1. ¿Chucoch yom mi lac jacʼben i tʼan Jehová?

YOM mi lac jacʼben i tʼan * Jehová. Jiñʌch tsaʼ bʌ i meleyonla (pʌtʌyonla), jin chaʼan an tiʼ wenta chaʼan miʼ yʌqʼueñonla mandar tac (Ap. 4:11). Pero añʌch yambʌ i sujmlel chaʼan yom mi lac jacʼben i tʼan: Jiñʌch ñumen wem bʌ bajcheʼ miʼ chaʼlen yumʌntel. Cʼʌlʌl ti wajali an wiñicob xʼixicob (quixtañujob) am bʌ i chaʼleyob yumʌl tiʼ tojlel yambʌlob. Pero Jehová jiñʌch jiñi yumʌl ñumen am bʌ i ñaʼtʌbal yicʼot i cʼuxbiya, miʼ chʼʌmben i sujm yambʌlob i miʼ pʼuntañob (Éx. 34:6; Ro. 16:27; 1 Jn. 4:8).

2. ¿Chucoch yom mi lac jacʼben i tʼan Jehová cheʼ bajcheʼ miʼ yʌl Hebreos 12:9-11?

² Jehová yom chaʼan mi lac jacʼben i tʼan, mach chaʼañic mi lac bʌcʼñan, chaʼañʌch mi laj cʼuxbin yicʼot mi laj qʼuel bajcheʼ lac tat muʼ bʌ i cʼuxbiñonla. Ti jiñi carta tsaʼ bʌ i tsʼijbu Pablo tiʼ tojlel jiñi hebreojob miʼ yʌl chaʼan yomʌch mi lac jacʼben i tʼan lac Tat come jiñʌch muʼ bʌ i cʌntesañonla «chaʼan mi lac taj lac wenlel» (pejcan Hebreos 12:9-11).

3. a) ¿Bajcheʼ mi lac pʌs chaʼan mucʼʌch lac jacʼben i tʼan Jehová? b) ¿Chuqui ti cʼajtiya tac mi caj lac jacʼ?

³ Mi lac jacʼben i tʼan Jehová cheʼ mi lac chaʼlen wersa lac jacʼ lac mel pejtelel chuqui miʼ subeñonla yicʼot cheʼ maʼañic mi lac bajñel yajcan chuqui wem bʌ yicʼot maʼañic bʌ (Pr. 3:5). Mach wocolic mi caj lac jacʼben i tʼan Jehová cheʼ miʼ cʼotel laj cʌn jiñi utsʼatax bʌ i melbalʌl tac come jiñʌch muʼ bʌ i ñijcan  chaʼan miʼ mel pejtelel chuqui yom (Sal. 145:9). Cheʼ mi lac ñumen cʌn Jehová, mi lac ñumen cʼuxbin. I miʼ mucʼʌch laj cʼuxbin, mach cʼʌñʌlic lac chaʼan jumpʼejl lista baqui miʼ yʌl chuqui tac yom mi lac mel yicʼot maʼañic bʌ. Mi lac chaʼlen wersa laj cʼuxbin chuqui wem bʌ yicʼot lac tsʼaʼlen chuqui mach bʌ weñic, cheʼ bajcheʼ miʼ mel Jehová (Sal. 97:10). Pero an i tajol wocol mi la cubin chaʼan mi lac jacʼben i tʼan. ¿Chucoch? ¿I chuqui miʼ mejlel i cʌñob jiñi ancianojob, tatʌlob yicʼot ñaʼʌlob tiʼ tojlel jiñi yumʌl Nehemías, jiñi rey David yicʼot María, jiñi i ñaʼ Jesús? Ti ili temaj mi caj lac tajben i jacʼbal.

4, 5. Cheʼ bajcheʼ miʼ yʌl Romanos 7:21-23, ¿chucoch an qʼuiñil wocol mi la cubin chaʼan mi lac jacʼben i tʼan Jehová?

