¿Chucoch maʼañic mi lac chaʼlen guerra cheʼ bajcheʼ tsiʼ meleyob jiñi israelitajob?
TI JIÑI Segunda Guerra Mundial, juntiquil soldado chaʼan nazi tiʼ sube junmojt Testigojob: «Ti laʼ pejtelel mi caj laʼ chʌmel (sajtel) mi maʼañic mi laʼ jacʼ majlel ti guerra tiʼ contra Francia yicʼot Inglaterra». Anquese yaʼ lʌcʼʌ añob cabʌl soldadojob chaʼan jiñi SS, mi juntiquilic hermano tsiʼ jacʼʌ majlel. ¡Tsaʼʌch i wen pʌsʌyob i chʼejlel! Ili jiñʌch jumpʼejl wem bʌ ejemplo chaʼan muʼ bʌ lac mel (chaʼlen) jiñi i testigojonbʌla Jehová: Maʼañic mi lac majlel ti guerra. Maʼañic mi la cotsan lac bʌ tiʼ wocol tac ili pañimil anquese mi lac mejlel ti tsʌnsʌntel.
Pero mach tiʼ pejtelelobic jiñi xñoptʼañoʼ bʌ miʼ yʌlob i bʌ cheʼ miʼ ñaʼtañob bajcheʼ jiñi. An muʼ bʌ i ñaʼtañob chaʼan jiñi xñoptʼañob mucʼʌch i mejlel i coltañob i país i yomʌch miʼ melob. Tajol miʼ ñaʼtañob: «Jiñi israelitajob jiñobʌch i tejclum Dios i tsajñob ti guerra. ¿Chucoch mach cheʼic miʼ melob jiñi xñoptʼañob ti ili ora?». ¿Bajcheʼ la cʌlʌ cheʼ añic majqui miʼ subeñonla jiñi? Miʼ mejlel lac tsictesan chaʼan mach lajalic bajcheʼ tsaʼ chumleyob jiñi israelitajob ti wajali yicʼot bajcheʼ chumulob jiñi i tejclum Dios ti ili ora. Laʼ laj qʼuel joʼchajp muʼ bʌ i pʌs chucoch mach lajalic.
1. PEJTELEL JIÑI I WIÑICOB DIOS LOQʼUEMOB JACH TI JUMPʼEJL TEJCLUM
Ti wajali, Jehová tsiʼ yajca jiñi israelitajob chaʼan miʼ sujtelob tiʼ tejclum. Tiʼ subeyob: «Mi caj laʼ wochel tic chaʼan tiʼ tojlel pejtelel colem tejclum tac» (Éx. 19:5). Cheʼ jaʼel, tsiʼ yʌqʼueyob jumpʼejl i lum baqui mi caj i chumtʌlob. Jin chaʼan, cheʼ bʌ tiʼ subeyob chaʼan miʼ majlelob ti guerra tiʼ contra yambʌ tejclum tac, jiñi israelitajob maʼañic tiʼ tsʌnsañob yambʌ i wiñicob Dios. a
Ili ora, jiñi i wiñicob Jehová «loqʼuemob ti ñuqui tejclum tac, pʼolbalʌl tac, alʌ tejclum tac yicʼot tʼan tac» (Apoc. 7:9). Cheʼ muqʼuic i majlelob ti guerra, woli (choncol) i contrajiñob yicʼot miʼ mejlel i tsʌnsañob jiñi i yermañujob.
