1, 2. a) ¿Chucoch weñʌch bʌ tʼan lac chaʼan cheʼ mi caj i tilel jiñi Armagedón? b) ¿Chuqui ti cʼajtiya tac mi caj laj qʼuel ti ili temaj?

YONLEL wiñicob xʼixicob (quixtañujob) miʼ ñaʼtañob chaʼan jiñi Armagedón jiñʌch jumpʼejl guerra baʼ mi caj i cʼʌjñel bomba tac o cheʼ mi caj i yujtel mach tac bʌ weñic ti ili Pañimil. Pero muʼ bʌ i yʌl jiñi Biblia chaʼan jiñi Armagedón miʼ yʌqʼueñonla lac tijicñʌyel (Ap. 1:3). Jiñi Armagedón maʼañic mi caj i jisan jiñi quixtañujob, mi caj i coltan. ¿Bajcheʼ mi caj i mel?

² Jiñi Biblia miʼ yʌl chaʼan jiñi Armagedón mi caj i jisan jiñi yumʌlob yicʼot jiñi jontoloʼ bʌ i mi caj i coltan jiñi tojoʼ bʌ. Ili guerra mi caj i coltan jaʼel ili lum cheʼ miʼ jisan jiñi woli (choncol) bʌ i yʌsiñob. (Ap. 11:18). Chaʼan mi lac ñumen chʼʌmben i sujm iliyi, laʼ laj qʼuel chʌmpʼejl cʼajtiya: ¿Chuquiyes jiñi Armagedón? ¿Chuqui tac mi caj i yujtel cheʼ bʌ mach jalix yom chaʼan miʼ tilel? ¿Chuqui yom mi lac mel chaʼan cuxul mi laj cʌytʌl? I ¿chuqui miʼ mejlel lac mel chaʼan bej xucʼul mi la cajñel cheʼ bʌ wolix (yʌquelix) i lʌcʼtiyel?

3. a) ¿Chuqui yom i yʌl jiñi tʼan Armagedón? b) Cheʼ la cujil muʼ bʌ i yʌl Apocalipsis 16:14, 16, ¿chucoch mi lac ñaʼtan chaʼan jiñi Armagedón mach yoque jumpʼejlic tejclum?

³ (Pejcan Apocalipsis 16:14, 16). Jiñi tʼan Armagedón junyajl jach mi lac taj yaʼ ti Biblia i tilem ti jumpʼejl tʼan am bʌ ti hebreo yom bʌ i yʌl «Wits i chaʼan Meguidó». Meguidó jiñʌch i cʼabaʼ jumpʼejl tejclum i chaʼan Israel ti wajali (Jos. 17:11). Pero Armagedón mach yoque jumpʼejlic tejclum. Ti toj bʌ tʼan jiñʌch bajcheʼ mi caj i yajñelob jiñi «reyob tiʼ pejtelel pañimil» cheʼ bʌ miʼ tempʌntelob chaʼan miʼ contrajiñob Jehová (Ap. 16:14). Pero ti  ili temaj mi caj laj cʼʌn jaʼel jiñi tʼan Armagedón chaʼan mi lac taj ti tʼan jiñi guerra muʼ bʌ caj i tejchel ti ora cheʼ bʌ tempʌbilobix jiñi reyob tiʼ pejtelel pañimil. ¿Chucoch la cujil chaʼan jiñi Armagedón mach yoque jumpʼejlic tejclum? Ñaxan, come jiñi wits i chaʼan Meguidó mach yoque añic. I chaʼpʼejlel, come jiñi lum muʼ bʌ i joy jiñi Meguidó mach wen colemic, jin chaʼan mach luʼ ochobic jiñi «reyob tiʼ pejtelel pañimil», i wiñicob yicʼot i juloñib o yan tac bʌ. I yuxpʼejlel, come cheʼ bajcheʼ mi caj laj qʼuel ti ili temaj, jiñi guerra i chaʼan Armagedón mi caj i tejchel cheʼ bʌ jiñi «reyob» ti Pañimil miʼ contrajiñob i wiñicob Dios, mach bʌ junlajalic baqui chumulob.

4. ¿Chucoch Jehová tsiʼ taja ti tʼan jiñi Meguidó cheʼ bʌ miʼ yʌl jiñi i guerra?

