1. ¿Chuqui ti pijtaya an i yʌqʼueyonla Jehová?

 JEHOVÁ an i yʌqʼueyonla jumpʼejl wem bʌ lac pijtaya, jiñʌch jiñi laj cuxtʌlel maʼañic bʌ i jilibal. An i wiñicob woli (choncol) bʌ i pijtañob chumtʌl tiʼ pejtelel ora yaʼ ti panchan bajcheʼ espíritu maʼañix baʼ ora mi caj i chʌmelob (sajtelob) (1 Cor. 15:50, 53). Pero cabʌlob miʼ pijtañob chumtʌl tiʼ pejtelel ora wʌʼ ti Pañimil yicʼot i tijicñʌyelob i chaʼan cʼocʼ miʼ yajñelob (Apoc. 21:3, 4). Ti lac pejtelel mi laj qʼuel ti ñuc jiñi lac pijtaya, mach yʌlʌyic mi wʌʼ mi lac chumtʌl ti Pañimil o ti panchan.

2. ¿Baqui chucul jiñi lac pijtaya, i chucoch?

² Cheʼ bʌ jiñi Biblia miʼ taj ti tʼan jiñi pijtaya, miʼ yʌcʼ ti ñaʼtʌntel chaʼan mucʼʌch caj i yujtel wen tac bʌ. La cujil chaʼan jiñi lac pijtaya mucʼʌch caj i tsʼʌctiyel come tilem ti Jehová (Rom. 15:13). Laj cʌñʌ jiñi albil tac bʌ i chaʼan yicʼot chaʼan mucʼʌch i tsʼʌctesan tiʼ pejtelel ora (Nm. 23:19). La cujil chaʼan Jehová yomʌch i mucʼʌch i mejlel i mel pejtelel jiñi albil bʌ i chaʼan. Jin chaʼan, jiñi lac pijtaya i sujmʌch come chucul ti chuqui tac i sujm bʌ yicʼot am bʌ laj qʼuele.

3. ¿Chuqui mi caj laj qʼuel ti ili estudio? (Salmo 27:14).

³ Jiñi lac Tat am bʌ ti panchan miʼ cʼuxbiñonla i yom chaʼan mi lac ñop tiʼ tojlel (pejcan Salmo 27:14). Mi pʼʌtʌlʌch lac pijtaya ti Jehová, mi caj i mejlel laj cuch jiñi wocol tac i mi caj lac pʌs lac chʼejlel yicʼot lac tijicñʌyel. Ti ili estudio mi caj laj qʼuel bajcheʼ miʼ cʌntañonla jiñi lac pijtaya. Laʼ lac ñaxan qʼuel chucoch mi la cʌl chaʼan jiñi pijtaya lajalʌch bajcheʼ jumpʼejl ancla yicʼot  jumpʼejl casco. I cheʼ jiñi mi caj laj qʼuel bajcheʼ miʼ mejlel lac pʼʌtʼesan jiñi lac pijtaya.

4. ¿Chucoch jiñi lac pijtaya lajalʌch bajcheʼ jumpʼejl ancla? (Hebreos 6:19).

