1. ¿Chucoch an cabʌlob mach bʌ yujilobic jiñi i sujmlel?

MIʼ ñaʼtʌntel chaʼan an yonlel ñopbalʌl muʼ bʌ i yʌlob chaʼan xñoptʼañob i miʼ yʌlob chaʼan miʼ chʼujutesañob Dios cheʼ bajcheʼ miʼ mulan. Jin chaʼan cabʌl lac piʼʌlob mach bʌ yujilobic jiñi i sujmlel i miʼ cʼajtibeñob i bʌ: «¿An jach ba jumpʼejl i sujm bʌ ñopbalʌl o weñʌch miʼ qʼuel Dios tiʼ pejtelel?». ¿Ixcu joñonla? ¿Mucʼʌch ba lac ñop chaʼan jiñi i testigojonbʌla Jehová mi lac pʌs jiñi i sujmlel yicʼot chaʼan jiñi lac chʼujutesa jin jach muʼ bʌ i chʼʌm Dios? ¿Mucʼʌch ba i mejlel lac ñop? Laʼ laj qʼuel chuqui tac miʼ pʌs jiñi.

2. ¿Chucoch tsaʼʌch i ñopo jiñi apóstol Pablo chaʼan i sujmlelʌch jiñi woli bʌ i ñop? (1 Tesalonicenses 1:5).

² Jiñi apóstol Pablo yujil chaʼan i sujmlelʌch jiñi woli (choncol) bʌ i ñop (pejcan 1 Tesalonicenses 1:5). Mach tsaʼic jach i ñopo tiʼ caj tsiʼ yubi i tijicñʌyel, chaʼañʌch tsiʼ wen tsaji jiñi i Tʼan Dios. Tsiʼ ñopo chaʼan «pejtelel jiñi Tsʼijbujel tilem ti Dios» (2 Tim. 3:16). Cheʼ bʌ Pablo tiʼ tsaji jiñi Tsʼijbujel tsiʼ qʼuele chaʼan Jesús jiñʌch jiñi Mesías wʌn albil bʌ. Pero jiñi judíojob ñucoʼ bʌ i yeʼtel (troñel) maʼañic tsiʼ chʼʌmʌyob ti ñuc jiñi. Miʼ poj alob chaʼan waʼchocobilob ti Dios, pero maʼañic tsiʼ pʌsʌyob ti chuqui tsiʼ meleyob (chaʼleyob) (Tito 1:16). Pero Pablo mach tsaʼic jach i yajca chuqui mi caj i ñop yicʼot chuqui maʼañic bʌ mi caj i ñop yaʼ tiʼ Tʼan Dios. Yomʌch i pʌs yicʼot i jacʼ «pejtelel chuqui yom Dios» (Hech. 20:27).

3. ¿Yom ba la cujil i jacʼbal pejtelel jiñi cʼajtiya tac chaʼan mi lac ñop chaʼan añʌch lac chaʼan jiñi i sujmlel? (Qʼuele jaʼel jiñi recuadro « Maʼañic miʼ mejlel lac tsic jiñi i melbal tac yicʼot jiñi i ñaʼtʌbal Jehová»).

 ³ An muʼ bʌ i yʌlob chaʼan jiñi i sujm bʌ ñopbalʌl yom miʼ jacʼ pejtelel jiñi cʼajtiya tac anquese maʼañic miʼ jamʌ tsictesʌntel yaʼ ti Biblia. ¿Weñʌch ba jiñi? Laʼ laj qʼuel jiñi i yejemplo Pablo. I sujmʌch chaʼan tiʼ sube jiñi xñoptʼañob: «Wen qʼuelela mi i sujmʌch pejtelel chuqui an», pero tsiʼ cʌñʌ jaʼel chaʼan an chuqui tac maʼañic bʌ miʼ chʼʌmben i sujm (1 Tes. 5:21). Tiʼ tsictesa chaʼan «mach tsʼʌcʌlic chuqui cʌmbil lac chaʼan» yicʼot chaʼan «lajal bajcheʼ woli laj qʼuel ti jumpʼejl espejo mach bʌ wen tsiquilic» (1 Cor. 13:​9, 12). Pablo mach luʼ yujilic, i mi joñoñicla. Pero yujilʌch jiñi cʌntesa tac chaʼan bʌ Jehová, jiñi yujil bʌ tsiʼ yʌqʼue i ñop chaʼan añʌch i chaʼan jiñi i sujmlel.