⁴ ¿Chucoch Jehová tsiʼ taja ti tʼan jiñi Meguidó cheʼ bʌ miʼ yʌl jiñi i guerra? Come yaʼ ti Meguidó yicʼot ti jiñi joctʌl i chaʼan Jezreel tsaʼ ujti cabʌl guerra tac. An tac baqui tsiʼ chaʼle coltaya Jehová. Jumpʼejl ejemplo, «tiʼ tʼejl jini pasib jaʼ ti Meguido» tsiʼ colta juntiquil juez i chaʼan Israel i cʼabaʼ Barac chaʼan miʼ mʌlben (jotben) jiñi cananeojob am bʌ tiʼ wenta Sísara. Jiñi Barac yicʼot jiñi xʼaltʼan i cʼabaʼ Débora tsiʼ yʌqʼueyob wocolix i yʌlʌ Jehová chaʼan tsiʼ coltayob. Ti jumpʼejl cʼay tsiʼ yʌlʌyob: «Yaʼ ti panchan jini ecʼ tac tsiʼ chaʼleyob guerra [...] tiʼ contra Sísara. Tsiʼ jexbayob majlel jini jaʼ i cʼabaʼ Cisón» (Jue. 5:19-21).

5. ¿Chucoch qʼuexel jiñi Armagedón yicʼot jiñi guerra baqui tsaʼ ajñi Barac?

⁵ Barac yicʼot Débora tsiʼ yujtesayob i cʼay yicʼot ili tʼan tac: «Cheʼʌch yom miʼ laj jilelob a contrajob c Yum. Pero jini muʼ bʌ i cʼuxbiñetob yom lajal i pʼʌtʌlel bajcheʼ qʼuin cheʼ miʼ pasel» (Jue. 5:31). Ti Armagedón, jiñi i contrajob Jehová mi caj i chʌmelob (sajtelob), i jiñi muʼ bʌ i cʼuxbiñob Dios mi caj i coltʌntelob. Pero qʼuexel jiñi Armagedón yicʼot jiñi guerra baqui tsaʼ ajñi Barac. Ti Armagedón, jiñi i wiñicob Dios maʼañic mi caj i chaʼleñob jatsʼ. Maʼañic mi caj i cuchob majlel i juloñib o yan tac bʌ. Cojach yom chaʼan ñʌchʼʌlob miʼ yajñelob yicʼot miʼ ñopbeñob i coltaya Jehová yicʼot jiñi yonlel i yángelob (Is. 30:15; Ap. 19:11-15).

6. ¿Chuqui tac miʼ mejlel i cʼʌn Jehová chaʼan miʼ jisan jiñi i contrajob ti Armagedón?

⁶ ¿Bajcheʼ mi caj i mʌlben Jehová jiñi i contrajob ti Armagedón? Cabʌl bajcheʼ miʼ mejlel i mel (chaʼlen). Jumpʼejl ejemplo, tajol miʼ mejlel i cʼʌn jiñi yujquel, tuñijaʼ yicʼot chajc (Job 38:22, 23; Ez. 38:19-22). Cheʼ jaʼel, miʼ mejlel i yʌcʼ chaʼan jiñi i contrajob miʼ bajñel contrajiñob i bʌ (2 Cr. 20:17, 22, 23). I tajol miʼ mejlel i cʼʌn i yángelob chaʼan miʼ tsʌnsañob jiñi i contrajob (Is. 37:36). Mach yʌlʌlic chuqui miʼ cʼʌn, mi caj i mʌl. Pejtelel jiñi quixtañujob muʼ bʌ i contrajiñob Dios mi caj i jisʌntelob, pero jiñi tojoʼ bʌ mi caj i coltʌntelob (Pr. 3:25, 26).

7, 8. a) Cheʼ bajcheʼ miʼ yʌl 1 Tesalonicenses 5:1-6, ¿chuqui mi caj i yʌlob jiñi yumʌlob? b) ¿Chucoch añʌch i wocolel ili lot?

