1. ¿Bajcheʼ an i sujmlel cheʼ i cʼʌjñibal lac chaʼan Dios, i bajcheʼ miʼ coltañonla chaʼan mi lac taj lac tijicñʌyel?

 JIÑI i sujm bʌ tijicñʌyel mach muqʼuic jach i ñumel. Miʼ mejlel ti jalʼan tiʼ pejtelel ora. Yaʼ ti Cʌntesa ti wits, Jesús tsiʼ yʌlʌ bajcheʼ miʼ mejlel lac taj jiñi tijicñʌyel. Tsiʼ yʌlʌ: «Tijicñayob jiñi muʼ bʌ i ñaʼtañob chaʼan i cʼʌjñibalʌch i chaʼañob Dios» (Mat. 5:3). Yujil chaʼan cheʼ bʌ tsaʼ mejliyonla tsaʼ aqʼuentiyonla lac mulan laj cʌn yicʼot lac chʼujutesan jiñi lac Dios. Jiñʌch woli (choncol) bʌ i taj ti tʼan jiñi Biblia cheʼ bʌ miʼ yʌl chaʼan i cʼʌjñibalʌch lac chaʼan Dios. I joñonla muʼ bʌ lac melben i yeʼtel (troñel) Jehová miʼ mejlel la cubin lac tijicñʌyel come jiñʌch «jiñi tijicña bʌ Dios» (1 Tim. 1:11).

2, 3. a) ¿Majquiyob yambʌ miʼ mejlel i yubiñob i tijicñʌyel tsiʼ yʌlʌ Jesús? b) ¿Chuqui mi caj laj qʼuel ti ili estudio, i chucoch yomʌch mi la cʌl iliyi?

² ¿Yom ba junyaj wen bajcheʼ añonla chaʼan tijicñayonla? Maʼañic. Yaʼ ti Cʌntesa ti wits, Jesús tsiʼ yʌlʌ wen ñuc bʌ i cʼʌjñibal. Tsiʼ yʌlʌ chaʼan «jiñi muʼ bʌ i yubiñob i chʼijyemlel» miʼ mejlel i yubiñob i tijicñʌyel anquese mach tijicñayobic tiʼ caj i mulob o chaʼan woli (yʌquel) i ñusañob wocol. Cheʼ jaʼel, tsiʼ yʌlʌ chaʼan tijicña miʼ mejlel i yubiñob i bʌ «jiñi muʼ bʌ i contrajintelob chaʼan chuqui toj» o muʼ bʌ i wajlentelob tiʼ caj xcʌntʼañob i chaʼan (Mat. 5:4, 10, 11). Pero ¿bajcheʼ miʼ mejlel la cubin i sujm bʌ tijicñʌyel cheʼ bʌ woli lac ñusan ili wocol tac?

³ Jesús tsiʼ pʌsbeyonla chaʼan mach cʼʌñʌlic junyaj wen añonla chaʼan mi lac taj i sujm bʌ tijicñʌyel, yom bʌ mi lac mel (chaʼlen) jiñʌch cheʼ bʌ mi lac ñaʼtan chaʼan i cʼʌjñibalʌch lac  chaʼan Dios yicʼot chaʼan mi lac lʌcʼtesan lac bʌ tiʼ tojlel (Sant. 4:8). ¿Bajcheʼ miʼ mejlel lac mel jiñi? Ti ili estudio mi caj laj qʼuel uxchajp ñuc bʌ i cʼʌjñibal muʼ bʌ caj i coltañonla la cubin i sujm bʌ tijicñʌyel.

4. ¿Chuqui jiñi ñaxam bʌ yom bʌ mi lac mel chaʼan mi lac taj jiñi i sujm bʌ tijicñʌyel? (Salmo 1:1-3).

