1. ¿Bajcheʼ miʼ coltañonla laj qʼuel 2 Corintios 3:1-3, chaʼan wen ñucʌch bʌ eʼtel cheʼ bʌ mi laj coltan juntiquil quixtañu chaʼan cʼotel i chʼʌmjaʼ? (Qʼuele jiñi foto am bʌ tiʼ tejchibal).

¿BAJCHEʼ yubil mi la cubin cheʼ bʌ juntiquil woli (choncol) bʌ ti estudio miʼ chʼʌmeʼ jaʼ? Wen tijicñayʌch mi la cubin lac bʌ (Mt. 28:19). I mi joñonla tsaʼ bʌ la cʌqʼue estudio, ñumento mi la cubin lac tijicñʌyel (1 Ts. 2:19, 20). Jiñi xcʌntʼañob tsaʼ jaxto bʌ i chʼʌmʌyob jaʼ lajalob bajcheʼ jun muʼ bʌ i yʌcʼ ti cʌjñel chuqui wen tiʼ tojlel jiñi tsaʼ bʌ i cʌntesa yicʼot jiñi congregación (pejcan 2 Corintios 3:1-3).

2. a) ¿Chuqui ñuc bʌ cʼajtiya yom mi lac melben lac bʌ, i chucoch? b) ¿Chuquiyes jumpʼejl estudio loqʼuem bʌ ti Biblia? (Qʼuele jiñi nota).

² Wen tijicña mi la cubin cheʼ bʌ ti jiñi chʌmpʼejl jab ñumen bʌ tilel woli (yʌquel) i yʌjqʼuel 10 millón estudio tac * tiʼ pejtelel pañimil i ti jiñi chʌmpʼejl jab 280 mil wiñicob xʼixicob (quixtañujob) tsiʼ chʼʌmʌyob jaʼ ti jujumpʼejl jab. Cheʼ bajcheʼ mi laj qʼuel cʌylemto cabʌl woli bʌ i yʌqʼuentelob estudio mejl bʌ i chʼʌmob jaʼ. ¿Bajcheʼ miʼ mejlel laj coltañob? Jehová yujilʌch pijt, i woliʼ yʌcʼ chaʼan jiñi quixtañujob mejlto i sujtelob ti xcʌntʼan i chaʼan Cristo. Mach wen cabʌlix i yorajlel cʌylem. Jin chaʼan, la com lac chaʼlen wersa laj coltañob cheʼ bajcheʼ cʼamel miʼ mejlel lac mel chaʼan miʼ colelob tiʼ chaʼan bʌ Dios yicʼot chaʼan miʼ cʼotel i chʼʌmob jaʼ (1 Co. 7:29a, TNM; 1 P. 4:7).

3. ¿Chuqui mi caj i qʼuejlel ti ili estudio?

³ Jiñi Junmojt muʼ bʌ i pʌsob bij, tsiʼ cʼajtiyob yaʼ ti sucursal tac chuqui yom miʼ mejlel chaʼan jiñi woli bʌ i chʼʌmob  estudio miʼ mejlel i cʼotel i chʼʌmob jaʼ. Ti ili estudio yicʼot ti jiñi yambʌ, miʼ cajel laj qʼuel chuqui miʼ mejlel laj cʌn tiʼ tojlel jiñi superintendentejob i chaʼan circuito, misionerojob yicʼot precursorob añoʼ bʌ cabʌl i ñaʼtʌbal (Pr. 11:14; 15:22). * Jiñi tsaʼ bʌ i yʌlʌyob miʼ pʌsbeñonla chuqui yom miʼ melob (chaʼleñob) jiñi xcʌntesajob yicʼot jiñi woli bʌ i chʼʌmob estudio chaʼan miʼ tajob i wenlel. Ti ili estudio, miʼ cajel i qʼuejlel joʼchajp chuqui yom miʼ melob jiñi woli bʌ i chʼʌmob estudio chaʼan miʼ cʼotel i chʼʌmob jaʼ i chuqui yom mi lac mel jiñi xcʌntesajonbʌla chaʼan mi laj coltañob.

4. ¿Chucoch jiñi quixtañu maʼañic mi caj i colel tiʼ chaʼan bʌ Dios mi yaʼ jach miʼ chaʼlen estudio tiʼ tiʼ i yotot?