⁷ Mi caj i yʌjlel «ñʌchʼʌlix pañimil» yicʼot «maʼanic tsiquil bʌbʌqʼuen bʌ» cheʼ mach jalix yom chaʼan miʼ tilel «i qʼuiñilel lac Yum» (pejcan 1 Tesalonicenses 5:1-6). Ti 1 Tesalonicenses 5:2, jiñi «i qʼuiñilel lac Yum» yom i yʌl chaʼan jiñʌch jiñi «ñuc bʌ wocol» (Ap. 7:14). ¿Bajcheʼ mi caj lac ñaʼtan chaʼan mach jalix yom miʼ tejchel jiñi ñuc bʌ wocol? Jiñi Biblia miʼ yʌl chaʼan an chuqui mi caj i yʌjlel muʼ bʌ caj i yʌqʼueñonla lac ñaʼtan.

⁸ Jiñi yumʌlob mi caj i yʌlob chaʼan «ñʌchʼʌlix pañimil» yicʼot «maʼanic tsiquil bʌbʌqʼuen bʌ». ¿Chucoch mi caj i yʌlob? ¿Muʼ ba caj i yotsañob i bʌ jiñi ñucoʼ bʌ i yeʼtel ti ñopbalʌl tac? Tajol. Pero jumpʼejl jach lot i chaʼan bʌ xibajob. Ili lot añʌch i wocolel, come mi caj i yʌqʼuen i ñop  jiñi quixtañujob chaʼan wen cʌntʌbilob cheʼ bʌ mach jalix yom chaʼan miʼ tejchel jiñi ñuc bʌ wocol. Cheʼʌchi, «mi caj i bʌcʼ jisʌntelob cheʼ bajcheʼ miʼ bʌcʼ cajel ti bajqʼuel xʼixic cheʼ miʼ yilan pañimil i yalobil». ¿I chuqui mi caj i yujtel tiʼ tojlel jiñi xucʼul bʌ i wiñicob Jehová? Come mach yujilob jalaqui mi caj i ñoj tejchel jiñi ñuc bʌ wocol, tajol mi caj i toj sajtelob i pusicʼal cheʼ miʼ yujtel, pero chajpʌbil mi caj i yajñelob.

9. ¿Bajcheʼ mi caj i jisan Jehová i pañimil Satanás?

⁹ Jehová mach ti junjajtsʼic mi caj i jisan pejtelel i pañimil (mulawil) Satanás, cheʼ bajcheʼ tsiʼ mele tiʼ yorajlel Noé. Chaʼchajp bajcheʼ mi caj i mel. Ñaxan, mi caj i jisan jiñi Ñuc bʌ Babilonia, jiñʌch jiñi ñopbalʌl tac mach bʌ i sujmic am bʌ tiʼ pejtelel pañimil. Ti wiʼil, ti Armagedón, muqʼuix caj i luʼ jisʌben i pañimil Satanás, bajcheʼ jiñi política, jiñi choñoñelʌl yicʼot eʼtel (troñel) bajcheʼ soldadojob. Laʼ lac wen qʼuel bajcheʼ mi caj i yujtel ili chaʼchajp.

10. Cheʼ bajcheʼ miʼ yʌl Apocalipsis 17:1, 6 yicʼot 18:24, ¿chucoch Jehová mi caj i jisan jiñi Ñuc bʌ Babilonia?

¹⁰ Miʼ caj i yʌjqʼuel «ti toj mulil jini ñuc bʌ xmoja [o tsʼiʼlel bʌ xʼixic]» (pejcan Apocalipsis 17:1, 6; 18:24). Jiñi Ñuc bʌ Babilonia an i bibʼesʌbe i cʼabaʼ Dios. An i yʌlʌ lot tac tiʼ tojlel yicʼot an i mele i bʌ bajcheʼ juntiquil xtsʼiʼlel bʌ xʼixic tiʼ wut Dios, come an i colta jiñi yumʌlob ti pañimil. An i cʼʌñʌ i pʼʌtʌlel chaʼan miʼ ticʼlan jiñi muʼ bʌ i tsajcañob. Yicʼot an i tsʌnsa yonlel quixtañujob, yaʼ bʌ ochem jaʼel i wiñicob Dios (Ap. 19:2). ¿Bajcheʼ mi caj i jisan Jehová jiñi Ñuc bʌ Babilonia?