⁴ ÑAXAM BɅ YOM BɅ MI LAC MEL: Yom mi lac chʼʌm jiñi chʼujul bʌ bʌlñʌcʼʌl chaʼan mi lac taj jiñi i sujm bʌ tijicñʌyel. Joñonla yicʼot jiñi añimal tac mi lac weʼsan lac bʌ chaʼan maʼañic mi lac chʌmel (sajtel). Pero joñon jachla miʼ mejlel lac chʼʌm jiñi chʼujul bʌ bʌlñʌcʼʌl, i yomʌch mi lac mel. Jin chaʼan Jesús tsiʼ yʌlʌ: «Mach ti bʌlñʌcʼʌlic jach yom cuxul jiñi wiñic, cuxulʌch tiʼ pejtelel jiñi tʼan muʼ bʌ i loqʼuel tiʼ yej Jehová» (Mat. 4:4). Jin chaʼan, mi ti jumpʼejlic qʼuin yom mi laj cʌy lac pejcan jiñi Biblia. Jiñi salmista tsiʼ yʌlʌ chaʼan tijicña jiñi wiñic muʼ bʌ i pejcʌben i mandar Jehová ti qʼuiñil yicʼot ti acʼʌlel (pejcan Salmo 1:1-3).

5, 6. a) ¿Chuqui miʼ mejlel laj cʌn yaʼ ti Biblia? b) ¿Bajcheʼ miʼ coltañonla cheʼ bʌ mi lac pejcan jiñi Biblia?

⁵ Jehová miʼ cʼuxbiñonla, jin chaʼan miʼ subeñonla ti Biblia chuqui miʼ mejlel lac mel chaʼan mi lac taj jiñi tijicñʌyel. Jumpʼejl ejemplo, miʼ subeñonla chucoch tsiʼ yʌqʼueyonla jiñi laj cuxtʌlel, bajcheʼ mi lac mejlel ti sujtel tiʼ yamigo yicʼot chuqui miʼ mejlel lac mel chaʼan miʼ ñusan lac mul. Cheʼ jaʼel, miʼ subeñonla chuqui mi caj i mel ti talto bʌ qʼuin (Jer. 29:11). Miʼ wen aqʼueñonla lac tijicñʌyel cheʼ bʌ mi lac pejcan ti Biblia pejtelel iliyi.

⁶ Cheʼ bajcheʼ la cujil, jiñi Biblia miʼ chʼʌm tilel wen tac bʌ ticʼojel muʼ bʌ i coltañonla.  Tijicñayonla cheʼ bʌ mucʼʌch lac jacʼ. Jin chaʼan, mi cʼojyemoñixla mi la cubin tiʼ caj jiñi wocol tac, laʼ lac ñumen aqʼuen i yorajlel lac pejcʌben i Tʼan Jehová yicʼot lac wen ñaʼtan muʼ bʌ i yʌl. Jesús tsiʼ yʌlʌ: «¡Tijicñayob jiñi muʼ bʌ i yubiñob i tʼan Dios yicʼot mucʼʌch i melob!» (Luc. 11:28).

7. ¿Bajcheʼ miʼ mejlel laj cʼʌn ti wen jiñi lac tiempo cheʼ bʌ mi lac pejcan jiñi Biblia?

⁷ Cheʼ bʌ mi lac pejcan jiñi Biblia, laʼ la cʌqʼuen i yorajlel chaʼan «mi lac ñusan lac bʌ». ¿Chuqui yom i yʌl iliyi? Laʼcu lac ñaʼtan ili ejemplo. Laʼcu lac ñaʼtan chaʼan an majqui miʼ melbeñonla (pʌtbeñonla) jiñi bʌlñʌcʼʌl muʼ bʌ lac wen mulan. Pero orajonjachla o cabʌl jax chuqui an ti la col i cheʼ jach mi lac ti ti bucʼ majlel i maʼañix mi lac ñusan lac bʌ ti chuqui woli laj cʼux. Cheʼ bʌ miʼ yujtel laj cʼux jiñi lac waj, mi laj qʼuel chaʼan orajach tsaʼ lac ti ti cʼuxu, i mi lac ñaʼtan chaʼan i wentʌlel cʼunteʼ tsaʼ laj cʼuxu chaʼan miʼ mejlel lac ñusan lac bʌ. Cheʼʌch miʼ mejlel ti ujtel jaʼel cheʼ bʌ mi lac pejcan jiñi Biblia. Tajol ora orajonjachla i maʼañix «mi lac ñusan lac bʌ». Laʼ la cʌqʼuen i yorajlel chaʼan mi lac ñusan lac bʌ cheʼ bʌ mi lac pejcan jiñi Biblia, jin chaʼan laʼ lac ñop lac ñaʼtan chaʼan woli laj qʼuel jiñi woli bʌ i yujtel, chaʼan woli la cubin jiñi woli bʌ i yʌjlel yicʼot laʼ lac wen ñaʼtan jiñi tsaʼ bʌ lac pejca. Mi mucʼʌch lac mel pejtelel iliyi, ñumen tijicña mi caj la cubin.

