1. ¿Bajcheʼ la cujil chaʼan Jehová lʌcʼʌl yom ajñel ti lac tojlel?

 JEHOVÁ miʼ subeñonla chaʼan lʌcʼʌl mi la cajñel tiʼ tojlel (Sant. 4:8). Yom sujtel ti lac Dios, ti lac Tat yicʼot ti la camigo. Miʼ jacʼ jiñi la coración tac yicʼot miʼ coltañonla cheʼ bʌ an lac wocol. Cheʼ jaʼel, miʼ cʼʌn jiñi i yorganización chaʼan miʼ cʌntesañonla yicʼot miʼ cʌntañonla. Pero, ¿chuqui yom mi lac mel (chaʼlen) chaʼan lʌcʼʌl mi la cajñel tiʼ tojlel?

2. ¿Bajcheʼ miʼ mejlel lac lʌcʼtesan lac bʌ ti Jehová?

² Mi lac lʌcʼtesan lac bʌ ti Jehová cheʼ bʌ mi lac pejcan ti oración, mi lac pejcʌben i Tʼan yicʼot mi lac wen ñaʼtan muʼ bʌ i yʌl. Iliyi miʼ coltañonla chaʼan mi laj cʼuxbin yicʼot mi laj qʼuel ti ñuc muʼ bʌ i mel ti lac tojlel. Mi caj lac mulan lac jacʼben i tʼan yicʼot la cʌqʼuen i ñuclel (Apoc. 4:11). Cheʼ bʌ mi lac ñumen cʌn Jehová, mi caj lac ñumen ñop tiʼ tojlel yicʼot ti jiñi i yorganización am bʌ i yʌcʼʌ chaʼan miʼ cʌntañonla.

3. a) ¿Bajcheʼ miʼ ñop i ñajtʼesañonla ti Jehová jiñi Diablo? b) ¿Chuqui yom an lac chaʼan chaʼan maʼañic baʼ ora mi laj cʌy Dios yicʼot i yorganización? (Salmo 31:13, 14).

³ Pero jiñi Diablo miʼ ñop i ñajtʼesañonla ti Jehová, ñumento  cheʼ bʌ an lac wocol. ¿Bajcheʼ miʼ mel? Cʼunteʼ cʼunteʼ miʼ ñop i yʌqʼueñonla laj cʌy lac ñop ti Jehová yicʼot tiʼ yorganización. Pero miʼ mejlel lac mʌlben (jotben). Mi mucʼʌch lac wen ñop Jehová, maʼañic mi caj laj cʌy i mi jiñicto jiñi i yorganización (pejcan Salmo 31:13, 14).

4. ¿Chuqui mi caj lac taj ti tʼan ti ili estudio?

⁴ Ti ili estudio mi caj lac taj ti tʼan uxchajp wocol mach bʌ yaʼic miʼ yujtel ti congregación muʼ bʌ i mejlel i yʌqʼueñonla laj cʌy lac ñop Jehová yicʼot jiñi i yorganización. ¿Bajcheʼ miʼ mejlel i ñajtʼesañonla ti Dios ili uxchajp? I ¿chuqui miʼ mejlel lac mel chaʼan mi la cʌcʼ lac bʌ tiʼ contra Satanás?

5. ¿Bajcheʼ miʼ mejlel i yʌqʼueñonla laj cʌy lac ñop ti Jehová yicʼot ti jiñi i yorganización jiñi wocol tac?