11. ¿Chuquiyes jiñi «chʌctsʼeran bʌ bʌteʼel», i bajcheʼ mi caj i cʼʌn Dios chaʼan miʼ jisan jiñi Ñuc bʌ Babilonia?

¹¹ Jehová mi caj i cʼʌn jiñi «chʌctsʼeran bʌ bʌteʼel» am bʌ «lujuntsʼijt i xulub» chaʼan miʼ jisan jiñi ñuc bʌ xtsʼiʼlel xʼixic. Ili jontol bʌ bʌteʼel jiñʌch jiñi Organización de las Naciones Unidas, i jiñi 10 i xulub jiñʌch jiñi yumʌlob muʼ bʌ i coltañob ili ora. Cheʼ baʼ ora weñix miʼ qʼuel Dios, ili yumʌlob mi caj i contrajiñob jiñi Ñuc bʌ Babilonia. «Mi caj i chilbeñob i chubʌʼan yicʼot i pislel», cheʼ jaʼel, mi caj i yʌcʼob ti cʌjñel i jontolil (Ap. 17:3, 16). Come orajach mi caj i jisʌntel, bajcheʼ «ti jumpʼejl jach qʼuin», mi  caj i yʌcʼ ti toj sajtelob i pusicʼal jiñi woli bʌ i tsajcañob, ñumento cheʼ ti bele ora an i yʌlʌ ili: «Buchulon tic yumʌntel cheʼ bajcheʼ rey. Mach mebaʼonic. Maʼanic mi caj cubin wocol yicʼot uqʼuel» (Ap. 18:7, 8).

12. ¿Chuqui maʼañic mi caj i yʌcʼ Jehová chaʼan miʼ mel jiñi tejclum tac, i chucoch?

¹² Jiñi i wiñicob Dios miʼ qʼuelbeñob ti ñuc i cʼabaʼ yicʼot an i jacʼʌyob jiñi mandar chaʼan miʼ loqʼuelob yaʼ ti Ñuc bʌ Babilonia, jin chaʼan Jehová maʼañic mi caj i yʌcʼ chaʼan jiñi tejclum tac miʼ jisʌbeñob i wiñicob (Hch. 15:16, 17; Ap. 18:4). Cheʼ jeʼel, jiñi i wiñicob Dios an i chaʼleyob wersa chaʼan miʼ coltañob yambʌlob i loqʼuel yaʼi. Jin chaʼan, maʼañic mi caj i yʌqʼuentelob «wocol lajal bajcheʼob». Pero mucʼʌch caj i yʌjqʼuelob ti wocol i ñopoñel (chʼujbiya).

13. a) ¿Majqui jiñi Gog? b) Cheʼ bajcheʼ miʼ yʌl Ezequiel 38:2, 8, 9, ¿jala mi caj i tejchel jiñi Armagedón?

¹³ Cheʼ miʼ contrajiñonla jiñi Gog (pejcan Ezequiel 38:2, 8, 9). Cheʼ bʌ tsaʼix luʼ jisʌntiyob jiñi mach bʌ i sujmic ñopbalʌl tac, jiñi i tejclum Jehová mi caj i cʌytʌl cheʼ bajcheʼ juntejc teʼ mach bʌ muqʼuic i bujchel cheʼ miʼ ñumel tsʌts bʌ icʼ jaʼal. Satanás mi caj i wen michʼan. Jin chaʼan, mi caj i cʼʌn i tʼan tac xibajob chaʼan jiñi junmojt tejclum miʼ contrajiñob i tejclum Jehová (Ap. 16:13, 14). Jiñi junmojt tejclum miʼ subentel bajcheʼ Gog. Cheʼ baqui ora jiñi tejclum tac miʼ contrajin i tejclum Dios, mi caj i tejchel jiñi Armagedón (Ap. 16:16).

14. ¿Chuqui mi caj i cʼotel i ñaʼtan jiñi Gog?

