TEMAJ CHAʼAN ESTUDIO 38
«Laʼ baʼ añon [...]. Joñon mi cʌqʼueñetla laʼ cʼaj laʼ wo»
«Laʼ baʼ añon pejteletla woliyet bʌ la ti wocol eʼtel, al bʌ laʼ cuch. Joñon mi cʌqʼueñetla laʼ cʼaj laʼ wo» (MT. 11:28).
CʼAY 17 «Comʌch c mel»
MUʼ BɅ CAJ I QʼUEJLEL *
1. ¿Chuqui tsiʼ yʌlʌ Jesús yaʼ ti Mateo 11:28-30?
JESÚS an chuqui wen utsʼatax bʌ tiʼ sube jiñi woli (choncol) bʌ i ñʌchʼtañob. Tsiʼ yʌlʌ: «Laʼ baʼ añon [...]. Joñon mi cʌqʼueñetla laʼ cʼaj laʼ wo» (pejcan Mateo 11:28-30). Mach toʼol tʼan jach tsaʼ bʌ i yʌlʌ. Laʼ laj qʼuel chuqui tiʼ sube juntiquil xʼixic am bʌ wen tsʌts bʌ i cʼamʌjel.
2. ¿Bajcheʼ tsiʼ colta Jesús juntiquil xʼixic am bʌ i cʼamʌjel?
2 Jiñi xʼixic yomʌch miʼ coltʌntel ti ora. Añix 12 jab i cajel i cuch jiñi wocol i añʌch i wen sʌcla i coltʌntel ti doctorob. Cheʼ jaʼel, jiñi Mandar miʼ yʌl chaʼan bibiʼ jiñi xʼixic (Lv. 15:25). Cheʼ jiñi, tsaʼ cʼoti i yubin chaʼan Jesús miʼ lajmesan jiñi cʼamoʼ bʌ, jin chaʼan tsaʼ loqʼui i sʌclan. Cheʼ bʌ tsaʼ cʼoti i taj, tsiʼ tʌlbe i yoc i pislel i tsaʼ bʌcʼ lajmi. Pero Jesús mach cojach tsiʼ lajmesa, tsaʼʌch i chaʼ aqʼue i ñuclel. Jumpʼejl ejemplo jiñʌch cheʼ uts jach bajcheʼ tsiʼ pejca yicʼot tsaʼʌch i pʼisi ti ñuc cheʼ bʌ tiʼ sube «calobil». Ili tʼan tsaʼʌch i chaʼ tijicñesʌbe yicʼot tsiʼ ñuqʼuesʌbe i pusicʼal jiñi xʼixic (Lc. 8:43-48).
3. ¿Chuqui ti cʼajtiya tac mi cajel la cʌqʼuen i jacʼbal?
3 Tsaʼ bʌ i ñaxan mele jiñi xʼixic jiñʌch cheʼ tsaʼ loqʼui i sʌclan Jesús. Cheʼʌch yom mi lac mel (chaʼlen) jaʼel. Ti lac pejtelel yom mi lac chaʼlen wersa lac lʌcʼtesan lac bʌ ti Jesús. Ili ora, maʼañic miʼ lajmesʌben i cʼamʌjel jiñi muʼ bʌ i sajcañob. Pero mucʼʌch i chʌn subeñonla ili tʼan: «Laʼ baʼ añon [...]. Joñon mi cʌqʼueñetla laʼ cʼaj laʼ wo». Ti ili temaj, mi cajel la cʌqʼuen i jacʼbal joʼpʼejl cʼajtiya: ¿Bajcheʼ mi lac lʌcʼtesan lac bʌ ti Jesús? ¿Chuqui
tsiʼ yʌcʼʌ ti ñaʼtʌntel Jesús cheʼ bʌ tsiʼ yʌlʌ chaʼan mi lac chʼʌmben i qʼuech? ¿Chuqui mi laj cʌn tiʼ tojlel? ¿Chucoch miʼ pʼʌtʼesañonla o miʼ tijicñesañonla cheʼ mi lac mel jiñi eʼtel (troñel) tsaʼ bʌ i cʌybeyonla? I ¿bajcheʼ mi bej aqʼueñonla lac tijicñʌyel cheʼ mi lac chʼʌmben majlel i cuch?«LAʼ BAʼ AÑON»
4, 5. ¿Bajcheʼ miʼ mejlel lac lʌcʼtesan lac bʌ ti Jesús?