2. JEHOVÁ TIʼ SUBE JIÑI ISRAELITAJOB CHAʼAN MIʼ MAJLELOB TI GUERRA
Ti wajali, Jehová jiñʌch tsaʼ bʌ i yʌlʌ jalaqui yicʼot chucoch yom miʼ majlelob ti guerra jiñi israelitajob. Jumpʼejl ejemplo, tiʼ sube chaʼan miʼ jisañob jiñi cananeojob, cʌmbiloʼ bʌ chaʼan miʼ chʼujutesañob jiñi xibajob, miʼ wen chaʼleñob tsʼiʼlel yicʼot miʼ tsʌnsañob alʌlob chaʼan miʼ yʌcʼob ti majtañʌl. Jehová tiʼ sube jiñi israelitajob chaʼan miʼ jisañob yaʼ ti Lum tsaʼ bʌ wʌn subentiyob chaʼan maʼañic miʼ melob jaʼel jiñi muʼ bʌ i melob (Lv. 18:24, 25, TNM). Cheʼ bʌ jiñi israelitajob yaʼix añob ti jiñi Lum tsaʼ bʌ wʌn subentiyob an i tajol Dios tsiʼ yʌqʼueyob permiso chaʼan miʼ coltañob i bʌ tiʼ tojlel jiñi i contrajob (2 S. 5:17-25). Pero maʼañic tsiʼ bajñel aqʼueyob i ñaʼtan chaʼan miʼ majlelob ti guerra. I cheʼ bʌ miʼ majlelob ti guerra i Jehová maʼañic chuqui tiʼ subeyob, tsiʼ tajayob cabʌl wocol (Nm. 14:41-45; 2 Cr. 35:20-24).
Ili ora, Jehová mach yomic chaʼan jiñi lac piʼʌlob miʼ majlelob ti guerra. Jiñi tejclum tac miʼ chaʼleñob guerra chaʼan miʼ bajñel sʌclañob i wenlel, mach chaʼañic jiñi yom bʌ Dios. Tajol miʼ yotsañob i bʌ ti guerra come yom i chʼʌmob cabʌl tejclum, i tajob cabʌl taqʼuin, tiʼ caj política o chuqui miʼ bajñel ñaʼtañob. Pero ¿wem ba miʼ qʼuel Dios jiñi muʼ bʌ i yʌlob chaʼan miʼ chaʼleñob guerra tiʼ cʼabaʼ chaʼan miʼ coltañob jiñi ñopol bʌ i chaʼañob o chaʼan miʼ jisañob jiñi i contrajob? Maʼañic. Jehová miʼ yʌl chaʼan jin mi caj i coltan jiñi i sujm bʌ i wiñicob yicʼot mi caj i jisañob jiñi i contrajob ti jumpʼejl guerra muʼ bʌ i cajel ti talto bʌ qʼuin: Jiñi guerra chaʼan Armagedón (Apoc. 16:14, 16). Ti jiñi guerra, jin jach mi caj i yotsañob i bʌ i yángelob, mach jiñic jiñi i tejclum am bʌ ila ti Lum (Apoc. 19:11-15).
3. JIÑI ISRAELITAJOB MAʼAÑIC TIʼ TSɅNSAYOB JIÑI TSAʼɅCH BɅ I ÑOPOYOB TI JEHOVÁ
Cheʼ bʌ Jehová tsiʼ chaʼle guerra tiʼ contra Jericó, maʼañic tiʼ tsʌnsa Rahab yicʼot i familia come Rahab tsiʼ ñopo tiʼ tojlel. ¿Cheʼ ba miʼ yujtel jaʼel ti jiñi guerra tac muʼ bʌ i yujtel ili ora?
Ti wajali, jiñi israelitajob tsaʼʌch i wen pʼuntayob jiñi tsaʼʌch bʌ i ñopoyob ti Dios i jin jach miʼ tsʌnsañob jiñi tsaʼ bʌ i yʌlʌ Jehová chaʼan yom miʼ chʌmelob. Laʼ laj qʼuel chaʼpʼejl ejemplo. Anquese Jehová tsiʼ yʌlʌ chaʼan yom miʼ jisʌntel Jericó, jiñi israelitajob maʼañic tiʼ tsʌnsayob Rahab yicʼot i familia come Rahab tsiʼ ñopo ti Dios (Jos. 2:9-16; 6:16, 17). I ti wiʼil, maʼañic tsaʼ tsʌnsʌntiyob jiñi chumuloʼ bʌ ti Gabaón come tsiʼ pʌsʌyob chaʼan miʼ qʼuelob ti ñuc Dios (Jos. 9:3-9, 17-19).