¹⁴ Gog mi caj i ñopben i coltaya jiñi i wiñicob, yom i yʌl, jiñi i soldadojob (2 Cr. 32:8). Pero joñonla mi caj lac ñopben i coltaya jiñi lac Dios, Jehová. Maʼañic i sujmlel mi caj i qʼuelob jiñi tejclum tac cheʼ mi caj lac mel iliyi. Jiñi Ñuc bʌ Babilonia wen pʼʌtʌl tsiʼ pʌsʌ i bʌ, pero jiñi i diosob maʼañic tsiʼ coltayob tiʼ cʼʌb jiñi «chʌctsʼeran bʌ bʌteʼel» am bʌ «lujuntsʼijt i xulub» (Ap. 17:16). Jin chaʼan Gog mi caj i ñop chaʼan mi caj i mʌlbeñonla. Cheʼ bajcheʼ tocal miʼ mʌc jiñi pañimil, cheʼ mi caj i contrajin jiñi i tejclum Jehová (Ez. 38:16).  Pero ti ora mi caj i cʼotel i ñaʼtan chaʼan tsaʼ yajli ti jumpʼejl yac. Cheʼ bajcheʼ tsaʼ ujti tiʼ tojlel jiñi faraón yaʼ ti chʌchʌc bʌ mar, mi caj i ñaʼtan chaʼan woliʼ contrajin Jehová (Éx. 14:1-4; Ez. 38:3, 4, 18, 21-23).

15. ¿Chuqui mi caj i mel Jesús ti jiñi guerra i chaʼan Armagedón?

¹⁵ Cristo yicʼot yonlel i yángelob mi caj i coltañob jiñi i wiñicob Dios i mi caj i jisʌbeñob i wiñicob Gog (Ap. 19:11, 14, 15). ¿I chuqui mi caj i chaʼlen jiñi ñaxam bʌ i contra Jehová, jiñi Satanás, tsaʼ bʌ i loti jiñi tejclum tac chaʼan miʼ tejchel jiñi Armagedón? Jesús mi caj i choc ochel yicʼot i xibajob ti jumpʼejl chʼen maʼañic bʌ i yebal baqui ñupʼul mi caj i yajñelob ti mil jab (Ap. 20:1-3).

16. a) ¿Chuqui yom mi lac mel chaʼan mi lac pʌs chaʼan laj cʌñʌ Jehová? b) ¿Chuqui mi caj i chaʼleñob ti Armagedón jiñi quixtañujob i cʌñʌyoʼ bʌ Jehová?

¹⁶ Mach yʌlʌyic jalix ochemonla tiʼ tejclum Jehová, chaʼan cuxul mi laj cʌytʌl ti Armagedón, yom mi lac pʌs chaʼan laj cʌñʌ Dios yicʼot chaʼan mi lac jacʼ «i wen tʼan lac Yum Jesucristo» (2 Ts. 1:7-9). Laj cʌñʌ Dios cheʼ la cujil chuqui miʼ mulan yicʼot maʼañic bʌ, i baqui tac bʌ i mandar. I mi lac pʌs chaʼan laj cʌñʌ cheʼ bʌ mi laj cʼuxbin, mi lac jacʼben i tʼan yicʼot cheʼ jin jach mi lac chʼujutesan (1 Jn. 2:3-5; 5:3). Cheʼ bʌ an majqui miʼ pʌs chaʼan miʼ cʼuxbin Dios, wen utsʼatax chuqui miʼ yujtel tiʼ tojlel come miʼ cʌjñel ti Dios, i jiñʌch muʼ bʌ caj i coltan ti Armagedón (1 Co. 8:3). ¿Chucoch? Come cheʼ i cʌñʌyonla Dios, yom i yʌl chaʼan utsʼat añonla tiʼ tojlel.

17. ¿Chuqui ochem cheʼ mi lac jacʼ «i wen tʼan lac Yum Jesucristo»?

¹⁷ Jiñi «i wen tʼan lac Yum Jesucristo» jiñʌch pejtelel i sujmlel tsaʼ bʌ i cʌntesayonla yicʼot muʼ bʌ lac taj ti Biblia. Mi lac jacʼ cheʼ mi lac mel ti laj cuxtʌlel. Yaʼ ochem cheʼ mi la cʌcʼ ti ñaxan i melol i yeʼtel Jehová, mi laj qʼuel ti ñuc i mandar tac yicʼot mi lac sub jiñi wen tʼan chaʼan i Yumʌntel (Mt. 6:33; 24:14). Yicʼot jaʼel cheʼ mi laj coltan jiñi i wiñicob bombiloʼ bʌ o yajcʌbiloʼ bʌ i chaʼan Cristo cheʼ bʌ woliʼ qʼuelob ñuc bʌ i yeʼtel tac (Mt. 25:31-40).