4. ¿Bajcheʼ miʼ mejlel lac ñumen ñop chaʼan tsaʼix lac taja jiñi i sujmlel, i chuqui mi caj laj qʼuel ti ili estudio?

⁴ ¿Bajcheʼ miʼ mejlel lac ñumen ñop chaʼan tsaʼʌch lac taja jiñi i sujmlel? Junchajp jin cheʼ mi lac laj jiñi chʼujutesaya tsaʼ bʌ i pʌsʌ Jesús yicʼot bajcheʼ miʼ melob jiñi Testigojob ili ora. Ti ili estudio mi caj laj qʼuel chaʼan jiñi i sujm bʌ xñoptʼañob 1) maʼañic miʼ chʼujutesañob melbil (pʌtbil) tac jach bʌ dios, 2) miʼ qʼuelob ti ñuc i cʼabaʼ Jehová, 3) miʼ cʼuxbiñob jiñi i sujmlel i 4) miʼ wen cʼuxbiñob i bʌ.

5. ¿Chuqui ti ejemplo tsiʼ yʌcʼʌ Jesús cheʼ bʌ tsiʼ chʼujutesa Dios, i bajcheʼ miʼ mejlel lac lajin?

⁵ Jesús miʼ wen cʼuxbin Jehová, jin chaʼan jin jach tsaʼ bʌ i chʼujutesa cheʼ bʌ yaʼan ti panchan yicʼot cheʼ bʌ tsajñi ti Pañimil (Luc. 4:8). I tsiʼ pʌsbe jiñi xcʌntʼañob chaʼan cheʼʌch miʼ melob jaʼel. Jesús yicʼot jiñi xcʌntʼañob maʼañic tsiʼ wis cʼʌñʌyob imágen tac  tiʼ chʼujutesaya. Dios espíritujʌch, jin chaʼan pejtelel chuqui miʼ melob jiñi wiñicob bajcheʼ i yejtal maʼañic mi caj i wis laj i bʌ bajcheʼ jiñi i ñuclel (Is. 46:​5). ¿Wem ba mi lac melben i imágenlel jiñi poj chʼujuloʼ bʌ i mi lac melbeñob oración? Ti jiñi i chaʼpʼejlel Mandar, Jehová tsiʼ yʌlʌ: «Mach a bajñel mel a dios tac, mi i yejtal winic mi i yejtal bʌteʼel am bʌ ti pañimil mi i yejtal mut am bʌ ti chan, mi i yejtal chʌy am bʌ ti jaʼ. Mach a cʼuchchocon a bʌ tiʼ tojlelob» (Éx. 20:​4, 5). Tsiquil chuqui yom miʼ melob jiñi yomoʼ bʌ i mel chuqui miʼ mulan Dios.

6. ¿Chuqui ti ejemplo miʼ tsajcañob jiñi Testigojob ili ora?

⁶ Jiñi wen yujiloʼ bʌ chaʼan historia miʼ yʌlob chaʼan jiñi xñoptʼañob ti ñaxam bʌ siglo jin jach Dios tsiʼ chʼujutesayob. Jumpʼejl ejemplo, jumpʼejl libro muʼ bʌ i yʌl chaʼan bʌ jiñi xñoptʼañob miʼ yʌl chaʼan cheʼ tsaʼic ñaʼtʌnti chaʼan miʼ yotsʌntel imágen tac yaʼ baqui miʼ yujtel chʼujutesaya, jiñi ñaxam bʌ xñoptʼañob «maʼañic tsiʼ wis mulayob» (History of the Christian Church). Ili ora, jiñi i testigojonbʌla Jehová mi lac lajin jiñi xñoptʼañob ti ñaxam bʌ siglo. Maʼañic mi lac melben oración jiñi imágen tac, jiñi ángelob mi jiñicto Jesús. Cheʼ jaʼel maʼañic mi lac chaʼlen ti saludar jiñi bandera, i maʼañic mi lac mel yan tac bʌ baqui miʼ chʼujutesʌntel jiñi lac país. Mach yʌlʌyic chuqui miʼ yujtel, la comʌch lac jacʼ tsaʼ bʌ i yʌlʌ Jesús: «Chʼujutesan jiñi a Dios Jehová» (Mat. 4:10).

