1, 2. a) ¿Chuqui an i meleyob jiñi yumʌlob tiʼ contra jiñi i wiñicob Jehová, i chuqui an i meleyob jiñi hermanojob? b) ¿Chucoch miʼ mejlel la cubin lac tijicñʌyel anquese mi laj contrajintel? (Taja ti tʼan jaʼel jiñi foto tac am bʌ tiʼ tejchibal).

 TI ILI ora ñumen ti 30 país yicʼot territorio baqui mʌctʌbil jiñi la queʼtel (lac troñel). I an baqui jiñi añoʼ bʌ i yeʼtel tsiʼ yotsayob ti cárcel jiñi la quermañujob. ¿Chucoch? Tiʼ wut Jehová maʼañic tsiʼ meleyob (chaʼleyob) mach bʌ weñic. Mucʼ jach i wen tsajiñob (qʼuelob) jiñi Biblia, miʼ subeñob yambʌlob chuqui ñopolob i chaʼan i miʼ majlelob ti tempa bʌ. Cheʼ jaʼel, maʼañic miʼ yotsañob i bʌ ti política. Pero anquese miʼ wen tsʼaʼlentelob, ili i wiñicob Dios xucʼul b miʼ yajñelob yicʼot miʼ pʌsob chaʼan miʼ wen cʼuxbiñob Jehová, ili miʼ wen aqʼueñob i tijicñʌyel.

² Tajol qʼuelbil a chaʼan i fotojlel ili hermanojob yicʼot chaʼan tseʼtseʼñayob. Wen tijicñayob come yujilob chaʼan Jehová tijicña cheʼ xucʼul añob (1 Cr. 29:17a). Jesús tsiʼ yʌlʌ: «Tijicñayob jiñi muʼ bʌ i contrajintelob chaʼan chuqui toj […]. Yom tijicñayetla, tijpʼenla ti laʼ tijicñʌyel come ñucʌch jiñi laʼ chobejtʌbal» (Mat. 5:10-12).

3. Cheʼ bajcheʼ miʼ yʌl Hechos 4:19, 20, ¿chuqui tsiʼ meleyob jiñi apóstolob cheʼ bʌ tsaʼ contrajintiyob, i chucoch?

³ Jiñi la quermañujob cheʼ woli (choncol) i ñusañob bajcheʼ tsiʼ ñusayob jiñi apóstolob cheʼ ti ñaxam bʌ siglo cheʼ bʌ tsaʼ contrajintiyob tiʼ caj woli (yʌquel) i subob chaʼan bʌ Jesús. Jiñi juezob mach junsujtelic jach «tiʼ subeyob chaʼan miʼ cʌyob tʼan tiʼ cʼabaʼ Jesús» (Hech. 4:18; 5:27, 28, 40). ¿Chuqui tsiʼ meleyob jiñi apóstolob? (Pejcan Hechos 4:19, 20). Yujilob chaʼan juntiquil ñumen ñuc bʌ i yeʼtel tiʼ subeyob chaʼan miʼ subeñob wen tʼan jiñi tejclum yicʼot miʼ yʌcʼob ti cʌjñel chaʼan bʌ Cristo (Hech. 10:42). Jin chaʼan, Pedro yicʼot Juan tsiʼ chaʼleyob tʼan tiʼ wenta jiñi apóstolob, i tiʼ subeyob jiñi juezob chaʼan mi caj i jacʼbeñob i tʼan Dios i mach jiñic i chaʼañob, i tsiʼ yʌlʌyob chaʼan maʼañic mi caj i cʌyob tʼan tiʼ cʼabaʼ Jesús. Lajal bajcheʼ tsiʼ cʼajtibeyob: «¿Chucoch mi laʼ ñiqʼui al jiñi? ¿Ñumen ñuquetbala bajcheʼ Dios mi la wubin?».

4. Cheʼ bajcheʼ miʼ yʌl Hechos 5:27-29, ¿chuqui ti ejemplo tsiʼ yʌcʼʌyob jiñi apóstolob tiʼ tojlel jiñi i sujm bʌ xñoptʼañob, i bajcheʼ miʼ mejlel lac lajin?