⁴ Junchajp i sujmlel cheʼ wocol mi la cubin chaʼan mi lac jacʼben i tʼan Jehová, jiñʌch chaʼan xmulilonla, jin chaʼan i tilelʌch cheʼ mi lac ñusan tʼan. Adán yicʼot Eva tsiʼ bajñel waʼchocoyob i mandar cheʼ tsiʼ ñusʌbeyob i tʼan Dios i tsiʼ cʼuxuyob jiñi i wut teʼ (Gn. 3:22). Ili ora, yonlel quixtañujob maʼañic miʼ chʼʌmob ti wenta Dios, i jiñob jach miʼ ñaʼtañob chuqui wen yicʼot chuqui maʼañic bʌ.

⁵ Jiñi laj cʌñʌyix bʌ Jehová yicʼot mi laj cʼuxbin an i tajol wocolʌch mi la cubin chaʼan mi lac jacʼben i tʼan ti tsʼʌcʌl. Jiñʌch tsaʼ bʌ ujti tiʼ tojlel jiñi apóstol Pablo (pejcan Romanos 7:21-23). Cheʼ bajcheʼ Pablo, la com lac mel chuqui wem bʌ miʼ qʼuel Jehová. Pero tiʼ pejtelel ora yom mi lac chaʼlen wersa chaʼan maʼañic mi lac mulan lac mel jiñi mach bʌ weñic.

6, 7. ¿Baqui bʌ yambʌ i sujmlel cheʼ wocol mi la cubin chaʼan mi lac jacʼben i tʼan Jehová? Acʼʌ jumpʼejl ejemplo.

⁶ Cheʼ jeʼel, wocol mi la cubin chaʼan mi lac jacʼben i tʼan Jehová tiʼ caj jiñi laj cultura baqui tsaʼ coliyonla. Cabʌl ñaʼtʌbal tac maʼañic miʼ taj i bʌ yicʼot muʼ bʌ i yʌl Dios, i tajol woli (choncol) lac wen chaʼlen wersa chaʼan mi lac locʼsan ti lac pensar i ñaʼtʌbal tac quixtañujob ili ora. Laʼ laj qʼuel jumpʼejl ejemplo.

⁷ I tilelʌch cheʼ an tejclum tac baqui jiñi xcolelob miʼ xijqʼuelob i wen sʌclañob taqʼuin. Jiñʌch tsaʼ bʌ ujti tiʼ tojlel jiñi hermana Mary. * Cheʼ maxto i cʌñʌyic Jehová, tsajñi ti qʼueljun ti jumpʼejl universidad wem cʌmbil yaʼ ti lumal. Jiñi i familia tsiʼ xiqʼui chaʼan miʼ sʌclan i yeʼtel (troñel) baqui miʼ wen taj taqʼuin yicʼot miʼ wen qʼuejlel ti ñuc. Jiñʌch yom bʌ tiʼ tojlel jaʼel. Pero tsaʼ qʼuextʌyi chuqui yom cheʼ bʌ tsaʼ cʼoti i cʌn Jehová yicʼot i cʼuxbin. Jin chaʼan, miʼ yʌl: «An i tajol mic mulan cotsan jumpʼejl c choñoñel muʼ bʌ i yʌqʼueñon c taj cabʌl taqʼuin, pero mi caj i mʌctañon chaʼan mic melben i yeʼtel Jehová. Tiʼ caj cheʼ bajcheʼ tsaʼ cosʌntiyon, wocolto mi cubin chaʼan mi cʌl chaʼan maʼañic mic mel. Mij cʼajtiben Jehová chaʼan miʼ coltañon chaʼan maʼañic mic jacʼ eʼtel tac muʼ bʌ i mʌctañon c melben i yeʼtel» (Mt. 6:24).

8. ¿Chuqui mi caj lac tsajin?

⁸ Cheʼ bajcheʼ an laj qʼuele, mi lac taj lac wenlel cheʼ mi lac jacʼben i tʼan Jehová. Pero añʌch yambʌ i sujmlel cheʼ yom miʼ jacʼbeñob i tʼan Jehová jiñi ancianojob, tatʌlob yicʼot ñaʼʌlob, añoʼ bʌ tiʼ wenta jumpʼejl eʼtel: Miʼ mejlel i coltan jiñi yambʌlob. Wʌle mi caj laj qʼuel ejemplo tac am bʌ ti Biblia muʼ bʌ i pʌsbeñonla chaʼan bajcheʼ yom miʼ mejlel jiñi eʼtel cheʼ bajcheʼ miʼ mulan Jehová.

9. ¿Chuqui ti wocol tiʼ taja Nehemías?