7. ¿Bajcheʼ qʼuexelob jiñi i testigojob Jehová yicʼot jiñi yambʌ ñopbalʌl tac?

⁷ Ili ora, cabʌlob muʼ bʌ i tsajcañob jiñi ñucoʼ bʌ i yeʼtel ti ñopbalʌl tac, i yomobix i chʼujutesañob. Miʼ wen cʼotelob yaʼ ti templo, miʼ mʌñob libro tac i miʼ wen acʼob taqʼuin chaʼan miʼ coltañob. An muʼ bʌ i luʼ ñopob chuqui miʼ yʌlob. ¡Mi cheʼicto miʼ cʌlʌx ubiñob i tijicñʌyel bajcheʼ jiñi cheʼ muqʼuic i qʼuelob Jesús! Pero jiñi i wiñiconbʌla Jehová maʼañic mi lac tsajcan juntiquil wiñic. Anquese mi laj qʼuelob ti ñuc jiñi waʼchocobiloʼ bʌ, mi lac chʼʌm ti ñuc jiñi i cʌntesa Jesús: «Luʼ laʼ wermañu laʼ bʌ» (Mat. 23:​8-10). Maʼañic mi laj qʼuelob bajcheʼ diosob jiñi ñucoʼ bʌ i yeʼtel ti ñopbalʌl tac o jiñi yumʌlob. I maʼañic mi laj coltan chuqui miʼ melob, xucʼul mi la cajñel i maʼañic mi la cotsan lac bʌ tiʼ chaʼan bʌ pañimil (mulawil). Tiʼ pejtelel iliyi mach wis lajaloñicla bajcheʼ jiñi yañoʼ bʌ muʼ bʌ i poj alob chaʼan xñoptʼañob (Juan 18:36).

8. ¿Bajcheʼ la cujil chaʼan Jehová yom chaʼan mi lac ñuqʼuesʌben i cʼabaʼ yicʼot chaʼan mi la cʌcʼ ti cʌñol?

⁸ Ti jumpʼejl bʌ qʼuin, Jesús tsiʼ yʌlʌ tiʼ yoración: «C Tat, ñuqʼuesan jiñi a cʼabaʼ». Jehová tsiʼ jacʼbe ti cʼam bʌ tʼan i tiʼ sube chaʼan mucʼʌch caj i ñuqʼuesan i cʼabaʼ (Juan 12:28). Jesús tsiʼ yʌqʼue i ñuclel i cʼabaʼ i Tat tiʼ pejtelel ora (Juan 17:26). Jin chaʼan, miʼ mejlel la cʌl chaʼan jiñi i sujm bʌ xñoptʼañob tijicñayob cheʼ miʼ cʼʌmbeñob i cʼabaʼ Dios yicʼot miʼ yʌcʼob ti cʌñol.

9. ¿Bajcheʼ tsiʼ pʌsʌyob jiñi xñoptʼañob ti ñaxam bʌ siglo chaʼan mucʼʌch i qʼuelob ti ñuc i cʼabaʼ Dios?

⁹ Cheʼ ti ñaxam bʌ siglo, cheʼ bʌ tsaʼ jaxto waʼchoconti jiñi congregación, Jehová tsiʼ «chʼʌmʌ jiñi mach bʌ judíojobic, chaʼan miʼ mejlel i yajcan lac piʼʌlob mach bʌ judíojobic chaʼan miʼ chʼʌmbeñob majlel i cʼabaʼ jaʼel» (Hech. 15:14). Jiñi xñoptʼañob tsiʼ qʼueleyob ti ñuc cheʼ miʼ cʼʌmbeñob i cʼabaʼ Dios yicʼot cheʼ miʼ yʌcʼob ti cʌñol. Tsiʼ cʼʌmbeyob i cʼabaʼ ti subtʼan yicʼot cheʼ bʌ tiʼ tsʼijbuyob jiñi Biblia. * Cheʼ bajcheʼ jiñi tsiʼ pʌsʌyob chaʼan jumpʼejlobʌch  tejclum muʼ bʌ i chʼʌm majlel i cʼabaʼ Dios (Hech. 2:​14, 21).