⁴ Jiñi apóstolob tsiʼ yʌcʼʌyob wem bʌ ejemplo am bʌ i lajiyob tilel jiñi i sujm bʌ xñoptʼañob: Jiñʌch cheʼ mi lac «ñumen jacʼben i tʼan Dios bajcheʼ yumʌl i mach jiñic jiñi wiñicob» (pejcan Hechos 5:27-29). Cheʼ bʌ tsaʼ ujtiyob ti jajtsʼel tiʼ caj i xucʼtʌlelob, «tsaʼ loqʼuiyob yaʼ baqui an jiñi Sanedrín, tijicñayob come Dios tsiʼ chʼʌmʌyob ti ñuc chaʼan miʼ ñusañob wocol tiʼ caj i cʼabaʼ Jesús», i tsiʼ bej chaʼleyob subtʼan (Hech. 5:40-42).

5. ¿Chuqui ti cʼajtiya tac mi caj lac jacʼ?

⁵ Jiñi wem bʌ ejemplo tsaʼ bʌ i pʌsʌyob jiñi apóstolob miʼ yʌcʼ ti loqʼuel cʼajtiya tac. Jumpʼejl ejemplo, ¿bajcheʼ tsaʼ mejli i jacʼbeñob i tʼan Dios i mach jiñic i chaʼan wiñicob pero cheʼ jaʼel miʼ chucob i bʌ tiʼ tojlel «jiñi añoʼ bʌ i yeʼtel»? (Rom. 13:1). ¿I bajcheʼ miʼ mejlel lac jacʼben i tʼan jiñi «yumʌlob yicʼot añoʼ bʌ i yeʼtel», cheʼ bajcheʼ tsiʼ yʌlʌ jiñi apóstol Pablo, pero xucʼul mi la cajñel tiʼ wut Dios, jiñi ñumen ñuc bʌ yumʌl? (Tito 3:1).

6. a) ¿Majquiyob «jiñi añoʼ bʌ i yeʼtel» muʼ bʌ i yʌjlelob ti Romanos 13:1, i chuqui yom mi lac mel joñonla? b) ¿Chuqui jiñi la cujil bʌ tiʼ tojlel jiñi yumʌlob?

⁶ (Pejcan Romanos 13:1). Ti ili versículo, jiñi tʼan «jiñi añoʼ bʌ i yeʼtel» jiñobʌch jiñi yumʌlob añoʼ bʌ i yeʼtel tiʼ tojlel yambʌ lac piʼʌlob. Jiñi xñoptʼañonbʌla yom mi lac jacʼbeñob i tʼan ili yumʌlob. Miʼ chaʼleñob coltaya chaʼan maʼañic miʼ cʌlʌx ujtel mach bʌ weñic, miʼ yʌcʼob ti tsʼʌctesʌntel jiñi ley i an i tajol muʼto i coltañob i tejclum Jehová (Apoc. 12:16). Jin chaʼan, mi lac subentel chaʼan mi la cʌqʼueñob jiñi tojoñel, mi lac jacʼbeñob i tʼan yicʼot mi laj qʼuelob ti ñuc (Rom. 13:7). Pero ili yumʌlob añob i yeʼtel come Jehová tsiʼ yʌqʼueyob. Cheʼʌch tsiʼ yʌlʌ Jesús cheʼ bʌ jiñi gobernador romano Poncio Pilato tsiʼ melbe cʼajtiya tac. Cheʼ bʌ Pilato tiʼ sube chaʼan an i yeʼtel chaʼan miʼ coltan o chaʼan miʼ yʌcʼ ti tsʌnsʌntel, Jesús tiʼ sube: «Cheʼ machic tsiʼ yʌqʼueyet a weʼtel Dios maʼañic mi jumpʼejlic a weʼtel tic tojlel» (Juan 19:11). Cheʼ bajcheʼ Pilato, tiʼ pejtelel jiñi yumʌlob yicʼot jiñi políticojob ti ili ora an jach baqui jaxʌl i yeʼtelob.