Ili ora, jiñi muʼ bʌ i chaʼleñob guerra miʼ tsʌnsañob jiñi muʼ bʌ i ñopob Dios yicʼot jiñi maʼañobic bʌ i mul.
4. JIÑI ISRAELITAJOB CHEʼɅCH TSIʼ CHAʼLEYOB GUERRA CHEʼ BAJCHEʼ TSIʼ YɅLɅ DIOS
Ti wajali, Jehová tiʼ sube jiñi israelitajob chuqui tac yom miʼ melob cheʼ bʌ miʼ majlelob ti guerra. Jumpʼejl ejemplo, an i tajol tiʼ sube jiñi israelitajob chaʼan miʼ subeñob jiñi i contrajob chaʼan ñʌchʼʌl miʼ yajñelob tiʼ tojlelob (Dt. 20:10). Cheʼ jaʼel, Jehová tiʼ sube jiñi soldadojob chaʼan yom sʌcob yicʼot yom sʌc yaʼ baqui miʼ cʼajob i yo (Dt. 23:9-14). Jehová tiʼ subeyob jaʼel chaʼan mach yomic miʼ ticʼlañob jiñi xʼixicob yaʼ baqui miʼ majlelob ti guerra, cheʼ bajcheʼ ñʌmʌlob i mel jiñi soldadojob ti yambʌ tejclum tac. Mi juntiquil soldado israelita bʌ yom i pʌy juntiquil xʼixic tsaʼ bʌ i chucuyob, yomto miʼ pijtan jumpʼejl uw (Dt. 21:10-13).
Ili ora, cabʌl país an i firmariyob acuerdo tac baqui tsiʼ yotsayob ley tac chaʼan bʌ guerra. Anquese miʼ melob jiñi chaʼan miʼ cʌntañob jiñi yaʼ bʌ chumulob yaʼi, mach cheʼic miʼ yujtel.
5. DIOS TSIʼ CHAʼLE GUERRA CHAʼAN MIʼ COLTAN I TEJCLUM
¿Muʼto ba i coltan Dios jumpʼejl tejclum cheʼ bʌ miʼ chaʼlen guerra ili ora cheʼ bajcheʼ tsiʼ mele tiʼ tojlel israelitajob ti Jericó?
Ti wajali, Jehová tsiʼ chaʼle guerra chaʼan miʼ coltan jiñi israelitajob, i mach junsujtelic jach tsiʼ mele milagro tac chaʼan miʼ mʌlob (jotob). Jumpʼejl ejemplo, tsiʼ coltayob chaʼan miʼ chʼʌmob Jericó. Jiñi israelitajob cheʼ tsiʼ meleyob cheʼ bajcheʼ tsaʼ subentiyob ti Jehová, «tsiʼ chaʼleyob cʼam bʌ oñel», i cheʼ jiñi «tsaʼ jejmi tac jini tsʼajc». Cheʼ bajcheʼ jiñi, Jehová tsiʼ coltayob chaʼan mach wocolic miʼ yubiñob chaʼan miʼ chilob jiñi tejclum (Jos. 6:20). I ti wiʼil, tsiʼ mʌlbeyob jiñi amorreojob. ¿Bajcheʼ? Jehová «tsiʼ choco jubel colem tac bʌ tunijaʼ [...]. Ñumen cabʌlob tsaʼ bʌ chʌmiyob chaʼan jini tunijaʼ bajcheʼ jini tsaʼ bʌ tsʌnsʌntiyob ti espada chaʼan israelob» (Jos. 10:6-11).
Ili ora, Jehová maʼañic woli (yʌquel) i coltan ti guerra mi jumpʼejlic tejclum. Jiñi i Yumʌntel, am bʌ tiʼ cʼʌb jiñi Rey Jesucristo, «mach i chaʼañic ili pañimil» (Juan 18:36). Pero Satanás jiñʌch am bʌ tiʼ cʼʌb pejtelel jiñi yumʌlob. Jiñi guerra tac am bʌ ila ti pañimil (mulawil) miʼ pʌs chaʼan wen jontolʌch jiñi Satanás (Luc. 4:5, 6; 1 Juan 5:19).