⁴ Yaʼ ti carta tsaʼ bʌ i tsʼijbubeyob majlel jiñi hebreojob, jiñi apóstol Pablo tsiʼ laji jiñi lac pijtaya bajcheʼ jumpʼejl ancla (pejcan Hebreos 6:19). Ti bele ora miʼ majlel ti barco, jin chaʼan i cʌñʌ chaʼan jiñi ancla mucʼʌch i coltan jiñi barco chaʼan maʼañic miʼ ñijcan i bʌ. Ti jumpʼejl bʌ qʼuin cheʼ bʌ yaʼ majlel ti barco, tsaʼ caji tsʌts bʌ icʼ jaʼal. Ti jimbʌ ora, tsaʼ chojqui ochel ti jaʼ jiñi ancla tac chaʼan jiñi barco maʼañic miʼ jatsʼ i bʌ ti xajlel (Hech. 27:29, 39-41). Jiñi lac pijtaya lajalʌch bajcheʼ jumpʼejl ancla muʼ bʌ i coltañonla chaʼan maʼañic mi lac ñajtʼesan lac bʌ ti Jehová cheʼ bʌ mi lac ñusan wocol tac lajal bʌ bajcheʼ tsʌts bʌ icʼ jaʼal. Jiñi lac pijtaya chaʼan lʌcʼʌlix mi caj i tilel chuqui wen tac bʌ miʼ coltañonla lac lʌtʼ jiñi wocol tac. Laʼ laj cʼajtesan chaʼan Jesús tsiʼ yʌlʌ chaʼan mi caj laj contrajintel (Juan 15:20). Jin chaʼan, cheʼ bʌ mi lac wen ñaʼtan jiñi chobejtʌbal muʼ bʌ caj i yʌqʼueñonla Jehová miʼ coltañonla chaʼan mi lac chʌn melben i yeʼtel (troñel).

5. ¿Bajcheʼ tsiʼ colta Jesús jiñi i pijtaya cheʼ bʌ mi caj i chʌmel?

⁵ Laʼ laj qʼuel bajcheʼ jiñi pijtaya tsiʼ colta Jesús chaʼan chʌn xucʼul miʼ yajñel anquese yujil chaʼan pʼumpʼun jax bajcheʼ mi caj i chʌmel. Ti jiñi Pentecostés ti jabil 33, jiñi apóstol Pedro tsiʼ yʌlʌ jumpʼejl profecía am bʌ ti Salmo tac muʼ bʌ i tsictesan bajcheʼ Jesús tsiʼ wen ñopo ti Jehová: «Joñon an c pijtaya mi caj c chumtʌl come maʼañic mi caj a cʌyon yaʼ ti Mucoñibʌl, mi muqʼuicto caj a wʌcʼ chaʼan miʼ yocʼmʌn jiñi xucʼul bʌ a wiñic. […] Mi caj a wen aqʼueñon c tijicñʌyel tiʼ tojel a wut» (Hech. 2:25-28; Sal. 16:8-11). Anquese Jesús yujil chaʼan mi caj i chʌmel, añʌch i pijtaya chaʼan Dios mi caj i chaʼ cuxtesan yicʼot mi caj i chaʼ letsel majlel ti panchan (Heb. 12:2, 3).

6. ¿Chuqui tsiʼ yʌlʌ juntiquil hermano chaʼan jiñi pijtaya?

⁶ Wocolix i yʌlʌ cheʼ añob i pijtaya, cabʌl hermanojob an i lʌtʼʌyob jiñi wocol tac. Laʼ laj qʼuelben i yejemplo juntiquil xucʼul bʌ hermano i cʼabaʼ Leonard Chinn tsaʼ bʌ chumle ti Inglaterra. Ti jiñi Primera Guerra Mundial, tsaʼ otsʌnti ti cárcel come maʼañic tsiʼ jacʼʌ ochel bajcheʼ soldado. Chaʼpʼejl uw maʼañic majqui tsaʼ mejli i pejcan i cheʼ jiñi tsaʼ xijqʼui ti tsʌts bʌ eʼtel. Cheʼ bʌ ñumeñix majlel jiñi jabil tac, tiʼ tsʼijbu: «Jiñi tsiʼ coltayon j qʼuel chaʼan wen ñucʌch i cʼʌjñibal jiñi pijtaya chaʼan mi laj cuch jiñi wocol tac. Jiñi i yejemplo Jesús, jiñi apóstolob, jiñi xʼaltʼañob yicʼot jiñi muʼ bʌ i yʌl jiñi Biblia, miʼ yʌqʼueñonla utsʼatax bʌ lac pijtaya chaʼan jiñi talto bʌ qʼuin yicʼot miʼ yʌqʼueñonla lac pʼʌtʌlel chaʼan mi laj cuch jiñi wocol tac». Jiñi pijtaya tsaʼ sujti ti jumpʼejl ancla tiʼ tojlel Leonard, i cheʼʌch miʼ mejlel ti sujtel ti lac tojlel jaʼel.