⁵ Tajol mi lac taj lac tsʼaʼlentel ti lac familia o mi lac sʌt la queʼtel (lac troñel). ¿Bajcheʼ miʼ mejlel i yʌqʼueñonla lac ñajtʼesan lac bʌ ti Jehová yicʼot laj cʌy lac ñop tiʼ yorganización ili wocol tac? Cheʼ bʌ jal mi lac ñusan jumpʼejl wocol, tajol mi lac ñaʼtan chaʼan maʼañix mi caj i tojʼan i mi la cubin lac chʼijyemlel. Satanás miʼ cʼʌn iliyi chaʼan mi laj cʌy lac ñop chaʼan miʼ cʼuxbiñonla Jehová. Yom chaʼan mi lac tech laj cʼajtiben lac bʌ mi jiñi woli (choncol) bʌ lac ñusan i mul Jehová o jiñi i yorganización. Lʌcʼʌ cheʼʌch tsaʼ ujti tiʼ tojlel jiñi israelitajob yaʼ bʌ añob ti Egipto. Ti ñaxan tsaʼʌch i ñopoyob chaʼan Jehová tsiʼ yajca Moisés yicʼot Aarón chaʼan miʼ locʼsañob ti Egipto (Éx. 4:29-31). Pero cheʼ bʌ jiñi faraón tsaʼ caji i ñumen ticʼlañob tsiʼ yʌqʼueyob tiʼ mul Moisés yicʼot Aarón, i tsiʼ yʌlʌyob: «Tsaʼix laʼ wʌcʼʌyon lojon ti tsʼaʼlentel tiʼ tojlel Faraón yicʼot tiʼ tojlel c piʼʌlob lojon. Tsaʼix a techbe i michʼajel Faraón chaʼan miʼ tsʌnsañon lojon» (Éx. 5:19-21). ¡Mach weñic cheʼ bʌ tsiʼ yʌqʼueyob tiʼ mul ili xucʼul bʌ i wiñicob Dios! ¿Chuqui miʼ mejlel a mel chaʼan maʼ bej ñop ti Jehová yicʼot tiʼ yorganización mi añix ora cajel a ñusan wocol?

6. ¿Chuqui mi laj cʌn tiʼ tojlel Habacuc? (Habacuc 3:17-19).

⁶ Jamben a pusicʼal Jehová yicʼot coltan a bʌ tiʼ tojlel. Jiñi xʼaltʼan Habacuc tsiʼ wen ñusa wocol. Tsaʼto i ñaʼta chaʼan Jehová mach i wentajic. Jin chaʼan, tiʼ sube bajcheʼ yubil miʼ yubin i bʌ. Tsiʼ yʌlʌ: «¿Jaypʼejl to ora yom mic pejcañet c Yum, jinto maʼ wubibeñon c tʼan? […] ¿Chucoch maʼ wʌqʼueñon j qʼuel [...] i maña winicob?» (Hab. 1:2, 3). Jehová tsaʼʌch i jacʼbe i yoración (Hab. 2:2, 3). Habacuc tsiʼ chaʼ taja i tijicñʌyel cheʼ bʌ tsiʼ wen ñaʼta bajcheʼ Jehová an i colta i tejclum. Tsiʼ ñopo chaʼan Jehová i wentajʌch yicʼot chaʼan mi caj i coltan i cuch baqui jach bʌ wocol (pejcan Habacuc 3:17-19). ¿Chuqui mi laj cʌn? Cheʼ bʌ an a wocol, pejcan Jehová ti oración, suben bajcheʼ yubil maʼ wubin a bʌ i coltan a bʌ tiʼ tojlel. Jehová mucʼʌch caj i yʌqʼueñet a pʼʌtʌlel chaʼan maʼ cuch jiñi wocol. I mi caj a ñumen ñop tiʼ tojlel cheʼ bʌ maʼ qʼuel bajcheʼ miʼ coltañet.

7. ¿Chuqui tsiʼ ñopo i mel juntiquil i familia Shirley, i chuqui tsiʼ colta chaʼan miʼ chʌn ñop ti Jehová?