⁴ Cabʌl hermanojob miʼ yʌcʼob estudio tiʼ tiʼ i yotot juntiquil quixtañu. Iliyi weñʌch chaʼan jiñi quixtañu miʼ tech i mulan i cʌn jiñi am bʌ ti Biblia, pero maʼañic mi lac wen jalʼan ti tʼan yicʼotob, i tajol mach tiʼ pejtelelic semana miʼ mejlel ti estudio. An hermanojob muʼ bʌ i cʼajtibeñob i número jiñi quixtañu chaʼan miʼ mejlel i pejcañob ti wiʼil o miʼ chocbeñob majlel jumpʼejl mensaje chaʼan miʼ bej subeñob majlel i chaʼan bʌ Biblia, * i cheʼ bajcheʼ iliyi miʼ mejlel i coltañob. Miʼ mejlel ti ñumel cabʌl uw, i jiñi woli bʌ i chʼʌm estudio maʼañic miʼ colel tiʼ chaʼan bʌ Dios. Yom mi lac chʼʌmben i sujm chaʼan maʼañic mi caj i mejlel i cʼotel i yʌqʼuen i cuxtʌlel Dios yicʼot i chʼʌmeʼ jaʼ mi maʼañic miʼ yʌqʼuen i yorajlel yicʼot miʼ chaʼlen wersa i pejcʌben i Tʼan Dios.

5. ¿Chuqui tsiʼ yʌlʌ Jesús ti Lucas 14:27-33, chaʼan miʼ coltañonla tiʼ tojlel jiñi muʼ bʌ la cʌqʼueñob estudio?

⁵ Ti jumpʼejl bʌ qʼuin, Jesús tsiʼ yʌlʌ chaʼpʼejl ejemplo chaʼan mi cʌntesan chuqui yom miʼ mel juntiquil quixtañu chaʼan miʼ sujtel ti xcʌntʼan i chaʼan. Tsiʼ taja ti tʼan juntiquil quixtañu yom bʌ i mel chan bʌ qʼueloñib yicʼot juntiquil rey muʼ bʌ caj i majlel ti guerra yicʼot i contra. Tsiʼ yʌlʌ chaʼan jiñi yom bʌ i mel jiñi chan bʌ qʼueloñib, ñaxan yom «miʼ buchtʌl i tsicben i tojol chaʼan miʼ ñaʼtan mi jasʌl i taqʼuin chaʼan miʼ yujtel i mel». Yicʼot chaʼan jiñi rey ñaxan yom miʼ buchtʌl i ñaʼtan mi mucʼʌch caj i mʌjlel i chaʼan jiñi i soldadojob (pejcan Lucas 14:27-33). Jesús yujil chaʼan jiñi quixtañujob ñaxan yom miʼ wen ñaʼtañob chuqui yom miʼ melob chaʼan miʼ mejlelob ti sujtel ti xcʌntʼañob i chaʼan. Chaʼan miʼ mejlel i melob  cheʼ bajcheʼ tsiʼ yʌlʌ Jesús, yom mi lac subeñob chaʼan miʼ chaʼleñob estudio ti jujumpʼejl semana. ¿Bajcheʼ miʼ mejlel lac mel?

6. ¿Chuqui yom mi lac ñop lac mel chaʼan jiñi woli bʌ la cʌqʼuen estudio miʼ colel tiʼ chaʼan bʌ Dios?

⁶ Ñaxam bʌ, laʼ lac tsʼitaʼ jalʼan la cʌqʼueñob estudio yaʼ tiʼ tiʼ i yototob. Jumpʼejl ejemplo, cheʼ bʌ miʼ cʼotel lac julaʼtañob mach cojach jumpʼejl texto yom mi lac pejcʌbeñob. Cheʼ bʌ jiñi quixtañu tsaʼix ñʌmʼa cheʼ bʌ bej jalix mi lac pejcañob tiʼ tiʼ i yotot, laʼ laj cʼajtiben mi an baqui mi lac mejlel ti buchtʌl chaʼan mi lac bej subeñob chaʼan jiñi Biblia. Cheʼ bajcheʼ miʼ jacʼbeñonla, mi caj i pʌsbeñonla mi wolʌch i chʼʌm ti ñuc jiñi estudio woli bʌ la cʌqʼuen. I xucʼu xucʼul mi caj i mejlel laj cʼajtiben mi yom i chʼʌm estudio chaʼyajl ti jumpʼejl semana muʼ bʌ caj i coltan chaʼan ora miʼ colel tiʼ chaʼan bʌ Dios. Laʼ laj qʼuel yambʌ chuqui yom bʌ miʼ mel jiñi woli bʌ i chʼʌm estudio.

