TI JUJUMPʼEJL jab yonlelob miʼ chaʼlentelob ti readmitir yaʼ ti congregación. Laʼcu lac ñaʼtan bajcheʼ cʼamel tijicñʌyel an yaʼ ti panchan cheʼ bʌ juntiquil tiñʌmeʼ miʼ chaʼ sujtel (Luc. 15:​7, 10). Mi tsaʼ chaʼlentiyet ti readmitir, miʼ mejlel a wen ñop chaʼan Jesús, jiñi ángelob yicʼot Jehová wen tijicñayob cheʼ tsaʼ chaʼ sujtiyet ti congregación. Pero cheʼ maʼ chaʼ tojʼesan majlel bajcheʼ añet a wicʼot Jehová, tajol mi caj a taj wocol tac. ¿Baqui tac bʌ, i chuqui miʼ mejlel i coltañet?

Cabʌl hermanojob mach tijicñayic miʼ yubiñob i bʌ anquese tsaʼix chaʼ sujtiyob ti congregación. Mi cheʼ woli (choncol) a wujtel bajcheʼ jiñi, tajol maʼ ñaʼtan bajcheʼ yubil tsiʼ yubi i bʌ jiñi rey David. Anquese tsaʼix ñusʌbenti i mul, tsiʼ yʌlʌ: «Jini c jontolil tsiʼ yʌcʼʌyon ti wocol» (Sal. 40:12; 65:3). Tajol juntiquil muʼ bʌ i chaʼ sujtel tiʼ tojlel Jehová cabʌl jab bej anto i mul miʼ yubin i bʌ o miʼ wen chaʼlen quisin. Jumpʼejl ejemplo, Isabelle, * expulsada bʌ tsaʼ ajñi 20 jab, tsiʼ yʌlʌ: «Wen wocol tsaʼ cubi chaʼan mic ñop chaʼan Jehová tsaʼix i ñusʌbeyon c mul». Mi jatet maʼ wubin a chʼijyemlel, tajol maʼ chaʼ ñajtʼesan a bʌ tiʼ tojlel Jehová (Pr. 24:10). Mach a wʌcʼ ti ujtel jiñi.

An mach bʌ tijicñayic miʼ yubiñob i bʌ cheʼ bʌ miʼ ñaʼtañob pejtelel chuqui yom miʼ melob (chaʼleñob) chaʼan wen miʼ chaʼ ajñelob yicʼot Jehová. Cheʼ bʌ Antoine tsaʼix chaʼlenti ti readmitir, tsiʼ yʌlʌ: «Tsaʼ ñajʌyi c chaʼan pejtelel chuqui tac mic mel ti ñaxan bajcheʼ xñoptʼan». Tiʼ caj iliyi, tajol an mach bʌ añic miʼ wen chaʼleñob wersa chaʼan miʼ melbeñob i yeʼtel (troñel) Jehová.

Laʼ la cʌl jumpʼejl ejemplo. Mi jumpʼejl otot miʼ wen asiyel cheʼ bʌ miʼ ñumel jumpʼejl huracán, tajol jiñi i yum maʼañic mi caj i mulan cheʼ bʌ miʼ ñaʼtan bajcheʼ cʼamel yom miʼ yʌqʼuen i yorajlel yicʼot  yom miʼ chaʼlen wersa chaʼan miʼ chaʼ tojʼesan. Cheʼʌch miʼ yujtel jaʼel la quicʼot Jehová, mi tsaʼ jejmi bajcheʼ añet a wicʼot tiʼ caj jumpʼejl tsʌts bʌ mulil, tajol maʼ qʼuel chaʼan cabʌl chuqui yom maʼ mel chaʼan maʼ tojʼesan bajcheʼ añet a wicʼot. Pero añʌch a coltʌntel.

Jehová miʼ subeñonla: «Laʼ cula, laʼ lac tem chaʼlen tʼan» (Is. 1:18). Jatet tsaʼix a chaʼle wersa chaʼan maʼ tojʼesan bajcheʼ añet a wicʼot Jehová, i jin chaʼan miʼ cʼuxbiñet. Ñaʼtancu: Jehová miʼ mejlel i cʼʌñet chaʼan miʼ pʌs chaʼan Satanás juntiquilʌch xlot (Pr. 27:11).

Cheʼ bʌ tsaʼ chaʼ sujtiyet baʼan Jehová, tsaʼ lʌcʼtesa a bʌ tiʼ tojlel, i miʼ yʌcʼ i tʼan chaʼan mi caj i lʌcʼtesan i bʌ ti a tojlel jaʼel (Sant. 4:8). Weñʌch cheʼ jiñi yambʌlob miʼ qʼuelob chaʼan tsaʼix chaʼ sujtiyet ti congregación, pero anto chuqui yambʌ yom maʼ mel. Yom maʼ bej pʼʌtʼesan a cʼuxbiya tiʼ tojlel Jehová, jiñi a Tat yicʼot a wamigo. ¿Bajcheʼ miʼ mejlel a mel?