⁷ Mach a cʌy a melben i yeʼtel Jehová. Ili jiñʌch tsaʼ bʌ i colta juntiquil hermana i cʼabaʼ Shirley chʼoyol bʌ ti Papúa Nueva Guinea cheʼ bʌ tsiʼ ñusa wocol tac. b Pʼumpʼun jiñi i familia, i an i tajol wocol miʼ tajob chuqui miʼ cʼuxob. Juntiquil i familia tsiʼ ñopo i yʌqʼuen i cʌy i ñop ti Jehová, tiʼ sube: «Maʼ wʌl chaʼan jiñi i chʼujul bʌ i yespíritu Dios woli (yʌquel) i coltañet. Pero ¿baqui an jiñi a coltʌntel? Bej pʼumpʼuñettola. Woli jach a sʌt a tiempo  ti subtʼan». Shirley miʼ yʌl chaʼan tsaʼ cʼoti i yorajlel i tsiʼ cʼajtibe i bʌ mi Jehová cʼajalixto i chaʼañob. Miʼ yʌl: «Ti ora tsaʼ c pejca Jehová ti oración i tsaʼ c sube chuqui an tic pusicʼal. Tsaʼ c bej pejca jiñi Biblia yicʼot jiñi lac jun tac, maʼañic tsaʼ j cʌyʌ subtʼan yicʼot jiñi tempa bʌ». Shirley tsiʼ qʼuele chaʼan Jehová wolʌch i cʌntʌben i familia come maʼañic miʼ ñusañob wiʼñal yicʼot tijicñayob. Miʼ yʌl: «Tsaʼ j qʼuele chaʼan Jehová tsaʼʌch i jacʼʌ coración tac» (1 Tim. 6:6-8). Mi jatet mucʼʌch a chʌn melben i yeʼtel Jehová, jiñi wocol tac maʼañic mi caj i ñajtʼesañet tiʼ tojlel.

8. ¿Chuqui miʼ mejlel ti ujtel tiʼ tojlel jiñi hermanojob waʼchocobiloʼ bʌ yaʼ ti organización?

⁸ Jiñi laj contrajob miʼ cʼʌñob jiñi televisión, jiñi radio yicʼot jiñi internet chaʼan miʼ pucob lot tac tiʼ tojlel jiñi hermanojob waʼchocobiloʼ bʌ tiʼ yorganización Jehová (Sal. 31:13). An hermanojob am bʌ otsʌntiyob ti cárcel i miʼ yʌjlel chaʼan jontolob (simaroñob). Cheʼʌch tsaʼ ujti jaʼel ti jiñi ñaxam bʌ siglo. Jiñi apóstol Pablo tsaʼ jopʼbenti i mul i tsaʼ otsʌnti ti cárcel. ¿Chuqui tsiʼ meleyob jiñi xñoptʼañob ti jimbʌ ora?

9. ¿Chuqui tsiʼ meleyob chaʼtiqui uxtiquil xñoptʼañob cheʼ bʌ jiñi apóstol Pablo tsaʼ otsʌnti ti cárcel?

⁹ Cheʼ bʌ jiñi apóstol Pablo tsaʼ otsʌnti ti cárcel ti Roma, an xñoptʼañob tsaʼ bʌ i cʌyʌyob (2 Tim. 1:8, 15). ¿Tsaʼ ba i yubiyob quisin tiʼ caj Pablo tsaʼ qʼuejli bajcheʼ juntiquil jontol bʌ wiñic? (2 Tim. 2:8, 9). ¿O tsaʼ ba i bʌcʼñayob chaʼan miʼ ticʼlʌntelob jaʼel? Mach la cujilic, pero Pablo mach tijicñayic tsiʼ yubi i bʌ. Tsiʼ wen cuchu cabʌl wocol i colelto i yʌcʼ i bʌ ti chʌmel (sajtel) tiʼ cajob (Hech. 20:18-21; 2 Cor. 1:8). Mach yomic lajalonla bajcheʼ ili xñoptʼañob tsaʼ bʌ i cʌyʌyob Pablo cheʼ bʌ yom coltʌntel. ¿Chuqui yom mi laj cʼajtesan cheʼ bʌ miʼ ticʼlʌntel jiñi hermanojob waʼchocobiloʼ bʌ?

10. ¿Chuqui yom mi laj cʼajtesan cheʼ bʌ miʼ ticʼlʌntel jiñi hermanojob waʼchocobiloʼ bʌ, i chucoch?