7. ¿Bajcheʼ yom mi lac chajpan lac bʌ jiñi xcʌntesajonbʌla cheʼ bʌ miʼ cajel la cʌcʼ estudio?

⁷ Ñuc i cʼʌjñibal cheʼ bʌ jiñi xcʌntesajonbʌla mi lac chajpan lac bʌ cheʼ bʌ miʼ cajel la cʌcʼ estudio. Ñaxan yom mi lac pejcan jiñi muʼ bʌ caj laj qʼuel ti jiñi estudio yicʼot mi lac sʌclan jiñi texto tac. Laʼ laj qʼuel jiñi ñuc tac bʌ i cʼʌjñibal, laʼ lac wen ñaʼtan jiñi i títulojlel jiñi cʌntesʌntel, jiñi subtítulo tac, jiñi cʼajtiya tac, jiñi texto tac muʼ bʌ i yʌl «pejcan», jiñi foto tac yicʼot jiñi video tac muʼ bʌ i mejlel i coltañonla lac tsictesan jiñi temaj. Ti wiʼil laʼ lac chʼʌm ti ñuc jiñi woli bʌ la cʌqʼuen estudio, i laʼ lac ñaʼtan bajcheʼ miʼ cajel lac suben ti tsiquil yicʼot ti mach bʌ wocolic bʌ tʼan jiñi temaj chaʼan miʼ mejlel i cʼotel i chʼʌmben i sujm yicʼot miʼ mel tiʼ cuxtʌlel (Neh. 8:8; Pr. 15:28a).

8. Cheʼ bajcheʼ tsiʼ yʌlʌ Pablo ti Colosenses 1:9, 10, ¿chuqui yom mi lac mel tiʼ tojlel jiñi woli bʌ la cʌqʼuen estudio?

⁸ Yambʌ bajcheʼ miʼ mejlel lac chajpan lac bʌ, jiñʌch cheʼ bʌ mi laj cʼajtiben Jehová chaʼan miʼ coltan jiñi woli bʌ la cʌqʼuen estudio yicʼot chaʼan miʼ yʌqʼuen chuqui i cʼʌjñibal bʌ i chaʼan. Laʼ laj cʼajtiben i coltaya Jehová chaʼan mi laj cʼʌn ti wen jiñi Biblia chaʼan miʼ cʼotel tiʼ pusicʼal jiñi woli bʌ i chʼʌm estudio (pejcan Colosenses 1:9, 10). Laʼ lac ñaʼtan mi an chuqui wocol bʌ miʼ yubin chaʼan miʼ cʼotel i chʼʌmben i sujm. Mach ñajʌyic lac chaʼan chaʼan jiñi la com bʌ jiñʌch mi laj coltan chaʼan miʼ cʼotel i chʼʌmjaʼ.

9. ¿Bajcheʼ miʼ mejlel laj coltan jiñi quixtañu chaʼan miʼ chajpan i bʌ cheʼ bʌ mi caj la cʌqʼuen estudio?

⁹ Mi lac pijtan chaʼan cheʼ bʌ muqʼuix i wen  chʼʌm estudio jiñi quixtañu miʼ coltan chaʼan miʼ cʼotel i ñumen qʼuel ti ñuc chuqui am bʌ i mele Jehová yicʼot Jesús yicʼot miʼ mulan i ñumen cʌn (Mt. 5:3, TNM; 5:6). Chaʼan miʼ ñumen coltan jiñi woli bʌ i cʌn majlel, jiñi woli bʌ la cʌqʼuen estudio yom miʼ xucʼchocon i pensar. Jin chaʼan, laʼ lac chʌcʌ cʼajtesʌben chaʼan ñuc i cʼʌjñibal cheʼ bʌ miʼ wʌn chajpan jiñi cʌntesʌntel muʼ bʌ cajel laj qʼuel ti jiñi estudio yicʼot miʼ ñaʼtan bajcheʼ yilal miʼ mejlel i cʼʌn tiʼ cuxtʌlel. Miʼ mejlel laj coltan i ñaʼtan bajcheʼ miʼ mejlel i chajpan i bʌ cheʼ bʌ mi laj comol chajpan jumpʼejl cʌntesʌntel. * Laʼ laj cʌntesan bajcheʼ miʼ mejlel i tajben i jacʼbal jiñi cʼajtiya, i chaʼan miʼ chaʼpʼej uxpʼejl jach tʼan muʼ bʌ i sʌp mi caj i mejlel i tajben i jacʼbal yicʼot laʼ lac suben chaʼan miʼ jacʼ tiʼ bajñel tʼan. Cheʼ bajcheʼ iliyi, mi caj i mejlel lac ñaʼtan mi wolʌch i chʼʌmben i sujm jiñi woli bʌ lac suben. Laʼ laj qʼuel jiñi i yuxpʼejlel yom bʌ miʼ cʌn i mel jiñi woli bʌ la cʌqʼuen estudio.