Chaʼlen wersa a wʌqʼuen a bʌ meta tac muʼ bʌ i mejlel a tsʼʌctesan. Tajol cʼajalto a chaʼan jiñi ñaxan tac bʌ tsaʼ cʌñʌ tiʼ tojlel Jehová yicʼot chaʼan jiñi paraíso. Pero wʌle an chuqui yom maʼ ñʌmtesan a bʌ a mel, yom maʼ chʌn chaʼlen subtʼan, maʼ wajñel ti tempa bʌ yicʼot maʼ ñusan qʼuin a wicʼot jiñi hermanojob. Laʼ laj qʼuel chuqui tac miʼ mejlel a mel.

Pejcan Jehová tiʼ pejtelel ora. Yujil chaʼan wocol maʼ wubin chaʼan maʼ melben oración cheʼ bʌ anto a mul maʼ wubin (Rom. 8:26). Pero chʌn chaʼlen oración i suben chaʼan a womʌch sujtel tiʼ yamigo (Rom. 12:12). Andrej miʼ yʌl: «Wen an c mul mi cubin i mic wen chaʼlen quisin. Pero jajayajl mi cujtel ti oración ñumen tijicñayon i ñumen an c ñʌchʼtʌlel». Mi jatet maʼañic maʼ ñaʼtan chuqui miʼ mejlel a suben Jehová, wen ñaʼtan jiñi oración tac tsaʼ bʌ i mele jiñi rey David cheʼ bʌ tsaʼix i chaʼ ñaʼta i bʌ, mi lac taj yaʼ ti Salmo 51 yicʼot 65.

Wen pejcan jiñi Biblia. Jiñi mi caj i coltañet chaʼan maʼ pʼʌtʼesan a ñopoñel yicʼot a cʼuxbiya ti Jehová (Sal. 19:​7-11). Felipe tsiʼ yʌlʌ: «Tsaʼ cʼuñʼayon yicʼot tsaʼ yajliyon ti mulil come maʼañic mic chaʼlen wem bʌ estudio yicʼot maʼañic mic pejcan jiñi Biblia. Mach comic chaʼ yajlel ti mulil, jin chaʼan tsaʼ cajiyon ti wem bʌ estudio chaʼan mij cʌntan c bʌ». Cheʼʌch miʼ mejlel a mel jaʼel. Mi mach a wujilic chuqui miʼ mejlel a qʼuel cheʼ bʌ maʼ chaʼlen estudio, miʼ mejlel a cʼajtiben i coltaya juntiquil a wamigo añix bʌ i ñaʼtʌbal.

Chaʼ sujten tiʼ yamigo jiñi hermanojob. An muʼ bʌ i bʌcʼñañob chaʼan mach utsʼatic miʼ qʼuejlelob cheʼ bʌ miʼ chaʼ sujtelob ti congregación. Larissa tsiʼ yʌlʌ: «Tsaʼ c wen chaʼle quisin. Tsaʼ cʌcʼʌ c bʌ tiʼ contra jiñi congregación tsaʼ cubi. Cabʌl ora cheʼ tsaʼ cubi bajcheʼ jiñi». Miʼ mejlel a wen ñop chaʼan jiñi ancianojob yicʼot jiñi yambʌ hermanojob yomob i coltañet chaʼan wen maʼ chaʼ ajñel a wicʼot Jehová (qʼuele jiñi recuadro « Muʼ bʌ i mejlel i melob jiñi ancianojob»). Wen tijicñayob cheʼ yaʼix chaʼ añet ti congregación i yomob chaʼan tijicñayet (Pr. 17:17).

¿Chuqui miʼ mejlel a mel chaʼan ñumen lʌcʼʌl maʼ wajñel ti jiñi congregación? Mach a cʌy jiñi tempa bʌ tac i chaʼlen subtʼan a wicʼot jiñi hermanojob. ¿Bajcheʼ mi caj i coltañet iliyi? Félix tsiʼ yʌlʌ: «Jiñi congregación wolix (yʌquelix) i pijtan chaʼan mic chaʼ sujtel. Wen cʼuxbibilon tsaʼ cubi c bʌ. Tiʼ pejtelelob tsiʼ coltayoñob chaʼan chaʼ añoñix ti congregación mi cubin, chaʼan Jehová tsaʼix i ñusʌbeyon c mul yicʼot chaʼan miʼ mejlel c bej chaʼlen wersa» (qʼuele jiñi recuadro « Muʼ bʌ i mejlel a mel»).

Cheʼ bʌ woli a tojʼesan bajcheʼ añet a wicʼot Jehová, Satanás mi caj i bej aqʼueñet wocol chaʼan miʼ ñop i cʼunʼesañet (Luc. 4:13). Mi a wom a chajpan a bʌ, pʼʌtʼesan a cʼuxbiya ti Jehová.

Jehová tsiʼ yʌlʌ tiʼ tojlel jiñi i tiñʌmeʼ: «Mi caj c sajcan jini sajtem bʌ. Mi caj c chaʼ pʌy tilel ti corral. Mi caj c tsʼʌcʌben i lojwel. Mux c chaʼ pʼʌtʼesan jini cʼun bʌ» (Ez. 34:16). Jehová an i colta cabʌl i wiñicob chaʼan wen miʼ chaʼ ajñel yicʼotob. Jin chaʼan miʼ mejlel a ñop chaʼan yom i coltañet chaʼan ñumen lʌcʼʌl maʼ wajñel a wicʼot.