10. ¿Chuqui tac miʼ pʌs chaʼan jiñi i testigojob Jehová yajcʌbilob chaʼan miʼ chʼʌmbeñob majlel i cʼabaʼ Dios?

¹⁰ ¿Yajcʌbiloʼ ba jiñi i testigojob Jehová chaʼan miʼ chʼʌmbeñob majlel i cʼabaʼ Jehová? Laʼ laj qʼuel. Ili ora, cabʌl ñucoʼ bʌ i yeʼtel ti ñopbalʌl tac an i chaʼleyob wersa chaʼan miʼ mucob jiñi i cʼabaʼ Dios. Tsiʼ locʼsayob ti jiñi i Biblia i an maʼañic bʌ miʼ yʌcʼob ti cʼʌjñel ti jiñi i ñopbal. * Tsiquil chaʼan jin jach jiñi i Testigojonbʌla mi la cʌqʼuen i ñuclel i cʼabaʼ Dios yicʼot mi laj qʼuel ti ñuc. Maʼañic yambʌ muʼ bʌ i wen aqʼueñob i cʌn lac piʼʌlob jiñi i cʼabaʼ Dios. Mi lac chaʼlen wersa chaʼan mi lac mel cheʼ bajcheʼ miʼ yʌl jiñi laj cʼabaʼ: I testigojonla Jehová (Is. 43:​10-12). An la cʌcʼʌ ñumen ti 240 millón jiñi Traducción del Nuevo Mundo, baqui miʼ cʼʌjñel i cʼabaʼ Jehová yaʼ baqui tsiʼ locʼsayob jiñi yambʌ traductorob. I mi lac mel jun tac ti ñumen ti mil tʼan tac, i yaʼi miʼ cʼʌjñel jiñi i cʼabaʼ Jehová.

11. ¿Bajcheʼ tsiʼ pʌsʌyob jiñi xñoptʼañob ti ñaxam bʌ siglo chaʼan miʼ cʼuxbiñob jiñi i sujmlel?

¹¹ Jesús tsiʼ cʼuxbi jiñi i sujmlel, ili jiñʌch jiñi i sujmlel tiʼ tojlel Dios yicʼot chaʼan jiñi ñaʼtʌbil bʌ i chaʼan. Tsaʼʌch i jacʼʌ iliyi i tsiʼ yʌcʼʌ ti cʌñol (Juan 18:37). Jiñi i sujm bʌ xcʌntʼañob i chaʼan Jesús tsiʼ wen cʼuxbiyob jaʼel jiñi i sujmlel (Juan 4:​23, 24). Jiñi apóstol Pedro  tsiʼ yʌlʌ chaʼan ili jiñʌch «jiñi bij chaʼan bʌ i sujmlel» (2 Ped. 2:2). Jiñi xñoptʼañob cheʼ ti ñaxam bʌ siglo tsiʼ wen cʼuxbiyob jaʼel jiñi i sujmlel, jin chaʼan maʼañic tsiʼ jacʼʌyob jiñi i cʌntesa tac ñopbalʌl, jiñi costumbre tac yicʼot jiñi yan tac bʌ muʼ bʌ i yʌjlel am bʌ tiʼ contra jiñi i sujmlel (Col. 2:8). Jiñi i sujm bʌ xñoptʼañob ti ili ora miʼ chaʼleñob wersa jaʼel chaʼan miʼ bej ajñelob ti jiñi i sujmlel (3 Juan 3, 4). ¿Bajcheʼ? Miʼ chaʼleñob wersa chaʼan jiñi muʼ bʌ i ñopob yicʼot muʼ bʌ i melob cheʼʌch an cheʼ bajcheʼ miʼ yʌl Jehová.