7. ¿Bajcheʼ miʼ pʼʌtʼan jiñi lac pijtaya cheʼ bʌ mi lac ñusan wocol tac? (Romanos 5:3-5; Santiago 1:12).

⁷ Jiñi lac pijtaya miʼ pʼʌtʼan majlel cheʼ bʌ mi laj cuch jiñi wocol tac i cheʼ bʌ mi laj qʼuel chaʼan Jehová miʼ coltañonla i wen miʼ qʼuelonla (pejcan Romanos 5:3-5; Santiago 1:12). Jin chaʼan, ili ora jiñi lac pijtaya ñumen pʼʌtʌl, mach cheʼic bajcheʼ cheʼ bʌ cojaxto woli (yaquel) laj cʌn jiñi i sujmlel. Satanás yom chaʼan jiñi wocol tac miʼ cʼuñʼesañonla, pero Jehová miʼ coltañonla lac lʌtʼ.

8. ¿Chucoch jiñi lac pijtaya lajalʌch bajcheʼ jumpʼejl casco? (1 Tesalonicenses 5:8).

⁸ Jiñi Biblia miʼ yʌl chaʼan jiñi lac pijtaya lajalʌch jaʼel bajcheʼ jumpʼejl casco (pejcan 1 Tesalonicenses 5:8). Juntiquil soldado miʼ xoj jiñi i casco chaʼan jiñi i contra maʼañic miʼ  jatsʼben i jol. Ili ora jaʼel lajalʌch bajcheʼ woliyonla ti guerra, jin chaʼan yom mi laj cʌntan lac ñaʼtʌbal chaʼan Satanás maʼañic miʼ ticʼlan. Cabʌl chuqui miʼ mel (chaʼlen) chaʼan miʼ yʌcʼonla ti yajlel ti mulil yicʼot an chuqui tac miʼ ñop i yotsan ti lac ñaʼtʌbal. Cheʼ bajcheʼ jiñi casco miʼ coltʌben i jol jiñi soldado, jiñi pijtaya miʼ coltañonla chaʼan mi laj cʌntan lac ñaʼtʌbal i chʌn xucʼul mi la cajñel ti Jehová.

9. ¿Chuqui miʼ mejlel ti ujtel cheʼ bʌ jiñi lac piʼʌlob maʼañobic i pijtaya?

⁹ Jiñi lac pijtaya chaʼan mi lac chumtʌl tiʼ pejtelel ora miʼ coltañonla chaʼan mi lac yajcan lac mel chuqui wem bʌ. Pero miʼ mejlel ti cʼuñʼan mi jin jach mi lac chʌn pensarin chuqui bajñel la com. Laʼ lac ñaʼtan chuqui tsaʼ ujti tiʼ tojlel jiñi xñoptʼañob ti Corinto. Maʼañix tsaʼ caji i chʌn ñopob chaʼan mi caj i chaʼ cuxtʌyelob jiñi chʌmeñoʼ bʌ (1 Cor. 15:12). Jiñi apóstol Pablo tsiʼ yʌlʌ chaʼan jiñi maʼañic bʌ miʼ ñopob jiñi cʌntesa cheʼ jach chumulob bajcheʼ yomob (1 Cor. 15:32). Ili ora cabʌl lac piʼʌlob maʼañic bʌ miʼ ñopob muʼ bʌ i yʌl Dios i chumulob jach chaʼan miʼ melob chuqui yomob. Pero joñonla mi lac ñop jiñi albil bʌ i chaʼan Dios chaʼan bʌ jiñi talto bʌ qʼuin. Jiñi lac pijtaya lajalʌch bajcheʼ jumpʼejl casco muʼ bʌ i cʌntan lac ñaʼtʌbal i miʼ coltañonla chaʼan maʼañic mi lac bajñel ñaʼtan lac mel chuqui bajñel la com, muʼ bʌ i mejlel i ñajtʼesañonla ti Jehová (1 Cor. 15:33, 34).