7. ¿Baqui tac ora mach yomic mi lac jacʼbeñob i tʼan jiñi yumʌlob, i chuqui jiñi yom bʌ miʼ ñaʼtañob?

⁷ Jiñi xñoptʼañonbʌla mi lac jacʼben i tʼan jiñi yumʌlob cheʼ bʌ jiñi ley muʼ bʌ i yʌcʼob maʼañic miʼ ñusan ti pʼis i mandar tac Jehová. Pero cheʼ bʌ miʼ subeñoñobla lac mel maʼañic bʌ miʼ mulan Dios o miʼ mʌctañoñobla chaʼan maʼañic mi lac mel yom bʌ Dios, maʼañic mi lac jacʼbeñob i tʼan. Jumpʼejl ejemplo, tajol miʼ yʌlob chaʼan jiñi xcolelob miʼ yochelob ti soldado yaʼ tiʼ país. c O tajol maʼañix miʼ yʌqʼueñoñobla laj cʼʌn jiñi lac Biblia, lac jun tac, o miʼ mʌctañob jiñi lac subtʼan yicʼot lac tempa bʌ. Dios mi caj i chaʼlen meloñel tiʼ tojlel jiñi yumʌlob mi ñumeñix ti pʼis bajcheʼ miʼ cʼʌñob i yeʼtel, jumpʼejl ejemplo, jiñʌch cheʼ bʌ miʼ ticʼlañob jiñi xcʌntʼañob i chaʼan Cristo. ¡Jehová woliʼ qʼuelob! (Ec. 5:8, TNM).

8. ¿Chucoch mach lajalic Jehová bajcheʼ jiñi yumʌlob?

⁸ Jiñi añoʼ bʌ i yeʼtel cabʌl bajcheʼ miʼ mejlel i coltañoñobla i añob i pʼʌtʌlel tiʼ tojlel yambʌlob. Pero jiñi mach yomic i yʌl chaʼan tojob yicʼot chaʼan ñumen ñucob. Añʌch Juntiquil toj bʌ yicʼot ñumen ñuc bʌ, jiñʌch Jehová Dios. Yaʼ ti Biblia chʌnsujtel miʼ subentel Jehová bajcheʼ jiñi ñumen ñuc bʌ (Dn. 7:18, 22, 25, 27, TNM).

9. ¿Chuqui tsaʼ pʌsbenti jiñi xʼaltʼan Daniel?

⁹ Jiñi xʼaltʼan Daniel an chuqui tac tsaʼ pʌsbenti muʼ bʌ i pʌs chaʼan Jehová jiñʌch jiñi ñumen ñuc bʌ tiʼ tojlel pejtelel jiñi añoʼ bʌ i yeʼtel. Ti ñaxan tsiʼ qʼuele chʌncojt jontol (simaron) bʌ bʌteʼel, ili jiñʌch jiñi yumʌntel ti wajali yicʼot ti ili ora: Babilonia, Medopersia, Grecia, Roma yicʼot jiñi yumʌntel baqui ochem Reino Unido yicʼot Estados Unidos, woli bʌ ti yumʌntel ili ora (Dn. 7:1-3, 17). Cheʼ jiñi, Daniel tsiʼ qʼuele chaʼan Jehová buchul tiʼ trono yaʼ ti panchan (Dn. 7:9, 10). Jiñi tsaʼ bʌ i qʼuele ili xʼaltʼan ti wiʼil jiñʌch junchajp i ticʼol jiñi yumʌlob ti ili ora.

10. Cheʼ bajcheʼ miʼ yʌl Daniel 7:13, 14, 27, ¿majquiyob miʼ yʌqʼuen Jehová i yeʼtel ila ti Lum, i chuqui miʼ pʌs tiʼ tojlel?

