1. ¿Bajcheʼ yilal miʼ jacʼob cabʌlob jiñi ñaʼtʌbal am bʌ ti Biblia? (Proverbios 1:20, 21).

 TI CABɅL tejclum mi lac taj laj qʼuel xsubtʼañob tijicñayoʼ bʌ miʼ yʌqʼueñob jun tac lac piʼʌlob. ¿Am baʼ chaʼle subtʼan bajcheʼ iliyi? Mi añʌch, tajol tsaʼ ñaʼta jiñi lajiya am bʌ ti Proverbios baqui miʼ yʌjlel chaʼan jiñi mach bʌ añic i pʼisol i ñaʼtʌbal miʼ chaʼlen tʼan ti calle tac chaʼan jiñi lac piʼʌlob miʼ yubiñob (pejcan Proverbios 1:20, 21). Yaʼ ti Biblia yicʼot ti lac jun tac mi lac taj jiñi i sujm bʌ ñaʼtʌbal: Jiñi i ñaʼtʌbal Jehová. Jiñʌch yom bʌ miʼ ñaxan cʌñob jiñi lac piʼʌlob chaʼan miʼ mejlel i tajob jiñi i cuxtʌlel. Tijicña mi la cubin cheʼ bʌ an majqui miʼ chʼʌm jiñi lac jun tac. Pero mach tiʼ pejtelelobic cheʼ miʼ melob (chaʼleñob) bajcheʼ jiñi. An mach bʌ yomobic i cʌn muʼ bʌ i yʌl jiñi Biblia. Yañoʼ bʌ mucʼ jach i tseʼtañonla, miʼ ñaʼtañob chaʼan maʼañix i cʼʌjñibal jiñi Biblia. Cheʼ jaʼel, an muʼ bʌ i yʌlob chaʼan mach weñic chuqui miʼ yʌl jiñi Biblia chaʼan bajcheʼ yilal yomonla i miʼ yʌlob chaʼan jiñi muʼ bʌ i jacʼob am bʌ yaʼi ñumeñix ti pʼis miʼ melob i bʌ. Pero Jehová yicʼot i cʼuxbiya woli (choncol) i bej subeñonla ti lac pejtelel chaʼan mi laj cʌn jiñi i sujm bʌ ñaʼtʌbal. ¿Bajcheʼ miʼ mel?

2. ¿Bajcheʼ miʼ mejlel lac taj jiñi i sujm bʌ lac ñaʼtʌbal ili ora, pero chuqui miʼ melob yonlel lac piʼʌlob?

² Junchajp bajcheʼ Jehová miʼ yʌcʼ ti ñʌchʼtʌntel jiñi i sujm bʌ ñaʼtʌbal jiñʌch ti jiñi Biblia. I lʌcʼʌ tiʼ pejtelel lac piʼʌlob añob i chaʼan. ¿I chuqui miʼ mejlel la cʌl chaʼan jiñi lac jun tac loqʼuem  bʌ ti Biblia? Yicʼot i coltaya Jehová, ñumeñix ti mil tʼan loqʼuem. Jiñi muʼ bʌ i ñʌchʼtañob, ili jiñobʌch muʼ bʌ i pejcañob jiñi Biblia yicʼot lac jun tʼan i miʼ jacʼob muʼ bʌ i cʌñob, miʼ tajob i wenlel. Pero yonlel lac piʼʌlob mach yomobic i jacʼ muʼ bʌ i yʌl jiñi Biblia. Cheʼ bʌ an chuqui mi caj i melob, mucʼ jach i melob chuqui bajñel yomob o miʼ melob chuqui miʼ subeñob yañoʼ bʌ. Tajol mach yomic i qʼueloñobla come mi lac jacʼ muʼ bʌ i yʌl jiñi Biblia. Ti ili estudio mi caj lac taj ti tʼan chucoch an cheʼ bʌ miʼ melob bajcheʼ jiñi. Pero laʼ lac ñaxan qʼuel bajcheʼ miʼ mejlel lac taj jiñi lac ñaʼtʌbal tilem bʌ ti Jehová.