10. ¿Chucoch ñuc i cʼʌjñibal cheʼ bʌ jiñi woli bʌ la cʌqʼuen estudio miʼ pejcan jiñi Biblia ti jujumpʼejl qʼuin, i chuqui yom miʼ mel chaʼan mi ñumen locʼsʌben i wenlel?

¹⁰ Anquese weñʌch cheʼ bʌ jiñi quixtañu miʼ chaʼlen estudio ti jujumpʼejl semana, yomʌch jaʼel cheʼ ti jujumpʼejl qʼuin an chuqui miʼ bajñel mel. Yom miʼ ñʌchʼtʌben i tʼan Jehová yicʼot yom miʼ pejcan. Miʼ cajel i ñʌchʼtʌben i tʼan Jehová cheʼ bʌ miʼ pejcan jiñi Biblia ti jujumpʼejl qʼuin (Jos. 1:8, TNM; Sal. 1:1-3). Laʼ laj cʌntesan chaʼan miʼ cʼʌn jiñi programa chaʼan i pejcʌntel jiñi Biblia muʼ bʌ lac taj ti jw.org i muʼ bʌ i mejlel i chaʼlen ti imprimir. * Pero chaʼan miʼ ñumen locʼsʌben i wenlel i pejcʌntel jiñi Biblia, laʼ lac suben chaʼan miʼ ñaʼtan chuqui miʼ cʌntesan tiʼ tojlel Jehová yicʼot bajcheʼ miʼ mejlel i cʼʌn tiʼ cuxtʌlel jiñi muʼ bʌ i cʌn (Hch. 17:11; Stg. 1:25).

11. ¿Bajcheʼ miʼ mejlel i cʌn i mel oración jiñi woli bʌ la cʌqʼuen estudio, i chucoch ñucʌch i cʼʌjñibal cheʼ bʌ ti jujumpʼejl qʼuiñʌch miʼ mel?

¹¹ Laʼ lac suben jiñi woli bʌ la cʌqʼuen estudio chaʼan laʼ i pejcan Jehová ti jujumpʼejl qʼuin ti oración. Cheʼ bʌ mi caj lac tech la cʌqʼuen estudio yicʼot cheʼ bʌ mi caj la cujtesan, laʼ lac tem mel oración i laʼ la cʌlben i cʼabaʼ. Cheʼ bajcheʼ ili, mi caj i cʌn i mel oración loqʼuem bʌ tiʼ pusicʼal yicʼot chaʼan yom i yujtesan jiñi i yoración tiʼ cʼabaʼ Jesucristo (Mt. 6:9; Jn. 15:16). Jiñi muʼ bʌ la cʌqʼuen estudio mi caj i lʌcʼtesan i bʌ ti Jehová cheʼ bʌ miʼ ñʌchʼtʌben i tʼan, yom bʌ i yʌl, cheʼ bʌ miʼ pejcan ti jujumpʼejl qʼuin jiñi Biblia, i cheʼ jaʼel mi caj i mejlel  i pejcan Jehová cheʼ bʌ miʼ mel oración (Stg. 4:8). Mi cheʼʌch miʼ mel, miʼ cajel i coltan chaʼan miʼ yʌcʼ i cuxtʌlel ti Jehová yicʼot miʼ chʼʌmeʼ jaʼ. Laʼ laj qʼuel chuqui yambʌ miʼ mejlel i coltan.

12. ¿Bajcheʼ miʼ mejlel laj coltan jiñi muʼ bʌ la cʌqʼuen estudio chaʼan miʼ sujtel tiʼ yamigo Jehová?