10. ¿Bajcheʼ miʼ coltañonla jiñi pijtaya chaʼan maʼañic mi lac ñaʼtan mach tac bʌ weñic?

¹⁰ Jiñi casco chaʼan bʌ pijtaya miʼ coltañonla jaʼel chaʼan maʼañic mi lac ñaʼtan chaʼan maʼañic i cʼʌjñibal mi lac chaʼlen wersa lac tijicñesan Jehová. Tajol an muʼ bʌ i ñaʼtan: «Joñon maʼañic baʼ ora mi caj c chumtʌl tiʼ pejtelel ora. Maʼañic j cʼʌjñibal. I maʼañic baʼ ora mi caj c mejlel c mel yom bʌ Dios». Laʼ laj cʼajtesan chaʼan Elifaz, juntiquil poj i yamigo bʌ Job, tiʼ sube iliyi: «Winicon jachla. Mi lac lon ñaʼtan sʌconla». I tsiʼ bej alʌ: «Mach ñuquic tiʼ pusicʼal Dios jini chʼujuloʼ bʌ i chaʼan. Mach sʌquic jini panchan tiʼ tojel i wut» (Job 15:14, 15). ¡Lot jach iliyi! Laʼ laj cʼajtesan chaʼan Satanás cheʼ yom mi lac ñaʼtan bajcheʼ jiñi. Yujil chaʼan mi tsaʼ lac chʌn acʼʌ ti lac ñaʼtʌbal jiñi, xucʼu xucʼul mi caj lac sʌt jiñi lac pijtaya. Jin chaʼan, laʼ lac chaʼlen wersa chaʼan maʼañic mi lac jacʼ jiñi lot i laʼ lac chʌn acʼ ti lac jol jiñi albil bʌ i chaʼan Jehová. Laʼ lac chʌn cʼajtesan chaʼan Jehová yom chaʼan i wiñicob miʼ chumtʌlob tiʼ pejtelel ora i mi caj i coltañonla lac taj jiñi (1 Tim. 2:3, 4).

11. ¿Chucoch yom mi lac chaʼlen pijt cheʼ bʌ maxto cʼoti i yorajlel miʼ tsʼʌctiyel jiñi lac pijtaya?

¹¹ Wocolʌch chaʼan chʌn pʼʌtʌl miʼ yajñel jiñi lac pijtaya. An i tajol miʼ cʼojyel lac pijtan chaʼan Dios mi caj i tsʼʌctesan jiñi i tʼan. Pero Jehová cuxul tiʼ pejtelel ora i mach lajal miʼ qʼuel jujumpʼejl qʼuin bajcheʼ joñonla (2 Ped. 3:8, 9). Mucʼʌch caj i tsʼʌctesan jiñi albil bʌ i chaʼan, pero tajol maʼañic mi caj i mel tiʼ yorajlel bajcheʼ pijtʌbilic lac chaʼan. ¿Chuqui mi caj i coltañonla chaʼan chʌn pʼʌtʌl lac pijtaya yicʼot chaʼan mi lac chʌn chaʼlen pijt cheʼ bʌ maxto cʼoti i yorajlel chaʼan Dios miʼ tsʼʌctesan jiñi albil bʌ i chaʼan? (Sant. 5:7, 8).