3. ¿Chuqui yom mi lac mel chaʼan mi lac taj i sujm bʌ lac ñaʼtʌbal?

³ Jiñi lac ñaʼtʌbal jiñʌch cheʼ bʌ mi laj cʼʌn chuqui tac la cujil chaʼan mi lac yajcan lac mel chuqui tac wen. Pero anto chuqui yambʌ ochem ti jiñi i sujm bʌ ñaʼtʌbal. Jiñi Biblia miʼ yʌl: «Jiñʌch i cajibal lac ñaʼtʌbal cheʼ mi lac bʌcʼñan lac Yum. Jini muʼ bʌ i cʌn jini Chʼujul Bʌ, anix i ñaʼtʌbal» (Pr. 9:10). Jin chaʼan, cheʼ bʌ an chuqui ñuc bʌ i cʼʌjñibal mi caj lac mel yomʌch mi lac chʼʌm ti ñuc i ñaʼtʌbal «jini Chʼujul Bʌ», ili jiñʌch cheʼ bʌ mi laj cʌn chuqui miʼ ñaʼtan Jehová. Chaʼan miʼ mejlel lac mel iliyi, yom mi laj qʼuel chuqui miʼ yʌl jiñi Biblia yicʼot jiñi jun tac. Mi mucʼʌch lac mel, mi caj lac pʌs chaʼan añʌch lac ñaʼtʌbal tiʼ sujm (Pr. 2:5-7).

4. ¿Chucoch jin jach Jehová miʼ mejlel i yʌqʼueñonla i sujm bʌ lac ñaʼtʌbal?

⁴ Jehová jin jach muʼ bʌ i mejlel i yʌqʼueñonla jiñi i sujm bʌ lac ñaʼtʌbal (Rom. 16:27). ¿Chucoch mi la cʌl jiñi? Ñaxan, come jiñʌch tsaʼ bʌ i meleyonla (pʌtʌyonla) yicʼot i wen cʌñʌ pejtelel chuqui tsiʼ mele (Sal. 104:24). I chaʼpʼejlel, come miʼ pʌs i ñaʼtʌbal tiʼ pejtelel chuqui miʼ mel (Rom. 11:33). I yuxpʼejlel, come jiñi i ticʼojel mucʼʌch i coltan jiñi muʼ bʌ i jacʼob (Pr. 2:10-12). Mi la com lac taj i sujm bʌ lac ñaʼtʌbal, yomʌch mi lac jacʼ ili uxchajp yicʼot mi la cʌcʼ chaʼan miʼ coltañonla tiʼ pejtelel chuqui mi lac mel.

5. ¿Bajcheʼ yilal añob jiñi lac piʼʌlob tiʼ caj maʼañic miʼ cʌñob chaʼan Jehová jiñʌch muʼ bʌ i yʌqʼueñonla i sujm bʌ lac ñaʼtʌbal?

⁵ Cabʌl lac piʼʌlob muʼ bʌ lac tajob ti subtʼan miʼ yʌlob chaʼan wen utsʼatax bajcheʼ yilal chuqui tac an, pero maʼañic miʼ ñopob chaʼan an majqui tsiʼ mele i miʼ yʌlob chaʼan tilem ti evolución. Yañoʼ bʌ miʼ yʌlob chaʼan miʼ ñopob Dios, pero maʼañix i cʼʌjñibal miʼ qʼuelob muʼ bʌ i yʌl jiñi Biblia i yomob chumtʌl cheʼ bajcheʼ bajñel yomob. ¿Chuqui tajbil i chaʼañob? ¿Woli (yʌquel) ba i tojʼan majlel jiñi pañimil cheʼ jiñi lac piʼʌlob miʼ melob chuqui miʼ bajñel ñaʼtañob i maʼañic miʼ chʼʌmob ti ñuc i ñaʼtʌbal Dios? ¿Tijicñayoʼ ba tiʼ sujm o añoʼ ba jumpʼejl i pijtaya chaʼan jiñi talto bʌ qʼuin? Maʼañic. Jiñi woli bʌ i yujtel miʼ pʌsbeñonla chaʼan i sujmʌch iliyi: «Tiʼ tojlel Jehová maʼañic ñaʼtʌbalʌl, i chʼʌmbentel i sujm yicʼot ticʼojel am bʌ i cʼʌjñibal» (Pr. 21:30, TNM). Iliyi miʼ ñijcan lac pusicʼal chaʼan mi lac bej cʼajtiben Jehová chaʼan miʼ yʌqʼueñonla i sujm bʌ lac ñaʼtʌbal. Pero yonlel lac piʼʌlob maʼañic miʼ cʼajtiñob. ¿Chucoch?