8. ¿Bajcheʼ woliʼ tsʼʌctesan i yeʼtel «jiñi xucʼul bʌ xyaj eʼtel wen am bʌ i ñaʼtʌbal»? (Qʼuele jaʼel jiñi nota).

⁸ Jesús tsiʼ yʌqʼue tiʼ wenta «jiñi xucʼul bʌ xyaj eʼtel wen am bʌ i ñaʼtʌbal» chaʼan miʼ yʌqʼueñonla chʼujul bʌ bʌlñʌcʼʌl cheʼ tiʼ yorajlel, i cabʌlʌch bʌlñʌcʼʌl an lac chaʼan (Mat. 24:45). b Pejtelel muʼ bʌ i chajpan jiñi xucʼul bʌ xyaj eʼtel loqʼuemʌch ti Biblia (1 Tes. 2:13). Ili miʼ coltañonla chaʼan mi laj cʌn chuqui miʼ ñaʼtan Jehová, cheʼ bajcheʼ miʼ yʌl jiñi Biblia. Jin chaʼan, mi lac pejcan jiñi revista tac Lac Tsictesʌbentel yicʼot ¡Jamʌx a wut!, i jiñi tema tac muʼ bʌ i loqʼuel ti jw.org. Cheʼ jaʼel, mi lac chajpan lac bʌ chaʼan jiñi tempa bʌ tac i mi laj qʼuel ti jujumpʼejl uw jiñi programa tac chaʼan Broadcasting ti lac tʼan. Cheʼ mi lac chʼʌm ili chʼujul bʌ bʌlñʌcʼʌl mi caj i coltañonla chaʼan mi lac mel jiñi i chaʼchajplel muʼ bʌ i yʌqʼueñonla i sujm bʌ tijicñʌyel.

9. ¿Chuqui jiñi i chaʼchajplel yom bʌ mi lac mel chaʼan mi lac taj i sujm bʌ tijicñʌyel?

⁹ I CHAʼCHAJPLEL YOM BɅ MI LAC MEL: Yom mi lac jacʼben i mandar tac Jehová chaʼan mi la cubin i sujm bʌ tijicñʌyel. Juntiquil salmista tiʼ tsʼijbu: «Tijicñayob pejtel muʼ bʌ i bʌcʼñañob lac Yum, muʼ bʌ i chaʼleñob xʌmbal tiʼ bijlel» (Sal. 128:1). Cheʼ bʌ mi lac bʌcʼñan Jehová yom i yʌl chaʼan mi lac wen qʼuel ti ñuc i mach la comic lac mel maʼañic bʌ miʼ mulan (Pr. 16:6). Jin chaʼan, mi lac chaʼlen wersa chaʼan mi lac bej jacʼben i mandar chaʼan chuqui jiñi wem bʌ yicʼot jiñi mach bʌ weñic muʼ bʌ i yʌl jiñi Biblia (2 Cor. 7:1). Mi mucʼʌch lac mel muʼ bʌ i mulan Jehová yicʼot mi lac tsʼaʼlen muʼ bʌ i tsʼaʼlen, mi caj la cubin lac tijicñʌyel (Sal. 37:27; 97:10; Rom. 12:9).

10. ¿Chuqui yom mi lac mel cheʼ la cujilix chuqui yom bʌ Dios? (Romanos 12:2).