⁹ Jehová tsiʼ yʌqʼueyob tiʼ wenta jiñi ancianojob jumpʼejl ñuc bʌ eʼtel: Miʼ cʌntʌbeñob  i wiñicob (1 P. 5:2). Jiñi ancianojob cabʌl chuqui miʼ mejlel i cʌñob tiʼ tojlel Nehemías chaʼan bajcheʼ tsiʼ mele tiʼ tojlel jiñi i tejclum Jehová. Come juntiquilʌch yumʌl, miʼ mejlel i mel chuqui yom (Neh. 1:11; 2:7, 8; 5:14). Laʼ laj qʼuel chuqui ti wocol tsiʼ taja. Tsiʼ yubi chaʼan jiñi judíojob woli (yʌquel) i melob mach tac bʌ weñic yaʼ ti templo, chaʼan maʼañic woliʼ coltʌntelob jiñi levitajob ti taqʼuin cheʼ bajcheʼ tsʼijbubil yaʼ ti Mandar. Cheʼ jaʼel, maʼañix woliʼ qʼuelob ti ñuc jiñi cʼaj o yicʼot an tsaʼ bʌ ñujpuñiyob yicʼot xʼixicob maʼañic bʌ miʼ chʼujutesañob Jehová. Jin chaʼan, Nehemías añʌch chuqui yom miʼ mel (Neh. 13:4-30).

10. ¿Chuqui tsiʼ mele Nehemías cheʼ tsiʼ taja wocol tac?

¹⁰ Nehemías maʼañic tsiʼ cʼʌñʌ jiñi i yeʼtel am bʌ tiʼ wenta chaʼan miʼ wersa xicʼob jiñi Judíojob i jacʼbeñob i bajñel mandar. Tsaʼ jach i wen cʼajtibe ti oración Jehová chuqui yom miʼ mel yicʼot tsiʼ cʌntesa jiñi israelitajob tiʼ mandar Dios (Neh. 1:4-10; 13:1-3). Cheʼ jaʼel, tsiʼ pʌsʌ i pecʼlel i tsaʼto i tem chaʼle eʼtel yicʼot jiñi judíojob chaʼan miʼ chaʼ melbeñob i tsʼajquil jiñi Jerusalén (Neh. 4:15).

11. Cheʼ bajcheʼ miʼ yʌl 1 Tesalonicenses 2:7, 8, ¿bajcheʼ yom miʼ melob jiñi ancianojob tiʼ tojlel jiñi congregación?

¹¹ Tajol jiñi ancianojob maʼañic miʼ tajob jiñi wocol tsaʼ bʌ i ñusa Nehemías. Pero mejlʌch i lajibeñob i melbal. Jumpʼejl ejemplo, miʼ wen chaʼleñob eʼtel chaʼan miʼ coltan jiñi hermanojob. I maʼañic mi wen qʼuelob i bʌ ti ñuc tiʼ tojlel jiñi yambʌlob chaʼan jiñi eʼtel añoʼ bʌ tiʼ wenta, miʼ pʌsbeñob i cʼuxbiya jiñi congregación (pejcan 1 Tesalonicenses 2:7, 8). Wen jach bajcheʼ tsiʼ pejca jiñi yambʌlob come añʌch i pecʼlel yicʼot i cʼuxbiya. Juntiquil anciano am bʌ cabʌl i ñaʼtʌbal i cʼabaʼ Andrés miʼ yʌl: «Qʼuelbil c chaʼan chaʼan jiñi hermanojob wen jach bajcheʼ miʼ jacʼob cheʼ jiñi ancianojob miʼ pʌsob i yutslel i pusicʼal yicʼot miʼ chʼʌmob ti ñuc jiñi hermanojob. Ili melbalʌl tac jiñʌch muʼ bʌ i ñijcan jiñi hermanojob chaʼan miʼ coltañob jiñi ancianojob». Antonio juntiquil hermano añix bʌ ora i cajel bajcheʼ anciano miʼ  tsictesan: «Mic chaʼlen wersa chaʼan mic jacʼ jiñi ticʼojel am bʌ ti Filipenses 2:3 yicʼot chaʼan ti bele ora mic ñaʼtan chaʼan jiñi yambʌlob ñumen ñucob bajcheʼ joñon. Ili miʼ coltañon chaʼan maʼañic mic wersa xicʼob i jacʼob c tʼan».

