj i yo Jehová. Ili miʼ cʼajtesʌbeñonla tsaʼ bʌ i yʌlʌ Jesús chaʼan jiñi oración ti Lucas 11:8-10, 13. Tsiʼ cʼʌñʌ cabʌl lajiya chaʼan miʼ subeñonla chaʼan mi lac chʌn chaʼlen oración yicʼot mi lac bej cʼajtin jiñi chʼujul bʌ espíritu. Cheʼ jaʼel, miʼ mejlel laj cʼajtiben Jehová chaʼan miʼ coltañonla lac yajcan chuqui wem bʌ.

8. ¿Bajcheʼ tsaʼ tsʼʌctiyi muʼ bʌ i yʌl Isaías 30:20, 21?

⁸ (Pejcan Isaías 30:20, 21). Jiñi soldadojob chaʼan Babilonia jumpʼejl jab yicʼot ojlil tsiʼ joyoyob Jerusalén. Ti jimbʌ ora, jiñi judíojob tsiʼ wen ñusayob wocol. Pero yaʼ ti versículo 20 yicʼot 21, Jehová tiʼ subeyob chaʼan mi caj i coltañob mi mucʼʌch i chaʼ ñaʼtañob i bʌ yicʼot miʼ qʼuextañob i melbal (chaʼlibal). Isaías tsiʼ yʌlʌ chaʼan Jehová jiñʌch i Yaj cʌntesa i tejclum yicʼot chaʼan mi caj i pʌsbeñob bajcheʼ yom miʼ chʼujutesañob. Iliyi tsaʼʌch tsʼʌctiyi cheʼ bʌ jiñi judíojob tsaʼ locʼsʌntiyob ti Babilonia. Jehová tsiʼ pʌsʌ chaʼan jiñʌch jiñi Xyaj cʌntesa. Jiñi judíojob tsaʼʌch mejli i sʌqʼuesañob jiñi i sujm bʌ chʼujutesaya tiʼ coltaya Jehová. Ili ora, Jehová jiñʌch la caj cʌntesa jaʼel, i jiñi miʼ wen aqʼueñonla lac tijicñʌyel.

9. ¿Bajcheʼ junchajp miʼ cʌntesañonla Jehová ili ora?

⁹ Mi lac wen qʼuel ti ñuc cheʼ miʼ cʌntesañonla Jehová. Ti ili versículo tac, Isaías miʼ lajiñonla bajcheʼ alumnojob chaʼchajp bʌ bajcheʼ miʼ cʌntesʌntelob ti Jehová. Isaías tsiʼ ñaxan alʌ: «Mi caj laʼ qʼuel ti laʼ wut». Ti ili lajiya, jiñi xcʌntesa waʼal tiʼ tojel i wut i yalumnojob. ¿Bajcheʼ miʼ cʌntesañonla Jehová ili ora? Miʼ cʼʌn jiñi i yorganización. Mi lac wen qʼuel ti ñuc jiñi cʌntesa tac jamʌ tsiquil bʌ muʼ bʌ i yʌqʼueñonla i yorganización yaʼ ti tempa bʌ tac, ti asamblea, ti lac jun tac, ti JW Broadcasting^® yicʼot ti yan tac bʌ. Pejtelel iliyi miʼ coltañonla chaʼan maʼañic mi lac sʌt lac tijicñʌyel cheʼ bʌ mi lac ñusan tsʌts bʌ wocol tac.

10. ¿Bajcheʼ mi la cubiben i tʼan Jehová ti lac pat?

¹⁰ Isaías miʼ pʌs bajcheʼ yambʌ miʼ cʌntesañonla Jehová cheʼ bʌ tsiʼ yʌlʌ: «Mi caj laʼ wubin Tʼan ti laʼ pat muʼ bʌ i yʌl». Wʌle jiñi xʼaltʼan woliʼ taj ti tʼan Jehová bajcheʼ juntiquil xcʌntesa woli bʌ i xʌn majlel tiʼ pat i yalumnojob i woliʼ qʼuelob majlel yicʼot miʼ pʌsbeñob baqui yom miʼ majlelob. ¿Bajcheʼ mi la cubiben i tʼan  Jehová ti lac pat ili ora? Jiñʌch cheʼ bʌ mi lac pejcan jiñi Biblia. Yaʼʌch tsaʼ tsʼijbunti i tʼan Jehová ti wajali. Jin chaʼan, cheʼ bʌ mi lac pejcan lajal bajcheʼ woli la cubiben i tʼan Jehová ti lac pat (Is. 51:4).

11. ¿Chuqui yom mi lac mel chaʼan tijicña mi lac lʌtʼ jiñi wocol, i chucoch?