6. Cheʼ bajcheʼ miʼ yʌl Proverbios 1:22-25, ¿majquiyob jiñi mach bʌ yomobic i yubin jiñi i sujm bʌ ñaʼtʌbal?

⁶ Cabʌlob maʼañic bʌ miʼ yubiñob miʼ mel cheʼ bʌ jiñi i sujm bʌ ñaʼtʌbal «miʼ chaʼlen tʼan ti calle tac». Jiñi Biblia miʼ yʌl chaʼan an uxchajp lac piʼʌlob mach bʌ yomobic jiñi i ñaʼtʌbal: Jiñi maxto bʌ añobic i pusicʼal, jiñi xwajleyajob yicʼot jiñi tontojoʼ bʌ (pejcan Proverbios 1:22-25). Laʼ lac ñumen cʌn chucoch  iliyob mach yomobic jiñi i ñaʼtʌbal Dios yicʼot chuqui miʼ mejlel lac mel chaʼan mach cheʼic mi lac sujtel bajcheʼob.

7. ¿Chucoch an mach bʌ añobic i pusicʼal?

⁷ Jiñi maxto bʌ añobic i pusicʼal jiñobʌch jiñi maxto bʌ añobic i ñaʼtʌbal o maxto bʌ cʌntesʌbilobic, orajach bʌ miʼ yʌcʼob i bʌ ti lotintel (Pr. 14:15). Cheʼ bʌ mi lac chaʼlen subtʼan mi lac tajob cheʼoʼ bʌ bajcheʼ iliyi. I sujmʌch chaʼan jiñi ñucoʼ bʌ i yeʼtel ti ñopbalʌl o jiñi políticojob an i lotiyob yonlel lac piʼʌlob. An mach bʌ tijicñayic miʼ yubiñob i bʌ cheʼ bʌ miʼ ñaʼtañob iliyi. Pero jiñi muʼ bʌ i yʌjlelob ti Proverbios 1:22 maʼañobic i pusicʼal come cheʼʌch bej yomob ajñel bajcheʼ jiñi (Jer. 5:31). Miʼ mulañob i mel chuqui bajñel yomob i mach yomobic i cʌn muʼ bʌ i yʌl jiñi Biblia mi yomicto i jacʼob. Cabʌlob cheʼ bʌ miʼ ñaʼtañob bajcheʼ juntiquil xʼixic am bʌ i ñopbal ti Quebec (Canadá), tsaʼ bʌ i sube juntiquil Testigo: «Mi jiñi lon c sacerdote miʼ lotiñon lon, i mulʌch, mach c mulic lojon». Mach la comic sujtel bajcheʼ jiñi mach bʌ yilol yomobic i ñaʼtan pañimil (Pr. 1:32; 27:12).

8. ¿Chuqui mi caj i coltañonla lac taj lac ñaʼtʌbal?