4 Junchajp bajcheʼ mi lac lʌcʼtesan lac bʌ ti Jesús jiñʌch cheʼ bʌ mi laj cʌn tsaʼ bʌ i mele yicʼot tsaʼ bʌ i yʌlʌ (Lc. 1:1-4). Jin chaʼan, jujuntiquilonla an ti lac wenta chaʼan mi lac wen pejcan muʼ bʌ i yʌjlel tiʼ tojlel yaʼ ti Biblia. Cheʼ jaʼel, mi lac lʌcʼtesan lac bʌ ti Jesús cheʼ mi lac sujtel ti xcʌntʼan i chaʼan yicʼot mi lac chʼʌmjaʼ.
5 Yambʌ bajcheʼ mi lac mel, jiñʌch cheʼ bʌ mi laj cʼajtiben i coltaya jiñi ancianojob. Lajalobʌch bajcheʼ jumpʼejl majtañʌl tsaʼ bʌ i yʌcʼʌ Jesús, i miʼ cʼʌn chaʼan miʼ cʌntʌbeñob i tʌñʌmeʼ (Jn. 21:16; Ef. 4:7, 8, 11; 1 P. 5:1-3). Mach mejlic i cʼotel lac ñaʼtan chaʼan jiñi ancianojob yujilobix chuqui woli (yʌquel) lac ñusan yicʼot chuqui i cʼʌjñibal lac chaʼan, yom bʌ mi lac mel jiñʌch mi laj cʼajtibeñob i coltaya. Laʼ laj qʼuel chuqui miʼ yʌl juntiquil hermano i cʼabaʼ Julian: «Tsaʼ loqʼuiyon ti Betel come tsaʼ cʼamʼayon, i juntiquil camigo tiʼ subeyon chaʼan mij cʼajtiben jiñi ancianojob chaʼan miʼ julaʼtañoñob. Ti ñaxan, tsaʼ c ñaʼta chaʼan maʼañic i cʼʌjñibal c chaʼan. Pero ti wiʼil tsaʼʌch c sʌclʌbeyob i coltaya, i tsaʼ cʼoti j qʼuel chaʼan jumpʼejlʌch ñuc bʌ majtañʌl am bʌ c taja». Jiñi xucʼul bʌ ancianojob, cheʼ bajcheʼ tsaʼ bʌ i julaʼtayob Julian, miʼ coltañoñobla laj cʌmben «i ñaʼtʌbal Cristo», yom bʌ i yʌl, chaʼan miʼ mejlel lac chʼʌmben i sujm yicʼot lac lajiben i ñaʼtʌbal yicʼot bajcheʼ yilal i melbal (1 Co. 2:16; 1 P. 2:21). Iliyi jiñʌch jumpʼejl ñuc bʌ majtañʌl mejl bʌ i yʌqʼueñoñobla.
OCHEN «WɅʼ TIJ QʼUECH»
6. ¿Chuqui tsiʼ yʌcʼʌ ti ñaʼtʌntel Jesús cheʼ tsiʼ yʌlʌ ochen «wʌʼ tij qʼuech»?
6 Cheʼ bʌ Jesús tiʼ subeyonla ochel tiʼ qʼuech, tajol tsiʼ yʌcʼʌ ti ñaʼtʌntel chaʼan yom mi lac jacʼben i tʼan bajcheʼ yumʌl. Tajol tsiʼ yʌcʼʌ ti ñaʼtʌntel jaʼel chaʼan mi laj comol chʼʌm majlel jiñi i qʼuech i mi lac tem melben i yeʼtel Jehová. Mach yʌlʌyic chuqui woliʼ taj ti tʼan, woli bʌ i yʌcʼ ti ñaʼtʌntel jiñʌch chaʼan yom mi lac chaʼlen eʼtel.
7. Cheʼ bajcheʼ miʼ yʌl Mateo 28:18-20, ¿chuqui ti eʼtel tsaʼ aqʼuentiyonla, i chuqui miʼ mejlel lac ñop?
7 Mi lac chʼʌmben i cuch Jesús cheʼ mi la cʌcʼ lac bʌ ti Jehová i mi lac chʼʌmjaʼ. Jesús miʼ suben jiñi wiñicob xʼixicob (quixtañujob) chaʼan miʼ melob. Maʼañic mi caj i cʌy jiñi quixtañu yom bʌ i melben i yeʼtel Dios ti jumpʼejl i pusicʼal (Jn. 6:37, 38). Pejtelel jiñi muʼ bʌ i tsajcañob Jesús miʼ yʌqʼuentelob jaʼel jiñi eʼtel tsaʼ bʌ aqʼuenti i mel ti Jehová. Miʼ mejlel lac ñop chaʼan tiʼ pejtelel ora Jesús mi caj i coltañonla tiʼ melol ili eʼtel (pejcan Mateo 28:18-20).