12. ¿Chuqui miʼ mel jiñi Junmojt muʼ bʌ i pʌsob bij cheʼ bʌ miʼ qʼuelob chaʼan an chuqui yom miʼ qʼuextʌntel, i chucoch miʼ melob?

¹² Jiñi i testigojob Jehová maʼañic miʼ yʌlob chaʼan luʼ toj bajcheʼ miʼ chʼʌmbeñob i sujm jiñi Biblia. An i tajayob i sajtemal cheʼ bʌ miʼ tsictesañob jumpʼejl cʌntesa o chaʼan bajcheʼ miʼ chajpañob jiñi congregación. Pero iliyi mach yomic miʼ yʌcʼ ti toj sajtel lac pusicʼal, come jiñi Biblia jamʌ tsiquil miʼ yʌl chaʼan jiñi i tejclum Dios cʼunteʼ cʼunteʼ mi caj i ñumen chʼʌmben i sujm jiñi i sujmlel (Col. 1:​9, 10). Jehová cʼunteʼ cʼunteʼ mi caj i yʌcʼ ti cʌjñel jiñi i sujmlel, jin chaʼan yom mi lac pijtan chaʼan miʼ ñumel tsictiyel (Pr. 4:18). Cheʼ bʌ jiñi Junmojt muʼ bʌ i pʌsob bij miʼ qʼuelob chaʼan yom miʼ qʼuextʌntel bajcheʼ miʼ chʼʌmbentel i sujm jumpʼejl cʌntesa o bajcheʼ yom miʼ mejlel jumpʼejl eʼtel, ti ora miʼ qʼuextañob. Cabʌl ñopbalʌl am bʌ chuqui miʼ qʼuextañob chaʼan jach tijicñayob jiñi i wiñicob o chaʼan wen miʼ qʼuejlelob ti pañimil. Pero jiñi Testigojob miʼ melob chaʼan miʼ ñumen lʌcʼtesañob i bʌ ti Dios i miʼ chʼujutesañob cheʼ bajcheʼ tsiʼ pʌsʌ Jesús (Sant. 4:4). Cheʼ bʌ an chuqui mi laj qʼuextan, mi lac mel come tsaʼix lac ñumen ñaʼta muʼ bʌ i yʌl jiñi Biblia, mach chaʼañic mi lac tsajcan chuqui miʼ yʌjlel ili ora. Mi laj cʼuxbin jiñi i sujmlel (1 Tes. 2:​3, 4).

13. ¿Baqui bʌ jiñi melbalʌl ñumen ñuc bʌ i cʼʌjñibal chaʼan jiñi i sujm bʌ xñoptʼañob, i bajcheʼ miʼ pʌsob jiñi i testigojob Jehová ili ora?

¹³ Jiñi xñoptʼañob cheʼ ti ñaxam bʌ siglo tsaʼ wen cʌjñiyob chaʼan jiñi utsʼatax bʌ i melbalob (chaʼlibalob), pero ñumento chaʼan jiñi cʼuxbiya. Jesús tsiʼ yʌlʌ: «Cheʼ bajcheʼ iliyi tiʼ pejtelelob mi caj i ñaʼtañob chaʼan xcʌntʼañetla c chaʼan: Mi mucʼʌch laʼ cʼuxbin laʼ bʌ» (Juan 13:​34, 35). Ili ora, jiñi Testigojob tiʼ petol Pañimil miʼ wen cʼuxbiñob i bʌ yicʼot juntemelob. Mach lajaloñicla bajcheʼ jiñi yambʌ ñopbalʌl tac, temelonla bajcheʼ jumpʼejl familia anquese chʼoyolonla ti yan tac bʌ país o yambʌ laj cultura. Mi laj qʼuel ili cʼuxbiya ti jiñi tempa bʌ tac yicʼot colem tempa bʌ. Iliyi miʼ yʌqʼueñonla lac ñumen ñop chaʼan joñon jachla mi lac chʼujutesan Jehová cheʼ bajcheʼ miʼ mulan.