⁸ Jiñi Biblia miʼ subeñonla chaʼan yom mi lac taj majlel lac ñaʼtʌbal. Miʼ yʌqʼueñonla ili ticʼojel: «Cheʼ yom mi laʼ ñaʼtan bajcheʼ jiñi añobix bʌ i ñaʼtʌbal» (1 Cor. 14:20). Mi lac taj lac ñaʼtʌbal cheʼ bʌ mi lac jacʼ jiñi principio tac am bʌ ti Biblia. Cʼunteʼ cʼunteʼ mi caj laj qʼuel chaʼan jiñi principio tac miʼ coltañonla chaʼan mi lac mel chuqui tac wem bʌ yicʼot chaʼan maʼañic mi lac taj wocol. Wen cheʼ bʌ mi lac wen tsajin (qʼuel) lac bʌ chaʼan mi laj qʼuel bajcheʼ yilal woli lac majlel. Jumpʼejl ejemplo, mi añix ora a cajel ti estudio yicʼot ti tempa bʌ pero maxto a wʌcʼʌ a bʌ ti Jehová i maxto a chʼʌmʌ jaʼ, miʼ mejlel a cʼajtiben a bʌ chucoch maxto a mele jiñi. O mi chʼʌmʌlix a chaʼan jaʼ, ¿bajcheʼ yilal woli a majlel ti jiñi subtʼan yicʼot ti cʌntesa? ¿Muʼ baʼ pʌs ti chuqui maʼ mel chaʼan mucʼʌch a jacʼ jiñi principio tac am bʌ ti Biblia? ¿Cheʼ ba maʼ mel a bʌ tiʼ tojlel yambʌlob cheʼ bajcheʼ miʼ mel Jesús? Mi tsaʼ laj qʼuele chaʼan anto chuqui yom mi lac tojʼesan, laʼ lac jacʼ muʼ bʌ i yʌl Jehová, muʼ bʌ i «cʌntesan jini mach bʌ anic i pusicʼal» (Sal. 19:7).

9. ¿Bajcheʼ miʼ pʌsob jiñi xwajleyajob chaʼan mach yomobic i ñaʼtʌbal?

⁹ Jiñi yañoʼ bʌ mach bʌ añic miʼ mulañob jiñi i ñaʼtʌbal Dios jiñʌch jiñi xwajleyajob. Yaʼ ti lac subtʼan an i tajol mi lac tajob cheʼoʼ bʌ bajcheʼ jiñi. Miʼ mulañob i wajlen yañoʼ bʌ (Sal. 123:4, TNM). Jiñi Biblia tsiʼ wʌn alʌ chaʼan ti cojix tac bʌ qʼuin cabʌl xwajleyajob miʼ cajelob (2 Ped. 3:3, 4). Ili ora an cheʼoʼ bʌ bajcheʼ jiñi i ñijʼalob Lot, maʼañic miʼ jacʼob muʼ bʌ i yʌl Dios (Gn. 19:14). Cabʌlob muʼ bʌ i wajleñob jiñi muʼ bʌ i jacʼob chuqui miʼ yʌl jiñi Biblia. Jiñi xwajleyajob miʼ «melob mach bʌ weñic cheʼ bajcheʼ bajñel yomob» (Jud. 7, 17, 18). ¿Mach ba cheʼoʼbʌch jiñi apóstatajob yicʼot jiñi yañoʼ bʌ muʼ bʌ i tsʼaʼleñob Jehová cheʼ bajcheʼ miʼ yʌl jiñi Biblia tiʼ tojlel jiñi xwajleyajob?

10. Cheʼ bajcheʼ miʼ yʌl Salmo 1:1, ¿chuqui miʼ mejlel lac mel chaʼan maʼañic mi lac sujtel bajcheʼ jiñi xwajleyajob?

¹⁰ ¿Chuqui miʼ mejlel lac mel chaʼan maʼañic mi lac sujtel bajcheʼ jiñi xwajleyajob? Jumpʼejl ejemplo, mach yomic mi lac ñochtañob jiñi mucʼoʼ bʌ ti wulwul tʼan (pejcan Salmo 1:1). Ili yom i yʌl chaʼan maʼañic mi lac ñʌchʼtan mi muqʼuicto lac pejcan chuqui tac tilem bʌ tiʼ tojlel jiñi apóstatajob. Mi maʼañic mi laj cʌntan lac bʌ, miʼ mejlel lac tech la cʌl yañoʼ bʌ yicʼot mi laj cʌy lac ñop muʼ bʌ i yʌl Jehová yicʼot jiñi muʼ bʌ i subeñonla jiñi i yorganización. Chaʼan maʼañic mi lac mel jiñi, laʼ laj cʼajtiben lac bʌ: «¿Ñʌmʌl ba cʌl chuqui mach bʌ weñic jajayajl an chuqui tsijiʼ bʌ miʼ tsictesʌntel o mi  lac subentel lac mel? ¿Muʼ ba c sʌclan chuqui tac mach bʌ weñic tiʼ tojlel jiñi hermanojob waʼchocobiloʼ bʌ?». Jehová tijicña yicʼotonla mi ti orajach mi lac tojʼesan jiñi mach bʌ weñic (Pr. 3:34, 35).