¹⁰ (Pejcan Daniel 7:13, 14, 27). Daniel miʼ qʼuel chaʼan Dios miʼ chilben i yeʼtel pejtelel jiñi yumʌlob ila ti Pañimil i miʼ yʌqʼuen jiñi yomʌch bʌ miʼ yʌqʼuentelob yicʼot jiñi ñumen pʼʌtʌloʼ bʌ. ¿Majquiyob? Jiñʌch Jesucristo, juntiquil «cheʼ bajcheʼ I Yalobil Winic» yicʼot  jiñi «i chaʼañoʼ bʌ Dios», jiñi 144 mil muʼ bʌ caj i chaʼleñob yumʌntel «tiʼ pejtelel ora» (Dn. 7:18). Tsiquil chaʼan Jehová jiñʌch jiñi Ñumen ñuc bʌ come jin jach miʼ mejlel i mel iliyi.

11. ¿Chuqui yambʌ tiʼ tsʼijbu Daniel muʼ bʌ i pʌs chaʼan Jehová jiñʌch ñumen ñuc bʌ ti jiñi tejclum tac?

¹¹ Jiñi tsaʼ bʌ i qʼuele Daniel miʼ pʌs chaʼan i sujmʌch jiñi tsaʼix bʌ i yʌlʌ. Jiñi xʼaltʼan tsiʼ yʌlʌ chaʼan jiñi «Dios am bʌ ti panchan […] miʼ choc loqʼuel rey, miʼ waʼchocon rey». I tsiʼ bej alʌ: «An i pʼʌtʌlel lac Yum tiʼ tojlel yumʌlob ti pañimil. Miʼ yʌqʼuen i yumʌntel majqui jach yom» (Dn. 2:19-21; 4:17). ¿Añix ba i choco loqʼuel o i waʼchoco reyob Jehová? Añʌchix.

12. Alʌ jumpʼejl ejemplo chaʼan bajcheʼ Jehová tsiʼ choco loqʼuel reyob ti wajali. (Qʼuele jiñi dibujo).

¹² Jehová an i pʌsʌ chaʼan jiñʌch ñumen ñuc bʌ tiʼ tojlel «jiñi añoʼ bʌ i yeʼtel». Laʼ laj qʼuel uxpʼejl ejemplo. Jiñi faraón ti Egipto tsiʼ ticʼla jiñi i tejclum Jehová, i maʼañic tsiʼ jacʼʌ i yʌcʼob ti libre. Pero Dios tsiʼ coltayob i tsiʼ jisa jiñi faraón yaʼ ti Chʌchʌc bʌ mar (Éx. 14:26-28; Sal. 136:15). Jiñi rey Belsasar ti Babilonia tsiʼ mele ñuc bʌ qʼuiñijel i tiʼ tsʼaʼle «lac Yum am bʌ ti Panchan» yicʼot tsiʼ ñuqʼuesa jiñi «dios tac melbil bʌ ti oro, ti plata» i mach jiñic Jehová (Dn. 5:22, 23). Pero Dios tsiʼ yʌcʼʌ ti quisin ili chanchan jax bʌ wiñic. «Ti jim bʌ acʼʌlel» Belsasar tsaʼ tsʌnsʌnti, i jiñi i yumʌntel tsaʼ aqʼuenti jiñi medojob yicʼot jiñi persajob (Dn. 5:28, 30, 31). Jiñi rey Herodes Agripa I ti Palestina, tiʼ tsʌnsa jiñi apóstol Santiago i cheʼ jiñi tsiʼ yotsa ti cárcel jiñi apóstol Pedro come yom i tsʌnsan. Pero Dios tsiʼ mʌcta chaʼan maʼañic miʼ mel jiñi. «Jiñi i yángel Jehová ti ora tsiʼ yʌcʼʌ ti cʼamʼan», i Herodes tsaʼ chʌmi (sajti) (Hech. 12:1-5, 21-23).