14. Cheʼ bajcheʼ miʼ yʌl Colosenses 3:​12-14, ¿bajcheʼ ñumen wen mi lac pʌs chaʼan mucʼʌch laj cʼuxbin lac bʌ?

¹⁴ Jiñi Biblia miʼ yʌl: «Wen cʼuxbin laʼ bʌ» (1 Ped. 4:​8). Junchajp bajcheʼ mi lac pʌs ili cʼuxbiya jiñʌch cheʼ mi lac ñusʌben lac bʌ lac mul yicʼot mi laj cuchben lac bʌ lac sajtemal. Cheʼ jaʼel mi lac sʌclan bajcheʼ mi lac tʼox chuqui an lac chaʼan yicʼot mi laj coltan la quermañujob, yicʼotto jiñi am bʌ chuqui tsiʼ tumbeyoñobla (pejcan Colosenses 3:​12-14). Tiʼ sujm, ili cʼuxbiya jiñʌch muʼ bʌ i pʌs chaʼan i sujm bʌ xñoptʼañonla.

15. ¿Bajcheʼ tac yambʌ mi lac lajin jiñi congregación cheʼ ti ñaxam bʌ siglo?

¹⁵ Ti jiñi lac chʼujutesaya an yan tac bʌ bajcheʼ mi lac lajin jiñi congregación cheʼ ti ñaxam bʌ siglo. Jumpʼejl ejemplo jiñʌch bajcheʼ chajpʌbil jiñi organización, an i chaʼan superintendentejob chaʼan circuito, ancianojob yicʼot siervo ministerialob, ili miʼ lajin jiñi  tsaʼ bʌ i waʼchocoyob jiñi apóstolob cheʼ ti ñaxam bʌ siglo (Filip. 1:1; Tito 1:5). I cheʼ bajcheʼ tsiʼ meleyob, mi laj qʼuel ti ñuc jaʼel muʼ bʌ i yʌl i mandar Jehová chaʼan jiñi piʼleya, jiñi ñujpuñel, chaʼan bajcheʼ yilal yom mi laj qʼuel jiñi chʼichʼ yicʼot chaʼan yom mi laj cʌntan jiñi congregación tiʼ tojlel jiñi mach bʌ yomobic i jacʼbeñob i mandar tac Dios (Hech. 15:​28, 29; 1 Cor. 5:​11-13; 6:​9, 10; Heb. 13:​4).

16. ¿Chuqui miʼ pʌsbeñonla Efesios 4:​4-6?

¹⁶ Jesús tsiʼ yʌlʌ chaʼan cabʌlob muʼ bʌ caj i yʌlob chaʼan xcʌntʼañob i chaʼan, pero mach tiʼ pejtelelobic xcʌntʼañob i chaʼan (Mat. 7:​21-23). I jiñi i Tʼan Dios tsiʼ wʌn alʌ chaʼan ti jiñi cojix tac bʌ qʼuin cabʌlob «mi caj i poj pʌsob chaʼan miʼ chʼujutesañob Dios» (2 Tim. 3:​1, 5). Pero jiñi Biblia jamʌ tsiquil miʼ yʌl chaʼan «junchajp jach jiñi ñopoñel» utsʼat bʌ miʼ qʼuel Dios (pejcan Efesios 4:​4-6).

17. ¿Majquiyob miʼ tsajcʌbeñob i yejemplo Jesús yicʼot añob tiʼ sujm bʌ ñopbalʌl ili ora?

¹⁷ Cheʼ jiñi, ¿majquiyob jiñi añoʼ bʌ tiʼ sujm bʌ ñopbalʌl ili ora? Tsaʼix laj qʼuele chuqui tac miʼ pʌs jiñi. Tsaʼ laj qʼuelbe jiñi i yejemplo Jesús yicʼot bajcheʼ tiʼ tsajcayob jiñi xñoptʼañob cheʼ ti ñaxam bʌ siglo. Tsiquil i jacʼbal: Jiñʌch jiñi i testigojob Jehová. Jumpʼejlʌch ñuc bʌ lac majtan cheʼ añonla tiʼ tejclum Dios, cheʼ mi laj cʌn i sujmlel tiʼ tojlel Jehová yicʼot chaʼan jiñi ñaʼtʌbil bʌ i chaʼan. Jin chaʼan, laʼ lac chʌn chuc lac bʌ ti jiñi i sujmlel ti jumpʼejl lac pusicʼal.