11. ¿Bajcheʼ yilal miʼ qʼuelbeñob i mandar tac Jehová jiñi tontojoʼ bʌ?

¹¹ Jiñi yambʌ lac piʼʌlob mach bʌ añic miʼ mulañob jiñi i ñaʼtʌbal jiñʌch jiñi tontojoʼ bʌ. Cheʼ miʼ subentelob bajcheʼ jiñi come mach yomobic i jacʼbeñob i mandar tac Dios. Miʼ melob chuqui wem bʌ miʼ bajñel qʼuelob (Pr. 12:15). Miʼ tsʼaʼleñob Jehová, muʼ bʌ i yʌqʼueñonla lac ñaʼtʌbal (Sal. 53:1). Cheʼ bʌ mi lac tajob ti lac subtʼan, miʼ yʌloñobla come mi laj qʼuel ti ñuc muʼ bʌ i yʌl jiñi Biblia, pero maʼañic miʼ mejlel i coltañoñobla. Jiñi Biblia miʼ yʌl: «Mach i tajayic cabʌl i pusicʼal jini tonto bʌ. Maʼanic i cʼʌjñibal ti meloñibʌl» (Pr. 24:7). Jiñi tontojoʼ bʌ maʼañic chuqui wem bʌ miʼ mejlel i yʌlob. Jin chaʼan Jehová miʼ wʌn subeñonla: «Ñajt yom maʼ tʌtsʼ a bʌ tiʼ tojlel jini tonto bʌ» (Pr. 14:7).

12. ¿Chuqui mi caj i coltañonla chaʼan mach lajaloñicla bajcheʼ jiñi tontojoʼ bʌ?

¹² Joñonla mach lajaloñicla bajcheʼ jiñi muʼ bʌ i tsʼaʼlebeñob i ticʼojel tac Dios come mi laj cʌn laj cʼuxbin chuqui tac miʼ ñaʼtan yicʼot jiñi i mandar tac. Miʼ mejlel lac pʼʌtʼesan jiñi cʼuxbiya cheʼ bʌ mi laj qʼuel chuqui tac miʼ tajob jiñi muʼ bʌ i jacʼob tʼan yicʼot chuqui miʼ tajob jiñi muʼ bʌ i ñusañob tʼan. Miʼ mejlel lac ñaʼtan pejtelel jiñi wocol tac muʼ bʌ i tajob jiñi maʼañic bʌ miʼ jacʼbeñob i ticʼojel tac Jehová. I mi lac ñaʼtan jaʼel chuqui tac ti wenlel mi lac taj cheʼ bʌ mucʼʌch lac jacʼben i tʼan Dios (Sal. 32:8, 10).

13. ¿Muʼ ba i xicʼonla Jehová chaʼan mi lac jacʼ jiñi i ticʼojel tac?

¹³ Jehová miʼ yʌqʼueñonla ti lac pejtelel jiñi i ñaʼtʌbal, pero maʼañic miʼ wersa xicʼonla chaʼan mi lac chʼʌm. Pero mucʼʌch i tsictesan chuqui mi caj i chaʼleñob jiñi maʼañic bʌ miʼ qʼuelbeñob ti ñuc jiñi i ñaʼtʌbal (Pr. 1:29-32). Jiñi maʼañic bʌ miʼ jacʼbeñob i tʼan Jehová «mux i yʌqʼuentelob i chobejtʌbal chaʼan i melbalob». Ti wiʼil, mucʼ jach caj i tajob wocol i mi caj i jisʌntelob. Pero jiñi mucʼʌch bʌ i jacʼbeñob i ticʼojel tac Jehová mi caj i tajob ili wenlel: «Jini muʼ bʌ i chʼujbibeñon c tʼan maʼanic chuqui mi caj i bʌcʼñan. Mach talic i wocol. Mach yujilic bʌqʼuen» (Pr. 1:33).