¹⁰ (Pejcan Romanos 12:2). Tajol an majqui yujil chaʼan Jehová jiñʌch am bʌ tiʼ wenta chaʼan miʼ yʌl chuqui jiñi wem bʌ yicʼot jiñi mach bʌ weñic, pero yomʌch miʼ jacʼben jiñi i mandar tac jaʼel. Laʼ la cʌl jumpʼejl lajiya. Juntiquil lac piʼʌl yujil chaʼan jiñi yumʌl miʼ mejlel i yʌl bajcheʼ cʼamel velocidad yom miʼ ñijcan i carro ti carretera, pero tajol mach yomic i jacʼ jiñi ley. Jin chaʼan cʌlʌx ora miʼ ñijcan i carro. Joñonla yom mi lac pʌs ti lac melbal  (chaʼlibal) mi mucʼʌch lac ñop chaʼan jiñi ñumen wem bʌ jiñʌch cheʼ mi laj qʼuel ti ñuc jiñi i mandar tac Jehová (Pr. 12:28). David cheʼʌch tsiʼ qʼuele bajcheʼ jiñi come tiʼ sube Jehová: «Jatet mi caj a pʌsbeñon jini bij baʼan j cuxtilel. Cabʌl jax c tijicñʌyel ti a tojlel. Yaʼan c wenlel ti ñoj bʌ a cʼʌb tiʼ pejtelel ora» (Sal. 16:11).

11, 12. a) ¿Chucoch yom mi laj cʌntan lac bʌ cheʼ bʌ an chuqui woli lac pensarin o chʼijyemonla? b) ¿Bajcheʼ miʼ coltañonla muʼ bʌ i yʌl Filipenses 4:8 chaʼan mi lac yajcan ti wen jiñi lac ñusaqʼuin?

¹¹ Cheʼ bʌ an chuqui woli lac pensarin o chʼijyemonla, tajol mi lac sʌclan chuqui miʼ mejlel i coltañonla chaʼan mi lac ñajʌtesan jiñi lac wocol tac, i maʼañic i wocolel jiñi. Pero yom mi laj cʌntan lac bʌ chaʼan maʼañic mi lac mel muʼ bʌ i tsʼaʼlen Jehová (Efes. 5:10-12, 15-17).

¹² Ti jiñi carta tsaʼ bʌ i tsʼijbu jiñi apóstol Pablo tiʼ tojlel jiñi xñoptʼañob añoʼ bʌ ti Filipos, tiʼ subeyob chaʼan miʼ chʌn ñaʼtañob chuqui toj bʌ, sʌc bʌ, wem bʌ yicʼot pejtelel muʼ bʌ i ñijcañonla lac pʌs cʼuxbiya (pejcan Filipenses 4:8). Anquese Pablo mach jiñic woliʼ taj ti tʼan jiñi lac ñusaqʼuin tac, jiñi tsaʼ bʌ i yʌlʌ miʼ mejlel i coltañonla cheʼ bʌ mi lac yajcan jiñi lac ñusaqʼuin. Laʼcu lac mel iliyi: Cheʼ bʌ miʼ tilel jiñi tʼan «chuqui» laʼ laj qʼuextan yicʼot jiñi tʼan «cʼay», «película tac», «libro tac» o «videojuego tac». Ili mi caj i coltañonla lac ñaʼtan chuqui tac wen miʼ qʼuel Dios yicʼot chuqui mach bʌ weñic. La com lac jacʼ jiñi i mandar tac Jehová (Sal. 119:1-3). Cheʼ bajcheʼ jiñi, yicʼot sʌc bʌ laj conciencia mi caj i mejlel lac mel jiñi yambʌ muʼ bʌ caj i coltañonla lac taj i sujm bʌ tijicñʌyel (Hech. 23:1).

13. ¿Chuqui jiñi i yuxchajplel muʼ bʌ caj i yʌqʼueñonla i sujm bʌ tijicñʌyel? (Juan 4:23, 24).