«ÑOPOYON»
Laʼ la cʌqʼueñob i tijicñʌyel yambʌlob cheʼ bajcheʼ tsiʼ mele Jesús (Qʼuele jiñi párrafo 8 cʼʌlʌl ti 11). *
8, 9. a) ¿Chucoch tsiʼ mulayob ajñel yicʼot Jesús jiñi tsaʼ bʌ i pʌsʌyob i pecʼlel? b) ¿Chuqui ti cʼajtiya tac yom mi lac melben lac bʌ?
8 Jiñi tsaʼ bʌ i pʌsʌyob i pecʼlel tsiʼ mulayob ajñel yicʼot Jesús (Mt. 19:13, 14; Lc. 7:37, 38). ¿Chucoch? Come qʼuexelʌch bajcheʼ jiñi fariseojob. Ili wiñicob maʼañobic i cʼuxbiya yicʼot tsiʼ wen chañʼesañob i bʌ (Mt. 12:9-14). Pero Jesús tsiʼ pʌsʌ i cʼuxbiya yicʼot i pecʼlel. Jiñi fariseojob tsiʼ mulayob chaʼan miʼ wen cʌjñelob yicʼot chaʼan ñuc miʼ qʼuejlelob, pero Jesús tsiʼ cʌntesa jiñi xcʌntʼañob i chaʼan chaʼan maʼañic miʼ bajñel sʌclañob i ñuclel, chaʼan yom miʼ pʌsob i pecʼlel yicʼot miʼ coltañob yambʌlob (Mt. 23:2, 6-11). Come jiñi fariseojob an ñuc bʌ i yeʼtelob, jiñi quixtañujob miʼ wen bʌcʼñañob chaʼan chuqui miʼ mejlel i melbentelob (Jn. 9:13, 22). Pero Jesús tsiʼ ñuqʼuesʌbe i pusicʼal jiñi quixtañujob cheʼ tsiʼ pʌsʌ wem bʌ i melbal yicʼot cheʼ tiʼ uts bʌ tʼan tsiʼ pejcayob.
9 ¿Wolʌch ba laj cʌn tsaʼ bʌ i pʌsʌ Jesús? Laʼ laj cʼajtiben lac bʌ: ¿Cʌmbilon ba chaʼan mucʼʌch c pʌs cutslel yicʼot c pecʼlel? ¿Mejl ba c mel eʼtel tac mach bʌ wen ñuquic yilal chaʼan mij coltan yambʌlob? ¿Muʼ ba c pʌsben cutslel yambʌlob?
10. ¿Bajcheʼ tsiʼ ñusayob jiñi tsaʼ bʌ i chaʼleyob eʼtel yicʼot Jesús?
10 Jesús tsaʼʌch i yʌqʼue i yubiñob i tijicñʌyel yicʼot i ñʌchʼtʌlel jiñi tsaʼ bʌ i tsajcayob, i cheʼ jaʼel tsaʼʌch i wen mulaj i cʌntesañob (Lc. 10:1, 19-21). Tsaʼʌch i chʌn subeyob chaʼan miʼ melbeñob cʼajtiya tac i tsiʼ mulaj i cʌn chuqui miʼ ñaʼtañob (Mt. 16:13-16). Lajal bajcheʼ jiñi muʼ bʌ i pʌjqʼuel ti jumpʼejl invernadero miʼ colel yicʼot miʼ yʌcʼ i wut, cheʼʌch tsiʼ mele Jesús jaʼel come jiñi xcʌntʼañob i chaʼan tsaʼʌch cʼoti i cʌñob jiñi i cʌntesʌntelob i tsaʼʌch i pʌsʌyob ti melbal.
Yom utsonla yicʼot laʼ lac chʼʌm ti ñuc yambʌlob
Yom bʌxonla ti subtʼan
Yom bʌxonla ti eʼtel yicʼot yom mi lac pʌs lac pecʼlel *
11. ¿Chuqui ti cʼajtiya tac yom mi lac melben lac bʌ?