 ¹⁰ Cʼajtesan chucoch mi lac ticʼlʌntel yicʼot majqui woliʼ mel jiñi. Ti 2 Timoteo 3:12 miʼ yʌl: «Jiñi yomoʼ bʌ i chʼujutesañob Dios tiʼ cuxtʌlel bajcheʼ xcʌntʼañob i chaʼan Cristo Jesús mi caj i ticʼlʌntelob jaʼel». Jin chaʼan, maʼañic miʼ toj sajtel lac pusicʼal cheʼ Satanás miʼ ticʼlañob jiñi hermanojob waʼchocobiloʼ bʌ. Yom chaʼan miʼ cʌy i melbeñob i yeʼtel Jehová yicʼot chaʼan mi lac chaʼlen bʌqʼuen (1 Ped. 5:8).

11. ¿Chuqui mi laj cʌn tiʼ tojlel Onesíforo? (2 Timoteo 1:16-18).

¹¹ Chʌn pʌsben a xucʼtʌlel jiñi hermanojob waʼchocobiloʼ bʌ (pejcan 2 Timoteo 1:16-18). Ti ñaxam bʌ siglo, juntiquil xñoptʼan tsaʼʌch i mele chuqui wem bʌ tiʼ tojlel Pablo cheʼ bʌ an ti cárcel. Jiñʌch Onesíforo. Pablo tsiʼ yʌlʌ tiʼ tojlel: «Maʼañic tsiʼ quisñi i bʌ tiʼ caj cʌchʌlon ti cadena». Onesíforo tsiʼ chaʼle wersa chaʼan miʼ taj Pablo i cheʼ bʌ tsiʼ taja, tsiʼ colta. ¡Colelto i yʌcʼ i bʌ ti chʌmel tiʼ caj! ¿Chuqui mi laj cʌn? Mach a wʌcʼ chaʼan jiñi bʌqʼuen miʼ mʌctañet chaʼan maʼ coltan jiñi hermanojob woli bʌ i lʌtʼob i ticʼlʌntel. Chaʼlen wersa chaʼan maʼ coltañob (Pr. 17:17). Yomob chaʼan mi lac pʌsbeñob cʼuxbiya yicʼot chaʼan mi laj coltañob.

12. ¿Chuqui mi laj cʌn tiʼ tojlel jiñi hermanojob ti Rusia?

¹² Ñaʼtancu chuqui miʼ melob jiñi hermanojob ti Rusia cheʼ bʌ jiñi yambʌ hermanojob miʼ yotsʌntelob ti cárcel. Cheʼ bʌ an muʼ bʌ i cajelob ti meloñel, cabʌl hermanojob miʼ majlelob ti meloñibʌl chaʼan miʼ pʌsbeñob chaʼan mach i bajñelobic jach. ¿Chuqui mi laj cʌn? Mach a chaʼlen bʌqʼuen mi jiñi hermanojob waʼchocobiloʼ bʌ miʼ jopʼbentelob i mul, miʼ chujquelob majlel ti cárcel o miʼ ticʼlʌntelob. Tajayob ti tʼan ti a woración, cʌntʌbeñob i familia i qʼuele bajcheʼ miʼ mejlel a coltañob (Hech. 12:5; 2 Cor. 1:10, 11).

13. ¿Bajcheʼ miʼ mejlel i yʌqʼueñonla laj cʌy lac ñop ti Jehová yicʼot tiʼ yorganización jiñi lac wajlentel?

¹³ Tajol an lac familia o lac piʼʌlob ti eʼtel muʼ bʌ i wajleñoñobla come mi lac chaʼlen subtʼan o mi lac jacʼ muʼ bʌ i yʌl jiñi Biblia (1 Ped. 4:4). Tajol miʼ subeñoñobla: «Mic mulan bajcheʼ yilalet, pero ñumeñix ti pʼis jiñi a ñopbal». Tajol miʼ yʌloñobla tiʼ caj bajcheʼ yilalonla tiʼ tojlel jiñi expulsadojoʼ bʌ i miʼ subeñoñobla: «¿Bajcheʼ miʼ mejlel a wʌl chaʼan maʼ cʼuxbin jiñi lac piʼʌlob?». Cheʼ mi lac subentel bajcheʼ iliyi miʼ mejlel i yotsan lac duda i mi laj cʼajtiben lac bʌ: «¿Ñumeñix ba ti pʼis chuqui miʼ cʼajtin Jehová tic tojlel? ¿I ñoj tsʌts ba jiñi i yorganización?». Mi cheʼ woli a ñusan bajcheʼ iliyi, ¿chuqui miʼ mejlel a mel chaʼan maʼañic maʼ ñajtʼesan a bʌ ti Jehová yicʼot tiʼ yorganización?