¹³ I YUXCHAJPLEL YOM BɅ MI LAC MEL: Yomʌch mi lac wen qʼuel mi jiñʌch mi la cʌcʼ ti ñaxan jiñi i chʼujutesʌntel Jehová. Yomʌch mi lac chʼujutesan come jiñʌch tsaʼ bʌ i meleyonla (Apoc. 4:11; 14:6, 7). Jin chaʼan, jiñi ñumen ñuc bʌ i cʼʌjñibal yom ti laj cuxtʌlel jiñʌch cheʼ bʌ mi lac chʼujutesan cheʼ bajcheʼ miʼ mulan yicʼot «ti espíritu yicʼot tiʼ sujmlel» (pejcan Juan 4:23, 24). La com chaʼan jiñi chʼujul bʌ i yespíritu jiñʌch muʼ bʌ i coltañonla chaʼan mi lac chʼujutesan ti wen cheʼ bajcheʼ miʼ yʌl jiñi Biblia. Jiñi lac chʼujutesaya jiñʌch jiñi ñumen ñuc bʌ i cʼʌjñibal yom ti lac tojlel mach yʌlʌyic mi chumulonla baqui mʌctʌbil jiñi la queʼtel. Ti ili ora ñumen ti 100 hermanojob añob ti cárcel tiʼ cajach i testigojob Jehová. c Pero tijicñayob come miʼ chaʼleñob wersa chaʼan miʼ chaʼleñob oración, estudio yicʼot chaʼan miʼ subeñob yañoʼ bʌ jiñi wen tʼan. Anquese mi lac pʼajtʌl (ñiqʼuisubentel) o mi lac tsʼaʼlentel, tijicñayonla cheʼ la cujil chaʼan Jehová maʼañic miʼ cʌyonla yicʼot mi caj i yʌqʼueñonla i bendición (Sant. 1:12; 1 Ped. 4:14).

14. ¿Chuqui tsiʼ chaʼle juntiquil hermano ti Tayikistán, i chucoch?

¹⁴ An experiencia tac muʼ bʌ i pʌsbeñonla chaʼan jiñi uxchajp ujtel bʌ laj qʼuel mucʼʌch i yʌqʼueñonla i sujm bʌ tijicñʌyel, mach yʌlʌyic chuqui woli lac ñusan. Laʼ laj qʼuel tsaʼ bʌ ujti tiʼ tojlel Yovidón Boboyónov, juntiquil chʼiton am bʌ 19 i jabilel ti Tayikistán. Cheʼ ti 4 chaʼan octubre, 2019, tsaʼ chujqui majlel come maʼañic tsiʼ jacʼʌ i mel jiñi servicio militar. Cabʌl uw tsaʼ otsʌnti ti cárcel i tsaʼ wen ticʼlʌnti bajcheʼ juntiquil maleante. Jiñi medios de comunicación ti cabʌl país tsiʼ wen tajayob ti tʼan bajcheʼ tsaʼ ticʼlʌnti ili hermano. Tsaʼ ajli chaʼan tsiʼ  jatsʼʌyob chaʼan miʼ wersa xicʼob chaʼan miʼ mel jumpʼejl juramento yicʼot chaʼan miʼ xoj jiñi uniforme chaʼan bʌ soldadojob. Cheʼ jiñi tsaʼ chojqui majlel baqui miʼ yʌjqʼuelob ti tsʌts bʌ eʼtel jinto cheʼ bʌ jiñi presidente ti jiñi país tsiʼ yʌcʼʌ i tʼan chaʼan miʼ locʼsʌntel. Yovidón xucʼul yicʼot tijicña tsaʼ ajñi. ¿Chuqui tsiʼ colta? Tiʼ pejtelel ora tsiʼ cʌñʌ chaʼan i cʼʌjñibalʌch i chaʼan Dios.

15. ¿Bajcheʼ tsiʼ pʼʌtʼesa i ñopoñel Yovidón cheʼ bʌ yaʼan ti cárcel?

¹⁵ Cheʼ bʌ Yovidón an ti cárcel, tsaʼʌch i pʼʌtʼesa i ñopoñel anquese maʼañic i chaʼan jiñi Biblia mi jiñicto jiñi lac jun tac. ¿Bajcheʼ tsiʼ mele? Cheʼ bʌ jiñi hermanojob miʼ chʼʌmbeñob majlel chuqui tac miʼ cʼux, miʼ tsʼijbubeñob jiñi texto diario ti jiñi bolsa tac. Jin chaʼan, Yovidón tsaʼ mejli i pejcan jiñi Biblia yicʼot i wen ñaʼtan muʼ bʌ i yʌl ti jujumpʼejl qʼuin. Cheʼ bʌ Yovidón tsaʼ loqʼui ti cárcel, tsiʼ yʌqʼue ili ticʼojel jiñi maxto bʌ i ñusayob tsʌts tac bʌ wocol: «Chaʼlenla wersa chaʼan mi laʼ lʌcʼtesan laʼ bʌ ti Jehová ti ili ora cheʼ bʌ librejettola. I chaʼan mi laʼ mel jiñi, ñuc i cʼʌjñibal cheʼ mi laʼ pejcan jiñi Biblia yicʼot jiñi lac jun tac».