14, 15. ¿Chuqui mi laj cʌn ti Proverbios 4:23?

¹⁴ Tiʼ pejtelel ora miʼ coltañonla jiñi i ñaʼtʌbal Dios cheʼ bʌ mucʼʌch lac jacʼ. Cheʼ bajcheʼ tsaʼix laj qʼuele, Jehová miʼ yʌqʼueñonla jiñi wem bʌ i ticʼojel tac. Jumpʼejl ejemplo, yaʼ ti Proverbios mi lac taj wem bʌ ticʼojel tac chaʼan tiʼ pejtelel ora yicʼot muʼ bʌ i coltañonla chaʼan wen mi lac chumtʌl mi mucʼʌch lac jacʼ. Laʼ jach laj qʼuel chʌmpʼejl ticʼojel.

¹⁵ Laʼ laj cʌntan chuqui an ti lac pusicʼal. Jiñi Biblia miʼ yʌl: «Come bajcheʼ jach an lac  pusicʼal cheʼʌch añonla» (Pr. 4:23). Laʼcu lac ñaʼtan chuqui tac mi lac mel chaʼan mi laj cʌntan jiñi lac pusicʼal. Yom wen chuqui mi laj cʼux, mi lac mel ejercicio yicʼot maʼañic mi lac mel muʼ bʌ i mejlel i ticʼlañonla. Cheʼʌch mi lac mel jaʼel chaʼan mi laj cʌntan chuqui an ti lac pusicʼal. Yom mi lac pejcan i Tʼan Dios ti jujumpʼejl qʼuin. Yom mi lac chajpan lac bʌ chaʼan jiñi tempa bʌ, mi lac majlel yicʼot mi la cʌcʼ laj comentario. Mi lac chʌn chaʼlen subtʼan jaʼel. I maʼañic mi lac mel pejtelel chuqui miʼ mejlel i yotsan mach bʌ weñic ti lac ñaʼtʌbal, bajcheʼ jiñi ñusaqʼuin tac baqui an jiñi tsʼiʼlel yicʼot mi laj cʌntan majqui mi lac ñochtañob.

16. ¿Chucoch mucʼʌch i wen coltañonla ili ora jiñi ticʼojel am bʌ ti Proverbios 23:4, 5?

¹⁶ Yom tijicñayonla chaʼan jiñi am bʌ lac chaʼan. Jiñi Biblia miʼ yʌcʼ ili ticʼojel: «Mach a mel a pusicʼal chaʼan maʼ wochel ti rico. […] ¿Muʼ ba caj a lon sʌclan jini mach bʌ a tajayic? Lajalʌch lac chubʌʼan bajcheʼ i wichʼ xiyeʼ muʼ bʌ ti wejlel majlel» (Pr. 23:4, 5). Jiñi chubʌʼañʌl tac ti orajach miʼ mejlel ti jilel. Pero ili ora jiñi ricojoʼ bʌ yicʼot jiñi pʼumpʼuñoʼ bʌ yomob i wen tajob taqʼuin. Tiʼ caj iliyi, an i tajol miʼ melob mach bʌ weñic i mach weñix bajcheʼ yilal miʼ qʼuejlelob, miʼ sʌtob i yamigojob o i familia yicʼot miʼ cʼamʼañob (Pr. 28:20; 1 Tim. 6:9, 10). Pero jiñi lac ñaʼtʌbal miʼ coltañonla chaʼan mach ñumeñic ti pʼis bajcheʼ yilal mi laj qʼuel jiñi taqʼuin. Miʼ coltañonla chaʼan maʼañic mi laj cʌlʌx mulan chuqui tac an yicʼot chaʼan tijicñayonla chaʼan jiñi am bʌ lac chaʼan (Ec. 7:11, 12).