14. ¿Chuqui yom mi lac mel cheʼ bʌ mi lac wajlentel tiʼ caj mi lac jacʼben i mandar tac Jehová? (Salmo 119:50-52).

¹⁴ Coltʌben jiñi i mandar tac Jehová. Job tsaʼʌch i coltʌbe jiñi i mandar tac Jehová anquese tsaʼ wajlenti. Juntiquil poj i yamigo bʌ tiʼ sube chaʼan Dios mach i wentajic mi Job miʼ qʼuelben ti ñuc i mandar o maʼañic (Job 4:17, 18; 22:3). Pero Job maʼañic tsiʼ ñopo ili lot tac. Yujil chaʼan weñʌch jiñi i mandar tac Jehová chaʼan jiñi chuqui wem bʌ yicʼot jiñi mach bʌ weñic, i tsaʼʌch i colta. Maʼañic tsiʼ cʌyʌ i pʌs i xucʼtʌlel tiʼ caj jiñi yambʌlob (Job 27:5, 6). ¿Chuqui mi laj cʌn? Mach a wʌcʼ chaʼan jiñi wajlentel miʼ yʌqʼueñet a ñaʼtan chaʼan mach weñic jiñi i mandar tac Jehová. Ñaʼtancu bajcheʼ yilal añet cheʼ wolʌch a jacʼ. ¿Mach ba qʼuelbil a chaʼan i wenlel? Coltan  jiñi organización muʼ bʌ i jacʼ ili mandar tac. Cheʼ bajcheʼ jiñi, maʼañic mi caj a ñajtʼesan a bʌ ti Jehová anquese maʼ wajlentel (pejcan Salmo 119:50-52).

15. ¿Chucoch Brizit tsaʼ wen wajlenti tiʼ familia?

¹⁵ Laʼ laj qʼuel tsaʼ bʌ ujti tiʼ tojlel Brizit, juntiquil hermana ti India. Tsiʼ taja i wajlentel tiʼ familia come Testigo. Tsiʼ chʼʌmʌ jaʼ ti 1997 i cheʼ jiñi, jiñi i ñoxiʼal, mach bʌ Testigojic, tiʼ sʌtʌ i yeʼtel. Jin chaʼan, jiñi i ñoxiʼal tsiʼ yʌlʌ chaʼan mi caj i majlelob ti chumtʌl tiʼ yotot i papá i mamá, chumuloʼ bʌ ti yambʌ tejclum. Pero Brizit tsaʼ caji i ñusan yan tac bʌ wocol. Tsaʼ caji ti tsʌts bʌ eʼtel chaʼan miʼ mʌcʼlan i familia come jiñi i ñoxiʼal bej maxto añic i yeʼtel. I jiñi congregación ñumen lʌcʼʌl bʌ an cʌylemto 350 kilómetro i ñajtlel. Pero jiñi i familia i ñoxiʼal tsiʼ yʌcʼʌyob i bʌ tiʼ contra tiʼ caj Testigo. Tsaʼto ñumen tsʌtsʼa jiñi wocol, jin chaʼan Brizit yicʼot i familia tiʼ sʌclayob yambʌ baqui miʼ majlelob ti chumtʌl. Pero an chuqui tsaʼ ujti: Jiñi i ñoxiʼal tsaʼ chʌmi. Cheʼ jiñi, juntiquil i yixicʼal am bʌ 12 i jabilel tsaʼ chʌmi tiʼ caj cáncer. Cheʼto jaʼel, jiñi i familia Brizit tsiʼ yʌqʼue tiʼ mul pejtelel jiñi wocol. Tiʼ subeyob chaʼan cheʼ machic tsaʼ sujti tiʼ testigo Jehová maʼañic tsiʼ taja pejtelel jiñi wocol. Pero Brizit tsiʼ chʌn ñopo ti Jehová i chʌn lʌcʼʌl tsaʼ ajñi tiʼ yorganización.