¹² Jiñi muʼ bʌ la cʌqʼuen estudio mach cojach yom miʼ cʌytʌl tiʼ jol jiñi woli bʌ i cʌn, yom miʼ cʼotel jaʼel tiʼ pusicʼal. ¿Chucoch? Come yaʼ ti lac pusicʼal yaʼ cʌylem chuqui mi lac mulan tac yicʼot bajcheʼ yubil mi la cubin lac bʌ, i jiñʌch muʼ bʌ i ñijcañonla chaʼan an chuqui mi lac mel. Jiñi i cʌntesa tac Jesús tsaʼʌch cʌli tiʼ jol jiñi quixtañujob come añʌch i sujmlel bajcheʼ tiʼ subu. Pero tsaʼʌch i tsʌcleyob majlel Jesús jaʼel come tsaʼ cʼotiyob tiʼ pusicʼal jiñi i cʌntesa tac (Lc. 24:15, 27, 32). Jiñi woli bʌ la cʌqʼuen estudio yom miʼ qʼuel Jehová bajcheʼ juntiquil lac piʼʌl mejl bʌ laj qʼuel, yom miʼ qʼuel bajcheʼ i Tat, i Dios yicʼot i Yamigo (Sal. 25:4, 5). Cheʼ bʌ mi la cʌqʼuen estudio, laʼ la cʌl jiñi wen utsʼatax bʌ i melbal tac jiñi lac Dios (Éx. 34:5, 6; 1 P. 5:6, 7). Mach yʌlʌyic jiñi temaj woli bʌ lac tsictesʌben, laʼ la cʌqʼuen i qʼuel bajcheʼ yilal bʌ Dios jiñi Jehová. Laʼ laj coltan chaʼan miʼ qʼuel ti ñuc jiñi i cʼuxbiya, jiñi i yutslel yicʼot i pʼuntaya Jehová. Jesús tsiʼ yʌlʌ chaʼan jiñi ñaxam bʌ mandar, jiñi cʼax ñuc bʌ, jiñʌch: «Cʼuxbin a Yum Dios» (Mt. 22:37, 38). Laʼ lac chaʼlen wersa chaʼan jiñi muʼ bʌ la cʌqʼuen estudio miʼ cʼotel i wen cʼuxbin Jehová.

13. Alʌ jumpʼejl ejemplo chaʼan bajcheʼ miʼ mejlel laj coltan jiñi woli bʌ la cʌqʼuen estudio chaʼan miʼ cʌn jiñi wen utsʼatax bʌ i melbal Jehová.

¹³ Cheʼ bʌ mi lac pejcan jiñi woli bʌ la cʌqʼuen estudio, laʼ lac suben bajcheʼ yubil mi la cubin lac bʌ tiʼ tojlel Jehová. Tajol ili miʼ mejlel i coltan i qʼuel chaʼan ñuc i cʼʌjñibal cheʼ bʌ miʼ sujtesan tiʼ yamigo Jehová yicʼot cheʼ bʌ miʼ cʌn i cʼuxbin (Sal. 73:28). Jumpʼejl ejemplo, laʼcu lac ñaʼtan chaʼan woli lac tsictesan jumpʼejl temaj muʼ bʌ i cʼotel ti lac pusicʼal am bʌ yaʼ ti lac jun tac o jumpʼejl texto muʼ bʌ i taj ti tʼan jiñi i cʼuxbiya, jiñi i ñaʼtʌbal, jiñi i tojel o jiñi i pʼʌtʌlel Jehová. Mi jiñʌch woli bʌ lac tsictesan, miʼ mejlel lac suben jiñi woli bʌ la cʌqʼuen estudio chaʼan jiñi, jiñʌch junchajp muʼ bʌ i yʌqʼueñonla laj cʼuxbin jiñi lac Tat am bʌ ti panchan. Wʌle mi caj laj qʼuel jiñi joʼchajplel yom bʌ miʼ melob jiñi woli bʌ i chʼʌmob estudio chaʼan miʼ cʼotel i chʼʌmob jaʼ.

14. Cheʼ bajcheʼ miʼ yʌl Hebreos 10:24, 25, ¿chuqui mi caj i coltan jiñi woli bʌ la cʌqʼuen estudio chaʼan miʼ colel majlel tiʼ chaʼan bʌ Dios?