11 Mi aqʼuebilonla jumpʼejl eʼtel, yom mi laj cʼajtiben lac bʌ: «¿Bajcheʼ yilal c melbal mic pʌs tiʼ tojlel yambʌlob ti queʼtel o ti cotot? ¿Muʼ baʼ c chaʼlen wersa chaʼan an ñʌchʼtʌlel? ¿Muʼ ba c suben yambʌlob chaʼan miʼ melbeñoñob cʼajtiya tac? ¿Mucʼʌch ba c mulan j cʌn chuqui miʼ ñaʼtañob?». Mach yomic mi lac mel tsaʼ bʌ i mele jiñi fariseojob, muʼ bʌ i michʼañob cheʼ bʌ miʼ melbentelob cʼajtiya tac yicʼot miʼ contrajiñob jiñi mach bʌ cheʼic miʼ ñaʼtañob bajcheʼob (Mr. 3:1-6; Jn. 9:29-34).
«MUQʼUIX CAJ LAʼ TAJ CʼAJ O»
12-14. ¿Chucoch tijicñayonla cheʼ mi lac mel jiñi eʼtel tsaʼ bʌ i cʌybeyonla Jesús?
12 ¿Chucoch mi la cubin tijicñʌyel cheʼ bʌ mi lac mel jiñi eʼtel tsaʼ bʌ i cʌybeyonla Jesús? Laʼ laj qʼuel.
13 An lac chaʼan xcʌntayajob utsoʼ bʌ i pusicʼal. Anquese Jehová jiñʌch jiñi ñuc bʌ xcʌntaya lac chaʼan, mach jontolic yicʼot mucʼʌch i qʼuelonla ti wen. Miʼ chʼʌm ti ñuc jiñi eʼtel muʼ bʌ lac mel (He. 6:10). Cheʼ jaʼel, miʼ yʌqʼueñonla lac pʼʌtʌlel chaʼan miʼ mejlel lac mel jiñi eʼtel (2 Co. 4:7; Gá. 6:5). Jesucristo, jiñi lac Rey, miʼ pʌsbeñonla bajcheʼ yom mi lac mel tiʼ tojlel yambʌlob (Jn. 13:15). I jiñi ancianojob muʼ bʌ i cʌntañoñobla mucʼʌch i lajiñob Jesús, jiñi «ñuc bʌ Xcʌnta tiñʌmeʼ» (He. 13:20; 1 P. 5:2). Miʼ chaʼleñob wersa chaʼan miʼ coltañoñobla, miʼ pʌsbeñoñobla i yutslel yicʼot chʼejlob cheʼ miʼ cʌntesañoñobla i miʼ cʌntañoñobla.
14 An wem bʌ lac piʼʌlob ti eʼtel. Cojach jiñi i wiñiconbʌla Dios tijicñayonla ti jiñi eʼtel muʼ bʌ lac mel yicʼot cheʼ juntemel añonla tiʼ cʼuxbiya. Laʼcu lac ñaʼtan iliyi: Mi laj comol chaʼlen eʼtel yicʼotob jiñi wem bʌ i melbalob yicʼot maʼañic bʌ miʼ qʼuelob i bʌ ti ñuc tiʼ tojlel yambʌlob. Anquese an chuqui yujilob melol, maʼañic miʼ chanʼesañob i bʌ i miʼ qʼuelob chaʼan jiñi yambʌlob ñumen ñucob bajcheʼob. Mach cojach miʼ qʼueloñobla bajcheʼ lac piʼʌl lac bʌ ti eʼtel, mucʼʌch i qʼueloñobla bajcheʼ juntiquil amigo. Mucʼʌch i wen cʼuxbiñoñobla, i cheʼto jaʼel muʼto i yʌcʼob i cuxtʌlel ti lac tojlel.
15. ¿Bajcheʼ yom mi laj qʼuel jiñi eʼtel woli bʌ lac mel?