13. Alʌ jumpʼejl ejemplo chaʼan bajcheʼ Jehová tsiʼ jisa jiñi reyob tsaʼ bʌ i temeyob i bʌ.

¹³ Jehová an i pʌsʌ jaʼel chaʼan jiñʌch jiñi ñumen ñuc bʌ anquese jiñi yumʌlob miʼ temob i bʌ. Tsiʼ colta jiñi israelitajob chaʼan miʼ jisan jiñi 31 reyob cananeojoʼ bʌ yicʼot chaʼan miʼ yochelob ti jiñi Lum tsaʼ bʌ wʌn subentiyob (Jos. 11:4-6, 20; 12:1, 7, 24). Tiʼ tsʌnsa jaʼel jiñi rey Ben-Hadad yicʼot yambʌ 32 reyob siriojoʼ bʌ tsaʼ bʌ majliyob ti guerra tiʼ contra Israel (1 R. 20:1, 26-29).

14, 15. a) ¿Chuqui tsiʼ yʌlʌ jiñi rey Nabucodonosor yicʼot Darío chaʼan jiñi i yumʌntel Jehová? b) ¿Chuqui tsiʼ yʌlʌ juntiquil salmista tiʼ tojlel Jehová yicʼot jiñi i tejclum?

 ¹⁴ Jehová an i chʌn pʌsʌ chaʼan jiñʌch jiñi Ñumen ñuc bʌ. Tsiʼ yʌcʼʌ ti sojquel Nabucodonosor rey bʌ ti Babilonia cheʼ bʌ tsaʼ caji i wen qʼuel i bʌ ti ñuc tiʼ caj jiñi i pʼʌtʌlel yicʼot i ñuclel i maʼañic tsiʼ yʌqʼue i ñuclel Jehová. Cheʼ bʌ Nabucodonosor tsaʼix i chaʼ ñaʼta pañimil, tsiʼ yʌqʼue i ñuclel Jehová yicʼot tsiʼ cʌñʌ chaʼan jiñi i yumʌntel miʼ jalijel tiʼ pejtelel ora. I tsiʼ yʌlʌ chaʼan maʼañic majqui miʼ mejlel i mʌctan chaʼan miʼ mel chuqui yom (Dn. 4:30, 33-35). Cheʼ bʌ tsaʼ qʼuejli chaʼan xucʼulʌch Daniel yicʼot cheʼ bʌ Jehová tsiʼ colta chaʼan maʼañic miʼ cʼuxtʌl ti jiñi bajlum tac, jiñi rey Darío tsiʼ yʌlʌ iliyi: «Yom mi laʼ bʌcʼñan i Dios Daniel tiʼ pejtelel c yumʌntel. Yom mi laʼ pʼis ti wenta, come jiñʌch Cuxul bʌ Dios muʼ bʌ i yajñel tiʼ pejtelel ora. Maʼanic mi caj i jilel i yumʌntel. Miʼ yajñel i pʼʌtʌlel tiʼ pejtelel ora» (Dan. 6:7-10, 19-22, 25-27).

¹⁵ Juntiquil salmista tsiʼ yʌlʌ: «Lolom jach miʼ temob i tʼan jini gentilob, come lac Yum miʼ contrajiñob. Lac Yum miʼ yʌcʼ ti jilel chuqui miʼ lon ñaʼtañob i mel winicob xʼixicob». I tsiʼ bej alʌ: «Tijicñayob muʼ bʌ i yumañob Dios, tijicñayob jini yajcʌbiloʼ bʌ muʼ bʌ i yochelob tiʼ chaʼan Dios» (Sal. 33:10, 12). Jin chaʼan yomʌch xucʼulonla tiʼ wut Jehová.

16. ¿Chuqui miʼ mejlel lac ñop, i chucoch? (Qʼuele jiñi dibujo).