12. ¿Chucoch yom añob i pecʼlel jiñi ancianojob?

¹² Jiñi ancianojob yom añob i pecʼlel cheʼ bajcheʼ Jehová. Anquese jiñʌch Yumʌl bʌ ti panchan yicʼot ti pañimil, miʼ ñoctʌl chaʼan miʼ tech jiñi «pobre baʼ cʼax pʼumpʼun» (Sal. 18:35; 113:6, 7). Tiʼ sujm, Jehová miʼ tsʼaʼlen jiñi muʼ bʌ i chanʼesan i bʌ (Pr. 16:5).

13. ¿Chucoch yomʌch miʼ cʌntañob bajcheʼ miʼ chaʼleñob tʼan jiñi ancianojob?

¹³ Jiñi ancianojob muʼ bʌ jacʼbeñob i tʼan Jehová yom miʼ cʌntañob bajcheʼ miʼ chaʼleñob tʼan. Mi maʼañic miʼ melob, tajol mach weñic mi caj i jacʼob cheʼ an majqui mach weñic miʼ pejcañob (Gá. 5:14, 15; Stg. 1:26). Andrés, tsaʼ bʌ la cʌlʌ tiʼ tejchibal, miʼ yʌl: «An i tajol mach weñic com jacʼben juntiquil hermano cheʼ bʌ maʼañic miʼ chʼʌmon ti ñuc. Pero an i coltayon chaʼan mic pʌs c pecʼlel yicʼot cutslel cheʼ miʼ wen cʼotel c ñaʼtan jiñi i melbalob jiñi xucʼul bʌ i wiñicob Dios ti wajali». Jiñi ancianojob miʼ pʌsob chaʼan miʼ jacʼbeñob i tʼan Jehová cheʼ miʼ pʌsob i cʼuxbiya yicʼot cheʼ wen jach miʼ pejcañob jiñi hermanojob yicʼot jaʼel jiñi yambʌ ancianojob (Col. 4:6).

14. ¿Chuqui ti eʼtel an i yʌqʼue Jehová tiʼ wenta jiñi tatʌlob, i chuqui yom chaʼan miʼ melob?

¹⁴ Jehová tsiʼ yʌqʼue tiʼ wenta jiñi tatʌlob chaʼan miʼ cʌntañob jiñi i familia i miʼ pijtan chaʼan miʼ cʌntesañob yicʼot miʼ ticʼob jiñi yalobilob (1 Co. 11:3; Ef. 6:4). Pero añʌch baqui jaxʌl miʼ mejlel i melob. Jehová mi caj i cʼajtin mi tsaʼʌch i meleyob jiñi eʼtel come jiñʌch tsaʼ bʌ i mele jiñi familia tac (Ef. 3:14, 15, TNM). Jiñi tatʌlob miʼ pʌsob chaʼan mucʼʌch i jacʼbeñob i tʼan Dios cheʼ miʼ melob i yeʼtel cheʼ bajcheʼ miʼ mulan. Cheʼ mi cʼotel laj cʌn jiñi ejemplo i chaʼan David cabʌl chuqui miʼ cʌntesañonla.

15. ¿Chucoch jiñi David juntiquilʌch wem bʌ ejemplo i chaʼan jiñi tatʌlob?

¹⁵ Jehová tsiʼ waʼchoco David chaʼan miʼ cʌntan i familia yicʼot jiñi i tejclum Israel. Come juntiquilʌch rey, cabʌl i pʼʌtʌlel tiʼ yeʼtel. Pero an i tajol mach weñic bajcheʼ tsiʼ cʼʌñʌ i tsaʼ cʼoti i mel tac tsʌts bʌ mulil (2 S. 11:14, 15). Anquese tsiʼ mele tac jiñi, tsiʼ pʌsʌ chaʼan yom i jacʼben i tʼan Jehová cheʼ tsiʼ chʼʌmʌ i tojʼesʌntel. Tsiʼ laj sube chuqui an tiʼ pusicʼal ti oración (Sal. 51:1-4). Cheʼ jaʼel, tsiʼ wen pʌsʌ i pecʼlel chaʼan miʼ chʼʌm jiñi wem bʌ ticʼojel tiʼ tojlel wiñicob yicʼot xʼixicob (1 S. 19:11, 12; 25:32, 33). Cabʌl chuqui tsiʼ cʌñʌ ti chuqui mach bʌ weñic  tsiʼ mele i tsiʼ yʌcʼʌ ti ñaxan i melol i yeʼtel Jehová.