18. ¿Bajcheʼ mi caj i coltañob jiñi yajcʌbiloʼ bʌ i chaʼan Cristo jiñi ‹yambʌ tiñʌmeʼob› tsaʼ bʌ i pʌsʌyob i yutslel i pusicʼal tiʼ tojlelob?

 ¹⁸ Mach jalix yom chaʼan jiñi yajcʌbiloʼ bʌ i chaʼan Dios miʼ coltañob jiñi yambʌ tiñʌmeʼob chaʼan jiñi i yutslel i pusicʼal tsaʼ bʌ i pʌsʌyob tiʼ tojlelob (Jn. 10:16). ¿Bajcheʼ mi caj i melob? Cheʼ bʌ tsʼitaʼ jachix yom chaʼan miʼ tejchel jiñi guerra i chaʼan Armagedón, jiñi cʌylemobto bʌ chaʼan miʼ tsʼʌctesañob jiñi 144 mil, mi caj i yʌqʼuentelob i cuxtʌlel maʼañic bʌ miʼ chʌmel yaʼ ti panchan. Tiʼ pejtelelob jiñi 144 mil mi caj i temob i bʌ yicʼot i yángelob Dios chaʼan miʼ jisañob jiñi Gog i mi caj i cʌntañob jiñi ‹motocñayoʼ bʌ winicob xʼixicob›, utsoʼ bʌ bajcheʼ tiñʌmeʼ (Ap. 2:26, 27; 7:9, 10). Mi caj i wen tajob i tijicñʌyel jiñi ‹motocñayoʼ bʌ winicob xʼixicob› chaʼan tsiʼ coltayob jiñi yajcʌbiloʼ bʌ i chaʼan Jehová cheʼ wʌʼto añob ila ti Pañimil.

19, 20. Anquese mi lac taj wocol tac, ¿chuqui mi caj i coltañonla chaʼan bej xucʼul mi la cajñel cheʼ bʌ wolix i lʌcʼtiyel tilel jiñi Armagedón?

¹⁹ Ti ili cojix bʌ qʼuin tac, yonlel i wiñiconbʌla Dios mi lac taj wocol tac. Pero miʼ mejlel laj cuch yicʼot lac taj lac tijicñʌyel (Stg. 1:2-4). Muʼ bʌ caj i coltañonla jiñʌch cheʼ maʼañic mi laj cʌy lac mel oración (Lc. 21:36). Cheʼ jaʼel, yom mi lac pejcan jiñi Biblia tiʼ jujumpʼejl qʼuin yicʼot lac wen ñaʼtan chuqui miʼ subeñonla, bajcheʼ jiñi profecía tac muʼ bʌ i yʌl chaʼan ili ora (Sal. 77:12). Cheʼ mucʼʌch lac mel pejtelel iliyi yicʼot mi lac wen chaʼlen subtʼan, mi caj i pʼʌtʼan jiñi lac ñopoñel yicʼot lac pijtaya.

²⁰ Laʼ lac ñaʼtan chaʼan wen tijicña mi caj la cubin lac bʌ cheʼ jiñi Ñuc bʌ Babilonia tsaʼix jisʌnti yicʼot chaʼan tsaʼix ujti jiñi Armagedón. Ñumento yom mi lac ñaʼtan bajcheʼ cʼamel mi caj lac taj lac tijicñʌyel cheʼ bʌ jiñi i cʼabaʼ Dios yicʼot i yumʌntel mi caj i qʼuejlel ti ñuc (Ez. 38:23). Tiʼ sujm, jiñi i cʌñʌyoʼ bʌ Dios, muʼ bʌ i jacʼbeñob i tʼan i Yalobil yicʼot xucʼuloʼ bʌ miʼ yajñelob cʼʌlʌl tiʼ jilibal, tijicña miʼ yubiñob i bʌ cheʼ tal jiñi Armagedón (Mt. 24:13).