¹¹ ¿Chuqui yom mi lac mel chaʼan mi lac wen taj lac wenlel ti jiñi coltʌntel muʼ bʌ i yʌqʼueñonla Jehová tiʼ yorganización yicʼot tiʼ Tʼan? Isaías miʼ yʌl chaʼchajp. Ñaxan miʼ yʌl «Mach yaʼic yom. Wʌʼ jach an jini bij». I chaʼpʼejlel «Wʌʼ yom mi laʼ chaʼlen xʌmbal» (Is. 30:21). Jin chaʼan, mach jasʌlic cheʼ mi laj cʌn «jini bij», yomʌch mi lac chaʼlen xʌmbal yaʼi. Jiñi muʼ bʌ i subeñonla Jehová tiʼ Tʼan yicʼot jiñi i yorganización miʼ coltañonla lac ñaʼtan chuqui miʼ pijtan Jehová ti lac tojlel yicʼot bajcheʼ miʼ mejlel lac jacʼ jiñi muʼ bʌ i pʌsbeñonla. Yomʌch mi lac mel ili chaʼchajp chaʼan tijicñayonla mi lac melben i yeʼtel cheʼ bʌ mi lac ñusan wocol. Cheʼ jach bajcheʼ jiñi mi caj i yʌqʼueñonla i bendición.

12. Cheʼ bajcheʼ miʼ yʌl Isaías 30:23-26, ¿bajcheʼ tsiʼ yʌqʼue i bendición Jehová jiñi i tejclum?

¹² (Pejcan Isaías 30:23-26). ¿Bajcheʼ tsaʼ tsʼʌctiyi ti wajali ili profecía? Jiñi judíojob tsaʼ bʌ loqʼuiyob ti Babilonia i tsaʼ chaʼ sujtiyob majlel ti Israel tsiʼ tajayob cabʌl bendición. Jehová tsiʼ yʌqʼueyob cabʌl bʌlñʌcʼʌl. Pero anto yambʌ ñumen ñuc bʌ i cʼʌjñibal. Jehová tsiʼ ñumen aqʼueyob chʼujul bʌ bʌlñʌcʼʌl cheʼ bʌ tsaʼ caji i chʼujutesañob majlel ti wen. Jiñi i tejclum Dios ti jimbʌ ora tsiʼ taja cabʌl bendición, i maʼañic baʼ ujtem bajcheʼ jiñi. Cheʼ bajcheʼ miʼ yʌl jiñi versículo 26, Jehová tsiʼ yʌcʼʌ ti ñumen tsictiyel jiñi i sujmlel (Is. 60:2). Jiñi bendición tac tsiʼ colta jiñi tejclum chaʼan miʼ taj i tijicñʌyel yicʼot i pʼʌtʌlel chaʼan miʼ bej melben i yeʼtel Jehová. Tiʼ sujm, tsaʼʌch i wen ubiyob i tijicñʌyel (Is. 65:14).

13. ¿Bajcheʼ tsʼʌctiyem ili ora jiñi profecía chaʼan mi caj i tojʼan jiñi sʌc bʌ chʼujutesaya?

¹³ ¿Am ba tsʼʌctiyi ili ora jiñi profecía chaʼan bajcheʼ mi caj i chaʼ tojʼan jiñi sʌc bʌ chʼujutesaya? Añʌch. Cʼʌlʌl ti 1919, yonlel lac piʼʌlob tsaʼ loqʼuiyob yaʼ ti Ñuc bʌ Babilonia, jiñi mach bʌ i sujmic ñopbalʌl tac. Tiʼ pejtelelob tsaʼ pʌjyiyob majlel ti jumpʼejl Lum ñumen wem bʌ: Jiñi paraíso espiritual (Is. 51:3; 66:8). ¿Chuquiyes jiñi paraíso espiritual?

14. ¿Chuquiyes jiñi paraíso espiritual, i majqui chumulob yaʼi ti ili ora? (Qʼuele jiñi nota).

¹⁴ Cʼʌlʌl ti 1919, jiñi muʼ bʌ caj i majlelob ti panchan woliʼ yubiñob i tijicñʌyel ti jiñi  paraíso espiritual. b Ti wiʼil tsaʼ ochiyob jaʼel jiñi xñoptʼañob muʼ bʌ caj i chumtʌlob ila ti Lum, jiñi yambʌ tʌñʌmeʼ tac, i Jehová an i yʌqʼueyob cabʌl bendición (Juan 10:16; Is. 25:6; 65:13).

15. ¿Baqui an jiñi paraíso espiritual?

¹⁵ ¿Baqui an jiñi paraíso espiritual ili ora? Jiñi paraíso espiritual an tiʼ petol Pañimil come an i wiñicob Jehová tiʼ petol Pañimil. Jin chaʼan, mach yʌlʌyic baqui chumulonla, ti lac pejtelel mi lac mejlel ti ochel yaʼ ti paraíso espiritual mi mucʼʌch laj coltan jiñi i sujm bʌ chʼujutesaya tiʼ pejtelel laj cuxtʌlel.

16. ¿Chuqui yom mi lac mel chaʼan mi lac bej qʼuelben i yutsʼatlel jiñi paraíso espiritual?