16. ¿Chuqui tsiʼ yʌcʼʌ tiʼ ñaʼtʌbal Yovidón?

¹⁶ Jiñi hermano Yovidón tsaʼʌch i jacʼʌ jiñi i mandar tac Jehová. Maʼañic tsiʼ ñaʼta yicʼot tsiʼ mele mach tac bʌ weñic, tsiʼ yʌcʼʌ i ñaʼtʌbal ti Jehová yicʼot ti jiñi wen ñuc bʌ i cʼʌjñibal miʼ  qʼuel. Tsiʼ yʌqʼue i yorajlel i qʼuel jiñi melbil tac bʌ i chaʼan Jehová. Ti jujumpʼejl sʌcʼan miʼ yubiben i cʼay jiñi xmateʼmut, i cheʼ ti acʼʌlel miʼ wen qʼuel jiñi luna yicʼot jiñi ecʼ tac. Tsiʼ yʌlʌ: «Ili majtañʌl tac tilem bʌ ti Jehová tsiʼ yʌqʼueyon c tijicñʌyel». Cheʼ bʌ mi lac wen qʼuel ti ñuc pejtelel muʼ bʌ i yʌqʼueñonla Jehová, tijicñayonla i jiñi miʼ yʌqʼueñonla lac pʼʌtʌlel chaʼan mi laj cuch jiñi wocol tac.

17. ¿Bajcheʼ miʼ mejlel i coltan 1 Pedro 1:6, 7 juntiquil woli bʌ i ñusan jumpʼejl wocol cheʼ bajcheʼ i chaʼan Yovidón?

¹⁷ Yovidón tsiʼ yʌcʼʌ ti ñaxan jaʼel jiñi i chʼujutesʌntel Jehová. Yujil chaʼan jiñi ñumen ñuc bʌ i cʼʌjñibal jiñʌch cheʼ xucʼul miʼ yajñel. Jesús tsiʼ yʌlʌ: «Chʼujutesan jiñi a Dios Jehová i jin jach yom maʼ melben i yeʼtel» (Luc. 4:8). Jiñi comandantejob yic’ot jiñi soldadojob yomob chaʼan Yovidón miʼ cʌy jiñi ñopol bʌ i chaʼan. Pero Yovidón qʼuin acʼbal tsiʼ pejca Jehová ti oración, i tsiʼ cʼajtibe chaʼan miʼ coltan chaʼan chʌn xucʼul miʼ yajñel. Anquese tsaʼ ticʼlʌnti maʼañic tsiʼ cʌyʌ jiñi ñopol bʌ i chaʼan. Cheʼ bajcheʼ jiñi, tijicña mi yubin come jiñi jajtsʼel yicʼot cheʼ tsaʼ otsʌnti ti cárcel tsiʼ yʌqʼue jiñi maxto bʌ añic i chaʼan ti ñaxan: Tsaʼ qʼuejli miʼ sujmʌch jiñi i ñopoñel (pejcan 1 Pedro 1:6, 7).

18. ¿Bajcheʼ miʼ mejlel lac chʌn ubin lac tijicñʌyel?

¹⁸ Jehová yujil chuqui jiñi i cʼʌjñibal bʌ lac chaʼan chaʼan mi lac taj jiñi i sujm bʌ tijicñʌyel. Mi mucʼʌch lac mel jiñi uxchajp tsaʼ bʌ laj qʼuele ti ili estudio, mi caj lac chʌn ubin lac tijicñʌyel anquese an lac wocol tac. Cheʼ jiñi mi caj i mejlel la cʌl jaʼel: «Tijicña miʼ yajñelob jini winicob xʼixicob [...] come i chaʼañob Dios, lac Yum» (Sal. 144:15).