16. ¿Chuqui ti bendición tac tsiʼ taja Brizit cheʼ chʌn lʌcʼʌl tsaʼ ajñi ti Jehová yicʼot tiʼ yorganización?

¹⁶ Jiñi congregación wen ñajt an baqui chumul Brizit, jin chaʼan juntiquil superintendente chaʼan circuito tiʼ sube chaʼan miʼ chaʼlen subtʼan yaʼ baqui chumul yicʼot miʼ mel jiñi tempa bʌ tac tiʼ yotot. Ti ñaxan tsiʼ ñaʼta chaʼan mach mejlic i mel jiñi. Pero tsaʼʌch i jacʼʌ jiñi tsaʼ bʌ i sube jiñi superintendente, tsaʼ caji ti subtʼan, tsaʼ caji i mel jiñi tempa bʌ tac tiʼ yotot yicʼot jiñi chʼujutesaya ti familia yicʼotob i yixicʼal. ¿Chuqui tsaʼ ujti? Brizit tsaʼ caji i yʌcʼ cabʌl estudio, i cabʌl tsaʼ bʌ i chʼʌmʌyob jaʼ. I cheʼ ti 2005 tsaʼ sujti  ti precursora regular. Jehová tsaʼʌch i yʌqʼue i bendición come tsiʼ ñopo tiʼ tojlel yicʼot tsiʼ pʌsʌ i xucʼtʌlel tiʼ yorganización. Jiñi i yixicʼalob woliʼ melbeñob i yeʼtel Jehová, i ili ora añix chaʼpʼejl congregación yaʼ baqui chumul. Brizit yujil chaʼan jiñʌch Jehová tsaʼ bʌ i yʌqʼue i pʼʌtʌlel chaʼan miʼ cuch jiñi wocol tac yicʼot i wajlentel tiʼ familia.

17. ¿Chuqui yom mi lac mel?

¹⁷ Satanás yom chaʼan mi lac ñaʼtan chaʼan Jehová miʼ cʌyonla cheʼ bʌ mi lac ñusan wocol tac yicʼot chaʼan cheʼ mi laj coltʌben jiñi i yorganización mucʼ jach lac ñumen taj wocol. Cheʼ jaʼel, yom i yotsan lac bʌqʼuen cheʼ bʌ miʼ jopʼbentel i mul, miʼ ticʼlʌntel o miʼ yotsʌntel ti cárcel jiñi hermanojob waʼchocobiloʼ bʌ. I miʼ cʼʌn jiñi wajleya chaʼan miʼ yʌqʼueñonla laj cʌy lac ñop jiñi i mandar tac Jehová yicʼot ti jiñi i yorganización. Pero joñonla laj cʌñʌyix chuqui tac miʼ cʼʌn i maʼañic mi la cʌcʼ lac bʌ ti lotintel (2 Cor. 2:11). Mach lac jacʼ jiñi i lot tac, laʼ lac chʌn pʌs lac xucʼtʌlel ti Jehová yicʼot tiʼ yorganización. Laʼ laj cʼajtesan chaʼan Jehová maʼañic baʼ ora mi caj i cʌyonla (Sal. 28:7). Jin chaʼan, ¡mach la cʌcʼ chaʼan an chuqui miʼ ñajtʼesañonla ti Jehová! (Rom. 8:35-39).

18. ¿Chuqui mi caj laj qʼuel ti jiñi yambʌ estudio?

¹⁸ Ti ili estudio tsaʼ lac taja ti tʼan wocol tac mach bʌ yaʼic miʼ yujtel yaʼ ti congregación i muʼ bʌ i mejlel i yʌqʼueñonla laj cʌy lac ñop ti Jehová yicʼot tiʼ yorganización. Pero yaʼ ti congregación mi lac taj yan tac bʌ wocol jaʼel. ¿Bajcheʼ miʼ mejlel lac lʌtʼ? Ti jiñi yambʌ estudio mi caj laj qʼuel.