16. ¿Chuqui tac miʼ mejlel i cʌñob jiñi tatʌlob tiʼ tojlel David?

¹⁶ Laʼ laj qʼuel chaʼpʼejl uxpʼejl cʌntesʌntel mejl bʌ laʼ cʌn tatʌletbʌla tiʼ tojlel David. Cʼʌñʌla ti wen jiñi eʼtel aqʼuebiletbʌla i chaʼan Jehová. Cʌñʌla jiñi mach bʌ weñic woli laʼ mel yicʼot chʼʌmʌla jiñi ticʼojel tac muʼ bʌ laʼ wʌqʼuentel yaʼ ti Biblia. Mi mucʼʌch laʼ mel, laʼ wijñam yicʼot laʼ walobilob mi caj i qʼueletla ti ñuc chaʼan an laʼ pecʼlel. Cheʼ jaʼel, cheʼ mi laʼ chaʼlen oración yicʼotob, subenla Jehová pejtelel chuqui an ti laʼ pusicʼal. Cheʼ bajcheʼ iliyi, jiñi laʼ familia mi caj i qʼuel chaʼan mucʼʌch a wen chʼʌm ti ñuc Dios. I acʼʌla ti ñaxan i melol i yeʼtel Jehová (Dt. 6:6-9). Jiñi wem bʌ laʼ ejemplo jiñʌch jumpʼejl majtañʌl ñumen ñuc bʌ i cʼʌjñibal mejl bʌ a melben jiñi a familia.

17. ¿Chuqui ti eʼtel aqʼuebil i chaʼan Jehová jiñi ñaʼʌlob?

¹⁷ Jehová an i yʌqʼue tiʼ wenta jiñi ñaʼʌlob ñuc bʌ eʼtel tiʼ familia yicʼot chaʼan miʼ yʌcʼob i coltaya i ticʼ i yalobilob (Pr. 6:20). Tiʼ sujm, miʼ mejlel i coltañob i yalobil tiʼ pejtelel i cuxtʌlel (Pr. 22:6). Laʼ laj qʼuel chuqui miʼ mejlel i cʌñob jiñi ñaʼʌlob tiʼ tojlel María, jiñi i ñaʼ Jesús.

18, 19. ¿Chuqui miʼ mejlel i cʌñob jiñi ñaʼʌlob tiʼ tojlel María?

¹⁸ María wen cʌmbil i chaʼan jiñi Tsʼijbujel tac. Tsiʼ wen qʼuele ti ñuc Jehová yicʼot tsaʼ sujti ti wem bʌ i yamigo. Tsiʼ jacʼʌ i mel pejtelel chuqui miʼ suben Dios anquese tsaʼ qʼuextʌyi jiñi i cuxtʌlel (Lc. 1:35-38, 46-55).

¹⁹ Laʼ laj qʼuel chuqui miʼ mejlel laʼ cʌn ñaʼʌletbʌla tiʼ tojlel María. Ñaxam bʌ, pejcanla jiñi Biblia yicʼot chaʼlenla oración chaʼan mi laʼ chʌn ajñel bajcheʼ i yamigo Jehová. I chaʼpʼejlel, mi an chuqui yom mi laʼ qʼuextan ti laʼ cuxtʌlel, yomʌch mi laʼ mel chaʼan utsʼat miʼ qʼueletla. Jumpʼejl ejemplo, tajol jiñi laʼ tat laʼ ñaʼ orajach tsaʼ michʼayob yicʼotetla i ti tsʌts bʌ tʼan tsiʼ pejcayetla. Jin chaʼan, cheʼ tsaʼ coliyetla majlel tsaʼ laʼ ñaʼta chaʼan cheʼʌch yom mi laʼ mel jaʼel tiʼ tojlel laʼ walobilob. Anquese cʌmbilix laʼ chaʼan bajcheʼ yom Jehová chaʼan mi laʼ cosan laʼ walobilob, tajol wocolʌch mi laʼ wubin chaʼan mi laʼ pʌs laʼ pijt yicʼot cheʼ mach orajic mi laʼ michʼan, ñumento cheʼ lujbetla o cheʼ jiñi laʼ walobilob maʼañic miʼ jacʼob laʼ tʼan (Ef. 4:31). Mi cheʼ mi laʼ wujtel, yom mi laʼ ñumen cʼajtiben i coltaya Jehová ti oración. Juntiquil ñaʼʌl i cʼabaʼ Lidia miʼ yʌl: «An qʼuiñil, yom mic wen chaʼlen oración chaʼan mach tsʌtsic mic pejcan jiñi calobil cheʼ miʼ ñusan c tʼan. Cheʼ jaʼel, maʼañix mi cujtesan c tʼan cheʼ an chuqui woli c suben, i mic mucu cʼajtiben Jehová chaʼan miʼ coltañon. Jiñi oración  an i coltayon chaʼan ñʌchʼʌl mi cajñel» (Sal. 37:5).