12. Cheʼ bajcheʼ miʼ yʌl Hebreos 11:1, 6, ¿bajcheʼ miʼ taj i bʌ jiñi lac pijtaya yicʼot cheʼ mi lac ñop Dios?

¹² Jiñi lac pijtaya chʌn pʼʌtʌl mi caj i yajñel mi lʌcʼʌl an la quicʼot Jehová come jiñʌch muʼ bʌ i subeñonla chaʼan mucʼʌch caj i tsʼʌctesan jiñi albil bʌ i chaʼan. Jiñi Biblia miʼ yʌl chaʼan añʌch lac pijtaya come mi lac ñop chaʼan añʌch Jehová yicʼot chaʼan «miʼ yʌqʼuen i majtan jiñi muʼ bʌ i wen sʌclañob» (pejcan Hebreos 11:1, 6). Cheʼ bʌ mi lac ñumen ñop chaʼan añʌch Jehová, mi caj i coltañonla lac ñumen ñop chaʼan mucʼʌch caj i tsʼʌctesan pejtelel  albil bʌ i chaʼan. Laʼ laj qʼuel chuqui miʼ mejlel lac mel chaʼan Jehová miʼ sujtel ti ñumen wem bʌ la camigo i cheʼ bajcheʼ jiñi pʼʌtʌl miʼ yajñel lac pijtaya.

13. ¿Bajcheʼ mi lac mejlel ti sujtel tiʼ yamigo Dios?

¹³ Laʼ lac pejcan Jehová ti oración i laʼ lac pejcʌben i Tʼan. Anquese maʼañic miʼ mejlel laj qʼuel Jehová, mi lac mejlel ti sujtel tiʼ yamigo. Miʼ mejlel lac pejcan ti oración i mi caj i yubiñonla (Jer. 29:11, 12). I miʼ mejlel lac ñʌchʼtan Jehová cheʼ bʌ mi lac pejcʌben jiñi i Tʼan yicʼot mi lac wen ñaʼtan muʼ bʌ i yʌl. Jiñi lac pijtaya miʼ ñumen pʼʌtʼan cheʼ bʌ mi lac pejcan bajcheʼ tsiʼ cʌnta i wiñicob ti wajali. Pejtelel muʼ bʌ lac taj tiʼ Tʼan Dios «tsaʼ tsʼijbunti chaʼan laj cʌntesʌntel, chaʼan mi lac taj lac pijtaya cheʼ mi laj cuch wocol yicʼot cheʼ miʼ ñuqʼuesʌntel lac pusicʼal ti jiñi Tsʼijbujel» (Rom. 15:4).

14. ¿Chucoch yom mi lac wen ñaʼtan am bʌ i mele Jehová tiʼ tojlel yambʌlob?

¹⁴ Laʼ lac wen ñaʼtan bajcheʼ an i tsʼʌctesa i tʼan Jehová. Laʼcu lac ñaʼtan tsaʼ bʌ i mele tiʼ tojlel Abrahán yicʼot Sara. Dios tiʼ subeyob chaʼan mi caj i tilelob i yalobil anquese añobix i jabilel (Gn. 18:10). ¿Chuqui tsiʼ mele Abrahán? Jiñi Biblia miʼ yʌl: «Tsiʼ ñopo chaʼan mucʼʌch caj i sujtel tiʼ tat cabʌl tejclum» (Rom. 4:18). Tiʼ tojlel juntiquil lac piʼʌl maʼañic pijtaya yilal, pero Abrahán tsiʼ ñopo chaʼan Dios mucʼʌch caj i tsʼʌctesan i tʼan. I cheʼʌch tsaʼ ujti bajcheʼ tsaʼ subentiyob (Rom. 4:19-21). Relato tac bajcheʼ iliyi miʼ yʌqʼueñonla lac ñop chaʼan Jehová mucʼʌch caj i tsʼʌctesan i tʼan, anquese joñonla wocol mi laj qʼuel.

15. ¿Chucoch yomʌch mi lac wen ñaʼtan jiñi am bʌ i mele Dios ti lac tojlel?