¹⁶ Tsaʼix laj qʼuele chuqui tsiʼ mele Jehová ti wajali. Jin chaʼan, ¿chuqui mi caj i mel ti talto bʌ qʼuin? Miʼ mejlel lac ñop chaʼan Jehová mi caj i coltan jiñi i wiñicob cheʼ tiʼ yorajlel «cabʌl wocol» (Mat. 24:21; Dn. 12:1). Mi caj i mel cheʼ bʌ jiñi junmojt tejclum tac, cʌmbil bʌ bajcheʼ Gog de Magog, miʼ contrajin jiñi xucʼul bʌ i wiñicob Jehová. Maʼañic mi caj i mʌlbeñob (jotbeñob) Jehová yicʼot jiñi i yángelob anquese miʼ temob i bʌ jiñi 193 tejclum tac ochem bʌ ti jiñi Naciones Unidas.  Jehová miʼ yʌcʼ i tʼan: «Cheʼʌch mi caj c pʌs c ñuclel come chʼujulon. Mi caj cʌcʼ ti cʼuxbintel j Cʼabaʼ tiʼ tojlel cabʌl tejclum tac. Mi caj i ñaʼtañob Yumʌlon» (Ez. 38:14-16, 23; Sal. 46:10).

17. ¿Chuqui mi caj i chaʼleñob jiñi reyob ti Pañimil, i chuqui mi caj i yujtel tiʼ tojlel jiñi xucʼuloʼ bʌ?

¹⁷ Jiñi muʼ bʌ caj i mel Gog mi caj i yʌcʼ chaʼan miʼ tilel jiñi guerra chaʼan Armagedón, baqui Jehová mi caj i jisan «jiñi reyob tiʼ petol pañimil» (Apoc. 16:14, 16; 19:19-21). Pero «jini tojoʼ bʌ mi caj i chʌn ajñelob tiʼ lumal. Jini mach bʌ añobic i mul [xucʼuloʼ bʌ, TNM] xucʼul miʼ cajelob ti chumtʌl» (Pr. 2:21).

18. ¿Chuqui an i meleyob cabʌl i sujm bʌ xñoptʼañob, i chucoch? (Daniel 3:28).

¹⁸ Cʼʌlʌl ti wajali cabʌl xñoptʼañob an i pʌsʌyob chaʼan maʼañic miʼ bʌcʼñañob chaʼan miʼ chujquelob yicʼot miʼ tsʌnsʌntelob come miʼ cʼuxbiñob Jehová, jiñi Ñumen ñuc bʌ Rey. Yomob i pʌsob i xucʼtʌlel cheʼ bajcheʼ tsiʼ meleyob jiñi uxtiquil hebreojob cheʼ bʌ tsaʼ chojquiyob ochel ti ticʌw bʌ horno tiʼ caj i xucʼtʌlelob ti Jehová (pejcan Daniel 3:28).

19. ¿Chuqui mi caj i chʼʌm tiʼ wenta Jehová chaʼan miʼ mel i wiñicob, i chuqui yom mi lac mel ti ili ora?

¹⁹ Jiñi salmista David yujil chaʼan wen ñuc i cʼʌjñibal cheʼ xucʼulonla tiʼ wut Dios. Tiʼ tsʼijbu: «Jehová mi caj i yʌqʼuen i toj i mul jiñi tejclum tac. C Yum Jehová, chaʼlen meloñel tic tojlel, qʼuele jiñi toj bʌ c melbal yicʼot bajcheʼ tsaʼ c pʌsʌ c xucʼtʌlel» (Sal. 7:8, TNM). Tsiʼ yʌlʌ jaʼel: «Cʌntañon come tojon [o xucʼulon], utsʼaton» (Sal. 25:21). Jiñi ñumen wem bʌ miʼ mejlel lac mel jiñʌch cheʼ xucʼulonla tiʼ tojlel Jehová mach yʌlʌyic chuqui miʼ yujtel. Cheʼ bajcheʼ jiñi, cheʼ mi caj la cubin lac bʌ bajcheʼ jiñi salmista tsaʼ bʌ i tsʼijbu: «Tijicñayob jini tojoʼ bʌ [xucʼuloʼ bʌ, TNM] muʼ bʌ i chaʼleñob xʌmbal cheʼ bajcheʼ tsʼijbubil tiʼ cʌntesʌbal lac Yum» (Sal. 119:1).