¹⁶ Junchajp muʼ bʌ i mejlel lac mel chaʼan mi lac bej ajñel ti jiñi paraíso espiritual jiñʌch cheʼ mi lac bej qʼuel ti ñuc jiñi congregación. ¿Bajcheʼ mi lac mel iliyi? Jiñʌch cheʼ bʌ mi laj qʼuel chuqui wem bʌ tiʼ tojlel jiñi hermanojob i mach jiñic jiñi i sajtemalob (Juan 17:20, 21). ¿Chucoch wen ñuc i cʼʌjñibal mi lac mel iliyi? Laʼcu lac ñaʼtan ili lajiya. Ti mateʼel cabʌl teʼ tac. Cheʼʌch jaʼel yaʼ ti paraíso espiritual yaʼ ti congregación tac, an cabʌl hermanojob mach bʌ junlajalobic (Is. 44:4; 61:3). Mach la cʌcʼ chaʼan jiñi i sajtemal jiñi «teʼ tac» am bʌ ti lac tʼejl miʼ mʌctañonla chaʼan mi laj qʼuelben i yutsʼatlel. Ili yom i yʌl chaʼan mach yomic mi la cʌcʼ chaʼan jiñi lac sajtemal o i sajtemal jiñi hermanojob ti congregación miʼ mʌctañonla laj qʼuelben i yutsʼatlel yicʼot bajcheʼ juntemel jiñi congregación tiʼ petol pañimil (mulawil).

17. ¿Chuqui miʼ mejlel lac mel ti jujuntiquilonla chaʼan ñumen juntemelonla yaʼ ti congregación?

¹⁷ ¿Chuqui miʼ mejlel lac mel ti jujuntiquilonla chaʼan ñumen temelonla? Mi lac chaʼlen wersa lac sʌclan ñʌchʼtʌlel (Mat. 5:9; Rom. 12:18). Jajayajl mi lac chaʼlen wersa chaʼan wen mi la cajñel la quicʼotob jiñi hermanojob ti congregación, woli lac ñumen utsʼatesan jiñi paraíso espiritual. Cʼajal lac chaʼan chaʼan Jehová jiñʌch tsaʼ bʌ i pʌyʌyonla ochel ti lac pejtelel ti jiñi sʌc bʌ chʼujutesaya yaʼ ti paraíso espiritual (Juan 6:44). Wen tijicña miʼ yubin cheʼ miʼ qʼuel chaʼan mi lac chaʼlen  wersa chaʼan ñumen an ñʌchʼtʌlel yicʼot juntemelonla, come miʼ wen qʼuel ti ñuc i wiñicob (Is. 26:3; Ageo 2:7, TNM).

18. ¿Chuqui jiñi yom bʌ mi lac wen ñaʼtan, i chucoch?

¹⁸ ¿Chuqui miʼ mejlel lac mel chaʼan mi lac ñumen ñusan lac bʌ ti jiñi bendición tac muʼ bʌ i yʌqʼueñonla Jehová? Laʼ lac wen ñaʼtan chuqui tac mi laj cʌn yaʼ tiʼ Tʼan Dios yicʼot ti lac jun tac. Cheʼ bʌ mi lac chaʼlen estudio yicʼot mi lac wen ñaʼtan muʼ bʌ laj cʌn, mi caj lac taj melbalʌl tac muʼ bʌ caj i coltañonla lac pʌs jiñi cʼuxbiya cheʼ bʌ bajcheʼ ti jumpʼejl familia (Rom. 12:10). Cheʼ bʌ mi lac wen ñaʼtan jiñi bendición tac am bʌ lac chaʼan ili ora, mi lac ñumen lʌcʼtesan lac bʌ ti Jehová. I cheʼ bʌ mi lac wen ñaʼtan jiñi bendición tac muʼ bʌ caj i yʌqʼueñonla Jehová ti talto bʌ qʼuin, chʌn cuxul mi caj i yajñel ti lac pusicʼal jiñi lac pijtaya chaʼan mi caj lac melben i yeʼtel tiʼ pejtelel ora. Pejtelel iliyi mi caj i coltañonla chaʼan ñumen tijicñayonla mi lac melben i yeʼtel Jehová.

19. a) Cheʼ bajcheʼ miʼ yʌl Isaías 30:18, ¿chuqui miʼ mejlel lac ñop? b) ¿Chuqui mi caj i coltañonla chaʼan tijicña mi laj cuch jiñi wocol tac?

¹⁹ Jehová mi caj i coltañonla cheʼ bʌ miʼ jisan ili jontol bʌ pañimil (Is. 30:18). La cujil chaʼan maʼañic mi caj i chʌn acʼ ti ajñel Satanás ila ti pañimil mi jumpʼejlic qʼuin come «tojʌch lac Yum Dios» (Is. 25:9). Jehová yicʼot joñonla woli lac chʌn pijtan jiñi laj coltʌntel. Pero wʌle la com lac chʌn qʼuel ti ñuc cheʼ miʼ mejlel lac melben oración, cheʼ mi lac pejcʌben i Tʼan, mi lac jacʼ chuqui mi laj cʌn yicʼot mi lac wen ñaʼtan jiñi bendición tac tajbil bʌ lac chaʼan. Mi mucʼʌch lac bej mel iliyi, Jehová mi caj i coltañonla chaʼan tijicña mi lac bej melben i yeʼtel yicʼot chaʼan mi laj cuch jiñi wocol tac.