15 Woli lac mel wen utsʼatax bʌ eʼtel. Mi laj cʌntesañob chuqui i sujm bʌ tiʼ tojlel Jehová jiñi quixtañujob i mi la cʌl chaʼan juntiquilʌch xlot jiñi Diablo (Jn. 8:44). Satanás miʼ ticʼlan jiñi quixtañujob yicʼot lot tac muʼ bʌ i wen aqʼueñob i chʼijiyemlel. Jumpʼejl ejemplo, yom i yʌqʼueñonla lac ñop chaʼan Jehová maʼañic miʼ ñusʌbeñonla lac mul i chaʼan mach i wentʌlelic miʼ cʼuxbiñonla. Iliyi jiñʌch jumpʼejl wen ñuc bʌ lot. Cheʼ bʌ mi lac lʌcʼtesan lac bʌ ti Cristo, mucʼʌch i ñusʌntel jiñi lac mul come Jehová mucʼʌch i wen cʼuxbiñonla (Ro. 8:32, 38, 39). ¡Wen tijicña mi la cubin cheʼ mi laj cʌntesan yambʌlob chaʼan miʼ ñopob Jehová i cheʼ jiñi i sujmlel miʼ coltañob tiʼ cuxtʌlel!
LAʼ LAC CHɅN UBIN LAC TIJICÑɅYEL TIʼ CHʼɅMOL MAJLEL I QʼUECH JESÚS
16. ¿Chucoch qʼuexelʌch jiñi i qʼuech Jesús bajcheʼ yan tac bʌ cuchʌl?
16 Jiñi cuchʌl muʼ bʌ i yʌqʼueñonla Jesús yʌñʌlʌch bajcheʼ yambʌ cuchʌl tac wocol bʌ ti chʼʌmol majlel. Jumpʼejl ejemplo, cheʼ bʌ sujtelix mucʼonla ti la queʼtel, wen lujbonla mi la cubin lac bʌ, i cheʼ jaʼel maʼañic miʼ yʌqʼueñonla tijicñʌyel. Pero jiñi eʼtel muʼ bʌ i yʌqʼueñonla Jehová yicʼot Jesús mucʼʌch i yʌqʼueyonla tijicñʌyel. Tajol wen lujbeñix mi laj cʼotel ti la cotot chaʼan tsaʼ lac chaʼle tsʌts bʌ eʼtel, pero mi lac wersa xicʼ lac bʌ chaʼan mi lac majlel ti tempa bʌ. I cheʼ bʌ mi lac chaʼ sujtel ti la cotot, chaʼ añix lac pʼʌtʌlel. Cheʼʌch miʼ yujtel jaʼel cheʼ bʌ mi lac chaʼlen wersa loqʼuel ti subtʼan o mi lac chaʼlen estudio ti lac bajñelil: Mi lac chaʼ taj lac pʼʌtʌlel yicʼot lac tijicñʌyel.
17. ¿Chuqui yom bʌ miʼ cʼotel laj cʌn, i chuqui yom mi lac wen ñaʼtan?
17 Yomʌch miʼ cʼotel lac ñaʼtan chaʼan an jach baqui jaxʌl lac pʼʌtʌlel. Jin chaʼan yom mi lac wen ñaʼtan bajcheʼ mi caj laj cʼʌn. Jumpʼejl ejemplo, tajol mi lac toʼol jisan lac pʼʌtʌlel tiʼ sʌclʌntel chubʌʼañʌl tac. Laʼ laj qʼuel chuqui tiʼ sube Jesús juntiquil chʼiton tsaʼ bʌ i cʼajtibe chuqui yom miʼ mel chaʼan miʼ mejlel i taj i cuxtʌlel mach bʌ añic miʼ jilel. Ili chʼiton mucʼʌch i pʼis ti ñuc jiñi mandar i añʌch wem bʌ i melbal come jiñi Evangelio i chaʼan Marcos miʼ yʌl chaʼan Jesús tsiʼ cʼuxbi. Jin chaʼan tiʼ sube: «Cucu, choño pejtelel a chubʌʼan [...] tsajcañon». Ili chʼiton wocol tsiʼ yubi chaʼan miʼ yajcan chuqui miʼ mel, come ñumen ñuc an tiʼ pusicʼal jiñi «i chubʌʼan» i mach jiñic chaʼan miʼ tsajcan majlel Jesús (Mr. 10:17-22). Jin chaʼan, maʼañic tsiʼ jacʼʌ i chʼʌmben majlel i qʼuech Jesús i tsaʼʌch i chʌn yuma jiñi «chubʌʼañʌl» (Mt. 6:24). Cheʼ joñoñicla jiñi chʼiton, ¿chuqui tsaʼ lac yajca lac mel?
18. ¿Chuqui yom mi lac bixel mel majlel, i chucoch?