20. ¿Chuqui ti wocol miʼ tajob chaʼtiquil uxtiquil ñaʼʌlob, i bajcheʼ miʼ mejlel i ñusañob?

²⁰ An yambʌ wocol muʼ bʌ i tajob chaʼtiquil uxtiquil ñaʼʌlob: Jiñʌch cheʼ wocol miʼ yubiñob chaʼan miʼ pʌsbeñob cʼuxbiya jiñi i yalobilob (Tit. 2:3, 4). Ili jiñʌch tiʼ caj cheʼ jiñi i tat i ñaʼ maʼañic tsiʼ pʌsbeyob cʼuxbiya cheʼ bʌ chutobto. Pero mach cheʼic yom miʼ melob jaʼel. Jiñi ñaʼʌlob yomoʼ bʌ i jacʼbeñob i tʼan Jehová tajol yom miʼ cʌñob bajcheʼ miʼ pʌsbeñob cʼuxbiya jiñi i yalobilob. Tajol wocol mi caj i yubiñob chaʼan miʼ qʼuextañob i pensar, bajcheʼ miʼ yubiñob i bʌ yicʼot chuqui miʼ melob, pero mejlʌch i melob. Mi cheʼʌch miʼ melob, tijicña mi caj yubiñob i bʌ yicʼot jaʼel jiñi i familiajob.

21, 22. Cheʼ bajcheʼ miʼ yʌl Isaías 65:13, 14, ¿chuqui ti wenlel tac mi lac taj cheʼ mi lac jacʼben i tʼan Jehová?

²¹ Jiñi rey David tsaʼ cʼoti i ñaʼtan chaʼan miʼ taj cabʌl wenlel cheʼ miʼ jacʼben i tʼan Jehová. Tsiʼ yʌlʌ: «Tojʌch i cʌntesa lac Yum. Miʼ yʌqʼueñonla i tijicñʌyel lac pusicʼal. Tsiquil i sujmlel i mandar lac Yum. Miʼ yʌqʼueñonla lac chʼʌmben isujm». I tsiʼ bej alʌ: «Mic taj j cʌntesʌntel ti a tʼan come a winicon. An cabʌl c chobejtʌbal tiʼ jacʼol a tan» (Sal. 19:8, 11). Ili ora, miʼ mejlel laj qʼuel chaʼan jiñi muʼ bʌ i jacʼbeñob i tʼan Jehová mach lajalobic yicʼot jiñi muʼ bʌ i tsʼaʼleñob i mandar. Jiñi muʼ bʌ i jacʼbeñob i tʼan Dios miʼ wem ubiñob i «tijicñʌyel i pusicʼal» (pejcan Isaías 65:13, 14).

²² Cheʼ bʌ jiñi ancianojob, jiñi tatʌlob yicʼot ñaʼʌlob miʼ jacʼbeñob i tʼan Jehová, miʼ qʼuextʌyel jiñi i cuxtʌlelob, wen tijicña miʼ yajñelob i familia yicʼot temel miʼ yajñel jiñi congregación. Pero jiñi ñumen ñuc bʌ jiñʌch chaʼan miʼ tijicñesʌbeñob i pusicʼal Jehová (Pr. 27:11). Iliyi jiñʌch muʼ bʌ i ñumen aqʼueñonla lac tijicñʌyel.