JIÑI I SUJM BɅ XÑOPTʼAÑONBɅLA MI LAC SɅCLAN ÑɅCHʼTɅLEL
Cheʼ bajcheʼ tsaʼix laj qʼuele, mach lajalic bajcheʼ chumulonla ili ora yicʼot bajcheʼ tsaʼ chumleyob jiñi israelitajob. Pero an yan tac bʌ i sujmlel chucoch maʼañic mi lac majlel ti guerra. Jumpʼejl ejemplo, Dios tsiʼ wʌn alʌ chaʼan ti jiñi cojix tac bʌ qʼuin jiñi muʼ bʌ i cʌñob «maʼanix mi caj i chʌn ñopob guerra». I cheʼ jaʼel, maʼañic mi caj i yotsañob i bʌ (Is. 2:2-4). Cheʼ jaʼel, Cristo tsiʼ yʌlʌ chaʼan jiñi xcʌntʼañob i chaʼan mach i chaʼañobic ili pañimil, maʼañic mi caj i yotsañob i bʌ ti jiñi wocol tac muʼ bʌ i yujtel ila ti pañimil (Juan 15:19).
Cristo tiʼ sube jiñi xcʌntʼañob chaʼan anto chuqui yambʌ yom miʼ melob. Tsiʼ pʌsbeyob chaʼan mach yomic miʼ melob pejtelel muʼ bʌ i yʌcʼ ti tejchel michʼ, muʼ bʌ i mejlel i yʌcʼ chaʼan miʼ lotob michʼ tiʼ pusicʼal yicʼot chaʼan miʼ majlelob ti guerra (Mat. 5:21, 22). I tsiʼ pʌsbeyob jaʼel chaʼan yom miʼ sʌclañob ñʌchʼtʌlel yicʼot yom miʼ cʼuxbiñob jiñi i contrajob (Mat. 5:9, 44).
¿Chuqui yom i yʌl ti lac tojlel iliyi? Mach la comic majlel ti guerra. Pero ¿tsʼitaʼ lotol ba jontolil (mañajlel) ti lac pusicʼal muʼ bʌ i mejlel i tech tʼox bʌ o leto (quera) yaʼ ti congregación? Laʼ lac chaʼlen wersa chaʼan mi lac locʼsan ti lac pusicʼal pejtelel iliyi (Sant. 4:1, 11).
Jiñi xñoptʼañonbʌla mi lac sʌclan ñʌchʼtʌlel yicʼot mi laj cʼuxbin lac bʌ, maʼañic mi la cotsan lac bʌ tiʼ wocol jiñi pañimil (Juan 13:34, 35). Laʼ lac chaʼlen wersa chaʼan chʌn xucʼul mi la cajñel jinto cheʼ bʌ Jehová miʼ junyajl jisan jiñi guerra tac (Sal. 46:9).
a I sujmʌch chaʼan an i tajol jiñi tribu tac ti Israel tsiʼ contrajiyob i bʌ, pero Jehová mach weñic tsiʼ qʼuele (1 R. 12:24). An i tajol weñʌch tsiʼ qʼuele come an tribu tac tsaʼ bʌ i chañʼesayob i bʌ tiʼ tojlel o tsiʼ meleyob tsʌts bʌ mulil (Jue. 20:3-35; 2 Cr. 13:3-19; 25:14-22; 28:1-8).
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Chucoch cheʼ maʼañic miʼ majlelob ti guerra jiñi i testigojob Jehová?
Cabʌl quixtañujob yujilob chaʼan joñon lojon bajcheʼ i testigojob Jehová maʼañic mi lon c majlel ti guerra. Cʌñʌ chucoch cheʼ mi lon c ñaʼtan bajcheʼ jiñi.