¹⁴ La com chaʼan jiñi woli bʌ la cʌqʼueñob estudio  miʼ cʼotel i chʼʌmob jaʼ. Junchajp bajcheʼ miʼ mejlel laj coltañob jiñʌch cheʼ bʌ mi lac subeñob chaʼan miʼ majlelob ti tempa bʌ tac. Jiñi xcʌntesajob añoʼ bʌ cabʌl i ñaʼtʌbal miʼ yʌlob chaʼan jiñi mucʼʌch bʌ i yajñelob ti tempa bʌ jiñʌch ora bʌ miʼ colelob tiʼ chaʼan bʌ Dios (Sal. 111:1). An muʼ bʌ i subeñob chaʼan mi yom i cʌñob ti wen muʼ bʌ i yʌl jiñi Biblia yom miʼ yajñelob ti tempa bʌ. Laʼ lac pejcʌben Hebreos 10:24, 25 jiñi muʼ bʌ la cʌqʼuen estudio, i laʼ lac tsictesʌben bajcheʼ miʼ mejlel i coltan cheʼ bʌ miʼ yajñel ti tempa bʌ tac (pejcan). Cheʼ jaʼel, laʼ lac pʌsben jiñi video ¿Chuqui miʼ mejlel yaʼ ti i Yotlel Tempa bʌ? * Laʼ laj coltan jiñi muʼ bʌ la cʌqʼuen estudio chaʼan mucʼʌch i mulan majlel yaʼ ti tempa bʌ tac.

15. ¿Chuqui miʼ mejlel lac mel chaʼan jiñi muʼ bʌ la cʌqʼueñob estudio miʼ majlelob yaʼ ti tempa bʌ tac?

¹⁵ ¿Chuqui miʼ mejlel lac mel mi jiñi woli bʌ la cʌqʼuen estudio maʼañic ajñen ti jumpʼejl tempa bʌ o bixetic jach miʼ yajñel? Laʼ lac suben chuqui tsaʼ laj cʌñʌ ti jumpʼejl tempa bʌ maxto bʌ jali. Mi caj i mulan majlel jaʼel cheʼ bʌ miʼ qʼuel bajcheʼ tsiʼ yʌqʼueyet a wubin a bʌ jiñi tempa bʌ. Aqʼuen jumpʼejl Lac Tsictesʌbentel o jiñi Jun chaʼan lac tempa bʌ woli bʌ i qʼuejlel ti jiñi bʌ ora. Laʼ lac pʌsben chuqui mi caj i qʼuejlel yaʼ ti yambʌ tempa bʌ i laʼ laj cʼajtiben baqui bʌ tsiʼ ñumen mulaj. Maʼañic i lajintel muʼ bʌ caj i ñʌchʼtan yaʼ ti tempa bʌ bajcheʼ am bʌ i ñʌchʼta yaʼ ti yan tac bʌ ñopbalʌl (1 Co. 14:24, 25). Yaʼ ti tempa bʌ mi caj i cʌn hermanojob muʼ bʌ caj i coltañob chaʼan miʼ cʼotel i chʼʌmjaʼ.

16. a) ¿Chuqui miʼ mejlel lac mel chaʼan mi laj coltan jiñi muʼ bʌ la cʌqʼuen estudio chaʼan miʼ cʼotel i chʼʌmjaʼ? b) ¿Chuqui miʼ cajel laj qʼuel yaʼ ti yambʌ estudio?

¹⁶ Cheʼ jiñi, ¿chuqui miʼ mejlel lac mel chaʼan mi laj coltan jiñi muʼ bʌ la cʌqʼuen estudio chaʼan miʼ cʼotel i chʼʌmjaʼ? Laʼ lac suben chaʼan miʼ chaʼlen estudio ti jujumpʼejl semana yicʼot chaʼan miʼ chajpan i bʌ. Cheʼ bajcheʼ jiñi, mi caj i chʼʌm ti ñuc cheʼ bʌ miʼ yʌqʼuentel estudio. Laʼ laj cʌntesan chaʼan miʼ pejcan ti oración Jehová ti jujumpʼejl qʼuin yicʼot chaʼan miʼ sujtesan tiʼ yamigo, i laʼ lac suben majlel ti jiñi tempa bʌ tac. (Qʼuele jiñi recuadro « ¿Chuqui yom miʼ mel jiñi muʼ bʌ i chaʼlen estudio?»). Pero cheʼ bajcheʼ miʼ cajel laj qʼuel ti yambʌ estudio, an joʼchajp yom bʌ mi lac mel jiñi xcʌntesajonbʌla ti Biblia chaʼan jiñi muʼ bʌ la cʌqʼueñob estudio miʼ cʼotel i chʼʌmob jaʼ.