Muʼ bʌ i yʌl Eclesiastés 5:8 (TNM) miʼ wen acʼonla ti pensar come miʼ yʌl: «Mi tsaʼ qʼuele chaʼan yaʼ baqui chumulet miʼ melbentel mach bʌ weñic jiñi pʼumpʼuñoʼ bʌ yicʼot mi mach tojic bajcheʼ miʼ chaʼleñob meloñel, mach yomic miʼ toj sajtel a pusicʼal. Come jiñi am bʌ ñuc bʌ i yeʼtel woliʼ qʼuejlel ti juntiquil ñumen ñucto bʌ i yeʼtel, i tiʼ tojlelob anto yambʌlob ñumen ñucoʼ bʌ i yeʼtel».

Tiʼ wut juntiquil quixtañu ili tʼan tac woli jach i taj ti tʼan jiñi yumʌlob. Pero cheʼ mi lac wen ñaʼtan an chuqui miʼ yʌqʼueñonla lac ñaʼtan tiʼ tojlel Jehová muʼ bʌ i wen ñuqʼuesan lac pusicʼal yicʼot miʼ yʌqʼueñonla lac ñʌchʼtʌlel.

Eclesiastés 5:8 (TNM) miʼ taj ti tʼan juntiquil yumʌl muʼ bʌ i wen ticʼlan jiñi pʼumpʼuñoʼ bʌ yicʼot miʼ melbeñob mach bʌ tojic. Ili wiñic yom miʼ cʼajtesan chaʼan tajol juntiquil ñumen ñuc bʌ i yeʼtel woliʼ qʼuel chuqui woliʼ mel. I tajol an yambʌlob ñumen ñucto bʌ i yeʼtelob. Chʼijiyemtic jax ti alol, pero ila ti pañimil an yumʌlob mach bʌ weñic chuqui miʼ melob i tiʼ caj jiñi, jiñi quixtañujob miʼ yilañob wocol.

Anquese maʼañix mi lac ñaʼtan chuqui mi lac mel, miʼ yʌqʼueñonla lac tijicñʌyel cheʼ bʌ Jehová woliʼ qʼuel chuqui woliʼ mel ili ñuc bʌ yumʌlob. Miʼ mejlel laj cʼajtiben Dios chaʼan miʼ coltañonla yicʼot miʼ mejlel la cʌqʼuen tiʼ wenta lac wocol (Sal. 55:22; Fil. 4:6, 7). La cujil chaʼan Jehová woliʼ qʼuel «ñumel tiʼ pejtelel pañimil jini xucʼuloʼ bʌ i pusicʼal muʼ bʌ i ñopob» (2 Cr. 16:9).

Jin chaʼan, Eclesiastés 5:8 (TNM) miʼ pʌsbeñonla chaʼan ti jiñi yumʌlob ila ti pañimil tiʼ pejtelel ora añʌch juntiquil ñumen ñuc bʌ i yeʼtel. Cheʼ jaʼel, ili versículo miʼ ñumen pʌsbeñonla chaʼan jiñʌch Jehová ñumen ñuc bʌ i yeʼtel tiʼ pejtelel pañimil yicʼot ti panchan. Ili ora woliʼ cʼʌn i Yalobil, Jesucristo, chaʼan miʼ chaʼlen yumʌntel. Jehová mach bʌ añic i pʼisol i pʼʌtʌlel miʼ qʼuel pejtelel chuqui miʼ yujtel yicʼot tojʌch chuqui miʼ mel, i cheʼ jaʼel jiñi i Yalobil.