17. ¿Bajcheʼ miʼ mejlel lac taj «i tʼan jini weñoʼ bʌ i pusicʼal» muʼ bʌ i yʌjlel ti Proverbios 12:18?

¹⁷ Laʼ lac ñaxan wen ñaʼtan chuqui mi caj la cʌl. Mi maʼañic mi laj cʌntan lac bʌ, miʼ mejlel lac wen low yañoʼ bʌ ti lac tʼan. Jiñi Biblia miʼ yʌl: «An winicob xʼixicob mach bʌ utsic i tʼan. Miʼ jecʼonla bajcheʼ espada. I tʼan jini weñoʼ bʌ i pusicʼal i wentajʌch tsʼac muʼ bʌ i lajmesañonla» (Pr. 12:18). Cheʼ bʌ mi laj cʌntan lac bʌ chaʼan maʼañic lac sub ñumel i sajtemal yambʌlob, wen mi caj la cajñel la quicʼotob (Pr. 20:19). Chaʼan jiñi lac tʼan lajalʌch bajcheʼ tsʼac, yom mi la cotsan ti lac pusicʼal jiñi i Tan Dios (Luc. 6:45). Cheʼ bʌ mucʼʌch lac wen ñaʼtan  jiñi ticʼojel tac am bʌ ti Biblia, jiñi lac tʼan utsʼatax miʼ mejlel ti sujtel tiʼ tojlel yambʌlob (Pr. 18:4).

18. ¿Bajcheʼ miʼ coltañonla Proverbios 24:6 ti lac subtʼan?

¹⁸ Laʼ lac chʌn jacʼ muʼ bʌ i yʌl jiñi organización. Jiñi Biblia miʼ yʌqʼueñonla ili ticʼojel: «Yom pʼipʼ i pusicʼal muʼ bʌ i chaʼlen guerra. Miʼ mʌjlel i chaʼan jini am bʌ cabʌl i yaj tojʼesayajob tiʼ tʼejl» (Pr. 24:6). Laʼ lac ñaʼtan bajcheʼ miʼ coltañonla ili principio ti lac subtʼan yicʼot ti laj cʌntesa. Mach cheʼic mi lac chaʼlen subtʼan bajcheʼ bajñel la com, mucʼʌch lac jacʼ bajcheʼ mi lac subentel. Mi laj cʌntesʌntel yaʼ ti tempa bʌ, baqui cabʌl chuqui miʼ mejlel laj cʌn ti discurso yicʼot ti demostración muʼ bʌ i ñusañob jiñi hermanojob. Cheʼ jaʼel, jiñi i yorganización Jehová miʼ yʌqʼueñonla publicación tac yicʼot video muʼ bʌ i coltan jiñi lac piʼʌlob chaʼan miʼ chʼʌmbeñob i sujm jiñi Biblia. ¿Tsaʼix baʼ cʌñʌ a cʼʌn ti wen jiñi eʼtijib tac?

19. ¿Bajcheʼ yilal maʼ qʼuel jiñi ñaʼtʌbal muʼ bʌ i yʌcʼ Jehová? (Proverbios 3:13-18).

¹⁹ (Pejcan Proverbios 3:13-18). ¡Mucʼʌch lac wen qʼuel ti ñuc jiñi ticʼojel tac muʼ bʌ lac taj yaʼ tiʼ Tʼan Dios! Mucʼʌch i wen coltañonla. Ti ili estudio, tsaʼix laj qʼuele ejemplo tac chaʼan bʌ lac ñaʼtʌbal muʼ bʌ lac taj yaʼ ti Proverbios. Pero Jehová mucʼʌch i yʌqʼueñonla yambʌ ticʼojel tac yaʼ ti yambʌ libro tac am bʌ ti Biblia. Laʼ lac chʌn jacʼ jiñi i ñaʼtʌbal Dios. Mach lac wentajic chuqui miʼ ñaʼtan jiñi pañimil (mulawil). La cujil chaʼan «tijicñayob jini muʼ bʌ i chʌn lotob tiʼ pusicʼal».