¹⁵ Laʼ lac ñaʼtan jiñi am bʌ i mele Jehová ti lac tojlel. ¿Ñaʼtʌbil ba lac chaʼan bajcheʼ an i tsʼʌctesa ti lac tojlel jiñi albil tac bʌ i chaʼan yaʼ tiʼ Tʼan? Jumpʼejl ejemplo, Jesús tsiʼ yʌlʌ chaʼan jiñi i Tat mi caj i yʌqʼueñonla jiñi i cʼʌjñibal bʌ  lac chaʼan (Mat. 6:32, 33). Tsiʼ yʌlʌ jaʼel chaʼan Jehová mi caj i yʌqʼueñonla jiñi chʼujul bʌ espíritu cheʼ bʌ mi laj cʼajtiben (Luc. 11:13). Jehová añʌch i tsʼʌctesa iliyi. I tajol miʼ tilel ti lac jol jaʼel yan tac bʌ i tʼan tsʼʌctesʌbil bʌ i chaʼan ti lac tojlel, chaʼan miʼ ñusan lac mul, miʼ tijicñesan lac pusicʼal yicʼot miʼ yʌqʼueñonla jiñi chʼujul bʌ bʌlñʌcʼʌl (Mat. 6:14; 24:45; 2 Cor. 1:3). Mi mucʼʌch lac wen ñaʼtan jiñi melbil bʌ i chaʼan Dios ti lac tojlel, mi caj lac ñumen ñop chaʼan i sujmʌch jiñi albil bʌ i chaʼan chaʼan mi caj i mel ti talto bʌ qʼuin.

16. ¿Chucoch jumpʼejlʌch ñuc bʌ lac majtan jiñi lac pijtaya?

¹⁶ Jiñi lac pijtaya chaʼan mi caj lac taj laj cuxtʌlel mach bʌ añic miʼ jilel jumpʼejlʌch lac majtan tilem bʌ ti Dios. La comix laj qʼuel jiñi i la cujil chaʼan mucʼʌch caj i tsʼʌctiyel. Jiñi lac pijtaya lajal bajcheʼ jumpʼejl ancla come miʼ coltañonla lac lʌtʼ jiñi wocol tac, jiñi ticʼlʌntel yicʼot chaʼan maʼañic mi lac bʌcʼñan chʌmel. Cheʼ jaʼel, lajal bajcheʼ jumpʼejl casco come miʼ cʌntan lac ñaʼtʌbal i miʼ coltañonla lac tsʼaʼlen jiñi mach bʌ weñic yicʼot mi lac wen mulan chuqui wem bʌ. Jiñi lac pijtaya muʼ bʌ i yʌqʼueñonla jiñi Biblia miʼ coltañonla lac ñumen lʌcʼtesan lac bʌ ti Dios yicʼot miʼ pʌsbeñonla chaʼan mucʼʌch i wen cʼuxbiñonla. Cheʼ mi lac chaʼlen wersa chaʼan chʌn pʼʌtʌl jiñi lac pijtaya mucʼʌch i wen coltañonla.

17. ¿Chucoch miʼ yʌqʼueñonla lac tijicñʌyel jiñi lac pijtaya?

¹⁷ Ti jiñi carta tsaʼ bʌ i tsʼijbu majlel Pablo chaʼan jiñi xñoptʼañob ti Roma, tiʼ subeyob: «Ubinla laʼ tijicñʌyel chaʼan jiñi pijtaya» (Rom. 12:12). Pablo tsaʼʌch mejli i yubin i tijicñʌyel come yujil chaʼan mi caj i taj i cuxtʌlel tiʼ pejtelel ora yaʼ ti panchan mi chʌn xucʼulʌch miʼ yajñel ti Jehová. Joñonla jaʼel miʼ mejlel la cubin lac tijicñʌyel chaʼan jiñi lac pijtaya come la cujil chaʼan Jehová mucʼʌch caj i tsʼʌctesan i tʼan. Juntiquil salmista tsiʼ yʌlʌ: «Tijicña muʼ bʌ i […] pijtan lac Yum, come jiñʌch i Dios [«xucʼul bʌ tiʼ pejtelel ora», TNM]» (Sal. 146:5, 6).