18 Ñuc i cʼʌjñibal cheʼ bʌ mi lac tsajin chuqui jiñi la com bʌ lac taj. ¿Chucoch? Come jiñʌch muʼ bʌ caj i yʌqʼueñonla laj qʼuel bajcheʼ woli laj cʼʌn jiñi lac pʼʌtʌlel. Laʼ laj cʌn tiʼ tojlel juntiquil chʼiton i cʼabaʼ Mark. Miʼ yʌl: «Cabʌl jabil tsaʼ c lon ñaʼta chaʼan maʼañic woli c sajcan cabʌl chubʌʼañʌl. Pero anquese añon bajcheʼ precursor, jin jach jiñi taqʼuin muʼ bʌ c joy pensarin yicʼot chaʼan bajcheʼ mic mejlel ti chumtʌl ti wen. Mij cʼajtiben c bʌ chucoch wen wocol jax woliʼ ñumel c chaʼan. Tsaʼ cʼoti j qʼuel chaʼan ñaxan woli cʌcʼ jiñi com bʌ c taj i chaʼan cojach woli cʌqʼuen muʼ bʌ i colobʌyel c chaʼan jiñi Jehová». Ili chʼiton tsaʼ cʼoti i qʼuextan bajcheʼ miʼ ñaʼtan i tsaʼ caji i ñumen mel i chaʼan bʌ Dios. Miʼ chaʼ al: «An i tajol miʼ ticʼlañon jiñi cʌlʌx pensar. Pero wocolix i yʌlʌ i coltaya Jehová yicʼot Jesús, wolʌch c chʌn mel majlel i yeʼtel».
19. ¿Chucoch ñuc i cʼʌjñibal cheʼ wen jach bajcheʼ yom mi laj qʼuel jiñi laj cuxtʌlel?
19 Mi caj lac chʌn ubin lac tijicñʌyel cheʼ bʌ mi lac chʼʌmben majlel i cuch jiñi Jesús, mi mucʼʌch lac mel ili uxchajp. Ñaxam bʌ, wen jach bajcheʼ yom mi laj qʼuel jiñi laj cuxtʌlel. Mi lac melben i yeʼtel Jehová i mi lac mel cheʼ bajcheʼ miʼ yʌl. Joñonla jiñi xʼeʼtelonla i Jehová jiñʌch jiñi Yumʌl (Lc. 17:10). Mi tsaʼ lac lon ñopo lac mel jiñi eʼtel cheʼ bajcheʼ mi lac mulan, joñonjachla mi caj lac bajñel ubin wocol yicʼot jiñi qʼuech. Cheʼʌch miʼ yujtel juncojt tat wacax woli bʌ i chʼʌm majlel jiñi i qʼuech cheʼ miʼ ñaʼtan majlel baqui bajñel yom, mucʼ jach caj i bajñel lujbʼan yicʼot mi caj i toʼol ticʼlan i bʌ. Pero cabʌlʌch chuqui mi cajel lac mel majlel yicʼot maʼañic chuqui mi caj i mʌctañonla mi mucʼʌch lac sʌclʌben i coltaya Jehová. Yom mi laj cʼajtesan chaʼan maʼañic majqui miʼ mejlel i mʌctan chaʼan miʼ tsʼʌctesan chuqui yom (Ro. 8:31; Stg. 4:7).
20. ¿Chuqui yom miʼ ñijcañonla chaʼan mi lac chʼʌmben majlel i qʼuech Jesús?
Jn. 6:25-27, 51, 60, 66; Fil. 3:18, 19). Pero an tsaʼ bʌ i meleyob jiñi eʼtel chaʼan i cʼuxbiyajob ti Dios yicʼot tiʼ piʼʌlob. Tsiʼ tajayob i tijicñʌyel cheʼ bʌ wʌʼto añob ila ti Pañimil cheʼ woliʼ chʼʌmob majlel jiñi cuchʌl, i tsaʼ aqʼuentiyob jiñi pijtaya chaʼan miʼ tem chaʼleñob eʼtel yicʼot Cristo yaʼ ti panchan. Joñonla jaʼel mi cajel lac taj lac tijicñʌyel mi wen jach jiñi muʼ bʌ i ñijcañonla lac chʼʌm majlel jiñi i cuch Jesús.
20 I chaʼpʼejlel, wen jach chuqui yom miʼ ñijcañonla ti eʼtel. Jiñi la com bʌ jiñʌch miʼ yʌqʼuentel i ñuclel jiñi cʼuxbibil bʌ lac Tat, Jehová. Cheʼ ti ñaxam bʌ siglo, an quixtañujob tsaʼ bʌ i meleyob ili eʼtel chaʼan jach miʼ tajob chuqui bajñel yomob o chaʼan miʼ qʼuejlelob ti ñuc. Jin chaʼan, maʼañic tsaʼ cʼoti i tajob i tijicñʌyel i tsiʼ cʌyʌyob jiñi i cuch Jesús (21. Cheʼ bajcheʼ miʼ yʌl Mateo 6:31-33, ¿chuqui miʼ mejlel lac pijtan chaʼan miʼ mel Jehová?
21 I yuxpʼejlel, wen jach chuqui yom mi lac pijtan. Tsaʼʌch lac yajca lac mel jumpʼejl tsʌts bʌ eʼtel mach bʌ cʼuñic ti melol. Jesús tsaʼʌch i wʌn subeyonla chaʼan mi cajel lac tsʼaʼlentel. Pero mucʼʌch i mejlel lac ñop chaʼan Jehová mi caj i yʌqʼueñonla jiñi lac chʼejlel chaʼan mi laj cuch jiñi wocol. Mi mucʼʌch lac chʌn cucheʼ majlel jiñi wocol, mi caj lac ñumen pʼʌtʼesan lac ñopoñel (chʼujbiya) (Stg. 1:2-4). Cheʼ jaʼel, mucʼʌch i mejlel lac pijtan chaʼan Jehová mi caj i yʌqʼueñonla chuqui la com, chaʼan Jesús mi caj i cʌntañonla yicʼot chaʼan jiñi hermañojob mucʼʌch caj i chʌn coltañoñobla (pejcan Mateo 6:31-33; Jn. 10:14; 1 Ts. 5:11). Cheʼ bajcheʼ iliyi, ¿anto ba chuqui mi lac chʌn cʼojoʼtan?
22. ¿Chuqui miʼ mejlel i yʌqʼueñonla lac tijicñʌyel?
22 Jiñi xʼixic tsaʼ bʌ lajmesʌbenti i cʼamʌjel, tsaʼʌch cʼoti i yubin i tijicñʌyel ti jiñi jach bʌ qʼuin. Pero cojach mi caj i chʌn ubin i tijicñʌyel mi mucʼʌch i tsajcan majlel Jesús tiʼ xucʼtʌlel. ¿Chuqui tsiʼ yajca i mel jiñi xʼixic? Mi tsaʼʌch i chʼʌmbe majlel i qʼuech Jesús, tsaʼʌch i taja jiñi wen ñuc bʌ majtañʌl: Jiñi pijtaya chaʼan miʼ tem chaʼlen eʼtel yicʼot Cristo yaʼ ti panchan. Mi cheʼʌch tsiʼ mele, ñumen ñuc i majtan tsaʼ bʌ cʼoti i taj jiñi xʼixic cheʼ bajcheʼ jiñi tsaʼ bʌ i sʌtʌ. Mi joñonla woli lac pijtan chumtʌl ti panchan o wʌʼ ti Pañimil, mucʼʌch la cubin lac tijicñʌyel cheʼ bʌ tsaʼ lac jacʼʌ jiñi tsaʼ bʌ i subeyonla Jesús: «Laʼ baʼ añon».
CʼAY 13 Laʼ lac tsajcan Jesús
^ parr. 5 Jesús miʼ subeñonla chaʼan mi lac lʌcʼtesan lac bʌ tiʼ tojlel. ¿Chuqui yom i yʌl iliyi? Ti ili temaj mi caj lac tajben i jacʼbal yicʼot mi caj i cʼajtesʌbeñonla bajcheʼ miʼ yʌqʼueñonla tijicñʌyel cheʼ mi lac chaʼlen eʼtel yicʼot Cristo
^ parr. 60 MUʼ BɅ I PɅS JIÑI FOTO: Jesús cabʌl bajcheʼ tsiʼ yʌqʼue i yubin i tijicñʌyel jiñi quixtañujob.
^ parr. 66 MUʼ BɅ I PɅS JIÑI FOTO: Cheʼ bajcheʼ tsiʼ mele Jesús, juntiquil hermano woliʼ ñop i tsajcʌben i melbal.